ᑯᐯᒃ ᐸᕐᓇᐳᖅ ᐊᐅᓚᑦᓯᓂᖃᕈᒪᑦᓱᓂ ᐃᒪᕐᒥᒃ ᐆᒻᒪᖁᑎᑦᓴᓕᐅᕐᓂᒥᒃ ᐊᖏᔪᒥᒃ ᐊᓯᑦᔩᓂᖃᓚᖓᔪᒥᒃ ᓄᓇᓕᕐᓚᐅᑉ ᑕᕐᕋᖓᓂᒃ
ᓀᑦᑐᒥᒃ ᐅᓂᒃᑳᑕᐅᒍᑎᖏᑦ ᔦᒥᓯ ᐯ ᑯᐯᒃ ᑕᕐᕋᖓᑕᓗ ᐊᖏᖃᑎᒌᒍᑎᖏᑕ
It has been nearly 50 years since the James Bay and Northern Quebec Agreement was signed. Nunatsiaq News will be running stories about the agreement this fall, leading up to the publication of a special section about the anniversary on Nov. 11. (Map by Nunatsiaq News)
ᓄᓇᕕᐅᑉ ᑰᖏᑦ ᐊᐅᓚᕕᐅᓯᒪᔪᑐᖃᐅᕗᑦ ᐃᖃᓗᓐᓂᐊᕕᐅᕙᑦᓱᑎᒃᓗ ᓄᓇᕕᒻᒥᐅᓄᑦ ᐊᕐᕌᒍᐃᑦ ᑕᐅᓴᓐᑏᑦ ᐅᖓᑖᓂᑦᑐᑦ ᓈᑦᓱᒋᑦ, ᐃᓄᑐᐃᓐᓀᑦ ᑭᖑᕙᕇᑦ ᑲᒪᑦᓯᐊᓯᒪᔪᑐᙯᑦ ᓄᓇᓂᓪᓗ ᐃᒪᕐᓂᓗ ᐊᓂᕐᕋᒥᓃᑦᑐᓂᒃ. ᑌᒣᑦᑐᖅ ᐃᓅᓯᖓᑦ ᓱᑲᑦᑐᒥᒃ ᐊᓯᑦᔨᑎᑕᐅᓯᒪᔪᖅ ᐊᕐᕌᒍᐃᑦ 1970-ᓃᑎᓪᓗᒋᑦ, ᑌᒣᑎᑕᐅᑦᓱᑎᒃ ᔦᒥᓯ ᐯᑉ ᐱᓇᓱᑦᑕᐅᓂᖓᓄᑦ
1971-ᖑᑎᓪᓗᒍ ᑯᐯᒃ ᓄᓇᓕᕐᓚᖓᑕ ᐊᖓᔪᕐᖄᖓ ᕈᐱᐋ ᐳᕋᓵ ᐅᖃᒻᒪᕆᒍᑎᖃᓚᐅᕐᓯᒪᕗᖅ ᓄᓇᓕᕐᓚᐅᑉ ᐃᑯᒪᓕᐅᕈᑎᖃᕐᓂᒥᒃ ᐱᓇᓱᕝᕕᖓᓂ, ᙯᑦᕈ-ᑯᐯᒃ, ᐊᖏᔪᒥᒃ ᐃᒪᕐᒥᒃ ᐃᑯᒪᓕᐅᕈᑎᓕᐅᕐᕕᓴᒥᒃ ᓄᓇᕕᒻᒥ ᓴᓇᒍᒫᕐᓂᐊᓕᕐᑎᓗᒍ ᐊᑐᕈᑎᒋᓂᐊᕐᑕᒥᓂᒃ ᑰᓐᓂᒃ ᑰᑦᑐᓂᒃ ᔦᒥᓯ ᐯᒧᑦ. ᐃᒣᑦ ᑰᑦᑐᑦ ᐄᔅᒣᓐᒥᑦ, ᐆᐱᓐᓇᑕᒥᑦ ᑲᓂᐊᐱᔅᑲᐅᒥᓪᓗ ᓴᖑᑎᑎᕐᑕᐅᓛᓕᕐᑎᓗᒋᑦ ᓴᐳᑎᓕᐅᕐᑕᐅᒪᑦᓱᓂ ᑕᓯᕉᕐᑕᐅᒪᔪᒧᑦ ᓚ ᑲᕌᓐ ᑰᖓᓂ, ᑖᑦᓱᒪ ᑰᑉ ᑰᓐᓂᖓ ᒪᕐᕈᕕᓪᓗᐊᑐᒌᔭᒥᒃ ᓲᖕᖑᓯᒋᐊᕐᑕᐅᑎᓪᓗᒍ. ᐊᖏᔪᕐᔪᐊᕌᓗᐃᑦ ᑰᕝᕕᓭᑦ ᐱᖓᓱᕕᓪᓗᐊᑐᒥᒃ ᖁᑦᓯᓂᓖᑦ ᓀᐋᑲᕋ ᑰᒐᓗᐊᑕ ᓴᓂᐊᓂ ᙯᕐᑐᖏᑦ ᖃᕋᕐᑎᑕᐅᓯᒪᕗᑦ, ᐊᓯᑦᔩᓯᐊᕐᓱᑎᒃ ᓄᓇᑕᒥᓂ. ᑖᒃᑯᐊ ᓴᓇᔭᐅᔪᑦ ᐱᔭᕇᑕᐅᑎᓪᓗᒋᑦ 1980 ᐊᕐᕌᒍᖏᓐᓃᓕᕐᓱᑎᒃ, ᔦᒥᓯ ᐯᒥ ᐃᑯᒪᓕᐅᕈᑎᐊᓗᐃᑦ ᐃᒡᓗᔪᐊᖁᑎᖓᑦ ᐃᑯᒪᓕᐅᕈᑎᖃᕐᑎᓯᓕᓚᐅᔪᕗᖅ ᑯᐯᒃ ᓄᓇᖓᓂᒃ ᐊᖏᔪᒻᒪᕆᒻᒥ, ᐱᓗᐊᕐᑐᒥ ᓄᓇᓕᓐᓂᒃ ᐃᒡᓗᒐᓴᓂᓪᓗ ᓯᕿᓂᕐᒦᑐᓂᒃ.
ᐊᓪᓓᑦ ᑯᔩᑦ ᐃᓅᖃᑎᒌᑦᑐᖁᑎᖏᓪᓗ ᓄᓇᕕᒻᒥᐅᓗ ᖃᐅᔨᒋᐊᕐᕕᐅᓚᐅᕐᓯᒪᖕᖏᑐᑦ ᑕᒪᒃᑯᐊ ᓴᓇᓂᐅᓚᖓᓕᕐᑐᑦ ᐱᑦᔪᑎᐅᑎᓪᓗᒋᑦ ᐊᖏᖃᑎᖃᓚᐅᕐᓯᒪᖕᖏᓚᓪᓗ ᓄᓇᓕᕐᓚᐅᑉ ᐱᓂᐊᕐᓂᕆᓯᔭᖏᓐᓂᒃ ᐃᓕᖓᑦᓱᑎᒃ ᐃᒪᕐᓄᓗ ᓄᓇᓄᓪᓗ. ᑰᓐᓂᒃ ᓯᒥᑦᑐᐃᓃᑦ ᐅᓗᑦᔭᐅᑎᑦᓯᓯᒪᒻᒪᑕ ᓄᓇᒥᒃ ᐊᖏᓂᓕᒻᒥᒃ 11,500-ᓂᒃ ᓯᒃᑭᑕᐅᓕᖓᑦᓱᑎᒃ ᑭᓚᒦᑕᓂᒃ — ᐊᖏᓂᖓ ᒪᕐᕈᕕᓪᓗᐊᑲᓴᑦᑐᒥ ᐊᖏᓂᖃᑎᖓ ᕿᑭᕐᑕᐅᑉ ᐳᕆᓐᓴ ᐃᐊᑦᒍᑦ ᐁᓚᒥᒃ ᑌᔭᐅᒍᑎᓕᒻᒥᒃ. ᐅᓄᕐᓂᓭᑦ 2,300-ᓂᑦ ᐃᓄᐃᑦ ᓄᓇᓯᒪᔪᑦ ᒣᓚᓯᒃᑯᓂ ᓄᑦᑎᑕᐅᒋᐊᖃᓚᐅᕐᓯᒪᔪᑦ ᓄᓇᓕᑦᑕᖃᒻᒥᐅᓯᔪᒧᑦ ᓯᔅᓵᓯᐱᔅᒧᑦ. ᓇᐹᕐᑐᐃᑦ ᐃᒪᕐᒧᑦ ᐅᖁᕐᑕᕈᕐᑎᑕᐅᔪᑦ ᓄᓇᐅᓪᓗ ᐱᕈᕐᑐᖏᑦ ᓄᐃᑦᓯᓂᖃᕐᓯᒪᔪᑦ ᐃᒪᕈᔪᑦᓱᓂ ᒨᑯᔨᐅᓂᕋᕐᑕᐅᔪᒥᒃ ᑖᓐᓇᓗ ᐃᖃᓗᓐᓂᒃ ᑐᖁᕃᓕᓚᐅᔪᕗᖅ ᐅᓄᕐᑐᒪᕆᐊᓗᓐᓂᓗ ᑕᐅᓴᓐᑎᓃᑦᑐᓂᒃ ᑐᑦᑐᓂᒃ ᑐᖁᕋᒃᑫᓱᓂ. ᐊᓪᓓᑦ ᑯᔩᑦ ᐱᐅᓯᑐᖃᕐᒥᒍᑦ ᒪᙯᕝᕕᒋᓲᖏᓪᓗ ᐃᖃᓗᓐᓂᐊᕕᒋᓲᖏᓪᓗ ᐊᓯᕈᕐᑕᐅᓯᒪᔪᑦ.
1972-ᖑᓕᕐᑎᓗᒍ ᓄᓇᕕᒻᒥᐅᑦ ᓴᕐᕿᑎᑦᓯᓕᓚᐅᕐᓯᒪᕗᑦ ᑲᑐᑦᔨᖃᑎᒌᕝᕕᒋᓂᐊᓕᕐᑕᒥᓐᓂᒃ ᐊᑦᓯᕋᐅᑎᑖᕐᓱᒍ ᐃᓄᐃᑦ ᑲᑐᑦᔨᖃᑎᒌᓐᓂᖓᑦ ᑯᐸᐃᒃ ᑕᕐᕋᖓᓂ, ᑖᒃᑯᐊ ᑖᑦᓱᒥᖓ ᐱᒋᐊᕐᑎᓯᔪᑦ ᐅᕕᒃᑲᐅᓱᑎᒃ ᐱᓂᐊᕐᓂᓕᕆᓂᕐᒥᒃ ᓄᓇᖁᑎᒥᓐᓂ ᑲᒪᒋᔭᖃᕆᐊᕐᓯᒪᓯᒪᔪᑦ. ᓯᕗᓪᓕᐹᒥ, ᐊᑕᐅᓯᕐᒥᒃ ᑐᕌᒐᖃᓚᐅᕐᓯᒪᔪᑦᒃ: ᑰᓐᓂᒃ ᓯᒥᑦᑐᐃᔪᓂᒃ ᓄᕐᖃᑎᑦᓯᓂᕐᒥᒃ.
ᓄᓇᓕᕐᓚᒃ ᐃᓱᒫᓗᒍᑕᐅᔪᓂᒃ ᓈᓚᒍᒪᓯᒪᖕᖏᑐᖅ, ᑌᒣᒻᒪᑦ 1973-ᖑᓕᕐᑎᓗᒍ, ᓄᓇᕕᒻᒥᐅᑦ ᐳᕋᓴᐅᑉ ᑲᕙᒪᖓᓂᒃ ᐃᕐᖃᑐᐃᕕᒻᒨᕆᓕᓚᐅᕐᓯᒪᔪᑦ. 167-ᖑᑦᓱᑎᒃ ᑕᑯᓐᓇᓯᒪᔪᑦ ᐅᖄᔭᖏᑦ ᐅᖃᐅᓯᖃᕐᓱᑎᒃ ᖃᓄᑎᒋᒃ ᐃᓅᓯᖏᑦ ᓱᕐᕋᑕᐅᓂᖃᓚᐅᕐᒪᖔᑕ ᔦᒥᓯ ᐯᒥ ᓴᓇᔭᐅᔪᓄᑦ. ᐃᕐᖃᑐᐃᔨ ᐋᓪᐱᐋᕐ ᒪᓘᕝ ᐅᖃᐅᑦᔨᓕᓚᐅᕐᓯᒪᔪᖅ ᙯᑦᕈ-ᑯᐯᒃᑯᓂᒃ ᑰᓐᓂᒃ ᓯᒥᑦᑐᐃᓂᕐᒥᓂᒃ ᓄᕐᖃᖁᑦᓱᒍ. ᑖᑦᓱᒪ ᐃᕐᖃᑐᐃᔨᐅᑉ ᑐᑭᑖᖏᑦ ᐅᒃᓗᐃᑦ ᐱᖓᓲᔪᕐᑐᑦ ᐊᓂᒍᕐᑎᓗᒋᑦ ᐊᑐᕈᓐᓀᑎᑕᐅᓕᓚᐅᕐᓯᒪᒻᒥᔪᑦ ᑯᐯᒃ ᐃᕐᖃᑐᐃᔨᐅᑉ ᑐᑭᑖᖏᓐᓂᒃ ᐊᑐᕈᓐᓀᑎᑦᓯᔨᖏᓐᓄᑦ, ᑭᓯᐊᓂ ᒪᓘᕝ ᑐᑭᑖᕕᓂᖏᑦ ᓇᓗᓀᕆᓯᒪᔪᑦ ᓄᓇᓂᒃ ᐃᓐᓄᐃᓯᒪᓇᓱᒍᑎᖏᓐᓂᒃ ᐊᓪᓓᑦ ᑯᔩ ᐃᓄᑐᐃᓐᓀᓗ ᑯᐯᒃᓗ ᑲᕙᒪᖓᓂᒃ ᐊᑑᑎᓚᖀᑦᓱᑎᒃ ᐊᖏᖃᑎᒌᒍᑎᖃᕋᓱᓐᓂᓂᒃ ᐱᒐᓱᒍᑎᒋᓯᑦᓱᒋᑦ ᐊᑭᓕᕐᑕᐅᒍᑎᑖᖑᒍᓐᓇᑐᓂᒃ ᓱᓕ ᑰᓐᓂᒃ ᓯᒥᑦᑐᐃᓂᖅ ᑲᔪᓯᓂᖃᕐᒪᑦ.
ᐊᕐᕋᒎᓐᓂ ᒪᕐᕉᓂ, ᐃᓄᐃᑦ ᑲᑐᑦᔨᖃᑎᒌᓐᓂᖓᑦ ᑯᐸᐃᒃ ᑕᕐᕋᖓᓂ ᑐᕌᕐᑕᒥᓂᒃ ᓴᖑᑎᑦᓯᓕᓚᐅᕐᓯᒪᕗᖅ ᐁᕙᓐᓂᖔᓯᑦᓱᓂ ᑲᕙᒪᒃᑯᑦ ᐱᖁᔭᓕᕆᔨᖏᓐᓂᒃ ᓲᓱᑦᓴᓯᐊᖕᖏᒪᕆᑉᐸᑐᓂᒃ. ᓄᓇᕕᒻᒥᐅᓕᒫᑦ ᐊᖏᖃᑎᒌᒐᓱᒍᑎᖃᓕᕐᑐᓄᑦ ᐃᓚᐅᒍᒪᓯᒪᖕᖏᑐᑦ, ᑕᒪᓐᓇ ᐃᓱᐃᑦᑐᒪᕆᒻᒦᓇᕐᓯᒪᔪᖅ ᑌᒃᑯᓇᓂ ᓄᓇᓕᓐᓂ ᓱᕐᕋᑕᐅᒪᔪᓂ. ᐱᓂᐊᕐᓂᓕᕆᓂᑎᒍᑦ ᐊᖏᖃᑎᒌᖕᖏᓂᖅ ᓄᓇᖁᑕᐅᔪᒥ ᓴᕐᕿᓂᖃᓚᐅᕐᓯᒪᒻᒪᑦ, ᓴᕐᕿᒍᑎᐅᓚᕿᑦᓱᓂ ᐱᓂᐊᕐᓂᓕᕆᔨᓄᑦ ᐊᑦᓯᕋᐅᑎᓕᓐᓄᑦ ᐃᓄᐃᑦ ᑐᖕᖓᕕᖓᑦ ᓄᓇᒥᓐᓂ. ᐊᖏᖃᑎᒌᒑᓱᓐᓂᓂᒃ ᐱᓇᓱᖃᑕᐅᒻᒪᕆᑦᓯᒪᔪᑦ ᐃᓚᖓᑦ ᓵᓕ ᒍᐊᑦ, ᐅᖃᕐᓯᒪᔪᖅ ᑌᑦᓱᒪᓂ ᐅᓇᑕᐅᑎᔪᑎᑐᑦ ᐱᐅᓯᖃᓕᓚᐅᕐᓯᒪᒋᐊᒥᒃ.
ᐃᓄᐃᑦ ᑐᖕᖓᕕᖓᑦ ᓄᓇᒥᓐᓂ ᓴᕐᕿᔮᕈᑎᖃᓚᐅᔪᖅ ᐊᑭᕋᕐᑐᓂᕐᒥᒃ ᐃᓕᖓᓂᓕᓐᓂᒃ ᐊᒃᓚᑕᐅᒪᔪᑦ ᐃᓚᖏᓐᓄᑦ ᐊᑎᓕᕐᑐᑦ ᔦᒥᓯ ᐯᑉ ᑯᐯᒃᓗ ᑕᕐᕋᖓᑕ ᐊᖏᖃᑎᒌᒍᑎᖏᓐᓂ, ᐊᒃᓚᑕᐅᒪᔪᑦ ᓴᒃᑯᓯᓂᐅᓯᒪᒻᒪᑕ ᓄᓇᓕᑐᙯᑦ ᐃᓐᓄᐃᓯᒪᒍᑎᖏᓐᓂᓗ ᐱᔪᓐᓇᐅᑎᖏᓐᓂᓗ ᐃᓄᑐᐃᓐᓀᑦ ᐃᓕᖓᑦᓱᑎᒃ ᓄᓇᕕᐅᑉ ᓄᓇᖓᓄᑦ. ᐅᑉᐱᕆᔭᖃᕐᓯᒪᒐᒥᒃ ᖃᓄᐃᓕᙰᓂᐅᕚᓪᓗᒐᔭᕐᑐᑦ ᑌᒣᓕᔪᓂᒃ ᐅᖃᐅᓯᕐᑕᓕᓐᓂ ᐊᑎᓕᐅᖃᑎᒌᒍᑎᖃᕐᓂᑯᑦ ᓱᒃᑯᐃᒐᔭᕆᐊᖏᑦ ᐃᓄᑐᐃᓐᓀᑦ ᐱᒍᓐᓇᕈᑎᑦᓴᖏᓐᓂᒃ ᓇᒻᒥᓂ-ᑲᕙᒪᑖᕐᓂᓴᒥᒍᑦ.
ᑲᕙᒪᒃᑯᑦ ᐱᔪᒪᓯᒪᒻᒪᑕ ᐃᓄᑐᐃᓐᓇᓂᒃ ᓄᓇᓯᒪᔪᓂᒃ ᓴᒃᑯᓯᓂᖃᖁᔨᑦᓱᑎᒃ ᓄᓇᓂᒃ ᐃᓐᓄᐃᓯᒪᓇᓱᒍᑎᒥᓐᓂᒃ ᓄᓇᕕᓐᓂ ᑮᓇᐅᔭᓂᒃ $90-ᒥᓕᐋᓐᓂᒃ ᐊᑭᓕᕐᑕᐅᒍᑎᖃᕐᓗᑎᒃ ᐱᕕᒋᕙᓐᓂᐊᓕᕐᑕᒥᓂᒃ ᐊᕐᕌᒍᑦ 20 ᐊᓂᒍᕐᐸᓕᐊᓂᖏᓐᓂ, ᐊᑐᕐᑕᐅᔪᑦᓴᐅᓱᑎᒃ ᐃᒡᓗᖃᕐᑎᓯᓂᕐᓄᑦ, ᓄᓇᓕᒻᒥᓂ ᐊᐅᓚᑦᓯᓂᕐᓄᑦ ᐃᓅᖃᑎᒌᑦᑐᓗ ᐃᓅᑦᔪᓯᒥᒍᑦ ᐱᑦᔪᔭᐅᓂᑦᓴᖏᓐᓄᑦ. ᐃᓄᐃᑦ ᑲᑐᑦᔨᖃᑎᒌᓐᓂᖓᑦ ᑯᐸᐃᒃ ᑕᕐᕋᖓᓂ ᐊᑕᕐᖑᓯᕈᑎᖃᕐᓯᒪᒻᒥᔪᖅ ᐱᑦᔪᔨᒍᑏᑦ ᓄᓇᕕᒻᒥ ᓴᕐᕿᑎᑕᐅᓂᖃᖁᑦᓱᒋᑦ, ᐃᓚᐅᑎᓪᓗᒋᑦ ᐃᓕᓐᓂᐊᓂᓕᕆᓃᑦ, ᓄᓇᓕᓕᒫᑦ ᑲᕙᒪᖓ, ᐃᓗᓯᓕᕆᓂᕐᓗ. ᑕᕐᕿᓂ ᐊᒥᓱᓂ ᑕᐸᓇᖕᖏᑐᒥᒃ ᐊᖏᖃᑎᒌᒐᓱᓐᓂᓂᒃ ᐱᓇᓱᒍᑕᐅᓚᐅᕐᓱᑎᒃ, ᔦᒥᓯ ᐯᑉ ᐊᒻᒪᓗ ᑯᐸᐃᒃ ᑕᕐᕋᖓᑕ ᑲᑐᑦᔨᖃᑎᒌᓐᓂᖓ ᐊᑎᓕᐅᖃᑎᒌᖃᑎᖃᕐᓂᖃᑦᓴᕋᑕᓕᓚᐅᕐᓯᒪᕗᑦ ᓅᕕᒻᐱᕆ 11, 1975-ᖑᓕᕐᑎᓗᒍ.
ᓵᔪᐃᓕ ᐅᐃᑖᓗᒃᑐᖅ, ᐃᓄᑐᐃᓐᓇᓄᑦ ᐊᑎᓕᐅᖃᑎᒌᖃᑕᐅᔪᓄᑦ ᐃᓚᐅᓯᒪᔪᖅ, ᐅᖃᕐᓯᒪᔪᖅ ᐃᒫᒃ, “ᐊᖏᓚᐅᕐᓯᒪᔪᒍᑦ [ᓴᒃᑯᓯᖁᔨᑦᓱᑎᒃ] ᐊᒃᓚᓯᒪᔭᖏᓐᓂᒃ. ᑌᒣᓕᒐᑦᑕ, ᓴᕐᕿᑎᑕᐅᓂᖃᕐᑎᓗᒍ ᑲᑎᕕᒃ ᓄᓇᓕᓕᒫᑦ ᑲᕙᒪᖓ, ᐱᔪᓐᓇᐅᑎᑖᕐᓯᒪᒐᑦᑕ ᓇᒻᒥᓂᖅ ᐊᐅᓚᑦᓯᓂᖃᕈᓐᓇᓂᐊᓕᕐᓱᑕ ᐃᓗᓯᓕᕆᓂᕐᓂᓗ ᐃᓄᓕᕆᓂᕐᓂᓗ, ᐳᓖᓯᖃᓕᕐᓗᑕᓗ, ᓇᒻᒥᓂᖅ ᐃᖏᕐᕋᑎᑦᓯᓂᐊᓕᕐᓱᑕ. ᐱᐅᔪᐊᓘᔭᕐᓯᒪᔪᖅ, ᐃᓱᒪᑐᐃᓐᓇᓱᑕ ᓇᒻᒥᓂᖅ ᐃᓅᓯᑦᑎᓂᒃ ᑲᒪᒋᔭᖃᓛᓕᕐᓂᑎᓐᓂᒃ. ᑭᓯᐊᓂ ᐊᕕᐅᑎᓯᒪᓯᒪᔪᒍᑦ. ᐃᓚᖏᑦ ᑐᑭᓯᒪᑎᓪᓗᒋᑦ, ᑭᓯᐊᓂᓗ ᐊᓯᖏᑦ ᑐᑭᓯᒪᖕᖏᑐᑦ.”
ᒪᑭᕝᕕᒃ ᐱᓇᓱᒐᖃᕐᕕᒃ ᐃᓂᓪᓚᑕᐅᓂᖃᓕᓚᐅᕐᓯᒪᔪᖅ 1978-ᒥ ᑲᒪᒋᔭᖃᕐᓂᐊᓕᕐᓱᓂ ᑮᓇᐅᔭᓂᒃ ᐊᑭᓕᕐᑕᐅᒍᑎᐅᓯᒪᔪᓂᒃ ᑲᕙᒪᒃᑯᓄᑦ ᐃᓕᖓᓚᖓᑎᓪᓗᒋᑦ ᓄᓇᕕᒻᒥᐅᓕᒫᓄᑦ. ᐃᓄᑐᐃᓐᓇᑎᒍᑦ ᐱᓇᓱᒐᖃᕐᕕᖁᑎᖃᓕᕐᓱᑕ ᑎᒍᒥᐊᕐᑐᒥᒃ-ᐱᔪᓐᓇᐅᑎᓂᒃ ᓄᓇᕕᒻᒥ, ᑲᔪᓯᕙᑦᑐᖅ ᐱᓇᓱᑦᑕᐅᔪᖅ ᓴᐳᑦᔨᓯᒪᓇᓱᒍᑎᐅᑦᓱᑎᒃ ᐱᔪᓐᓇᐅᑎᓂᒃᓗ ᓱᕐᕃᑐᒥᓪᓗ ᓄᓇᓕᐅᔪᑦ ᓄᓇᕕᒻᒥ ᐊᕙᑎᖏᓐᓂᒃᔦᒥᓯ ᐯ ᑯᐯᒃᓗ ᑕᕐᕋᖓᑕ ᐊᖏᖃᑭᒌᒍᑎᖏᑦ ᓯᕗᓪᓕᐹᖑᓯᒪᕗᑦ ᐅᓪᓗᒥᐅᓕᕐᑐᖅ ᓄᓇᓕᑐᙯᑦ ᓄᓇᒥᓐᓄᑦ ᐊᖏᖃᑎᒌᒍᑎᒋᔭᖏᓐᓂ ᑲᓇᑕᒥ, ᑐᖕᖓᕕᖕᖑᓯᒪᕗᓪᓗ ᐊᖏᖃᑎᒌᒍᑎᐅᕙᓕᕐᑐᓄᑦ ᓯᓚᕐᔪᐊᒥᐅᓂ. ᓱᕐᕃᓂᖏᑦ, ᑕᒪᕐᒥᒃ ᐱᐅᔪᒧᓪᓗ ᓈᒻᒪᖏᓐᓂᓴᒧᓪᓗ, ᐅᓪᓗᒥ ᐃᑉᐱᒋᔭᐅᖏᓐᓇᑐᑦ ᐃᓄᑐᐃᓐᓀᑦ ᐃᓅᓯᖏᓐᓂ ᐊᕐᕌᒍᑦ 50 ᐊᓂᒍᓕᕐᑎᓗᒋᑦ.
— With files from Cedric Gallant ᐊᒃᓚᑕᐅᔪᑦ ᐃᓚᖏᑦ ᓯᐊᑦᕆᒃ ᑲᓛᓐ ᐊᒃᓚᖁᑎᖏᓐᓂᑦ ᐱᔭᐅᓯᒪᔪᑦ
ᑖᒃᑯᐊ ᐅᓂᒃᑲᑕᐅᔪᑦ ᐃᓚᒋᔭᐅᕗᑦ ᓄᓇᑦᓯᐊᖅ ᑐᓴᕋᑦᓴᓂᐅᑎᖏᑕ ᐃᕐᖃᐅᒪᑦᓯᓂᖓᓄᑦ ᐊᕐᕌᒍᓂ 50-ᓂ ᐊᓂᒍᐃᓕᕐᓂᖓᓂᒃ ᐊᑎᓕᐅᕐᑕᐅᓂᖃᓚᐅᕐᓯᒪᑎᓪᓗᒋᓂᑦ ᔦᒥᓯ ᐯᑉ ᑯᐯᒃᓗ ᑕᕐᕋᖓᑕ ᐊᖏᖃᑎᒌᒎᑎᖏᑦ ᐊᕐᕌᒍᖅ 1975-ᖑᑎᓪᓗᒍ.
This project has been made possible in part by the Government of Canada.
(0) Comments