ᐃᒡᓕᖃᖅᑐᖅ 24ᓂ ᐃᓐᓇᐅᓂᕐᓴᒃᑯᕕᒃ ᑲᖏᖅᖠᓂᖅᒥ ᐃᓱᒪᒋᔭᐅᔪᖅ ᐊᑐᖅᑕᐅᔪᓐᓇᕐᓯᓂᐊᕐᓂᖓᓂᒃ ᑕᒪᑐᒪᓂ ᐊᕐᕌᒍᒥ

For English version, see 24-bed elders home in Rankin Inlet expected to be ready this year

ᓴᓇᔭᐅᓂᖓ ᑲᖏᖅᖠᓂᖅᒥ ᓄᑖᖅ ᐃᓐᓇᒃᑯᕕᒃᓴᖅ ᑭᖑᕙᓯᒃᑐᖅ ᐊᐅᓚᔾᔪᑎᖏᑦ ᑮᓇᐅᔭᐃ ᖄᖏᐅᑎᓯᒪᙱᖢᑎᒃ, ᐅᖃᓚᐅᕐᑐᑦ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ.

ᒐᕙᒪᑐᖃᒃᑯᑦ ᑐᓴᖅᑎᑦᑎᓚᐅᕐᑐᑦ ᑕᒪᓐᓇ ᑕᖅᑭᖅ ᐱᒋᐊᖅᓯᒪᓕᖅᑎᓪᓗᒍ ᑐᓂᓯᓂᐊᕐᓂᕋᖅᖢᑎᒃ $25 ᒥᓕᐊᓐ ᑖᓚᓂ ᐃᓐᓇᐅᓂᕐᓴᓂᒃ ᑲᒪᒋᔭᖃᕐᕕᒃᓴᒥᑦ ᑖᓐᓇᓗ 90 ᐳᓴᓐᑎᖓ ᐱᐊᓂᒃᑕᐅᓕᖅᖢᓂ.

ᐅᓇ ᑮᓇᐅᔭ ᐅᑯᑎᒎᓈᖓᔪᖅ ᑲᓇᑕᒥ ᓴᓇᔭᒃᓴᓕᕆᔨᓂᒃ ᓄᓇᓕᖕᓂ ᐃᒡᓗᒃᓴᓂᒃ (Infrastructure Canada’s Green and Inclusive Community Buildings) ᐱᓕᕆᐊᒃᓴᑎᒍᑦ.

ᐃᑲᔫᑎᒃᓴᓂ ᐱᔪᓐᓇᕈᓐᓇᕐᓗᑎᒃ ᑕᕝᕘᓇ ᐱᓕᕆᐊᒃᓴᑎᒍᑦ, ᐅᑯᐊ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᑦ ᓇᓗᓇᐃᕐᓯᔭᕆᐊᖃᓚᐅᕐᑐᑦ ᐱᓕᕆᐊᒃᓴᐃᑦ 2025ᒥ ᐱᐊᓂᒃᑕᐅᓯᒪᓂᐊᕐᓗᑎᒃ, ᐅᓇ ᐱᓕᕆᕝᕕᒃᒧᑦ ᐅᖃᖅᑎᒋᔭᐅᔪᖅ ᕼᐊᓚ ᑐᐊᓪ.

ᒫᓐᓇᓕ ᓄᓇᕗᒥᑦ ᒐᕙᒪᒃᑯᑦ ᐃᓐᓇᒃᑯᕕᒃᓴᒧᑦ ᐋᖅᑭᒃᓯᒪᔭᖏᑦ ᐊᓯᖏᓐᓄᖔᖅ ᐱᓕᕆᐊᒃᓴᓄᑦ ᐊᑐᖅᑕᐅᔪᓐᓇᕐᓂᐊᓕᖅᑐᑦ, ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᕋᖅᖢᓂ.

ᐅᓇ $59.35 ᒥᓕᐊᓐ ᑖᓚᑐᖅᑐᖅ ᐱᓕᕆᐊᒃᓴᖅ ᐊᐅᓚᑕᐅᔾᔪᑎᖓᒎᖓᔪᖅ, ᓇᓗᓇᐃᓚᐅᕐᒥᔪᖅ.

ᐅᓇ ᓴᓇᔭᒃᓴᓕᕆᔨᓂᒃ ᓄᓇᓕᖕᓂ ᐃᒡᓗᒃᓴᓂᒃ ᐱᓕᕆᐊᒃᓴᖅ ᐃᑲᔪᖃᑦᑕᖅᑐᖅ ᓄᑖᙳᕆᐊᖅᑎᑦᑎᔪᒪᓂᕐᒥᒃ ᐊᒻᒪ ᓄᑖᓂ ᐃᒡᓗᓕᐅᕐᓂᐅᔪᓂᒃ ᓱᕋᐃᔾᔪᑎᒃᓴᖃᓗᐊᙱᑦᑐᓂᒃ ᐊᒻᒪ ᐊᑐᐃᓐᓇᐅᔪᓐᓇᖅᑐᓂᒃ “ᐱᔭᐅᔭᕆᐊᖃᓪᓚᕆᒃᑐᓂᒃ ᐃᑲᔪᖅᑕᐅᓯᒪᙱᐊᖅᑐᓂᒃ ᓄᓇᓕᖕᓂ,” ᐅᖃᕐᓯᒪᔪᖅ ᐱᓕᕆᐊᖑᔫᑉ ᖃᕋᓴᐅᔭᒃᑯᑦ ᓴᖅᑭᔮᒐᖓ.

ᒐᕙᒪᑐᖃᒃᑯᑦ ᐅᑎᖅᑎᑦᑎᖃᑦᑕᖅᑐᑦ ᐊᑐᖅᑕᐅᔪᕕᓂᕐᓂ ᐱᓕᕆᐊᓂᒃ ᐱᒋᐊᖅᑕᐅᓯᒪᔪᓂᒃ ᐊᐃᕆᓕ 1, 2021, ᐅᖃᕐᑐᖅ ᑲᐃᓚᑉ ᓯᐹᓴᕝ, ᐅᖃᓪᓚᒃᑎᒋᔭᐅᔪᖅ ᐃᒡᓗᓴᓕᕆᔨᒃᑯᓐᓄᑦ ᑲᓇᑕᒥ (Infrastructure Canada), ᖃᕋᓴᐅᔭᒃᑯᑦ ᑎᑎᕋᖅᖢᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᐊᒥᐊᒃᑯᒋᔭᐅᔪᖅ ᐱᓕᕆᐊᓄᑦ ᐊᑭᓕᐅᑎᓄᑦ ᐅᓇ $34.35 ᒥᓕᐊᓐ ᑖᓚ ᓱᓕ ᓄᓇᕗᒥᑦ ᒐᕙᒪᒃᑯᓐᓄᑦ ᑲᒪᒋᔭᐅᔪᖅ.

ᑲᖏᖅᖠᓂᖅᒥ ᐅᓇ ᐃᒡᓕᖃᖅᑐᖅ 24ᓂ ᐃᓐᓇᒃᑯᕕᒃᓴᖅ ᐱᐊᓂᒃᑕᐅᓂᐊᓚᐅᕐᓯᒪᔫᒐᓗᐊᖅ 2023ᒥ.

ᑑᐊᓪ ᐅᖃᓚᐅᕐᑐᖅ ᓴᓇᔭᐅᓂᖓᑕ ᑭᖑᕙᕆᐊᕐᓯᒪᓂᖓ ᐊᒃᑐᐃᓂᖃᓚᐅᕐᓂᖓᓂᒃ ᐱᓕᕆᐊᒃᓴᒥ ᐊᒻᒪ ᐊᓯᐊᓂ ᐅᖃᒃᑲᓐᓂᙱᖢᓂ.

ᐅᖃᓚᐅᕐᑐᖅ ᐱᓕᕆᐊᒃᓴᖅ 90 ᐳᓴᓐᑎᖓ ᐱᐊᓂᒃᑕᐅᓯᒪᓕᖕᓂᖓᓂ ᐊᒻᒪ ᑕᒪᑐᒪᓂ ᐊᕐᕌᒍᒥ ᐱᐊᓂᒃᑕᐅᓂᐊᖅᖢᓂ.