ᑲᓛᖦᖡᑦ ᓄᓈᓐᓂ ᖃᖓᑕᓲᖓᑕ ᐃᒃᓯᕙᐅᑕᖓ ᓂᕆᐅᖕᓂᖃᑦᑎᐊᖅᐳᖅ ᐊᖅᑯᑎᒋᔭᖓᑕ ᓯᕗᓂᒃᓴᖓᓂ
ᒪᓕᒃ ᕼᐃᒋᓚᓐ ᐆᓪᓯᓐ ᐅᖃᖅᐳᖅ ᐃᖃᓗᖕᓂ-ᓅᒃᒧᑦ ᑐᕌᖓᔪᒥ ᖃᖓᑕᓂᐅᔪᒥ ᐊᑐᐃᓐᓇᖃᖅᑎᑦᑎᕗᖅ ᐱᕕᒃᓴᖃᕐᓂᐅᔪᓂ ᐱᕈᖅᓴᐃᓂᕐᒥ ᐳᓚᕋᖅᑐᓕᕆᓂᕐᒥ
ᑲᓛᖦᖡᑦ ᓄᓈᓐᓂ ᖃᖓᑕᓲᖓᑦ ᑎᑭᓐᓂᖓ ᐃᖃᓗᖕᓄᑦ ᔫᓂ 26−ᒥ ᐹᖅᑕᐅᓚᐅᖅᐳᖅ ᖁᕕᐊᓱᒍᑕᐅᔪᓂ. ᓴᐅᒥᖕᒥ: ᑲᓇᑦ ᕼᐅᒡ, ᐊᖓᔪᖅᑳᖑᔪᖅ ᑲᓛᖦᖡᑦ ᓄᓈᓐᓂ ᑭᒡᒐᖅᑐᐃᔨᖓ Washington, D.C.−ᒥ; ᒪᓕᒃ ᕼᐃᒋᓚᓐ ᐆᓪᓯᓐ, ᑲᓛᖦᖡᑦ ᓄᓈᓐᓂ ᖃᖓᑕᓲᖓᑕ ᑲᑎᒪᔨᖏᑕ ᐃᒃᓯᕙᐅᑕᖓ; ᓄᓇᕗᒻᒥ ᓯᕗᓕᖅᑎ P.J. ᐊᕿᐊᕈᖅ; ᑲᓛᖦᖡᑦ ᓄᓈᓐᓂ ᓯᕗᓕᖅᑎᐅᑉ−ᑐᖏᓕᖓ ᐃᐊᕆᒃ ᔭᓐᓯᓐ; ᐊᒻᒪ ᑲᓇᐃᑎᐊᓐ ᓄᐊᑦ ᐊᐅᓚᑦᑎᔨᒻᒪᕆᖓ ᓴᓕ ᑎ ᑳᕆᐊ. (ᔨᐊᕝ ᐱᓚᑦᑎᐊᐃᒧᑦ ᐊᔾᔨᓕᐅᖅᑕᐅᔪᖅ)
For English version, see Air Greenland chairperson optimistic new route will succeed
“ᑲᒪᓇᖅᖢᓂ ᐅᓪᓘᓯᒪᕗᑦ,” ᐅᖃᓚᐅᖅᐳᖅ ᒪᓕᒃ ᕼᐃᒋᓚᓐ ᐆᓪᓯᓐ, ᑲᓛᖦᖡᑦ ᓄᓈᓐᓂ ᖃᖓᑕᓲᖓᑕ board ᐃᒃᓯᕙᐅᑕᖓ, ᐊᐅᓪᓚᖅᑎᓪᓗᒍ ᐃᖃᓗᖕᓂ ᖃᖓᑕᓲᒃᑯᑦ ᓯᕿᓐᓂᖅᑐᒥ ᐅᓐᓄᓴᐅᔪᒥ ᐱᓇᓱᐊᕈᓯᐅᓚᐅᖅᑐᒥ.
ᐆᓪᓯᓐ ᐃᓚᒋᔭᐅᓚᐅᖅᐳᖅ ᑲᑎᙵᓂᐅᔪᓂ ᖁᕕᐊᓱᒍᑎᖃᖅᑐᒥ ᐅᑎᕐᓂᖓᓂ ᑲᓛᖦᖡᑦ ᓄᓈᓐᓂ ᖃᖓᑕᓲᖓᓐᓂ ᐱᓇᓱᐊᕈᓯᑕᒫᒥ ᑐᕌᖓᔪᒥ ᖃᖓᑕᓂᐅᔪᓂ ᐃᖃᓗᖕᓂ ᐊᒻᒪ ᓅᒃ, ᑲᓛᖦᖡᑦ ᓄᓈᓐᓂ ᔫᓂ 26−ᒥ.
ᑲᓛᖦᖡᑦ ᓄᓈᓐᓂ ᖃᖓᑕᓲᖓᑕ ᓯᕗᓂᐊᓂ ᐊᖅᑯᑎᖓ ᓄᖅᑲᖅᑎᑕᐅᓚᐅᖅᓯᒪᕗᖅ 2015−ᒥ ᐱᔾᔪᑎᖃᖅᑐᒥ ᐅᓄᙱᓗᐊᖅᑐᓂ ᐃᑭᒪᓂᖃᕐᓂᐅᔪᓂ.
ᒫᓐᓇ, ᐆᓪᓯᓐ ᐅᖃᖅᐳᖅ, ᐱᔪᒪᓂᖃᖅᐳᖅ.
“ᐱᔭᕆᐊᖃᕐᓂᐅᔪᒥ ᑲᑎᙵᓂᖃᒃᑲᓐᓂᕐᓂᐅᔪᒥ ᕿᑎᐊᓂ ᐱᒻᒪᕆᐅᓚᐅᖅᐳᖅ, ᐊᒻᒪ ᑕᑯᓯᒪᕗᒍᑦ [ᐊᖏᒡᓕᕙᓪᓕᐊᔪᒥ] ᐱᔭᕆᐊᖃᕐᓂᐅᔪᒥ ᑕᐃᔅᓱᒧᖓ ᑲᑎᙵᓂᐅᔪᒥ, ᑕᒪᒃᑭᓂ ᐃᓕᖅᑯᓯᒧᑦ, ᓴᓇᐅᒐᓕᕆᓂᕐᒧᑦ ᐅᕝᕙᓘᓐᓃᑦ ᐃᓕᓐᓂᐊᕐᓂᓕᕆᓂᕐᒧᑦ,” ᐅᖃᓚᐅᖅᐳᖅ.
“ᑲᑎᙵᓂᐅᔪᒥ ᐳᓚᕋᕐᓂᐅᔪᒥ ᐊᒻᒪ ᕿᑲᕐᓂᐅᔪᒥ ᐅᑯᓇᓂ ᓄᓇᐅᔪᓂ ᐃᓚᒋᔭᐅᓂᐊᖅᐳᖅ ᓇᖕᒥᓂᖃᕐᓂᐅᔪᒥ.”
ᐃᓄᐃᑦ ᓲᕐᓗ ᑳᓚᐃᓐ ᐸᓂᑦ, ᑲᓇᑕᐅᑉ ᑭᒡᒐᖅᑐᖅᑎᒻᒪᕆᒃ ᓄᓇᐅᑉ ᐊᓯᖓᓐᓂᒃ ᑎᐊᓐᒫᒃᒧᑦ, ᐊᒻᒪ ᕼᐊᓂ ᕘᒍᓪ ᐃᔅᑭᐊᐃ, ᑕᐃᓂᔅ ᑭᒡᒐᖅᑐᖅᑎᒻᒪᕆᒃ ᓄᓇᐅᑉ ᐊᓯᖓᓐᓂᒃ ᑲᓇᑕᒧᑦ, ᐅᓂᒃᑳᕆᓯᒪᕗᖅ ᐱᕚᓪᓕᕈᑕᐅᔪᓂ ᖃᖓᑕᓂᐅᔪᓂ ᑐᓂᓯᓂᐊᕐᓂᖓᓂ ᐃᑳᖅᓯᓂᕐᒥ ᓄᓇᒥ ᐃᓚᐆᓂᐅᔪᓂ ᐅᑯᓇᓂ ᑲᓛᖦᖡᑦ ᓄᓈᓐᓂ ᐊᒻᒪ ᓄᓇᕗᒻᒥ.
ᑭᓯᐊᓂ ᐊᐱᖅᑯᑎᑕᖃᖅᐳᖅ ᓱᓕ ᖃᖓᑕᓲᑉ ᒪᑭᒪᒍᓐᓇᕐᓂᐊᕐᓂᖓᓂ.
ᐃᖃᓗᖕᓂ ᑲᑎᒪᔨᐅᔪᖅ ᕉᒪᐃᓐ ᓯᑏᕙᓐᓴᖅ, ᐃᓚᖃᖅᑐᒥ ᑲᓛᖦᖡᑦ ᓄᓈᓐᓂ, ᐅᖃᓚᐅᖅᐳᖅ ᑐᕌᖓᓂᓕᖕᓂ ᑕᐃᑯᖓ ᐊᒻᒪ ᐅᑎᒧᑦ ᐃᖃᓗᖕᓂ ᐊᐅᓪᓛᕐᓂᕐᒥ ᐊᑐᐃᓐᓇᐅᓂᖅᓴᐅᑎᑦᑎᓂᐊᖅᐳᖅ.
ᑭᓯᐊᓂ, ᐅᖃᓚᐅᖅᐳᖅ, ᑲᓛᖦᖡᑦ ᓄᓈᓐᓂ ᖃᖓᑕᓲᖓ ᐊᒻᒪ ᑲᓇᐃᑎᐊᓐ ᓄᐊᑦ ᓂᐅᕕᐊᒃᓴᖃᕋᓱᒋᐊᖃᖅᐳᑦ ᖃᖓᑕᓂᐅᔪᓂ ᐅᐊᖕᓇᒥ ᐊᒥᐊᓕᑲᒧᑦ ᐊᒻᒪ ᔫᕋᑉᒧᑦ ᐊᐅᓪᓛᖅᑎᐅᔪᓄᑦ ᓇᓗᓇᐃᖅᓯᓂᕐᒥ ᖃᖓᑕᓂᐅᔫᑉ ᐆᒪᑦᑎᐊᕈᓐᓇᕐᓂᖓᓂ.
“ᓇᐃᓴᐅᑎᓂ ᐅᓄᕐᓂᐅᕗᖅ ᐊᒻᒪ ᐱᓕᕆᔾᔪᔾᔭᐅᔪᒪᔪᓂ ᒪᑐᐃᖓᐃᓐᓇᖅᑎᑦᑎᓂᐊᖅᑐᒥ ᖃᖓᓕᒫᖅ, ᐅᓇᐅᙱᑦᑐᖅ ᕿᓚᒻᒥᐅᔪᒥ ᐆᒃᑐᕋᕐᓂᖏᓐᓂ,” ᓯᑏᕙᓐᓴᓐ ᐅᖃᓚᐅᖅᐳᖅ ᐱᔭᕆᐊᖃᕐᓂᐅᔪᒥ ᐱᓇᓱᐊᕐᓂᕐᒥ ᐊᖏᓂᖅᓴᐅᔪᒥ ᓂᐊᕕᐊᒃᓴᖃᕋᓱᐊᕐᓂᐅᔪᒥ.
“ᐃᓱᒪᕗᖓ ᐱᓕᕆᓂᖃᕆᐊᖃᕐᓂᖓᓂ ᓂᐅᕕᐊᒃᓴᖃᕋᓱᐊᕐᓂᕐᒥ ᐱᓪᓚᕆᐅᔪᒥ ᐱᑕᖃᑐᐃᓐᓇᕆᐊᖃᕐᓂᖓᓂ ᐃᓄᖕᓂ ᐃᒃᐱᒍᓱᖕᓂᖃᕐᓂᖏᓐᓂ ᐅᑭᐅᖅᑕᖅᑐᒥ ᐊᒻᒪᓗ ᐊᑑᑎᖃᕐᓂᕐᒥ ᐱᔪᒥᓇᖅᑐᒥ ᐊᖅᑯᑕᐅᔪᒥ ᔫᕋᑉᒥᙶᖅᑐᒥ ᕿᓚᒥᐸᓗᖕᒥ.”
ᐆᓪᓯᓐ ᐅᖃᓚᐅᖅᐳᖅ ᑕᒪᓐᓇ ᐃᓚᒋᔭᐅᕗᖅ ᐸᕐᓇᐅᑎᒥᒃ.
ᐅᖃᓚᐅᖅᐳᖅ ᐱᓕᕆᖃᑎᖃᕐᓂᐅᔪᖅ ᐅᑯᓇᓂ ᑲᓛᖦᖡᑦ ᓄᓈᓐᓂ ᖃᖓᑕᓲᖓᓐᓂ ᐊᒻᒪ ᑲᓇᐃᑎᐊᓐ ᓄᐊᑦᑯᓐᓂ ᐃᑲᔪᕐᓂᐊᖅᐳᖅ ᑲᑎᖃᑎᖃᕐᓂᕐᒥ ᓅᒃᒥ ᐃᓚᖏᓐᓄᑦ ᑲᓇᐃᑎᐊᓐ ᓄᐊᑦ ᖃᓪᓗᓈᓄᑦ ᐅᐸᒐᒃᓴᐅᔪᓂ, ᓲᕐᓗ ᐋᑐᕚᒧᑦ.
ᖄᒃᑲᓐᓂᐊᒍᑦ, ᐆᓪᓯᓐ ᐅᖃᓚᐅᖅᐳᖅ ᐳᓚᕋᖅᑐᓕᕆᓂᖅ ᐱᕈᖅᐸᓪᓕᐊᖕᒪᑦ ᓅᒃᒥ ᒫᓐᓇ ᑲᓛᖦᖡᑦ ᓄᓈᓐᓂ ᐊᖓᔪᖅᑳᖃᕐᕕᖓᑕ ᓄᑖᖑᔪᒥ ᒥᑦᑕᕐᕕᖓᑕ ᐃᒡᓗᕐᔪᐊᖓ ᒪᑐᐃᖅᓯᒪᓕᕐᒪᑦ ᐊᒻᒪ ᐱᕙᓪᓕᐊᓕᖅᖢᓂ ᐊᐅᓪᓛᖅᑎᓂ ᖃᓂᒡᓕᒐᒥ ᐱᔭᕇᖅᑕᐅᓂᐊᕐᓂᖓᓂ.
ᓂᕆᐅᖕᓂᖃᖅᐳᒍᑦ ᐊᒻᒪ “ᓂᕆᐅᒃᐳᒍᑦ ᐱᕈᕐᓂᖃᕐᓂᐊᕐᓂᖓᓂ ᐳᓚᕋᖅᑐᓕᕆᓂᕐᒥ, ᑕᒪᒃᑭᓂ ᓅᒃᒥ ᐊᒻᒪ ᐃᓗᓕᔅᓴᓂᑦ [ᓄᓇᐅᑉ ᐱᖓᔪᖓᓐᓂ−ᐊᖏᓛᖑᔪᒥ ᓄᓇᓕᐸᐅᔭᖓ] ᐊᒻᒪ ᑕᐃᒪᑐᖅ ᐊᓯᖏᓐᓄᑦ ᐃᓚᒋᔭᐅᔪᓄᑦ ᑲᓛᖦᖡᑦ ᓄᓈᓐᓂ,” ᐅᖃᓚᐅᖅᐳᖅ.
“ᐃᓱᒪᕗᖓ ᐸᕐᓇᐅᑎ ᒪᑐᐃᖅᓯᓂᕐᒥ ᑭᓱᑐᐃᓐᓇᒥᒃ ᐃᑲᔪᖅᓱᐃᓂᐊᖅᑐᒥ ᑕᐃᔅᓱᒥᖓ ᐱᕙᓪᓕᐊᑎᑕᐅᓂᖓᓂ, ᑕᐃᒫᒃ ᓂᕆᐅᖕᓂᖃᕐᔪᐊᖅᐳᒍᑦ ᐱᕙᓪᓕᐊᑎᑦᑎᓂᕐᒥ ᑲᓛᖦᖡᑦ ᓄᓈᓐᓂ ᐃᓗᐃᑦᑑᓗᓂ ᓄᓇᐅᔪᒥ ᐳᓚᕋᖅᑐᓕᕆᓂᕐᒧᑦ ᐅᐸᒃᑕᐅᔪᒃᓴᐅᓂᖓᓂ.”
(0) Comments