AI-ᒧᑦ ᓴᖏᑦᑎᓯᒪᔪᖅ ᐃᓄᒃᑎᑑᕈᑎ ‘ᖃᒡᓕᔪᖅ’

For the English version of this story, please see AI-powered Inuktitut program ‘within reach’.

ᒪᓕᖕᓂᐊᕐᓗᒍ ᓈᒻᒪᓛᖅ “net-iquette,” ᒪᑦᑎᑦᑕᐅᑎᓯ ᑕᑯᔭᖅᑐᕐᐸᒡᓗᒋ ᐃᖃᓗᐃᑦ ᖃᓄᙱᒃᑲᓗᐊᕆᐊᒃᓴᖏᓐᓂᒃ ᐱᔭᐅᙱᒃᑲᓗᐊᕆᐊᒃᓴᖏᓐᓂᒃ ᑎᖕᒥᐊᓄᑦ ᐊᒻᒪᓗ ᑖᓐᓇ ᒪᑦᑎᑦᑕᐅᑎ ᐃᒫᓂ ᐱᐅᔪᓐᓃᙱᒃᑲᓗᐊᕐᒪᖔᑦ.

“ᐅᓇ ᓴᐳᔾᔨᓯᒪᓂᖅ ᐆᒪᔾᔪᑎᒋᔭᕐᓂᒃ, ᐃᖃᓗᐃᑦ ᐱᐅᑎᓐᓇᓱᒡᓗᒋ ᐊᒻᒪᓗ ᐃᓱᒪᒋᓗᒋᑦ ᐃᖃᓗᒐᓱᖃᑦᑕᖅᑐᑦ ᐊᓯᖏᑦ ᐊᒻᒪ ᐊᕙᑎᒋᔭᐅᔪᖅ,” ᐅᖃᕐᑐᖅ ᐊᑖᑕᑦᓯᐊᖅ — ᓴᓇᔭᐅᓯᒪᔪᖅ Al-ᒧᑦ, ᖀᖑᓪᓗᓂ ᐊᑖᑕᑦᑎᐊᙳᐊᖅ ᐃᓄᒃᑎᑐᑦ ᐅᖃᕈᓐᓇᖅᖢᓂ.

ᑕᕐᕆᔭᒐᒃᓴᖅ ᐊᑎᖃᖅᖢᓂ Net-iquette: Pro Tips from Ataatatsiaq, ᐃᓕᔭᐅᓚᐅᕐᑐᖅ ᖃᕋᓴᐅᔭᒃᑯᑦ ᑕᖅᑭᖅ ᐱᒋᐊᓕᓵᖅᑎᓪᓗᒍ ᑯᑦ ᐃᔨᔅᓯᐊᕐᒧᑦ, ᐱᒋᐊᖅᑎᑦᑎᔨ ᐊᐃᖓᐃ ᓄᓇᖃᖅᑳᖅᑐᑦ ᐅᖃᐅᓯᓕᕆᓂᕐᒧᑦ ᐱᓕᕆᕝᕕᒃᒥ. ᐅᓇ ᑕᕐᕆᔭᒐᒃᓴᖅ ᐊᑐᐃᓐᓇᐅᒻᒥᔪᖅ ᖃᓪᓗᓈᑎᑐᑦ.

ᒫᓐᓇᓕ ᐊᑖᑕᑦᓯᐊᖅ ᓂᐱᖓ ᑐᓵᔨᒧᑦ ᓂᐱᒋᔭᐅᔪᖅ — ᑭᓯᐊᓂᓕ ᓂᐱᖃᓕᕐᓂᐊᖅᑐᖅ ᐃᒻᒥᓂ ᐅᖃᓪᓚᒍᓐᓇᕐᓯᓗᓂ, ᐃᔨᔅᓯᐊᒃ ᐊᐱᕐᓱᖅᑕᐅᑎᓪᓗᒍ ᐅᖃᓚᐅᕐᑐᖅ.

“ᓱᓕ ᑕᐃᑯᖓ ᑎᑭᐅᑎᓯᒪᙱᑦᑐᒍᑦ, ᑭᓯᐊᓂᓕ ᐃᓱᒪᔪᒍ ᖃᒡᓕᓂᖓᓂ,” ᐅᖃᕐᑐᖅ.

ᐊᐃᖓᐃ ᓄᓇᖃᖅᑳᑐᑦ ᐅᖃᐅᓯᓕᕆᓂᕐᒧᑦ ᐱᓕᕆᓕᕝᕕᒃ, ᓂᐊᖁᙴᒦᑦᑐᖅ, ᐱᒋᐊᖅᑕᐅᓚᐅᕐᓯᒪᔪᖅ 2022-ᒥ ᐃᑲᔫᑎᐅᓇᓱᒃᖢᓂ ᐃᓄᒃᑎᑐᑦ ᐅᖃᐅᓯ ᐊᑐᖅᑕᐅᖃᑕᐅᓕᕐᓂᐊᕐᒪ ᖃᕋᓴᐅᔭᒃᑯᑦ.

ᐊᕐᕌᒎᓕᕐᑐᓂᒃ ᐱᖓᓱᓂᒃ, ᐃᔨᔅᓯᐊᒃ ᐊᒻᒪ ᐃᖅᑲᓇᐃᔭᖅᑎᐅᖃᑕᐅᒥᔪᖅ ᑲᑎᕐᓱᐃᖃᑦᑕᕐᓯᒪᖕᒪᑎ ᐃᓄᒃᑎᑐᑦ ᑎᑎᕋᐅᓯᕐᓂ ᐊᒻᒪ ᐃᓄᒃᑎᑐᑦ ᓂᐱᓕᐅᕐᓯᒪᔪᓂᒃ. ᑖᒃᑯᐊᓗ ᑐᓴᖅᑕᐅᕙᓪᓕᐊᔪᑦ ᐊᑐᓕᖅᑎᑕᐅᓂᐊᖅᖢᑎᒃ “ᐊᔪᕈᓐᓃᕐᓴᕈᑎᐅᓗᓂ” Al ᐱᓕᕆᐊᖑᔪᖅ ᐃᓄᒃᑎᑐᑦ ᐊᔪᕈᓐᓃᕐᓂᐊᕐᒪᑕ ᐊᒻᒪ ᐊᑐᓕᕐᓗᓂ.

ᐅᓇ ᐱᓕᕆᐊᒃᓴᖅ, ᓱᓕ ᒫᓐᓇ ᐊᑎᖃᖅᑎᑕᐅᙱᑦᑐᖅ, ᐊᑐᖅᑕᐅᔪᓐᓇᕐᓯᓂᐊᕐᑐᖅ ᐃᒻᒪᖄᑦ ᑕᖅᑭᑦ 6 ᐊᓂᒍᖅᐸᑕ, ᐃᔨᔅᓯᐊᒃ ᐅᖃᕐᑐᖅ.

ᐊᒻᒪᓗ ᐃᓚᒋᔭᐅᓂᐊᖅᖢᓂ ᐃᓄᒃᑎᑐᑦ ᓂᐱᒋᔭᐅᓂᐊᕐᑐᑦ ᐆᑐᓇᖅ ᐊᑖᑕᑦᓯᐊᖅᑎᑐᑦ, ᐊᐃᖓᐃ ᐱᓕᕆᐊᒃᓴᖅ ᑐᑭᓕᐅᕆᖃᑦᑕᓕᕐᓂᐊᕐᑐᖅ ᐃᓄᒃᑎᑐᑦ ᖃᓪᓗᓈᑎᑑᖓᓕᕐᐸᒡᓗᒋᑦ ᐊᒻᒪ ᐃᓄᒃᑎᑐᑦ ᐅᖃᐅᓯᕆᔭᐅᔪᓂᒃ ᑎᑎᕋᖅᐸᓪᓕᐊᔪᓐᓇᓕᕐᓗᓂ.

ᐅᓇ ᐱᓕᕆᐊᒃᓴᖅ ᑐᑭᓕᐅᕆᓕᕈᓐᓇᕐᓂᐊᖅᑐᖅ ᐊᑐᕐᑕᐅᔪᓐᓇᕐᓗᓂ ᑲᑎᒪᔪᓂᒃ ᐅᕝᕙᓘᓐᓃᑦ ᓘᒃᑖᑉ ᑎᑎᕋᕐᕕᐊᓂ ᐅᖃᐅᓯᕐᓄᑦ ᐊᔪᕈᑎᐅᕙᒃᑐᓂᒃ ᐊᑐᕐᑎᑦᑎᖏᓐᓂᕐᓴᐅᓗᓂ.

“ᐃᓅᓪᓗᑕ ᐱᓕᕆᐊᕗᑦ ᓴᓇᕙᓪᓕᐊᒻᒪᑕ ᖃᕋᓴᐅᔭᒧᑦ ᐃᓚᒃᓴᒥ ᐃᑲᔪᕐᓂᐊᖅᑐᒥ ᐃᓅᓪᓗᑕ, ᑯᑦ ᐃᔨᔅᓯᐊᒃ ᐅᖃᕐᑐᖅ.

ᐃᓇᖏᕐᓯᔾᔪᑎᐅᔾᔮᙱᑦᑐᖅ ᐃᓄᒃᑎᑑᓕᕆᔨᓂ, ᑭᓯᐊᓂᓕ ᐊᑐᕐᑕᐅᔪᓐᓇᕋᔭᖅᖢᓂ ᑐᓵᔨᒃᓴᖅᑕᖃᙱᑉᐸᑕ.

ᑭᓯᐊᓂᓕ ᐅᓇ ᐱᓕᕆᐊᖑᔪᖅ ᖃᕋᓴᐅᔭᕐᒧᑦ ᐊᑦᑕᑕᕈᓐᓇᕐᓯᓂᐊᓕᕐᑐᖅ ᓴᖅᑭᔮᒐᕆᔭᐅᔪᓄᑦ ᐆᑐᓇᖅ ᔫᑑᑉ ᐃᓄᒃᑎᑐᑦ ᐅᖃᕐᓯᒪᓕᖅᑎᑦᑎᔪᓐᓇᖅᖢᓂ ᑕᕐᕆᔮᒐᕐᓂᒃ, ᐊᔾᔨᖃᐸᓗᒃᖢᓂ ᑐᑭᓕᐅᕈᑎᓂ ᐊᓯᖏᓐᓄᑦ ᐅᖃᐅᓯᕐᓄᑦ ᐊᑐᕐᑕᐅᖃᑦᑕᖅᑐᓂᒃ.

ᑭᓯᐊᓂᓕ, ᐊᐃᖓᐃ ᑲᒻᐸᓂᑐᐊᖑᙱᒻᒪᑦ ᐃᓄᒃᑎᑐᑦ ᐅᖃᐅᓯᕐᒥ ᐊᔪᕈᓐᓃᖅᑎᑦᑎᓇᓱᒃᑐᓂ ᖃᕋᓴᐅᔭᒃᑯᑦ. ᒪᐃᑯᕈᓵᕝ ᑲᓇᑕ ᐱᓕᕆᖃᑎᖃᓕᓚᐅᕐᑐᑦ ᓄᓇᕗᒥᑦ ᒐᕙᒪᒃᑯᓐᓂ ᐊᒻᒪᓗ ᑎᓯᐱᕆᒥ ᑐᓴᖅᑎᑦᑎᓪᓗᑎᒃ ᐋᖅᑭᒃᓯᓚᐅᕐᓂᖏᓐᓂᒃ ᐃᓄᒃᑎᑐᑦ ᑎᑎᕋᕐᓯᒪᔪᓂ ᐅᖃᓪᓚᒍᓐᓇᐅᑎᓂ ᐅᕙᓂ ᑐᑭᓕᐅᕆᓂᕐᒧᑦ ᐃᓚᒃᓴᕆᔭᖓᓂᒃ.

ᐃᔨᔅᓯᐊᒃ ᐅᖃᓚᐅᕐᑐᖅ ᒐᕙᒪᒃᑯᑦ ᐱᓕᕆᖃᑎᖃᓪᓗᐊᕐᓂᖏᓐᓂ ᒥᑭᑦᑐᓂᒃ ᓄᓇᖃᖅᑳᖅᑐᓄᑦ ᑲᒻᐸᓂᐅᔪᓂᒃ ᐃᒪᓐᓇᐅᙱᑦᑐᖅ “ᑕᐅᑐᙱᖢᑎᒃ ᑮᓇᐅᔭᒃᓴᓕᐅᕐᓗᑎᒃ” ᓯᓕᑰᓐ ᕚᓕᒥ ᐱᓕᕆᕝᕕᐊᓗᖕᓄᑦ ᐅᑯᑎᑐᓇᖅ ᒪᐃᑯᕈᓵᕝᑎᑐᑦ ᑖᒃᑯᐊᓗ ᑮᓇᐅᔭᓕᐅᕈᑎᖃᕋᓱᑐᐃᓐᓇᖅᖢᑎᒃ ᐃᓄᐃᑦ ᐅᖃᐅᓯᖏᓐᓂ.

ᑕᐃᒪᐃᒃᑲᓗᐊᖅᑎᓪᓗᒍ, ᐃᑲᔪᖅᑕᐅᙱᓪᓗᑎᒃ ᒐᕙᒪᒃᑯᓐᓂ, ᐅᓇ ᓇᖕᒥᓂᖅ ᐃᑲᔫᑎᑖᕐᓯᒪᓪᓗᑎᒃ ᐱᓕᕆᐊᒃᓴᖅ ᐊᑭᖃᖅᖢᓂ ᐅᓄᒻᒪᕆᒃᑐᓂ ᐱᐊᓂᒃᑕᐅᕙᓪᓕᐊᓯᔪᖅ.

ᐃᓱᒪᒋᔭᐅᒻᒪ ᐅᓇ ᐊᐃᖓᐃ ᐊᓂᒍᐃᑦᑎᐊᕐᓂᖓ ᓄᓇᖃᖅᑳᖅᑐᓂᒃ ᐱᓕᕆᕝᕕᐅᔪᑦ ᑲᓇᑕᒦᑦᑐᑦ ᐊᑐᓕᕐᓂᐊᖁᓪᓗᓂᒋᑦ Al ᐅᖃᐅᓯᓕᕆᓂᕐᒧᑦ ᐱᓕᕆᔾᔪᑎᖓᓂ, ᐃᔨᔅᓯᐊᒃ ᐅᖃᕐᑐᖅ.

“ᑲᒻᐸᓂᑐᐃᓐᓇᐅᒐᑦᑕ ᓂᐊᖁᙴᒥ ᐊᒻᒪ ᑕᐃᒪᐃᑦᑐᓐᓇᕈᑦᑕ ᑕᐃᒪᓕ ᐸᓯᕕᒃ ᓂᒋᐊᓃᑦᑐᓯᒍᑦ ᐅᕝᕙᓘᓐᓃᑦ ᐳᕆᐅᕆᔅᓂ ᓇᓂᓘᓐᓃᑦ ᓄᓇᕐᔪᐊᕐᒥ ᐊᔪᙱᒻᒥᔪᐃᑦ.”