4 ᓄᓇᕗᒻᒥ ᐃᓄᑐᖃᐃᑦ ᐊᖏᕐᕋᖅᐳᑦ ᑲᖏᖅᖠᓂᕐᒧᑦ

For English version, see 4 Nunavut elders come home to Rankin Inlet

ᐃᓚᖏᑦ ᐃᓄᑐᖃᐃᑦ ᐊᖏᕐᕋᖅᐸᓪᓕᐊᕗᑦ ᓄᓇᕗᒻᒧᑦ ᐊᐅᓪᓚᖅᓯᒪᓚᐅᕐᓂᖏᓐᓂ ᐋᑐᕚᒥ, ᐅᖃᖅᐳᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔮᓐ ᒪᐃᓐ.

ᓯᕗᓪᓕᐊᔪᓂ ᑲᑎᙵᓂᐅᔪᓂ ᐃᓄᑐᖃᕐᓂ ᐃᒡᓗᖃᕐᓂᐊᖅᑐᓂ ᓄᑖᖑᔪᒥ 24-ᓂ ᐃᒡᓕᓕᖕᒥ ᑲᖏᖅᖠᓂᕐᒥ ᐊᑯᓂᐅᔪᒥ ᐸᖅᑭᔭᐅᕝᕕᖕᒥ ᐃᒡᓗᕐᔪᐊᖓᓄᑦ ᐅᑎᓚᐅᖅᐳᑦ ᓄᓇᕗᒻᒧᑦ ᐱᓇᓱᐊᕈᓯᐅᔪᒥ.

“ᐅᓪᓗᒥᐅᔪᒥ, ᐅᑯᐊ ᑲᑎᙵᓂᐅᔪᑦ ᐃᓄᑐᖃᕐᓂ ᐱᕗᑦ ᐅᖓᕙᕆᐊᖅᑕᐅᓯᒪᔪᒥ ᐃᓄᑐᖃᕐᓂ ᐸᖅᑭᓂᐅᔪᒥ ᐅᕙᓂ ᓄᓇᕗᑦᑎᓐᓂ,” ᒪᐃᓐ ᐅᖃᓚᐅᖅᐳᖅ ᒪᐃ 29−ᒥ, ᐅᖃᓪᓚᒃᖢᓂ ᐃᓄᒃᑎᑐᑦ ᒪᓕᒐᓕᐅᕐᕕᖕᒥ.

“ᑭᕙᓪᓕᕐᒥ ᐃᒡᓗᕐᔪᐊᖓ ᑲᖏᖅᖠᓂᕐᒥ ᓄᑖᖑᔪᒥ ᐊᖏᕐᕋᕆᓂᐊᓕᖅᐸᖓᑦ.”

ᑎᓴᒪᓂ ᐃᓄᑐᖃᕐᓂ ᑎᑭᑦᑐᖃᖅᓯᒪᓕᖅᐳᖅ ᒫᓐᓇᒧᑦ ᑎᑭᖦᖢᒍ ᐊᒻᒪ ᐅᓄᕐᓂᖅᓴᐅᔪᓂ ᑎᑭᑦᑐᖃᓕᒑᕗᑦ. ᒪᐃᓐ ᐅᖃᓚᐅᖅᐳᖅ ᐅᑭᐅᖅᑕᖅᑐᓕᐊᕐᓂᐊᖅᐳᑦ ᐱᖓᓱᓂ ᑎᓴᒪᓂᒡᓘᓐᓃᑦ ᑐᐊᕕᕐᓇᖅᑐᒃᑯᑦ ᖃᖓᑕᓲᒃᑯᑦ ᐱᓇᓱᐊᕈᓯᑕᒫᒥ.

“ᖁᑦᑎᓛᖑᔪᒥ ᑭᒡᓕᐅᔪᒥ ᐱᕙᓪᓕᐊᑎᑕᐅᓂᖓᓂ ᐃᒡᓗᕐᔪᐊᒥ — ᓯᕗᓪᓕᖅᐹᑦᑎᐊᖑᔪᒥ ᑕᐃᓴᐃᑦᑑᓂᖓᓂ ᓄᓇᕗᒻᒥ — ᐅᑕᖅᑭᕗᖅ ᐃᓕᖅᑯᓯᒥᒃ ᓴᙱᒋᐊᖅᑎᑦᑎᔪᒥ, ᐊᑦᑕᓇᙱᑦᑐᒥ ᐊᒻᒪ ᐊᖏᕐᕋᐅᔫᔮᖅᑐᒥ ᐊᕙᑎᐅᔪᒥ,” ᐅᖃᓚᐅᖅᐳᖅ.

“ᖃᐅᔨᒪᕗᒍᑦ ᐃᓄᑐᖃᐃᑦ ᑕᐃᑲᓂ ᑐᔪᕐᒥᔪᐃᑦ ᑐᓴᕈᒪᓂᐊᕐᓂᖏᓐᓂ ᐃᓄᒃᑎᑐᒻᒥ ᐅᖃᓪᓚᒃᑕᐅᓂᖓᓂ. ᐃᓄᐃᑦ ᐱᒻᒪᕆᐅᒋᔭᐅᔪᓂ ᐱᔪᒪᕗᑦ ᐊᒻᒪ ᐃᓕᖅᑯᓯᖓᓂ ᑕᑯᒃᓴᐅᑎᑕᐅᔪᒥ ᖃᓄᐃᓕᐅᕈᑕᐅᔪᓂ ᐊᒻᒪ ᓂᕿᓂ ᓂᕆᑎᑕᐅᓂᖏᓐᓂ.”

24-ᓂ ᐃᒡᓕᓕᒃ ᐃᒡᓗᕐᔪᐊᖅ ᐱᔭᕇᖅᑕᐅᓚᐅᖅᐳᖅ ᔭᓄᐊᕆᒥ ᒪᓕᒃᑐᒥ ᖃᔅᓯᒐᓚᖕᓂ ᑭᖑᕙᕆᐊᕐᓂᐅᔪᓂ ᐊᒻᒪ ᒪᑐᐃᓚᐅᖅᐳᖅ ᒪᐃᒥ.

22−ᓂ ᐃᓕᓯᒪᐃᓐᓇᕐᓂᐊᖅᑐᓂ-ᐸᖅᑭᔭᐅᓂᕐᒥ ᐃᒡᓕᖏᑦ ᐃᓐᓄᒃᑕᐅᔪᐃᓐᓇᐅᓂᐊᖅᐳᑦ ᔪᓚᐃᒥ, ᐅᖃᓚᐅᖅᐳᖅ ᓵᒪᐃᓐ ᑎᐅᒍᕌᓯᐊᔅ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᖅᑎᐅᔪᒥ. ᐊᐃᑉᐸᖏᑦ ᒪᕐᕉᒃ ᐃᒡᓕᐅᔪᑦ ᕿᓚᒻᒥᐅᔪᒥ ᐊᔪᕐᓇᖅᑐᖅᓯᐅᖅᑐᒥ ᐸᖅᑭᓂᐅᔪᓅᖅᐳᑦ.

ᒪᐃᓐ ᐅᖃᓚᐅᖅᐳᖅ ᐱᓕᕆᓂᐅᔪᒥ ᐃᖅᑲᓇᐃᔭᖅᑎᑖᕐᓂᕐᒥ ᐊᒻᒪ ᐱᓕᒻᒪᒃᓴᐃᓂᕐᒥ ᐃᓄᖕᓂ ᐃᖅᑲᓇᐃᔭᕐᓂᖏᓐᓂ ᐃᒡᓗᕐᔪᐊᒥ ᑲᔪᓰᓐᓇᖅᐳᖅ.

$59.4-ᒥᓕᐊᓐᓂ ᐱᓕᕆᐊᒃᓴᐅᔪᖅ ᐊᑕᐅᓯᐅᓪᓗᓂ ᐱᖓᓱᓂ ᐊᑯᓂᐅᔪᒥ ᐸᖅᑭᕝᕕᐅᔪᓂ ᐃᒡᓗᕐᔪᐊᖑᕗᑦ ᒐᕙᒪᒃᑯᑦ ᐸᕐᓇᐃᓂᖏᓐᓂ ᓴᓇᓂᕐᒧᑦ ᓄᓇᕗᒻᒥ 2030−ᖑᕋᓱᖕᓂᖓᓂ ᐃᓚᒋᔭᐅᓪᓗᓂ ᐃᓄᑐᖃᙳᕐᓂᕐᒥ ᐱᒃᓴᐅᓱᒋᓂᕐᒥ ᐸᕐᓇᒍᑕᐅᔪᒥ.

ᐊᑯᓂᐅᔪᒥ ᐸᖅᑭᔭᐅᕝᕕᖕᒥ ᐃᒡᓗᕐᔪᐊᖓᓄᑦ ᐱᓕᕆᐊᒃᓴᐅᔪᑦ ᐸᕐᓇᒃᑕᐅᕙᓪᓕᐊᕗᑦ ᐃᖃᓗᖕᓄᑦ ᐊᒻᒪ ᐃᖃᓗᑦᑑᑦᑎᐊᕐᒥ.