ᑲᑐᔾᔨᖃᑎᒌᒃᑐᑦ ᐱᔨᑦᑎᕋᐅᑎᓂ ᐊᒃᑐᐃᓂᖃᑐᐃᓐᓇᕆᐊᓖᒃ ᐋᔩᖃᑎᒌᖕᓂᖅ ᐱᓕᕆᐊᖑᐃᓐᓇᖅᐸᑦᑦ

For the English version of this story, please see Air Inuit pilots warn of service reductions if negotiations drag on.

ᑕᕿᓂ 18-ᓂ ᐋᔩᖃᑎᖃᖅᖢᑎᒃ ᓄᑖᒥ ᑳᓐᑐᕌᒃᑖᕋᓱᒃᖢᑎᒃ, ᐅᖃᕐᑎᒋᔭᐅᔪᖅ ᐃᓄᐃᑦ ᖃᖓᑕᓲᖏᓐᓄᑦ ᑲᑐᔾᔨᖃᑎᒌᑦ ᐅᖃᓚᐅᕐᑐᑦ ᑕᒪᓐᓇ ᒫᓐᓇ ᐋᖅᑭᒃᑕᐅᔾᔮᕋᓱᒋᔭᐅᙱᖢᓂ ᐊᒻᒪᓗ ᖃᐅᔨᒪᖁᔨᓪᓗᓂ ᖃᖓᑕᓲᑉ ᐱᔨᑦᑎᕋᐅᑎᖏᑦ ᐊᒃᑐᖅᑕᐅᑐᐃᓐᓇᕆᐊᖃᕐᓂᖏᓐᓂᒃ.

ᐋᔩᖃᑎᒌᖏᓐᓇᕐᐸᑕ ᐃᓱᒪᓇᕐᓯᒧᖅ ᖃᖓᑕᓲᖅᑏᑦ ᐊᓯᖏᓐᓂ ᖃᖓᑕᓲᓂ ᕿᓂᑐᐃᓐᓇᕆᐊᖃᕐᓂᖏᓐᓂ ᑕᐃᒪᓐᓇᓗ ᐊᒃᑐᐃᓂᖃᕋᔭᖅᖢᓂ ᐃᓄᐃᑦ ᖃᖓᑕᓲᖏᑦᑕ ᐱᔨᑦᑎᕋᐅᑎᖏᓐᓂ, ᐅᖃᕐᑐᖅ ᓗᐃ-ᕕᓕᑉ ᑎᒧᕆᔅ, ᑭᒡᒐᖅᑐᐃᔪᖅ ᐃᓄᐃᑦ ᖃᖓᑕᓲᖏᓐᓄᑦ ᖃᖓᑕᓲᖅᑎᓂᒃ ᐃᓚᒋᔭᐅᔪᓂᒃ ᖃᖓᑕᓲᖅᑏᑦ ᑲᑐᔾᔨᖃᑎᒌᖏᓐᓂ ᑲᓇᑕᒥ, ᐅᖃᒃᑲᓐᓂᖅᖢᓂ ᖃᖓᑕᓲᖅᑎᓂ ᐱᑲᑕᒍᒪᖃᑦᑕᕐᓂᖏᓐᓂᒃ.

ᓗᐃ-ᕕᓕᑉ ᑎᒧᕆᔅ, ᑭᒡᒐᖅᑐᐃᔪᖅ ᐃᓄᐃᑦ ᖃᖓᑕᓲᖏᓐᓄᑦ ᖃᖓᑕᓲᖅᑎᓂᒃ ᐅᑯᓇᓂ ᖃᖓᑕᓲᖅᑎᑦ ᑲᑐᔾᔨᖃᑎᒌᖏᑦ ᑲᓇᑕᒥ, ᐃᓱᒪᓚᐅᕐᒪ ᐃᓚᖏᑦ ᖃᖓᑕᓲᖅᑏᑦ ᕿᒪᐃᑐᐃᓐᓇᕆᐊᖃᕐᓂᖏᓐᓂ ᐋᔩᖃᑎᒌᓂᕐᒥ ᐊᑯᓂᐅᓂᖓᓄᑦ. (ᐊᔾᔨᙳᐊᖅ ᐅᕙᙵᑦ ᓗᐃ-ᕕᓕᑉ ᑎᒧᕆᔅ)

“ᐃᓱᒫᓘᑎᒋᔭᕗᓪᓕ ᐱᓯᒪᓇᓱᒍᒪᓂᕆᔭᕗᑦ ᐊᔪᕈᓐᓃᕐᓯᒫᓂᒃᑯᑦ ᖃᖓᑕᓲᖅᑎᕗᑦ,” ᐅᖃᕐᑐᖅ, ᐅᖃᐅᓯᖃᕆᓪᓗᓂ ᐅᑭᐅᕐᑕᖅᑐᕐᒥ ᖃᖓᑕᓲᒥ ᐊᔾᔨᒋᙱᓐᓂᕋᖅᖢᓂᐅᒃ.

ᑎᒧᕆᔅ ᐅᖃᓚᐅᕐᑐᖅ ᑮᓇᐅᔭᓕᐊᕆᔭᐅᕙᒃᑐᑦ ᐊᓯᖏᓪᓗ ᐃᑲᔫᑎᒋᔭᐅᔪᑦ ᐊᒻᒪᓗ ᐃᖅᑲᓇᐃᔭᕐᕕᒋᔭᖏᑦ ᐃᓄᐃᑦ ᖃᖓᑕᓲᖏᓐᓂ ᐱᒡᒍᓴᐅᑎᔾᔪᑎᐅᓗᐊᙱᒻᒪᑕ ᐊᓯᖏᓐᓄᑦ ᖃᖓᑕᓲᓄᑦ.

ᑲᑐᔾᔨᖃᑎᒌᑦ ᑳᓐᑐᕌᖓ ᐃᓱᓕᕝᕕᖃᓚᐅᕐᓯᒪᖕᒪᑦ ᔫᓂ 2023-ᒥ.

ᑎᒧᕆᔅ ᐅᖃᓚᐅᕐᑐᖅ ᐋᔩᖃᑎᒌᒍᑎᐅᔪᓂ, ᑖᒃᑯᐊ ᑲᑐᔾᔨᖃᑎᒌᖑᔪᑦ ᐱᐅᓯᕚᓪᓕᖅᑎᑦᑎᓇᓱᒃᖢᑎᒃ ᐃᖅᑲᓇᐃᔭᖅᑎᓂ ᐸᐸᑦᑎᓇᓱᒃᖢᑎᒃ ᐃᓚᖃᕐᑐᑦ ᐊᑭᑦᑐᕆᐊᖅᑎᑕᐅᓇᓱᒃᖢᓂ ᑮᓇᐅᔭᓕᐊᕆᔭᐅᕙᒃᑐᑦ, ᐃᖅᑲᓇᐃᔭᕐᕕᒋᔭᐅᔪᑦ ᐱᐅᓯᕚᓪᓕᖅᑎᓐᓇᓱᒃᖢᒋᑦ ᐊᒻᒪᓗ ᐃᖅᑲᓇᐃᔭᕐᕕᒃᓴᕆᔭᐅᔪᓂᒃ ᐋᖅᑭᒃᓱᐃᓯᒪᓗᑎᒃ.

ᖃᖓᑕᓲᓂᒃ ᖃᖓᑕᕝᕕᐅᓂᐊᖅᑐᓂ ᖃᓄᐃᓕᐅᕈᓘᔭᕐᓇᕐᓯᒻᒪᑦ, ᐅᖃᕐᑐᖅ, ᐊᔪᓐᓇᕈᑎᐅᓕᖅᖢᓂ ᖃᖓᑕᓲᖅᑎᓄᑦ ᐃᓅᓯᖏᓐᓂ ᐋᖅᑭᒃᓱᐃᓯᒪᓇᓱᒋᐊᒃᓴᖅ.

“ᓲᕐᓗ ᐃᒪᓐᓇ, ᖃᖓᑕᕝᕕᒃᓴᖃᕈᕕᑦ ᐅᓪᓗᓕᒫᖅ ᖃᖓᑕᓐᓇᒥ ᓇᒡᒐᔾᔭᐅᒃᑯᑦ, ᐅᖃᐅᔾᔭᐅᑐᐃᓐᓇᕆᐊᖃᕐᓇᖅᑐᖅ ᐅᓪᓛᒃᑯᑦ ᖃᖓᑕᕝᕕᒋᓂᐊᖅᑕᕐᓂ ᐃᒪᓐᓇ, ‘ᖃᓄᕐᓖ? ᐅᓪᓗᕐᓂ ᑎᓴᒪᓂ ᐊᐅᓪᓚᖅᓯᒪᔭᕆᐊᖃᕐᑐᑎᑦ.”

ᐅᖃᕐᓗᓂ, “ᒫᓐᓇᓗ ᐃᖅᑲᓇᐃᔭᖅᑎᑦᑎᑲᑕᒃᑐᑦ,” ᑐᑭᖃᖅᖢᓂ ᖃᖓᑕᓲᕐᑏ ᑭᐅᖃᑦᑕᕆᐊᖃᕐᓂᖏᓐᓂ ᐃᖅᑲᓇᐃᔭᙱᓚᐅᑲᖕᓂᖏᓐᓂ ᐊᒻᒪ ᖃᖓᑕᔭᕆᐊᖃᕐᓂᕋᖅᑕᐅᓗᑎᒃ, “ᑕᐃᒪᐃᙱᑉᐸᑕ ᑕᒪᑐᒧᖓ ᓈᒻᒪᙱᓕᐅᕈᑎᖃᖅᑎᑕᐅᓇᔭᕐᑐᑦ.”

ᑕᐃᒪᙵᓪᓕ ᔫᓂ 30-ᐅᓚᐅᕐᑐᒥ, ᐋᔩᖃᑎᒌᒃᑐᑦ ᐃᑲᔪᖅᑕᐅᑲᑕᒃᑐᑦ ᑎᒃᑯᐊᖅᑕᐅᓯᒪᔪᓂ ᐅᖃᖃᑎᒋᔭᐅᔪᒃᓴᒥ ᐊᒻᒪᓗ ᑎᒪᕆᔅ ᐅᖃᖅᖢᓂ ᑕᒪᓐᓇ ᑲᔪᓯᕙᓪᓕᐊᓂᕋᖅᖢᓂᐅᒃ. ᐅᓇ ᐅᖃᖃᑎᒋᔭᐅᔪᖅ ᐱᖓᔪᒋᔭᐅᓕᕐᓯᒪᔪᖅ ᐋᔩᖃᑎᒌᒃᑐᓂ, ᐃᑲᔪᖅᖢᓂᒋ ᑕᒪᕐᒥ ᓇᓗᓇᐃᕐᓯᑲᑕᖕᓂᒃᑯᑦ ᖃᓄᐃᓕᐅᕆᐊᖃᕐᓂᖏᓐᓂᒃ ᐱᓕᕆᐊᖏᓐᓄᑦ.

ᑎᒪᕆᔅ ᐅᖃᓚᐅᕐᑐᖅ ᑲᑐᔾᔨᖃᒌᑦ ᐊᒻᒪ ᑲᒻᐸᓂᐅᔪᖅ ᖃᐅᔨᓇᓱᓕᓚᐅᕐᒥᔪᑦ ᓇᓕᐊᒃ ᖃᖓᑕᓲᓕᕆᔨᒃᑯᑦ ᐱᔨᑦᑎᕋᐅᑎᖓ “ᐱᒻᒪᕆᐅᒋᔭᐅᕙᑦ ᐅᕘᓇ ᑲᓇᑕᒥ ᒪᓕᒐᖅᑎᒍᑦ,” ᑕᒪᓐᓇ ᑐᑭᖃᖅᖢᓂ ᐃᖅᑲᓇᐃᔭᖅᑎᒋᔭᐅᔪᑦ ᐱᔨᑦᑎᕋᖃᑦᑕᕐᓂᕐᒧᑦ ᓄᖃᖓᔭᕆᐊᖃᖏᓐᓂᕋᖅᑕᐅᓗᑎᒃ.

ᐊᐱᕆᔭᐅᒐᒥ ᑕᒪᓐᓇ ᑲᑐᔾᔨᖃᑎᒌᓄᑦ ᓄᖅᑲᖓᔾᔪᑎᐅᑐᐃᓐᓇᕆᐊᖃᕆᐊᒃᓴᖓᓂᒃ, ᑎᒪᕆᔅ ᐅᖃᓚᐅᕐᑐᖅ, “ᐃᖅᑲᓇᐃᔮᒧᑦ ᖃᓄᐃᓕᐅᕈᑎᖃᑐᐃᓐᓇᕆᐊᓖ.

“ᑭᓯᐊᓂᓕ ᐅᖃᐅᓯᖃᕈᒪᙱᓐᓇᑦᑕ ᓄᖃᖓᔪᒪᓂᕐᒥ ᒫᓐᓇ ᐱᓕᕆᓂᕐᓴᐅᔪᒪᒐᑦᑕ ᐱᔨᑦᑎᕋᐅᑎᕗᑦ ᑲᔪᓯᓯᒪᖁᓪᓗᒋᑦ. ᑕᐃᒪᓕ 100 ᐳᓴᓐᑎᒥ ᐋᔩᖃᑎᖃᕋᓱᒃᑐᒍᑦ.”

ᑎᒪᕆᔅ ᐅᖃᓚᐅᕐᑐᖅ ᐅᓗᕆᐊᓱᖕᓂᕋᖅᖢᓂ “ᐱᑕᖃᒃᑲᓐᓂᕐᓂᐊᕆᐊᒃᓴᖓᓂ” ᖃᖓᑕᓲᖅᑎᓂ ᓄᖅᑲᖅᐸᓪᓕᐊᔪᓂ ᑕᒪᓐᓇ ᐋᖅᑭᒃᑕᐅᓵᓕᔪᓐᓇᙱᑉᐸᑦ, ᐅᖃᖅᖢᓂ ᓯᕗᓂᐊᓂ ᐋᔩᑲᑕᒃᑎᓪᓗᒋᑦ ᒫᓂ 40-ᓂ 50-ᓄ ᖃᖓᑕᓲᖅᑎᓂ ᓄᖅᑲᖅᑐᖃᓚᐅᕐᓯᒪᓂᖓᓂᒃ.

ᑲᑐᔾᔨᖃᑎᒌᑦ ᒫᓐᓇ ᑭᒡᒐᖅᑐᐃᔪᑦ 235-ᓂ ᖃᖓᑕᓲᖅᑎᓂ ᐊᒻᒪ ᑖᒃᑯᓇᙵᑦ 42 ᐳᓴᓐᑎᖏ ᐊᕋᒍᑦ ᐱᖓᓱᑦ ᑐᖔᓂ ᖃᖓᑕᓲᕐᓯᒪᓪᓗᑎᒃ, ᐅᖃᕐᑐᖅ.

ᑭᒡᒐᖅᑐᐃᔪᖅ ᐃᓄᐃᑦ ᖃᖓᑕᓲᖏᓐᓄ ᐅᖃᕈᒪᓚᐅᙱᒻᒪ ᑕᒪᑐᒥᖓ ᐅᖃᐅᓯᐅᔪᒥᒃ.