ᓄᑖᖅ ᓇᖕᒥᓂᖃᓕᕐᑐᖅ, ᓵᓚᒃᓴᕋᓱᖕᓂᖅ ᑕᐃᒪᓐᓇᓗ ᓄᓇᑦᓯᐊᕐᒥ ᐱᕙᓪᓕᐊᔪᑦ ᐱᒋᐊᓕᓚᐅᕐᓯᒪᕗᖅ

ᐱᒋᐊᓚᐅᕐᓯᒪᔪᖅ ᐋᕐᓗᖅᑐᖅ ᐊᐃᐱᓕᐅᑉ ᐃᓱᒪᖓᓂ.

ᐊᐃᐱᓕᐅᓚᐅᕐᓯᒪᔪ ᑕᐃᔅᓱᒪᓂ ᔪᓚᐃ 1976-ᒥ ᓵᓚᒃᓴᓚᐅᕐᓯᒪᔪᖅ $50.00-ᓂ ᐊᒻᒪᓗ ᑐᓴᒐᒃᓴᓂ ᐃᓅᓯᓕᒫᖓᓂ ᑐᓂᔭᐅᑐᐃᓐᓇᖃᑦᑕᕐᓂᐊᖅᖢᓂ ᓵᓚᒃᓴᕐᓂᖓᓂᒃ ᓄᑖᒥ ᐊᑎᖅᑖᖅᑎᑦᑎᓇᓱᒃᖢᑎᒃ ᐆᒥᖓ ᐃᓄᒃᓱᒃᒥ, ᑐᓴᒐᒃᓴᓕᐅᕈᑎ ᐱᒋᐊᖅᑕᐅᓂᑯᕕᓂᖅ 1973-ᖑᑎᓪᓗᒍ ᑐᓴᒐᒃᓴᓕᐅᖃᑦᑕᖅᖢᑎᒃ ᒫᓐᓇ ᓄᓇᕘᓕᖅᑐᒥᒃ.

ᖃᐅᔨᔪᒃᓴᐅᕗᑎ ᐊᐃᐱᓕᐅᑉ ᐃᓱᒪᒋᓚᐅᕐᑕᖓᓂᒃ, ᓂᕈᐊᕆᔭᐅᓚᐅᕐᓯᒪᔪᖅ 40 ᐅᖓᑖᓂ ᐱᓇᓱᒃᑐᓂᒃ, ᐆᒥᖓ ᑐᓴᒐᒃᓴᓕᐅᕐᕕᒃ ᐊᓯᐊᓂᒃ ᐊᑎᖅᑖᖅᑎᑕᐅᓇᓱᒃᑎᓪᓗᒍ ᐆᒥᖓ ᓄᓇᑦᓯᐊᕐᒥ ᐱᕙᓪᓕᐊᔪᑦ.

ᐅᓇ ᐊᑎᖓ ᐊᑎᕇᓐᓇᓕᖅᑕᖓ ᐊᒻᒪᓗ ᑖᓐᓇ ᐱᑕᖃᐃᓐᓇᓕᖅᖢᓂ ᑐᓴᒐᒃᓴᓕᐅᕈᑎ: ᓄᓇᑦᓯᐊᕐᒥ ᐱᕙᓪᓕᐊᔪᑦ ᐱᕙᓪᓕᐊᓯᒪᓪᓚᕆᖕᒪᑦ ᑐᓴᒐᒃᓴᓕᐅᕐᕕᐅᓪᓗᓂ ᐊᒻᒪ ᐅᓄᖅᑐᓕᐅᕈᑎᓐ ᐊᑐᖅᐸᒃᖢᑎᒃ ᐃᖃᓗᖕᓂ ᑎᑎᕋᕐᕕᖓᓂᒃ.

ᑕᒪᑐᒪᓂ ᐊᕐᕌᒍᒥ ᑖᓐᓇ ᑐᓴᒐᒃᓴᓕᐅᕈᑎ ᖁᕕᐊᓲᑎᖃᕐᒪᑦ ᐊᕐᕌᒍᓂ 50-ᓂ ᐱᓕᕆᐊᖑᓂᖓᓂᒃ.

ᓵᓚᒃᓴᕋᓱᒃᑐᓂ ᓂᕈᐊᖅᑎᑦᑎᔩᑦ ᓂᕈᐊᑦᑎᐊᖅᑐᐊᓘᓚᐅᕐᓯᒪᔪᑦ: ᑖᔅᓱᒥᖓ ᑎᑎᕋᐅᓯᖃᓚᐅᕐᓯᒪᔪᑦ ᔫᓂ 30, 1976-ᒥ, ᓯᕗᓪᓕᖅᐹᖑᓪᓗᓂ ᐅᓂᒃᑳᓕᐊᕆᔭᐅᔪᖅ ᑖᔅᓱᒪ ᓄᑖᖅ ᐊᑎᕆᓂᐊᖅᑕᖓ ᐱᓇᓱᐊᕈᓯᕐᒥ ᑭᖑᓪᓕᕐᒥ ᐊᑐᓕᓛᕐᓗᓂ ᔪᓚᐃ 7-ᒥ: “ᓄᓇᑦᓯᐊᖅ ᑐᑭᖃᖅᑐᖅ ‘ᓄᓇ ᐱᐅᔪᐊᓗᒃ’ ᐊᒻᒪᓗ ᐅᖃᐅᓯᖅ ᐊᑐᖅᑕᐅᕙᒃᖢᓂ ᓄᓇᑦᓯᐊᑉ ᐃᓚᖓᓂ ᓇᐹᖅᑐᓕᐅᑉ ᐅᐊᖕᓇᖅᐸᓯᐊᓂᒃ.”

“ᓄᓇᑦᓯᐊᖅᒥ ᑕᐃᔭᐅᕙᓚᐅᕐᓯᒪᖕᒪᑦ. ᑐᑭᖃᖅᑐᖅ ᐱᐅᔪᐊᓗᒃ ᓄᓇ. ᑕᐃᒪᐃᒻᒪᑦ,” ᐅᖃᕐᑐᖅ ᒫᓂᑲ ᑲᓈᓕ, ᑖᓐᓇ ᓯᕗᓪᓕᖅᐹᖑᓚᐅᕐᓯᒪᔪᖅ ᐋᖅᑭᒃᓱᐃᔨ ᓄᓇᑦᓯᐊᕐᒥ ᐱᕙᓪᓕᐊᔪᒥ ᐊᑎᖃᓕᓵᖅᑎᓪᓗᒍ, ᐊᐱᖅᓱᖅᑕᐅᑎᓪᓗᒍ ᐱᓇᓱᐊᕈᓯᐅᓵᖅᑐᒥᓐ.

ᑳᓇᓕ ᑐᓴᒐᒃᓴᓕᐅᖅᑎᐅᓚᐅᕐᓯᒪᔪᖅ ᐃᓄᒃᓱᒃ ᑐᓴᒐᒃᓴᓕᐅᖅᑎᐅᑎᓪᓗᒍ, ᑖᓐᓇ ᐱᒋᐊᖅᑕᐅᓂᑰᓪᓗᓂ 1973-ᒥ. ᑖᓐᓇ ᐊᖓᔪᖅᑳᕆᔭᐅᓚᐅᕐᓯᒪᔪᖅ ᐋᖅᑭᒃᓱᐃᕙᓪᓕᐊᓕᖅᑎᓪᓗᒋᑦ ᓇᖕᒥᓂᕆᔭᐅᔪᒥᒃ ᑲᒻᐸᓂᒥ ᐆᒥᖓ ᕗᕉᐱᓱ ᐳᕋᔅ ᓕᒥᑎᑦ (Frobisher Press Ltd.), ᑖᒃᑯᐊᓗ ᓂᐅᕕᖅᖢᑎᒃ ᑐᓴᒐᒃᓴᓕᐅᕐᕕᒃ 1976-ᒥ.

ᑭᓯᐊᓂᓕ, ᓄᓇᓕᖕᓄᑦ ᑐᓴᒐᒃᓴᓕᕆᔨᐅᔪᑦ ᐊᐅᓚᑦᑎᔪᑦ ᐃᓄᒃᓱᒃᒥ ᓄᑖᓂ ᐱᖃᓕᕐᑐᓂ ᐊᒃᑐᐊᔪᒪᔪᓐᓃᓚᐅᕐᒪᑕ ᑖᔅᓱᒥᖓ ᐊᒻᒪ ᓇᖕᒥᓂᖃᓕᖅᑐᓂᒃ ᑕᐃᒪᓕ ᕗᕉᐱᓱ ᐳᕋᔅ ᐊᓯᐊᓂᒃ ᐊᑎᖅᑖᖁᔭᐅᖕᒪ ᐊᖏᓚᐅᕐᓯᒪᔪᑦ.

ᐊᒻᒪᓗ ᓵᓚᒃᓴᕋᓱᒃᑎᑦᑎᓂᒃᑯᑦ ᐊᑎᖃᓕᓚᐅᕐᓯᒪᔪᖅ ᓄᓇᑦᓯᐊᕐᒥ ᐱᕙᓪᓕᐊᔪᑦ.

ᑕᐃᔅᓱᒪᓂᓕ, ᓄᑖᒥ ᑎᐅᕆᑖᕋᓱᖕᓂ ᓄᓇᑦᓯᐊᑉ ᑲᓇᖕᓇᖓᓃᑦᑐᑦ ᐃᓱᒪᖕᓇᑐᐃᓐᓇᓚᐅᕐᓯᒪᖕᒪ, ᑭᓯᐊᓂᓕ ᓄᓇᕗᑦ ᐊᑐᖅᑕᐅᕙᓪᓕᐊᓕᓚᐅᕐᓯᒪᖕᒪᑦ 1970-ᖏᓐᓃᓕᖅᑎᓪᓗᒍ, ᑳᓇᓕ ᐃᖅᑲᐅᒪᔪᖅ.

“ᓄᓇᑦᓯᐊᖅ ᒪᓕᒐᓕᕆᔨᓅᙱᓐᓂᕐᓴᐅᓚᐅᕐᓯᒪᖕᒪᑦ ᐊᒻᒪ ᑕᑯᔪᒥᓇᑦᑎᐊᖅᖢᓂ,” ᐅᖃᕐᑐᖅ, ᐊᒻᒪᓗ “ᓴᖅᑭᔮᖅᑎᑦᑎᑦᑎᐊᖅᖢᓂ” ᓄᓇᒥ, ᑖᔅᓱᒪᓗ ᐋᓱᕚ, ᐋᓐᑎᐅᕆᐅᒥᐅᑕᕕᓂᐅᑉ ᐅᖓᒋᓕᕐᓯᒪᓪᓗᓂᐅᒃ.

“ᓴᖅᑭᑎᑦᑎᓯᒪᓚᐅᕐᓯᒪᖕᒪᑦ ᐊᕕᒍᒪᓂᕐᒥᒃ ᓂᕈᐊᕐᓯᒪᓂᑦᑎᓐᓂᒃ, ᑭᓯᐊᓂᓕ ᐊᕕᖕᓂᕐᒧᑦ ᐊᒃᑐᐃᓂᖃᓚᐅᕐᓯᒪᙱᓐᓇᑦᑕ,” ᐅᖃᕐᑐᖅ.

ᕗᕉᐱᓱ ᐳᕋᔅ ᓕᒥᑎᑦᑯᑦ ᑖᔅᓱᒥᖓ ᑐᓴᒐᒃᓴᓕᐅᕈᑎᒥ ᐱᓯᒪᒃᑲᓐᓂᓚᐅᕐᓯᒪᔪᖅ ᓂᐅᕕᖅᑕᐅᓚᐅᖅᑎᓐᓴᒍ ᐅᑯᓄᖓ ᓄᐊᑕᒃᔅᑯᓐᓄᑦ, ᑖᒃᑯᐊᓗ ᒫᓐᓇ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ ᐊᐅᓚᑦᑎᓪᓗᑎ ᓱᓕ ᒫᓐᓇᒧᑦ.

“ᓄᓇᑦᓯᐊᕐᒥ ᐱᕙᓪᓕᐊᔪᑦ ᓂᐅᕕᓚᐅᕐᓯᒪᔭᕗᑦ 1985-ᒥ ᐊᒻᒪᓗ ᑖᓐᓇ ᐊᑎᖓ ᐊᑐᖅᑕᐅᕌᓂᒃᓯᒪᓕᖅᖢᓂ ᐊᕐᕌᒍᑲᓴᖕᓂ ᖁᓕᓂᒃ,” ᐅᖃᕐᑐᖅ ᓴᖅᑭᑎᑦᑎᔨ ᒪᐃᑯᓪ ᕌᐳᑦᔅ.

“ᐊᒻᒪᓗ ᐊᑎᖓ ᐊᓯᙳᖅᑎᑦᑐᒪᙱᖢᑎᒍ ᓄᓇᕗᒧᑦ ᓲᖃᐃᒻᒪ ᐋᖅᑭᒃᓯᓯᒪᓕᓚᐅᕐᓯᒪᒐᑦᑕ ᐅᓄᒃᑲᓐᓂᖅᑐᓂᒃ ᑐᓴᒐᒃᓴᓕᐅᒃᑲᓐᓂᕈᒪᓪᓗᑕ ᐊᒻᒪ ᓄᓇᕕᒃᒧᑦ ᐊᐅᓪᓚᖅᑎᑦᑎᖃᑦᑕᕐᓗᑕ ᑐᓴᒐᒃᓴᓂᒃ.”

ᒎᒍᓗᓂ ᐅᓇ ᐅᖃᐅᓯᖅ ‘ᓄᓇᑦᓯᐊᖅ’ ᐊᒻᒪᓗ ᑭᓱᓕᒫᐸᓗᐃᑦ ᐊᒃᑐᐃᓯᒪᔪᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᖃᕋᓴᐅᔭᒃᑯᑦ ᓴᖅᑭᔮᒐᖓᓂ ᐊᒻᒪ ᑐᓴᒐᒃᓴᖏᓐᓂᒃ. ᕌᐳᑦᔅ ᐅᖃᕐᑐᖅ “ᐅᓇ ᑭᒃᑯᓕᒫᓄᑦ ᖃᐅᔨᒪᔭᐅᓕᕐᒪᑦ ᐅᑭᐅᕐᑕᖅᑐᕐᒥ, ᐊᒻᒪᓗ ᑕᐃᔭᐅᓂᕐᓴᐅᕙᒃᖢᓂ ᓄᓇᑦᓯᐊᖅ ᐃᒪᓐᓇᐅᙱᑦᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᑦ.”

ᐃᓄᒃᑎᑐᑦ, ᐅᓇ ᓄᓇᑦᓯᐊᖅ ᐊᑐᖅᑕᐅᖃᑦᑕᕐᒥᖕᒪᑦ ᓄᓇᒥ ᓄᓇᕗᑦ ᐱᒋᐊᓪᓚᕆᓚᐅᕐᓯᒪᑎᓐᓇᒍ 1999-ᒥ.

“ᐄᓛᒃ, ᓄᓇᑦᓯᐊᖅ ᐊᑐᖅᑕᐅᕙᓚᐅᕐᒪᑦ ᐃᓄᒃᑎᑐᑦ ᐊᓐᑕᐸᔫᑏᒧᑦ,” ᐅᖃᕐᑐᖅ ᐹᓪ ᖁᐊᓴ, ᐃᖃᓗᐃᑦ ᓄᓇᓕᐸᐅᔭᖓᓄᑦ ᑲᑎᒪᔨᐅᖃᑕᐅᔪᖅ. “ᐅᓇ ᐅᖃᐅᓯᖅ ᑐᑭᖃᕐᒪᑦ ᐱᐅᔪᐊᓗᒃ ᓄᓇ, ᐅᕝᕙᓘᓐᓃᑦ ᐱᐅᔪᐊᓗᑦ ᐊᐅᓪᓛᕐᕕᒋᓗᒍ.

“ᐃᓅᓪᓗᑕ, ᐊᑐᖃᑦᑕᕋᑦᑎᒍᑦ ᓱᓕ ᓄᓇᑦᓯᐊᖅ ᐅᖃᐅᓯᖃᖅᖢᑕ ᐃᓂᒥ ᐊᐅᓪᓚᕐᕕᒃᓴᑦᑎᐊᕙᖕᒥᓐ.”

– ᐃᓚᖃᖅᖢᑎ ᑰᕆ ᓚᐅᕌᒃ ᑎᑎᕋᕐᓯᒪᔭᖏᓐᓂᒃ