$80,000 ᐅᖃᓕᒫᒐᓕᐅᕐᓂᒧᑦ ᓵᓚᒃᓴᐅᓯᐊᕐᒥ ᓵᓚᒃᓴᓚᐅᕐᑐᖅ ᐱᓇᓱᒍᒪᔪᖅ ᐅᖃᓕᒫᒐᓕᐊᖏᑦ ᐋᖅᑭᒃᓱᖅᑕᐅᑎᓐᓂᐊᕐᓗᓂᒋᑦ

For English version, see $80,000 literacy prize winner to plot path to publication

ᐱᒋᐊᖅᐸᓪᓕᐊᓕᕐᑐᖅ ᐃᓄᒃᑐᑦ ᑎᑎᕋᖅᑎ ᑖᓇ ᐋᑕᒻᔅ ᐃᓱᒪᒃᓴᖅᓯᐅᕆᐊᖃᕐᓂᐊᕐᑐᖅ ᕿᑲᕐᓇᐅᓂᖓᓂ, ᐊᒻᒪᓗ ᓇᓕᐊᒃ ᐃᓱᒪᓕᐅᕈᑎᒋᔭᕆᐊᖃᕐᑕᖓ ᐊᒃᑐᐊᓇᓂ $80,000 ᖃᓄᖅ ᐊᑐᕐᓂᐊᕐᓂᖓᓄᑦ.

ᐅᓇ ᓵᓚᒃᓴᐅᓯᐊᖓᑕ ᐊᖏᑎᒋᓂᕆᓚᐅᕐᑕᖓ ᐋᑕᒻᔅᒧᑦ ᑐᓂᔭᐅᓚᐅᕐᑐᖅ ᑎᓯᐱᕆ 4-ᒥ ᓵᓚᒃᓴᐅᓯᐊᖅᖢᓂ ᐱᖓᔪᒋᔭᐅᔪᒥ ᐊᕐᕌᒍᒥ ᐃᓄᒃᑑᖅᑕ! ᐃᓄᒃᑐᑦ ᑎᑎᕋᐅᓯᕐᓄᑦ ᓵᓚᒃᓴᐅᓯᐊᕐᒥ, ᑐᓴᖅᑕᐅᑎᑦᑎᔾᔪᑎᐅᑎᓪᓗᒍ ᑎᓯᐱᕆ 4-ᒥ ᐃᓕᓴᕐᓯᑲᑕᖕᓇᐅᑎᓪᓗᒍ ᐃᖃᓗᖕᓂ.

ᓴᖅᑭᔮᒐᖅᑎᒍ ᑲᑎᒪᖃᑎᖃᓚᐅᖅᖢᑎᒃ ᑭᒡᒐᖅᑐᐃᔨᓂ ᓄᓇᕗᑦ ᑐᙵᕕᒃᑯᑦ ᑎᒥᖓᓂ, ᑖᒃᑯᐊ ᐊᐅᓚᑦᑎᔨᐅᔪᑦ ᓵᓚᒃᓇᐅᓯᐊᕐᒥ, ᐋᑕᒻᔅ ᐅᖃᓚᐅᕐᑐᖅ ᖃᐅᔨᓚᐅᕐᓂᕋᖅᖢᓂ ᑖᓐᓇ ᑮᓇᐅᔭᖅ ᐃᓗᐃᑦᑑᓪᓗᓂ ᑐᓂᔭᐅᖃᑦᑕᙱᓐᓂᖓᓂᒃ ᑭᓯᐊᓂᓕ ᐊᕕᒃᑐᖅᑕᐅᓯᒪᕙᒃᖢᓂ ᐊᕐᕌᒎ ᐃᓗᐊᓂ ᐱᖃᑦᑕᕐᓂᐊᖅᖢᓂᒋᑦ ᑎᑎᕋᖃᑦᑕᕐᓂᖓ ᐱᕙᓪᓕᐊᓇᓱᖕᓂᖓᓂ.

ᑐᙵᕕᒃ ᐃᑲᔫᑎᒃᓴᖃᕐᑐᖅ ᖃᓄᐃᓕᐅᕈᑎᐅᕙᓪᓕᐊᔪᓐᓇᖅᑐᓂᒃ.

“ᑕᐃᒪᓐᓇᐅᖂᔨᒻᒪ,” ᐅᖃᕐᑐᖅ. “ᓲᕐᓗ ᑳᓐᑐᓛᕆᓪᓗᒍ. ᐊᖏᖃᑎᒌᒍᑎ.”

ᐋᑕᒻᔅ, ᑲᖏᖅᖠᓂᖅᒥᐅᑕᖅ, ᐅᖃᓚᐅᕐᑐᖅ ᑎᑎᕋᖅᐸᓪᓕᐊᓂᖓᒍᑦ ᖃᓄᐃᓕᐅᕈᑎᒋᔪᓐᓇᖅᑕᖏᓐᓂ ᐃᓱᒪᒃᓴᖅᓯᐅᕈᑎᖃᕐᓂᐊᕐᓂᕋᖅᑐᖅ ᓄᑖᒥ ᐊᕐᕌᒎᓂᐊᕐᑐᒥᑦ, ᐅᕝᕙᓘᓐᓃᑦ ᐃᓄᒃᑐᑦ ᐅᖃᐅᓯᓕᕆᔨᓂ ᐱᓕᕆᖃᑎᖃᕐᓗᓂ ᐅᐱᕐᖔᖑᓂᐊᕐᑐᖅ. ᐅᕝᕙᓗᑭᐊᖅ ᐃᓄᒃᑐᑦ ᐅᓂᒃᑳᓕᐊᖏᑦ ᐋᖅᑭᒃᓱᖅᑕᐅᑎᓐᓇᓱᒡᓗᓂᒋᑦ.

“ᖃᐅᔨᓇᓱᒃᑐᖓ,” ᐅᖃᕐᑐᖅ. “ᐅᓂᒃᑳᓕᐊᕋ ᐱᓕᕆᕈᓘᔭᕐᓇᓚᐅᕐᑐᖅ — ᑕᐃᒪᙵᐸᓗᒃ, ᑎᑎᕋᕈᓘᔭᕐᓇᖅᖢᓂ.”

ᐋᑕᒻᔅ ᓵᓚᒃᓴᐅᑎᖃᓚᐅᕐᑐᖅ ᐅᓂᒃᑳᓕᐊᕆᓚᐅᕐᓯᒪᔭᖓᓂ ᐆᒥᖓ ᓄᑲᑉᐱᐊᕐᒥ 9-ᓂ ᐅᑭᐅᓕᒃᒥ ᐊᑎᖃᖅᖢᓂ ᑲᑦᑕᒐᖅ ᑖᓐᓇᓗ ᓵᓚᒋᔭᐅᕙᖕᓂᖓᓂ ᐊᓂᒍᐃᑎᑦᑎᓚᐅᕐᓂᖓᓂ, ᐊᖅᑯᑎᖓᒍᓪᓗ ᐊᓈᓇᑦᑎᐊᖓᓄᑦ ᐅᖃᓪᓚᐅᔾᔭᐅᕙᒃᖢᓂ ᐊᒻᒪᓗ ᖃᓄᐃᓕᐅᕈᓘᔭᑲᑕᙳᐊᖅᖢᓂ.

“ᓲᖃᐃᒻᒪ, ᑭᓇᐅᓂᕗᑦ ᖃᐅᔨᑦᑎᐊᕌᖓᑦᑎᒍᑦ ᖁᕕᐊᓱᖕᓂᕐᓴᐅᖃᑦᑕᕋᑦᑕ. ᐃᓱᒫᓘᑎᖃᕈᓐᓃᕐᖢᑕ. ᐃᓱᒪᒋᔭᕗᓪᓗ ᐊᓯᙳᖅᓗᓂ,” ᐋᑕᒻᔅ ᐅᖃᕐᑐᖅ.

“ᐃᓄᐃᑦ ᐅᓂᒃᑳᓕᐊᖏ ᖃᐅᔨᕚᓪᓕᕈᑎᖃᖃᑦᑕᕐᒪᑕ ᐊᒻᒪᓗ ᐱᐅᓛᑦ ᐅᓂᒃᑳᑦ, ᖃᐅᔨᔭᒃᑯᑦ, ᐃᓅᓯᕐᒥ ᐊᑐᖅᑕᐅᖃᑦᑕᕐᓂᑯᑦ ᐃᓐᓇᕐᓄᑦ. ᐃᓅᓯᖏᓐᓂ ᐊᒃᓱᕈᕐᓇᖅᑐᓂᒃ ᐊᑐᕐᓯᒪᖕᒪᑕ, ᖁᕕᐊᓇᙱᑦᑐᐊᓗᖕᓂ, ᐃᓅᓇᓱᖕᓂᕐᒥ ᑕᒪᒃᑯᐊᓗ ᐃᓅᓯᕆᑐᐃᓐᓇᖅᖢᓂᔾᔪ ᖃᐅᑕᒫᓐ.”

ᐋᑕᒻᔅ ᐊᕐᕌᒍᖃᓕᕐᖢᓂ 9-ᓂ ᑐᓵᖃᑦᑕᓚᐅᕐᓯᒪᕙ ᐃᓐᓇᐃᑦ ᐅᓂᒃᑳᖏᓐᓃ ᐆᑐᓇᖅ ᑲᑦᑕᒐᖅᑎᑐ? “ᐅᖃᓪᓚᐃᓐᓇᐅᔭᓚᐅᕐᓯᒪᔪᖓ,” ᐅᖃᕐᑐᖅ. “ᑐᓵᑲᑕᖕᓂᕐᓴᐅᓕᓚᐅᕐᑐᖓ — ᑐᓵᕙᒃᖢᖓ — ᐊᖏᓂᕐᓴᐅᓕᕐᑎᓪᓗᖓ.”

ᐃᖅᑲᓇᐃᔭᖃᑦᑕᓕᖅᖢᓂ, ᐋᑕᒻᔅ ᓂᐱᓕᐅᕐᓯᒪᔪᓂ ᑐᓵᑲᑕᖃᑦᑕᓚᐅᕐᒪᑦ ᐅᕙᓂ ᓰᐲᓰ ᐅᑭᐅᕐᑕᖅᑐᕐᒥ ᑲᑎᑕᐅᕙᓪᓕᐊᓯᒪᔪᓂ ᐅᑯᓄᖓ ᐅᖃᓪᓚᒃᑎᐅᑎᓪᓗᒐ ᑐᓵᔭᒃᓴᑦ ᑭᕙᓪᓕᖅᒥᑦ.

ᑐᑭᓕᐅᕐᑎᐅᓪᓗᓂ, ᐃᓐᓇᑐᖃᕐᓄᑦ ᓂᐱᓕᐅᕐᑕᐅᓯᒪᔪᓂᒃ ᑎᑎᕋᖅᐸᓪᓕᐊᓯᒪᖕᒪ ᐅᑯᓄᖓ ᓄᓇᕗᒥᑦ ᐅᖃᐅᓯᓕᕆᓂᕐᒧᑦ ᑲᑎᒪᔨᐅᓚᐅᕐᑐᓄᑦ ᒫᓐᓇᓕ ᐊᑎᖃᖔᓕᕐᑐᑦ ᐃᓕᑕᖅᓯᓂᖅ ᐊᒻᒪᓗ ᖃᓪᓗᓈᑎ ᑐᑭᓕᐅᕆᕙᒃᖢᓂᒋᑦ.

“ᑐᓵᓯᒪᒐᒪ ᐊᒥᓱᒻᒪᕆᐊᓗᖕᓂ ᐅᓂᒃᑳᓂ ᐃᓐᓇᑐᖃᕐᓂ ᐊᒻᒪ ᖁᕕᐊᒋᑦᑎᐊᖅᖢᒍ. ᐊᔪᙱᑦᑐᐊᓗᐃᑦ,” ᐋᑕᒻᔅ ᐅᖃᕐᑐᖅ. “ᖃᓄᖅ ᐊᒃᓱᕈᕐᓇᖅᑎᒋᓚᐅᕐᒪᖔ ᖃᐅᔨᒪᔭᐅᙱᒻᒪ. 15 ᒥᓂᑦᔅᓘᓐᓃᑦ ᐱᓱᓚᐅᑲᒃᑯᕕᑦ ᑕᐅᕙᓃᓕᕐᑐᑎᑦ.”

ᐊᑕᐅᓯᕐᓕ ᓂᐱᓕᐅᕐᓯᒪᔪᓂ ᐃᓐᓇᕐᓄᑦ ᐅᓂᒃᑳᓂ ᖃᐅᔨᓚᐅᕐᑕᖓ ᖃᓄᖅ ᐃᓄᐃᑦ ᐃᓱᒪᒋᔭᐅᑦᑎᐊᓕᖃᑦᑕᕐᓂᖏᓐᓂ ᖃᓄᖅ ᐊᔪᙱᔾᔪᑎᖃᓕᕌᖓᑕ, ᐃᓅᓇᓱᖕᓂᒃᑯᑦ ᐊᔪᙱᓐᓂᖃᖅᖢᑎᒃ.

“ᑐᓵᓕᕌᖓᒪ ᐃᓐᓇᑐᖃᕐᓂ ᐅᖃᐅᓯᖃᖅᑐᓂᒃ ᐱᐅᒋᓛᖏᓐᓂ, ᐊᕐᓇᐅᑦ ᑲᒪᒋᔭᖃᒡᒍᔪᑦ ᐊᕐᓇᓂ ᖃᐅᔨᒪᔭᖏᓐᓂᒃ ᐊᔪᙱᑦᑐᐊᓘᓂᖏᓐᓂᒃ ᒥᕐᓱᕐᓂᕐᒥᒃ. ᐊᖑᑎᓪᓕ, ᐱᐅᒋᓛᖏᑦ ᐊᖑᓇᓱᖃᑦᑕᖅᑐᑦ,” ᐅᖃᕐᑐᖅ.

ᐋᑕᒻᔅᒧᓪᓕ, ᐅᓂᒃᑳᕐᓂᖅ ᐊᔪᙱᔾᔪᑎᐅᔭᕆᐊᓕᒃ. ᑭᖑᓪᓕᕐᓕ ᑎᑎᕋᐅᓯᕆᓗᒍ.