ᐃᒡᓗᒃᓴᖃᖅᑎᑦᑎᓂᖅ ᐱᒻᒪᕆᐅᓪᓗᓂ ᓯᕗᓐᓕᐅᔾᔭᐅᖁᔭᐅᕗᖅ $2.5B ᑮᓇᐅᔭᑦ ᐊᑐᖅᑐᒃᓴᑦ

ᑮᓇᐅᔭᓕᕆᔨᒃᑯᑦ ᒥᓂᔅᑕᖓ ᐅᖃᖅᐳᖅ ᐊᑐᕈᒪᓂᖓᓂ ᑮᓇᐅᔭᑦ ᐊᑐᖅᑐᒃᓴᑦ ᐊᒥᐊᒃᑯᓂ ᐃᒡᓗᒃᓴᖃᖅᑎᑦᑎᒃᑲᓐᓂᕐᓂᕐᒥ

ᑮᓇᐅᔭᓕᕆᔨᒃᑯᑦ ᒥᓂᔅᑕᖓ ᓗᐊᓐ ᑯᓱᒐᖅ ᐅᖃᖃᑎᖃᖅᐳᖅ ᑐᓴᒐᒃᓴᓕᕆᔨᒃᑯᓐᓂ ᐃᖃᓗᖕᓂ ᒪᐃ 26−ᒥ before ᓴᖅᑭᑎᑦᑎᓚᐅᖅᑳᕋᓂ ᒐᕙᒪᒃᑯᑦ 2022-23−ᒥ ᑮᓇᐅᔭᑦ ᐊᑐᖅᑐᒃᓴᓂ. (ᐊᔾᔨᓕᐅᖅᑕᐅᔪᖅ ᐃᒪ ᑐᕌᓐᑐᕐᒧᑦ)

By ᑕᐃᕝ ᓛᒃᕼᐃᐊᑦᒧᑦ

For English version, see Housing is a key priority in Nunavut’s $2.5B budget

ᓯᕗᓪᓕᖅᐹᖅ ᑐᒃᓯᕋᖅᑕᐅᔪᖅ ᑮᓇᐅᔭᑦ ᐊᑐᖅᑐᒃᓴᓂ ᓄᓇᕘᑉ ᓄᑖᖑᔪᓂ ᓂᕈᐊᖅᑕᐅᓯᒪᔪᓂ ᒪᓕᒐᓕᐅᖅᑎᖏᓐᓂ ᑕᐅᑐᒃᑕᑐᐊᖃᑲᐃᓐᓇᓚᐅᖅᐳᑦ ᐃᒡᓗᒃᓴᖃᖅᑎᑦᑎᓂᕐᒥ, ᐃᓚᖃᖅᑐᒥ $27 ᒥᓕᐊᓐᓂ ᓄᑖᓂ ᐃᓄᓕᒫᓄᑦ ᐊᒻᒪ ᐃᖅᑲᓇᐃᔭᖅᑎᐅᔪᓄᑦ ᐃᒡᓗᒃᓴᖏᓐᓄᑦ.

“ᐊᑕᐅᓯᐅᔪᖅ ᐊᖏᓛᖑᔪᓂ ᐱᖃᙱᓗᐊᕐᓂᑦᑎᓐᓂ ᓄᓇᕗᒻᒥ ᐃᒡᓗᒃᓴᖃᖅᑎᑦᑎᓂᐅᔪᒥ,” ​​ᑮᓇᐅᔭᓕᕆᔨᒃᑯᑦ ᒥᓂᔅᑕᖓ ᓗᐊᓐ ᑯᓱᒐᖅ ᐅᖃᓚᐅᖅᐳᖅ ᑮᓇᐅᔭᑦ ᐊᑐᖅᑐᒃᓴᓄᑦ ᐅᖃᓪᓚᖕᓂᕆᓚᐅᖅᑕᖓᓂ ᑐᓂᓚᐅᖅᑕᒥᓂ ᒪᐃ 26−ᒥ ᒪᓕᒐᓕᐅᕐᕕᖕᒥ.

ᓄᓇᕘᑉ 2022-23 ᑮᓇᐅᔭᑦ ᐊᑐᖅᑐᒃᓴᖏᑦ ᑐᒃᓯᕋᖅᐳᑦ $2.58 ᐱᓕᐊᓐᓂ ᐊᑐᕐᓂᐊᖅᑐᓂ ᑕᒪᑐᒪᓂ ᑮᓇᐅᔭᓕᕆᓂᕐᒧᑦ ᐊᕐᕌᒍᒥ, ᐃᓚᒋᐊᖅᓯᓚᐅᖅᑐᒥ $2.62 ᐱᓕᐊᓐᓂ ᓂᕆᐅᒋᔭᐅᔪᓂ ᑮᓇᐅᔭᖅᑖᕆᔭᐅᕙᓪᓕᐊᔪᓂ.

ᑮᓇᐅᔭᑦ ᐊᑐᖅᑐᒃᓴᑦ ᐃᓗᓕᖃᕆᕗᑦ $75 ᒥᓕᐊᓐᓂ ᓯᕗᓂᒃᓴᒧᑦ ᑮᓇᐅᔭᓂ ᐊᑐᖅᑐᒃᓴᓂ ᐊᑐᖅᑕᐅᓇᔭᖅᑐᓂ ᑐᐊᕕᕐᓇᖅᑐᒥ ᐊᑐᖅᑕᐅᓂᖓᓂ

ᓄᕙᒡᔪᐊᕐᓇᖅ-19 ᐊᒥᓱᓄᑦ ᖃᓂᒻᒪᓐᓇᐅᔪᒥ ᒥᒃᖠᒋᐊᖅᑎᑦᑎᓚᐅᕐᒪᑦ ᐊᖏᓂᖓᓂ ᐱᓕᕆᐊᖑᓂᐅᔪᓂ ᓄᓇᕗᒻᒥ ᒐᕙᒪᒃᑯᑦ ᑮᓇᐅᔭᖃᖅᑎᑦᑎᔪᓐᓇᓚᐅᙱᓚᑦ ᑭᖑᓪᓕᐅᔪᒥ ᑮᓇᐅᔭᓕᕆᓂᕐᒧᑦ ᐊᕐᕌᒍᖓᓂ, ᒫᓐᓇ ᓇᓚᐅᑦᑖᕆᕗᑦ ᐊᐅᓚᑕᐅᓂᖓᓂ ᑮᓇᐅᔭᓂ ᐊᒥᐊᒃᑯᓂ $40 ᒥᓕᐊᓐᓂ ᑕᒪᑐᒪᓂ ᐊᕐᕌᒎᔪᒥ. ᑕᐃᓐᓇ ᐊᒥᐊᒃᑯᖓ ᐅᑎᕐᔭᕆᐊᕐᓂᐅᕗᖅ ᐊᕐᕌᓂᓂ $31 ᒥᓕᐊᓐᓂ ᑮᓇᐅᔭᐃᑦ ᖄᖏᐅᑎᓂᖏᓐᓂ.

ᑭᓯᐊᓂ ᐊᑭᐅᔪᓂ ᐃᒡᓗᓕᐅᕐᓂᕐᒧᑦ ᓄᓇᕗᒻᒥ ᑎᑭᐅᑎᓂᖏᓐᓂ $1 ᒥᓕᐊᓐᓂ ᐊᑐᓂ ᐃᒡᓘᔪᒧᑦ, ᑯᓱᒐᖅ ᐅᖃᐅᔾᔨᓚᐅᖅᐳᖅ ᑐᓴᒐᒃᓴᓕᐅᖅᑎᓂ ᓯᕗᓂᐊᓂ ᐅᖃᓪᓚᖕᓂᕆᔭᖓᓂ ᒐᕙᒪᒃᑯᑦ ᐊᒥᐊᒃᑯᖏᓐᓂ ᖄᒃᑲᓐᓂᐊᒍᑦ ᐃᒡᓗᒃᓴᓄᑦ ᐊᑑᑎᖃᑦᑎᐊᖅᐳᖅ.

“ᐱᐅᕗᖅ ᓴᓇᓂᕐᒥ ᐊᒥᐊᒃᑯᓂ ᑭᓯᐊᓂ ᓴᓇᑐᐃᓐᓇᒐᒃᓴᐅᙱᓚᑦ ᐅᑯᓂᖓ ᐊᒥᐊᒃᑯᓂ ᐱᖃᑐᐃᓐᓇᕐᓂᕐᒧᑦ,” ᑯᓱᒐᖅ ᐅᖃᓚᐅᖅᐳᖅ.

“ᐱᔾᔪᑎᖃᕆᐊᖃᖅᐳᖅ ᑐᓄᐊᓂ.”

ᐅᖃᓪᓚᖕᓂᕆᔭᖓᓂ, ᑯᓱᒐᖅ ᓇᓗᓇᐃᖅᓯᓚᐅᖅᐳᖅ ᒐᕙᒪᖓ ᓴᖅᑭᑎᑦᑎᓛᕐᓂᖏᓐᓂ ᕿᓚᒻᒥᐅᔪᒥ ᑮᓇᐅᔭᓂ ᖄᖏᐅᑎᔪᓂ ᓯᕗᓂᒃᓴᒥ ᑮᓇᐅᔭᑦ ᐊᑐᖅᑐᒃᓴᓄᑦ ᑭᐅᓂᕐᒧᑦ ᐃᒡᓗᒃᓴᖃᙱᓗᐊᕐᓂᕐᒧᑦ ᑐᐊᕕᕐᓇᕐᓂᐅᔪᒥ.

ᑕᐃᓐᓇ ᑐᕌᒐᒃᓴᐅᔪᖅ ᑲᑎᖃᑎᖃᖅᑐᒥ 6−ᖓᓂ ᒪᓕᒐᓕᐅᕐᕕᐅᑉ ᐱᓕᕆᐊᒃᓴᖏᓐᓂ, ᑲᑐᔾᔨᓗᑕ, ᐊᖏᖅᓯᒪᓂᖃᖅᑐᒥ ᓴᓇᓂᕐᒧᑦ 1,000−ᓂ ᐃᒡᓗᒃᓴᓂ ᑲᑎᙵᓂᐅᔪᓂ ᐊᕐᕌᒍᑦ−ᑎᓴᒪᓂ ᐱᓕᕆᓂᖓᓂ.

ᐊᓯᖏᓐᓂ ᓇᖢᓇᐃᖅᑕᐅᓂᐅᔪᓂ ᐊᑐᖅᑕᐅᓂᖓᓂ ᐸᕐᓇᐅᑎᒥ ᑎᒃᑯᐊᕆᕗᖅ ᐱᓕᕆᐊᒃᓴᐅᔪᒥ ᓯᕗᓪᓕᐅᔾᔭᐅᖁᔭᐅᔪᓂ ᐃᓚᖃᖅᑐᒥ ᐃᓐᓇᕈᖅᐸᓪᓕᐊᓂᕐᒥ ᐅᐱᒋᓂᖃᕐᓗᑎᒃ, ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐊᒻᒪ ᒪᒥᓴᕐᓂᕐᒥ, ᐃᓕᓐᓂᐊᕐᓂᕐᒥ ᐊᒻᒪ ᐊᔾᔨᒌᙱᑎᑦᑎᓂᐅᔪᒥ ᓄᓇᓕᖕᓂ ᑮᓇᐅᔾᔭᒃᓴᓂᐅᔪᓂ.

$27 ᒥᓕᐊᓐᓂ ᓴᓂᕐᕙᒃᑕᐅᓯᒪᔪᓂ ᐃᒡᓗᒃᓴᓄᑦ, $21 ᒥᓕᐊᓐ−ᖓᓂ ᑐᕌᕐᓂᐊᖅᐳᖅ ᓄᑖᓄᑦ ᐃᓄᓕᒫᓄᑦ ᐃᒡᓗᒃᓴᓄᑦ, $6 ᒥᓕᐊᓐᓂ ᐃᖅᑲᓇᐃᔭᖅᑎᓄᑦ ᐃᒡᓗᒃᓴᖏᓐᓄᑦ. ᐃᓚᒋᔭᐅᕗᖅ $51.5 ᒥᓕᐊᓐᓂ ᑲᑎᓪᓗᒍ ᒐᕙᒪᒃᑯᑦ ᑐᒃᓯᕋᕐᓂᖏᓐᓂ ᐊᑐᕐᓂᐊᕐᓂᕐᒧᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ, ᑯᓱᒐᖅ ᐅᖃᓚᐅᖅᐳᖅ ᐅᖃᓪᓚᖕᓂᖓᓂ.

ᖄᒃᑲᓐᓂᐊᒍᑦ $1.5 ᒥᓕᐊᓐᓂ ᑐᒃᓯᕋᖅᑕᐅᕗᖅ ᐊᖏᕐᕋᖃᙱᑦᑐᓄᑦ ᐱᒋᐊᕈᑕᐅᔪᓄᑦ, ᓲᕐᓗ ᓅᑉᐸᓪᓕᐊᓂᕐᒥ ᐃᒡᓗᒃᓴᓄᑦ ᐊᒻᒪᓗ ᐃᑯᕐᕋᖅ ᐃᒡᓗᕋᓛᓂ ᓴᓇᓂᖏᓐᓂ ᐱᓕᕆᐊᖑᔪᒥ. ᑕᐃᒪᓐᓇᑦᑕᐃᓐᓇᖅ ᐊᖏᓂᖓᓂ ᓴᓂᕐᕙᒃᑕᐅᓯᒪᕗᑦ ᐃᓚᒌᓄᑦ ᐋᓐᓂᖅᓯᕆᓂᐅᕙᒃᑐᓄᑦ ᑮᓇᐅᔭᖃᖅᑎᑕᐅᓂᖏᓐᓂ.

ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ, ᑮᓇᐅᔭᑦ ᐊᑐᖅᑐᒃᓴᑦ ᑐᒃᓯᕋᖅᐳᑦ ᑮᓇᐅᔭᖃᖅᑎᑦᑎᓂᐅᔪᒥ 75−ᓄᑦ ᓄᑖᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ-ᐸᖅᑭᓂᐅᔪᒥ ᐃᓂᐅᔪᓄᑦ, $2.1 ᒥᓕᐊᓐᓂ 31−ᓄᑦ ᐃᓅᓕᓴᖅᑕᐅᓂᕐᒧᑦ ᐊᐅᓪᓛᕐᓂᕐᒧᑦ ᑎᑎᕋᖅᑎᐅᔪᓂ ᐱᐅᓯᒋᐊᖅᑎᑦᑎᓂᕐᒥ ᐱᔨᑦᑎᕋᕐᓂᕐᒥ ᐃᓅᓕᓴᖅᑕᐅᓂᕐᒧᑦ ᐊᐅᓪᓛᕐᓂᐅᔪᒧᑦ.

ᐃᓄᑐᖃᕐᓄᑦ ᐸᖅᑭᔭᐅᓂᖏᓐᓄᑦ, ᑯᓱᒐᖅ ᐅᖃᓚᐅᖅᐳᖅ ᒐᕙᒪᖓ ᑲᑎᖅᓱᕐᓂᐊᕐᓂᖏᓐᓂ ᑮᓇᐅᔭᓂ ᑐᖅᑯᖅᑕᐅᓯᒪᓗᑎᒃ ᐱᕈᖅᐸᓪᓕᐊᑎᑕᐅᓗᑎᒃ $19 ᒥᓕᐊᓐᓂ ᓇᑉᐸᖅᑎᕆᓂᕐᒧᑦ ᑲᖏᖅᖠᓂᕐᒥ ᐊᑯᓂᐅᔪᒥ ᐸᖅᑭᕝᕕᒋᔭᖓᓂ.

ᑮᓇᐅᔭᑦ ᐊᑐᖅᑐᒃᓴᑦ ᑐᒃᓯᕋᕆᕗᑦ ᒪᕐᕉᖕᓂ ᓄᑖᖑᔪᓂ ᐃᓂᒃᓴᐅᔪᓂ ᒐᕙᒪᓕᕆᔨᒃᑯᓐᓄᑦ ᓴᖅᑭᑎᑦᑎᓂᖏᓐᓂ ᐃᓄᑐᖃᕐᓂ ᐸᖅᑭᔭᐅᓂᖓᓂ ᐸᕐᓇᒍᑎᒃᓴᒥ ᐊᒻᒪ ᐊᑐᓕᖅᑎᑕᐅᓂᖓᓂ ᐸᕐᓇᐅᑎᒥᒃ.

ᐃᓕᓐᓂᐊᖅᑐᓕᕆᔨᒃᑯᓐᓂ, ᑮᓇᐅᔭᑦ ᐊᑐᖅᑐᒃᓴᑦ ᑐᒃᓯᕋᖅᐳᑦ $2.5 ᒥᓕᐊᓐᓂ ᐃᖅᑲᓇᐃᔮᖅᑎᑦᑎᓂᕐᒥ 25−ᓂ ᐃᖅᑲᓇᐃᔭᖅᑎᓂ ᐃᓚᖃᖅᑐᒥ ᐃᓕᓐᓂᐊᕐᕕᖕᒥ ᐃᓅᓯᓕᕆᔨᐅᔪᓂ, ᐊᓪᓚᕝᕕᓕᕆᓂᕐᒥ ᐃᑲᔪᖅᓯᐅᔪᓂ ᐊᒻᒪ ᓴᓗᒻᒪᖅᓴᐃᔨᐅᔪᓂ.

ᐃᑲᔪᕐᓂᕐᒧᑦ ᐊᔾᔨᒌᙱᑎᑦᑎᓂᕐᒥ ᓄᓇᓕᖕᓂ ᑮᓇᐅᔾᔭᒃᓴᓂᐅᔪᓂ, ᑯᓱᒐᖅ ᐅᖃᓚᐅᖅᐳᖅ ᒐᕙᒪᖓ ᐸᕐᓇᒃᐳᑦ ᑲᑎᖅᓱᕐᓂᐊᕐᓂᖏᓐᓂ ᑮᓇᐅᔭᓂ ᑐᖅᑯᖅᑕᐅᓯᒪᓗᑎᒃ ᐱᕈᖅᐸᓪᓕᐊᑎᑕᐅᓗᑎᒃ $17.2 ᒥᓕᐊᓐᓂ ᕙᐃᐸᒥ ᐱᓕᕆᐊᒃᓴᐅᔪᒥ ᑐᕌᖓᓂᖃᖅᑐᒥ ᑐᓂᓯᓂᕐᒥ ᖁᑦᑎᒃᑐᒥ−ᓱᒃᑲᔪᒥ ᐋᑉᑎᒃ ᖃᕋᓴᐅᔭᒃᑰᕈᓐᓇᕐᓂᐅᔪᒥ ᓄᓇᕗᒻᒧᑦ 2025 ᑎᑭᓐᓇᓱᐊᕐᓂᖓᓂ.

ᑯᓱᒐᖅ ᐅᖃᓚᐅᖅᐳᖅ ᒐᕙᒪᖓ ᑐᒃᓯᕋᕆᕗᖅ ᑐᓂᓯᓂᕐᒥ $500,000−ᒥ ᓄᓇᕗᒻᒥ ᒐᕙᒪᒃᑯᑦ ᓄᓇᒥᙶᖅᑐᒥ ᐆᒻᒪᖅᑯᑎᓄᑦ ᐃᑲᔪᖅᓱᐃᓂᕐᒥ ᐱᓕᕆᐊᖑᔪᒥ. ᐱᓕᕆᐊᖑᔪᖅ ᑐᓂᓯᕙᒃᐳᖅ ᑐᓂᕐᕈᑎᓂ ᐃᒡᓗᕋᓛᓂ ᓇᖕᒥᓂᖃᖅᑎᐅᔪᓄᑦ ᐃᓕᓯᓂᕐᒥ ᓄᓇᒥᙶᖅᑐᒥ ᐆᒻᒪᖅᑯᑎᒥ, ᓲᕐᓗ ᓯᕿᓂᕐᒥ ᐆᒻᒪᖅᑯᑎᖃᕐᓂᐅᔪᒥ.

ᐊᓯᖏᓐᓂ ᓇᓗᓇᐃᖅᑕᐅᓯᒪᔪᓂ ᑐᒃᓯᕋᖅᑕᐅᔪᒥ ᑮᓇᐅᔭᑦ ᐊᑐᖅᑐᒃᓴᓄᑦ ᐃᓚᖃᖅᐳᖅ:

  • $2.8 ᒥᓕᐊᓐᓂ ᐃᖅᑲᓇᐃᔮᖃᖅᑎᑦᑎᓂᕐᒥ 28−ᓂ ᓄᑖᓂ ᐃᖅᑲᓇᐃᔭᖅᑎᐅᔪᓂ ᐋᖅᑭᒋᐊᕐᕕᒃ ᐃᑲᔪᖅᑕᐅᕕᖕᒥ ᒪᒥᓴᕐᕕᐅᔪᒥ
  • $1.5 ᒥᓕᐊᓐᓂ ᐃᑲᔪᕐᓂᕐᒧᑦ ᐊᑐᓕᖅᑎᑦᑎᓂᕐᒥ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᒪᓕᒐᖓᓐᓂ
  • $1.7 ᒥᓕᐊᓐᓂ ᓄᓇᕗᒻᒥ ᒪᒃᑯᒃᑐᓂ ᐃᓚᐅᖃᑕᐅᓂᖏᓐᓂ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᐅᔪᓂ
  • $1.4 ᒥᓕᐊᓐᓂ ᐅᓄᕐᓂᖅᓴᐅᔪᓂ ᐃᓕᓐᓂᐊᕐᕕᖕᓄᑦ ᐸᓯᖃᕐᓂᐅᔪᒥ ᓄᓇᕗᒻᒥ

ᐊᓂᒍᖅᑕᐅᓚᐅᙱᓐᓂᖓᓂ, ᓄᓇᕗᒻᒥ ᒪᓕᒐᓕᐅᖅᑏᑦ ᕿᒥᕐᕈᓂᐊᖅᐳᑦ ᑐᒃᓯᕋᖅᑕᐅᔪᒥ ᑮᓇᐅᔭᑦ ᐊᑐᖅᑐᒃᓴᓂ ᑎᑭᑉᐸᓪᓕᐊᔪᓂ ᐱᓇᓱᐊᕈᓯᐅᔪᓂ ᑲᑎᒪᔨᕋᓛᓂ ᑲᑎᒪᓂᐅᔪᓂ ᐊᑐᓂ ᒐᕙᒪᒃᑯᓐᓂ ᐱᓕᕆ−ᕕᐅᔪᓂᑦ.

– ᑎᑎᖅᑲᖁᑕᐅᔪᓂ ᐃᒪ ᑐᕌᓐᑐᕐᒥ

Share This Story

(0) Comments