ᐊᐃᓴ ᓱᕈᓯᓚ ᓵᓚᖃᖅᐳᖅ 2024−ᒥ ᐃᕙᒃᑲᒃ ᓵᓚᖃᕋᓱᐊᕐᓂᐅᔪᒥ
ᐳᕕᕐᓂᖅᑐᖅ ᕿᒧᒃᓯᖅᑎ ᓯᕗᓪᓕᐅᖏᓐᓇᓚᐅᖅᐳᖅ ᓱᒃᑲᓴᐅᑎᓂᐅᔪᒥ, ᓯᕗᓪᓕᐅᓪᓗᓂ ᑕᒪᒃᑭᓂ ᐅᓪᓗᓂᑦ 6−ᓂ ᓵᓚᖃᕋᓱᐊᕐᓂᐅᔪᒥ
ᕿᒧᒃᓯᖅᑎ ᐊᐃᓴ ᓱᕈᓯᓚ ᓱᒃᑲᓴᖅᐳᖅ ᖃᓕᕈᓯᕐᒥ ᐃᓄᒃᔪᐊᒃ ᖃᓂᒋᔭᖓᓂ ᐅᓪᓗᖓᓂ 4−ᒥ ᓱᒃᑲᓴᐅᑎᓂᐅᔪᒥ. (ᐃᐊᑦᓴᓐ ᒪᕈᔭᒪ ᐊᔾᔨᓕᐅᖅᑕᖓ/ᒪᑭᕝᕕᒃ)
For the English version of this story, please see Aisa Surusila wins 2024 Ivakkak race.
ᐊᐃᓴ ᓱᕈᓯᓚ ᐳᕕᕐᓂᖅᑑᕐᒥᐅᑕᖅ ᓵᓚᒃᓴᖅᑎᐅᕗᖅ 2024−ᒥ ᐃᕙᒃᑲᒃ ᕿᒧᒃᓯᒃᑯᑦ ᓱᒃᑲᓴᐅᑎᓂᐅᔪᒥ.
ᓱᒃᑲᓴᐅᑎᓂᖅ ᐱᒋᐊᓚᐅᖅᐳᖅ ᐅᒥᐅᔭᕐᒥ ᕕᕗᐊᕆ 26−ᒥ. ᖁᓕᓂᑦ ᐅᓪᓗᓂᑦ ᐊᒻᒪ 410 ᑭᓛᒥᑐᓂ ᑭᖑᓂᐊᒍᑦ, ᕿᒧᒃᓯᖅᑏᑦ ᑎᑭᑉᐸᓪᓕᐊᓕᓚᐅᖅᐳᑦ ᐃᓱᓕᕝᕕᖓᓄᑦ ᑐᑭᓕᐊᕐᓂᐅᔪᒥ ᐳᕕᕐᓂᖅᑐᕐᒥ.
ᐃᒡᓕᓂᖓ ᐊᒃᓱᕈᕐᓇᕐᔪᐊᓚᐅᖅᐳᖅ, ᐱᖅᓯᕐᓂᐅᔪᓂ ᐊᒻᒪ ᐊᓄᕆᕐᔪᐊᖅᑐᓂ ᓵᙵᔭᐅᓪᓗᓂ ᕿᒧᒃᓯᖅᑎᓂᑦ ᓯᕗᓪᓕᖅᐹᖓᓂ ᓇᑉᐸᖓᓂ, ᐅᖃᐅᓯᐅᓪᓗᓂ ᓄᑖᙳᕆᐊᖅᑎᑕᐅᕙᓪᓕᐊᓂᐅᔪᓂ ᐃᕙᒃᑲᒃᑯᓐᓄᑦ ᐋᖅᑭᒃᓱᐃᔨᐅᔪᓂ ᓱᒃᑲᓴᐅᑎᓂᐅᔪᒥ ᕙᐃᔅᐳᒃᑯᑦ ᒪᒃᐱᒐᓪᓚᕆᖓᓐᓂ.
ᐅᓪᓗᖓ 1 ᐊᔪᕐᓇᓚᐅᙱᓚᖅ, ᕿᒧᒃᓯᖅᑏᑦ ᐃᖏᕐᕋᓪᓗᑎᒃ ᓯᕗᓪᓕᖅᐸᐅᔪᒧᑦ ᑕᖕᒫᕐᕕᐅᔪᒧᑦ 72 ᑭᓛᒥᑐᓂ ᐅᖓᓯᖕᓂᐅᔪᒥ ᐱᒋᐊᕐᕕᖓᓂ
ᓱᕈᓯᓚ ᓯᕗᓪᓕᐅᓚᐅᖅᐳᖅ ᑕᐃᑲᓂ ᐅᓪᓗᖓᓂ ᐊᑯᓂᐅᓂᖃᖅᖢᓂ ᐃᑲᕐᕋᓂ 5 ᐊᒻᒪ 29 ᒥᓂᑦᓂ.
ᕿᒧᒃᓯᖅᑎ ᔭᓐ-ᒪᕆ ᐳᐃᓪᓐ ᐳᕕᕐᓂᖅᑐᕐᒥᐅᑕᖅ ᓄᖅᑲᓚᐅᖅᐳᖅ ᓱᒃᑲᓴᐅᑎᓂᕐᒥ ᓯᕗᓪᓕᖅᐹᖓᓂ ᐅᓪᓗᖓᓂ ᑭᖑᓂᐊᒍᑦ, ᐅᖃᐅᓯᐅᓪᓗᓂ ᓄᑖᙳᕆᐊᖅᑎᑕᐅᓂᐅᔪᓂ ᐃᕙᒃᑲᒃᒥ.
ᒪᕐᕈᖓᓂ ᐅᓪᓗᖓᓂ, ᓇᑉᐸᓪᓗᐊᑲᓴᖓᓐᓂ ᐃᓄᒃᔪᐊᕐᒧᑦ, ᐃᓱᒫᓗᖕᓂᐅᔪᓂ ᓯᓚᑦᑎᐊᔭᐅᙱᑦᑐᒥ ᐱᕙᓪᓕᐊᓕᓚᐅᖅᐳᖅ, ᓱᒃᑲᓴᐅᑎᓂᕐᒥ ᐋᖅᑭᒃᓱᐃᔨᐅᔪᑦ ᐅᖃᓚᐅᖅᐳᖅ. ᓱᕈᓯᓚ ᓯᕗᓪᓕᐅᖏᓐᓇᓚᐅᖅᐳᖅ ᑲᑎᓪᓗᒍ ᐊᑯᓂᐅᓂᐅᔪᒥ ᐃᑲᕐᕋᓂ 11−ᓂ ᐊᒻᒪ 49 ᒥᓂᑦᓂ.
ᕿᒧᒃᓯᖅᑏᑦ ᐃᖏᑉᕋᓚᐅᖅᐳᑦ 50 ᑭᓛᒥᑐᓂ ᐱᖓᔪᖓᓐᓂ ᐅᓪᓗᖓᓂ ᑎᑭᕝᕕᒃᓴᐅᔪᒧᑦ, ᐅᓯᑲᑦᑕᖅᑕᐅᓪᓗᑎᒃ ᐃᓄᒃᔪᐊᕐᒧᑦ. ᕕᕗᐊᕆ 28−ᒥ, ᑕᒪᒃᑭᑦ ᓵᓚᖃᕋᓱᐊᖅᑐᑦ ᑎᑭᐅᑎᓚᐅᖅᐳᑦ ᓄᓇᓕᖕᒧᑦ ᓱᒃᑲᓴᐅᑎᓚᐅᖅᑎᓪᓗᒋᑦ ᖃᓄᐃᓐᓂᐅᔪᓂ ᐱᖅᓯᓕᕐᓂᐊᖅᑐᒥ.
ᕿᒧᒃᓯᖅᑏᑦ ᐊᒻᒪᓗ ᐃᕙᒃᑲᒃ ᑲᑎᙵᓂᐅᔪᓂ ᐅᑕᖅᑮᓚᐅᖅᐳᑦ ᐱᖅᓯᕐᓂᐅᔪᒥ ᐅᓪᓗᓄᑦ ᑕᓪᓕᒫᓄᑦ ᐃᓄᒃᔪᐊᕐᒥ.
ᑕᐃᑯᖓ ᑎᑭᖦᖢᒍ ᓱᕈᓯᓚ ᓱᓕ ᓯᕗᓪᓕᐅᓚᐅᖅᐳᖅ ᐊᑯᓂᐅᓂᖃᖅᖢᓂ ᐃᑲᕐᕋᓂ 15−ᓂ ᐊᒻᒪ 50 ᒥᓂᑦᓂ.
ᐱᖅᓯᐊᓂᒃᑎᓪᓗᒍ, ᑭᓴᒪᖓ, ᑕᓪᓕᒪᖓ ᐊᒻᒪ 6−ᖓᓂ ᐅᓪᓗᖏᓐᓂ ᐃᖏᕐᕋᓂᖃᑦᑎᐊᓚᐅᖅᐳᑦ.
ᓱᕈᓯᓚ ᐱᔭᕇᓚᐅᖅᐳᖅ ᓯᕗᓪᓕᖅᐸᐅᓪᓗᓂ, ᒪᓕᒃᑕᐅᓪᓗᓂ ᑕᓯᐅᔭᕐᒥᐅᑕᖅ ᐅᐃᓕ ᑲᐃᓐ ᓄᑲᖅᖠᖅ ᒪᕐᕈᖓᓂ ᐃᓂᒋᔭᐅᔪᒥ, ᐊᒻᒪ ᓵᓕ ᐊᖕᓇᑐᒃ ᐱᖓᔪᒋᔭᐅᓪᓗᓂ.
(0) Comments