ᓄᓇᕗᒥᑦ ᐊᑐᖅᑕᐅᓯᒪᙱᑦᑐᖅ: ᓴᐳᔾᔨᓯᒪᓂᕐᒥᑦ ᐊᓯᙳᕐᓯᒪᔪᓂᒃ ᑭᓲᓂᕕᓂᖏᓐᓂᒃ ᐱᔪᓐᓇᐅᑎᓂᒃ
“ᐃᓱᒪᓕᕐᑐᖓᓂ ᓄᓇᖃᖃᑕᐅᒻᒪᕆᓕᕐᓂᓐᓂᒃ ᓄᓇᕗᒥᑦ, ᐊᒻᒪᓗ ᐅᕙᓐᓂᑦ ᐱᒃᑯᒋᒻᒪᕆᒃᖢᖓ”
ᑭᐅᕋᓐ ᑐᕌᑲᓐᐴᒡ (Kieran Drachenberg), ᑕᐃᔅᓱᒪᓂ 17-ᖑᓪᓗᓂ, ᐊᓈᓇᖓᓗ, ᑳᑐᕆᓐ ᓚᐃᑦᕗᑦ, ᓄᓇᕗᒥᑦ ᒪᓕᒐᓕᕆᕕᒡᔪᐊᒥᑦ ᐅᓇᓗ ᑮᑦ ᐲᑐᓴᓐ, ᑕᐃᒡᓱᒪᓂ ᒪᓕᒐᓕᕆᓂᕐᒧᑦ ᒥᓂᔅᑕᐅᓚᐅᕐᓯᒪᔪᖅ, ᒫᑦᓯ 13, 2017-ᒥᑦ. ᑖᓐᓇᓕ ᐅᓪᓗᖅ ᓄᓇᕗᒥᑦ ᒪᓕᒐᓕᐅᕐᑎᐅᔪᑦ ᑕᒪᕐᒥᒃ ᓂᕈᐊᕐᕕᒋᓚᐅᕐᓯᒪᔭᖓᑦ ᓄᑖᙳᕆᐊᖅᑎᑦᑎᓂᕐᒥᑦ ᓄᓇᕗᒥᑦ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓂᒃ ᑭᒡᓕᓯᓂᐊᖅᑎᒃᑯᑦ ᒪᓕᒐᕐᔪᐊᖓᓂᑦ ᓴᐳᔾᔨᓯᒪᓂᕐᒧᑦ ᐃᓄᖕᓂᑦ ᐊᔾᔨᒌᙱᑎᑕᐅᓂᒃᑯᑦ. ᑐᕌᑲᓐᐴᒡ ᑭᖑᓂᐊᒍᑦ ᐃᓕᓴᕆᔭᐅᒻᒪᕆᓕᓚᐅᕐᓯᒪᔪᖅ ᐃᑲᔪᕐᓯᒪᓂᕐᒥᑦ ᐃᓱᒪᒃᑯᓐᓂ ᐋᓐᓂᐊᖃᖅᑕᐃᓕᓂᕐᒥᑦ. (ᐊᔾᔨᓕᐅᕆᔨ ᓯᑏᕝ ᑐᓵᒻ)
For an English version of this story, see A Nunavut milestone: protection for transgender rights
ᖁᕕᐊᓲᑎᖃᕋᑦᑕ ᓄᓇᕗᑦ 20-ᐅᓕᕐᓂᖓᓂᒃ ᕿᒥᕐᕈᐊᖅᖢᑎᒍᑦ ᑖᔅᓱᒪ ᓇᖕᒥᓂᖅ ᒐᕙᒪᓕᕆᔨᖃᖅᑐᑦ ᑎᐅᕆᑑᕆᐅᑉ ᐊᓂᒍᐃᓯᒪᓂᖏᓐᓂ ᐊᒻᒪ ᐱᓇᓱᒋᐊᖃᖅᓯᒪᔭᖏᓐᓂᒃ ᒫᙵᑦ ᑎᑕᐅᓯᕆᓂᕐᒥᒃ ᐊᒻᒪ ᑕᑯᓐᓇᒐᒃᓴᓕᕆᓂᕐᒥᒃ ᒪᐅᖓ ᑮᓇᐅᔭᓕᐅᕋᓱᖕᓂᕐᒧᑦ, ᐃᓄᒃᑐᑦ ᖃᓄᐃᓕᕐᓂᖓᓂᒃ ᐊᒻᒪᓗ ᓯᓚᐅᑉ ᐊᓯᙳᖅᓂᖓᓂᒃ. ᐃᓚᖏᓐᓂᒃ ᓄᓇᕗᒻᒥᐅᑕᑦ ᐅᓂᒃᑲᐅᓯᖏᓐᓂᒃ ᑐᓴᕐᓂᐊᖅᑐᒍ ᖃᓄᖅ ᓄᓇᕗᑦ ᑐᑭᖃᕐᒪᖔᑦ ᑖᒃᑯᓄᖓ ᐊᒻᒪᓗ ᖃᓄᐃᑦᑐᓂ ᐊᓯᙳᕈᑎᒃᓴᓂᒃ ᑕᑯᔪᒪᖕᒪᖔᖏᓐᓂᒃ ᐊᕐᕌᒍ 20 ᐊᒡᒋᖅᑐᓂᒃ.
ᐃᓱᒪᙳᐊᕆᑦ ᐱᔪᓐᓇᐅᑎᖃᙱᓪᓗᑎᑦ. ᐃᓄᐃᑦ ᐱᖁᔭᑎᒍᑦ ᐱᔪᓐᓇᕈᓐᓇᕐᓗᑎᒃ ᐊᔾᔨᐅᙱᑎᑦᑎᒐᓱᖕᓂᕐᒥ ᐃᖅᑲᓇᐃᔮᒃᓴᑎᒍᑦ, ᐊᓯᖏᑦᑎᒍᓪᓗ ᐊᔾᔨᐅᙱᑎᑦᑎᒍᑎᐅᕙᒃᑐᓂᒃ, ᐊᒻᒪᓗᑕᐃᒪᓐᓇ ᐱᖁᔭᑎᒍᑦ ᑕᐃᒪᐃᑎᑕᐅᓪᓗᓂ, ᑕᐃᒪᐃᓕᐅᕐᑐᓪᓗ ᑭᓇᐅᓂᑐᐃᓐᓇᕐᓄᑦ ᐊᒻᒪᓗ ᐃᓅᔾᔪᑎᒋᔭᕕᓂᕐᓄᑦ.
ᐅᓇ ᓱᕐᓗ ᐃᒻᒪᑲᓪᓛᓗᖕᓂᙶᖅᑐᖅ, ᑭᓯᐊᓂᓕ ᑕᐃᒪᐃᑦᑐᖅ ᑭᓇᑐᐃᓐᓇᕐᒧᑦ ᓇᓗᓇᐃᕐᑕᐅᓯᒪᔪᒥ ᐊᕐᓇᕕᓂᐅᒐᓗᐊᑦ ᐊᖑᑎᐅᓕᕐᖢᑎᒃ ᐊᖑᑏᓪᓘᓐᓃᑦ ᐊᕐᓇᖑᕐᓯᒪᓕᕐᖢᑎᒃ ᓄᓇᕗᒥ ᑎᑭᖢᒍ ᒫᑦᓯ 13, 2017.
ᑖᓐᓇ ᑎᑭᖏᓐᓂᖓᓂᒃ, ᐊᓯᙳᕐᓯᒪᓂᕐᒥᑦ ᓴᕿᔮᕐᓂᖅ ᑎᑎᕋᐅᓯᐅᓯᒪᓚᐅᙱᒻᒪ ᐅᕙᓂ ᑭᒃᑯᑐᐃᓐᓇᑦ ᐱᔪᓐᓇᐅᑎᖏᓐᓄᑦ ᐱᖁᔭᕐᔪᐊᕐᒥᑦ ᓄᓇᕗᒥᑦ.
ᐊᒥᓱᓂᒃ ᐅᖃᐅᓯᕐᓂᒃ ᑕᒪᑐᒧᖓ ᐃᓱᒪᒋᔭᖃᓚᐅᕐᓯᒪᕗᖓ ᑕᐃᔅᓱᒪᓂ: ᓂᙵᖕᓂᖅ, ᐅᒃᐱᕈᓱᙱᓐᓂᖅ ᐊᒻᒪ ᐋᓐᓂᕐᓂᕐᒥᒃ.
ᑕᒪᓐᓇ ᓇᓗᓇᐃᔭᕆᐊᒃᓴᖅ ᓇᓗᓇᑲᓴᒻᒪᕆᑦᑎᐊᕐᑐᖅ, ᑭᓯᐊᓂᓕ, ᐅᖃᐅᓯᕆᓂᐊᕐᓗᒍ ᐋᓐᓂᕈᑎᒋᓕᕐᓗᒍ ᖃᐅᔨᒪᒐᒪ ᐃᓄᒃᑕᖃᐅᕐᑐᖅ ᐅᒃᐱᕈᓱᖕᒥᔪᓂᒃ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᑦᑎᒍᑦ ᓇᓗᓇᐃᕐᓯᒪᔪᓐᓇᓚᐅᙱᑦᑐᖓ, ᐅᕙᓐᓂ ᐊᓯᙳᖅᑎᑦᑐᓐᓇᙱᑎᓪᓗᒐ.
ᐅᕙᓐᓂ ᐃᔨᕐᓯᒪᔪᓐᓇᓚᐅᕐᑐᖓ, ᐄᓛᒃ, ᑭᓯᐊᓂᓕ ᐃᓅᓯᖅ ᑭᓲᖕᒪᑦ ᐃᔨᕐᓯᒪᓗᓂ ᐃᓅᖃᑎᖕᓄᑦ, ᓇᒡᓕᒋᔭᕐᓄᑦ ᐊᒻᒪ ᐱᓗᐊᕐᑐᒥᑦ ᐃᓕᖕᓄᑦ?
ᐱᕈᖅᐸᓪᓕᐊᑎᓪᓗᖓ, ᖃᐅᔨᒪᐃᓐᓇᐅᔭᓚᐅᕐᓯᒪᔪᖓ ᐊᔾᔨᐅᙱᓐᓂᓐᓂ ᐊᓯᒃᑲ ᑕᑯᓪᓗᒋᑦ. ᐱᐅᙱᑦᑐᒃᑰᙱᑦᑐᖅ, ᐋᑲ—ᐃᓱᒪᒋᔭᖃᖅᑐᖓᓕ ᐊᔾᔨᒌᙱᓐᓂᐅᔪᑦ ᖁᕕᐊᓲᑎᐅᖃᑦᑕᕆᐊᖃᕐᓂᖏᓐᓂᒃ. ᑭᓯᐊᓂᓕ ᐃᓱᒪᒋᓂᒃᑯᑦ ᐊᔾᔨᐅᙱᓐᓂᕆᔭᒃᑯᑦ.
ᐱᐅᒃᓴᖅᑐᖓ “ᐊᕐᓇᐃᑦ” ᐱᖁᑎᖏᓐᓂᒃ ᐊᒻᒪ “ᐊᖑᑏᑦ” ᐱᖁᑎᖏᓐᓂᒃ, ᑭᓯᐊᓂᓕ ᐅᖓᑖᒍᓪᓕ, ᐃᒃᐱᒋᔭᖃᓚᐅᕐᓯᒪᕗᖓ ᐊᔾᔨᐅᙱᑦᑐᐊᓗᖕᓂ ᑭᓲᖕᒪᖔᑦ ᖃᐅᔨᒪᙱᑯᑖᒃᑕᓐᓂᒃ.
ᑐᑭᓯᐅᒪᓚᐅᙱᓚᖓ ᐃᓱᒪᒃᑯᑦ ᖃᓄᐃᒻᒪᑦ ᐊᖑᑎᓃᓐᓂᕐᓴᐅᒋᓪᓗᖓ, ᐊᒻᒪᓗ ᐃᖁᒻᒪᖅᐸᒃᖢᖓ ᓯᓐᓇᒃᑐᓵᖅᖢᖓ ᐃᓅᓂᑰᓂᓐᓂᑦ ᐊᖑᑎᐅᓪᓗᖓ, ᐊᒻᒪᓗ ᖃᓄᐃᒻᒪᑦ ᑖᒃᑯᐊ ᓯᓐᓇᒃᑐᕆᔭᒃᑯᑦ ᕿᐊᔾᔪᑎᒋᕙᒃᖢᒋᑦ ᐅᓪᓛᒃᑯᑦ ᐃᓕᓐᓂᐊᕆᐊᙱᓐᓂᓐᓂᑦ.
ᑕᒪᓐᓇ ᐲᖅᑎᒐᒃᓴᐅᓚᐅᙱᑦᑐᖅ, ᐃᓚᒪ ᐃᓚᖓᑦ ᓇᓗᓇᙱᖢᓂ, ᑭᓯᐊᓂᓕ ᖃᓄᒻᒪᕆᐊᓗᑭᐊᖅ.
ᐊᑯᓂᐊᓗᒃ ᐅᕙᓐᓂ ᑕᒪᑐᒧᖓ ᖃᐅᔨᓇᓱᓚᐅᕐᓯᒪᙱᑦᑐᖓ. ᑕᒻᒪᕐᓯᒪᖅᑰᔨᓪᓗᖓ. ᓲᕐᓗ ᑕᐃᒪᐃᓐᓂᕋ “ᐱᐅᙱᑦᑐᐊᓗᒃ,” ᐊᒻᒪᓘᓐᓃᑦ ᐃᓛᓐᓂᒃᑯᑦ, “ᐃᓕᖁᓯᐅᙱᑦᑐᐊᓗᒃ.”
ᑕᑯᓚᐅᕐᓯᒪᒐᒪ ᑕᓚᕖᓴᓐᑯᑦ ᓴᕿᔮᒐᕐᓂ ᐊᒻᒪᓗ ᐃᓅᓯᒻᒪᕆᒃᑯᑦ ᑕᐃᒪᓐᓇ ᐃᒃᐱᒋᔭᖃᕐᑐᑦ ᖃᓄᐃᑕᐅᕈᓘᔭᔭᒻᒪᑕ. ᐊᖑᑏᑦ ᐊᕐᓇᕐᓯᐅᑎᓂᒃ ᐱᐅᒃᓴᖅᑐᑦ ᑕᐸᒋᔭᐅᔪᑦ, ᐊᒻᒪᓗ ᐊᕐᓇᐃᑦ ᐊᖑᑎᓯᐅᑎᓂᒃ ᑕᐃᒪᓐᓇᑦᑕᐃᓐᓇ ᐱᔭᐅᕙᒃᑭᕗᑦ.
ᑕᐃᒪᐃᓐᓂᖓᓄᑦ ᐃᓕᓯᒪᑦᑎᐊᖅᐸᕋ, ᐋᕿᑦᑎᐊᕐᓯᒪᓪᓗᒍ ᓴᓗᒪᓪᓗᓂᓗ ᐴᒃᓴᙳᐊᒥᑦ ᐃᒡᓕᕐᒪ ᐊᑖᓅᕐᓯᒪᔭᓐᓂᑦ.
ᑭᓯᐊᓂᓕ ᒪᑯᒃᑐᙳᕐᓂᐊᓵᖅᑎᓪᓗᖓ ᑖᓐᓇ ᐴᕆᔭᕋ ᒪᑐᐃᒃᑲᓐᓂᓚᐅᕐᓯᒪᕗᖅ. ᐊᑖᑕᒋᔭᐅᔪᖅ ᐱᖃᓐᓇᕆᔭᒪ ᐃᓚᖓᑦᑕ ᓴᕿᓚᐅᕐᓯᒪᖕᒪᑦ ᐊᕐᓇᑎᑑᖓᓕᖅᖢᓂ. ᑐᑭᓯᔪᓐᓇᓚᐅᙱᑦᑐᖓ ᖃᓄᖅ ᑐᑭᖃᕐᒪᖔᑦ. ᑭᓲᖕᒪᑦ ᐊᓯᙳᕐᓯᒪᓂᖅ? ᑕᒪᒃᑯᐊ ᖃᓄᖅ ᑐᑭᖃᕐᒪᑕ?
ᐅᕙᖓᓂ, ᓲᖃᐃᒻᒪ, ᐊᖓᔪᖄᓐᓄᑦ ᑕᒪᑐᒥᖓ ᑐᑭᓯᒋᐊᖅᑎᑕᐅᔪᒪᓚᐅᕐᐳᖓ ᖃᐅᔨᑎᑕᐅᓗᖓᓗ. ᐊᓈᓇᒪ ᐅᖃᓪᓚᒡᕕᒋᓚᐅᕐᓯᒪᔮᖓ ᑭᓲᔭᕆᐊᒃᓴᖓᓂᒃ, ᑕᒪᑐᒥᖓ ᑲᙳᓱᒐᓂ.
ᐅᕙᓐᓄᑦ ᐅᖃᕈᓐᓇᐃᓐᓇᐅᔭᕐᒪᑦ ᑕᒪᒃᑯᓂᖓ LGBTQ+ ᐊᒻᒪ ᐃᒻᒥᒃᑰᖓᔪᓂᒃ, ᐊᒻᒪᓗ ᑭᖑᓂᐊᒍᑦ ᐅᐸᒍᑎᓪᓗᓄ LGBTQ+-ᑯᑦ ᖃᓄᐃᓕᐅᕐᓂᖏᓐᓄᑦ ᑐᑭᓯᒃᑲᓐᓂᕐᓂᐊᕋᒪ ᑕᐃᒪᐃᑦᑐᓂᒃ.
ᐅᕙᓐᓂ ᑐᑭᓯᒋᐊᖅᑎᑦᑎᑎᓪᓗᒍ, ᓲᕐᓗ ᐃᑭᑦᑕᐅᑎᒥᒃ ᐃᓱᒪᒃᑰᕐᑐᖃᖅᑐᖅ, ᐊᒻᒪᓗ ᑭᓱᓕᒫᑦ ᑐᑭᖃᓕᖅᖢᑎᒃ. ᓲᕐᓗᓕ ᐅᕙᓐᓃᑦᑐᖅ ᐃᓚᖓ ᓴᕿᑳᓪᓚᒃᖢᓂ ᐃᓗᒃᑯᑦ, ᑐᖅᖢᓛᖅᖢᖓ ᐊᒻᒪ ᕿᐊᓪᓗᓂ ᑐᑭᖃᓕᑕᐃᓐᓇᖅᖢᓂ.
“ᑕᒻᒪᓚᐅᙱᑦᑐᖓ ᐊᔾᔨᐅᙱᐊᓗᖏᖢᖓᓗ ᐃᒃᐱᒋᔭᒃᑯᑦ—ᐊᓯᓐᓂᒃ ᑕᐃᒪᐃᑦᑐᖅᑕᖃᕐᒥᖕᒪᑦ, ᖃᐅᑕᒫᓐ ᐋᓐᓂᕐᓯᒪᔪᑦ, ᖃᐅᔨᒪᔪᑦ ᐊᔾᔨᐅᙱᓐᓂᖏᓐᓂᒃ ᐊᒻᒪ ᐱᒃᑯᒋᔭᖃᑐᐃᓐᓇᖅᑐᑦ ᐊᔾᔨᐅᙱᓐᓂᕆᔭᒥᖕᓂᑦ.
ᓱᕈᓯᒋᔭᐅᓪᓗᖓ ᓄᑖᖑᓕᕐᑐᓂ ᐱᓕᕆᔾᔪᑎᖃᐅᓕᖅᑐᓂᒃ, ᖃᕋᓴᐅᔭᒃᑯᑦ ᕿᓂᑲᑕᓕᖅᖢᖓ ᑭᖑᓪᓕᐊᒍᑦ. ᖃᐅᔨᓇᓱᓚᐅᕐᐳᖓ ᐅᖃᐅᓯᐅᓯᒪᔪᓂᒃ, ᑕᕐᕆᔭᒐᒃᓴᓂᒃ ᖁᙱᐊᖅᖢᖓ, ᐅᖃᓕᒫᑲᑕᒃᖢᖓ ᐅᖃᐅᓯᐅᑲᑕᒃᑐᓂᒃ ᐊᒻᒪᓗ ᐃᒡᓗᕈᓯᓐᓃᑐᐃᓐᓇᖅᖢᖓ ᕿᐊᑐᐃᓐᓇᖅᐸᒃᖢᖓ. ᕿᐊᔾᔪᑎᒃᑲ ᐋᓐᓂᕐᓇᖅᑐᓄᑦ ᐊᒻᒪ ᖁᕕᐊᓱᖕᓂᕐᒧᑦ, ᐃᓛᓐᓂᑦ ᑕᒪᐃᓐᓄᑦ. ᑭᓱᒥ ᐃᖢᐊᕐᓂᕐᓴᒥ ᐃᒃᐱᒍᓱᒃᓯᒪᖏᓚᖓ.
ᓲᖃᐃᒻᒪᓕ, ᐊᕐᕌᒍᒐᓴᐃᑦ ᐊᓂᒍᖅᑎᓪᓗᒋ ᓴᕿᑦᑐᓐᓇᕐᓯᓚᐅᕐᐳᖓ. ᐃᓚᖓᒍᑦ ᐃᒃᐱᒋᔭᒪ ᖃᐅᔨᒪᓪᓗᓂ ᐱᖃᓐᓇᕆᔭᒃᑲ, ᐃᓚᒃᑲ, ᐃᓅᓯᓐᓃᑦᑐ ᖃᓄᐃᒃᓴᕋᔭᙱᓐᓂᖏᓐᓂᒃ. ᑕᐃᒪᓕ ᓈᒻᒪᙱᓐᓂᕐᓴᐅᓇᔭᓚᐅᕐᑐᖅ ᐅᕙᓐᓂ ᑲᒪᓇᓱᖔᕈᑎᒃ.
ᑭᓯᐊᓂᓕ ᐃᓚᖓ ᐃᒃᐱᒋᔭᕋ ᓱᓕ ᑲᑉᐱᐊᓱᒃᖢᓂ, ᓲᖃᐃᒻᒪ ᒪᑯᐊᖑᖕᒪᑕ ᑕᕝᕙᓕ ᐃᒪᐃᑉᐸᑦ ᐊᒻᒧ ᖃᓄᐃᒍᑎᐅᔪᓐᓇᕋᔭᖅᑐᑦ ᖃᐅᔨᒪᙱᑕᒃᑯ. ᐃᓅᓱᒃᑑᓕᖅᖢᖓ ᓴᕿᓕᓚᐅᕐᓯᒪᔪᖓ.
ᓂᕆᐅᒃᓯᒪᒐᒪ ᐱᖃᓐᓇᕆᔭᒃᑯ ᐃᓚᒃᑲᓗ ᐅᕙᓐᓂ ᖃᓄᐃᒃᓴᙱᒃᑲᓗᐊᖅᑎᓪᓗᒋ, ᑕᒪᒃᒥᒃ ᑕᐃᒪᓐᓇ ᐃᓱᒪᓇᔭᙱᒻᒥᖕᒪᑕ. ᐃᓚᖓ ᐃᓱᒪᔭᒪ, ᑲᑉᐱᐊᓱᑉᓂᕐᓴᒃᑯ ᓂᕆᐅᓚᐅᕐᑐᖅ ᖃᐅᔨᒪᔭᒃᑲ ᑐᑭᓯᔾᔮᙱᑦᑕᕆᐊᒃᓴᖏᓐᓂᒃ. ᐅᕙᓐᓂ ᖃᓄᐃᓐᓂᕋᐃᓕᕐᓗᑎᑐᒃ, ᐅᕝᕙᓘᓐᓃᑦ ᕿᐸᓱᓕᕐᓗᑎᒃ ᓇᖕᒥᓂᖅ ᐊᐅᓚᒍᓐᓇᙱᑕᓐᓄᑦ.
ᑭᓯᐊᓂᓕ ᖃᐅᔨᓕᓚᐅᕐᐳᖓ ᐃᒡᓗᖔᖓᒎᓂᖓᓂᒃ—ᐊᒥᓱᑦ ᖁᕕᐊᒋᔭᖃᓚᐅᕐᑐᑦ ᐊᒻᒪ ᖃᓄᐃᓕᒃᑲᓐᓂᕋᑎᒃ ᓱᖁᑎᒃᓴᙱᑦᑐᑦ, ᑭᓯᐊᓂᓕ ᐊᐱᕆᓪᓗᑎ ᖃᓄᖅ ᐃᓱᒪᒋᔭᖃᑦᑎᐊᕈᓐᓇᕐᓂᐊᕐᓂᕐᒥᑦ. ᑕᐃᒪᓐᓇᐃᓐᓇᔭᓚᐅᙱᑦᑐᖓ ᐃᖃᓗᐃᑦ ᐊᓯᐊᓃᓚᐅᕈᒪ.
ᒫᓐᓇᓕ, ᐱᔪᓐᓇᐅᑎᒐ ᓴᐳᔾᔭᐅᓯᒪᓕᕐᑐᖅ ᐅᕘᓇ ᓄᓇᕗᒥᑦ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ ᐱᖁᔭᕐᔪᐊᒃᑯᑦ. ᐅᕙᓐᓂᒃ ᐃᖢᐊᕐᓴᕐᓂᕐᓴᐅᓕᕐᖢᖓ ᐊᒻᒪᓗ ᓄᓇᓖᑦ ᐊᖏᕐᕋᕆᓕᕐᑕᕋ.
ᐃᒃᐱᒍᓱᓕᕐᑐᖓ ᓄᓇᖃᖃᑕᐅᓪᓚᕆᓕᕐᓂᓐᓂᒃ ᓄᓇᕗᒥᑦ, ᐊᒻᒪᓗ ᐅᕙᓐᓂᑦ ᐱᒃᑯᒋᓯᒪᒻᒪᕆᒃᖢᖓ ᐊᖏᕐᕋᕆᔭᓐᓂᒃ. ᑕᒪᓐᓇ ᓇᓗᓇᐃᒃᑯᑎᓪᓚᕆᐅᕗᖅ ᓄᓇᕗᑦ ᐊᖏᕐᕋᕆᒐᒃᑯ, ᐊᒻᒪᓗ ᐃᓄᐃᑦ ᑕᕝᕙᓃᑦᑐᑦ ᑕᐃᔪᓐᓇᖅᖢᒋᑦ ᐱᖃᓐᓇᕆᓂᕋᕐᓗᒋᑦ ᐊᒻᒪ ᐃᓚᒋᓂᕋᕐᓗᒋᑦ.
ᑭᐅᕋᓐ ᑐᕌᑲᓐᐴᒡ ᐱᓕᕆᔨᐅᓯᒪᔪᖅ ᐃᓅᓱᒃᑑᓂᖓᓂᒃ ᐊᒻᒪᓗ ᒫᓐᓇ ᐱᔪᓐᓇᐅᑎᖏᓐᓂᑦ ᒪᑯᖓ LGBTQ+ ᐃᓄᖕᓂᑦ ᐊᒻᒪᓗ ᐃᓱᒪᖏᑦᑎᒍᑦ ᐋᓐᓂᐊᖃᓗᐊᖅᑐᓄᑦ.
(0) Comments