ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓴᖅᑎᑦᑎᕗᖅ ᐊᑭᓕᐅᑎᒃᓴᐅᓇᔭᖅᑐᓂᒃ ᐳᓚᕋᖅᑐᓕᕆᓂᕐᒧᑦ ᐊᐅᓚᑦᑎᔨᓄᑦ ᐃᓄᐃᑦ ᓇᖕᒥᓂᖅ ᓄᓇᖏᓐᓄᑦ

ᑮᓇᐅᔭᓕᐅᕋᓱᖕᓂᒃᑯᑦ ᐳᓚᕋᖅᑐᓕᕆᓂᕐᒥᒃ ᐊᐅᓚᑦᑎᔨᐅᔪᑦ ᐊᑭᓖᖃᑦᑕᕆᐊᖃᓕᕐᑐᑦ ᐃᓄᐃᑦ ᓇᖕᒥᓂᖅ ᓄᓇᖏᓐᓅᕈᒪᒍᑎ ᕿᑭᖅᑕᓂ, ᐅᑯᐊ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓴᖅᑎᑦᑎᓚᐅᕐᑐᑦ ᐊᕐᕌᒍᑕᒫᕐᓯᐅᑎᓂᒃ ᑲᑎᒪᕕᒡᔪᐊᕐᓇᓂ ᐃᖃᓗᖕᓂ ᐱᖓᑦᓯᖅ, ᐅᒃᑑᐱᕆ 9-ᒥ.

ᕿᑭᖅᑕᓂ ᓄᓇᐃᑦ ᐅᓄᓛᓂᒃ ᐅᒥᐊᕐᔪᐊᓂᒃ ᐃᓄᖕᓂᒃ ᐅᓯᔪᓂᒃ ᐅᐸᒃᑕᐅᕙᒃᑐᑦ ᓄᓇᕗᒻᒦᑦᑐᓕᒫᒥ.

ᒥᑦᑎᒪᑕᓕᒃ 17-ᓂ ᐅᒥᐊᕐᔪᐊᓂ ᐃᓄᖕᓂ ᐅᓯᔪᓂᒃ ᐅᐸᒃᑕᐅᓚᐅᕐᑐᑦ ᐊᐅᔭᐅᔪᖅ, ᐃᖃᓗᐃᓪᓕ ᐅᐸᒃᑕᐅᓪᓗᓂ ᑎᓴᒪᓄᑦ.

“ᐃᓄᐃᑦ ᕿᑭᖅᑕᓂ ᓄᓇᓕᖕᓃᑦᑐᑦ ᐃᓱᒫᓗᑎᖃᕐᓯᒪᓕᕐᒪᑕ ᐅᓇ ᐱᔾᔪᑎᒋᓪᓗᒍ ᐅᓄᕐᓯᕙᓪᓕᐊᓂᖏᑦ ᐳᓚᕋᖅᑐᓕᕆᓂᕐᒧᑦ ᖃᓄᐃᓕᐅᕈᑎᐅᔪᓂᒃ ᑕᒫᓂ ᓄᓇᑦᑎᓐᓂ, ᐱᓗᐊᖅᑐᒥᑦ ᐃᓄᖕᓂ ᐅᓯᕙᒃᑐᓂᒃ ᐅᒥᐊᕐᔪᐊᓂ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐋᖅᑭᒃᓯᓕᓚᐅᕐᑐᑦ ᐳᓚᕋᖅᑐᓕᕆᓂᕐᒥᒃ ᐊᐅᓚᑦᑎᔨᓄᑦ ᐊᑭᓕᐅᑎᒃᓴᓂᒃ ᐃᑲᔫᑎᐅᓂᐊᖅᑐᓂᒃ ᐃᓄᖕᓄᑦ ᓄᓇᓕᖕᓂᑦ ᐅᒥᐊᕐᔪᐊᓄᑦ ᐊᒃᑐᖅᑕᐅᓯᒪᓗᐊᖅᑐᓄᑦ,” ᐲ. ᔭᐃ. ᐊᕿᐊᕈᒃ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖓ, ᐅᖃᓚᐅᕐᑐᖅ ᑐᓴᒐᒃᓴᑎᒍᑦ.

ᑐᓴᒐᒃᓴᓕᐅᓚᐅᕐᖢᑎᒃ ᕿᑭᖅᑖᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓄᓇᓕᕆᓂᕐᒧᑦ ᐊᒻᒪ ᐊᑐᒃᑲᓐᓂᕈᓐᓇᖅᑐᓕᕆᓂᕐᒧᑦ ᐱᓕᕆᕝᕕᖏᑦ ᐅᖃᐅᓯᖃᓕᓚᐅᕐᑐᑦ ᐊᑭᓕᐅᑎᒃᓴᐅᓂᐊᖅᑐᓂᒃ ᓄᑖᓂᒃ.

ᓄᑖᑦ ᐊᑭᓕᐅᑎᒃᓴᑦ ᐅᑯᓄᖓ ᑐᕌᖓᔪᑦ:

• ᖃᖓᑕᓲᖅ ᒥᓐᓂᖏᓐᓄᑦ ᐃᓄᐃᑦ ᓄᓇᖓᓄᑦ: $150 ᒥᑦᑕᕌᖓᑦ
• ᖁᓕᒥᒎᓖᑦ ᒥᓐᓂᖏᓐᓄᑦ ᐃᓄᐃᑦ ᓄᓇᖓᓄᑦ: $100 ᒥᑦᑕᕌᖓᑦ
• ᑮᓇᐅᔭᓕᐅᕋᓱᖕᓂᕐᒧᑦ ᑕᒻᒫᕐᕕᐅᕙᒃᑐᑦ ᐃᓄᐃᑦ ᓄᓇᖏᓐᓂ: $50 ᐅᓪᓗᕐᒧᑦ
• ᑮᓇᐅᔭᓕᐅᕋᓱᖕᓂᒃᑯᑦ ᐳᓛᖅᑐᓂᑦ ᐊᑐᐃᓐᓇᖃᖅᑎᑦᑎᓂᖅ ᐃᑲᕐᕋᑦ 6 ᑐᖔᓂ ᐃᓄᐃᑦ ᓄᓇᖏᓐᓂᒃ: $25.00 ᐅᓪᓗᕐᒧᑦ

ᑲᑎᑕᐅᔪᓂᒃ ᐊᑭᓕᐅᑎᓂᒃ ᓇᑉᐸᖏᑦ ᐊᖑᓇᓱᒃᑐᓕᕆᔨᒃᑯᓐᓄᐊᖃᑦᑕᕋᔭᖅᑐᑦ ᖃᓂᒃᓴᓛᖑᔪᑦ ᐳᓚᕋᖅᑐᓕᕆᓂᕐᒥᑦ ᐱᓕᕆᐊᖃᖅᑐᓄᑦ ᐊᑐᐃᓐᓇᕆᔭᐅᔪᓂᒃ, ᑐᓴᒐᒃᓴᓕᐊᖑᔪᖅ ᐅᖃᕐᓯᒪᓚᐅᕐᑐᖅ. ᓇᑉᐸᖓᑕᓕ ᐊᐃᑉᐸᖓ ᐅᑯᓄᙵᕋᔭᖅᖢᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ.

ᐅᒥᐊᕐᔪᐊᑦ ᐃᓄᖕᓂ ᐅᓯᕙᒃᑐᑦ ᓄᓇᕗᒧᐊᖅᑐᑦ ᐃᓄᖃᖃᑦᑕᕐᒪᑕ ᒫᓂ 150-ᓂ 400-ᓄ, ᕉᔅᐋᓐ ᑎ’ᐅᕆᔨᐅ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᑐᑭᒧᐊᖅᑎᑦᑎᔨ ᓄᓇᓕᕆᓂᕐᒧᑦ ᐊᑐᒃᑲᓐᓂᕈᓐᓇᖅᑐᓕᕆᓂᕐᒧᓪᓗ, ᐅᖃᓚᐅᕐᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᑲᑎᒪᔨᖏᓐᓄᑦ ᑲᑎᒪᑎᓪᓗᒋᑦ.

ᐅᓇ $25 ᐅᓪᓗᕐᒧ ᐊᑭᓕᐅᑎ ᑐᕌᖓᓇᔭᖅᑐᖅ ᑕᒪᐃᓐᓄᓕᒫᖅ ᐊᑐᓂ ᐃᑭᒪᔪᓄᑦ ᐃᓄᖕᓂ ᐅᓯᕙᒃᑐᓂᒃ ᐃᓄᐃᑦ ᓇᖕᒥᓂᖅ ᓄᓇᖏᓐᓄᐊᕐᓂᐊᕈᑎᒃ—ᐅᕝᕙᓘᓐᓃᑦ IOL (ᐃᓄᐃᑦ ᓇᖕᒥᓂᖅ ᓄᓇᖏᑦ).

“ᖃᔅᓯᑐᐃᓐᓇᐅᒐᓗᐊᖅᐸᑦ ᐃᓄᐃᑦ ᐅᒥᐊᕐᔪᐊᕐᒦᑦᑐᑦ ᐃᓄᐃᑦ ᓇᖕᒥᓂᖅ ᓄᓇᖏᓐᓄᑦ ᓂᐅᓯᒪᓂᐊᕈᑎᒃ, ᐊᑭᓕᒐᒃᓴᖃᖅᑎᑕᐅᓇᔭᖅᑐᑦ ᐃᓄᐃᑦ ᐅᒥᐊᕐᔪᐊᕐᒦᑦᑐᑦ ᐅᓄᕐᓂᖏᑦ ᒪᓕᒡᓗᒋᑦ,” ᑎ’ᐅᕆᔨᐅ ᐅᖃᓚᐅᕐᑐᖅ ᑲᑎᒪᔨᓄᑦ.

ᑎ’ᐅᕆᔨᐅ ᐅᖃᓚᐅᕐᑐᖅ ᐅᒥᐊᕐᔪᐊᑦ ᐃᓄᖕᓂ ᐅᓯᕙᒃᑐᑦ ᕿᑭᖅᑕᓂ ᓄᓇᖏᓐᓄᑦ ᑐᓂᓯᖃᑦᑕᕆᐊᖃᕐᓂᐊᖅᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᖃᔅᓯᐅᓂᐊᕐᓂᖏᓐᓂᒃ ᐃᓄᐃᑦ ᐃᑭᒪᓂᐊᖅᑐᓂ ᑕᖅᑭᑕᒫᑦ ᐅᕝᕙᓘᓐᓃᑦ ᐅᒥᐊᖅᑐᓕᓚᐅᙱᓐᓂᖏᓐᓂᒃ.

“ᑕᐃᒪᓕ ᐅᒥᐊᕐᔪᐊᖅ ᐅᓯᒍᓂ 350 ᐃᓄᖕᓂ, ᐊᑭᓖᑎᑦᑎᓇᔭᖅᑐᒍᑦ $25-ᓂ ᐅᓪᓗᖅ ᐊᑕᐅᓯᕐᒧ ᐊᑕᐅᓯᖅ ᐃᓄᒧᑦ. ᑕᐃᒪᓕ ᐊᖏᓂᕐᓴᐃᑦ ᐃᓄᖕᓂ ᐅᓯᕙᒃᑐᑦ ᐅᒥᐊᕐᔪᐊᑦ ᐊᑭᓖᒋᐊᖃᕋᔭᖅᑐᑦ ᒫᙵᑦ $10,000-ᓂ $20,000-ᓄ ᓄᓇᒧᐊᕐᓂᐊᕐᓗᓂ ᐃᓄᐃᑦ ᓇᖕᒥᓂᖅ ᓄᓇᖓᓄᑦ,” ᑎ’ᐅᕆᔨᐅ ᐅᖃᖅᑐᖅ.

ᓄᓇᓖᓪᓕ ᐊᒥᓱᓂ ᐅᒥᐊᕐᔪᐊᓂ ᐃᓄᖕᓂ ᐅᓯᔪᓂᒃ ᐅᐸᒃᑕᐅᕙᒃᑐᑦ ᐊᐅᔭᒃᑯᑦ, ᐆᑐᓇᖅ ᒥᑦᑎᒪᑕᓕᒃᑎᑐᑦ, ᐊᖑᓇᓱᒃᑐᓕᕆᔨᖏᑦ ᐱᓇᔭᖅᑐᑦ ᒫᓂ $50,000-ᓂ $70,000-ᓄ ᐊᑭᓕᐅᑎᒃᓴᓄᑦ, ᐅᖃᒃᑲᓐᓂᖅᑐᖅ.

ᓄᑖᑦ ᐊᑭᓕᐅᑎᒃᓴᑦ ᐃᑲᔫᑎᐅᓂᐊᕐᒥᔪᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᓄᓇᒥ ᐊᑐᕈᒪᓂᕐᒧᑦ ᖃᕋᓴᐅᔭᒃᑯᑦ ᐊᑎᓕᐅᕐᕕᓕᕆᓂᕐᒥᓐ.

ᑕᐃᒪᓐᓇᓕ, ᐳᓚᕋᖅᑐᓕᕆᓂᕐᒧᑦ ᐊᐅᓚᑦᑎᔨᐅᔪᑦ ᖃᐅᔨᑎᑕᐅᖃᑦᑕᕋᔭᖅᑐᑦ ᓄᑖᓂᒃ ᐊᑭᓕᐅᑎᒃᓴᓂᒃ ᐱᓇᓱᓕᕌᖓᑕ ᐊᑐᐃᓐᓇᖃᕈᒪᓂᕐᒥᑦ ᐃᓄᐃᑦ ᓇᖕᒥᓂᖅ ᓄᓇᖏᓐᓂᒃ.

ᑎ’ᐅᕆᔨᐅ ᐅᖃᓚᐅᕐᑐᖅ ᕿᑭᖅᑕᓂ ᐃᓄᐃᑦ ᑲᑐᔾᓕᖃᑎᒌᑦ ᐋᖅᑭᒃᓯᓚᐅᕐᓂᖏᓐᓂᒃ ᐊᑭᓕᐅᑎᒃᓴᓂ ᒪᓕᒃᖢᑎᒃ ᐊᓯᖏᓐᓂᒃ ᑲᑐᔾᔨᖃᑎᒌᑦ ᐊᑭᓕᐅᑎᒋᑎᑉᐸᒃᑲᖏᓐᓂᒃ ᐳᓚᕋᖅᑐᓕᕆᓂᕐᒧᑦ. ᓲᕐᓗ ᐆᑐᓇᖅ, ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐊᑭᓖᑎᑦᑕᕙᖕᒪᑕ $25-ᓂ ᐃᓄᒃ ᐊᑕᐅᓯᕐᒥ ᑲᓇᑕᐅᑉ ᒥᕐᖑᐃᕐᓯᕕᖓᓄᐊᕐᓂᐊᕈᑎᒃ.

ᕼᐋᒻᒪᓚᐅᔪᑦᑕᐅᖅ ᐊᑭᓖᑎᑦᑎᕙᖕᒪᑕ ᐃᓄᖕᓂ ᐅᓯᔪᓂᒃ ᐅᒥᐊᕐᔪᐊᓂᒃ ᐊᒻᒪ ᐳᓚᕋᖅᑐᓕᕆᓂᕐᒧᑦ ᐊᐅᓚᑦᑎᔨᓂᒃ ᓄᓇᖏᓐᓄᐊᖅᑐᓂᒃ, ᑎ’ᐅᕆᔨᐅ ᐅᖃᕐᒥᔪᖅ.

“ᐅᒥᐊᕐᔪᐊᑦ ᐃᓄᖕᓂ ᐅᓯᕙᒃᑐ ᐃᓄᐃᑦ ᓇᖕᒥᓂᖅ ᓄᓇᖏᓐᓄᐊᕈᓐᓇᕐᓯᓯᒪᔪᑦ ᐊᑭᓖᑎᑕᐅᕙᒃᐳᑦ ᑖᔅᓱᒥᖓ ᑭᓯᐊᓂ ᐃᓄᐃᑦ ᓇᖕᒥᓂᖅ ᓄᓇᑎᓐᓄᐊᓪᓚᕆᒃᑯᑎᒃ,” ᐅᖃᖅᑐᖅ.

ᔫ ᐊᑕᒍᑦᑖᓗᒃ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᑎᑎᕋᖅᑎ/ᑮᓇᐅᔭᓕᕆᔨᖓᑦ, ᐊᐱᕆᓚᐅᕐᑐᖅ ᐊᔪᕐᓇᕋᔭᙱᑦᑕᕆᐊᒃᓴᖓᓂᒃ ᑖᒃᑯᐊ ᐊᑭᓕᐅᑎᑦ ᓯᕗᓂᒃᓴᑦᑎᓐᓂ ᐊᖏᒡᓕᒐᔭᕆᐊᒃᓴᖏᓐᓂᒃ.

ᑎ’ᐅᕆᔨᐅ ᐅᖃᓚᐅᕐᑐᖅ ᐊᓯᙳᖅᑕᐅᔪᓐᓇᕋᔭᓛᕐᓂᖓᓂᒃ, ᑭᓯᐊᓂᓕ ᐅᖃᐅᓯᐅᑲᑕᒋᐊᖃᕋᔭᖅᖢᓂ ᐊᒻᒪ ᐋᖅᑭᒃᑕᐅᓗᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᑲᑎᒪᔨᖏᓐᓄᑦ.

“ᐅᓇ ᖁᕕᐊᓇᕈᓘᔭᕐᑐᖅ ᖃᓄᐃᓕᐅᕈᑎᒃᓴᖅ. ᓯᕗᓕᐅᕐᑎᐅᒃᑲᓐᓂᓕᕆᕗᒍ ᐃᓄᐃᒃ ᐃᑲᔫᑎᑖᕈᓐᓇᕐᓂᖏᓐᓂᒃ ᓄᓇᓕᖏᓐᓄᑦ,” ᐊᕿᐊᕈᒃ ᐅᖃᓚᐅᕐᑐᖅ ᑲᑎᒪᔨᓄᑦ.

ᐊᑭᓕᐅᑎᒃᓴᐃᑦ ᒫᓐᓇᑲᐅᑎᒋ ᐊᑐᓕᕐᓂᐊᖅᑐᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᓚᐅᕐᑐᑦ.