ᖁᓄᔪᕐᓂᐊᖅᑕᐅᓂᑯᕕᓃᑦ ᑐᒃᓯᕋᐅᑎᒋᓂᐊᖅᑕᖏᓐᓂᒃ $8 ᒥᓕᐊᓐ ᑖᓚᓂ ᓄᓇᕗᒥᑦ ᒐᕙᒪᒃᑯᓐᓂ ᐊᖏᖃᑎᒌᒍᑎᖃᖅᐳᑦ

For the English version of this story, please see Abuse victims reach proposed $8M settlement with Nunavut government.

ᓄᓇᕗᒥᑦ ᒐᕙᒪᒃᑯᑦ ᐊᖏᓚᐅᕐᑐᑦ $8 ᒥᓕᐊᓐ ᑖᓚᓂ ᐃᓄᒋᐊᓄᑦ ᐃᖅᑲᖅᑐᐃᕕᒃᑰᕈᑎᒋᑎᑕᐅᔪᒥᒃ ᓄᓇᕗᒻᒥᐅᓂ ᖁᓄᔪᕐᓂᐊᖅᑕᐅᖃᑦᑕᓚᐅᕐᓯᒪᓂᖏᓐᓄᑦ ᐃᓕᓐᓂᐊᕆᐊᖃᑦᑕᖅᑎᓪᓗᒋ ᑲᖏᖅᑐᒑᐱᖕᒥ ᐊᒻᒪ ᖃᐅᓱᐃᑦᑐᕐᒥ ᖃᖓᑲᓪᓚᕈᓘᓕᕐᑐᖅ.

ᐃᖅᑲᖅᑐᐃᑎᑦᑎᔪᑦ ᓗᐊᐃᔭᖏᑦ ᐅᑯᓇᙶᖅᑐᑦ ᑰᐳ ᕇᒍᓪ ᐊᒻᒪ ᒧᕆᔅ ᒨᐊ ᓂᐅᕙᐅᓐᓛᓐᒥ ᐊᒻᒪ ᓛᐸᑐᐊᒥ, ᑐᓴᖅᑎᑦᑎᓚᐅᖅᑐᑦ ᐊᖏᖃᑎᒌᒍᑎᐅᔪᒥᑦ ᒪᐃ 7-ᒥ ᑐᓴᒐᒃᓴᓕᐅᖅᖢᑎᒃ.

ᐅᓇ ᐃᓄᒋᐊᓄᑦ ᐃᖅᑲᖅᑐᐃᕕᒃᑰᖅᑎᑦᑎᓂᖅ ᐱᒋᐊᖅᑕᐅᓚᐅᖅᓯᒪᔪᖅ 2008-ᒥ 37-ᓄᑦ ᐃᓕᓐᓂᐊᖅᑎᕕᓂᕐᓄᑦ ᐃᓕᓴᐃᔨᖃᖅᖢᑎᒃ ᒧᕇᔅ ᑯᓘᓕᒥ, ᐱᔾᔪᑎᖃᖅᖢᑎᒃ ᖁᓄᔪᕐᓂᐊᖃᑦᑕᓚᐅᕐᓯᒪᓂᖓᓂᒃ ᐱᖓᓱᓂᒃ ᓄᓇᕗᒥᑦ ᓄᓇᓕᖕᓂ.

ᑯᓘᓕ 1996-ᒥ ᐃᖅᑲᖅᑐᖅᑕᐅᔾᔪᑎᖃᓚᐅᖅᓯᒪᔪᖅ 9-ᓂ ᖁᓄᔪᕐᓂᐊᖅᓯᒪᓂᕐᒨᖓᔪᓂᒃ ᐃᓕᓐᓂᐊᖅᑎᓂᒃ ᑕᐃᔅᓱᒪᓂ ᓄᓇᑦᓯᐊᖑᓚᐅᕐᓯᒪᔪᒥᒃ.

2016-ᒥ ᐱᖓᓱᑦ ᐃᖅᑲᖅᑐᐃᕕᒃᑰᖅᑎᑦᑎᔪᑦ ᐱᓇᓱᓚᐅᕐᓯᒪᖕᒪᑕ ᐃᓄᒋᐊᖑᓗᑎᒃ ᐃᖅᑲᖅᑐᐃᕕᒃᑰᖅᑎᑦᑎᔪᒪᓪᓗᑎ 2020-ᖑᑎᓪᓗᒍ ᐊᒻᒪᓗ ᐊᖏᖅᑕᐅᓪᓗᑎᒃ ᑲᔪᓯᔪᓐᓇᕐᓂᖏᓐᓂᒃ.

ᐱᓇᓱᐊᕈᓯᐅᓚᐅᕐᑐᒥ ᐊᖏᖃᑎᒌᒍᑎ ᑐᕌᖓᑎᑕᐅᑐᐃᓐᓇᓚᐅᕐᑐᖅ ᑯᓘᓕᒧᑦ ᖁᓄᔪᕐᓂᐊᖅᑕᐅᔪᕕᓂᕐᓄᑦ ᐃᓕᓐᓂᐊᖃᑦᑕᖅᑎᓪᓗᒋᑦ ᑲᖏᖅᑐᒑᐱᒃᒥᑦ ᐊᒻᒪ ᖃᐅᓱᐃᑦᑐᒥᑦ ᐊᐃᕆᓕ 1, 1969-ᓗ ᐊᒻᒪ ᔪᓚᐃ 30, 1981 ᐊᑯᓐᓂᖓᓂ.

ᓕᓐ ᒧᐊ, ᐱᓕᕆᐊᖃᖃᑕᐅᔪᖅ ᒨᕆᔅ ᒧᐊᒥ, ᐅᖃᓚᐅᕐᑐᖅ ᑕᐃᒪᐃᓐᓂᕋᖅᑕᐅᓪᓗᓂ ᑖᒃᑯᐊ ᐃᓕᓐᓂᐊᕐᕖᒃ ᑯᓘᓕᐅᑉ ᐃᓕᓴᐃᕝᕕᒋᓚᐅᕐᓯᒪᖕᒪᑕ ᓄᓇᑦᓯᐊᖑᑎᓪᓗᒍ, ᐅᑯᐊᓕ ᑯᓘᓕᐅᑉ ᖁᓄᔪᕐᓂᐊᖃᑦᑕᖅᑕᕕᓂᖏᑦ ᐊᓯᖏᓐᓂᒃ ᓄᓇᓕᖕᓂ ᒐᕙᒪᑐᖃᒃᑯᓐᓄᑦ ᐊᐅᓚᑕᐅᓚᐅᕐᓯᒪᖕᒪᑕ ᐊᒻᒪ ᐅᕘᓈᕆᐊᖃᖅᖢᑎᒃ ᒪᑭᓖᓐ ᐃᓕᓐᓂᐊᖅᕕᒃᒥᑦ ᐃᖅᑲᖅᑐᐃᕕᒃᑰᖅᑎᑦᑎᓂᒃᑯᑦ.

ᐅᑯᐊ ᓄᓇᕗᒥᑦ ᐃᖅᑲᖅᑐᐃᕕᒃᑯᑦ ᐊᖏᖅᐸᑕ ᐱᔭᐅᓇᓱᒃᑐᓂᒃ ᔫᓂ 4-ᒥᑦ ᑕᒪᑐᒥᖓ ᐱᓕᕆᐊᖃᓕᖅᑎᓪᓗᒋᑦ, ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᐊᑭᓖᓇᔭᖅᑐᑦ $8 ᒥᓕᐊᓐ ᑖᓚᓂ ᐊᖏᖃᑎᒌᖕᓂᒃᑯᑦ ᐱᔭᐅᓇᓱᒃᑐᓂᒃ ᐃᓕᓐᓂᐊᖅᑐᕕᓂᕐᓂ.

ᐅᓇ ᑮᓇᐅᔭᖅ ᐊᕕᒃᑐᖅᑕᐅᓇᔭᖅᑐᖅ ᐃᓕᓐᓂᐊᖃᑎᒌᕕᓂᕐᓄᑦ ᒪᓕᒡᓗᑎᒃ ᖃᓄᑎᒋ ᐋᓐᓂᖅᑕᐅᓯᒪᖕᒪᖔᑕ ᑎᑭᓪᓗᓂ $200,000 ᐊᑐᓂ ᐱᓇᓱᒃᑐᓄᑦ.

“ᑭᒡᒐᖅᑐᐃᔪᑦ ᐃᖅᑲᖅᑐᐃᕕᒃᑰᖅᑎᑦᑎᔪ ᐊᒻᒪ ᓗᐊᐃᔭᖏᑦ ᐅᒃᐱᕈᓱᖕᒪᑕ ᑐᒃᓯᕋᐅᑎᒋᔭᐅᓇᓱᒃᑯᑦ ᐱᐅᓛᒃᑰᖅᓯᒪᓇᓱᒃᑐ ᐃᓕᓐᓂᐊᖅᑎᕕᓂᕐᓄᑦ,” ᒪᕐᕉᒃ ᓗᐊᔭᖃᕐᕕᐅᔫᒃ ᐅᖃᓚᐅᖅᑑᑦ ᑐᓴᒐᒃᓴᑎᒍᑦ.

ᐃᓕᓐᓂᐊᖃᑕᐅᔪᕕᓃᑦ ᐅᐸᒍᑎᔪᓐᓇᖅᑐᑦ ᐱᓕᕆᐊᖑᓕᖅᐸᑦ ᑭᓯᐊᓂᓕ “ᐅᐸᙱᒃᑲᓗᐊᖅᐸᑕ,” ᖃᓄᐃᒋᑦᑐᖅ, ᓗᐊᐃᔭᒋᔭᐅᔪᑦ ᐅᖃᓚᐅᕐᑐᑦ.