ᐋᓐᓂᐊᓯᐅᖅᑎᑕᖃᙱᓗᐊᕐᓂ ᐊᐅᔭᐅᔪᖅ ᒪᑐᔾᔪᑎᐅᔪᖅ, ᐊᒻᒪ ᐱᔨᑦᑎᕋᐅᑎᓂᒃ ᓄᖅᑲᖅᑎᑦᑎᔾᔪᑎᐅᓪᓗᓂ 8-ᓂ ᓄᓇᕗᒥᑦ ᐋᓐᓂᐊᕕᖕᓂ

ᐊᓯᒃᑲᓐᓂᖏᓐᓂᒃ ᐊᓯᙳᖅᑎᑦᑎᑐᐃᓐᓇᕆᐊᖃᕐᒥᔪᑦ ᒪᓕᒡᓗᑎᒃ ᐃᖅᑲᓇᐃᔭᖅᑎᑦ ᐅᓄᕐᓂᖏᓐᓂᒃ, ᐋᓐᓂᐊᕕᓕᕆᔨᒃᑯᑦ ᐅᖃᖅᑐᑦ

ᖃᒪᓂᑦᑐᐊᖅ ᐋᓐᓂᐊᕕᒃ ᐃᓚᒋᔭᐅᔪᖅ 8-ᓂ ᓄᓇᕗᒥᑦ ᐋᓐᓂᐊᓯᐅᖅᑎᖃᙱᓗᐊᖅᑐᓂᒃ ᐅᕝᕙᓘᓐᓃᑦ ᑕᖅᑭᐅᓂᐊᖅᑐᒥ ᐃᖅᑲᓇᐃᔭᖅᑎᖃᙱᓗᐊᕐᓂᐊᕋᓱᒋᔭᐅᔪᓂᒃ, ᑕᐃᒪᓐᓇᓗ ᐱᔨᑦᑎᕋᐅᑎᕆᙱᓐᓂᕐᓴᐅᓂᐊᕐᖢᑎ ᐊᒻᒪ ᒪᑐᓯᒪᓚᐅᑲᖕᓂᐊᖅᖢᑎᒃ. (ᐊᔾᔨᙳᐊᖁᑎᒋᔭᐅᔪᖅ)

By ᒥᓚᓂ ᐅᕆᑦᓵᑦ

For an English version of this story, see Nurse shortage forces summertime closures, service cuts at 8 Nunavut health centres

ᐋᓐᓂᐊᓯᐅᑎᓂ ᐱᑕᖃᙱᓗᐊᕐᓂᖓᓄᑦ ᒪᕐᕉᖕᓂ ᐋᓐᓂᐊᕖᖕᓂ ᓄᓇᕗᒥᑦ ᒪᑐᔪᖃᑦᑎᐊᒻᒪᕆᖕᓂᐊᖅᑐᖅ ᐊᐅᔭᐅᓂᖓᓂ ᐊᒻᒪ ᐊᓯᖏᑦ 6 ᐱᔨᑦᑎᕋᐅᑎᖏᓐᓂᒃ ᐱᓕᕆᐊᖃᙱᓐᓂᕐᓴᐅᓕᕐᓂᐊᖅᖢᑎᒃ ᒪᑯᓄᖓ ᑐᐊᕕᕐᓇᖅᑐᓂ ᐱᓕᕆᓂᕐᓴᐅᑲᑕᒡᓗᑎᒃ.

“ᓄᓇᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ ᐊᒻᒪᓗ ᑲᓇᑕᓕᒫᒥ ᐋᓐᓂᐊᓯᐅᖅᑎᓂᒃ ᐊᒥᒐᖅᓯᑲᑕᖕᓂᖅ ᐊᔪᕐᓇᕈᑎᒻᒪᕆᐅᖕᒪᑦ ᐋᓐᓂᐊᓯᐅᖅᑎᑖᕋᓱᖕᓂᕐᒥᒃ ᓄᓇᕗᒧᑦ,” ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᖁᐊᓴ ᑯᓱᒐᖅ ᐅᖃᓚᐅᖅᑐᖅ ᑐᓴᒐᒃᓴᓕᐅᖅᑎᓪᓗᒋᑦ ᐱᓕᕆᕝᕕᖏᑦ ᔪᓚᐃ 16-ᖑᑎᓪᓗᒍ.

ᐋᓐᓂᐊᕖᑦ ᐊᐅᔪᐃᑦᑐᕐᒥ ᐊᒻᒪ ᖃᐅᓱᐃᑦᑐᕐᒥ— ᓄᓇᕗᒥᑦ ᐅᓄᙱᓛᓂᒃ ᐃᓄᖃᖅᑐᑦ 140-ᓂᒃ ᐊᒻᒪ 218-ᓂ — ᒪᑐᑦᑎᐊᒻᒪᕆᖕᓂᐊᖅᑐᑦ ᐋᒐᓯᐅᑉ ᕿᑎᐊᓂ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑐᓴᒐᒃᓴᓕᐊᖓᓂ ᐅᖃᖅᓯᒪᓚᐅᖅᑐᑦ.

ᖃᑯᒍ ᒪᑐᐃᒃᑲᓐᓂᕐᓂᐊᕆᐊᒃᓴᖏᓐᓂᒃ ᐅᖃᐅᓯᐅᓯᒪᙱᑦᑐᑦ ᑖᒃᑯᐊ ᒪᑐᓯᒪᓚᐅᑲᖕᓂᐊᖅᑐᑦ.

ᑕᓗᕐᔪᐊᕐᒥ ᐋᓐᓂᐊᕕᒃ ᒪᑐᓂᐊᕐᒥᔪᖅ ᐱᓇᓱᐊᕈᓰᖕᓂ ᒪᕐᕉᖕᓂ ᔪᓚᐃ 30-ᒥᑦ ᐋᒐᓯ 13-ᒧ, ᑭᓯᐊᓂ ᑐᐊᕕᕐᓇᖅᑐᖅᑕᖃᕌᖓ ᐊᒻᒪᓗ ᓴᓂᑭᓗᐊᕐᒥ ᑕᐃᒪᓐᓇᑦᑕᐃᓐᓇᐅᓂᐊᕐᒥᔪᖅ ᑕᖅᑭᓕᒫᑲᓴᖕᒥᑦ, ᔪᓚᐃ 26-ᒥᑦ ᐋᒐᓯ 31-ᒧᑦ.

ᑰᒑᕈᒥ, ᐋᓐᓂᐊᕕᒃ ᒪᑐᓯᒪᓂᐊᕐᑐᖅ ᐱᓇᓱᐊᕈᓰᖕᓂ ᒪᕐᕉᖕᓂ ᑭᓯᐊᓂ ᑐᐊᕕᕐᓇᖅᑐᖅᑕᖃᕌᖓ ᐋᒐᓯ 1-ᒥᑦ 15-ᒧᑦ, ᐊᒻᒪ ᑲᖏᖅᑐᒑᐱᖕᒥᑦ ᐃᑲᕐᕋᖏᑦ ᐅᓄᕈᓐᓃᖅᑎᑕᐅᓯᒪᓂᐊᕐᑐᑦ ᐋᒐᓯ 9-ᒥᑦ 24-ᒧᑦ ᐊᒻᒪ ᓇᐅᔮᑦ ᐱᔨᑦᑎᕋᐅᑎᖏᓐᓂ ᐃᓚᖏᓐᓂᒃ ᐊᑐᑲᑕᔾᔮᙱᖢᑎᒃ ᐋᒐᓯ 12-ᒥᑦ 31-ᒧᑦ.

ᖃᒪᓂᑦᑐᐊᖅᒥ ᐋᓐᓂᐊᕕᒃ ᒫᓐᓇ ᒪᑐᓯᒪᔪᖅ ᑭᓯᐊᓂ ᑐᐊᕕᕐᓇᖅᑐᓄᑦ ᐊᒻᒪᓗ ᐱᔨᑦᑎᕋᐅᑎᖏᓐᓂᒃ ᐱᓕᕆᐊᖃᙱᓐᓂᖅᓴᐅᓕᕐᓂᐊᖅᖢᑎᒃ ᔪᓚᐃ 22-ᒥᑦ, ᑎᓇᕇ ᓴᒧᕕᐊᓪ, ᐅᖃᖅᑎᒋᔭᐅᔪᖅ ᐋᓐᓂᐊᖃᕐᓇᙱᑦᑐᓕᕆᔨᓄᑦ ᑎᑎᕋᓚᐅᖅᑐᖅ ᖃᕋᓴᐅᔭᒃᑯᑦ.

ᔫᓂ 30-ᒥ, 163 ᐋᓐᓂᐊᓯᐅᖅᑎᓄᑦ ᐃᓂᒃᓴᐃᑦ ᐃᓄᖃᓚᐅᙱᑦᑐᑦ. ᓴᒧᕕᐊᓪ ᐅᖃᓚᐅᖅᑐᖅ 8 ᑖᒃᑯᓇᙵ ᐱᔾᔪᑎᖃᓗᐊᖅᑐᑦ ᐊᓯᖏᓐᓂᖔᖅ ᐱᓕᕆᐊᖃᒃᑲᓐᓂᕐᓂᖅᒧᑦ ᐊᒻᒪᓗ 6 ᐃᓇᖏᖅᑎᐅᑲᑕᒃᐸᒃᖢᑎᒃ.

39 ᐋᓐᓂᐊᓯᐅᖅᑎᓄᑦ ᐃᓂᒃᓴᐃᑦ ᐃᓄᖃᙱᑦᑐᑦ ᒫᓐᓇ ᐊᒻᒪᓗ 17-ᓂ ᐋᓐᓂᐊᓯᐅᖅᑎᓪᓚᕆᖕᓂ ᐃᓂᒃᓴᐃᑦ ᐃᓄᖃᙱᖢᑎᒃ, ᓴᒧᕕᐊᓪ ᐅᖃᕐᒥᔪᖅ.

ᐊᓯᔾᔨᖅᑕᐅᔪᓄᑦ ᐅᑯᐊ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓄᓇᕗᒻᒥᐅᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᐅᑎᓂᒃ ᐊᑐᐃᓐᓇᖃᖅᑎᑦᑎᓇᓱᒃᑐᑦ, ᑐᓴᒐᒃᓴᓕᐊᕆᔭᐅᔪᖅ ᐅᖃᖅᓯᒪᓚᐅᖅᑐᖅ.

ᒪᑯᐊᓕ ᓄᓇᓖᑦ ᐊᑐᐃᓐᓇᖃᙱᑦᑐᑦ ᐅᕝᕙᓘᓐᓃᑦ ᐱᔨᑦᑎᕋᐅᑎᖃᑦᑎᐊᙱᑦᑐᓄᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᖃᕋᓴᐅᔭᒃᑯᑦ ᓴᖅᑭᔮᑲᐅᑎᒋᔪᓐᓇᖅᑐᒃᑯᑦ ᐋᓐᓂᐊᖅᑐᓕᕆᕙᒡᓗᑎᒃ, ᑎᑭᑎᑦᑎᕙᒡᓗᑎᒡᓘᓐᓃᑦ ᐋᓐᓂᐊᓯᐅᖅᑎᓂᒃ ᐊᒻᒪ ᐋᓐᓂᐊᖅᑐᓕᕆᔨᓂᒃ, ᐅᖃᕐᓯᒪᓚᐅᕐᑐᖅ ᑐᓴᒐᒃᓴᐃᑦ.

ᐋᓐᓂᐊᕕᖕᒧᑦ ᐅᖄᓚᔪᑦ ᐊᓯᐊᓄᑦ ᐅᖃᖃᑎᖃᖅᑎᑕᐅᓕᕋᔭᖅᑐᑦ ᖃᕋᓴᐅᔭᒃᑯᑦ ᐱᔨᑦᑎᕋᐅᑎᓕᕆᓂᒃᑯᑦ ᐊᒻᒪᓗ ᐃᓚᖏ ᐊᓯᖏᓐᓄ ᓄᓇᓕᖕᓄᑦ ᐅᖃᖃᑎᖃᖅᑎᑕᐅᕙᒡᓗᑎᒃ.

ᐃᖅᑲᓇᐃᔭᖅᑎᐅᔪᑦ ᐱᔨᑦᑎᕋᐅᑎᓕᕆᖃᑦᑕᕐᓂᐊᖅᑐᑦ ᒪᑯᓂᖓ ᐃᓅᓕᓴᐅᑎᑖᖅᑎᑦᑎᖃᑦᑕᕐᓂᒃᑯᑦ ᑭᓯᐊᓂᓕ ᑕᒪᓐᓇ ᑭᖑᕙᕆᐊᕐᓯᒪᑐᐃᓐᓇᕆᐊᖃᖅᖢᓂ ᐃᖅᑲᓇᐃᔭᖅᑎᖃᙱᓗᐊᕐᓂᕐᒧᑦ.

ᖃᕋᓴᐅᔭᒃᑯᑦ ᓴᖅᑭᑲᑕᐅᒋᓐᓇᖅᑐᒃᑯᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔭᖅᑏᑦ ᐊᒻᒪ ᐋᓐᓂᐊᖅᑐᓕᕆᔨᐅᔪᑦ ᑲᒪᒋᔭᖃᕈᓐᓇᕐᓂᐊᖅᑐᑦ ᓄᕙᒡᔪᐊᕐᓇᖅ-19 ᐋᓐᓂᐊᖃᖅᑐᖃᓕᕐᓂᖅᐸᑦ ᓄᓇᓕᖕᓂ ᐊᒻᒪᓗ ᖃᐅᔨᓴᖅᑎᒃᑎᑲᑕᒡᓗᑎᒃ ᐊᒻᒪᓗ ᐊᐃᑦᑐᖅᑕᐅᔪᓂᒃ ᖃᐅᔨᓇᓱᒍᓐᓇᕐᓗᑎᒃ.

ᐋᓐᓂᐊᖅᑐᓕᕆᔨᒃᑯᑦ ᐊᒻᒪ ᐋᓐᓂᐊᓯᐅᖅᑏᑦ ᐊᑐᐃᓐᓇᐅᓂᐊᖅᑐᑦ ᑲᐱᔭᐅᔭᕆᐊᓕᖕᓂ ᑲᒪᒋᔭᖃᖅᐸᒡᓗᑎᒃ ᐃᓂᒃᓴᓕᐅᖅᓯᒪᔪᓂᒃ.

ᐱᔨᑦᑎᕋᐅᑎᑦ ᐅᓄᕈᓐᓃᖅᐹᓪᓕᕐᓂᖓ ᐊᒻᒪ ᒪᑐᓯᒪᓚᐅᑲᖕᓂᖅ ᐊᓯᙳᖅᑎᑕᐅᑐᐃᓐᓇᕆᐊᖃᖅᑐᖅ ᐃᖅᑲᓇᐃᔭᖅᑎᑦ ᒪᓕᒡᓗᒋᑦ, ᑐᓴᒐᒃᓴᐃᑦ ᐅᖃᖅᓯᒪᓚᐅᖅᑐᑦ.

ᐅᑯᐊ ᐸᐃᓱᐊ ᐋᓐᓂᐊᖅᑐᓕᕆᔨᒃᑯᑦ (Bayshore Healthcare) ᐊᕐᕌᒍᒐᓴᖕᓄᑦ ᐊᑭᑦᑐᕋᐅᑎᒍᑎᓂᒃ ᑐᓂᓯᓚᐅᖅᑐᑦ ᓄᓇᕗᒥᑦ ᒐᕙᒪᒃᑯᓐᓄᑦ ᑖᒃᑯᐊ ᐋᓐᓂᐊᓯᐅᖅᑎᒃᓴᓂᒃ ᑲᒪᔨᓪᓚᕆᐅᓂᐊᕐᓗᑎᒃ ᐊᒻᒪ ᐃᕐᓂᓱᒃᓰᔨᓂᒃ ᒫᓯᐅᓚᐅᖅᑐᒥ.

ᐅᓇ ᐱᓕᕆᖃᑎᒌᖕᓂᖅ ᐊᒻᒪ ᐃᖅᑲᓇᐃᔮᖅᑖᖅᑎᑦᑎᑲᑕᖕᓂᖅ ᐱᓇᓱᐊᕈᓯᕐᓂ ᐊᓂᒍᓵᖅᑐᓂᒃ ᐱᕕᖃᕈᑎᐅᓚᐅᖅᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᒃ ᒪᑐᑎᑦᑎᑦᑕᐃᓕᒃᑲᓐᓂᕈᑎᐅᓪᓗᓂ ᐊᓯᖏᓐᓂᒃ ᐋᓐᓂᐊᕕᖕᓂ ᐊᐅᔭᐅᔪᖅ, ᑭᓯᐊᓂᓕ ᐃᓚᖏᑦ ᒪᑐᑐᐃᓐᓇᕆᐊᖃᕐᓂᐊᖅᑐᑦ ᐃᖅᑲᓇᐃᔭᖅᑎᑖᕈᓐᓇᙱᑉᐸᑕ, ᑐᓴᒐᒃᓴᖅ ᐅᖃᖅᓯᒪᔪᖅ.

ᐃᓚᖃᖅᖢᓂ ᑕᐃᕕᑦ ᕕᐊᓐ ᑎᑎᖃᖁᑎᖏᓐᓂᒃ

Share This Story

(0) Comments