ᓄᓇᕗᒥᑦ ᒐᕙᒪᒃᑯᑦ ᕿᓂᓕᕐᑐᑦ ᐃᓄᖕᓄᑦ-ᓄᓇᖃᖅᑳᖅᑐᓄᑦ ᑐᕌᖓᔪᒥᒃ ᐊᑐᓗᐊᖅᐸᖕᓂᕐᒧᑦ ᐃᑲᔪᖅᑕᐅᕕᒃᓴᓂᒃ
ᐱᔪᒪᒍᑎᑦ ᑐᒃᓯᕋᐅᑎᒋᔭᐅᔪᖅ ᐅᖃᕐᓯᒪᔪᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᓱᒪᓂᖏᓐᓂᒃ ᐋᖅᑭᒃᓱᐃᓗᑎᒃ ᓄᓇᓕᖕᓂ ᐃᓱᒪᒃᑯᑦ ᐋᓐᓂᐊᖅᑐᓕᕆᓂᕐᒧᑦ ᐊᒻᒪ ᐊᑐᓗᐊᖅᐸᒃᑐᓄᑦ ᐱᓕᕆᔨᒃᓴᐅᓂᐊᕐᑐᓂᒃ
ᓄᓇᕗᒥᑦ ᓯᕗᓕᐅᕐᑎ ᔫ ᓴᕕᑲᑖᖅ, ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᓂ ᒥᓂᔅᑕ ᓰᒪᔅ ᐅᕇᒐᓐ ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓᑦ ᐊᓗᑭ ᑰᑦᑎᖅ ᐊᑎᓕᐅᕐᐳᑦ ᐱᓕᕆᖃᑎᒌᖕᓂᒃᑯᑦ ᐱᓕᕆᐅᖃᕈᒪᓂᕐᒥᒃ ᐃᖃᓗᖕᓂ ᐋᒐᓯ 2019-ᖑᑎᓪᓗᒍ, ᓴᓇᓂᐊᕐᓗᑎᒃ ᐊᑐᓗᐊᖅᐸᒃᑐᓄᑦ ᐃᑲᔪᖅᑕᐅᕝᕕᒃᓴᒥᑦ (ᐊᔾᔨᖑᐊᖁᑎᖓ ᐊᒪ ᑐᕌᓐᑐ)
For an English version of this story, see Nunavut government seeks Inuit, Indigenous-focused addictions treatment programs
ᓄᓇᕗᒥᑦ ᒐᕙᒪᒃᑯᑦ ᕿᓂᕐᒪᑕ ᑭᓇᑐᐃᓐᓇᒥᒃ ᐱᓕᕆᐊᖃᕈᓐᓇᕋᔭᖅᑐᒥᒃ ᐃᓄᐃᑦ ᐃᓕᖁᓯᖓᒍᑦ ᐊᑐᓗᐊᕐᓂᕐᒧᑦ ᒪᒥᓴᕈᑎᐅᔪᓐᓇᖅᑐᓂᒃ ᓄᓇᕗᒥᑦ.
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᑭᑦᑐᕋᐅᑎᒍᑎᒥ ᓴᖅᑭᑦᑎᓚᐅᕐᓯᒪᖕᒪᑕ ᔭᓄᐊᕆᐅᑎᓪᓗᒍ, ᕿᓂᖅᖢᑎᒃ ᒪᒥᓴᕈᑎᐅᓇᔭᕐᑐᓂᒃ ᒪᑯᓄᖓ “ᐋᖅᑭᒃᓯᒪᔪᑐᖄᓗᖕᓄᑦ ᐃᓄᐃᑦ ᐃᓕᖅᑯᓯᖏᑦᑎᒍᑦ ᐅᕝᕙᓘᓐᓃᑦ ᓄᓇᖃᖅᑳᖅᑐᑦ ᐃᓕᖅᑯᓯᖓᒍᑦ ᐊᑐᖅᑕᐅᕙᒃᑐᓄᑦ.”
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᕿᓂᕐᒪᑕ ᐱᔨᑦᑎᕋᐅᑎᓂᒃ ᐋᖅᑭᒃᑕᐅᓯᒪᔪᓐᓇᖅᑐᓂ ᓄᓇᕗᒻᒥᐅᑦ ᐃᓅᓱᒃᑐᖏᓐᓄᑦ, ᐊᓈᓇᒋᔭᐅᔪᓄᑦ ᐊᒻᒪᓗ ᐃᒪᒌᓄᑦ, ᑖᓐᓇ ᑕᐃᒪᓐᓇ ᑐᒃᓯᕋᕈᑎᒋᔭᐅᔪᖅ ᐅᖃᕐᓯᒪᔪᖅ ᐊᒻᒪᓗ ᒪᑐᓚᐅᖅᖢᓂ ᕕᕝᕗᐊᕆ 26-ᖑᑎᓪᓗᒍ.
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓇᓗᓇᐃᕐᓯᓚᐅᕐᑐᑦ ᕿᓂᕐᓂᖏᓐᓂᒃ ᐱᔨᑦᑎᕋᕐᕕᒃᓴᓂᒃ ᑲᒪᒋᔭᐅᙱᓐᓇᕆᐊᓕᖕᓄᑦ ᐅᕝᕙᓘᓐᓃᑦ ᐱᔨᑦᑎᕋᐅᖃᕐᕕᒃᓴᒥᑦ ᓄᓇᖃᖅᑐᓄᑦ, ᑭᓯᐊᓂᓕ ᑖᓐᓇ ᐱᔨᑦᑎᕋᐅᑎᓕᕆᔨᐅᓇᔭᕐᑐᖅ ᑲᒪᒋᔭᖃᕈᓐᓇᕆᐊᖃᕋᔭᖅᖢᓂ ᐊᖏᕐᕋᕐᓯᒪᓕᕐᑐᓂᒃ ᑲᒪᒋᔭᕆᐊᓕᖕᓂᒃ ᓄᓇᓕᖕᓂ.
ᐊᑭᑦᑐᕋᐅᑎᒍᑎ ᓇᓗᓇᐃᕐᓯᓯᒪᓪᓚᕆᙱᑦᑐᖅ ᓄᓇᕗᑦ ᐸᕐᓇᐅᑎᒋᔭᖏᓐᓂᒃ ᓴᓇᓂᕐᒥᒃ ᐅᓗᕆᐊᓇᕐᑐᖅᓯᐅᓗᐊᒧᑦ ᐊᒻᒪ ᐊᑐᓗᐊᔭᓐᓂᕐᒧᑦ ᒪᒥᓴᕐᕕᒃᓴᒥᑦ ᐃᖃᓗᖕᓂ.
ᒐᕙᒪᒃᑯᑦ ᒫᓐᓇ ᑲᒪᒋᔭᖃᙱᑦᑐᑦ ᓄᓇᕗᒥᑦ ᐊᑐᓗᐊᕐᓂᕐᒧᑦ ᒪᒥᓴᕐᓂᕐᒧᑦ ᐱᓕᕆᐊᖑᔪᓂᒃ, ᑭᓯᐊᓂᓕ ᓄᓇᕗᒥᑦ ᒐᕙᒪᒃᑯᑦ ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᑲᑐᔾᔨᓪᓗᑎᒃ ᐱᓕᕆᖃᑎᒌᒃᑐᑦ ᐋᖅᑭᒃᓱᐃᓇᓱᖕᓂᕐᒥᒃ ᐃᖃᓗᖕᓃᑦᑐᒥᑦ ᓄᓇᕗᒥᑦ ᒪᒥᓴᕐᕕᒃᓴᒥᒃ.
ᒐᕙᒪᑐᖃᒃᑯ ᒫᓐᓇ ᓴᓂᕐᕙᐃᓯᒫᓂᓕᕐᑐᑦ $47.5 ᒥᓕᐊᓐᓂ ᓴᓇᓂᐊᕐᓂᕐᒧᑦ ᒪᒥᓴᕐᕕᒃᓴᒥᒃ ᐊᒻᒪᓗ ᐊᐅᓚᑕᐅᔾᔪᑎᒃᓴᖓᓄᑦ ᑖᓐᓇ ᒪᑐᐃᓚᐅᕐᑎᓪᓗᒍ.
ᑕᒪᓐᓇ ᐊᑐᓚᐅᕐᑎᓐᓇᒍᓕ ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᐃᑲᔫᓯᐊᖅᑖᖅᑎᑦᑎᕙᒃᑐᑦ ᓄᓇᕗᑦ ᓯᓚᑖᓂ ᒪᒥᓴᕐᕕᓕᕆᓂᕐᒥᒃ ᐊᒻᒪ ᐊᑐᓗᐊᕐᓂᕐᒧᑦ ᐃᑲᔪᖅᑕᐅᕝᕕᒃᒥᑦ; ᓄᓇᕗᒥᑦ ᒐᕙᒪᒃᑯᑦ ᑭᖑᓪᓕᖅᐹᒥ ᐊᐅᓚᔾᔪᑎᒃᓴᖏᑦ ᓴᓂᕐᕙᐃᓯᒪᓚᐅᕐᑐᑦ $10.6 ᒥᓕᐊᓐᓂᒃ ᑕᒪᒃᑯᐊ ᐱᔨᑦᑎᕋᐅᑎᒋᔭᐅᔪᑦ ᓄᑖᙳᕆᐊᖅᑕᐅᔾᔪᑎᒃᓴᖏᓐᓄᑦ ᐊᕐᕌᒍᒧᑦ.
ᑕᐃᒪᓐᓂᖓᓄᑦ, ᐊᑭᑦᑐᕋᐅᑎᒍᑎ ᓴᖅᑭᑎᑦᑎᓯᒪᔪᖅ ᓄᓇᕗᑦ ᓯᓚᑖᓃᑦᑐᑦ ᐃᓱᒪᓕᕆᓂᕐᒧᑦ ᐋᓐᓂᐊᕐᑐᓕᕆᓂᖅ ᐊᒻᒪᓗ ᐊᑐᓗᐊᕐᓂᕐᒧᑦ ᐱᔨᑦᑎᕋᐅᑎᐅᔪᑦ “ᐱᑕᖃᖅᑎᑕᐅᖏᓐᓇᕐᓂᐊᕐᑐᑦ ᐃᓚᒋᔭᐅᓗᓂ ᓄᓇᕗᒥᑦ ᑲᒪᒋᔭᖃᓂᕐᒧᑦ ᐱᓕᕆᔾᔪᓯᖏᓐᓄᑦ.”
“ᖃᐅᔨᒪᔭᐅᖕᒪᑦ ᑲᔪᓯᔭᕆᐊᖃᕐᓂᖓᓂᒃ ᓄᓇᕗᑦ ᓯᓚᑖᓃᑦᑐᑦ ᐱᔨᑦᑎᕋᐅᑎᐅᔪᑦ ᐋᖅᑭᒃᑕᐅᓯᒪᔪᑦ ᐅᓇ ᐱᔨᑦᑎᕋᐅᓕᕆᕝᕕᒃᓴᖅ ᐱᓕᕆᔨᒃᓴᖃᕋᓱᓕᕐᓂᖓᓂᒃ ᓄᓇᕗᒥᑦ,” ᐅᖃᕐᓯᒪᔪᖅ.
“ᐱᓕᕆᕝᕕᐅᑉ ᐸᕐᓇᐅᑎᖓ ᐋᖅᑭᒃᓯᒍᑎᐅᓇᓱᒡᓗᓂ ᓄᓇᓕᖕᓂ ᐃᓱᒪᓕᕆᓂᕐᒧᑦ ᐊᒻᒪ ᐊᑐᓗᐊᕐᓂᕐᒧᑦ ᐱᓕᕆᔨᐅᓂᐊᕐᑐᓂᒃ. ᐃᓱᒪᒋᔭᐅᖕᒪᑦ ᑕᒪᒃᑯᐊ ᓄᓇᓕᖕᓂ ᐱᓕᕆᔨᐅᔪᑦ ᐊᑐᐃᓐᓇᖃᕐᓂᕐᓴᐅᓇᔭᕐᓂᖏᓐᓂᒃ ᓇᓗᓇᐃᔭᕐᓯᒪᓂᕐᓴᓂᒃ ᐃᑲᔪᕈᑎᒃᓴᓂᒃ ᒪᐅᓇ ᐅᖄᓚᐅᑎᑎᒍᑦ ᐋᓐᓂᐊᖅᑐᓕᕆᓂᕐᒥᒃ ᐱᓕᕆᓂᕐᓴᐅᓗᑎᒃ ᐊᒻᒪᓗ ᓘᒃᑖᓂᒃ ᐱᓕᕆᐊᓕᖕᓂ ᐊᑕᐅᓯᕐᒥ ᖃᐅᔨᓴᕆᐊᕌᖓᑕ ᐊᑐᐃᓐᓇᖃᕐᓂᕐᓴᐅᓗᑎᒃ ᐊᒻᒪᓗ ᐅᓪᓗᒃᑯᑦ ᐱᓕᕆᕝᕕᐅᔪᓐᓇᖃᑦᑕᕐᓂᐊᕐᑐᓂᒃ.”
ᓄᓇᕗᒥᑦ ᒐᕙᒪᒃᑯᑦ ᐅᖃᕐᓯᒪᙱᑦᑐᑦ ᖃᑯᒍᑦ ᓴᓇᓕᕋᔭᕆᐊᒃᓴᖏᓐᓂᒃ ᒪᒥᓴᕐᕕᒃᒋᔪᒪᔭᖓᓂᒃ. ᑭᓯᐊᓂᓕ ᐅᓇ ᑮᓇᐅᔭᓕᕆᔨᒃᑯᑦ ᒥᓂᔅᑕᖓ ᔪᐊᔾ ᕼᐃᒃᔅ ᐅᖃᓚᐅᕐᓯᒪᔪᖅ ᐊᐅᓚᔾᔪᑎᒃᓴᓕᕆᑎᓪᓗᒍ ᐱᓇᓱᐊᕈᓯᐅᓚᕐᑐᒥᒃ ᑖᒃᑯᐊ ᒐᕙᒪᒃᑯᑦ ᑕᒪᑐᒥᖓ ᐱᒋᐊᕈᒪᑐᐃᓐᓇᕐᓂᖏᓐᓂᒃ.
“ᐅᓇ ᐱᓕᕆᕝᕕᒃᓴᖅ ᐃᑲᔪᕋᔭᕐᑐᖅ ᓄᓇᕗᒻᒥᐅᓂᒃ ᒪᒥᓴᕈᓐᓇᕐᓗᑎᒃ ᓄᓇᕗᒥᑦ, ᖃᐅᔨᒪᔭᖏᓐᓂᒃ ᖃᓂᒃᓴᕐᓗᑎᒃ ᐃᓚᖏᓐᓂᒡᓗ ᐊᒻᒪᓗ ᐃᓕᖅᑯᓯᑦᑎᓐᓄᑦ, ᐊᑐᖃᑦᑕᖅᑕᑦᑎᓐᓄᑦ ᐊᒻᒪᓗ ᐅᖃᐅᓯᖃᑎᖏᓐᓄᑦ,” ᕼᐃᒃᔅ ᐅᖃᓚᐅᕐᓯᒪᔪᖅ ᕕᕝᕗᐊᕆ 23-ᖑᑎᓪᓗᒍ. “ᐱᓕᕆᔪᒪᒻᒪᕆᒃᑐᒍᑦ ᑕᒪᑐᒥᖓ ᑲᔪᓯᑎᑦᑎᔪᒪᓪᓗᑕ ᐃᓅᖃᑎᑦᑎᓐᓄᑦ.”
ᖃᐅᔨᓇᓱᒃᑎᒥᑦ ᐅᓂᒃᑳᓕᐊᖑᔪᕕᓃᑦ ᐅᑯᓄᖓ ᓄᓇᕗᒥᑦ ᒐᕙᒪᒃᑯᓐᓄᑦ 2018-ᖑᑎᓪᓗᒍ ᓇᓗᓇᐃᕐᓯᓯᒪᓚᐅᕐᑐᑦ ᖁᓕᕇᓕᖓᔪᓂᒃ ᐱᖓᓲᓕᖓᔪᒥᑦ ᒪᒥᓴᕐᕕᒃᓴᖃᕆᐊᖃᕐᓂᖓᓂᒃ ᐊᑐᓗᐊᔭᓐᓂᕐᒧᑦ ᓄᓇᕗᓄᒥᑦ, ᐃᓚᖃᖅᖢᓂ ᐃᖃᓗᖕᓂ ᒪᒥᓴᕐᕕᒃᓴᖅ, ᓄᓇᓕᖕᓂᑦ ᒪᒥᓴᕐᕕᒃᓴᐃᑦ ᐊᒻᒪᓗ ᓄᓇᐃᓐᓇᕐᒥ ᒪᒥᓴᕐᑕᐅᕝᕕᒃᓴᒥᑦ, ᑕᒪᓐᓇᓗ ᐊᑭᖃᓪᓗᐊᖅᖢᓂ ᒫᓂ $102 ᒥᓕᐊᓐᓂ ᐊᕐᕌᒍᓂᒃ ᑕᓪᓕᒪᓂᒃ.
ᐸᕐᓇᐅᑎᐅᔪᖅ 256 ᒥᒃᓵᓂᑦ ᓄᓇᖃᕐᑐᓂᒃ ᐱᓕᕆᐊᖃᖃᑦᑕᕋᔭᕐᑐᑦ ᐊᕐᕌᒍᒥ ᒪᐅᓇ ᓄᓇᓕᖕᓂ ᒪᒥᓴᕐᕕᓕᕆᓂᕐᒧᑦ ᐱᓕᕆᐊᑎᒍᑦ ᐊᒻᒪ ᐱᔨᑦᑎᕋᐅᑎᑎᒍᑦ, ᐊᒻᒪᓗ ᒫᓂ 80-ᓂᒃ ᓄᓇᖃᖅᑐᓂᒃ ᑲᒪᒋᔭᖃᕐᐸᒡᓗᑎᒃ ᐊᕐᕌᒍᒥ ᓄᓇᐃᓐᓇᕐᒥ ᒪᒥᓴᖅᑐᓕᕆᓂᒃᑯᑦ ᑕᒪᓐᓇᓗ ᒪᓂᒪᔭᐅᓪᓗᓂ ᐊᕕᒃᑐᖅᓯᒪᓂᒃᑰᖓᔪᒃᑯᑦ ᓄᓇᕗᒥᑦ.
(0) Comments