ᑐᐊᕕᕐᓇᖅᑐᒥ ᒥᓐᓂᐅᔪᓂ ᐊᒻᒪ ᓄᑕᐅᙱᑦᑐᐊᓗᖕᒥ ᐱᓕᕆᐊᖑᓂᐅᔪᒧᑦ ᑎᒍᔭᐅᓂᐅᔪᒥ

ᐊᕐᕌᒍᒥ ᐃᖃᓗᖕᓂ ᐃᓱᓕᑉᐳᖅ ᖃᔅᓯᒐᓛᓗᖕᓂ ᐃᓵᖅᑐᓄᑦ

ᐃᓕᓴᐱ ᓯᐅᑎᐊᐱᒃ ᑎᒍᒥᐊᖅᐳᖅ ᐊᕙᓗᓯᒪᔪᒥ ᐊᔾᔨᙳᐊᒥ ᓄᑲᖓᓂ ᒥᐊᕆ ᐋᓐ ᐴᒥᖕᕼᐋᒻᒥ ᓯᓚᑖᓂ ᐃᖃᓗᖕᓂ ᐃᖅᑲᖅᑐᐃᕕᖓᓂ ᐅᒃᑐᐱᕆ 29−ᒥ. ᓯᑎᐱᕆᒥ, ᐊᖑᒻᒥ ᐃᖅᑲᖅᑐᒐᒃᓴᙳᓚᐅᖅᐳᖅ ᐃᓄᐊᕐᓂᖅ ᐸᕐᓇᒃᓯᒌᖅᓯᒪᓇᓂ ᐴᒥᖕᕼᐋᒻ ᑐᖁᓂᖓᓂ ᒪᐃ 1986−ᒥ. (ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓ ᔨᐊᕝ ᐱᓚᑦᑎᐊᐃᒧᑦ)

By ᔨᐊᕝ ᐱᓚᑦᑎᐊᐃ – ᓄᓇᓕᖕᓂ ᑐᓴᒐᒃᓴᓕᐅᕐᓂᕐᒧᑦ ᐱᒋᐊᕈᑕᐅᔪᒥ ᑐᓴᒐᒃᓴᓕᐅᖅᑎ

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᐅᓂᒃᑳᕆᓲᖑᕗᑦ ᑐᓴᒐᒃᓴᓂ ᐊᖏᔪᒻᒪᕆᐊᓗᖕᒥ ᐃᓂᐅᔪᒥ. ᐅᓂᒃᑳᓲᖑᕗᖅ 25−ᓂ ᓄᓇᕗᒻᒥ ᓄᓇᓕᐅᔪᓂ, 14−ᓂ ᓄᓇᕕᖕᒥ ᐅᑭᐅᖅᑕᖅᑐᒥ ᓄᓇᓕᐅᔪᓂ, ᐊᒻᒪᓗᑦᑕᐅᖅ ᐅᓂᒃᑳᓕᐊᓂ ᖃᓪᓗᓈᑦ ᓄᓇᖓᓐᓂ ᑲᓇᑕᒥ ᐊᒻᒪ ᑕᐅᕗᖓ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᒧᑦ.

ᐃᖃᓗᐃᑦ — ᓄᓇᕘᑉ ᐊᖓᔪᖅᑳᖃᕐᕕᖓ ᐊᒻᒪ ᓄᓇᓕᐸᐅᔭᑐᐊᖅ — ᑕᑯᒃᓴᐅᑎᑕᐅᒐᔪᒃᐳᖅ ᐅᖃᐅᓯᒃᓴᓕᐊᓂ. ᐊᖏᕐᕋᕆᔭᐅᕗᖅ ᐱᖓᓱᓂ ᓄᓇᖃᖅᑐᓂ ᑐᓴᒐᒃᓴᓕᐅᖅᑎᓂ, ᐊᒻᒪ ᑲᒪᒋᔭᖃᓲᖑᕗᖅ ᐊᒥᓱᓂ ᓄᓇᕗᒻᒥ ᑲᑎᒪᔨᕐᔪᐊᖑᔪᓄᑦ, ᓇᖕᒥᓂᕆᔭᐅᔪᓂ ᐊᒻᒪ ᐃᓕᖅᑯᓯᒥ ᖃᓄᐃᓐᓂᐅᔪᓂ.

ᑐᓴᒐᒃᓴᓕᐅᖅᑎᑦ ᐱᔭᒃᓴᖃᐃᓐᓇᓚᐅᖅᐳᑦ 2024−ᒥ ᑲᒪᒋᔭᖃᖅᖢᑎᒃ ᑐᐊᕕᕐᓇᖅᑐᓂ, ᐱᒻᒪᕆᐅᔪᓂ ᑲᑎᒪᓂᐅᔪᓂ ᐊᒻᒪ ᑭᓱᓕᒫᑦ ᕿᑎᐊᓂ — ᐃᑭᑦᑐᒥ ᓄᖑᑎᕆᓚᐅᕋᓗᐊᖅᑎᓪᓗᒍ ᑐᓴᒐᒃᓴᓕᕆᔨᒃᑯᑦ ᐃᖃᓗᖕᓂ ᐃᖅᑲᓇᐃᔭᕐᕕᖓᑕ ᐃᓂᖓᓂ. ᐅᑯᐊ ᐃᓚᖏᑦ ᐊᕐᕌᒍᒥ ᐊᖏᓛᖑᔪᓂ ᐅᓂᒃᑳᓕᐊᑦ.

ᑎᒍᔭᐅᔪᖃᖅᐳᖅ 1986−ᒥ ᓄᑕᐅᙱᑦᑐᐊᓗᖕᒥ ᐱᓕᕆᓂᐅᔪᒥ

ᐃᓄᐊᖅᓯᓂᐅᔪᒥ 15-ᓂ-ᐅᑭᐅᓕᖕᒥ ᒥᐊᕆ ᐋᓐ ᐴᒥᖕᕼᐋᒻᒥ, ᑐᖁᑕᐅᓪᓗᓂ ᐊᖏᕐᕋᖓᓂ ᐃᖃᓗᖕᓂ 1986−ᒥ, ᖃᐅᔨᔭᐅᓚᐅᙱᓚᖅ ᐊᕐᕌᒍᑦ 30 ᐅᖓᑖᓂ. ᑭᓯᐊᓂ ᓯᑎᐱᕆ 25−ᒥ, ᔫᐱ ᐊᑦᓯᖅᑕᖅ ᓴᖅᑭᓚᐅᖅᐳᖅ ᐃᖅᑲᖅᑐᐃᕕᖕᒥ ᓵᙵᓂᕐᒧᑦ ᐃᖅᑲᖅᑐᒐᒃᓴᐅᓂᖓᓂ ᐃᓄᐊᕐᓂᖅ ᐸᕐᓇᒃᓯᒌᖅᓯᒪᓇᓂ ᐃᓅᓱᒃᑑᑉ ᑐᖁᓂᕆᓚᐅᖅᑕᖓᓂ.

ᑕᐃᓐᓇ ᐅᓪᓗᖓᓂ ᓇᓗᓇᐃᖅᓯᓂᖃᓚᐅᖅᐳᖅ ᒪᕐᕈᐃᖅᓱᕐᓂᖓᓂ ᐊᑦᓯᖅᑕᖅ ᐃᖅᑲᖅᑐᒐᒃᓴᐅᓂᖓᓂ ᐴᒥᖕᕼᐋᒻ ᐃᓄᐊᖅᑕᐅᓂᖓᓄᑦ. ᓯᕗᓂᐊᓂ ᐃᖅᑲᖅᑐᒐᒃᓴᐅᔪᒥ ᖁᔭᓈᖅᑕᐅᓚᐅᖅᐳᖅ ᐃᖅᑲᖅᑐᖅᑕᐅᔾᔪᑎᒃᓴᖃᕐᒪᖔᑦ ᖃᐅᔨᓇᓱᐊᕐᓂᖃᓚᐅᖅᑎᓪᓗᒍ.

ᐅᓄᕐᓂᖅᓴᐅᔪᒥ 50−ᓂ ᐃᓚᒋᔭᐅᔪᓂ ᐊᒻᒪ ᐃᑲᔪᖅᓱᐃᔨᐅᔪᓂ ᐅᐸᓚᐅᖅᐳᑦ ᐃᖅᑲᖅᑐᐃᕕᖕᒥ ᓴᖅᑭᔮᕐᓂᖓᓂ ᓯᕗᓂᐊᓂ ᐊᕐᕌᒎᔪᒥ. ᐃᖅᑲᖅᑐᐃᕕᒃ ᑕᑕᓗᐊᕐᓂᑯᒧᑦ ᐃᓚᖏᑦ ᐃᓄᐃᑦ ᓇᖏᕆᐊᖃᓚᐅᖅᐳᑦ ᐅᕝᕙᓘᓐᓃᑦ ᐃᒃᓯᕚᕐᓗᑎᒃ ᓇᑎᕐᒥ.

ᓄᑖᖑᔪᖅ ᐃᖅᑲᖅᑐᒐᒃᓴᖅ ᖃᓱᒋᐊᕐᓂᐅᓚᐅᖅᐳᖅ ᐴᒥᖕᕼᐋᒻᑯᑦ ᐃᓚᖏᓐᓄᑦ, ᑭᓯᐊᓂ ᓇᓗᓇᐃᖅᓯᓚᐅᖅᐳᑦ ᐅᓇ ᐊᑯᓂᐅᔪᒥ ᐃᖅᑲᖅᑐᖅᑕᐅᓂᕐᒥ ᐱᓕᕆᐊᖑᔪᓐᓇᕐᓂᖓᓂ. ᐊᑦᓯᖅᑕᐅᑉ ᐃᖅᑲᖅᑐᖅᑕᐅᒃᑲᓐᓂᕐᕕᒃᓴᖓᑕ ᐅᓪᓗᖓ ᕗᕕᐊᕆ 11−ᖑᕗᖅ.

“ᓴᐱᓕᖅᑕᐃᓕᑕ,” ᐅᖃᓚᐅᖅᐳᖅ ᐃᓕᓴᐱ ᓯᐅᑎᐊᐱᒃ — ᐴᒥᖕᕼᐋᒻ ᐊᖓᔪᖓ ᐊᒻᒪ ᐃᖃᓗᐃᑦ ᒪᐃᔭᐅᓚᐅᖅᓯᒪᔪᖅ ᐊᒻᒪ ᓄᓇᕗᒻᒥ ᒪᓕᒐᓕᐅᖅᑎᐅᓂᕐᒥ — ᐊᐱᖅᓱᖅᑕᐅᓂᕐᒥ ᑭᖑᓂᐊᒍᑦ ᐊᑦᓯᖅᑕᐅᑉ ᐅᒃᑐᐱᕆ 29−ᒥ ᐃᖅᑲᖅᑐᐃᕕᖕᒥ ᓴᖅᑭᓐᓂᐅᔪᒥ.

“ᓂᕆᐅᖕᓂᖃᕋᓱᐊᖅᐳᖓ ᐅᓇ ᐊᑯᓂᐊᓘᔾᔮᙱᓐᓂᖓᓂ ᐱᓕᕆᓂᐅᔪᒥ, ᐱᐅᔪᓂ ᐃᓱᒪᓇᓱᐊᖅᐳᖓ ᑕᒪᓐᓇ ᐅᕙᑦᑎᓐᓂ ᑲᔪᓯᑎᑦᑎᓯᒪᖕᒪᑦ, ᐃᒻᒪᖄ, ᐱᓕᕆᓂᕐᒥ ᑕᒪᒃᑭᓂ ᐱᓕᕆᓂᐅᔪᓂ ᓯᕗᒻᒧᑦ ᐊᕐᕌᒍᒐᓵᓗᖕᓂ.”

ᐋᒍᔅᑎᒥ ᑐᐊᕕᕐᓇᕐᓂᐅᔪᓂ

ᐋᒍᔅᑎ ᐱᔭᒃᓴᖃᕐᔪᐊᓚᐅᖅᐳᖅ ᑕᖅᑭᐅᓪᓗᓂ ᐃᖃᓗᖕᓄᑦ ᑐᐊᕕᕐᓇᖅᑐᒥ ᐱᔨᑦᑎᕋᖅᑎᒃᑯᓐᓄᑦ.

ᐃᖃᓗᖕᓂ ᖃᑦᑎᕆᔩᑦ ᕿᒥᕐᕈᐊᖅᐳᑦ ᐃᑭᓐᓂᑯᒥ ᐊᒥᐊᒃᑯᔪᒥ ᒪᕐᕉᖕᓂ ᐃᒃᓯᓐᓇᑯᓂ ᓄᓇᓯᐅᑎᓂ ᐊᐅᔭᖅ 2024−ᒥ. (ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓ ᔨᐊᕝ ᐱᓚᑦᑎᐊᐃᒧᑦ)

ᐱᒋᐊᕐᓂᖓᓂ ᑕᖅᑭᐅᔪᒥ, ᖃᔅᓯᒐᓚᖕᓂ ᐃᒃᓯᓐᓇᑯᓂ ᓄᓇᓯᐅᑎᓂ ᐃᑭᑎᑕᐅᓚᐅᖅᐳᑦ ᐊᔾᔨᒌᙱᑦᑐᓂ ᖃᓄᐃᓐᓂᐅᔪᓂ. ᒪᕐᕉᖕᓂ ᒪᒃᑯᒃᑐᓂ ᐋᓐᓂᐊᕕᖕᒧᐊᖅᑎᑕᐅᓚᐅᖅᐳᑦ ᐊᑕᐅᓯᐅᔪᒥ ᐅᑯᓇᓂ ᖃᓄᐃᓐᓂᐅᔪᓄᑦ.

ᐃᖃᓗᖕᓂ ᐊᖑᒻᒥ ᐃᖅᑲᖅᑐᒐᒃᓴᙳᖅᑎᑕᐅᓚᐅᖅᐳᖅ ᐱᔮᖅᑯᒥ ᐃᑭᑎᑦᑎᓂᕐᒥ ᒪᓕᒃᑐᒥ ᐋᒍᔅᑎ 4−ᒥ ᖃᓄᐃᓐᓂᐅᔪᒥ ᐸᓴᒋᔭᐅᓪᓗᓂ ᐃᑭᑎᑦᑎᓇᓱᓚᐅᕐᓂᖓᓂ ᐅᖂᑕᖅ ᑲᑐᔾᔨᖃᑎᒌᖑᔪᑦ ᐊᑦᑎᒃᑐᒥ−ᑭᒡᓕᖃᖅᑐᒥ ᐅᖅᑯᐊᖑᔪᒥ.

ᐅᓪᓛᕐᔪᐊᖓᓂ ᐋᒍᔅᑎ 10−ᒥ, ᑲᓇᑕᒥ ᐸᓖᓯᒃᑯᑦ ᒪᑐᓯᓚᐅᖅᐳᑦ ᐃᓚᖓᓐᓂ ᓯᕗᒧᒋᐊᖅ ᐊᖅᑯᑎᖓᓂ ᐱᓱᒃᑐᒥ ᐊᐳᖅᑕᐅᔪᖃᓚᐅᖅᑎᓪᓗᒍ ᐊᒻᒪ ᑐᖁᑕᐅᓪᓗᓂ ᓄᓇᓯᐅᑎᒧᑦ. ᒪᒃᑯᒃᑐᒥ ᐃᖅᑲᖅᑐᒐᒃᓴᙳᓚᐅᖅᐳᖅ ᐅᓗᕆᐊᓇᖅᑐᒥ ᐊᖁᓐᓂᖓᓂ ᐱᑎᑦᑎᔪᒥ ᑐᖁᓂᕐᒧᑦ.

ᐃᖃᓗᖕᓂᕐᒥᐅᑕᐃᑦ ᐅᖃᓘᑎᖏᑦ ᓯᕙᓂᒐᓚᕈᓘᔭᓚᐅᖅᐳᑦ ᐅᓪᓛᖓᓂ ᐋᒍᔅᑎ 26−ᒥ ᑲᓇᑕᒥ ᐸᓖᓯᒃᑯᑦ ᑐᓂᓯᑎᓪᓗᒋᑦ ᐅᔾᔨᖅᓱᕐᓂᐅᔪᒥ ᐅᖃᐅᔾᔨᔪᒥ ᓄᓇᖃᖅᑎᐅᔪᓂ ᐃᓯᖅᓯᒪᐃᓐᓇᖁᔭᐅᓪᓗᑎᒃ ᐱᔾᔪᑎᖃᖅᑐᒥ ᐊᐅᓚᑕᐅᓂᐅᔪᒥ Upper Plateau−ᒥ. ᐸᓖᓯᒃᑯᑦ ᑕᑯᔭᐅᓚᐅᖅᐳᑦ ᐊᑐᖅᑐᓂ ᐊᒥᓱᓂ-ᖁᑭᕆᐊᖅᓯᑲᐅᑎᒋᔪᓐᓇᖅᑐᓂ ᖁᑭᐅᑎᓂ ᓅᑲᑕᒃᖢᑎᒃ ᓴᓂᓕᖓᓂ. ᐃᓂᖅᑎᕆᓂᐅᔪᖅ ᐲᖅᑕᐅᓚᐅᖅᐳᖅ ᐅᓐᓄᓴᓕᓵᖅᑎᓪᓗᒍ ᑲᓇᑕᒥ ᐸᓖᓯᒃᑯᑦ ᐅᖃᓚᐅᖅᑎᓪᓗᒋᑦ “ᐅᓗᕆᐊᓇᖅᑐᖃᓪᓚᕆᙱᓐᓂᖓᓂ.”

ᓄᓇᕐᔪᐊᒧᑦ ᖃᖓᑕᓂᐅᔪᑦ ᓄᖅᑲᖅᑎᑕᐅᕗᑦ ᐃᖃᓗᖕᓂ

ᕼᐊᓐᓇᓚᖏᓐᓂ ᐊᐅᓪᓛᖅᑎᐅᔪᓂ ᐊᔪᖅᓯᓯᒪᓚᐅᖅᐳᑦ ᖃᔅᓯᒐᓚᖕᓂ ᐃᑲᕐᕋᓂ ᐃᖃᓗᖕᓂ ᒥᑦᑕᕐᕕᖓᓂ ᒪᕐᕉᖕᓂ ᐊᓯᐊᒎᖅᑐᓂ ᖃᓄᐃᓐᓂᐅᔪᓂ ᑕᒪᑐᒪᓂ ᐊᕐᕌᒎᔪᒥ ᔫᓇᐃᑎᑦ ᔅᑕᐃᑦᔅᓄᙵᐅᔪᓂ ᖃᖓᑕᓂᖏᑦ ᓴᖑᑎᑕᐅᑎᓪᓗᒋᑦ.

ᖃᖓᑕᓲᖅ ᐃᓐᑎᐊᒥ ᐃᒃᓯᕚᖅᐳᖅ ᓄᖅᑲᖓᓪᓗᓂ ᐃᖃᓗᖕᓂ ᒥᑦᑕᕐᕕᖓᓂ ᐅᒃᑐᐱᕆ 15−ᒥ ᒥᑦᑕᕆᐊᖃᓚᐅᖅᑎᓪᓗᒍ ᐅᔾᔨᖅᓱᕐᓂᕐᒧᑦ ᑲᑉᐱᐊᓵᕆᓂᐅᔪᒥ. (ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓ ᔨᐊᕝ ᐱᓚᑦᑎᐊᐃᒧᑦ)

ᒪᐃ 7−ᒥ, ᖃᖓᑕᓲᖅ ᕗᕌᓐᔅᒥ ᖃᖓᑕᓂᐅᔪᒥ ᐱᐊᕆᔅᒥ ᓯᐋᑐᓪᒧᑦ ᒥᑦᑕᕆᐊᖃᖅᑎᑕᐅᓚᐅᖅᐳᖅ ᐱᔾᔪᑎᖃᖅᑐᒥ ᐅᓂᒃᑳᕆᔭᐅᔪᒥ “ᐆᓇᕐᓂᐅᔪᒥ” ᑎᐱᖃᕐᓂᖓᓂ ᖃᖓᑕᓲᒥ. ᑕᐃᒃᑯᐊ ᐃᑭᒪᔪᑦ ᐊᐃᔭᐅᓚᐅᖅᐳᑦ ᖃᖓᑕᓲᖅ ᕗᕌᓐᔅ ᖃᖓᑕᑎᑦᑎᒐᒥ ᐃᓇᖏᖅᑎᒃᓴᖓᓂ ᖃᖓᑕᓲᒥ ᐃᖃᓗᖕᓄᑦ ᑕᐃᑲᓂ ᐅᓐᓄᖓᓂ.

ᐅᒃᑐᐱᕆ 15−ᒥ, ᐃᖃᓗᖕᒥᐅᑕᐃᑦ ᓄᓇᖃᖅᑎᐅᔪᑦ ᐃᖅᑯᒻᒪᓚᐅᖅᐳᑦ ᑕᑯᓂᐅᔪᒥ ᖃᖓᑕᓲᖅ ᐃᓐᑎᐊᒥ ᓄᖅᑲᖅᓯᒪᔪᒥ ᒥᑦᑕᕐᕕᖓᓂ. ᑕᐃᓐᓇ ᖃᖓᑕᓂᐅᔪᖅ ᑐᕌᖅᐸᓪᓕᐊᔪᖅ ᓂᐅ ᑕᓕᒥ ᓯᑳᒍᒧᑦ, ᓄᖅᑲᖅᑎᑕᐅᓚᐅᖅᐳᖅ ᐱᔾᔪᑎᖃᖅᑐᒥ ᐅᔾᔨᖅᓱᕐᓂᕐᒧᑦ ᑲᑉᐱᐊᓵᕆᓂᐅᔪᒥ. ᐃᑭᒪᔪᑦ ᓂᐅᔭᕆᐊᖃᓚᐅᖅᐳᑦ ᐊᒻᒪ ᐅᑕᖅᑭᓪᓗᑎᒃ ᐃᑲᕐᕋᓂ 18−ᓂ ᒥᑦᑕᕐᕕᖕᒥ ᐃᒡᓗᖁᑎᖓᓐᓂ ᖃᖓᑕᑎᐅᖅᑳᓚᐅᖅᑳᕋᑎᒃ ᑲᓇᑕᒥ ᐅᓇᑕᖅᑐᒃᓴᒃᑯᓐᓄᑦ.

ᖃᔅᓯᒐᓚᖕᓂ ᐃᓵᕐᓂᐅᔪᓂ ᑐᕌᖅᑎᑦᑎᕗᑦ ᓇᖕᒥᓂᕆᔭᐅᔪᓂ, ᑮᓇᐅᔾᔭᒃᓴᕈᑕᐅᙱᑦᑐᓄᑦ

ᑕᒪᑐᒪᓂ ᐅᑭᐊᒃᓵᖑᔪᒥ ᐱᓇᓱᐊᕈᓯᑕᒫᐸᓗᖕᒥ ᐅᓂᒃᑳᓕᐅᕐᓂᖃᓚᐅᖅᐳᖅ ᐃᓵᖅᓯᓂᐅᔪᓂ ᐊᒻᒪ ᑎᒡᓕᖕᓂᐅᔪᓂ ᐃᖃᓗᖕᓂ ᐊᒃᑐᐃᓂᖃᖅᑐᒥ ᓇᖕᒥᓂᕆᔭᐅᔪᓂ ᐊᒻᒪ ᑮᓇᐅᔾᔭᒃᓴᕈᑕᐅᙱᑦᑐᓄᑦ ᑲᑐᔾᔨᖃᑎᒌᖑᔪᓂ.

ᐃᓃᑦ ᑐᕌᒐᕆᔭᐅᔪᑦ ᐃᓚᖃᓚᐅᖅᐳᑦ First Steps ᐸᐃᕆᕝᕕᒃ, ᓄᓇᑦᑕ ᓱᓇᒃᑯᑖᖏᑦ ᑕᑯᔭᒐᖃᕐᕕᒃ, ᖃᔪᖅᑐᕐᕕᒃ ᓄᓇᓕᖕᓂ ᐊᔪᖅᓴᖅᑐᓄᑦ ᓂᕿᑖᕐᕕᒃ, ᑲᓇᑕᒥ ᑎᑎᖅᑲᕐᓂᐊᕐᕕᖓᓂ, ᓴᓪᓗᕕᓂᖅ ᐊᒻᒪ ᑲᓇᑕᒥ ᓖᔾᔭᓐᒥ.

Staff Sgt. ᑎᐊᕈᓪ ᒋᐅᓪ, ᐃᖃᓗᖕᓂ ᑲᓇᑕᒥ ᐸᓖᓯᒃᑯᑦ ᑎᑎᕋᕐᕕᖓᓂ ᐊᖓᔪᖅᑳᕆᔭᐅᔪᖅ, ᐅᖃᐅᔾᔨᓚᐅᖅᐳᖅ ᓄᓇᓕᐸᐅᔭᒥ ᑲᑎᒪᔨᐅᔪᓂ ᓄᕕᐱᕆ 26−ᒥ ᑕᒪᒃᑭᒐᓚᑦ ᑕᒪᒃᑭᐅᙱᑉᐸᑕ ᐃᓵᕐᓂᐅᔪᑦ ᑕᐃᑯᖓ ᐅᓪᓗᖓᓄᑦ ᐱᔭᐅᓯᒪᓕᖅᐳᑦ. ᐃᑲᕐᕋᒐᓴᓂ ᑭᖑᓂᐊᒍᑦ ᐅᑭᐅᖅᑕᖅᑐᒥ ᐆᒪᔪᓐᓇᕐᓂᕐᒧᑦ ᓂᐅᕕᕐᕕᖓᑕ ᐅᒥᐊᕐᔪᐊᒃᑰᕈᑎᖓᑕ ᐴᕆᔭᖓ ᐃᓵᖅᑕᐅᓚᐅᕆᕗᖅ.

ᓄᑖᖅ ᐃᑳᕐᕕᒃ ᑲᑎᙵᓂᖃᖅᑎᑦᑎᕗᖅ ᓂᐊᖁᙴᒥ ᐃᖃᓗᖕᓄᑦ

ᔫᓇᐃᑎᑦ ᔅᑕᐃᑦᖦᓂ ᐅᓇᑕᖅᑐᒃᓴᓄᑦ-ᓴᓇᔭᐅᔪᒥ ᐃᑳᕐᕕᖓᓂ ᑲᑎᙵᓂᖃᖅᑎᑦᑎᔪᒥ ᓂᐊᖁᙴᒥ ᐃᖃᓗᖕᓄᑦ ᐊᕐᕌᒍᑲᓴᖕᓂ 70−ᓂ ᐃᓇᖏᖅᑕᐅᓚᐅᖅᐳᖅ ᑕᒪᑐᒪᓂ ᐊᕐᕌᒎᔪᒥ.

ᓱᕋᑦᑎᕆᔭᐅᓂᖓᓂ ᓄᑕᐅᙱᑦᑐᒥ ᐃᑳᕐᕕᖕᒥ ᐱᒋᐊᓚᐅᖅᐳᖅ ᐊᐅᔭᐅᔪᒥ.

ᓄᑖᖅ ᐃᑳᕐᕕᒃ, ᓱᓕᖕᓂᖃᖅᑐᒥ ᒪᕐᕈᐃᓕᖓᔪᓄᑦ ᐃᖏᕐᕋᔪᓂ ᐊᒻᒪ ᐱᓱᒡᕕᓕᖕᒥ ᓴᓂᕋᖓᒍᑦ, ᒪᑐᐃᖅᑕᐅᓚᐅᖅᐳᖅ ᓄᕕᐱᕆᒥ ᐊᒻᒪ ᓄᓇᓕᖕᓂ ᖁᕕᐊᓱᒍᑕᐅᔪᒥ ᒪᓕᓚᐅᖅᐳᖅ.

Share This Story

(0) Comments