ᓄᓇᕕᖕᒥ ᐸᓖᓯᒃᑯᑦ ᐱᔨᑦᑎᕋᖅᑎᖏᑦ ᑐᕌᕋᓱᐊᖅᐳᑦ ᐱᒋᐊᖅᑎᑦᑎᒃᑲᓐᓂᕐᓂᕐᒥ ᐸᓖᓯᙳᐊᓂ ᐱᓕᕆᐊᖑᔪᒥ

For the English version of this story, please see Nunavik Police Service aims to relaunch cadet program.

ᓄᓇᕕᖕᒥ ᐸᓖᓯᒃᑯᑦ ᐱᔨᑦᑎᕋᖅᑎᖏᑦ ᐆᒻᒪᖅᑎᑦᑎᒃᑲᓐᓂᕋᓱᐊᖅᐳᑦ ᐸᓖᓯᙳᐊᓂ ᐱᓕᕆᐊᖑᔪᒥ ᓂᕆᐅᖕᓂᖃᖅᖢᑎᒃ ᐅᓄᖅᓯᒋᐊᖅᑎᑦᑎᓂᕐᒥ ᐃᓄᖕᓂ ᐃᖅᑲᓇᐃᔭᖅᑎᖏᓐᓂ.

ᐱᓕᕆᐊᖑᔪᖅ ᐃᖅᑲᓇᐃᔭᖅᑎᑦᑎᓂᐊᖅᐳᑦ 18-ᓂ-ᐅᑭᐅᓕᖕᓂ ᐃᓄᖕᓂ ᐃᓚᐅᖃᑕᐅᓂᕐᒥ ᐸᓖᓯᒃᑯᓐᓂ ᖃᓄᐃᓕᐅᕈᑕᐅᔪᓂ ᓲᕐᓗ ᐱᑎᑦᑎᑦᑕᐃᓕᒪᓂᕐᒥ ᐱᓕᕆᓂᐅᔪᒥ, ᐸᐃᓯᑰᒃᑯᑦ ᐃᖏᕐᕋᓂᐅᔪᓂ ᐊᒻᒪ ᐃᓕᓐᓂᐊᕐᕕᖕᒥ ᑕᑯᒃᓴᐅᑎᑦᑎᓂᐅᔪᓂ, ᐅᖃᓚᐅᖅᐳᖅ ᓄᓇᕕᖕᒥ ᐸᓖᓯᒃᑯᑦ ᐱᔨᑦᑎᕋᖅᑎᖏᑦᑕ ᐊᖓᔪᖅᑳᖓ ᔮᓐ−ᐱᐊᕆ ᓚᕉᔅ ᐅᐃᕖᑎᑐᑦ ᐊᐱᖅᓱᖅᑕᐅᓂᐅᔪᒥ ᑰᔾᔪᐊᕐᒥ ᑎᑎᕋᕐᕕᖓᓂ.

ᐊᐅᔭᐅᔪᒥ ᒪᕐᕉᖕᓂᓪᓘᓐᓃᑦ ᐸᓖᓯᙳᐊᖑᓗᑎᒃ, ᐃᓱᒪᓕᐅᕆᔪᓐᓇᖅᐳᑦ ᐃᓯᕈᒪᖕᒪᖔᑕ ᑲᓇᑕᒥ ᐸᓖᓯᒃᑯᑦ ᐱᓕᕆᐊᖑᔪᒥ ᓄᓇᕕᖕᒥ ᐸᓖᓯᒃᑯᑦ ᐊᑐᖅᓯᒪᔭᖓᓐᓂ ᐃᖅᑲᓇᐃᔭᖅᑎᑦᑎᓂᕐᒥ ᐊᓯᖏᓐᓂ ᐸᓖᓯᐅᔪᓂ.

ᑕᖅᑭᓂ-6−ᓂ ᐱᓕᕆᐊᖑᔪᒥ, ᐊᑐᐃᓐᓇᐅᑎᑕᐅᔪᒥ ᕆᔭᐃᓇᒥ, ᐱᓕᒻᒪᒃᓴᐃᓲᖑᕗᖅ ᐸᓖᓯᒥᒃ ᐱᒋᐊᕐᓂᖓᓂ. ᐃᓱᓕᑦᑎᒐᒥᒃ, ᐃᖅᑲᓇᐃᔮᖅᑎᑕᐅᔪᓐᓇᖅᐳᑦ ᐃᓯᕐᓂᕐᒥ ᓄᓇᕕᖕᒥ ᐸᓖᓯᒃᑯᑦ ᐱᔨᑦᑎᕋᖅᑎᒃᑯᓐᓄᑦ.

“ᐅᖃᕆᐊᖃᖅᐳᖓ ᐱᔭᒃᓴᖅᑕᖃᕐᔪᐊᕐᓂᖓᓂ,” ᓚᕉᔅ ᐅᖃᓚᐅᖅᐳᖅ ᑲᑎᙵᓂᕆᔭᖓᓂ ᐱᐅᓯᒋᐊᖅᑎᑦᑎᔭᕆᐊᖃᕐᓂᖓᓂ ᐱᓕᕆᖃᑎᖃᕐᓂᐅᔪᒥ ᐃᓄᖕᓂ.

“ᐊᒡᕕᐊᕈᑎᖃᖅᐳᖅ ᐅᕙᑦᑎᓐᓄᑦ ᐊᒻᒪ ᓄᓇᓕᖕᓄᑦ. ᐅᖃᐅᓯᐅᙱᑦᑐᒥ ᐃᒃᐱᒍᓱᖕᓂᖃᖅᐳᖅ, ᐅᒃᐱᕈᓱᙱᓐᓂᐅᔪᒥ ᐊᒻᒪ ᑕᒪᓐᓇ ᓇᓗᓇᐃᖅᐸᕋ.”

ᓚᕉᔅ ᐅᖃᓚᐅᖅᐳᖅ ᓂᕆᐅᒃᐳᖅ ᐃᖅᑲᓇᐃᔭᖅᑎᑦᑎᓂᖓᓂ ᐃᓄᖕᓂ ᐊᐅᓚᑦᑎᓂᖓᓂ ᐸᓖᓯᙳᐊᖑᓂᕐᒥ ᐱᓕᕆᐊᖑᔪᒥ.

ᓄᓇᕕᖕᒥ ᐸᓖᓯᒃᑯᑦ ᓯᕗᓂᐊᓂ ᐊᐅᓚᑦᑎᓚᐅᖅᓯᒪᕗᑦ ᐸᓖᓯᙳᐊᓂ ᐱᓕᕆᐊᖑᔪᒥ 2018−ᒥ, ᓯᕗᓂᑦᑎᐊᖓᓂ ᓚᕉᔅ ᐱᒋᐊᓚᐅᕐᓂᖓᓂ ᐃᓂᒋᔭᖓᓂ, ᑭᓯᐊᓂ ᐱᓕᕆᐊᒃᓴᐅᔪᖅ ᐃᒃᓯᓐᓇᖅᑕᐅᓚᐅᖅᐳᖅ.

ᐅᖃᓚᐅᖅᐳᖅ ᑕᐃᔅᓱᒪᓂ ᓄᓇᕕᖕᒥ ᐸᓖᓯᒃᑯᑦ ᐱᔨᑦᑎᕋᖅᑎᖏᑦ ᐊᒥᓱᓂ ᐊᓯᖏᓐᓂ ᓯᕗᓪᓕᐅᑎᑕᐅᖁᔭᐅᔪᖃᓚᐅᖅᐳᑦ ᐊᒻᒪ ᐸᓖᓯᙳᐊᓂ ᐱᓕᕆᐊᖑᔪᖅ, ᐋᖅᑭᒃᓱᖅᓯᒪᑦᑎᐊᙱᑦᑐᒥ ᓂᕆᐅᖕᓂᕆᓚᐅᖅᑕᖓᓂ ᐱᕈᖅᓴᐃᓂᖓᓂ ᒫᓐᓇᐅᔪᒥ, ᐃᒃᓯᓐᓇᖅᑕᐅᓯᒪᓚᐅᖅᐳᖅ ᒪᓕᒃᑐᒥ.

“ᒫᓐᓇ ᐋᖅᑭᒃᓱᑦᑎᐊᖅᓯᒪᓕᕋᑦᑕ, [ᐱᓕᕆᔨ] ᐅᖃᖅᓯᒪᑦᑎᐊᖅᑐᒥ ᐱᔭᒃᓴᖃᕐᓂᐊᖅᐳᑦ” ᐊᒻᒪ ᐃᑲᔪᖅᓱᐃᓂᖃᕐᓗᓂ ᑳᑉᑕᐅᔪᒥ, ᐅᖃᓚᐅᖅᐳᖅ.

ᓚᕉᔅ ᐅᖃᓚᐅᖅᐳᖅ ᒫᓐᓇᓕᓴᐅᔪᒥ ᐅᔾᔨᕆᓚᐅᖅᐳᖅ ᖃᓄᑎᒋ ᐱᓕᕆᐊᒃᓴᖃᕐᓂᖏᓐᓂ ᑐᓂᓯᓂᕐᒥ ᓄᓇᕕᖕᒥ ᐸᓖᓯᒃᑯᓐᓂᑦ ᐊᒻᒪ ᓄᓇᓕᐅᔪᓂ ᖃᓂᒡᓕᒋᐊᖅᑎᑕᐅᓂᖏᓐᓂ, ᐱᓗᐊᖅᑐᒥ ᖃᓄᐃᓐᓂᐅᔪᒥ ᓴᓪᓗᓂᑦ ᐊᕐᕌᓂ ᑐᕌᖅᑎᑦᑎᓚᐅᖅᑐᒥ ᐸᓖᓯᒃᑯᑦ ᖁᑭᖅᓯᓂᐅᔪᒥ ᔮᓱᐊ ᐸᐱᒐᑐᖕᒥ.

ᓂᐱᖅᑯᖅᑐᔪᒥ ᐊᑲᖅᓴᙱᓐᓂᖅᑕᖃᓚᐅᖅᐳᖅ ᐸᐱᒐᑦᑑᑉ ᐃᓅᔪᓐᓃᕐᓂᖓᓂ, ᓱᓕ ᖃᐅᔨᓴᖅᑕᐅᔪᒥ ᑯᐸᐃᖕᒥ ᐸᓖᓯᒃᑯᑦ ᓇᐅᑦᑎᖅᓱᖅᑎᖏᓐᓂ.

“ᑕᐃᒪᙵᓂ ᐅᔾᔨᕆᓚᐅᖅᐳᖓ, ᐅᐊᑲᓪᓚᖔ, ᐊᕐᕌᒍᓄᑦ 8−ᓂ ᐱᓕᕆᒐᓗᐊᖅᑎᓪᓗᑕ ᐃᓂᖓᓄᐊᖅᓯᑎᑦᑎᓂᕐᒥ ᑭᓱᑐᐃᓐᓈᓗᖕᓂ ᐅᓪᓗᕐᒥ ᐊᑕᐅᓯᕐᒥ ᐊᓯᐊᓄᑦ ᓱᕋᑦᑎᑦᑎᐊᖅᐳᖅ,” ᐅᖃᓚᐅᖅᐳᖅ ᓚᕉᔅ.

“ᑐᑭᓯᕗᖓ ᐅᖓᓯᒃᑑᕗᒍᑦ ᓱᓕ ᐅᒃᐱᕈᓱᖃᑦᑕᐅᑎᓂᕐᒥ.”

ᑕᐃᒪᙵᓂ, ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᖓᑦ, ᒪᑎᕝᕕᒃ ᐊᒻᒪ ᓄᓇᕕᖕᒥ ᐸᓖᓯᒃᑯᑦ ᐱᓕᕆᕗᑦ ᓴᖅᑭᑎᑦᑎᓂᕐᒥ ᐃᓄᓕᒫᓄᑦ ᐸᓚᐃᖅᓯᒪᔾᔪᑎᓕᕆᓂᕐᒧᑦ ᑲᑎᒪᔨᕋᓛᖑᔪᓂ ᑭᒡᒐᖅᑐᐃᔨᖃᕐᓗᑎᒃ ᑕᒪᒃᑭᓂ ᐱᖓᓱᓂ ᑲᑎᙵᓂᐅᔪᓂ ᐅᖃᐅᓯᖃᕐᓂᐊᕐᓗᑎᒃ ᐸᓖᓯᓕᕆᓂᕐᒥ, ᐊᑦᑕᓇᔾᔭᐃᖅᓯᓯᒪᓂᕐᒥ ᐊᒻᒪ ᓵᙵᔭᒃᓴᐅᔪᓐᓇᕐᓗᑎᒃ.

ᓚᕉᔅ ᐅᖃᓚᐅᖅᐳᖅ ᐸᓖᓯᑦ ᐃᒻᒥᓂᒃ ᐃᓚᐅᖃᑕᐅᓂᖅᓴᐅᔪᓐᓇᕆᕗᑦ ᓄᓇᓕᖕᓂ ᐱᙳᐊᕐᓂᕐᓂ ᐱᙳᐊᖃᑕᐅᓗᑎᒃ ᐅᕝᕙᓘᓐᓃᑦ ᐃᓚᐅᖃᑕᐅᓗᑎᒃ ᓄᓇᓕᖕᓂ ᖃᓄᐃᓕᐅᕈᑕᐅᔪᓂ.

“ᖃᓪᓗᓈᑦ ᓄᓇᖓᓂᑎᑑᙱᑦᑐᖅ,” ᐅᖃᓚᐅᖅᐳᖅ.

“ᐊᐱᕆᕙᙱᓚᒍᑦ [ᐸᓖᓯᓂ] ᓇᐅᑦᑎᖅᓱᕐᓂᕐᒥ ᐊᖅᑯᑎᓂ ᖃᖓᓕᒫᑦᑎᐊᖅ. ᐊᐱᕆᓂᖅᓴᐅᕗᖓ [ᐸᓖᓯᒃᑯᑦ] ᐃᓚᓕᐅᔾᔨᓗᑎᒃ ᐃᒻᒥᓂᒃ, ᐃᓕᓐᓂᐊᕐᕕᓕᐊᖅᐸᒡᓗᑎᒃ, ᐃᓚᐅᖃᑕᐅᓗᑎᒃ ᖃᓄᐃᓕᐅᕈᑕᐅᔪᓂ ᓲᕐᓗ ᒪᒃᑯᒃᑐᑦ ᕼᐋᑎᓕᕌᖓᒥᒃ.”

ᓚᕉᔅ ᐅᖃᓚᐅᖅᐳᖅ ᐱᒋᐊᖅᑎᑦᑎᔪᒪᓂᖓᓂ ᐸᓖᓯᙳᐊᓂ ᐱᓕᕆᐊᖑᔪᒥ ᑕᒪᑐᒪᓂ ᐊᐅᔭᐅᔪᒥ.

“ᒫᓐᓇ ᓇᒻᒪᒃᓯᕗᖅ,” ᐅᖃᓚᐅᖅᐳᖅ.