ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑎᓂ ᑐᓵᕗᑦ ᐃᖅᑲᓇᐃᔮᕆᔭᐅᔪᒪᔪᓄᑦ ᐅᖃᐅᔾᔨᓂᐅᔪᒥ ᐃᖅᑲᓇᐃᔮᓄᑦ ᑕᑯᒃᓴᐅᑎᑕᐅᓂᐅᔪᒥ

For English version, see ‘Just go for it’: High school students hear career advice at trade show

ᓯᕗᓪᓕᖅᐹᒥ ᐅᓪᓗᖓᓂ ᓄᓇᕗᒻᒥ ᐃᖅᑲᓇᐃᔮᕆᔭᐅᔪᓄᑦ ᑕᑯᒃᓴᐅᑎᑕᐅᓂᖓᓂ, ᐅᓄᕐᓂᖅᓴᐅᔪᓂ 100−ᓂ ᐃᓄᖕᓂ — ᑕᒪᒃᑭᒐᓚᑦ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑎᓂ — ᑕᑕᐃᓚᐅᖅᐳᑦ ᐃᒡᓗᕈᓯᕐᒥ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᕐᒧᑦ ᐊᓐᓂᑭᑕᕐᕕᖓᓂ ᑐᓵᓂᕐᒧᑦ ᐅᖃᓪᓚᒃᑎᐅᔪᓂ ᐊᔾᔨᒌᙱᑦᑐᓂ ᑲᑐᔾᔨᖃᑎᒌᖑᔪᓂ ᓇᓗᓇᐃᖅᓯᓂᖏᓐᓂ ᐱᓕᒻᒪᒃᓴᐃᓂᕐᒧᑦ ᐱᓕᕆᐊᖑᒧᓂ ᐊᒻᒪ ᐊᑐᐃᓐᓇᖃᖅᑎᑦᑎᔪᓂ ᐃᖅᑲᓇᐃᔮᕆᔭᐅᔪᒪᔪᓄᑦ ᐅᖃᐅᔾᔨᓂᐅᔪᒥ.

“ᐅᕙᓂ ᐃᒡᓗᕈᓯᕐᒦᑦᑐᓕᒫᑦ, ᑭᓲᔪᓐᓇᖅᐳᑎᑦ ᑭᓲᔪᒪᓂᕐᓂ, ᐊᒻᒪ ᐅᓇ ᐅᒃᐱᕈᓱᙱᓐᓂᐅᔪᒥ ᐱᔪᓐᓇᙱᓐᓂᕐᓂ ᐃᓕᖕᓂ ᓄᖅᑲᖅᑎᑦᑎᑦᑕᐃᓕᓕ ᐊᒻᒪ ᐅᖃᕐᓗᑎᑦ, ‘ᐱᔪᓐᓇᖅᑐᖓ,’” ᐅᖃᓚᐅᖅᐳᖅ ᑭᐅᕈᓪᐋᓐ ᕼᐋᑎᖕ, ᐊᐅᓚᑦᑎᔨᒻᒪᕆᒃ SmartIce ᑕᕆᐅᕐᒥ ᓯᑯᒥ ᓇᐅᑦᑎᖅᓱᕐᓂᐅᔪᒥ ᐊᒻᒪ ᑐᓴᒐᒃᓴᓂ ᐃᖕᒃ ᓯᑎᐱᕆ 17−ᒥ.

ᐊᑕᐅᓯᐅᓪᓗᓂ 7-ᖑᔪᓂ ᐅᖃᓪᓚᒃᑎᐅᖃᑕᐅᓚᐅᖅᐳᖅ ᑲᑎᒪᔨᐅᔪᓂ ᐃᓚᖃᓚᐅᖅᑐᒥ ᑭᒡᒐᖅᑐᐃᔨᐅᔪᓂ ᕿᑭᖅᑕᓂ ᓴᓇᕕᓕᕆᓂᖕᒧᑦ ᑎᒥᖁᑖ, NCC ᑮᓇᐅᔭᓕᐅᕋᓱᐊᖅᑏᑦ ᐱᓇᓱᐊᖅᑕᖏᓐᓂ, Ampere (ᐊᐅᓚᑕᐅᔪᒥ ᐱᙳᐊᕐᒥ), ᐊᒻᒪ ᑲᓇᑕᒥ ᐸᓖᓯᒃᑯᑦ.

ᐅᓂᒃᑳᕆᓚᐅᖅᑎᓪᓗᒋᑦ ᑲᑐᔾᔨᖃᑎᒌᖏᑕ ᐊᒻᒪ ᐃᖅᑲᓇᐃᔮᒥ ᐱᓕᒻᒪᒃᓴᐃᓂᐅᔪᒥ ᐱᓕᕆᐊᖑᔪᓂ, ᐃᓚᖏᑦ ᑲᑎᒪᔨᐅᔪᑦ ᐅᖃᓪᓚᓚᐅᖅᐳᑦ ᐊᒃᓱᕈᕐᓇᕐᓂᐅᔪᓂ ᓵᙵᕙᖕᓂᖏᓐᓂ ᐃᖅᑲᓇᐃᔭᖅᑎᑖᕐᓂᕐᒧᑦ ᐃᓄᖕᓂ, ᐊᒻᒪ ᐊᑐᐃᓐᓇᖃᖅᑎᑦᑎᓚᐅᖅᐳᖅ ᐃᑲᔫᑎᒃᓴᓂ ᐃᓕᓐᓂᐊᖅᑎᓄᑦ ᐱᓱᒃᐸᓪᓕᐊᑎᓪᓗᒋᑦ ᐃᖅᑲᓇᐃᔮᕆᔪᒪᔭᖏᓐᓄᑦ.

“ᐃᓱᒪᕗᖓ ᐊᖏᓛᖑᔪᖅ ᐊᒃᓱᕈᕐᓇᕐᓂᐅᔪᖅ ᐃᓄᐃᑦ ᐃᒻᒥᓂᒃ ᑕᑯᔪᓐᓇᙱᓐᓂᖏᓐᓂ ᓇᓗᓇᐃᖅᑕᐅᓯᒪᔪᒥ ᐊᑐᕐᓂᖃᐅᑎᐅᔪᒥ,” ᕼᐋᑎᖕ ᐅᖃᓚᐅᖅᐳᖅ.

100−ᐸᓗᖕᓂ ᐃᓄᖕᓂ, ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑏᓐᓇᐸᓗᖕᓂ, ᓈᓚᒃᐳᑦ ᐃᒡᓗᕈᓯᕐᒥ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᕐᒧᑦ ᐊᓐᓂᑭᑕᕐᕕᖓᓂ ᑕᐃᑲᓂ ᓄᓇᕗᒻᒥ ᐃᖅᑲᓇᐃᔮᕆᔭᐅᔪᓄᑦ ᑕᑯᒃᓴᐅᑎᑕᐅᓂᖓᓂ ᑲᑎᒪᓂᐅᔪᒥ ᐅᖃᓪᓚᖕᓂᐅᔪᒥ ᒪᒃᑯᒃᑐᓄᑦ ᐱᕕᒃᓴᖃᕐᓂᐅᔪᓂ. (ᔨᐊᕝ ᐱᓚᑦᑎᐊᐃᒧᑦ ᐊᔾᔨᓕᐅᖅᑕᐅᔪᖅ)

ᑕᐃᕕᑦ ᒪᒃᐋᑕᒻᔅ, ᐃᖅᑲᓇᐃᔭᖅᑐᓕᕆᓂᕐᒧᑦ ᐅᖃᐅᔾᔨᒋᐊᖅᑎ ᐃᓕᓐᓂᐊᐹ ᐊᔪᙱᓐᓂᐅᔪᓂ ᐱᕙᓪᓕᐊᑎᑦᑎᓂᕐᒧᑦ ᐱᓕᕆᕝᕕᖓᓂ, ᑲᔪᖏᖅᓴᐃᓚᐅᖅᐳᖅ ᐃᓕᓐᓂᐊᖅᑎᓂ ᑐᒃᓯᕋᕐᓂᕐᒧᑦ ᐃᖅᑲᓇᐃᔮᖑᔪᓄᑦ ᐊᒻᒪ ᐱᕕᒃᓴᖃᕐᓂᐅᔪᓄᑦ, ᐊᑐᕐᓂᖃᑐᐃᓐᓇᕐᓂᕐᒧᓪᓘᓐᓃᑦ ᐱᓕᕆᓂᒃᑰᕆᓂᐅᔪᒥ.

“ᐃᖅᑲᓇᐃᔮᖅ ᐱᙱᖏᑐᐃᓐᓇᕆᐊᖃᖅᐸᐃᑦ, ᑭᓯᐊᓂ ᐊᐱᖅᓱᖅᑕᐅᓂᖃᑐᐃᓐᓇᕆᐊᖃᖅᐳᑎᑦ,” ᐅᖃᓚᐅᖅᐳᖅ.

“ᐱᕕᒃᓴᖃᑐᐃᓐᓇᕆᐊᖃᖅᐳᑎᑦ ᐅᖃᓪᓚᖃᑎᖃᕐᓂᕐᒥ ᐃᓄᖕᓄᑦ ᐃᖅᑲᓇᐃᔮᖅᑎᑦᑎᓲᓂ, ᐊᒻᒪ ᖃᐅᔨᒪᓗᑎᒃ ᐱᔪᒪᓂᖃᕐᓂᕐᓂ ᐃᖅᑲᓇᐃᔮᒃᓴᒥ.”

Cpl. ᔪᐊᔾ ᕼᐊᓄᕆ, ᓄᓇᕗᒻᒥ ᑲᓇᑕᒥ ᐸᓖᓯᒃᑯᓐᓄᑦ ᓯᐊᒻᒪᖅᑎᑦᑎᓂᕐᒧᑦ ᖃᐅᔨᒪᖃᑎᒌᖕᓂᐅᔪᒥ ᐊᒻᒪ ᐃᖅᑲᓇᐃᔭᖅᑎᑖᖅᑎᑦᑎᓇᓱᐊᕐᓂᕐᒧᑦ ᐱᓕᕆᔨ, ᐱᔾᔪᑎᖃᖅᑐᒥ ᒪᒃᑯᒃᑐᓄᑦ ᖁᙱᐊᖅᑐᓄᑦ ᐃᓚᒋᔭᐅᔪᓄᑦ, ᐅᖃᓪᓚᓚᐅᖅᐳᖅ ᐃᓅᓯᖓᓂ ᐱᕈᖅᓴᓪᓗᓂ ᑲᖏᖅᖠᓂᕐᒥ ᐊᒻᒪ ᐸᓖᓯᐅᓂᖓᓂ ᐃᖅᑲᓇᐃᔮᕆᔭᒥᓂ.

ᐅᖃᓚᐅᖅᐳᖅ ᐃᓛᓐᓂᒃᑯᑦ ᐊᒃᓱᕈᖅᐸᓚᐅᖅᐳᖅ ᐃᓕᓐᓂᐊᕐᕕᖕᒥ, ᑭᓯᐊᓂ ᖁᕕᐊᓇᑦᑎᐊᖅᑐᒥ ᐊᕐᕌᒍᓂ 22−ᓂ ᑲᓇᑕᒥ ᐸᓖᓯᒃᑯᓐᓂᑦ ᐃᖅᑲᓇᐃᔭᕐᓂᖓᓂ ᓄᓇᕗᓕᒫᒥ ᐊᒻᒪᓗᑦᑕᐅᖅ ᑲᓇᑕᒥ ᐊᖓᔪᖅᑳᕐᔪᐊᑉ ᓇᐅᑦᑎᖅᓱᖅᑎᐅᔪᒥ ᐱᓕᕆᓂᖓᓂ.

“ᐱᕈᖅᓴᓪᓗᓂ, ᓱᓕᒃᑲᓐᓂᖅ, ᐃᓕᓐᓂᐊᖅᑎᐅᓪᓗᓂ ᖁᑦᑎᒃᑐᓂ ᓇᓗᓇᐃᖅᓯᓯᒪᙱᓐᓂᐅᔪᒥ, ᐅᒃᐱᕈᓱᓚᐅᙱᓚᖓ ᕿᓱᑐᐃᓐᓇᒥᒃ ᐱᔪᓐᓇᕐᓂᓐᓂ,” ᕼᐊᓄᕆ ᐅᖃᓚᐅᖅᐳᖅ.

“ᖃᐅᔨᓂᐊᖅᐳᑎᑦ ᖃᓄᖅ ᓴᙱᑎᒋᓂᕐᓂ ᐊᒻᒪ ᓴᙱᔫᔪᓐᓇᕐᓂᕐᓂ ᐊᒻᒪ ᖃᐅᔨᒪᕐᔪᐊᕐᓂᕐᓂ.”

ᐃᓱᓕᑦᑎᓚᐅᖅᐳᖅ ᐅᖃᐅᔾᔨᓪᓗᓂ ᐃᓕᓐᓂᐊᖅᑎᓂ: “ᐱᖏᐊᑐᐃᓐᓇᕐᓗᓯ.”

ᖃᔅᓯᒐᓚᖕᓂ ᑲᑎᒪᔨᐅᔪᓂ ᑲᔪᖏᖅᓴᐃᓚᐅᖅᐳᑦ ᐃᓕᓐᓂᐊᖅᑎᓂ ᐅᑎᕐᓂᕐᒧᑦ ᐃᖅᑲᓇᐃᔮᕆᔭᐅᔪᓂ ᑕᑯᒃᓴᐅᑎᑕᐅᓂᖓᓂ ᓯᑎᐱᕆ 19−ᒥ, ᐃᓄᓕᒫᓄᑦ ᐅᓪᓘᓂᐊᖅᑐᒥ, ᐅᖃᓪᓚᖃᑎᖃᕐᓂᕐᒧᑦ ᐃᓂᒋᔭᖏᓐᓂ ᐃᖅᑲᓇᐃᔮᓄᑦ ᐊᒻᒪ ᐱᓕᒻᒪᒃᓴᓂᐅᔪᓄᑦ ᐱᕕᒃᓴᖃᕐᓂᐅᔪᓄᑦ.