ᐊᕿᐊᕈᖅ, ᐅᑭᐅᕐᑕᖅᑐᕐᒥ ᓯᕗᓕᐅᕐᑎᑦ ᐅᖃᐅᓯᖃᕐᑐᑦ ᓴᐳᓐᓂᐊᖅᑐᓕᕆᓂᕐᒥ ᐅᐊᓯᖕᑕᓐᒥ

For the English version of this story, please see Akeeagok, premiers talk security during Washington trip.

ᐱᓇᓱᐊᕈᓯᐅᓚᐅᕐᑐᒥ ᐅᖃᐅᓯᖃᑲᑖᓪᓚᓚᐅᖅᖢᑎᒃ ᑲᑎᖃᑎᖃᕐᓂᐊᕐᓂᖏᓐᓂᒃ ᐱᓕᕆᔨᒻᒪᕆᒋᔭᐅᔪᓂ ᐊᒥᐊᓕᑲᐅᑉ ᐊᖓᔪᖅᑳᖓᓄᑦ ᑖᓄᑦ ᑐᕋᒻᑉ, ᑲᓇᑕᒥ ᓯᕗᓕᐅᕐᑎᑦ ᓂᐱᖃᓗᐊᓚᐅᙱᓪᓚᑦ ᐅᖃᐅᓯᕆᓚᐅᕐᑕᖓᑦᑕ ᒥᒃᓵᓄᑦ.

ᑕᖅᑭᐅᓵᕐᑐᒥ, ᓯᕗᓕᐅᕐᑎᑦ, ᐃᓚᒋᔭᐅᓪᓗᓂ ᓄᓇᕗᑦ ᓯᕗᓕᐅᕐᑎᖓ ᐸᐅᓗᓯ ᐊᕿᐊᕈᖅ, ᐅᖃᐅᓯᖃᑲᑕᓚᐅᕐᑐᑦ ᐅᐊᓯᖕᑕᓐ, ᑏ.ᓰᒧᐊᕐᓂᐊᕐᓂᖏᓐᓂᒃ, ᑭᐅᓗᖃᑎᖃᕆᐊᕐᓗᑎ ᐊᒥᐊᓕᑲᒥᐅᓂᒃ ᓈᒻᒪᒃᓴᙱᖢᑎᒃ ᐊᑭᓕᐅᑎᐅᒃᑲᓐᓂᓕᒑᔪᓂ ᑲᓇᑕᒥᐅᓄᑦ.

ᕕᕝᕗᐊᕆ 13-ᒥ, ᐅᑭᐅᕐᑕᖅᑐᕐᒥ ᓯᕗᓕᐅᕐᑎᑦ ᐃᓚᐅᓚᐅᕐᒪᑕ ᐅᖃᐅᓯᖃᑲᑕᒃᑐᓂ ᐅᕙᓂ ᐅᐊᓯᖕᑕᓐ ᐃᓱᒪᓕᐅᕆᕝᕕᒃᒥ ᐅᕙᓂ ᕗᐃᐊᓴᓐ ᐅᐸᒡᕕᒃᒥ.

ᐅᓇ ᓯᕗᓪᓕᖅᐹᖑᓚᐅᕐᑐᖅ ᐊᕿᐊᕈᖅ ᐱᕕᖃᖅᖢᓂ ᐅᖃᐅᓯᖃᕐᓂᕐᒥᒃ ᐳᓛᕐᓂᕆᓚᐅᕐᑕᖏᓐᓂᒃ. ᓄᓇᑦᓯᐊᕐᒧᑦ ᓯᕗᓕᐅᕐᑎ ᐋᕐ.ᔭᐃ. ᓯᒻᓴᓐ ᐊᒻᒪ ᔫᑳᓐᒧᑦ ᓯᕗᓕᐅᕐᑎ ᕌᓂ ᐱᓚᐃ ᐅᐸᖃᑕᐅᓚᐅᕐᑐᑦ.

ᑭᓯᐊᓂᓕ ᐊᖓᔪᖅᑳᖃᕐᕕᒃᒧᐊᖅᖢᑎᒃ ᐅᖃᐅᓯᖃᓚᐅᙱᑦᑐᑦ ᓯᕗᓕᐅᕐᑎ ᐅᖃᐅᓯᕆᓚᐅᖅᑕᖏᓐᓂᒃ.

ᐅᖃᐅᓯᖃᓚᐅᕐᑐᓪᓕ ᐅᑭᐅᕐᑕᖅᑐᕐᒥ ᑮᓇᐅᔭᓕᐅᕈᑎᑦ ᐱᕈᖅᐸᓪᓕᐊᓂᖏᓐᓂᒃ ᐅᑭᐅᕐᑕᖅᑐᕐᒥ ᓴᐳᓐᓂᐊᕐᓂᖅ ᐊᒻᒪ ᓴᐳᔾᔨᓯᒪᓂᕐᒥ ᐅᑯᐊ ᐅᕌᓯᐊ ᐊᒻᒪ ᓴᐃᓇ ᓈᒻᒪᙱᓕᐅᕈᑎᖃᓗᐊᓕᕐᑎᓪᓗᒋᑦ.

“ᒫᓐᓇᓕ ᑕᑎᑦᑐᒦᓐᓇᑦᑕ,” ᐊᕿᐊᕈᖅ ᐅᖃᕐᑐᖅ ᐅᖃᐅᓯᖃᑲᑕᒃᑎᓪᓗᒋ ᐅᖃᖅᖢᑎᒃ ᒪᓕᒐᓕᕆᓂᒃᑯᑦ ᐅᑭᐅᕐᑕᖅᑐᖅ ᐱᓕᕆᐊᖑᓂᕐᓴᐅᓕᕐᓂᖓᓂᒃ.

“ᓄᓇᕗᖅ ᐅᑭᐅᕐᑕᖅᑐᕐᒥ ᐊᖅᑯᑎᒋᔭᐅᓪᓗᐊᑕᖃᑦᑕᕐᒪᑦ ᐅᕘᓇ ᓱᓪᓗᐊᓗᒃᑯᑦ ᐅᐊᓕᓂᖅᒥ ᕿᑭᖅᑖᓗᒃᒧ ᑕᕆᐅᒃᑯᑦ ᐊᖅᑯᑎᒃᑯᑦ. ᐊᑕᐃᓯᑦᑕᐃᓐᓇᕐᒥ ᐱᓕᕆᖃᑎᖃᕋᑦᑕᑦ ᐅᑯᐊᓗ ᐊᒥᐊᓕᑲᒥᐅᑦ ᐅᕘᓇ ᓅᕌᑦ (Norad) ᓄᐊᑦ ᐊᒥᐊᓕᑲᒥ ᓴᐳᓐᓂᐊᖅᑐᓕᕆᕝᕕᒃᒥ ᐊᒻᒪᓗ ᖃᓄᐃᓕᐅᖃᑦᑕᕈᓯᑦᑎᒍᑦ ᓄᓇᕗᑦ ᖃᓄᐃᖁᓇᒍ ᓄᐊᑦ ᐊᒥᐊᓕᑲ.”

ᐅᕘᓇ X ᑎᑎᕋᕐᕕᒃᑯᑦ, ᐊᕿᐊᕈᖅ ᑎᑎᕋᓚᐅᕐᑐᖅ ᑖᓐᓇ, ᐱᓚᐃ ᐊᒻᒪ ᓯᒻᓴᓐ “ᑲᑎᖃᑎᖃᓚᐅᕐᒪᑕ ᓯᑎᒡ ᐱ. ᐳᕋᔅᒥ, ᐊᖓᔪᖅᑳᑉ ᑐᒡᓕᖓ ᐱᓕᕆᐊᒧᑦ ᐅᕙᓂ ᑎᐊᓐᒫᒃ ᐃᒻᐸᓯᖓᓂ ᐊᒻᒪ ᑲᓛᖡᑦ ᑭᒡᒐᖅᑐᐃᔨᖓᓂ ᑲᓇᑦ ᕼᐃᐅ.

ᓴᖅᑭᒃᑎᑉᐹᓪᓕᖅᑎᑦᑎᓇᓱᖕᓂᖅ ᐅᑭᐅᕐᑕᖅᑐᕐᒥᐅᓂ ᐱᒻᒪᕆᐅᖕᒪᑦ ᐱᓕᕆᖃᑎᒌᖕᓂᐊᕐᓗᑕ ᑮᓇᐅᔭᓕᐅᕈᑎᓂᒃ ᐱᕙᓪᓕᐊᔪᓕᕆᓂᕐᒥ, ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᖃᓄᐃᓕᐅᕈᑎᓂᒃ ᐊᒻᒪᓗ ᐅᑭᐅᕐᑕᖅᑐᖅ ᓴᐳᔾᔭᐅᓯᒪᔭᕆᐊᖃᕐᓂᖓᓂᒃ.

ᓯᕗᓕᐅᕐᑎᑦ, ᐃᓚᒋᔭᐅᓪᓗᑎᒃ ᑲᑎᒪᔨᕐᔪᐊᓄᑦ (Council of the Federation), ᐅᐊᓯᖕᑕᓐᒦᓚᐅᕐᒪᑕ ᑕᐃᒪᙵᓂ ᕕᕝᕗᐊᕆ 11-ᐅᓚᐅᕐᑐᒥ. ᐊᕿᐊᕈᖅ ᐅᐊᓯᖕᑕᓐᒥ ᐊᐅᓪᓚᓚᐅᕐᑐᖅ ᕕᕝᕗᐊᕆ 13-ᒥ.

ᑕᐃᑲᓃᑎᓪᓗᒋᓪᓕ ᑲᑎᖃᑎᖃᑲᑕᓚᐅᕐᑐᑦ ᒐᕙᒪᒃᑯᓐᓄᑦ ᐱᓕᕆᔨᒻᒪᕆᖕᓂ ᐊᒻᒪ ᓴᓇᕝᕕᓕᕆᓂᕐᒧᑦ ᓯᕗᓕᐅᕐᑎᓂ ᐅᖃᐅᓯᖃᖅᖢᑎᒃ ᑐᕌᒻᑉ ᐅᓗᕆᐊᕐᓵᕈᑎᒋᑲᑕᒃᑕᖓᓂ ᐊᑭᓖᑎᑦᑎᒃᑲᓐᓂᕈᑎᒃᓴᓂ ᑕᒪᐃᓐᓄ ᑲᓇᑕᒥᙶᖅᑐᓄᑦ ᑭᓯᐊᓂ ᐅᕐᓱᐊᓗᒃ ᑖᓐᓇᓕ 10 ᐳᓴᓐᑎᒥ ᐊᑭᓕᐅᑎᒃᑲᓐᓂᖃᕋᔭᖅᖢᓂ. ᒪᒃᓯᑯᒃᑕᐅᖅ ᑕᐃᒪᓐᓇᑦᑕᐃᓐᓇ ᑲᑉᐱᐊᓵᖅᑕᐅᓪᓗᑎᒃ..

ᑐᕋᒻᑉ ᐅᖃᓚᐅᕐᓯᒪᔪᖅ ᓯᕗᓪᓕᕐᒥ ᐊᑭᓕᐅᑎᒃᓴᑲᓐᓂᒃᓴᐃᑦ ᐱᒋᐊᓛᕐᓂᖏᓐᓂᒃ ᕕᕝᕗᐊᕆ 4-ᒥ ᑭᓯᐊᓂᓕ ᕕᕝᕗᐊᕆ 3-ᒥ ᑖᓐᓇ ᐅᖓᕙᕆᐊᓕᓚᐅᕐᑕᖓ ᑭᓯᐊᓂ ᒫᔅᓯᐅᓕᕐᐸᑦ.

ᑕᒪᐅᓇᓕ ᑐᕋᒻᑉ ᑭᖑᕙᕆᐊᖅᑎᑦᑎᓚᐅᕐᓂᕐᒥᓂ ᒪᓕᒃᐳᖅ.

ᐊᑎᓕᐅᓚᐅᕐᑐᖅ ᕕᕝᕗᐊᕆ 11-ᒥ ᐊᑐᓕᖁᔨᓯᒪᔪᒥᒃ 25 ᐳᓴᓐᖏᓐᓂ ᐊᑭᓖᒃᑲᓐᓂᖃᑦᑕᖁᔨᓪᓗᓂ ᑕᒪᐃᓐᓄᑦ ᓴᕕᕋᔭᒃᓄᑦ ᐊᒻᒪ ᐊᓘᒥᓇᒻᒧᑦ ᑎᑭᑎᑕᐅᔪᓂᒃ ᐊᒥᐊᓕᑲᒧᑦ, ᑲᓇᑕᒥᙶᖅᑐᑦ ᐃᓚᐅᓪᓗᑎᒃ, ᐱᒋᐊᕐᓗᓂ ᒫᔅᓯ 12.

ᕕᕝᕗᐊᕆ 13-ᒥ ᑐᕌᒻᑉ ᐊᑎᓕᐅᓚᐅᕐᑐᖅ ᑐᓴᕈᑎᑎᒍ ᐅᖃᕐᓯᒪᔪᓂ ᐊᑭᓕᐅᑎᒃᑲᓐᓂᕐᓂ ᐃᓚᓕᐅᔾᔨᔪᒪᓪᓗᓂ ᒫᓐᓇ ᐊᑭᓕᐅᑎᒃᑲᓐᓂᐅᔪᓂ ᓄᓇᕐᔪᐊᓕᒫᒥᑦ.

ᐅᓪᓗᒐᓴᖕᓂ ᐅᐊᓯᖕᑕᓐᒥ ᐊᒻᒪᓗ ᑐᕋᒻᑉ ᐊᑭᓕᐅᑎᒃᓴᒃᑲᓐᓂᓕᕆᑎᓪᓗᒍ ᑲᓇᑕᒧᑦ, ᐊᒻᒪᓗ ᓴᖅᑭᑦᑎᓯᒪᓗᐊᙱᖢᓂ ᖃᓄᖅ ᑕᒪᓐᓇ ᐱᓕᕆᐊᖑᓂᐊᕐᓂᖓᓂ ᑕᐃᒪᓕ ᑖᒃᑯᐊ ᓯᕗᓕᐅᕐᑎ ᑭᓱᒧᑦ ᐅᐸᒍᑎᓯᒪᖕᒪᖔᑕ ᐃᓱᒪᒋᔭᐅᓕᕐᑐᑦ.

ᐋᓐᑎᐅᕆᐅᒧᑦ ᓯᕗᓕᐅᕐᑎ ᑕᒡ ᕗᐊᑦ ᐃᒃᓯᕙᐅᑕᐅᒪᐅᕐᑐᖅ ᐅᑯᓄᖓ ᑲᑎᒪᔨᕐᔪᐊᓄᑦ ᑲᑐᔾᔨᖃᑎᒌᓄᑦ (Council of the Federation), ᑲᑐᔾᔨᖃᑎᒌᑦ ᑲᓇᑕᐅᑉ ᓯᕗᓕᐅᕐᑎᖏᑦ, ᑐᕌᒐᖃᖅᖢᑎᒃ ᐱᓕᕆᖃᑎᒌᖕᓂᕐᒥ ᓴᖅᑭᑦᑎᒃᑲᓐᓂᕋᓱᒃᖢᑎᒃ ᐅᑯᑎᒎᓇᖅ ᐳᕌᕕᓐᓯᓪᓗ ᑎᐅᕆᑑᕆᓪᓗ. ᖃᓄᐃᓕᐅᒐᒃᓴᓂ ᐊᐅᓚᑦᑎᑲᑕᓚᐅᕐᑐᖅ ᐊᖏᕐᕋᖓᓂ ᓂᕈᐊᒐᒃᓴᓕᕆᑎᓪᓗᒋᑦ.

ᐋᓐᑎᐅᕆᐅ ᐊᓐᑏᐲᑯᑦ ᐊᖓᔪᖅᑳᖓ ᒥᐅᕆᑦ ᓯᑕᐃᐅᔅ ᐅᖃᐅᓯᖃᓚᐅᕐᑐᖅ ᐊᐅᓪᓚᕈᑎᐅᔪᖅ “ᑖᒃᓰᔭᕈᑎᓄᑦ ᐃᑲᔫᑎᓕᒃ ᐅᐊᓯᖕᑕᓐᒥ ᐊᔾᔨᓕᐅᖅᑕᐅᔭᖅᑐᕐᑎᓪᓗᒋᑦ,” ᑐᓴᒐᒃᓴᓕᐅᕈᑎᑎᒍᑦ ᕕᕝᕗᐊᕆ 13-ᒥ.

“ᑎᑎᕋᕐᓂᐊᖅᑐᒍᑦ ᑲᒥᓯᓇᒧᑦ ᐊᒻᒪ ᓂᕈᐊᒐᒃᓴᓕᕆᔨᓄᑦ ᐋᓐᑎᐅᕆᐅᒥ ᑕᒪᓐᓇ ᕿᒥᕐᕈᐊᕐᑕᐅᖁᓪᓗᒍ ᐊᒻᒪᓗ ᑭᐅᔨᐅᔪᓐᓇᖁᓪᓗᒍ ᑕᒪᑐᒧᖓ,” ᓯᑕᐃᐅᔅ ᐅᖃᕐᑐᖅ.