30 ᕿᒻᒦᑦ ᐱᒋᔭᐅᙱᑦᑐᑦ ᖃᓪᓗᓈᓄᑦ ᐊᐅᓪᓚᖅᑎᑕᐅᔪᑦ ᓘᒃᑖᕐᒥ ᑲᖏᕐᓱᒃᒧᐊᖅᑐᖃᓚᐅᕐᑎᓪᓗᒍ

80 ᖃᓂᒋᔭᖓᓃᑦᑐᑦ ᕿᒻᒦᑦ ᑲᐱᔭᐅᓚᐅᕐᑐᑦ ᓄᓇᕕᒃᒥ ᓄᓇᓕᖕᓂ

ᓘᒃᑖᖅ ᒫᑏᓐ ᓇᑑ, ᓂᕐᔪᑎᓄᑦ ᐋᓐᓂᐊᓯᐅᖅᑎ ᐅᑯᓇᓂᒃ ᓯᐅᑦᔅ ᓄᐊᑏᒃᔅ (Chiots Nordiques), ᐱᓚᒃᑐᐃᔪᖅ ᕿᒻᒥᒥᒃ ᑲᖏᕐᓱᒃᒥ. (ᐊᔾᔨᙳᐊᖅ ᐅᕙᙵᑦ ᑖᕝᓂ ᕕᐊᓘ-ᓚᒥᐅ)

By ᔨᐊᕝ ᐱᐊᑦᓯᐃ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For English version, see 30 ownerless dogs flown south after clinic visit to Kangirsuk

ᑯᐸᐃᒃᒥ ᓂᕐᔪᑎᓂᒃ ᓴᐳᓐᓂᐊᖅᑎᓄᑦ ᑲᑐᔾᔨᖃᑎᒌᑦ ᖃᖓᑕᓲᒃᑰᖅᑎᑦᑎᓚᐅᕐᑐᑦ 30ᓂ ᕿᒻᒥᓂᒃ ᖃᓪᓗᓈᑦ ᓄᓇᖓᓄᑦ ᑲᖏᕐᓱᒃᒥ ᑖᒃᑯᐊ ᐱᓕᕆᐊᖑᐊᓪᓚᓚᐅᖅᑎᓪᓗᒋᑦ ᕿᑐᕐᖏᐅᕈᓐᓇᐃᓪᓕᑎᑕᐅᓪᓗᑎᒃ ᑕᕝᕙᓂ ᓄᓇᓕᖕᓂ.

18ᖑᔪᑦ ᐃᑲᔪᖅᑏᑦ ᐅᕙᓂ ᓯᐅᑦᔅ ᓄᐊᑏᒃᔅ (Chiots Nordiques), ᑮᓇᐅᔭᓕᐅᕋᓱᒐᑎᒃ ᐱᓕᕆᔨᐅᔪᑦ ᓂᕐᔪᑎᓄᑦ ᐋᓐᓂᐊᓯᐅᖅᑎᒥᒃ ᓄᓇᓕᖕᓄᐊᖅᑎᑦᑎᕙᒃᖢᑎᒃ ᑯᐸᐃᒃ ᐅᐊᖕᓇᖓᑕ ᓄᓇᖏᓐᓄᑦ, ᐅᕙᓃᓚᐅᕐᒪᑕ ᑲᖏᕐᓱᒃᒥ ᐋᒐᓯ 12ᒥ 15ᒧ ᖃᐅᔨᓴᑲᑕᒋᐊᖅᑐᖅᖢᑎᒃ ᕿᒻᒥᓂᒃ ᐊᒻᒪ ᐱᓕᕆᐊᖃᑲᑕᒃᖢᑎᒃ.

ᑕᕝᕙᓃᑎᓪᓗᒋᑦ ᒫᓂ 100ᖏᓐᓂ ᕿᒻᒥᓂᒃ ᖃᐅᔨᓴᓚᐅᕐᓯᒪᔪᑦ ᐊᒻᒪᓗ 80 ᖃᓂᒋᔮᓂᒃ ᕿᑐᕐᖏᐅᕈᓐᓇᐃᓪᓕᑎᑕᐅᓪᓗᑎᒃ, ᐅᖃᕐᑐᖅ ᑖᕝᓂ ᕕᐊᓘ-ᓚᒥᐅ, ᐊᖓᔪᖅᑳᖅ ᓯᐅᑦᔅ ᓄᐊᑏᒃᔅᓄᑦ.

ᕕᐊᓘ-ᓚᒥᐅ, ᓂᕐᔪᑎᓂᒃ ᐋᓐᓂᐊᓯᐅᖅᑎ ᐱᓕᕆᐊᓪᓚᕆᒋᓪᓗᓂᐅᒃ, ᐅᖃᓚᐅᕐᑐᖅ ᑖᒃᑯᐊ ᑲᑐᔾᔨᖃᑎᒌᑦ ᐱᓕᕆᓕᒪᑦᑎᐊᕐᓂᖏᓐᓂᒃ ᐅᓄᕈᓘᔭᖅᑐᓂᒃ ᓇᒧᙵᐅᑎᑦᑎᓂᕐᒥᒃ ᐃᖅᑲᓇᐃᔭᖅᑎᓂᒃ ᐊᒻᒪᓗ ᓂᕐᔪᑎᓄᑦ ᖃᐅᔨᓴᕈᑎᓂᒃ ᑕᒪᒃᑯᓄᖓ ᐋᓐᓂᐊᕕᓕᕆᔨᓄᑦ.

ᐅᓯᓕᕐᓱᐃᓂᖅ 30ᓂ ᕿᒻᒥᓂᒃ ᐊᒻᒪ ᕿᒻᒥᐊᕐᔪᒃᓂ ᑕᒫᓂᕐᕆᔪᓂᒃ ᖃᖓᑕᓲᒧᑦ ᓵᑕᖅᑕᐅᓯᒪᔪᒧᑦ ᖃᓄᐃᓕᐅᕈᓘᔭᕐᓇᓚᐅᕐᑐᖅ.

“ᐅᑯᐊ ᐅᓄᒻᒪᕆᖕᒪᑕ ᖃᖓᑕᓲᒃᑰᖅᑎᓐᓇᓱᒃᖢᒋᑦ,” ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ.

ᐊᖅᑯᑎᒃᑯᓪᓕ ᐊᔪᕐᓇᙱᓐᓂᕐᓴᒻᒪᕆᒃ, ᐊᒻᒪᓗ ᐊᐅᓪᓚᖅᑎᑦᑎᕙᒃᖢᑕ ᒫᙵᑦ 30ᓂ ᒪᐅᖓ 80ᓄ ᕿᒻᒥᓂᒃ ᐅᐸᒃᑕᑦᑎᓐᓂ.”

ᑖᒃᑯᐊᓕ ᕿᒻᒦᑦ, ᒫᓐᓇ ᖃᓪᓗᓈᓃᓕᕐᑐᑦ, ᑐᓂᐅᖅᑲᖅᑕᐅᓚᐅᕐᑐᑦ ᐊᖏᕐᕋᕆᑲᐃᓐᓇᕐᓂᐊᖅᑕᖏᓐᓄᑦ ᐊᒻᒪᓗ ᓴᐳᓐᓂᐊᖅᑎᒃᑯᓐᓄᑦ ᑎᒍᐊᖅᑖᕆᔭᐅᔪᓐᓇᕆᐊᒃᓴᖏᓐᓂᒃ.

ᓄᓇᕕᒃᒥ, ᓄᓇᓖᑦ ᕿᒻᒥᖃᐅᓕᖃᑦᑕᕐᒪᑕ ᑕᒫᓂᕐᕆᔪᓂᒃ. ᑲᖏᕐᓱᒃ, ᐃᓄᖃᕐᑐᖅ 600 ᑐᖔᓃᑦᑐᓂᒃ ᓇᓗᓇᐃᔭᐃᔾᔪᑎᑎᒍᑦ 2016ᒥ ᑕᐃᒪᐃᖃᑕᐅᖕᒥᖕᒪᑦ.

ᓄᓇᕕᒃᒥ ᓯᕗᓪᓕᖅᐹ ᓂᕐᔪᑎᓄᑦ ᐋᓐᓂᐊᕕᒃ ᒫᓐᓇ ᓴᓇᔭᐅᕙᓪᓕᐊᔪᖅ ᐅᕙᓂ ᑰᔾᔪᐊᖅᒥ. ᒪᑐᐃᕐᐸᑦ ᐊᕐᕌᒍ ᐃᓱᒪᒋᔭᐅᔪᖅ ᓂᕐᔪᑎᓄᑦ ᐋᓐᓂᐊᓯᐅᖅᑎᓂᒃ ᑲᒪᒋᔭᖃᖃᑦᑕᕐᓂᐊᕐᓗᑎᒃ ᒪᐅᓇ ᐱᓚᒃᑐᐃᕙᒡᓗᑎᒃ ᐊᒻᒪ ᑲᒪᒋᔭᖃᕐᓗᑎᒃ ᓂᕐᔪᑎᓂᒃ ᑕᒫᓂ.

ᑭᓯᐊᓂᓕ ᑖᓐᓇ ᐋᓐᓂᐊᕕᒃ ᐊᑐᒋᓐᓂᖓᓂᒃ ᑖᒃᑯᐊ ᕿᒻᒦᑦ ᐃᓚᖏᓐᓂ ᓄᓇᓕᖕᓂ ᑐᖁᑕᐅᑐᐃᓐᓇᕆᐊᖃᕐᒪᑕ ᓄᓇᖃᖅᑐᓂᒃ ᐅᓄᕐᓯᑎᑦᑕᐃᓕᒪᔭᐅᓗᑎᒃ — ᑕᐃᒪᓐᓇᓗ ᐅᓇ ᕕᐊᓘ-ᓚᒥᐅ ᐅᖃᓚᐅᖅᖢᓂ ᐅᓄᕐᓂᕐᓴᐃᑦ ᑕᐃᑕᐃᓕᐅᖁᔨᙱᓐᓂᖏᓐᓂᒃ.

“ᐋᓐᓂᐊᓯᐅᖅᑎᒃᑯᑦ ᐋᖅᑭᒍᑎᒃᓴᖃᖁᔨᖕᒪᑕ,” ᐅᖃᕐᑐᖅ.

ᐅᑯᓂᖓ ᓯᐅᑦᔅ ᓄᐊᑏᒃᔅ ᑲᖏᕐᓱᒃᒧᑦ ᑎᑭᑎᑕᐅᓇᓱᒃᖢᑎᒃ ᐊᕐᕌᒍᓕᒫᖅ ᓇᑉᐸᕐᓗ ᐸᕐᓇᒃᑕᐅᓚᐅᕐᑐᖅ, ᕕᐊᓘ-ᓚᒥᐅ ᐅᖃᓚᐅᖅᑐᖅ. ᓄᓇᕙᒡᔪᐊᕐᓇᖅ-19ᒧᑦ ᖃᓄᐃᓕᐅᖅᑕᐃᓕᓂᖅ ᓄᖅᑲᖓᔾᔪᑎᐅᓚᐅᕐᑐᖅ ᐅᓄᕈᓘᔭᒻᒪᕆᒃᑐᓂᒃ ᐃᑲᔪᖅᑎᓂᒃ ᓄᓇᓕᖕᓄᐊᕈᓐᓇᙱᑎᑦᑎᔾᔪᑎᐅᓪᓗᓂ ᐊᒻᒪᓗ ᑕᒪᓐᓇ ᐊᕐᕌᒍ ᐱᒋᐊᕐᓯᒪᓕᕐᑎᓪᓗᒍ ᑲᖏᕐᓱᒃ ᓄᑖᒥᒃ ᒪᐃᔭᑖᓚᐅᕐᓯᒪᖕᒪᑦ ᐊᒻᒪ ᑲᑎᒪᔨᓂᒃ ᑕᒪᒃᑯᓂᖓ ᐱᓕᕆᐊᓂᒃ ᖃᐅᔨᑎᑕᐅᔭᕆᐊᓕᖕᓂᒃ.

ᑭᖑᓪᓕᕐᒥ ᑲᖏᕐᓱᒃᒧᑦ ᐸᕐᓇᒃᐸᓪᓕᐊᓕᕐᒥᔪᑦ ᐊᕐᕌᒍᒧᑦ,, ᕕᓕᐅ-ᓚᒥᐅ ᐅᑲᓚᐅᕐᑐᖅ, ᐊᒻᒪᓗ ᐃᓱᒪᓪᓗᓂ ᐅᓄᕐᓂᕐᓴᐃᑦ ᓄᓇᓖᑦ ᕿᒻᒥᖏᓐᓂᒃ ᕿᑐᕐᖏᐅᕈᓐᓇᐃᓪᓕᑎᑕᐅᑎᑦᑎᖁᓪᓗᓂᒋᑦ ᑕᒪᐅᓇ.

Share This Story

(0) Comments

Join the Conversation

Your email address will not be published. Required fields are marked *

*