ᐊᑯᓕᕕᒃ ᒪᐃᔭᖓ ᓈᒻᒪᒃᓴᖅᓯᒪᙱᑦᑐᖅ ᖃᒧᑕᐅᔭᖃᙱᓗᐊᕐᓂᖓᓂᒃ ᑯᐊᐸᒃᑯᑦ

ᐃᓚᒌᓴᒃᑯᑦ ᐊᐅᓚᑦᑎᔨᖓ ᐅᖃᓚᐅᕐᑐᖅ ᐱᖁᑎᑖᕐᕕᒋᕙᒃᑕᖏᓐᓂᒃ ᓈᒻᒪᙱᓕᐅᕈᑎᖃᕐᓂᖏᓐᓂᒃ, ᐅᖃᖅᖢᑎᒃ ᐅᑭᐅᕐᑕᖅᑐᕐᒧᑦ ᐊᐅᓪᓚᖅᑎᑦᑎᓇᓱᖕᓂᖏᓐᓂᒃ

ᐊᑯᓕᕕᒃᒥ ᑯᐊᐸᒃᑯᑦ ᓂᐅᕕᕐᕕᖓ ᖃᒧᑕᐅᔭᓂᒃ ᓂᐅᕕᐊᒃᓴᖃᑦᑎᐊᙱᑦᑐᑦ ᐅᒥᐊᕐᔪᐊᖅᑕᖄᓪᓚᓚᐅᖅᑎᓪᓗᒍ ᐊᐅᔭᐅᓚᐅᕐᑐᖅ. ᑯᐊᐸᒃᑯᑦ ᐱᓕᕆᔨᖏᑦ ᐅᖃᓚᐅᕐᑐᑦ ᓈᒻᒪᙱᓕᐅᕈᑎᖃᕐᓂᕋᖅᖢᑎᒃ ᐱᑖᕐᕕᐅᕙᒃᑐᓂᒃ ᐊᒻᒪᓗ ᖃᒧᑕᐅᔭᐃᑦ ᓄᓇᓕᖕᓄ ᑎᑭᑎᑕᐅᓂᐊᖅᖢᑎᒃ ᐱᖁᑎᓄᑦ ᖃᖓᑕᓲᒃᑰᕐᓗᑎᒃ. (ᐊᔾᔨᙳᐊᖁᑎᒋᔭᐅᔪᖅ)

By ᔨᐊᕝ ᐱᐊᑦᓯᐄ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For English version, see Akulivik mayor frustrated over lack of snowmobile stock at co-op

ᒪᐃᔭᒋᔭᐅᔪᖅ ᐊᑯᓕᕕᒃᒥ ᓈᒻᒪᒃᓴᖅᓯᒪᙱᑦᑐᖅ ᖃᒧᑕᐅᔭᖅᑕᖃᙱᓗᐊᕐᓂᖓᓂᒃ ᓂᐅᕕᐊᒃᓴᓂᒃ ᑯᐊᐸᒃᑯᑦ ᓂᐅᕕᕐᕕᐊᓂᒃ.

ᐊᓯᖏᑦᑎᑐᑦ ᐅᑭᐅᕐᑕᖅᑐᕐᒥ ᓄᓇᓕᖕᓂ, ᐊᑯᓕᕕᒃᒥᐅᑕᑦ ᖃᒧᑕᐅᔭᖃᕆᐊᖃᕐᒪᑕ ᐅᑭᐅᕐᑯᑦ ᓇᒧᙵᐅᔾᔪᑎᒃᓴᖏᓐᓂᒃ, ᐃᖃᓗᒐᓱᒋᐊᕈᑎᒃᓴᖏᓐᓂᒃ ᐊᒻᒪ ᐊᖑᓇᓱᒍᑎᒃᓴᖏᓐᓂᒃ, ᐅᖃᕐᑐᖅ ᒪᐃᔭ ᐃᓚᐃ ᐊᖏᔪ.

ᐊᐅᔭᐅᓚᐅᕐᑐᕐᓕ ᐊᑯᓕᕕᒃᒥ ᑯᐊᐸᒃᑯᑦ ᖃᒧᑕᐅᔭᓂᒃ ᑎᑭᕝᕕᐅᓚᐅᕐᓯᒪᙱᒻᒪᑕ ᐅᒥᐊᕐᔪᐊᒃᑯᑦ.

“ᑭᒃᑯᓕᒫᓄᑦ ᖃᐅᔨᒪᔭᐅᔭᕆᐊᖃᖅᑐᒍᑦ ᓈᒻᒪᙱᓕᐅᕈᑎᖃᖅᑎᑕᐅᓂᑦᑎᓐᓂᒃ ᒫᓐᓇ,” ᐊᖏᔪ ᐅᖃᕐᑐᖅ.

ᐃᓚᖓᒍᑦᑕᐅᖅ ᓈᒻᒪᒃᓴᙱᔾᔪᑎᖃᕐᒥᔪᖅ ᖃᒧᑕᐅᔭᑕᖃᙱᓗᐊᕐᓂᖓ ᐊᒃᑐᐊᓂᖃᕐᓂᖓᓂᒃ ᐃᓚᒋᔭᐅᔪᓄᑦ ᑮᓇᐅᔭᖅᑖᕈᑎᑖᕈᑎᐅᓐᓇᕐᒪᑦ ᑯᐊᐸᒃᑯᑦ ᓂᐅᕐᕈᑎᖃᑦᑎᐊᑲᑕᒃᐸᑕ.

ᑯᐊᐸᒃᑯᓐᓄᑦ ᐃᓚᒋᔭᐅᔪᑦ ᐊᕐᕌᒍ ᐱᐊᓂᒃᑳᖓᑦ ᐃᓚᒋᔭᐅ-ᔪᑎᑖᖃᑦᑕᕐᒪᑕ ᒪᓕᒃᓯᒪᔪᓂᒃ ᓂᐅᕐᕈᑎᖃᕐᓂᖓ ᐊᕐᕌᒍᒧᑦ. ᐱᖁᑎᑕᖃᙱᑎᓪᓗᒍ, ᐃᓄᐃᑦ ᖃᒧᑕᐅᔭᖅᑖᕆᐊᖃᕐᑐᑦ ᐊᓯᖏᓐᓂᒃ ᓂᐅᕕᕆᐊᖃᓕᖅᖢᑎᒃ ᐊᒻᒪᓗ ᑮᓇᐅᔭᖅᑖᕆᔭᐅᔪᑦ ᓄᓇᓕᖕᓄ ᐅᑎᕋᔭᙱᖢᑎᒃ.

“ᑯᐊᐸᒃᑯᓐᓂ ᓂᐅᕕᙱᖢᑎᒃ ᖃᒧᑕᐅᔭᓂᒃ, ᐊᕐᕌᓂ ᐱᒋᐊᖅᖢᒍ ᓂᐅᕕᐊᒃᓴᖃᙱᖢᑎᒃ ᖃᒧᑕᐅᔭᓂᒃ, ᐃᓄᐃᑦ ᓂᐅᕕᖃᑦᑕᕐᓯᒪᖕᒪᑕ ᐊᓯᖏᓐᓂᒃ ᑲᒻᐸᓂᐅᔪᓂᒃ ᐅᑯᑎᑐᓇᖅ ᓄᐊᑕᓐᑯᓐᓂᒃ, ᑖᒃᑯᐊᓗ ᐅᓄᕈᓘᔭᖅᑐᓂᒃ ᖃᒧᑕᐅᔭᖅᑖᓚᐅᖅᖢᑎᒃ ᐅᒥᐊᕐᔪᐊᒃᑯᑦ,” ᐊᖏᔪ ᐅᖃᕐᑐᖅ.

“ᓈᒻᒪᒃᓴᓚᐅᙱᓐᓇᓚ, ᓲᖃᐃᒻᒪ ᑮᓇᐅᔭᖅ ᑯᐊᐸᒃᑯᓐᓄᐊᕋᔭᓚᐅᕐᑐᖅ ᓂᐅᕕᖅᑎᒃᑯᓐᓄᐊᖔᖅᖢᓂ ᓄᐊᑕᓐᒧᑦ.”

ᓄᓇᓕᖕᓂ ᐊᖑᓇᓱᒃᐸᒃᑐᑦ ᖃᒧᑕᐅᔭᖃᕆᐊᖃᕐᒪᑕ, ᐊᖏᔪ ᐅᖃᕐᑐᖅ, ᐊᒻᒪᓗ ᓄᓇᖓ ᑮᓇᐅᔭᑎᒍᑦ ᐃᑲᔪᖅᑕᐅᖁᓪᓗᓂᐅᒃ ᑕᕝᕘᓇ ᓂᐅᕕᐊᒃᓴᑎᒍᑦ.

“ᒪᐃᔭᐅᓪᓗᖓ. ᑕᑯᓪᓗᒋᑦ ᐱᖃᓐᓇᕆᔭᒃᑲ ᐊᒻᒪ ᐊᖑᓇᓱᒃᑎᐅᖃᑎᒃᑲ ᑕᐃᒪᓕ ᑕᐃᒪᓐᓇ ᑭᒡᒐᖅᑐᖅᑕᐅᔪᒪᓇᔭᙱᓐᓇᒪ,” ᐊᖏᔪ ᐅᖃᕐᑐᖅ.

“ᑕᐃᒪ ᐱᔪᒪᓇᓱᒃᑯᒪ ᑕᐃᒪᓕ ᑖᓐᓇ ᐊᒃᓱᕈᕐᓗᓂ ᕿᓂᕋᓱᓪᓗᐊᖅᑐᖅ ᐱᔪᒪᔭᓐᓂ; ᑕᐃᒪᓐᓇᐅᔭᕆᐊᖃᕐᒪᓐ.”

ᐊᖏᔪ ᐅᖃᓚᐅᕐᑐᖅ ᐅᖃᐅᔾᔭᐅᓚᐅᕐᓂᕋᖅᖢᓂ ᐃᓚᒌᓴᒃᑯᓐᓄᑦ ᐱᖁᑎᑖᕐᕕᐅᓇᓱᒃᑐᓂᒃ ᓈᒻᒪᙱᓕᐅᕈᑎᖃᑲᑕᖕᓂᖏᓐᓂᒃ — ᑖᓐᓇᓗ ᑖᔅᓱᒪ ᐅᒃᐱᕆᓗᐊᙱᖢᓂᐅᒃ. ᐅᖃᓚᐅᕐᒪᓐ ᐊᓯᖏᑦ ᑯᐊᐸᐃᑦ ᐱᓇᓱᒃᑕᖏᓐᓂᒃ ᑎᑭᕝᕕᐅᓚᐅᕐᓂᕋᖅᖢᓂᒋᑦ.

ᐃᓚᒌᓴᒃᑯᑦ ᐊᐅᓚᑦᑎᔨᖓ ᒫᒃ ᐱᓕᐅ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᓄᓇᕕᒃᒥᐅᑕᓕᒫᑦ ᐊᒃᑐᖅᑕᐅᓚᐅᕐᓂᖏᓐᓂᒃ ᖃᒧᑕᐅᔭᓂᒃ ᑎᑭᕝᕕᐅᙱᓐᓂᕐᒥᒃ, ᐊᑯᓕᕕᒃᑐᐊᖑᙱᑦᑐᖅ.

ᖃᕋᓴᐅᔭᒃᑯᑦ ᑎᑎᕋᖅᑕᖏᓐᓂᒃ, ᐱᓕᐅ ᐅᖃᓚᐅᕐᑐᖅ ᑭᖑᕙᕆᐊᕈᑎᐅᔪᑦ ᑯᐊᐸᒃᑯᑦ ᐱᑖᕐᕕᖏᓐᓂᒃ ᐃᓚᒌᓴᒃᑯᓐᓂ ᐅᒥᐊᕐᔪᐊᒃᑰᖅᑐᒃᓴᓂᒃ ᐱᐊᓂᒃᓯᙱᔾᔪᑎᐅᓚᐅᕐᓂᖓᓂᒃ ᖃᒧᑕᐅᔭᓂᒃ ᐊᐅᔭᐅᕋᑖᕐᑐᖅ.

ᑭᓯᐊᓂᓕ ᕿᑎᐊᒍᑦ ᐱᖁᑎᖃᕐᓂᖅ ᑕᐃᒪᐃᓕᖓᑐᐃᓐᓇᕐᑐᖅ ᐊᒻᒪᓗ ᐃᓚᒌᓴᒃᑯᑦ ᖃᒧᑕᐅᔭᓂᒃ ᓄᓇᕕᒃ ᑯᐊᐸᒃᑯᓐᓄ ᐊᐅᓪᓚᖅᑎᑦᑎᓇᓱᒃᖢᑎᒃ ᖃᖓᑕᓲᒃᑯᑦ.

“ᐱᓕᕆᓇᓱᒃᑲᓗᐊᖅᑐᒍᑦ ᑖᒃᑯᐊ ᖃᒧᑕᐅᔭᐃᑦ ᑎᑭᑎᑕᐅᑎᓐᓇᓱᒃᖢᑎᒍᑦ,” ᐱᓕᐅ ᐅᖃᕐᑐᖅ.

“ᖃᐅᔨᒪᒐᑦᑕ ᖃᓄᐃᔾᔪᑎᐅᓂᖓ ᓈᒻᒪᙱᓐᓂᖓᓂᒃ ᐊᒻᒪ ᒪᒥᐊᔾᔪᑎᒋᓪᓗᑎᒍᑦ ᑭᖑᕙᕈᑎᓄᑦ.”

ᖃᖓᑕᓲᒃᑰᕐᓂᐊᖅᑐᑦ ᑲᔪᓯᑎᑕᐅᓂᐊᕐᑐᑦ; ᑭᓯᐊᓂᓕ ᐅᑭᐅᕐᑯ ᖃᖓᑕᓲᒧᑦ ᓈᒻᒪᖃᑦᑕᙱᑎᓪᓗᒍ ᑭᖑᕙᕆᐊᒃᑲᓐᓂᑐᐃᓐᓇᕆᐊᓖᑦ.

“ᐱᓯᒪᓕᕐᑕᕗᑦ ᑕᒪᕐᒥ ᖃᒧᑕᐅᔭᐃᑦ ᐊᒻᒪᓗ ᐱᓕᕆᖃᑎᖃᖅᖢᑕ ᐃᓄᐃᑦ ᖃᖓᑕᓲᖓᓂᒃ ᑯᐊᐸᒃᑯᓐᓄᑦ ᐊᐅᓪᓚᕐᑎᓐᓇᓱᒡᓗᑎᒍᑦ,” ᐱᓕᐅ ᐅᖃᕐᑐᖅ.

“ᐃᓄᐃᑦ ᖃᖓᑕᓲᖓ ᐱᓇᓱᒃᑎᐊᖅᑑᒐᓗᐊᑦ ᑭᓯᐊᓂᓕ ᓯᓚ ᓈᒻᒪᙱᓐᓂᖓᓄᑦ ᐊᒻᒪ ᐊᓯᖏᓐᓄᑦ ᑭᖑᕙᕈᑎᓄᑦ ᑕᐃᒪᓕ ᑖᒃᑯᐊ ᑎᑭᑎᑲᐅᖅᑐᒐᒃᓴᐅᙱᒻᒪᑕ.”

Share This Story

(0) Comments

Join the Conversation

Your email address will not be published. Required fields are marked *

*