ᐃᖃᓗᖕᓂ ᓄᓇᓕᒃ ᐅᓂᒃᑳᓕᐅᖅᑎ ᐅᖃᐅᓯᖃᕐᑐᖅ ᐅᓇᑕᕕᒡᔪᐊᕐᓇᒥᒃ, ᓇᒡᓕᒍᓱᒃᓯᒪᓂᕐᒥᒃ ᐊᒻᒪᓗ ᐋᕗᕆᑲᒥ ᓯᕗᕚᖃᕐᓂᖓᓂᒃ ᓯᕗᓪᓕᖅᐹᒥ ᐅᖃᓕᒫᒐᓕᐊᖓᓂ

For English version, see Iqaluit teacher explores war, love and African lineage in first book

ᓯᕗᓪᓕᖅᐹᖓᓂ ᑎᑎᕋᖅᐸᓪᓕᐊᓕᖅᖢᓂ ᖁᓕᑦ ᐊᕐᕌᒍᑦ ᓯᕗᓂᐊᓂᒃ ᐋᓚᓐ ᕗᐃᐊᑉ ᐅᖃᓕᒫᒐᓕᐊᒥᓂ ᓴᖅᑭᑎᑦᑎᕗᖅ

“ᐅᓇ ᐅᓂᒃᑳᖅ ᐊᑯᓂᐊᓗ ᐃᓱᒪᒋᓯᒪᒐᒃᑯ,” ᐅᖃᕐᑐᖅ ᐊᐱᕐᓱᖅᑕᐅᑎᓪᓗᒍ ᓄᕕᐱᕆ 16-ᒥ ᐃᖃᓗᖕᓂ ᑳᕕᑐᕆᐊᕐᕕᒃᒥ.

ᕗᐃᐊᑉ ᔨᒻᐹᑉᕗᐃᒥᐅᑕᕕᓂ ᑲᓇᑕᒥᐅᑕᐅᓕᕐᑐᖅ ᐃᖃᓗᖕᓂ ᓄᓇᖃᓕᖅᖢᓂ ᖁᓕᓂ ᐊᕐᕌᒍᓂ ᑲᓇᑕᒥᐅᑕᐅᓯᒪᓕᖅᖢᓂ ᐊᕐᕌᒍᓂ 22-ᓂ. ᐅᖃᓕᒫᒐᓕᐊᖓ Once Upon A Time in Zimbabwe ᓄᕕᐱᕆ 9-ᒥ ᓴᖅᑭᑕᐅᓚᐅᕐᓯᒪᔪᖅ.

ᐅᓇ ᐅᓂᒃᑳᓕᐊᕆᓯᒪᔪᖅ ᐅᖃᐅᓯᖃᙳᐊᖅᖢᓂ ᕗᐃᐊᑉ ᑎᑎᕋᐅᓯᕆᔭᖓᓂᒃ ᔫᓴᕝ ᑖᓂᐅᔅᒥ, ᔨᒻᐹᑉᕗᐃᒥ ᐃᓅᓂᑯ 1980-ᒥ. ᓯᕗᕚᖃᖅᖢᓂ ᐋᕗᕆᑲᒧᐊᕐᓂᑯᓂ ᐃᖕᓚᓐᒥ 1820-ᒥ. ᑖᓂᐅᔅ ᐃᓅᓯᕐᒥᓂ ᕿᒥᕐᕈᐊᕆᐊᖃᖅᖢᓂ 1990-ᖏᓐᓂ ᐊᑕᐅᓯᑦᑕᐃᓐᓇᓂᙶᖏᓐᓂᖓᓄᑦ. ᑖᓂᐅᔅ ᓇᑭᙶᕐᓯᒪᓂᕐᒥᓂ ᖃᐅᔨᓇᓱᒃᓯᒪᓪᓗᓂᐅ ᐋᕗᕆᑲ ᖃᓄᐃᑉᐸᓪᓕᐊᓂᖓᒍᑦ.

ᕗᐃᐊᑉ ᐅᖃᓚᐅᕐᑐᖅ ᐅᓂᒃᑳᖑᓂᖓᓂ ᓇᒡᓕᒍᓱᖕᓂᕐᒥᒃ, ᐅᓇᑕᕕᒡᔪᐊᕐᓇᒥᒃ, ᓵᓚᒃᓴᐅᑎᕕᓂᕐᓂᒃ ᐊᒻᒪᓗ ᑭᓇᐅᓂᕐᒧᑦ ᓇᓗᓇᐃᕐᓯᓯᒪᓂᕐᒥᒃ.

“ᑭᓯᐊᓂᓕ ᐅᓂᒃᑳᓕᐊᕋ ᐅᖃᐅᓯᖃᓗᐊᖅᑐᖅ ᑕᒪᑦᑕᑦᑎᐊ ᐃᓅᓂᑦᑎᓐᓂᒃ,” ᕗᐃᐊᑉ ᐅᖃᕐᑐᖅ.

“ᐅᓪᓗᖅ ᐱᐊᓂᒃᑳᖓᑦ ᓈᒻᒪᙱᓕᐅᕈᑎᖃᖃᑦᑕᖅᑐᒍᑦ ᑭᓯᐊᓂᓕ ᑕᒪᐅᓇᑦᑕᐃᓐᓇᖅ ᓱᓕ ᐊᔪᙱᕈᓘᔭᖅᐸᒃᖢᑕ.”

ᓯᕗᓪᓕᕐᒥ ᕗᐃᐊᑉ ᐅᖃᓚᐅᕐᑐᖅ ᑎᑎᕋᐅᓯᖃᕐᓂᐊᕐᓂᕋᖅᖢᓂ ᐅᕉᑎᓯᐊᒥ ᐅᓇᑕᕕᒡᔪᐊᕐᓇᕕᓂᕐᒥᒃ ᑕᐃᔅᓱᒪᓂᓕ ᔨᒻᐹᑉᕗᐃ ᐃᒻᒥᓂ ᐊᐅᓚᓕᕐᓂᑰᓪᓗᓂ ᐳᕆᑎᔅᑯᓐᓂ 1980-ᒥ.

ᕗᐃᐊᑉ ᐃᓚᐃᓚᐅᕐᓯᒪᖕᒪ ᓈᒻᒪᙱᓕᐅᕈᑎᖃᕐᑎᓪᓗᒋᑦ. ᑭᓯᐊᓂᓕ ᐅᖃᓚᐅᕐᑐᖅ ᐅᓂᒃᑳᓕᐅᕐᓂᐊᕈᓂᐅᑉ ᑕᐃᒪᓕ ᐃᑲᔫᑎᐅᔪᓐᓇᖁᓇᔭᖅᖢᓂᐅᒃ.

“ᑎᑎᕋᐅᓯᖃᔾᔮᙱᑦᑐᖓ ᐅᓇᑕᕕᒡᔪᐊᕐᓇᐅᓚᐅᕐᑐᒥᓐ,” ᕗᐃᐊᑉ ᐅᖃᕐᑐᖅ.

“ᑎᑎᕋᐅᓯᖃᕐᓂᐊᕋᒪᓕ ᐃᓅᓯᕆᕙᒃᑕᑦᑎᓐᓂ.”

ᕗᐃᐊᑉ ᑎᑎᕋᖃᑦᑕᕐᓂᖓ ᒪᑯᑎᒎᓇᐅᕙᒃᑐᖅ ᓇᐃᑦᑐᓂᒃ ᐅᖃᐅᓯᖃᕐᕕᒃᑯᑦ ᐊᒻᒪ ᓇᐃᑦᑐᓂᒃ ᐅᓂᒃᑳᓕᐊᑎᒍᑦ. ᐅᖃᓚᐅᕐᑐᖅ ᐱᖃᓐᓇᕆᔭᖏᓐᓄᑦ ᑎᑎᕋᖁᔭᐅᓯᒪᓪᓗᓂ ᑭᓯᐊᓂᓕ ᑕᒪᓐᓇ ᐅᖓᕙᕆᐊᕐᓯᒪᔭᖓ, ᐅᖃᖅᖢᓂ “ᐃᓄᕈᓗᑐᐃᓐᓇᐅᒐᒪ.”

“ᐅᕙᓐᓂ ᐅᒃᐱᕆᓗᐊᓚᐅᙱᓐᓇᒪ,” ᕗᐃᐊᑉ ᐅᖃᕐᑐᖅ.

ᑭᓯᐊᓂ ᐅᖃᒃᑲᓐᓂᖅᖢᓂ ᖃᑯᒍᙳᒃᑲᓐᓂᕐᑎᓪᓗᒍ ᓄᓕᐊᖓᑕ ᐅᖃᐅᑎᓪᓗᓂᐅᒃ ᑎᑎᕋᕆᐊᖃᕐᓂᖓᓂ ᐅᖃᓕᒫᒐᕐᒥ ᑎᑎᕋᕈᓐᓇᑦᑎᐊᕐᓂᖓᓄᑦ.

ᕗᐃᐊᑉ ᐱᓕᕆᓯᒪᔪᖅ ᐃᓄᓕᕆᔨᒃᑯᓐᓂᑦ ᐊᒻᒪ ᒪᓕᒐᓕᕆᔨᒃᑯᓐᓂᑦ.

ᐃᖅᑲᓇᐃᔮᖓᑕ ᐊᓯᐊᒍ ᐃᑲᔪᖃᑦᑕᖅᑐᖅ ᖃᔪᖅᑐᕐᕕᒃᒥ ᐊᒻᒪ ᐊᖏᕐᕋᖃᙱᑦᑐᒃᑯᕕᒃᒥ ᐅᑯᓄᖓ ᐅᖂᑕᖅ ᑲᑐᔾᔨᖃᑎᒌᓄᑦ ᒫᓐᓇᓗ ᑕᐃᒃᑯᓄᖓ ᑲᑎᒪᔨᐅᖃᑕᐅᓪᓗᓂ.

ᕗᐃᐊᑉ ᐅᖃᓚᐅᕐᒥᔪᖅ ᐃᓚᐅᓂᖓᓂ ᓄᓇᕗᒥᑦ ᕿᕐᓂᖅᑕᐃᑦ ᑲᑐᔾᔨᖃᑎᒌᓄᑦ ᐱᒋᐊᖅᑎᑦᑎᖃᑕᐅᓯᒪᓪᓗᓂ ᐅᑯᓂᖓ ᐋᕗᕆᑲ ᐊᒻᒪ ᑯᕆᐱᐊᓐ ᑲᑐᔾᔨᖃᑎᒌᓂᒃ ᓄᓇᕗᒥᑦ.

ᕗᐃᐊᑉ ᐅᖃᓕᒫᒐᓕᐊᖓ ᐊᑐᐃᓐᓇᐅᔪᖅ ᐋᒥᔮᓐᒥ, ᐋᐳᓪᒥ ᐊᒻᒪ ᒎᒍᓪ ᐱᓖᒥ.

ᐊᖃᓕᒫᒐᐃᑦ ᐊᑐᐃᓐᓇᐅᓪᓗᑎ ᑎᑭᓴᖅᑕᐅᓗᑎ ᐅᑯᓇᙵ ᕗᕇᓴᓐ ᐳᕋᔅᑯᓐᓂᒃ ᑖᒃᑯᐊᓕ ᓄᓇᕗᒧᑦ ᐊᐅᓪᓚᖅᑎᑦᑎᕙᙱᖢᑎᒃ.