$1.5 ᐱᓕᐊᓐ ᑖᓚ ᓄᓇᕗᒧᑦ ᐊᖏᕈᑎ ᓄᑖᙳᕆᐊᖅᑕᐅᓂᖓ ᑕᐃᒪᙵᓂ 1993-ᒥ

For the English version of this story, please see Historic $1.5B deal marks first renewal of Nunavut Agreement since 1993.

ᒐᕙᒪᑐᖃᒃᑯᑦ ᐊᒻᒪ ᐃᓄᐃᑦ ᓯᕗᓕᐅᕐᑎᖏᑦ ᐊᑎᓕᐅᓚᐅᕐᑐᑦ ᐊᑯᓂᕈᓗᒃ ᐅᑕᖅᑭᔭᐅᓯᒪᔪᒥ ᐊᑐᓕᖅᑎᑦᑎᓂᕐᒧᑦ ᐱᓕᕆᔾᔪᑎᒃᓴᓂ ᐅᕘᓇ ᓄᓇᕗᒧᑦ ᐊᖏᕈᑎᒃᑯᑦ ᒫᔅᓯ 8ᔾᖑᑎᓪᓗᒍ — ᓯᕗᓪᓕᖅᐹᖅ ᑖᓐᓇ ᐱᓕᕆᔾᔪᑎ ᓄᑖᙳᕆᐊᖅᑕᐅᔪᖅ ᑕᐃᒪᙵᑦ ᐊᖏᕈᑎ ᐊᑎᓕᐅᖅᑕᐅᓚᐅᕐᓯᒪᑎᓪᓗᒍ ᐊᕐᕌᒎᓕᕐᑐᑦ 30 ᐅᖓᑖᓂ.

ᐅᓇ ᐊᖏᖃᑎᒌᒍᑎ ᐃᓚᖃᕐᑐᖅ $1.5 ᐱᓕᐊᓐ ᑖᓚᓂ ᐊᕐᕌᒍᓄᑦ ᑕᓪᓕᒪᓄᑦ ᐊᒻᒪ ᐊᕐᕌᒍᑕᒫᓐ ᐃᑲᔫᑎᑖᕈᑎᐅᕙᒡᓗᓂ $77.6 ᒥᓕᐊᓐᑖᓚᓂ.

ᒐᕙᒪᑐᖃᒃᑯᑦ-ᓄᓇᖃᖅᑳᖅᑐᓄᓪᓕ ᐱᓕᕆᖃᑎᒌᒍᑎᓄᑦ ᒥᓂᔅᑕ ᒋᐅᕆ ᐊᓈᓐᑕᓴᖓᕇ, ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᔨᐅᕆᒥ ᑑᕐᖔᓗᒃ, ᐊᒻᒪᓗ ᓄᓇᕗᒧᑦ ᓯᕗᓕᐅᕐᑎ ᐸᐅᓗᓯ ᐊᕿᐊᕈᖅ ᑐᓴᖅᑎᑦᑎᓚᐅᕐᑐᑦ ᓄᓇᕗᑦ ᓯᕗᓂᒃᓴᕗᒥᑦ, ᐋᑐᕚᒥ ᐃᓄᖕᓄᑦ ᐃᓕᓐᓂᐊᖅᑎᓄᑦ ᓯᓚᑦᑐᖅᓴᕐᕕᒃᒥ.

ᐃᑲᔫᑎᒃᓴᖅ ᐃᑲᔪᕈᑎᐅᓂᐊᕐᑐᖅ ᓄᓇᕗᑦ ᑐᙵᕕᒃᑯᓐᓂᑦ, ᓄᓇᕗᒥᑦ ᒐᕙᒪᒃᑯᓐᓂ, ᓄᓇᕗᒥ ᐸᕐᓇᐃᔨᒃᑯᓐᓂᒃ, ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᒃ, ᓄᓇᕗᒥᑦ ᐃᒪᓕᕆᔨᒃᑯᑦ ᑲᑎᒪᔨᖏᑦ, ᓄᓇᕗᒥᑦ ᓄᓇᐅᑉ ᖄᖓᓃᑦᑐᓄᑦ ᑭᒡᓕᓯᓂᐊᖅᑎᑦᑯᓐᓂ, ᐊᒻᒪᓗ ᓄᓇᕗᒥᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂ.

ᐊᖏᖃᑎᒌᒍᑎ ᐃᓚᖃᕐᑐᖅ $50 ᒥᓕᐊᓐ ᑖᓚᓂ ᓄᓇᕗᒥᑦ ᐃᓄᐃᑦ ᐃᑦᑕᕐᓂᓴᓕᕆᔨᒃᑯᓐᓄᑦ, ᐊᑯᓂᕈᓗ ᐅᑕᕿᔭᐅᔪᖅ ᖃᓄᐃᓕᐅᕈᑎᒃᓴᖅ ᐃᓂᖃᖅᑎᑦᑎᔾᔪᑎᐅᓗᓂ ᐊᒻᒪ ᓴᐳᔾᔨᓯᒪᕝᕕᐅᓗᓂ ᓄᓇᕗᒥᑦ ᓄᓇᓕᕆᓂᕐᒧᑦ ᐊᒻᒪ ᐃᓕᖅᑯᓯᕐᒧᑦ ᑎᑎᕋᐅᓯᐅᕙᓪᓕᐊᓯᒪᔪᓂᒃ. ᔫᓂᐅᓚᐅᕐᓯᒪᔪᖅ ᐃᖃᓗᐃᑦ ᓄᓇᓕᐸᐅᔭᖏᓐᓄᑦ ᑲᑎᒪᔩᑦ ᑐᓴᖅᑎᑕᐅᑲᑕᓚᐅᕐᒪᑕ ᐃᓂᒃᓴᓕᐅᕈᒪᔪᓂᒃ ᐃᖃᓗᐃᑦ ᑎᒥᑦᑎᐊᖓᓂ ᒫᓂ Upper Platieau ᒥᒃᓵᓂ.

“ᐅᓇ ᐊᖏᕈᑎ ᐊᖅᑯᑎ ᐃᓅᖃᑎᒌᖕᓂᒃᑯᑦ, ᐃᓕᖅᑯᓯᒃᑯᑦ, ᐊᒻᒪ ᑮᓇᐅᔭᓕᐅᕋᓱᖕᓂᕐᒧᑦ ᖃᓄᐃᖁᓇᒋᑦ ᐃᓄᐃᑦ. ᐃᑲᔫᑎᒃᓴᓂ ᐅᓄᕐᓯᕚᓪᓕᕈᑎᐅᔪᖅ ᐱᖓᓱᐃᑲᓴᖅᖢᓂ ᐆᒪᔪᓕᕆᓂᕐᒧᑦ ᐊᒻᒪ ᐊᖑᓇᓱᒃᑐᓕᕆᔨᓄᑦ,” ᑑᕐᖔᓗᒃ ᐅᖃᕐᑐᖅ.

ᓄᑖᙳᕆᐊᖅᑎᑦᑎᓂᖅ ᐊᑐᓕᖅᑎᑦᑎᓂᕐᒧᑦ ᐱᓕᕆᑎᑦᑎᓂᖅ ᐊᕐᕌᒍᑦ ᖁᓕᑦ ᐱᐊᓂᒃᑳᖓᑕ ᕿᒥᕐᕈᐊᖅᑕᐅᕙᒡᓗᓂ ᒫᓐᓇ ᐊᖏᕈᑎᒋᔭᐅᔪᖅ, ᓄᑖᙳᕆᐊᖅᑕᐅᕙᒡᓗᑎᒃ ᐃᑲᔫᑎᑖᕆᔭᐅᕙᓪᓕᐊᕙᒃᑐᑦ ᐊᒻᒪ ᐃᑲᔫᑎᑖᖅᐸᒃᑐᓂ, ᐊᒻᒪᓗ ᓄᑖᓂ ᐊᑐᖁᔭᐅᓕᖅᑐᓂ ᒪᓕᖃᑦᑕᕆᐊᖃᖅᖢᑎᒃ, ᐅᖃᕐᑐᖅ ᐊᓇᓐᑕᓴᖓᕇ.

ᓄᓇᕗᒧᑦ ᐊᖏᕈᑎ, ᐊᑎᓕᐅᖅᑕᐅᓚᐅᕐᓯᒪᔪᖅ 1993-ᒥ, ᓄᓇᕗᒥᑦ ᐱᒋᐊᖅᑎᑦᑎᔾᔪᑎᐅᓚᐅᕐᓯᒪᔪᖅ 1999-ᒥ, ᑭᓯᐊᓂᓕ ᐊᑐᓕᖅᑎᑕᐅᓯᒪᓂᖓ ᐊᒃᓱᕈᕈᑎᐅᓚᐅᖃᑦᑕᕐᒪᑕ.

ᓄᓇᕗᑦ ᑐᙵᕕᒃᑯᑦ ᒐᕙᒪᑐᖃᒃᑯᓐᓂ ᐃᖅᑲᖅᑐᐃᕕᒃᑰᖅᑎᑦᑎᓚᐅᕐᓯᒪᔪᑦ 2006-ᒥ ᐊᑐᓕᖅᑎᑦᑎᓯᒪᙱᓐᓂᖏᓐᓄᑦ ᐃᓚᖏᓐᓂ ᐊᖏᕈᑎᓃᑦᑐᓂᒃ ᑕᐃᒪᓐᓇᓗ 2015-ᒥ ᑮᓇᐅᔭᖅᑖᕈᑎᐅᓕᓚᐅᕐᓯᒪᓪᓗᓂ. ᐃᖅᑲᖅᑐᐃᕕᒃᑯᑦ ᐋᖅᑭᒃᑕᐅᔪᑎᒍᑦ, ᓄᓇᕗᑦ ᑐᙵᕕᒃᑯᑦ ᑐᓂᔭᐅᓚᐅᕐᓯᒪᔪᑦ $255.5 ᒥᓕᐊᓐ ᑖᓚᓂ ᒐᕙᒪᑐᖃᒃᑯᓐᓂ.

ᐊᓇᓐᑕᓴᖓᕇ ᐅᖃᓚᐅᕐᑐᖅ ᓄᑖᖅ ᐃᑲᔫᑎ ᐱᔭᐅᑕᐃᓐᓇᕐᓂᖓᓂ ᐊᖏᖅᑕᐅᓚᐅᕐᓯᒪᑎᓪᓗᒋᑦ ᐊᖏᕈᑎᓃᑦᑐᑦ.

ᐅᖓᑖᓂ $600 ᒥᓕᐊᓐ ᑖᓚ ᑐᕌᖓᓂᐊᕐᑐᖅ ᐃᓄᐃᑦ ᐃᖅᑲᓇᐃᔭᕈᓐᓇᖅᓯᑎᑕᐅᓂᖏᓐᓄᑦ ᐊᒻᒪ ᐊᔪᕈᓐᓃᖅᓴᕈᑎᓄᑦ ᐊᑯᑦᑐᓂᕆᔭᐅᔪᖅ ᐃᖅᑲᓇᐃᔭᖅᑎᓂ ᐱᔨᑦᑎᕋᐅᑎᓕᕆᓂᕐᒧᑦ ᐋᖅᑭᒋᐊᖅᑕᐅᓇᓱᒡᓗᓂ. ᖃᖓᑦᑎᐊᓵᖅ ᐃᖅᑲᓇᐃᔭᖅᑐᑦ ᒥᒃᓵᓄᑦ ᖃᐅᔨᓴᕐᓂᖅ ᐅᖃᐅᓯᐅᓚᐅᕐᑐᖅ ᑑᕐᖔᓗᒃᒧᑦ ᖃᐅᔨᔾᔪᑎᐅᓚᐅᕐᑐᖅ 10,000 ᐅᖓᑖᓂ ᐃᓄᐃᑦ — 89 ᐳᓴᓐᑎᖏ ᐃᓅᓱᒃᑐᑦ — ᐃᖅᑲᓇᐃᔭᕈᒪᓂᕋᕐᓯᒪᔪᑦ ᒐᕙᒪᒃᑯᓐᓄᑦ.

“ᑕᑯᓛᕐᑐᓯ ᐅᓄᕐᓂᕐᓴᓂ ᐃᓄᖕᓂ ᒐᕙᒪᒃᑯᓐᓄᑦ ᐃᖅᑲᓇᐃᔭᓕᖅᑐᓂ ᐊᕐᕌᒍᓂ ᐊᒡᒋᖅᑐᓂᒃ,” ᐅᖃᕐᑐᖅ. “ᐅᓇ ᐱᓕᕆᐊᖑᔪᒪᔪᓂᒃ ᐅᔾᔨᕐᓇᓛᖑᔪᖅ ᐊᔪᕈᓐᓃᖅᓴᖅᑎᑦᑎᓂᖅ ᒐᕙᒪᒃᑯᑦ ᐃᖅᑲᓇᐃᔮᖏᓐᓄᑦ,” ᑑᕐᖔᓗᒃ ᐅᖃᕐᑐᖅ.

ᐅᓇ ᐊᖏᕈᑎ ᐃᓱᒪᒋᔭᐅᔪᖅ ᐆᒥᖓ 2024-ᒥ ᐃᖅᑲᓇᐃᔮᓂ ᐊᕕᒃᑐᐃᓂᕐᒧᑦ ᐊᖏᕈᑎᖏᓐᓂ ᐅᑯᐊ ᒐᕙᒪᑐᖃᒃᑯᑦ ᐊᒻᒪ ᓄᓇᕗᒥᑦ ᒐᕙᒪᒃᑯᓐᓄ ᐊᒻᒪ ᓄᓇᕗᑦ ᑐᙵᕕᒃᑯᓐᓄ ᐃᓱᒪᓕᐅᕆᖃᑦᑕᓂᕐᓴᐅᔾᔪᑎᐅᓂᐊᖅᑐᖅ ᐊᒻᒪ ᐱᔪᓐᓇᐅᑎᖃᒃᑲᓐᓂᕈᑎᐅᓗᓂ ᒐᕙᒪᑐᖃᒃᑯᑦ ᓄᓇᖁᑎᖏᓐᓂᒃ ᓄᓇᕗᒦᑦᑐᓂᒃ.

ᐊᕿᐊᕈᖅ ᐅᖃᓚᐅᕐᑐᖅ ᑖᒃᑯᐊᒃ ᒪᕐᕉᒃ ᐊᖏᕈᑏᒃ ᓴᓂᓕᕆᒃᓯᒪᔫᒃ, ᒪᑐᒥᖓ ᐱᓕᕆᐊᒃᓴᓂ ᐊᕕᒃᑐᐃᓂᕐᒥ ᐃᓱᒪᓕᐅᕆᔪᓐᓇᕐᓂᕐᓴᐅᓗᑎᒃ ᐊᖏᕐᕋᖏᓐᓂᒃ ᑕᒪᒃᑯᐊ ᐊᑐᓕᖅᑎᑦᑕᕆᐊᓖᑦ ᐱᓕᕆᐊᖑᓗᑎᒃ ᓄᓇᕗᒧᑦ ᐊᖏᕈᑎᓃᑦᑐᑦ ᐊᑐᖅᑕᐅᒐᓗᐊᕐᒪᖔᑕ.

ᐊᕿᐊᕈᖅ ᐅᖃᓚᐅᕐᑐᖅ ᑕᐅᑐᖕᓂᕐᓴᐅᔭᕆᐊᖃᓕᕐᓂᖏᓐᓂᒃ ᐱᓕᕆᕙᓪᓕᐊᓂᖅ ᑕᒪᒃᑯᐊ “ᐃᑲᔫᑎᒃᓴᑦ” ᓄᓇᕗᒧᑦ ᐊᖏᕈᑎᓂ ᐱᔭᐅᔪᓐᓇᕐᓂᕐᓴᐅᓗᑎᒃ.

“ᐃᓱᒪᒻᒪᕆᒃᑐᖓ ᐊᕐᕌᒍᓂ ᖁᓕᓂ ᐱᒋᐊᕐᕕᒋᓇᓱᒃᑕᑦᑎᓐᓃᔾᔮᙱᓪᓗᑕ — ᐊᖏᖃᑎᒌᒍᓐᓇᙱᓪᓗᑎᒃ ᐊᒻᒪᓗ ᐱᒻᒪᕆᐅᓂᖓ ᐃᓕᓴᕆᔭᐅᓯᒪᙱᓪᓗᓂ,” ᐅᖃᕐᑐᖅ.

ᐊᓇᓐᑕᓴᖓᕇ ᐅᖃᓚᐅᕐᑐᖅ ᐱᓕᕆᔾᔪᑎᒃᓴᑦ ᓇᓗᓇᐃᖅᑕᐅᒃᑲᓐᓂᕐᓂᖏᑦ, ᑕᐃᒪᓕ ᖃᐅᔨᓴᖅᑕᐅᔪᓐᓇᕐᓂᐊᖅᑐᑦ ᐊᕐᕌᒍᑦ ᖁᓕᑦ ᐊᓂᒍᖅᐸᑕ. ᐅᖃᒃᑲᓐᓂᖅᖢᓂ ᐅᓇ $77.6 ᒥᓕᐊᓐ ᑖᓚ ᐊᕐᕌᒍᒧᑦ ᐃᑲᔫᑎᒃᓴᖅ ᐊᑯᓂᕈᓗᒃ ᑕᐃᒪᐃᓐᓂᐊᕐᓂᕋᖅᖢᓂᐅᒃ, ᑭᓯᐊᓂᓕ ᓯᕗᓂᑦᑎᓐᓂ ᐋᔩᕈᑎᖃᕆᐊᖃᕐᓂᐊᖅᑐᑦ ᐊᒻᒪ ᐋᖅᑭᒃᓱᐃᒃᑲᓐᓂᕐᓗᑎᒃ ᐱᔭᐅᔭᕆᐊᖃᓛᑦ ᐃᓱᒪᒋᔭᐅᓗᑎᒃ.