ᐊᕐᕕᐊᕐᒥᐅᑕᑦ ᖁᕕᐊᓲᑎᖃᕐᑐᑦ ᐊᖑᓇᓱᒃᑎ ᖃᓄᐃᙱᖢᓂ ᐅᑎᕐᓂᖓᓂᒃ

For English version, see Arviat celebrates safe return of missing hunter

ᐊᕐᕕᐊᓂ ᓄᓇᖃᖅᑐᑦ ᖁᕕᐊᓲᑎᖃᓚᐅᕐᑐᑦ ᒪᐃ 12-ᒥ ᐊᖑᓇᓱᒃᑎ ᐊᑯᓂᕈᓗᒃ ᐊᓯᐅᓯᒪᓚᐅᖅᖢᓂ ᐊᖏᕐᕋᕐᒪᑦ ᖃᓄᐃᙱᖢᓂ.

ᐅᓄᒻᒪᕆᒃᑐᑦ ᒥᑦᑕᕐᕕᒃᒥ ᑕᐅᑐᓚᐅᕐᑐᑦ ᐅᓇ ᑖᒪᔅ ᕼᐃᐊᑕᓛᖅ ᐊᓕᑲᔪᐊ ᖁᓕᒥᒎᓕᒃᑯᑦ ᑎᑭᐅᔾᔭᐅᑎᓪᓗᒍ.

ᕙᐃᔅᐳᒃᑯᑦ ᓴᖅᑭᔮᑲᐅᑎᒋᔪᒥ ᐊᔾᔨᓕᐅᖅᑕᐅᔪᒥᒃ ᐊᓕᑲᓱᐊᑉ ᐅᑯᐊᖓᑕ ᓄᐊᒪ ᔩᓐ ᑲᑉᓗᑦᓯᐊᒃ ᐊᔾᔨᓕᐅᖅᑕᖓᓂᒃ ᐃᓄᒋᐊᑦ ᓴᖅᑭᔮᖅᑐᑦ ᒥᑦᑕᕐᕕᒃᒥ ᖁᕕᐊᓱᒃᖢᑎᒃ ᓂᓪᓕᐊᔪᑦ, ᐃᙱᕐᑐᑦ ᐊᒻᒪ ᓄᓇᓯᐅᑎᖏᓐᓂᒃ ᖁᖁᐊᖅᑎᑦᑎᔪᑦ ᑐᙵᓱᒃᑎᑦᑎᓪᓗᑎᒃ ᐊᓕᑲᓱᐊᕐᒥᒃ ᐊᒻᒪ ᓇᓂᓯᔨᖏᓐᓂᒃ.

ᐊᓕᑲᓱᐊ ᐅᓪᓗᒐᓴᒻᒪᕆᖕᓂ ᓇᓂᔭᐅᔪᓐᓇᓚᐅᙱᒻᒪᑦ, ᑎᑎᕋᕐᓯᒪᑲᑕᓚᐅᕐᑐᑦ ᑐᓴᐅᑎᓕᕆᓂᕐᒧ ᑎᑎᕋᕐᕕᒃᓂᒃ.

ᐅᓪᓗᒃᑯ ᒫᓂ 1:00-ᒥ ᓄᓇᓖᑦ ᖃᐅᔨᓴᐅᑎᖓᒍᑦ, ᑐᓴᑲᑕᓕᓚᐅᕐᑐᑦ ᐊᓕᑲᓱᐊ ᓇᓂᔭᐅᓂᖓᓂᒃ ᖃᓄᐃᙱᖢᓂ.

ᐃᑲᕐᕌᒃ ᒪᕐᕉᒃ ᐊᓂᒍᖅᑎᓪᓗᒋᑦ ᑐᓴᓚᐅᖅᖢᑎᒃ ᑲᑎᓕᓚᐅᕐᑐᑦ ᒥᑦᑕᕐᕕᒃᒥ.

ᒪᐃᔭ ᔫ ᓴᕕᑲᑖᖅ ᓄᑲᖅᖠᖅ ᐅᖃᓚᐅᕐᑐᖅ ᖁᕕᐊᓱᑲᑕᑦᑎᐊᓚᐅᕐᓂᕋᖅᖅᖢᓂᒋᑦ ᓄᓇᓖᑦ ᓄᓇᖃᑎᖓ ᓇᓂᔭᐅᖕᒪᑦ ᖃᓄᐃᙱᖢᓂ ᐊᒻᒪ ᖁᔭᓕᓪᓗᓂ ᐃᑲᔪᓚᐅᖅᑐᓂᒃ ᕿᓂᖅᑐᓂᒃ.

“ᐅᓇ ᖁᕕᐊᓇᖅᑐᖅ ᑕᐃᒪᓐᓇ ᐱᓇᓱᐊᕈᓯᖅ ᐃᓱᓕᖢᓂ,” ᓴᕕᑲᑖᖅ ᓄᑲᖅᖠᖅ ᐅᖃᓚᐅᕐᑐᖅ.

“ᑕᐃᒪᓕ ᐃᓕᔅᓯᓐᓄᓕᒫᖅ ᐊᒃᓱᐊᓗᒃ ᖁᔭᓐᓇᒦᒃ ᐃᑲᔪᕐᓂᔅᓯᓐᓂᒃ ᐊᒻᒪᓗ ᐃᓱᓕᑦᑎᐊᖅᖢᓂ.”

ᕙᐃᔅᐳᒃᑯᑦ ᑲᑉᓗᑦᓯᐊᒃ ᑐᓴᐅᒪᑎᑦᑎᓚᐅᕐᑐᖅ ᓴᑭᖓ ᖃᓄᐃᒻᒪᖔᑦ ᑎᑭᓚᐅᖅᑎᓪᓗᒍ ᓄᓇᓕᖕᓄᑦ.

“ᖃᓄᐃᙱᑦᑎᐊᖅᑐᖅ,” ᑲᑉᓗᑦᓯᐊᒃ ᐅᖃᕐᑐᖅ.

“ᑕᒪᑦᑕ ᖁᔭᓕᑦᑎᐊᖅᑐᒍᑦ.”