165 ᐊᕐᕌᒍᑦ ᐊᓂᒍᕐᓯᒪᓕᖅᑎᓪᓗᒋᑦ, ᐃᓄᐃᑦ ᖃᐅᔨᒪᓂᖓᑦ ᕗᕌᖕᒃᓕᓐ ᐅᒥᐊᕐᔪᐊᖓᓂ ᓇᓂᓯᒍᑎᐅᕗᖅ

ᐃᓄᐃᑦ ᖃᓄᐃᓕᐅᕈᓯᕕᓂᖏᑦ ᓇᓂᓯᓂᕐᒧᑦ ᐅᖃᐅᓯᐅᖃᑦᑕᓕᖅᐳᖅ ᓄᓇᕐᔪᐊᓕᒫᒥ

ᖃᐅᔨᒪᔭᐅᑦᑎᐊᖅᑐᖅ ᐊᖅᑐᕕᓂᓕᕆᔨ ᓗᐃ ᑲᒨᑲᒃ ᐅᖅᓱᖅᑑᖅᒥᐅᑕᖅ ᐅᕙᓃᑦᑐᖅ ᓄᓇᑦᑕ ᓱᓇᒃᑯᑕᖏᑦ ᑕᑯᔭᒐᖃᕐᕕᒃᒥᑦ ᐃᖃᓗᖕᓂᑦ ᔭᓄᐊᕆ 19, 2017-ᒥ, ᐅᖃᓪᓚᒃᑎᓪᓗᒍ ᐃᓄᐃᑦ ᖃᐅᔨᒪᔭᙱᓐᓂᒃ ᕗᕌᖕᒃᓕᓐ ᖃᐅᔨᓴᕐᓂᕕᓂᖓᓂᒃ ᓄᓇᓂᒃ. ᑲᒨᑲᑦ ᐃᑲᔪᒻᒪᕆᓚᐅᕐᐳᖅ ᓇᓂᓯᓂᕐᒥᒃ ᕗᕌᖕᒃᓕᓐ ᐅᒥᐊᕐᔪᐊᖏᓐᓂᒃ. (ᐊᔾᔨᓕᐅᕆᔨ ᓯᑏᕝ ᑐᓵᒻ)

By ᐅᕋᓱᓪ ᐹᑐᕐ

For an English version of this story, see The connected territory? Nunavut still waits

ᖁᕕᐊᓲᑎᖃᕋᑦᑕ ᓄᓇᕗᑦ 20-ᐅᓕᕐᓂᖓᓂᒃ ᕿᒥᕐᕈᐊᖅᖢᑎᒍᑦ ᑖᔅᓱᒪ ᓇᖕᒥᓂᖅ ᒐᕙᒪᓕᕆᔨᖃᖅᑐᑦ ᑎᐅᕆᑑᕆᐅᑉ ᐊᓂᒍᐃᓯᒪᓂᖏᓐᓂ ᐊᒻᒪ ᐱᓇᓱᒋᐊᖃᖅᓯᒪᔭᖏᓐᓂᒃ ᒫᙵᑦ ᑎᑕᐅᓯᕆᓂᕐᒥᒃ ᐊᒻᒪ ᑕᑯᓐᓇᒐᒃᓴᓕᕆᓂᕐᒥᒃ ᒪᐅᖓ ᑮᓇᐅᔭᓕᐅᕋᓱᖕᓂᕐᒧᑦ, ᐃᓄᒃᑐᑦ ᖃᓄᐃᓕᕐᓂᖓᓂᒃ ᐊᒻᒪᓗ ᓯᓚᐅᑉ ᐊᓯᙳᖅᓂᖓᓂᒃ. ᐃᓚᖏᓐᓂᒃ ᓄᓇᕗᒻᒥᐅᑕᑦ ᐅᓂᒃᑲᐅᓯᖏᓐᓂᒃ ᑐᓴᕐᓂᐊᖅᑐᒍ ᖃᓄᖅ ᓄᓇᕗᑦ ᑐᑭᖃᕐᒪᖔᑦ ᑖᒃᑯᓄᖓ ᐊᒻᒪᓗ ᖃᓄᐃᑦᑐᓂ ᐊᓯᙳᕈᑎᒃᓴᓂᒃ ᑕᑯᔪᒪᖕᒪᖔᖏᓐᓂᒃ ᐊᕐᕌᒍ 20 ᐊᒡᒋᖅᑐᓂᒃ.

ᓇᓂᓯᓂᑯᑦ–2014-ᒥᑦ ᐊᒻᒪ 2016-ᒥ–ᐊᓯᐅᓂᑯᓂᒃ ᐅᒥᐊᕐᔪᐊᑦ ᓲ ᔮᓐ ᕗᕌᖕᒃᖠ 1845-ᒥᑦ ᐊᑐᖅᑕᕕᓂᖏᓐᓂᒃ ᐅᑭᐅᕐᑕᖅᑐᕐᒥᑦ ᖃᐅᔨᓴᖅᑎᓪᓗᒍ ᐱᒻᒪᕆᐅᓛᖑᖃᑕᐅᒋᔭᐅᔪᑦ ᐃᑦᑕᕐᓂᓴᕐᓂ ᓇᓂᓯᕙᖕᓂᕐᒥᑦ ᑕᐃᒪᐃᑦᑐᐸᓗᖕᓂᒃ.

ᐊᑯᓂᐊᓗᒃ ᕿᓂᖅᑐᓂᒃ ᓇᓂᔭᐅᓚᐅᙱᑦᑐᑦ 165 ᐊᕐᕌᒍᐸᓗᖕᓂᑦ, ᑭᓯᐊᓂ 1990-ᖏᑦ ᐃᓱᓕᒻᒪᕆᓕᕐᑎᓪᓗᒋ, ᖃᐅᔨᓴᖅᑎᐅᔪᑦ ᕿᒥᕐᕈᐊᑲᑕᓕᕐᒪᑕ ᑎᑎᕋᖅᑕᐅᓯᒪᓂᑯᓂᒃ ᐃᓄᐃᑦ ᐅᖃᐅᓯᖏᓐᓂᒃ, ᑖᒃᑯᐊᓗ ᐃᓱᒪᒋᔭᐅᙲᓐᓇᕐᓂᑰᓪᓗᑎᒃ, ᑖᒃᑯᐊ ᖃᓄᐃᓐᓂᕕᓂᖏᑦ ᖃᐅᔨᔭᐅᓕᓚᐅᕐᑐᑦ.

ᐃᓄᐃᑦ ᖃᐅᔨᓂᑯᐃᑦ ᖃᐅᔨᓇᓱᒃᑐᓂᒃ ᐅᖃᖃᑦᑕᐃᓐᓇᓚᐅᕐᓯᒪᔪᑦ ᑖᒃᑯᐊ ᐃᓚᖓᑦ ᐅᒥᐊᕐᔪᐊᑉ ᑭᕕᓚᐅᕐᓯᒪᓂᖓᓂᒃ ᐅᑦᔪᓕᒃᒥᑦ–ᐅᐊᖕᓇᖅᐸᓯᐊᓂ ᐅᐊᓕᓂᕐᒥᐅᑦ ᓯᒡᔭᖓᓂᒃ ᐋᑎᓚᐃᑦ ᐸᓂᓐᓱᓚᒥᑦ (Adelaide Peninsula)–ᐃᒪᖓ ᐃᒃᑲᓐᓂᖓᓄᑦ ᑕᐃᔅᓱᒪᓂ ᓇᐸᕈᑕᖓ ᓴᕿᔮᕈᓐᓇᓚᐅᕐᑐᖅ ᐃᒪᕐᒥ. ᑕᒪᒃᑯᐊ ᖃᐅᔨᔾᔪᑎᐅᓇᔭᖅᑐᑦ, ᐱᓕᕆᐊᖑᓂᑰᒐᓗᐊᑦ 1990-ᖏᓐᓂᒃ ᑕᐃᕕᑦ ᕗᑦᒪᓐᒧᑦ, ᐃᓕᔭᐅᓯᒪᕗᑦ ᕿᑎᐊᓂᒃ ᖃᐅᔨᓴᕐᓂᖅ ᐱᒋᐊᖅᑕᐅᒃᑲᓐᓂᓕᖅᑎᓪᓗᒍ, ᐱᒋᐊᖅᑕᐅᓯᒪᓂᑰᓪᓗᓂ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒧᑦ ᐃᑦᑕᕐᓂᓴᓕᕆᔨ ᕌᐳᑦ ᒍᕆᓂᐅ, ᐱᖃᑎᖃᖅᖢᓂ ᐃᓅᔪᓐᓃᕐᓯᒪᓕᕐᑐᒥᒃ ᐊᑐᖅᑐᕕᓂᓕᕆᔨᒥᒃ ᓗᐃ ᑲᒧᒃᑲᒃ 2008-ᒥᑦ.

ᐊᕐᕌᒍᑕᒫᑲᓴᒃ ᐊᐅᔭᐅᓕᕌᖓᑦ ᐊᕐᕌᒍᓂᒃ 6-ᓂᒃ, ᑕᒪᓐᓇ ᕿᓂᕐᕕᐅᖃᑦᑕᓚᐅᕐᓯᒪᔪᖅ, ᐊᑐᖅᐸᒃᖢᑎᒃ ᐅᒥᐊᕐᓂᒃ ᐅᓂᐊᖅᑐᓂᒃ ᐃᒃᐱᒍᓱᖕᓂᒃᑯᑦ ᓇᓗᓇᐃᕐᓯᒍᑎᓂᒃ. 2014-ᒥᑦ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐃᓱᒪᓕᓚᐅᕐᓯᒪᔪᑦ ᐅᐊᖕᓇᖅᐸᓯᒃᑲᓐᓂᕐᒥᒃ ᕿᓂᕈᒪᓪᓗᑎᒃ ᒫᓂ ᑭᓪᓕᓂᐅᑉ ᑕᕆᐅᖓᓂ (Victoria Strait), ᖃᓂᒋᔭᖓᓂ ᑭᖑᓪᓕᖅᐹᖅ ᐅᒥᐊᕐᔪᐊᑉ ᐅᐸᒃᓯᒪᔭᕕᓂᖓᓂᒃ; ᑭᓯᐊᓂᓕ ᓯᑯ ᐱᐅᙱᓐᓂᖓᓄᑦ ᐅᑎᓕᓚᐅᕐᓯᒪᔪᑦ ᓂᒋᖅᐸᓯᐊᓄᑦ ᒪᐅᖓ ᐅᑦᔪᓕᒃ ᒥᒃᓵᓄᑦ.

ᑕᐃᑲᓃᓚᐅᕐᓯᒪᔪᖅ, ᓯᑎᐱᕆ 2, 2014-ᒥᑦ, ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐱᓕᕆᔨ ᐅᕋᐃᐊᓐ ᕼᐃᐅᕆᔅ ᑕᑯᓚᐅᕐᓯᒪᔪᖅ ᑕᕐᕋᒥ ᐅᓇᐅᓇᓱᒋᔭᐅᒻᒪᕆᒃᖢᓂ HMS ᐃᕆᐸᔅ ᐅᕘᓇ ᖃᐅᔨᓴᕈᑎᖓᒍᑦ, ᐊᒻᒪᓗ ᐅᖃᖅᖢᓂ ᒫᓐᓇ ᐅᖃᐅᓯᐅᕙᓕᖅᑐᒥᒃ, “ᑕᕝᕙᐃᓛᒃ! ᑕᕝᕙᐃᓛᒃ!”

ᓇᓂᓯᓂᖅ ᐅᖃᐅᓯᐅᓕᓚᐅᕐᓯᒪᔪᖅ ᓄᓇᕐᔪᐊᓕᒫᒥᑦ, ᐱᓗᐊᕐᑐᒥᒃ ᓄᓇᕗᒥᑦ, ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᒪᓕᒃᓯᒪᒐᓗᐊᖅᑎᓪᓗᒋᑦ ᐃᑦᑕᕐᓂᓴᓕᕆᓂᕐᒧᑦ ᒪᓕᒋᐊᓕᖕᓂᑦ ᓄᓇᕗᑦ ᐱᖁᔭᖅᔪᐊᖏᓐᓂᒃ, ᐊᒥᓱᑦ ᐃᓱᒪᓪᓗᑎ ᑖᒃᑯᐊ ᐃᑦᑕᕐᓂᓴᐃᑦ ᓅᑕᐅᓂᖏᓐᓂᒃ ᓂᒋᕐᒥᐅᓄᑦ ᖃᐅᔨᒪᙱᓗᐊᖅᖢᑎᒃ — ᐃᓚᖏᑦ ᐅᖃᕈᓐᓇᖅᑐᑦ ᐊᐱᕆᓚᐅᙱᖢᑎᒃ — ᓄᓇᕗᑦ ᒐᕙᒪᒃᑯᓐᓄᑦ ᐅᕝᕙᓘᓐᓃᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ.

ᐅᓇ ᑎᑎᕋᐅᔭᒐᖅᑕᐅᓂᑯᕕᓂᖅ ᓴᕿᔮᖅᑎᑦᑎᔪᖅ ᐊᐅᓪᓚᖅᐸᓪᓕᐊᓕᕐᑎᓪᓗᒋ ᐃᕆᐸᔅ ᐊᒻᒪ ᑎᐅᕈ ᐃᖕᓚᓐᒥ 1845-ᒥ. (ᐊᔾᔨᙳᐊᖁᑎᒋᔭᐅᔪᖅ)

ᓈᒻᒪᙱᓕᐅᕈᑎᐅᔪᑦ ᓇᖕᒥᓂᖃᕐᓂᕐᒧᑦ

ᓈᒻᒪᙱᓕᐅᕈᑎᐅᔪᑦ ᖃᓄᓪᓚᕆᐅᓂᖏᓐᓂᒃ ᐱᖁᔭᐃᑦ ᐊᑭᕋᕐᑐᕈᑎᐅᓚᐅᕐᐳᖅ ᐃᓚᖓᒍᑦ, ᑕᐃᔅᓱᒪᓂ ᓯᕗᓕᐅᕐᑎᐅᓚᐅᕐᑐᖅ ᐲᑕ ᑕᑉᑑᓇ ᑎᑎᕋᖅᐸᓵᖅᖢᓂ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒧᑦ ᐅᑎᕐᑎᑕᐅᖁᔨᓪᓗᓂ ᐃᑦᑕᕐᓂᓴᕐᓂᒃ. ᑕᒪᐅᓇᑦᑕᐃᓐᓇᕐᓕ, ᐊᑎᓕᐅᕐᓯᒪᒐᓗᐊᕐᑎᓪᓗᒋᑦ ᑐᑭᓯᖃᑦᑕᐅᑎᓯᒪᓂᕐᒥᒃ ᐊᑎᓕᐅᕐᑕᐅᓂᑯ 1997-ᒥᑦ ᐅᖃᕐᓯᒪᔪᖅ ᔫᓇᐃᑕᑦ ᑭᖕᑕᒻᑯᑦ ᐱᔪᓐᓇᕐᓂᖏᑦ ᐃᓚᖏᑦ ᒪᑯᓄᖓ ᑲᓇᑕᒥ ᑭᕕᔪᕕᓂᕐᓂᒃ ᐅᒥᐊᕐᔪᐊᓂᒃ ᓴᒃᑯᐃᓐᓂᐊᕋᓱᒋᔭᐅᓪᓗᑎᒃ ᑲᓇᑕᒦᑦᑐᓂᒃ, ᑭᓯᐊᓂᓕ ᐊᑐᓕᖅᑎᑕᐅᓂᖓ ᑖᔅᓱᒪ ᐊᖏᕈᑎᐅᑉ ᐊᑯᓂᐊᓗᒃ ᐱᓕᕆᐊᖑᓕᓚᐅᕐᑐᖅ ᐊᒻᒪ ᓈᒻᒪᒋᔭᐅᙱᓚᐅᖅᐸᓪᖢᓂ ᐱᓕᕆᕙᓪᓕᐊᓂᖅ.

ᑕᐃᒪᐃᓕᐅᑲᑕᒃᑎᓪᓗᒋᑦ, ᓯᑎᐱᕆ 2016-ᒥᑦ, ᕗᕌᖕᒃᓕᓐ ᐅᒥᐊᕐᔪᐊᖓᑕ ᐊᐃᑉᐸᖓ—HMS ᑎᐅᕈ—ᓇᓂᔭᐅᓚᐅᕐᓯᒪᔪᖅ ᐅᕙᓂ ᑎᐅᕈ ᐸᐃᒥᑦ, ᐅᑯᓇᙵᑦ ᐅᒥᐊᕐᔪᐊᒧᑦ ᑐᓴᕐᓯᒪᔪᓂᒃ ᐅᑯᓇᙵᑦ ᐅᖅᓱᖅᑑᒥᐅᓂᒃ ᐊᒻᒪᓗ ᑲᓃᑎᐊᓐ ᐅᓇᑕᖅᑐᒃᓴᙳᐊᒥᑦ ᓵᒥ ᑯᒡᕕᒃ.

ᑖᓐᓇᓕ ᐃᕇᐸᔅᑎᑑᖓᓚᐅᙱᑦᑐᖅ, ᐃᕆᐸᔅ ᓱᕋᒃᓯᒪᕈᓘᔭᓚᐅᕐᒪᑦ ᓯᑯᒧᑦ ᐊᒻᒪ ᐃᖏᕐᕋᓂᕐᒧᑦ, ᑕᐃᒪᓕ ᑎᐅᕈ ᓇᓂᔭᐅᓚᐅᕐᑐᖅ ᐃᑎᓂᕐᓴᒥᑦ, ᐊᒻᒪᓗ ᓯᓚᑖ ᓱᕋᒃᓯᒪᙱᖢᓂ, ᐅᑯᐊᓘᓐᓃᑦ ᐃᒐᓛᑦ ᑳᑉᑕᓐ ᑯᕉᓯᐅᑉ ᐃᒡᓗᕈᓯᐊᓃᑦᑐᑦ.

ᐊᒃᓱᓪᓘᓐᓃᒃ, ᐱᓕᕆᕙᓪᓕᐊᖃᑎᒌᖕᓂᒃᑯᑦ ᐊᔾᔨᒌᙱᖅᑑᑎᒃᑯᑦ, ᐅᓇ ᐋᕿᒃᓯᒪᒍᑎᐅᔪᖅ ᐊᔾᔨᒌᙱᑦᑐᓂᒃ ᐱᓕᕆᔪᓂᒃ ᓈᒻᒪᙱᓕᐅᕈᑎᐅᑲᑕᒃᑐᖅ ᖃᓱᒡᔫᒥᓚᐅᕐᐳᖅ. ᐋᕿᒃᓯᓪᓗᑎᒃ ᕗᕌᖕᒃᓕᓐᒧᑦ ᑲᑎᒪᔨᕋᓛᓕᐅᕐᖢᑎᒃ, ᐊᒻᒪᓗ ᐃᓱᒪᓕᐊᕆᓂᖏᑦᑎᒍᑦ, ᐃᓄᖕᓂᑦ ᓴᐳᔾᔨᔨᐅᓂᐊᖅᑐᓂᒃ ᑎᒃᑯᐊᕐᓯᓚᐅᕐᓯᒪᕗᑦ ᑖᒃᑯᐊ ᐃᓂᒋᔭᐅᔪᑦ ᓴᐳᔾᔭᐅᓯᒪᑦᑎᐊᕐᓂᐊᕐᒪᑕ.

ᐊᖏᖃᑎᒌᖕᓂᖃᓚᐅᕐᑐᑦ ᓄᓇᕗᑦ ᒐᕙᒪᒃᑯᓐᓂ, ᐃᓄᐃᑦ ᐱᖁᑎᖏᓐᓂᒃ ᓇᐅᑎᖅᓱᖅᑎᑯᓐᓂᒃ ᐊᒻᒪᓗ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᓐᓂ,  ᑲᒪᒋᔭᐅᓂᖏ, ᐋᕿᒃᓱᖅᑕᐅᓯᒪᓂᖏᓪᓗ ᐱᓕᕆᐊᖑᖃᑦᑕᕐᓂᐊᕐᓗᓂ ᑕᒪᐃᓐᓄᑦ ᐃᓄᖕᓄᑦ ᐊᒻᒪ ᒐᕙᒪᑐᖃᒃᑯᑦ ᐱᓕᕆᔨᖏᓐᓄᑦ. ᐃᑲᔫᑎᒃᓴᓂᒃ ᐋᕿᒃᓯᓚᐅᕐᑐᑦ ᐊᖏᒡᓕᒋᐊᖅᑕᐅᔾᔪᑎᒃᓴᖓᓄᑦ ᐃᓕᖁᓯᓕᕆᔨᒃᑯᓐᓂᒃ ᐅᖅᓱᖅᑑᒥᑦ, ᑕᒪᒃᑯᐊ ᐃᓚᖏᑦ ᐱᖁᑎᑦ ᐅᒥᐊᕐᔪᐊᕕᓂᕐᒥᙶᖅᑐᑦ ᓴᕿᔮᖅᑎᑕᐅᔪᓐᓇᕐᓂᐊᕐᒪᑕ.

ᐃᑦᑕᕐᓂᓴᐃᑦ ᓇᓂᔭᐅᓯᒪᔪᑦ ᑲᑎᑕᐅᓯᒪᓕᕐᑐᑦ ᓴᕿᔮᒐᐅᓂᐊᕐᒪᑕ. ᑕᐃᔭᐅᓯᒪᔪᖅ “ᐃᓅᔪᓐᓃᕐᓂᖅ ᓯᑯᒥ,”  ᑖᓐᓇ ᓴᕿᑎᑕᐅᓯᒪᓕᖅᑐᖅ ᒍᕆᓐᕗᐃᑦᔅᒥᑦ ᔫᓇᐃᑕᑦ ᑭᖕᑕᒻᒥᑦ, ᐅᕙᓂ ᑲᓇᑕᒥ ᑕᑯᔭᒐᖃᕐᕕᒃ ᐊᑐᖅᑐᕕᓂᕐᓄᑦ (Canadian Museum of History), ᐊᒻᒪᓗ ᒫᓐᓇ ᓴᕿᔮᖅᑎᑕᐅᓪᓗᓂ ᐅᕙᓂ ᒥᔅᑎ ᓰᐳᐊᑦ ᑕᑯᔭᒐᖃᕐᕕᒃ (Mystic Seaport) ᐊᒥᐊᓕᑲᒥᑦ.

ᑕᐃᔭᐅᔪᖅ ‘ᐃᓅᔪᓐᓃᕐᓂᖅ ᓯᑯᒥ’ ᓴᖅᑮᔮᒐᕆᔭᐅᔪᖅ, ᑲᓇᑕᒥᓗ ᓄᓇᓕᖕᓅᑲᑕᖅᖢᑎᒃ, ᐊᒥᐊᓕᑲᒥ ᐊᒻᒪᓗ ᑯᐃᓐ ᓄᓇᖓᓂᒃ, ᔫᓇᐃᑕᑦ ᑭᖕᑕᒻ. ᐃᑲᔪᕈᑎᐅᓪᓗᓂ ᐅᓂᒃᑳᓄᑦ ᖃᓄᖅ ᐃᓄᐃᑦ ᖃᐅᔨᒪᓂᖓ ᐊᓯᐅᓯᒪᔪᓂ ᐅᒥᐊᕐᔪᐊᓂᒃ ᐅᓇ ᓲ ᔮᓐ ᕗᕌᖕᒃᓕᓐ 1845-ᒥ ᐅᑭᐅᑦᑕᖅᑑᑉ ᓄᓇᖓᓂᒃ ᖃᐅᔨᓴᖅᐸᓪᓕᐊᑎᓪᓗᒍ. ᐅᕙᓂᓕ, ᐃᓄᙳᐊᑦ ᐃᓄᐃᑦ ᐊᓐᓄᕌᖏᑦᑕ ᐊᔾᔨᖏᓐᓂᒃ ᔭᐸᓯᒪᔪ ᕿᒥᕐᕈᐊᖅᐳᑦ ᐃᓄᖕᒧᑦ ᕿᔪᖕᒥ ᓴᓇᔭᐅᓂᑯᕕᓂᕐᒥᒃ ᐃᐅᕈᑉᒥᐅᑕᖅᑎᑐᑦ ᐅᒥᐊᕐᔪᐊᙳᐊᖅ ᒫᓂ 1500-ᖏᓐᓂᒃ. (ᐊᔾᔨᓕᐅᕆᔨ ᓯᑏᕝ ᑐᓵᒻ)

ᓈᒻᒪᒌᑲᑕᙱᓐᓂᖅ ᐃᓱᓕᑉᐳᖅ ᐊᖏᖃᑎᒌᖕᓂᒃᑯᑦ

ᑭᖑᓪᓕᖅᐹᕐᓕ, ᐊᖏᖃᑎᒌᖕᓂᖃᓚᐅᕐᑐᑦ ᐃᒪᓐᓇ, ᑕᒪᒃᑯᐊ ᐅᒥᐊᕐᔪᐊᕕᓂᐅᑉ HMS ᐃᕆᐸᔅ ᐊᒥᐊᒃᑯᖏᓐᓄᑦ, ᔫᓇᐃᑕᑦ ᑭᖕᑕᒻ ᐱᔪᓐᓇᐅᑎᖏᓐᓂᒃ ᓴᒃᑯᐃᓗᑎᒃ ᐊᒥᐊᒃᑯᒋᔭᐅᔪᓂᒃ ᑕᒪᐃᓐᓂ ᐅᒥᐊᕐᔪᐊᒥᙶᕐᓂᐊᖅᑐᓂᒃ.

ᑖᒃᑯᐊ ᐱᒋᐊᕐᓯᒪᓂᑰᓪᓗᑎᒃ ᓈᒻᒪᒌᖃᑎᒌᙱᑉᐸᒃᖢᑎᒃ ᐱᐊᓂᒍᑎᖃᓚᐅᕐᐳᖅ ᐊᖏᖃᑎᒌᖕᓂᒃᑯᑦ – ᑕᐃᒪᐃᓂᖓᓄᓪᓗ, ᓇᓂᓯᓂᖅ ᑖᒃᑯᓂᖓ ᒪᕐᕉᖕᓂ ᐅᒥᐊᕐᔪᐊᕕᓂᑐᖄᓘᖕᓂᒃ ᐃᑲᔪᕈᑎᒻᒪᕆᐅᓂᐊᕐᑐᖅ ᓄᓇᕗᒻᒥᐅᓄᑦ, ᑕᒪᐃᓐᓄᑦ ᓄᓇᓕᖕᓃᑦᑐᓄᑦ ᐅᒥᐊᕐᔪᐊᕕᓂᐅᑉ ᖃᓂᒋᔭᖓᓂᒃ, ᐊᒻᒪᓗ ᑕᒪᐃᓐᓄᑦ ᐃᓄᖕᓄᑦ.

ᐅᓄᕐᓂᕐᓴᐃᑦ ᑕᒪᐅᙵᑲᑕᓕᕐᓗᑎᒃ ᐅᒥᐊᕐᔪᐊᒃᑯᑦ ᐃᓄᖕᓂᑦ ᐅᓯᔨᐅᕙᒃᑐᓂᒃ, ᐊᒥᓱᑦ ᐃᒻᒪᑲᓪᓚᓕᓴᕐᓂᒃ ᑐᓴᐅᒪᔪᒪᓂᕐᒧᑦ ᐆᒥᖓ ᕗᕌᖕᒃᓕᓐ ᖃᓄᐃᓂᑯᕕᓂᐊᓂᒃ, ᑕᐃᒪᐃᓐᓂᖓᓄᑦ ᑕᒪᒃᑯᐊ ᑮᓇᐅᔭᑎᒍᑦ ᐱᑖᕈᑎᐅᓂᕐᓴᐅᓂᐊᕐᑐᖅ ᐊᒻᒪ ᑐᑭᓯᓂᕐᓴᐅᓕᕐᓗᑎᒃ.

ᐱᒻᒪᕆᐅᓛᕐᓕ, ᐅᓂᒃᑲᐅᓯᖃᑲᑕᓕᕐᒪᑕ ᓄᓇᕐᔪᐊᓕᒫᒥᑦ ᐃᓄᐃᑦ ᐃᑲᔪᓚᐅᕐᓂᖏᓐᓂᒃ ᓇᓂᓯᓂᕐᒥᒃ ᑕᒪᐃᓐᓂᒃ ᐅᒥᐊᕐᔪᐊᕕᓃᖕᓂᒃ, ᐅᕘᓇᑐᐊᖑᙱᑦᑐᖅ ᐃᓅᔪᓐᓃᑉᓂᖅ ᓯᑯᒥ ᓴᕿᔮᒐᑎᒍᑦ (ᑖᒃᑯᐊᓗ ᐊᓛᓯᑲᒧᐊᖅᑕᐅᓂᐊᖅᖢᑎᒃ ᐊᐅᔭᖅ ᑭᖑᓪᓕᖅᐹᖑᓗᑎᒃ ᐅᐸᒃᑕᐅᑲᑕᒃᑐᓂᒃ ᑖᒃᑯᓄᖓ), ᑭᓯᐊᓂᓕ ᑐᑭᓯᒋᐊᕈᑎᑎᒍᑦ ᐊᒻᒪ ᐃᓕᓐᓂᐊᕈᑎᑎᒍᑦ ᓴᕿᑕᐅᓯᒪᓕᕐᑐᓂᒃ ᐅᑯᓇᙵᑦ ᒐᕙᒪᑐᖃᒃᑯᓐᓂᒃ ᐊᒻᒪ ᑎᐅᕆᑑᕆᓂᒃ ᒐᕙᒪᐅᔪᓂᒃ ᐱᓕᕆᖃᑎᒌᖕᓂᒃᑯᑦ.

ᐅᓇ ᓂᕆᐅᒋᔭᐅᑯᑖᒃᑐᖅ ᓄᓇᕗᒥᑦ ᖃᓄᐃᑉᐸᓪᓕᐊᔪᓄᑦ ᑎᑎᕋᐅᓯᐅᕙᓪᓕᐊᓂᒃᓴᖅ ᐊᒻᒪᓗ ᑕᑯᔭᒐᖃᕐᕕᒃᓴᖅ ᓴᕿᓪᓚᕆᖕᓂᐊᕐᓂᖓ ᐱᓪᓚᕆᐅᓕᕈᑎᒃ, ᑕᒪᕐᒥᒃ ᐱᖁᑎᑦ ᐃᑦᑕᕐᓂᓴᓕᕆᓂᕐᒧᑦ ᐱᓕᕆᐊᖑᔪᑦ ᓱᓕ—ᐃᓚᖃᕐᓗᑎᒃ ᐱᖁᑎᕕᓂᕐᓂᒃ ᐸᐸᑕᐅᓯᒪᔪᓂᒃ 1999-ᒥ—ᑲᑎᑕᐅᓂᐊᕐᒪᑕ ᑐᑭᓯᒍᑎᐅᒃᑲᓐᓂᓕᕐᓗᑎᒃ ᐃᓄᐃᑦ ᖃᓄᐃᓕᐅᕈᓯᕕᓂᖏᓐᓂᒃ, ᑕᒪᓐᓇᓗ ᐅᓂᒃᑳᖅ ᕗᕌᖕᒃᓕᓐ ᖃᐅᔨᓴᖅᐸᓪᓕᐊᒐᓱᖕᓂᕕᓂᖓ ᐃᓚᒋᔭᐅᕌᕐᔪᑐᐃᓐᓇᖅᑐᖅ ᑕᒪᒃᑯᓄᖓ.

ᖁᔭᓐᓇᒦᑦ ᐃᓄᐃᑦ ᓂᐱᓕᐅᕐᑕᐅᓯᒪᓕᓚᐅᕐᓯᒪᖕᒪᑕ ᐊᕐᕌᒍ 100-ᓗᐊᓂ ᐊᓂᒍᕐᓯᒪᔪᓂᒃ–ᐃᓚᖃᖅᖢᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂ ᐊᒻᒪ ᖃᓄᐃᓕᐅᕈᓯᕕᓂᕐᓂᒃ ᓱᓕ ᒫᓐᓇ ᐃᓄᖕᓄᑦ ᑕᐃᒪᐃᑎᑕᐅᔪᓂᒃ–ᑕᒪᓐᓇ ᐊᔪᕐᓇᕈᓐᓃᕐᓂᐊᕐᒪᑦ.

ᐅᕋᓱ ᐹᑐ ᐃᓕᓴᐃᔨᐅᕗᖅ ᖃᓪᓗᓈᑦ ᐅᖃᐅᓯᐊᓂᒃ ᐊᒻᒪ ᑐᓴᐅᒪᔾᔪᑎᓕᕆᓂᕐᒥᒃ ᐅᕙᓂ ᕉᑦ ᐊᐃᓚᓐ ᓯᓚᑦᑐᖅᓴᕐᕕᒃᒥᑦ. ᓄᑖᖑᓛᖅ ᐅᖃᓕᒫᒐᓕᐊᖓ, ᓇᓂᓯᓂᖅ ᕗᕌᖕᒃᓕᓐᒥᑦ: ᐅᖃᐅᓯᐅᓯᒪᙱᑦᑐᖅ 165-ᓂ ᐅᑭᐅᓂᒃ ᕿᓂᖅᑕᐅᓯᒪᓯᒪᔪᒥᒃ, ᐅᖃᓕᒫᒐᓕᐊᙳᖅᑎᑕᐅᓚᐅᕐᓯᒪᔪᖅ 2016-ᒥᑦ ᐅᑯᓇᙵᑦ ᒪᒋᐅᓪ-ᑯᐃᓐᔅ ᓯᓚᑦᑐᖅᓴᕐᕕᒃᔪᐊᒥᑦ ᑐᓴᒐᒃᓴᓕᐅᕐᑎᓂᒃ.

 

Share This Story

(0) Comments

Join the Conversation

Your email address will not be published. Required fields are marked *

*