ᐃᑲᔪᖅᑐᐃᓂᖃᕈᑎᑎᒍᑦ ᓄᓇᕕᖕᒥ ᒪᒃᑯᒃᑐᓂᒃ ᐃᑲᔪᖅᑐᐃᓂᖃᖅᐳᑦ ᐃᓕᓐᓂᐊᕈᑎᒥᓐᓂᒃ ᑲᔪᓯᒋᐊᖅᓯᒪᑎᑦᓯᖁᓪᓗᒋᑦ

ᐃᑲᔪᖅᑐᐃᓯᒪᓕᕆᐊᕐᓂᖅ ᓄᓇᕕᒃᒥ ᑕᑯᒃᓴᐅᓕᖅᑎᑦᑎᒋᐊᖅᓯᒪᕗᖅ ᒪᒃᑯᒃᑐᖏᓂᒃ ᐃᓄᐃᑦ ᖁᕝᕙᖅᑎᑦᓯᒋᐊᕐᓂᕐᒥᓐᓂ ᑲᔪᓯᒋᐊᕈᓐᓇᕐᓂᖏᓂᒃ ᐃᓕᓐᓂᐊᕈᑎᒥᓐᓂᒃ ᐊᒻᒪᓗ ᐃᓅᓯᕆᔭᒥᓐᓂᒃ.

ᐃᓕᓐᓂᐊᕈᑎᒥᓐᓂᒃ ᑲᔪᓯᒋᐊᕈᓐᓇᕐᓂᖅ ᐅᓪᓗᖁᑎᖏᓄᑦ ᐃᑲᔪᖅᑐᐃᓯᒪᓕᕆᐊᕈᑎᐅᕗᑦ ᓄᓇᕕᒻᒥᐅᑦ ᐊᒥᖅᑲᕈᑎᖃᖁᓪᓗᒋᑦ ᓇᖕᒥᓂᖅ ᐅᓂᒃᑳᒃᓴᒥᓐᓂᒃ ᑲᔪᓯᒋᐊᕈᓐᓇᕐᓂᕐᒥᑎᒍᑦ ᐊᓂᒍᐃᓯᒪᓕᓚᐅᕐᓂᕐᒥᓐᓄᑦ ᐃᑲᔪᕈᑎᐅᓕᕐᓂᐊᖁᓪᓗᒋᑦ ᐃᓕᓐᓂᐊᖅᑐᐃᑦ ᓄᓇᕕᒃᒥᐅᑦ ᐃᓕᓐᓂᐊᕈᑎᒥᓐᓂᒃ ᑲᔪᓯᒋᐊᖅᑎᑕᐅᔪᓐᓇᖁᓪᓗᒋᑦ, ᐅᖃᖅᓱᓂ ᓯᑎᕙᓂ ᔮᒃᔅ, ᑐᓴᒐᒃᓴᓕᕆᔨᐅᔪᑦ ᑲᑎᕕᒃ ᐊᕕᒃᑐᖅᓯᒪᓂᖓᓂ ᒐᕙᒪᒃᑯᖏᓐᓄᑦ.

“ᐅᔾᔨᕈᓱᓕᖅᑎᑦᓯᒋᐊᕈᒪᒐᑦᑕ, ᑐᓴᖅᓴᐅᓕᕆᐊᕐᓗᑕ ᐊᒻᒪᓗ ᐆᒻᒪᐃᒋᐊᕈᑎᒃᓴᓂᒃ ᐱᑕᖃᓕᖅᑎᑦᓯᓗᑕ ᐊᑐᓕᖅᑎᑕᐅᖁᓪᓗᒋᑦ ᐊᑐᕐᓂᖃᖅᑑᓂᖏᑦ ᐃᓕᓐᓂᐊᕈᑎᒥᓐᓂᒃ ᑲᔪᓯᒋᐊᕈᓐᓇᕐᓂᐅᔪᓄᑦ ᐊᒻᒪᓗ ᐱᔭᕇᖅᓯᒪᓕᕈᓐᓇᕐᓂᖏᓐᓄᑦ,” ᔮᒃᔅ ᐅᖃᖅᓱᓂ. “ᓄᓇᕗᒻᒥᐅᓄᑦ ᐱᓕᕆᓂᖃᕐᕕᒃᓴᓂᒃ ᐱᑕᖃᓕᖅᑎᑦᑎᔪᒪᕗᒍᑦ ᐅᖃᓪᓚᐅᓯᖃᕐᕕᒋᔪᓐᓇᖅᑕᖏᓂᒃ ᖃᓄᕐᓕ ᑲᔪᓯᒋᐊᕈᓐᓇᓚᐅᕐᓂᕐᒥᓐᓄᑦ, ᓱᓇᑦ ᐱᔾᔪᑎᒋᓪᓗᒋᑦ ᑲᔪᓯᒋᐊᕈᓐᓇᓚᐅᕐᓂᕐᒥᓐᓄᑦ ᐊᒻᒪᓗ ᑕᒪᒃᑯᓂᖓ ᑐᓴᖅᑕᐅᔭᕆᐊᓕᖕᓂᒃ ᐃᓕᐅᖅᑲᐃᓯᒪᓕᕐᓗᑕ ᐃᓅᖃᑎᒌᑦ ᑐᓴᖅᑎᑦᑎᓯᒪᔾᔪᑎᖏᓄᑦ ᕖᔅᐳᒃᑎᒍᑦ ᐅᕝᕙᓘᓐᓃᑦ ᖃᓄᑐᐃᓐᓇᖅ ᑐᓴᐅᒪᓕᖅᑎᑦᓯᔪᒪᒍᑎᒃ ᐊᒥᖅᑲᕈᑎᒋᔭᐅᕙᓕᖁᓪᓗᒋᑦ.”

ᐃᑲᔪᖅᑐᐃᓕᕆᐊᕐᓂᖓᑦ ᓄᓇᕕᒃᒥ ᓯᕗᓕᖅᑎᐅᓪᓗᑎᒃ ᐱᓕᕆᓂᐅᕗᖅ ᐃᓱᒪᒃᑯᓐᓂᑦ (Esuma), ᑐᑭᓕᐅᕐᓂᐊᕐᓗᒍ ᑐᑭᖃᖅᑐᒥᒃ ᐃᓄᒃᑎᑐᑦ “ᐃᓱᒪᒋᔭᖃᕐᓂᖅ”. ᑖᒃᑯᐊ ᑎᒥᖁᑎᒋᔭᐅᔪᑦ, ᑐᕌᕐᕕᒃᓴᖃᖅᑎᑕᐅᕗᑦ ᐃᑲᔪᖅᑐᐃᓯᒪᓕᕆᐊᒥᒃ ᐃᓕᓐᓂᐊᕈᑎᒥᓐᓂᒃ ᐃᖏᕐᕋᑦᓯᐊᖅᑎᑦᓯᖁᔨᓕᕆᐊᒧᑦ, ᐱᒋᐊᖅᑎᑕᐅᓚᐅᖅᓯᒪᓪᓗᑎᒃ 2014-ᒥ ᐊᒥᓱᕐᓚᐅᓪᓗᑎᒃ ᐊᕕᒃᑐᖅᓯᒪᓂᕐᒥ ᑲᑐᔾᔨᖃᑎᒌᖑᔪᓂᑦ ᐃᓚᖃᖅᓱᑎᒃ ᑲᑎᕕᒃ ᐃᓕᓐᓂᐊᕐᓂᓕᕆᓂᕐᒧᑦ ᑲᑎᒪᔨᖏᓂᒃ, ᒪᑭᕕᒃ ᑯᐊᐳᕇᓴᖓᓂᒃ ᐊᒻᒪᓗ ᑐᓴᒐᒃᓴᓕᕆᔨᒃᑯᓐᓂᒃ ᑕᖅᕋᒥᐅᑦ ᓂᐱᖓᑦ ᑎᒥᖁᑎᖓᓐᓂᒃ, ᐊᒻᒪᓗ ᐊᓯᖏᓐᓂᒃ.

2018-ᒥ, ᐅᓂᒃᑳᓕᐊᕆᓯᒪᔭᖏᑦ ᓄᓇᕕᖕᒥ ᐃᓕᓐᓂᐊᕐᓂᓕᕆᓂᕐᒧᑦ ᑲᑎᒪᔨᖏᓂᑦ ᑲᑎᕕᒃ ᐃᓕᓴᕐᓂᓕᕆᓂᒃᑯᓐᓂᑦ ᑕᑯᒃᓴᐅᑎᑦᓯᓚᐅᕐᒪᑕ ᖁᑦᑎᖕᓂᖅᓴᓄᑦ ᐃᓕᓐᓂᐊᕌᓂᒍᑎᖃᖅᓯᒪᔪᑦ ᖁᑦᑎᖕᓂᕆᔭᖏᑦ ᓄᓇᕕᖕᒥ 25 ᐳᕐᓴᓐᑎᓪᓗᐊᖑᓕᕐᓂᖏᑕ, ᐃᓱᒪᒋᓗᒋᑦ 77 ᐳᕐᓴᓐᑎᐅᑎᓪᓗᒋᓪᓕ ᐊᓯᖏᓂ ᐃᓕᓐᓂᐊᕐᕕᖕᓂ ᐳᕌᕕᓐᓯᐅᔪᒥ.

ᐅᑭᐅᑕᒫᑦ ᐃᓕᓐᓂᐊᕐᕕᖕᓂ ᐃᓕᓐᓂᐊᕈᑎᒥᓐᓂᒃ ᑲᔪᓯᒋᐊᕈᓐᓇᕐᓂᖅ ᐅᓪᓗᖁᑎᖏᓄᑦ ᐃᑲᔪᖅᑐᐃᓕᕆᐊᕈᑎᐅᕙᒃᑐᑦ, ᐱᓕᕆᐊᖑᓯᒪᓕᖅᑐᒥ ᐊᕐᕕᓂᓕᖕᓄᑦ (6) ᐅᑭᐅᓄᑦ, ᐊᐅᓚᑦᓯᓂᐅᕗᖅ ᑯᐃᐸᒃ ᐳᕌᕕᓐᓯᓕᒫᖓᓂ, ᑭᓯᐊᓂᓗ ᔮᒃᔅ ᐅᖃᓚᐅᕐᐳᖅ ᐃᑲᔪᖅᑐᐃᓕᕆᐊᕈᑎᒃᓴᐅᓪᓗᑎᒃ ᑎᑎᕋᖅᑕᐅᓯᒪᔪᑦ ᐊᐅᓪᓚᖅᑎᑕᐅᕙᒃᑐᑦ ᒪᓐᑐᕆᐋᓪᒥᑦ ᐃᓚᐅᑎᑦᓯᓯᐊᖅᐸᖖᒋᓗᐊᕐᒪᑕ ᐊᔾᔨᒋᔭᐅᖖᒋᑦᑐᑎᒍᑦ ᐊᑐᖅᑕᐅᕙᒃᑐᓄᑦ ᓄᓇᕗᒻᒥᐅᑦ ᒪᒃᑯᒃᑐᖏᓂᑦ.

ᓲᕐᓗ, ᖃᕆᑕᐅᔭᑎᒎᕈᑎᒃᓴᐅᔪᑦ ᓱᒃᑲᔫᕙᖖᒋᓗᐊᕐᒪᑕ ᓄᓇᕕᖕᒥ, ᑕᒪᒃᑯᐊᓗ ᐱᔾᔪᑎᒋᓪᓗᒋᑦ ᐱᓕᕆᐊᒃᓴᐅᕙᒃᑐᑦ ᐊᔪᕐᓇᓕᖅᐸᖕᒪᑕ ᐃᓕᕆᐊᕆᓇᓱᒋᐊᒥᒃ, ᐊᒻᒪᓗ ᐊᐅᓪᓚᖅᑎᑦᓯᕙᓐᓂᖅ ᑎᑎᖅᑲᓂᐊᕐᕕᒃᑎᒍᑦ ᐊᑯᓂᐅᓂᖅᓴᐅᕙᖕᒥᖕᒪᑕ. ᐊᒻᒪᓗᒃᑲᓐᓂᖅ, ᑕᑯᓐᓇᖅᑕᐅᔪᒃᓴᐅᓪᓗᑎᒃ ᐱᓕᕆᐊᒃᓴᐅᔪᑦ ᐱᔾᔪᑎᖃᖅᑎᑕᐅᕙᖖᒋᓗᐊᕐᒪᑕ ᑐᕌᖓᑎᑕᐅᓯᒪᔪᓂᒃ ᐃᓄᖕᓄᑦ.

ᑕᐃᒪᓕ, ᐃᓱᒪ ᑎᒥᖁᑎᖓᑦ ᐃᑲᔪᖅᑐᐃᓂᖃᓕᖅᓯᒪᕗᑦ ᐃᓚᒋᔭᐅᖃᑕᐅᔪᐃᑦ ᐋᖅᑭᒃᓱᐃᓯᒪᖃᑦᑕᓕᖁᓪᓗᒋᑦ ᖃᓄᐃᓕᐅᖅᑎᑦᓯᓂᐅᕙᓐᓂᐊᖅᑐᓂᒃ ᑐᕌᖓᑎᑕᐅᓗᑎᒃ ᑲᔪᓯᒋᐊᖅᑎᑦᓯᔪᓐᓇᕐᓂᕐᒧᑦ ᐃᑲᔪᕐᓂᖃᕋᔭᖅᑐᓄᑦ ᓇᖕᒥᓂᖅ ᖃᓄᐃᓪᓚᑦᑖᕐᓂᐅᔪᓄᑦ, ᔮᒃᔅ ᐅᖃᖅᓱᓂ.

ᐃᓕᓐᓂᐊᕐᕖᑦ ᐅᕝᕙᓘᓐᓃᑦ ᓄᓇᓕᒋᔭᐅᔪᑦ ᐃᓚᒋᔭᐅᖃᑕᐅᔪᒪᔪᑦ ᐋᖅᑭᒃᓱᐃᓂᕐᒧᑦ ᐱᓕᕆᐊᖑᔪᒃᓴᐅᔪᓂᒃ ᐃᑲᔪᖅᑐᐃᓕᕆᐊᕈᑎᐅᓂᐊᕐᓗᑎᒃ ᑐᒃᓯᕋᐅᑎᖃᕈᓐᓇᖅᑎᑕᐅᕗᑦ ᑎᑭᓪᓗᒋᑦ $5,000-ᓄᑦ ᐃᓱᒪ ᑎᒥᖁᑎᖓᓐᓂᑦ. ᐅᑭᐅᑕᒫᑦ ᐱᓕᕆᐊᖑᕙᒃᑐᑦ ᐃᓚᖃᖅᑎᑕᐅᕙᒃᐳᑦ “ᑲᔪᓯᒋᐊᕈᓐᓇᕐᓂᕐᒧᑦ ᐊᒥᐊᒐᓕᐊᖑᕙᒃᑐᓂᒃ” ᐃᓕᓐᓂᐊᕐᕕᖕᓂ ᐃᒪᓐᓇ ᐃᓕᓐᓂᐊᖅᑐᐃᑦ ᑎᑎᕋᕈᓐᓇᖅᑎᑕᐅᕙᒃᓱᑎᒃ ᐃᓱᒪᒋᔭᒥᓐᓂᒃ ᐊᒻᒪᓗ ᑎᑭᓯᒪᓕᕐᕕᒋᔪᒪᔭᒥᖕᓂᒃ, “ᑎᑎᖅᑲᓂᒃ ᑐᓴᖅᑎᑦᓯᔾᔪᑎᓂᒃ” ᐱᓕᕆᐊᖅ ᓄᓇᕕᒻᒥᐅᓄᑦ ᑎᑎᕋᖅᑕᐅᕙᓐᓂᖏᓂᒃ ᐃᑲᔪᖅᑐᐃᓯᒪᓂᕐᒧᑦ ᒪᒃᑯᒃᑐᓄᑦ ᐊᒻᒪᓗ ᐊᔾᔨᒌᖖᒋᐅᖅᑐᓄᑦ ᐃᓅᖃᑎᒌᑦ ᑐᓴᐅᒪᖃᑦᑕᐅᑎᓕᕆᓂᕐᒥ ᐱᓕᕆᓂᐅᕙᒃᑐᓄᑦ.

ᑕᕝᕙᓂ ᐅᑭᐅᑦᑎᓐᓂ, ᓄᓇᕕᖕᒥ ᒪᒃᑯᒃᑐᑦ ᐃᖅᑲᓇᐃᔭᕐᓂᓕᕆᔨᖏᑦ ᑕᑯᒃᓴᐅᑎᑦᑎᖃᑦᑕᖅᐳᑦ ᐅᓂᒃᑳᕆᔭᐅᓯᒪᔪᓂᒃ ᐃᓕᓐᓂᐊᖅᑐᓂᑦ ᐊᒻᒪᓗ ᐃᓕᓴᐃᔨᐅᔪᓂ ᐃᓅᖃᑎᒌᑦ ᑐᓴᒐᒃᓴᓕᕆᓂᕐᒥ ᒪᒃᐱᕋᖁᑎᖏᓐᓂ “ᐃᓕᑕᕆᔭᐅᓯᒪᓕᖁᓪᓗᒋᑦ ᐊᒃᓱᕈᕈᑎᒋᓪᓗᒋᑦ ᐊᒻᒪᓗ ᑲᔪᓯᒋᐊᖅᑎᑦᓯᓪᓗᑎᒃ ᐱᓕᕆᓂᕆᓯᒪᔭᐅᔪᓂᒃ ᐃᓛᒃᑰᕐᓱᑎᒃ ᐃᓄᓐᓂᑦ ᐊᒻᒪᓗ ᑲᔪᖏᖅᓴᐃᓯᒪᓕᕈᑎᒋᒋᐊᖅᓱᒋᑦ ᓄᓇᕕᒻᒥᐅᓂᒃ ᒪᒃᑯᒃᑐᓂᒃ ᑲᔪᓯᒋᐊᖅᑎᑦᓯᔪᓐᓇᕐᓂᖏᑕᑦᑕᐅᖅ,” ᐅᖃᖅᓱᓂ ᐋᖅᑭᒃᓱᐃᔨᐅᔪᖅ ᓵᕐᓖᓐ ᒍᐃᓕᐊᒻᔅ.

ᐊᔪᐃᓐᓇᑕ ᐱᓕᕆᐊᒃᓴᐅᖕᒥᔪᖅ, ᑕᒪᑐᒪᓂ, ᓄᓇᕕᖕᒥ ᐃᓄᖏᓂᒃ ᑕᑯᒃᓴᐅᑎᑦᓯᖃᑦᑕᖁᔨᓕᖅᓯᒪᕗᑦ ᐃᓅᖃᑎᒌᑦ ᑐᓴᐅᒪᖃᑦᑕᐅᑎᓕᕆᔾᔪᑎᖏᑎᒍᑦ ᖃᓄᖅ ᐃᓅᓯᕐᒥᓐᓂ ᑲᔪᓯᒋᐊᕈᑎᖃᖅᐸᓐᓂᕐᒥᓐᓄᑦ ᐱᔾᔪᑎᖃᖅᑐᓂᒃ.

ᐃᑲᔪᖅᑐᐃᓕᕆᐊᕈᑎᐅᔪᑦ 2022-ᒥ ᑐᕌᖓᑎᑕᐅᓯᒪᕗᑦ “ᑲᔪᓯᒋᐊᕈᓐᓇᕐᓂᖅ: ᐃᓕᖅᑯᓯᕆᒐᑦᑎᒍ.”

“ᐃᓄᐃᑦ ᓴᖖᒋᔪᐊᓘᖕᒪᑕ ᐊᓐᓇᐅᒪᔪᓐᓇᑦᓯᐊᖅᑑᓪᓗᑎᒃ,” ᐅᖃᖅᓱᓂ ᐋᖅᑭᒃᓱᐃᔨ ᓯᐅᓪᕕᐊ ᑯᓘᑦᑎᐄ.

“ᑕᐃᒪᓕ ᐃᓕᓐᓂᐊᕐᕕᖕᓂ ᑲᔪᓯᒋᐊᕈᓐᓇᕐᓂᐅᔪᓄᑦ ᐱᔾᔪᑎᖃᖅᑐᓂᒃ ᑕᑯᓐᓇᓕᓚᐅᕋᑦᑕ ᖁᕝᕙᖅᑎᑦᓯᒋᐊᕈᑎᒋᓂᐊᕐᓗᒋᑦ ᐃᓄᐃᑦ ᑲᔪᓯᒋᐊᕈᓐᓇᕐᓂᖏᓂᒃ.”

ᑯᓘᑦᑎᐄ ᐆᒃᑐᕋᐅᑎᖃᓚᐅᕐᐳᖅ ᐊᖑᓇᓱᐊᖅᐸᓐᓂᐅᔪᓂᒃ. ᐊᔪᖖᒋᓐᓂᕆᔭᐅᒻᒪᑦ ᐊᑯᓂᐊᓗᒃᓗ ᐃᓕᓯᒪᓇᓱᐊᕈᑎᐅᕙᒃᓱᓂ, ᑭᓯᐊᓂᓗᑦᑕᐅᖅ ᑭᖑᓂᐊᓂ ᐊᖏᔪᐊᓗᖕᒥᒃ ᐱᓯᒪᓕᕈᑎᐅᕙᒻᒪᑦ ᐊᔪᕈᖕᓃᖅᑕᐅᓯᒪᓕᑐᐊᕌᖓᒥ.

“ᐅᑎᕌᖓᒥᒃ ᐊᖑᓇᓱᐊᕆᐊᖅᓯᒪᓚᐅᖅᓱᑎᒃ ᓂᕆᔭᒃᓴᖃᖅᑎᑦᓯᓯᒪᓕᖅᐸᒃᑐᑦ ᐃᓚᒋᔭᒥᓐᓂᒃ, ᐃᓄᑐᖃᕆᔭᐅᔪᓂᒃ ᓄᓇᓕᐅᔪᒥ ᓂᕆᔭᒃᓴᖃᓕᖅᑎᑦᓯᕙᒃᑐᑦ. ᐊᒥᖅᑲᕈᑎᖃᕐᓂᖅ ᖁᕕᐊᓇᖅᑑᖕᒪᑦ,” ᐅᖃᖅᓱᓂ.

ᑯᓘᑦᑎᐄ ᐅᖃᓚᐅᕐᐳᖅ ᐊᔪᕐᓇᓕᖅᐸᖕᒪᑦ ᐱᔭᕆᑐᔫᕙᒃᓱᓂ ᓄᓇᕕᒻᒥᐅᑦ ᑐᓂᓯᓯᒪᓕᖅᑎᒋᐊᖅᓱᒋᑦ ᑕᕐᕆᔭᒐᒃᓴᓕᐊᕆᓯᒪᔭᒥᓐᓂᒃ ᐅᓂᒃᑳᕆᓪᓗᒋᑦ ᑲᔪᓯᒋᐊᕈᓐᓇᕈᑎᒋᓯᒪᔭᒥᓐᓄᑦ.

“ᐃᓄᐃᑦ ᐱᐅᔪᕆᖖᒋᒻᒪᕆᒃᑐᒥᒃ ᐃᓕᖅᑯᓯᖃᕐᒪᑕ, ᑕᐃᒪᓗ ᑕᒪᓐᓇ ᐱᔾᔪᑎᒋᓪᓗᒍ ᐃᓛᓐᓂ ᐃᓄᐃᑦ ᐃᓱᒪᒋᔭᐅᓕᕈᒪᖖᒋᑦᓱᑎᒃ ᐱᐅᔪᕆᔪᐊᓘᓂᒥᓐᓂᒃ ᐱᑦᑕᐃᓕᒍᑎᒋᕙᖕᒪᒋᑦ,” ᐅᖃᖅᓱᓂ.

“ᑭᓯᐊᓂᓗ ᑕᒪᓐᓇ ᐊᒥᖅᑲᕈᑎᖃᕈᓐᓇᕐᓂᕐᒧᑦ ᐱᓕᕆᓂᐅᓯᒪᖕᒪᑦ, ᒪᒃᑯᒃᑐᖁᑎᕗᑦ ᐃᑲᔪᖅᑐᒐᐅᓯᒪᓕᖁᓪᓗᒋᑦ ᑲᔪᓯᒋᐊᕈᓐᓇᕐᓂᕐᒥᓐᓂᒃ ᑕᐅᑐᖔᓕᖁᓪᓗᒋᑦ ᓲᕐᓗ ᑕᐃᔅᓱᒪᓂᑐᖃᖅ ᑲᔪᓯᒋᐊᕈᓐᓇᕐᓂᕆᕙᓚᐅᖅᑕᑦᑎᑐᑦ.”

​​ᑕᕝᕙᓂ ᐅᑭᐅᒥ ᐃᓕᓐᓂᐊᕈᑎᒥᓐᓂᒃ ᑲᔪᓯᒋᐊᕈᓐᓇᕐᓂᖅ ᐅᓪᓗᖁᑎᖏᓄᑦ ᐃᑲᔪᖅᑐᐃᓂᖅ ᐱᓕᕆᐊᖑᓚᐅᕐᐳᖅ ᕕᑉᕈᐊᕆ 14-ᒥᑦ 18-ᒧᑦ.