‘ᖃᓄᐃᓕᐅᕈᑎ ᐊᑐᐃᓐᓇᙱᑦᑐᖅ,’ ᑯᕕᓂᑯᑦ ᐊᒻᒪ ‘ᐃᓅᓂᕋᖅᑐᖅ ᓱᓕᓇᓂ’

ᐅᑯᐊ ᐱᒻᒪᕆᐅᓛᖑᓚᐅᕐᑐᑦ ᑕᓪᓕᒪᑦ ᐅᓂᒃᑳᑦ ᓄᓇᕗᒥᙶᖅᑐᑦ ᑕᒪᑐᒪᓂ ᐊᕐᕌᒍᒥ

ᓴᐅᒥᐊᓂ, ᒐᕙᒪᑐᖃᒃᑯᑦ ᐅᑭᐅᕐᑕᖅᑐᓕᕆᓂᕐᒧᑦ ᒥᓂᔅᑕᖓ ᑖᓐ ᕚᓐᑐᓪ, ᐳᕋᐃᒻ ᒥᓂᔅᑕ ᔭᔅᑎᓐ ᑐᕉᑑ, ᓯᕗᓕᐅᖅᑎ ᐸᐅᓗᓯ ᐊᕿᐊᕈᖅ ᐊᒻᒪ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᖁᕕᐊᓲᑎᖃᖅᑐᑦ ᔭᓄᐊᕆᒥ ᐊᑎᓕᐅᓚᐅᖅᖢᑎᒃ ᓄᓇᕗᒥ ᒐᕙᒪᓕᕆᓂᕐᒧᑦ ᐊᖏᕈᑎᓂ ᐊᖅᓴᕐᓃᑦ ᑐᔪᕐᒥᕕᒃᒥ ᐃᖃᓗᖕᓂ. (ᐊᔾᔨᙳᐊᖁᑎᒋᔭᐅᔪᖅ ᔨᐊᕝ ᐱᐊᑦᓯᐄ)

By ᐋᑎ ᓵᑭᓯᐊᓐ

ᓄᓇᕗᑦ 25-ᓂ ᐅᑭᐅᖃᓕᖅᑎᓪᓗᒍ ᖃᓄᐃᓕᐅᕈᑎᐅᓯᒪᔪᑦ ᓄᓇᕗᒥᑦ ᑐᓴᐅᒪᔭᐅᓚᐅᖃᑦᑕᖅᑐᑦ ᑲᓇᑕᒥ ᐊᒻᒪ ᓄᓇᕐᔪᐊᒃᑯᑦ ᑐᓴᒐᒃᓴᓕᐅᖅᑎᓂ.

ᒪᑯᓇᙵᑦ ᒐᕙᒪᓕᕆᓂᖅ ᓅᑕᐅᓂᐊᓂᖏᓐᓂ ᒪᐅᖓ ᖃᓄᐃᓕᐅᕈᑎᓂᒃ ᒪᓕᖃᑦᑕᕈᑎᒃᓴᓂ ᐃᖅᑲᖅᑐᐃᕕᒃᑯᑦ ᐱᓕᕆᐊᖃᕐᓂᕐᒧᑦ, ᓄᓇᕗᑦ ᑐᓴᒐᒃᓴᑎᒍᑦ ᐅᖃᐅᓯᐅᑲᑕᒃᑐᖅ.

ᓯᕗᓕᐅᕐᑎ ᐸᐅᓗᓯ ᐊᕿᐊᕈᖅ ᐅᖃᓪᓚᖃᑎᖃᖅᑐᖅ ᑐᓴᒐᒃᓴᓕᕆᔨᓂ ᒪᓕᒐᓕᕆᕝᕕᒃᒥ ᓂᕈᐊᕌᓂᓵᖅᑎᓪᓗᒋᑦ ᒪᓕᒐᓕᕆᔨᒃᑯᑦ ᓯᕗᓕᐅᖅᑎᐅᓂᖓᓂ ᐲᖅᑎᑕᐅᖁᔨᙱᖢᑎᒃ. (ᐊᔾᔨᙳᐊᖁᑎᒋᔭᐅᔪᖅ ᐋᑎ ᓵᑭᓯᐊᓐ)

2024 ᐃᓱᓕᓕᕐᑎᓪᓗᒍ ᐅᑯᐊ ᐅᓂᒃᑳᓂ ᐱᒻᒪᕆᐅᓛᖑᓯᒪᔪᑦ ᐃᓚᖏᑦ.

ᒐᕙᒪᓕᕆᓂᖅ ᓅᑕᐅᓂᐊᕐᓂᖓ

ᒐᕙᒪᑐᖃᒃᑯᑦ ᐊᒻᒪ ᓄᓇᕗᒧᑦ ᓯᕗᓕᐅᕐᑎᑦ ᐅᖃᐅᓯᒃᓴᖃᕈᓘᔭᑲᑕᓚᐅᕐᑐᑦ ᖃᓄᑎᒋ ᐊᖏᑎᒋᓂᐊᕐᓂᖓ ᒐᕙᒪᓕᕆᓂᖅ ᓅᑕᐅᓂᐊᕐᓂᖓ ᓄᓇᓕᖕᓄᑦ.

ᓯᕗᓕᐅᕐᑎ ᐸᐅᓗᓯ ᐊᕿᐊᕈᖅ ᐅᖃᐅᓯᕆᓚᐅᕐᑕᖓ ᐃᒪᓐᓇ “ᖃᓄᐃᓕᐅᕈᑎ ᐊᑐᐃᓐᓇᙱᑦᑐᖅ.” ᓄᓇᕗᒧᑦ ᓴᓂᑑᓂᑯ ᑕᓂᔅ ᐹᑐᓴᓐ ᐅᖃᓚᐅᕐᑐᖅ ᑕᒪᓐᓇ “ᓄᑖᖅ ᖃᓄᐃᓕᐅᕐᓇᐅᓂᐊᓕᕐᑐᖅ.” ᐊᒻᒪ ᐳᕋᐃᒻ ᒥᓂᔅᑕ ᔭᔅᑎ ᑐᕉᑑ ᐅᖃᓕᕐᑐᖅ “ᐅᓇ ᐸᐃᑉᐹᑲᓪᓛᓗᒃ” ᐱᔾᔪᑎᖃᖅᖢᓂ 2 ᒥᓕᐊᓐ ᑭᓛᒥᑕᓂ ᐊᖏᓂᓕᖕᒥ ᓄᓇᒥ.

ᐊᖏᕈᑎ ᐊᑎᓕᐅᖅᑕᐅᓚᐅᕐᑐᖅ ᔭᓄᐊᕆᒥ ᐅᑯᓇᙵᑦ ᐊᕿᖓᕈᖅ, ᑐᕌᑑ, ᒐᕙᒪᑐᖃᒃᑯᑦ ᐅᑭᐅᕐᑕᖅᑐᕐᒥᐅᑕᓕᕆᓂᕐᒧᑦ ᒥᓂᔅᑕ ᑖᓐ ᕚᓐᑐᓪ ᐊᒻᒪ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᐊᖏᓂᖅᐹᖑᔪᖅ ᓄᓇᒥ ᓅᑎᑦᑎᓂᕐᒥ ᑲᓇᑕᒥ.

ᐅᓇ ᐊᑐᓕᕐᓂᐊᕐᑐᖅ ᐊᐃᕆᓕ 2027-ᒥ ᐊᒻᒪᓗ ᓅᑎᑦᑎᓂᐊᖅᖢᑎᒃ ᑲᒪᒋᔭᖃᕐᓂᕐᒥ ᓄᓇᕗᑦ ᓄᓇᖓᓂ, ᐃᒪᖓᓂ ᐊᒻᒪ ᐊᑐᒃᑲᓐᓂᕈᓐᓇᖅᑐᓕᕆᓂᕐᒥ ᒐᕙᒪᑐᖃᒃᑯᓐᓂ ᓄᓇᕗᑦ ᒐᕙᒪᒃᑯᓐᓄᑦ.

ᓄᓇᕗᑦ ᑭᖑᓪᓕᖅᐹᕆᔭᐅᔪᖅ ᑲᓇᑕᒥ ᑕᐃᒪᓐᓇ ᐊᖏᕈᑎᒥ ᐊᑎᓕᐅᖅᖢᑎᒃ, ᐆᒧᖓᓗ ᐹᑐᓴᓐᒧ, “ᐱᐅᓂᕐᐹᒥ ᐊᖏᖃᑎᒌᒍᑎ ᑕᒪᐃᑎᒍᑦ” ᑕᐅᑐᒃᖢᒋᓪᓕ ᐊᖏᕈᑎᒋᔭᐅᓂᑯᑦ ᐊᔾᔨᐸᓗᖏᑦ ᔫᑳᓐᒧᑦ ᐊᒻᒪ ᓄᓇᑦᓯᐊᕐᒧᑦ.

ᐊᖏᖃᑎᒌᙱᑦᑐᑦ ᐊᖏᖃᑎᒌᖃᑦᑕᖅᑐᓂᒃ ᒐᕙᒪᒃᑯᓐᓂ

ᓯᕗᓕᐅᖅᑎ ᐸᐅᓗᓯ ᐊᕿᐊᕈᖅ ᓂᕈᐊᕐᓂᒃᑯᑦ ᓯᕗᓕᐅᖅᑎᐅᙱᓐᓇᖅᑐᖅ ᓄᕕᐱᕆᒥ ᓄᖅᑲᖅᑎᑕᐅᔪᒪᓚᐅᑎᓪᓗᒍ ᐊᐃᕕᓕᒃᒧᑦ ᒪᓕᒐᓕᐅᖅᑎᒧᑦ ᓵᓚᒪᓐ ᒪᓕᑭᒧᑦ.

ᒪᓕᑭ, ᐃᒃᓯᕙᐅᑕᕆᔭᐅᔪᖅ ᒪᓕᒐᓕᐅᖅᑎᑐᐃᓐᓇᕐᓄᑦ, ᐅᖃᓚᐅᕐᑐᖅ ᓴᖅᑭᔮᙱᓗᐊᕐᓂᖓᓄᑦ ᐱᖁᔨᕗᖔᕈᑎᒥ ᐱᒋᐊᕈᑎᐅᓚᐅᕐᓂᕋᖅᖢᓂᐅᒃ.

“ᐊᐱᖅᑯᑎᒋᔭᑦᑎᓐᓄᑦ ᑭᐅᔭᐅᖃᑦᑕᓚᐅᙱᓐᓇᑦᑕ,” ᐅᖃᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐱᖁᔨᕗᖔᕈᑎ ᐱᒋᐊᖅᑎᓚᐅᖅᖢᓂᐅᒃ.ᕉ

ᐱᖁᔨᕗᖔᕈᑎ ᐊᓂᒍᕈᓐᓇᓚᐅᙱᑦᑐᖅ ᐅᑯᐊ  ᒪᓕᒐᓕᐅᖅᑎᑦ ᔮᓇᑦ ᐱᓯᐅᓛᖅ ᐳᕉᔅᑐ, ᐹᐱ ᐊᓇᕕᓗᒃ ᐊᒻᒪ ᐋᑕᒻ ᐋᕆᐊᒃ ᓚᐃᑦᓯᑑᓐ ᐊᕿᐊᕈᖅᒥ ᐃᑲᔪᖅᑐᐃᓚᐅᕐᓂᖏᓐᓄᑦ ᐊᒻᒪᓗ 6 ᒪᓕᒐᓕᐅᖅᑎᑦ ᓂᕈᐊᖅᑎᓪᓗᒋᑦ ᓯᕗᓕᐅᖅᑎᐅᖏᓐᓇᖁᔭᐅᓪᓗᓂ.

ᓂᕈᐊᕌᓂᒃᑎᓪᓗᒋ ᒪᓕᑭ ᐅᖃᓚᐅᕐᑐᖅ “ᐅᖃᐅᓯᒃᓴᖃᙱᓐᓂᕋᖅᖢᓂ” ᐊᐱᕆᔭᐅᓇᓱᒃᑎᓪᓗᒍ ᑕᒪᑐᒧᖓ ᖃᓄᐃᒻᒪᖔ.

ᓱᕋᐃᓯᒪᔾᔪᑎᑦ ᓄᓇᕗᒥᑦ ᐃᒪᓕᕆᕝᕕᐅᕙᒃᑐᓂᒃ

17 ᐅᑯᓇᙵᑦ 25-ᓂ ᓄᓇᕗᒥᑦ ᐃᒪᖃᕐᕕᐅᕙᒃᑐᓂᒃ ᐊᓂᒍᐃᓚᐅᙱᑦᑐᑦ ᖃᐅᔨᓴᖅᑕᐅᔾᔪᑎᖏᓐᓂᒃ ᐊᒻᒪᓗ ᐋᓐᓂᐊᖃᖅᑕᐅᓕᓂᕐᒧᑦ ᐊᒻᒪ ᐱᕐᕈᓗᐊᕿᑦᑕᐃᓕᓂᕐᒧᑦ ᓈᒻᒪᙱᓕᐅᕈᑎᖃᖅᖢᑎᒃ, ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᐋᓐᓂᐊᖃᖅᑕᐃᓕᓂᕐᒧᑦ ᖃᐅᔨᓴᕈᑎᖏᓐᓄᑦ ᐅᓂᒃᑳᖏᑦ ᐅᖃᕐᓯᒪᓚᐅᕐᑐᑦ ᑖᒃᑯᐊᓗ ᑐᓴᐅᒪᔭᕆᐊᖃᕐᓂᕐᒧᑦ ᒪᓕᒐᖅᑎᒍᑦ ᐱᔭᐅᔪᓐᓇᓚᐅᖅᖢᑎᒃ.

ᒪᐃᖑᑎᓪᓗᒍ, ᓄᓇᑦᓯᐊᕐᒥ ᐱᕙᓪᓕᐊᔪᑦ ᒪᕐᕈᐃᓕᖓᔪᒥ ᐅᓂᒃᑳᓂ ᓴᖅᑭᑎᑦᑎᓚᐅᕐᓯᒪᖕᒪᑕ ᐱᕐᕈᓗᐊᕿᑦᑕᐃᓕᓂᕐᒥ ᓱᕋᐃᔾᔪᑎᒋᔭᐅᔪᓂᒃ ᐊᒻᒪᓗ ᐱᖓᓱᑦ ᐃᒪᖃᕐᕕᐅᔪᑦ ᐋᓐᓂᐊᖃᖅᑕᐃᓕᓂᒃᑯᑦ ᐱᓕᕆᐊᖑᑐᐃᓐᓇᕆᐊᖃᖅᖢᑎᒃ.

ᑖᒃᑯᐊ ᐅᓂᒃᑳᓕᐊᖑᔪᑦ ᓄᓇᕗᒥ ᒐᕙᒪᒃᑯᓐᓄᑦ ᐊᒻᒪ ᒐᕙᒪᑐᖃᒃᑯᓐᓄᑦ ᐱᓕᕆᐊᖑᓕᓚᐅᕐᑐᑦ.

ᐊᓐᑏᐲᑯᑦ ᒪᓕᒐᓕᐅᖅᑎᖓᑦ ᐲᑕ ᔫᓕᐊᓐ ᒐᕙᒪᑐᖃᒃᑯᓐᓂᑦ “ᑐᐊᕕᕐᓇᖅᑐᒥᒃ” ᐱᓕᕆᐊᖃᕈᔨᓕᓚᐅᕐᑐᑦ ᓄᓇᕗᒥᑦ ᓄᓇᓖᑦ ᓴᓗᒪᔪᒥ ᐃᒪᖃᕈᓐᓇᖁᓪᓗᒋᑦ ᐊᒻᒪᓗ ᓄᓇᕗᑦ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᒥᓂᔅᑕᖓ ᑕᐃᕕᑦ ᔪᐊᓇᓯ ᐊᐱᕆᔭᐅᒋᓪᓗᓂ ᒪᓕᒐᓕᐅᖅᑎᓄᑦ ᖃᓄ ᐃᒪᖅ ᐱᐅᑎᒋᖕᒪᖔᑦ.

ᔪᐊᓇᓯ ᐅᖃᓚᐅᕐᑐᖅ ᓄᓇᕗᒥᑦ ᒐᕙᒪᒃᑯᑦ ᐋᖅᑭᒃᓯᓯᒪᓂᕋᖅᖢᓂᒋᑦ $127 ᒥᓕᐊᓐᓂ ᓄᓇᓕᖕᓂ ᐊᑐᖅᑕᐅᓂᐊᖅᑐᓂ ᐃᒪᖃᕐᕕᖏᓐᓄᑦ ᐊᒻᒪᓗ ᒐᕙᒪᑐᖃᒃᑯᑦ $2 ᒥᓕᐊᓐᓂ ᓴᓂᕐᕙᐃᒋᓪᓗᑎᒃ ᓄᑖᙳᕆᐊᕈᑎᐅᓂᐊᖅᑐᓂᒃ ᐃᒪᖃᕐᕕᖕᓄᑦ.

ᑯᕇᒪ ᒫᓐᔨ, ᑕᓕᖅᐱᐊᓂ, ᐃᖃᓗᐃᑦ ᐃᖅᑲᖅᑐᐃᕕᖓᓂ ᐊᓂᓕᖅᑎᓪᓗᒍ ᐊᑦᑐᖏᖅᑕᐅᓯᒪᓪᓗᓂ ᓯᕗᓪᓕᖅᐹᒥ ᐱᓕᕆᐊᕆᔭᐅᓕᖅᑎᓪᓗᒍ ᖃᓄᐃᑕᐅᓂᐊᕐᓂᖓᓄᑦ ᐃᓅᓂᕋᖅᓯᒪᓂᖓᓂ ᓱᓕᙱᖢᓂ. ᐅᓪᓗᑦ ᐱᖓᔪᖓᓐᓂ ᐋᖅᑭᒃᓯᓚᐅᕐᑐᑦ ᐊᕐᕌᒍᓂ ᐱᖓᓱᓂ ᑎᒍᔭᐅᓯᒪᓂᐊᕐᓗᓂ. (ᐊᔾᔨᙳᐊᖁᑎᒋᔭᐅᔪᖅ ᔨᐊᕝ ᐱᐊᑦᓯᐄ)

ᐊᕐᕌᒍᑦ ᐱᖓᓱᓂ ᑎᒍᔭᐅᓯᒪᓂᐊᖅᑐᖅ ᐃᓅᓂᕋᖅᓯᒪᓂᕐᒧᑦ ᐃᓅᙱᖢᓂ

ᑯᕇᒪ ᒫᓐᔨ ᔫᓂᒥ ᐃᖅᑲᖅᑐᖅᑕᐅᓚᐅᖅᑐᖅ ᑎᒍᔭᐅᓯᒪᓂᐊᕐᓗᓂ ᐊᕐᕌᒍᓂ ᐱᖓᓱᓂ ᑎᒍᔭᐅᓯᒪᓂᐊᕐᓗᓂ.

ᒫᓐᔨ “ᐃᓅᓂᕋᖅᑐᖅ ᓱᓕᓇᓂ” ᐱᕋᔭᒍᑎᖃᓚᐅᕐᒪᑦ ᓄᓇᕗᑦ ᐃᓄᖏᓐᓄᑦ ᐊᒻᒪᓗ “ᖃᐅᔨᔾᔪᑎᐅᓂᐊᕐᓗᓂ” ᓯᕗᓂᑦᑎᓐᓂ ᓱᓕᖏᓪᓗᑎᒃ ᐃᓅᓂᕋᖅᑐᓄᑦ, ᐅᖃᓚᐅᕐᑐᖅ ᐃᖅᑲᖅᑐᐃᔨ ᒥᐊ ᒪᓅᑭᐅ ᐃᖅᑲᖅᑐᐃᑎᓪᓗᒍ.

ᐅᓇ ᐃᖅᑲᖅᑐᖅᑕᐅᓂᖅ ᐃᓱᓕᒍᑎᐅᓚᐅᕐᑐᖅ ᓄᓇᕐᔪᐊᓕᒫᒧᑦ ᖃᐅᔨᒪᔭᐅᓪᓗᓂ.

2016-ᒥ, ᒫᓐᔨ ᐱᓇᓱᒍᑎᓂ ᑐᓂᓯᓚᐅᕐᓯᒪᖕᒪᑦ ᓄᓇᕗᑦ ᑐᙵᕕᒃᑯᓐᓄᑦ ᐸᓂᖏᓐᓄᑦ ᓈᑎᐊ ᐊᒻᒪ ᐊᒥᐅᕋ ᒋᐅᓪᒧ ᐊᒻᒪᓗ ᑮᓇᐅᔭᖅᑖᖅᖢᑎᒃ $158,254.05 ᐃᓕᓐᓂᐊᕈᑎᒃᓴᖏᓐᓂ ᑲᑭᕙᑯᓐᓂ, ᑖᒃᑯᐊ ᑮᓇᐅᔭᖃᖅᑎᑦᑎᔨᐅᕙᒃᑐᑦ ᕿᑭᖅᑕᓗᒥ ᐃᓄᖕᓂ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓂ.

ᑖᒃᑯᓄᖓ ᐃᑲᔫᑎᓄᑦ, ᑖᒃᑯᐊ ᒪᕐᕈᓕᐊᒃ ᐊᑭᓖᔪᓐᓇᖅᓯᓚᐅᕐᓯᒪᔪᑦ ᐃᓕᓐᓂᐊᕈᑎᖏᓐᓂ ᑯᐃᓐᔅ ᔫᓂᕘᓯᑎᒥ ᑭᖕᔅᑕᓐ ᐋᓐᑎᐅᕆᐅᒥ.

ᑖᒃᑯᐊᒃ ᒪᕐᕈᓕᐊᒃ ᓇᑭᙶᖅᓯᒪᓂᖏᑦ ᐊᐱᖅᑯᑎᐅᑲᑕᓕᓚᐅᕐᓯᒪᔪᑦ ᑐᓴᒐᒃᓴᓕᐅᕈᑎᑎᒍᑦ ᒫᔅᓯ 2023-ᒥ. ᑭᖑᓂᑦᑎᐊᖓᒍᑦ, ᓄᓇᕗᑦ ᑐᙵᕕᒃᑯᑦ ᐲᖅᑎᑦᑎᓕᓚᐅᕐᓯᒪᔪᑦ ᐃᓅᓂᕋᖅᓯᒪᓂᖏᑦ ᐊᒻᒪᓗ ᐸᓖᓯᒃᑯᑦ ᖃᐅᔨᓴᓕᖅᖢᑎᒃ.

ᔪᓚᐃᒥ ᑯᕕᔪᕕᓃᑦ

ᐅᓪᓗᑦ 7 ᐊᑯᓐᓂᖓᓂ ᔪᓚᐃᒥ ᐱᖓᓱᑦ ᓄᓇᕗᒥᑦ ᓄᓇᓖᑦ ᐅᕐᓱᐊᓗᖕᒥ ᑯᕕᒍᔾᔨᓚᐅᕐᓯᒪᖕᒪᑕ.

ᔪᓚᐃ 20-ᒥ 7,000 ᓖᑕ ᑏᓱᓪ ᐅᕐᓱᐊᓗᒃ ᑯᕕᓚᐅᕐᓯᒪᖕᒪᑦ ᒥᑦᑎᒪᑕᓕᒃᒥ; ᐅᓪᓘᒃ ᒪᕐᕉᒃ ᐊᓂᒍᖅᑎᓪᓗᒍ 4,800 ᓖᑕᓂ ᒑᓴᓖᓐᒥ ᑯᕕᔪᖃᖅᖢᓂ ᓴᓂᑭᓗᐊᖅᒥ ᐊᒻᒪᓗ ᔪᓚᐃ 25-ᒥ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐅᖃᓚᐅᖅᖢᑎᒃ 7,000 ᓖᑕ ᑏᓱᒥ ᑯᕕᔪᖃᓚᐅᕐᓂᖓᓂ ᑲᖏᖅᖠᓂᖅᒥᑦ.

ᓴᓂᑭᓗᐊᖅᒥᐅᑕᑦ ᓄᓇᖓᓂ ᕿᒪᐃᔪᑦ ᓄᓇᐃᓐᓇᕐᒧᑦ ᓄᓇᓕᖕᓂ ᒑᓴᓖᓐᒥ ᑕᒪᐅᖓᒥᐊ ᑯᕕᔪᖃᖅᑎᓪᓗᒍ ᔪᓚᐃᒥ. ᐅᖃᖅᑐᖃᑲᑕᓚᐅᕐᑐᖅ ᐃᓚᖏᑦ ᐃᓐᓇᑐᖃᐃᑦ ᓄᓇᓕᖕᓂ ᐃᓄᖃᖅᑐᒥ 1,000-ᓂ ᖃᖓᑕᓲᒃᑯᑦ ᐊᓯᐊᓄ ᓄᓇᓕᖕᓄᐊᖅᑕᐅᔪᖃᓚᐅᕐᓂᖓᓂ. (ᐊᔾᔨᙳᐊᖁᑎᒋᔭᐅᔪᖅ ᑯᕆᔅᑏᓇ ᒧᕼᐅᓐ, ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑐᓂᔭᐅᔪᖅ)

ᑕᒪᐃᓐᓂᓪᓕ ᐱᖓᓱᓂ ᖃᓄᐃᓕᔾᔪᑎᓂᒃ ᐅᓗᕆᐊᓇᖅᑐᖃᓕᓚᐅᙱᑦᑐᖅ ᐃᓄᖕᓄᑦ, ᑭᓯᐊᓂ ᒥᑭᓛᒥ ᑯᕕᓯᒪᔪᑦ ᓴᓂᑭᓗᐊᕐᒥ ᖃᓄᐃᓕᐅᕈᑎᐅᓚᐅᕐᑐᖅ, ᑖᓐᓇᓗ ᐃᓄᖃᖅᖢᓂ 1,000-ᓂ.

ᑐᐊᕕᕐᓇᖅᑐᖅᑕᖃᙱᒃᑲᓗᐊᖅᖢᓂ ᐅᓄᕈᓘᔭᕐᑐᑦ ᓄᓇᖃᑦᑐᑦ ᓄᓇᓖ ᐊᓯᐊᓄᐊᓚᐅᕐᑐᑦ ᓄᓇᐃᓐᓇᕐᒧᑦ ᐃᓚᖏᓪᓗ ᐊᐅᓪᓚᖅᑎᑕᐅᓪᓗᑎᒃ ᑰᔾᔪᐊᕌᐱᒃᒧᑦ.

ᓄᓇᕗᒥᑦ ᒐᕙᒪᒃᑯᑦ ᑕᒪᑐᒧᖓ ᑐᓴᖅᑎᑦᑎᓚᐅᙱᑦᑐᑦ ᑭᓯᐊᓂ ᐃᑲᕐᕋᑦ ᑕᓪᓕᒪᑦ ᐊᓂᒍᖅᑎᓪᓗᒍ ᑯᕕᔪᖅ ᐅᖃᐅᓯᐅᓂᖓᓂ.

ᓄᓇᕗᒥᑦ ᒐᕙᒪᒃᑯᑦ ᑕᐃᔅᓱᒪᓂ ᐊᕙᑎᓕᕆᔨᒃᑯᑦ ᒥᓂᔅᑕᖓᑕ ᑐᒡᓕᖓ ᐃᕚᓐ ᓇᐃᔪ ᑭᖑᓂᐊᒍᑦ ᐅᖃᓕᓚᐅᕐᑐᖅ ᒐᕙᒪᒃᑯᑦ ᑐᓴᖅᑎᑦᑎᑲᐅᑎᒋᓚᐅᖏᓐᓂᖏᓐᓂ ᓰᐲᓰᑯᓐᓄᑦ ᑖᓐᓇ ᐃᖅᑲᓇᐃᔭᖅᑎᐅᔪᖅ ᐅᖃᓚᐅᕐᓂᖓᓄᑦ ᑯᕕᔪᖅ “ᐅᓗᕆᐊᓇᙱᓐᓂᕋᖅᖢᓂᐅᒃ.”

ᐊᖏᕐᕋᐅᓪᓗᑎ ᐅᓪᓗᕈᒻᒥᑕᕐᓂᐊᕐᒪᑕ ᐊᒻᒪ ᐅᑎᕐᑎᓪᓗᒋᑦ ᖃᐅᔨᓕᓚᐅᕐᑐᑦ ᓄᓇᖃᖅᑐᑦ ᕿᒪᐃᓚᐅᕐᓂᖏᓐᓂᒃ ᓄᓇᓕᖕᓂ, ᓇᐃᔪ ᐅᖃᕐᑐᖅ.

Share This Story

(0) Comments