ᐋᑐᕚᒥ ᑐᓴᖅᑎᑦᑎᔪᑦ $2 ᒥᓕᐊᓐ ᑖᓚᓂ ᓄᓇᓕᖕᓂ ᐱᓕᕆᐊᒃᓴᓄᑦ ᓄᓇᕗᒥᑦ ᑐᓂᓯᓂᖏᓐᓂᒃ

ᒐᕙᒪᑐᖃᒃᑯᑦ ᑐᓂᓯᓂᐊᕐᒪᑕ $2.2 ᒥᓕᐊᓐᓂ ᓄᓇᕗᒥᑦ ᓄᓇᓕᖕᓄ ᐱᓕᕆᐊᒃᓴᓄᑦ, ᐅᖃᓚᐅᕐᑐᖅ ᐅᑭᐅᕐᑕᖅᑐᓕᕆᓂᕐᒧᑦ ᒥᓂᔅᑕ ᒫᔅᓯ 11ᒥ

“ᑕᒪᒃᑯᐊ ᐱᓕᕆᐊᖑᔪᑦ ᑕᑯᓪᓗᒋ ᐊᒻᒪᓗ ᖃᓄᐃᓕᐅᕈᑎᐅᓇᓱᖕᓂᖏᑦ ᖃᐅᔨᓕᕐᓇᖅᑐᖅ ᐃᓄᐃᑦ ᐃᖕᒥᖕᓂᒃ ᑲᒪᒋᖃᑦᑕᐅᑎᓂᖏᓐᓂᒃ, ᑖᓂᐅᓪ ᕚᓐᑐᓪ ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑐᓴᒐᒃᓴᓕᐅᖅᑎᓪᓗᒋᑦ ᐃᑲᔫᑎᒃᓴᑦ ᒥᒃᓵᓄᑦ. ᐅᖃᓪᓚᓚᐅᕐᑐᖅ ᐅᐃᓂᐱᒡᒥ.

ᑮᓇᐅᔭᐃᑦ ᐃᓚᒋᔭᐅᔪᑦ ᑲᓇᑕᒥ ᓄᓇᓕᖕᓄᑦ ᐱᕚᓪᓕᕈᑎᓄᑦ ᐃᑲᔫᑎᒃᓴᓂᒃ, ᒐᕙᒪᒃᑯᑦ ᐱᓕᕆᐊᖓ ᓄᓇᓕᖕᓂ ᐃᑲᔫᕈᑎᒃᓴᑦ ᓄᕙᒡᔪᐊᕐᓇᖅ-19-ᒧ ᑲᑕᒍᑎᖃᓗᐊᕐᑐᓄᑦ.

ᐱᓕᕆᐊᒃᓴᐃᑦ ᐃᑲᔫᑎᑖᕐᓂᐊᖅᑐᑦ ᓄᓇᕗᒥᑦ ᐅᑯᓂᖓ ᐃᓚᖃᕐᑐᑦ ᖃᔪᕐᑐᖅᕕᒃ, ᐃᓐᓇᑐᖃᓄᑦ ᐊᒻᒪ ᐃᓅᓱᒃᑐᓄᑦ ᐅᐸᒡᕕᒃ ᑕᓗᕐᔪᐊᕐᒥ; ᓄᓇᓯᐅᑎᓕᕆᕝᕕᒃ ᐊᒻᒪᓗ ᐊᓇᐅᓕᒑᕐᕕᒃ ᑰᒑᕐᔪᒃᒥ; ᐊᖅᑯᑎᒥ ᓇᐅᔮᓂᒃ; ᓯᐊᕐᕆᔮᕐᕕᒃᒥ, ᐱᙳᐊᕐᕕᒃᒥᑦ ᐊᒻᒪ ᐊᓇᐅᓕᒑᕐᕕᒃᒥᑦ ᑎᑭᕋᕐᔪᐊᕐᒥ ᐊᒻᒪᓗ ᓄᑖᙳᕆᐊᖅᑕᐅᓗᑎᒃ ᐃᖃᓗᖕᓂ ᐱᙳᐊᕐᕕᐅᑲᑕᒃᑐᑦ.

ᑕᓗᕐᔪᐊᖅ ᒪᐃᔭᖓ ᓴᒃ ᐱᔪ-ᓚᐃᐅᓪ ᐅᖃᓚᐅᕐᑐᖅ ᑐᓴᒐᒃᓴᓕᐅᖅᑎᓪᓗᒍ ᕼᐋᒻᒪᓚᖓ ᐃᖅᑲᓇᐃᔭᖅᑎᖃᐅᑦᑎᐊᙱᒻᒪ ᐊᒻᒪᓗ ᐅᓇ ᖃᔪᕐᑐᖅᕕᒃ ᐱᓇᓱᐊᕈᓯᓕᒫᖅ ᐃᑲᔪᒻᒪᕆᖕᓂᐊᖅᑐᑦ ᐊᒃᓱᕈᖃᑦᑕᖅᑐᓂᒃ..

“ᐱᖃᕆᐊᖃᒻᒪᕆᒃᑲᑦᑕ ᖃᔪᕐᑐᖅᕕᒃᒥᑦ,” ᐅᖃᖅᑐᖅ.

ᖁᕕᐊᓲᑎᖃᓚᐅᕐᒥᔪᖅ ᐃᓅᓱᒃᑐᓄᑦ ᐅᐸᒡᕕᒃᒥ, ᐅᖃᖅᖢᓂ ᑖᓐᓇ ᐊᑯᓂᐊᓗᒃ ᐅᑕᖅᑭᔭᐅᓂᖓᓂᒃ ᑕᓗᕐᔪᐊᕐᒥᐅᓄᑦ ᓲᖃᐃᒻᒪ ᒪᕐᕈᐃᓐᓇᐅᖕᒪᑕ ᐃᓅᓱᒃᑐᓄᑦ ᐅᐸᒡᕕᐅᔪᓐᓇᖃᑦᑕᕐᑐᑦ.

“ᓯᕗᓂᒃᓴᕗᑦ ᓂᕆᐅᓇᑦᑎᐊᖅᑐᐊᓗᒃ,” ᐅᖃᖅᑐᖅ.

ᐃᖃᓗᖕᓂᓪᓕ ᐱᙳᐊᕐᕕᖕᓂᒃ ᓄᑖᙳᕆᐊᖅᑎᑦᑎᓂᐅᓂᐊᕐᑐᑦ ᐃᓚᖃᕐᑐᑦ ᐅᑯᓂᖓ ᐃᓐᓇᑐᖃᐃᑦ ᖃᕐᒪᖓᓂᒃ, ᐳᐃᔾᔪᕋᕐᕕᒃᒥᑦ, ᐱᓇᓱᓂ ᓯᓚᒥ ᓱᕈᓯᕐᓄᑦ ᐱᙳᐊᕐᕕᖕᓂᒃ ᐊᒻᒪᓗ ᐱᖓᓱᓂ ᐱᓱᕋᔭᔅᕕᖕᓂᒃ. ᐃᑲᔫᑎᑕᖃᕐᓂᐊᕐᒥᔪᖅ ᓄᑖᒧᑦ ᐱᓱᕋᔭᕐᕕᐅᓕᕐᓂᐊᖅᑐᒧᑦ.

ᑕᒪᕐᒥᒃ ᐱᓕᕆᐊᒃᓴᐃᑦ ᐋᖅᑭᒃᑕᐅᕌᓂᖕᓂᐊᕐᑐᑦ ᒫᔅᓯ 31, 2023ᒥ, ᐊᒻᒪᓗ ᑖᒃᑯᐊ ᐃᑲᔫᑎᒃᓴᑦ ᐱᔭᐅᖃᑦᑕᕐᓂᐊᕐᑐᑦ ᐅᕘᓇ ᑲᓇᑕᒥ ᐅᑭᐅᕐᑕᖅᑑ ᐱᕙᓪᓕᐊᔪᓕᕆᔨᒃᑯᑦ ᐱᓕᕆᕝᕕᐊᒍᑦ.

ᐱᓕᕆᐊᒃᓴᐃᑦ ᐃᓱᒪᒋᔭᐅᖕᒥᔪᑦ ᐃᖅᑲᓇᐃᔮᒃᓴᓂᒃ ᐱᑕᖃᕐᓂᕐᓴᐅᓕᕐᓂᐊᕐᓂᖓᓂᒃ ᓄᓇᕗᒥᑦ. ᐃᓚᒋᔭᐅᓪᓗᓂ 8ᓂ ᐃᒡᓗᓕᐅᕐᓂᐅᓂᐊᖅᑐᓂᒃ, ᑕᓪᓕᒪᓂᒃ ᐃᖅᑲᓇᐃᔮᒃᓴᓪᓚᕆᖕᓂᒃ, ᐊᒻᒪᓗ ᒪᕐᕉᖕᓂᒃ ᐅᓪᓘ ᐃᓚᖓᓂ ᐃᖅᑲᓇᐃᔮᒃᓴᓂᒃ, ᑐᓴᒐᒃᓴᓕᐊᑎᒍ ᐅᖃᓚᐅᕐᑐᑦ CanNorᑯᑦ ᓇᓗᓇᐃᔭᐃᒃᑲᓐᓂᖅᖢᑎᒃ ᐃᑲᔫᑎᒃᓴᑦ ᒥᒃᓵᓄᑦ.

ᓄᓇᕗᒥᑦ ᒐᕙᒪᒃᑯᑦ, ᕼᐋᒻᒪᓚᐃᓪᓗ ᐊᒻᒪᓗ ᐃᒻᒥᒃᑯᑦ ᐱᓕᕆᕝᕕᖃᖅᑐ ᐃᑲᔪᕈᑎᒃᓴᓂᒃ ᐃᑲᔪᕐᓂᐊᕐᒥᔪᑦ ᐱᓕᕆᐊᒃᓴᓄᑦ.

ᕚᓐᑐᓪ ᖃᐅᔨᒪᓂᕋᓚᐅᕐᑐᖅ ᓄᓇᓖᑦ ᐋᖅᑭᒃᓱᖅᑕᐅᒃᑲᓐᓂᕆᐊᖃᕐᓂᖏᓐᓂᒃ ᑖᒃᑯᐊ ᐅᖃᐅᓯᐅᓯᒪᔪᑦ ᐅᖓᑖᓄᑦ, ᐅᖃᒃᑲᓐᓂᖅᖢᓂ ᑭᒃᑯᓕᒫᓄᑦ ᐱᔨᑦᑎᕋᐅᑎᓕᕆᔨᒃᑯᑦ ᐅᓄᒃᑲᓐᓂᖅᑐᓂᒃ ᐱᐅᓯᕚᓪᓕᕈᑎᒃᓴᓂᒃ ᐋᖅᑭᒃᓯᓯᒪᓂᕋᖅᖢᓂᒋᑦ.

“ᐃᓱᒪᔪᖓᓕ ᑕᖅᑭᓂᒃ ᐊᒡᒋᖅᑐᓂᒃ ᑕᒪᒃᑯᓄᖓ ᑐᓴᒐᒃᓴᓕᐅᒃᑲᓐᓂᕈᓐᓇᕈᒪᓪᓗᖓ,” ᐅᖃᓚᐅᕐᑐᖅ.