ᖃᓄᖅ ᓄᓇᓕᓐᓂᑦ ᐱᕙᓪᓕᐊᔪᓕᕆᔨ ᓴᖅᑮᖃᑦᑕᕐᓂᑰᒻᒪᖔᖅ ᐃᖃᓗᓐᓂ ᐅᐊᑦᑎᐊᕈ

ᓯᕗᓪᓕᖅᐹᒥ ᐱᒋᐊᕐᖓᑦ ᐃᓄᒃᓱᒃ ᐊᒥᓱᓕᖅᑎᑕᐅᕙᔪᔪᑦ (Gestetner) ᐊᒥᓲᓕᖅᑎᑦᑎᔾᔪᒻᒧᑦ 1973−ᒥ, ᓴᖅᑮᓚᐅᖅᓯᒪᔪᑦ ᖃᐅᔨᔭᐅᕙᓪᓕᐊᔪᓂᒃ ᐃᓄᓐᓄᑦ ᐊᓯᖏᓐᓄᓪᓗ ᐅᑭᐅᖅᑕᖅᑐᒥᐅᑕᕐᓄᑦ, ᓯᕗᓪᓕᖅᐹᒥ ᐱᕙᓪᓕᐊᔪᓕᕆᔨ ᐅᖃᖅᑐᓂ ᐋᓐ Hᐊᓐᓴᓐ.

“ᓯᕗᓪᓕᖅᐹᑦᑎᐊᒥ ᑕᐃᑲᓂ ᖁᕕᐊᓇᖅᑐᕐᔪᐊᖑᓚᐅᖅᓯᒪᔪᖅ ᐅᕙᑦᑎᓐᓄᓕᒫᖅ − ᐃᓄᓐᓄᑦ ᐃᓄᓪᓚᕆᐅᓐᖏᑦᑐᓄᓪᓗ − ᖃᐅᔨᕙᓪᓕᐊᖃᑦᑕᐅᑎᓪᓗᑕᓗ,” ᕼᐊᓐᓴᓐ ᐅᖃᖅᑐᓂ ᐊᐱᖅᓱᖅᑕᐅᑎᓪᓗᒍ ᓂᐊᖁᓐᖒᒥ ᐊᖏᕐᕋᖓᓐᓂ.

1960−ᖏᓐᓂ 70−ᖏᓐᓂᓪᓗ, ᐃᓄᐃᑦ, ᑕᒫᓂ ᓄᓇᒥᐅᑕᐅᖏᓐᓇᖅᑐᑦ, ᓅᑉᐸᓪᓕᐊᓕᓚᐅᖅᓯᒪᒻᒪᑕ ᑲᑎᑦᑐᑎᑦ ᓲᕐᓗ ᐳᕉᐱᓱ ᐸᐃᒧᑦ. ᖃᓪᓗᓈᑦ ᑕᒪᐅᓐᖔᕙᓪᓕᐊᓕᖅᑐᑎᑦ ᐃᖃᓗᕈᑦᑕᖅᑯᖅ ᐱᕈᖅᑐᕐᔪᐊᖑᓪᓗᓂᓗ ᒐᕙᒪᑐᖃᒃᑯᑦ ᐃᖅᑲᓇᐃᔮᖃᕐᓂᖏᓐᓄᑦ.

ᐃᑲᔪᖃᑦᑕᖅᑐᑦ ᐊᑭᓕᖅᓱᖅᑕᐅᒐᑎᑦ ᓴᖅᑮᓕᓚᐅᖅᓯᒪᔪᑦ ᐃᓄᒃᓱᒻᒥᑦ, ᓇᓗᓇᐃᖅᑕᐅᓪᓗᓂᓗ “ᓄᓇᓕᓐᓂ ᐆᑦᑐᕋᖅᑕᐅᔪᑦ” ᐅᓂᒃᑳᕐᒥᓂᒃ ᐅᓂᒃᑳᖃᑦᑕᖅᑐᑎᑦ.

“ᐱᐅᔪᕐᔪᐊᖑᓚᐅᖅᓯᒪᔪᖅ ᐅᓂᒃᑳᕆᔭᐅᕙᑦᑐᓂᓗ ᐃᓄᓐᓄᑦ,” ᕼᐊᓐᓴᓐ ᐃᖅᑲᐅᒪᔪᖅ ᑕᐃᒫᒃ.

ᐃᓄᒃᓱᒃ ᓴᖅᑮᕚᓪᓗᓚᐅᖅᓯᒪᔪᑦ ᕖᕝᕗᐊᕆᒥ 9−ᖑᑎᓪᓗᒍ, 1973, ᐅᑭᐅᓄᑦ ᐱᖓᓱᓄᑦ ᐊᐅᓚᓪᓗᓂ ᐃᓱᓕᑦᑕᖅᑯᖅ 1976−ᒥ ᐃᑲᔪᖅᑎᐅᖃᑦᑕᖅᑐᑦ ᐊᑭᓕᖅᓱᖅᑕᐅᖏᑦᑐᑦ ᓂᐅᕐᕈᑎᖃᕐᖓᑕ ᓇᒻᒥᓂᖁᑎᓕᒻᒧᑦ, ᐳᕉᐱ ᐱᕙᓪᓕᐊᔪᖏᑦ (Frobisher Press Ltd.), ᐊᑎᖓᓐᓂ ᐊᓯᔾᔩᑕᖅᑯᑦ.

ᑕᒪᓐᓇ ᐊᑦᑐᐊᓂᖃᖅᑐᖅ ᐃᓄᒃᓱᒃ ᐱᔾᔪᑎᒋᓪᓗᒍ ᓄᓇᑦᓯᐊᖅ ᐱᕙᓪᓕᐊᔪᖏᑦ ᓇᓪᓕᐅᓂᖅᓯᐅᓐᓂᖃᓕᖅᑐᖅ ᐅᑭᐅᓂᒃ 50ᓂᒃ 2023−ᒥ.

ᐱᒻᒪᕆᐅᓚᐅᕐᖓᑦ ᐳᕉᐱᓱ ᐸᐃᒧᑦ ᐱᕙᓪᓕᐊᔪᖃᕐᓗᑎᑦ ᑐᓴᐅᒪᖃᑎᒌᖃᑦᑕᕐᓂᐊᕐᖓᑕ, ᕼᐊᓐᓴᓐ ᐅᖃᖅᑐᓂ.

ᓄᓇᑦᓯᐊᖅ ᐱᕙᓪᓕᐊᔪᑦ ᑕᐃᑲᓐᖔᖅᑐᑦ ᐃᓄᒃᓱᒃ ᐱᕙᓪᓕᐊᔪᓂᒃ, ᓯᕗᓪᓕᖅᐹᒥ ᓴᖅᑮᓚᐅᖅᓯᒪᔪᑦ ᕖᕝᕗᐊᕆᒥ 9-ᖑᑎᓪᓗᒍ, 1973-ᒥ (ᐊᔾᔨᓐᖑᐊᖅ ᐱᔭᐅᓯᒪᔪᖅ ᐅᖃᓕᒫᒐᖃᕐᕕᒻᒥ ᑐᖅᑯᐃᕕᒻᒥᓪᓗ ᑲᓇᑕᒥ)

ᓄᓇᓕᒻᒥᐅᑕᐅᓪᓗᓂ ᐊᔾᔨᐅᖏᒻᒪᑦ ᓄᓇᒥᑦ ᐱᓇᓱᐊᖅᑐᓂ, ᖃᐅᔨᒪᖃᑦᑕᐅᑎᔪᐃᓐᓇᐅᓪᓗᑎᒃ ᐃᓚᒌᑦᑐᐃᓐᓇᐅᓪᓗᑎᓪᓗ.

“ᐃᓄᐃᑦ ᑭᒃᑰᓂᖏᓐᓂ ᐃᓕᑦᑐᖅᓯᒪᓪᓗᑎᒃ ᐊᓯᖏᓐᓂ ᐋᓪᓚᓂᒃ ᖃᐅᔨᕙᓪᓕᐊᓪᓗᑎᒃ ᐃᓅᓯᕐᒥᓂᒃ ᓯᕗᓪᓕᖅᐹᑦᑎᐊᒥ. ᖃᐅᔨᒪᖃᑎᒌᒐᓱᓚᐅᖅᓯᒪᔪᒍ,” ᐅᖃᖅᑐᓂ. “ᐊᒻᒪᓗ, ᖃᓪᓗᓈᓂᒥᑦ. ᐃᓕᓐᓂᐊᖅᑎᒋᐊᖃᖅᑐᑎᒍᓪᓗ ᐊᓐᓇᐅᒪᓇᓱᐊᕐᓂᕐᒥᑦ.”

Hᐊᓐᓴᓐ ᐃᓕᐊᕐᔫᓪᓗᓂ ᐱᕈᖅᓴᓚᐅᖅᓯᒪᔪᖅ ᑭᒻᒥᕈᒻᒥ, ᐱᕈᖅᓴᔭᐅᓪᓗᓂ ᐊᔭᖓᑕ/ᐊᑦᑕᖓᑕ ᐊᒻᒪᓗ ᐊᒃᑲᖓᑕ/ᐊᖓᖓᑕ, ᓄᓇᒥᐅᑕᐅᓪᓗᑎᑦ. 1957−ᖑᑎᓪᓗᒍ, ᐳᕉᐱᓱ ᐸᐃᒧᑦ ᓅᑦᑐᑎᑦ ᐊᐅᓪᓛᕕᓕᖅᑐᑦ ᓲᕐᓗ ᑭᒻᒥᕈᒻᒥ.

1960−ᒥ, ᐊᔭᖓᑕ/ᐊᑦᑕᖓᑕ ᖃᒪᓂᖅᑐᐊᒨᕈᑎᓚᐅᖅᓯᒪᔭᖓ, ᑐᕌᓐᑐᒨᑦᑕᓕᖅᑯᖅ, ᑎᒍᐊᖅᑎᓐᖑᐊᖏᓐᓄᑦ ᐱᓯᒪᔭᐅᓪᓗᓂ ᐅᑭᐅᓄᑦ ᑕᓪᓕᒪᓄᑦ.

ᑎᒍᐊᖅᑎᓐᖑᐊᖏᑦ ᐅᖃᓕᒫᖅᑎᑦᑎᕙᔪᔪᑦ ᐱᕙᓪᓕᐊᔪᓂᒃ ᐸᐃᑉᐸᓂ ᐅᖃᓕᒫᕆᐅᖅᓴᓪᓗᓂ ᑎᑎᕋᕆᐅᖅᓴᐸᑦᑐᓂᓗ ᖃᓪᓗᓈᑎᑐᑦ, ᓲᕐᓗ ᐸᕐᓇᑕᐅᔪᖅ ᐃᖅᑲᓇᐃᔮᕆᓛᑐᐃᓐᓇᖅᑕᒥᓄᑦ ᐅᑭᐅᖅᑕᖅᑐᒥ, ᐱᕙᓪᓕᐊᔪᓕᕆᔨᑐᐃᓐᓇᐅᓐᖏᓪᓗᓂ, ᑭᓯᐊᓂᑦᑕᐅ ᒐᕙᒪᑐᖃᒃᑯᓐᓂ ᐊᓪᓚᑦᑎᐅᓪᓗᓂ ᓇᕿᑦᑕᖅᑎᐅᓪᓗᓂ ᑐᑭᒧᐊᑦᑎᑦᑎᔨᐅᓪᓗᓂᓗ, ᐊᒻᒪᓗ ᓰᐲᓰᒃᑯᓐᓂ ᐃᖅᑲᓇᐃᔭᓚᐅᖅᓯᒪᓪᓗᓂ.

ᐅᑭᐅᖃᓕᖅᑎᓪᓗᒍ 13−ᓂᖅᑲ, ᑎᒍᐊᖅᑎᓐᖑᐊᖏᑦ ᖃᐅᔨᒪᒍᓐᓃᓚᐅᖅᓯᒪᒻᒪᑕ ᖃᓄᐃᓕᖓᔭᐅᓂᐊᕐᒪᖔᖅ − ᐊᐅᓪᓚᖅᑎᑕᐅᓗᓂ ᐳᕉᐱᓱ ᐸᐃᒧᑦ, ᐅᕝᕙᓘᓐᓃᑦ ᑐᕌᓐᑐᒥ ᐃᓕᓐᓂᐊᖅᑎᑕᐅᑐᐃᓐᓇᕐᓗᓂ.

“ᐃᓕᓐᓂᐊᖔᕈᒪᓚᐅᖅᓯᒪᔪᖓ.”

ᐃᓚᖓ ᐃᓄᒃᓱᒃᑯᑦ ᐱᕙᓪᓕᐊᔪᒃᑯᑦ ᑐᕌᒐᕆᓚᐅᖅᑕᖓ ᐃᓄᐃᑦ ᐊᔾᔨᒌᓐᖏᑦᑐᕈᓘᔭᕐᓂᑦ ᐅᖃᓕᒫᒐᔅᓴᖃᕐᓗᑎᑦ. ᑕᐃᔅᓱᒪᓂ, ᐊᒥᓲᓕᖅᑎᑦᑎᒍᓐᓇᔪᒻᒪᑕ ᑭᓯᐊᓂ ᐃᓄᑦᑎᑑᓕᖅᓯᒪᔪᓂᒃ ᑐᔅᓯᐅᑎᓂᒃ ᐊᒻᒪᓗ ᒐᕙᒪᑐᖃᒃᑯᓐᓃᓐᖔᖅᑐᓂᑦ ᓴᖅᑭᖅᑕᐅᓯᒪᔪᓂᒃ ᑕᐃᑯᐊᑑᕙᔪᒻᒪᑕ ᐃᓄᑦᑎᑑᖓᔪᑦ.

“ᐃᓄᑦᑎᑑᖓᔪᖅᑕᖃᓗᐊᖃᑦᑕᔪᓐᖏᒻᒪᑦ ᑕᐃᔅᓱᒪᓂ, ᐃᓱᓚᐅᖅᓯᒪᔪᖓ ᐱᐅᒐᔭᖅᑐᖅ ᐅᓕᒫᒐᔅᓴᖃᕐᓂᖅᑲᑕ ᐸᐃᑉᐹᖁᑎᖒᓐᖏᑦᑐᓂᑦ,” ᕼᐊᓐᓴᓐ ᐅᖃᖅᑐᓂ. “ᓄᑖᖑᓪᓗᓂᓗ ᑕᐃᒫᒃ ᐃᓅᓯᖅ, ᐱᕙᓪᓕᐊᔪᖁᑎᖃᓚᐅᖅᓯᒪᓐᖏᓐᓇᑦᑕᓕ ᑎᑎᕋᖅᓯᒪᔪᓂᒃ ᐅᖃᐅᓯᑦᑎᓐᓂ.”

ᐅᓂᒃᑳᑦᑐᐊᑦ ᐃᓄᑦᑎᑑᖓᓪᓗᑎᑦ ᐃᓄᑦᑎᑑᓕᖅᑎᑕᐅᓯᒪᔪᑦ ᖃᓪᓗᓈᑎᑑᖓᔪᒥᓂᕐᓂᑦ, ᓴᖅᑭᖅᑕᐅᓪᓗᑎᑦ ᒪᕐᕉᓐᓂᒃ ᐅᖃᐅᓰᓐᓂᒃ ᐊᑐᖅᑐᑎᑦ. (ᐅᓪᓗᒥᐅᔪᖅ, ᓄᓇᑦᓯᐊᖅ ᐱᕙᓪᓕᐊᔪᑦ ᓱᓕ ᓴᖅᑮᖃᑦᑕᖅᑐᖅ ᑕᒪᒃᑮᓐᓂᒃ ᐅᖃᐅᓰᓐᓂᒃ, ᑭᓯᐊᓂᓕ ᑎᑎᕋᖅᓯᒪᖔᓕᖅᑐᑦ ᖃᓪᓗᓈᑎᑐᑦ ᐃᓄᑦᑎᑐᓪᓗ ᐃᓄᑦᑎᑑᓕᖅᓯᒪᓐᖏᑦᑐᓃᖔᖅᑐᑎᑦ.)

“ᑕᐃᒫᒃ ᐱᔪᓐᓇᖅᓯᓚᐅᖅᑐᑦ, ᐅᓂᒃᑳᖅᑐᐊᑦ ᐃᓄᖁᑎᓐᓃᓐᖔᖅᑐᑦ,” ᕼᐊᓐᓴᓐ ᐅᖃᖅᑐᓂ.

ᐃᓄᒃᓱᒃ ᑲᑎᖅᓱᖅᑐᒍ ᑕᐃᔅᓱᒪᓂᐅᓚᐅᖅᓯᒪᔪᖅ ᐃᓕᓐᓂᐊᕕᔾᔪᐊᕐᒥ (Gordon Robertson Education Centre), ᐃᓐᓇᕐᓄᑦ ᐃᓕᓐᓂᐊᕐᕕᒃ ᑕᐃᑯᓐᖓᖃᑦᑕᓚᐅᖅᓯᒪᔪᑦ “ᐃᓕᓐᓂᐊᕆᐊᖅᑐᑎ ᖃᓄᐃᓘᕈᓗᔭᖅᑐᓂᒃ.”

ᑕᐃᑲᓂ ᐃᓄᒃᓱᒃ ᐊᑭᖃᓐᖏᑦᑐᒥᑦ ᐊᑐᖅᑐᐊᕈᑎᖃᓚᐅᖅᑐᖅ ᑎᕆᖅᑯᐊᓂ ᐊᓪᓚᕝᕕᖃᖅᑎᑕᐅᓪᓗᓂ, ᐊᑭᖃᓐᖏᑦᑐᓂᑦ ᐸᐃᑉᐹᓂ ᐊᑐᕈᓐᓇᖅᑐᑕ ᐊᒻᒪᓗ ᐊᒥᓲᕈᑎᓕᐅᕈᑎᖓᓐᓂ (Gestetner), ᐊᒥᓲᓕᖅᑎᑦᑎᔪᑎᐊᓗᒃ ᑎᐱᓕᕐᔪᐊᕌᓗᓪᓗᓂ ᐃᓚᔅᓵᓗᖏᓐᓂ ᐊᒥᓲᓕᖅᑎᑦᑎᔾᔪᑎᐅᑉ.

Hᐊᓐᓴᓐ ᐃᓄᑑᓚᐅᖅᓯᒪᔪᖅ, ᐸᓂᖓ ᐊᖏᔪᑦᑎᖅᐹᖅ ᑳᑎᓕᓐ ᓇᔅᓴᖃᑦᑕᖅᑐᓂᐅᒃ ᐃᖅᑲᓇᐃᔭᕆᐊᖅᑐᓂ. ᐊᒪᐅᑎᖓᑕ ᖄᖓᓂ ᓇᓪᓚᖓᕙᑦᑐᓂ ᐸᐃᑉᐹᓕᕆᑎᓪᓗᒍ ᐱᕙᓪᓕᐊᔪᓕᕆᓪᓗᓂ.

ᐅᑭᐅᒥ ᐊᓂᒍᖅᑐᒥ, ᐅᐃᒌᖅ, ᐹᒃᑯᑦ, ᐱᖓᓱᓂᑦ ᕿᑐᕐᖓᖅᑖᑲᓐᓂᖅᑐᑎᒃ. 1970−ᖏᓐᓂ, ᐹᑉ ᓂᐅᕐᕈᑎᓕᕆᓂᕐᒥᑦ ᐃᖅᑲᓇᐃᔮᖃᓚᐅᖅᓯᒪᔪᖅ ᓄᓇᑦᑎᐊᑉ ᒐᕙᒪᒃᑯᖏᓐᓄᑦ (ᓄᓇᑦᑕᖃᓚᐅᖅᑎᓐᓇᒍᓕ) ᑲᒻᐸᓂᑖᓚᐅᖅᑎᓐᓇᒍ 1980−ᖏᓐᓂ.

Hᐊᓐᓴᓐ ᐱᑐᖄᓗᒻᒥᑦ ᑲᑉᐳᔭᖅᑑᖏᑦᑐᒥᑦ ᓇᕿᑦᑕᐅᑎᖃᓚᐅᖅᓯᒪᔪᖅ, ᐃᖅᑲᐅᒪᑦᑎᐊᖅᑕᖓ “ᐅᔭᕋᑦᑎᐊᒧᑦ ᑭᓯᐊᓂ ᐃᓚᖏᑦ ᓇᕿᒋᐊᓕᐅᔮᖃᑦᑕᖅᑐᒥᓃᑦ.”

ᐃᓄᑦᑎᑑᖓᔪᓂᒃ ᐅᓂᒃᑳᓕᐅᖅᐸᑦᑐᓂ ᐊᒡᒐᒻᒧᑦ ᑎᑎᕋᖅᑐᓂ ᐸᐃᑉᐹᑦᑎᐊᕙᒻᒧ ᐊᑐᖅᑕᐅᖃᑦᑕᖅᑐᓂᒃ ᐊᒥᓲᓕᐅᕈᑎᒧᑦ (Gestetner).

“ᑕᒻᒪᑦᑕᐃᓕᒪᒐᓱᑦᑐᕐᔪᐊᖑᕙᓚᐅᖅᓯᒪᔪᖓ. ᑕᒻᒪᑳᓪᓚᒃᑯᖓ ᐃᑲᕐᕋᒥ ᐅᖓᑖᓄᓪᓘᓐᓃᑦ ᐋᖅᑭᔅᓱᕋᓱᒃᑲᔭᕐᒥᒐᒃᑯ ᐊᒥᓲᓕᖅᑎᑦᑎᔾᔪᑎᑐᖄᓗᒻᒪᑦ (Gestetner).”

ᐋᓐ Hᐊᓐᓴᓐ, ᐃᓄᒃᓱᒃᑯᑦ ᐱᕙᓪᓕᐊᔪᓕᕆᔨᒋᓚᐅᖅᓯᒪᔭᖓ, ᐃᓄᑦᑎᑑᖓᔪᓂᒃ ᐅᖃᓕᒫᖅᑐᖅ ᐱᑐᖃᓗᓐᓂᒃ 1970-ᓕᓴᕐᓂᑦ. (ᐊᔾᔨᓐᖑᐊᖅ ᑕᐃᕕᑦ ᕙᓐᒥᑦ)

Hᐊᓐᓴᓐ ᐃᖅᑲᐅᒪᔪᖅ ᐃᓄᒃᓱᒃ “ᐱᕙᓪᓕᐊᔪᑦ” ᐅᖃᓕᒫᒐᐅᓐᖏᖔᖅᑐᓂᑦ ᐱᕙᓪᓕᐊᔪᑦ, ᑎᑎᕋᖅᓯᒪᔪᑦ ᓇᐃᑦᑑᑎᐅᒻᒪᑕ ᐅᓂᒃᑳᑦ ᓄᓇᓕᓐᓂ ᐅᓂᒃᑳᖅᐸᑦᑐᒥᓃᑦ ᑖᔅᓱᒧᖓ. ᐊᓯᕙᕐᓂᐅᑉ ᒥᔅᓵᓄᑦ ᐃᓄᒃᓱᒃ ᐃᓗᓕᖃᕋᔪᑉᐸᓚᐅᖅᓯᒪᔪᖅ ᐱᓇᓱᐊᕈᓯᖅᑕᒫᑦ.

“ᐱᕙᓪᓕᐊᔪᐊᓗᑦᑕᖃᓚᐅᖅᓯᒪᓐᖏᑦᑐᖅ. ᐸᐃᑉᐹᑦ ᐊᒥᓲᓕᖅᑎᒪᓕᕋᑦᑎᒍ, ᐱᑐᖃᐅᓕᖅᑐᑎᑦ ᑐᓴᕋᔅᓴᑦ. ᓲᕐᓗ ᑎᑎᖅᑲᐅᓯᐊᑦ,” ᐅᖃᖅᑐᓂ.

ᐅᑭᐅᓄᑦ ᐱᖓᓱᓄᑦ ᐊᐅᓚᓕᖅᑎᓪᓗᒋᑦ, ᐃᓄᒃᓱᒃ ᓴᖅᑮᑐᐃᓐᓇᖅᐸᓚᐅᖅᓯᒪᔪᑦ ᐱᓇᓱᐊᕈᓯᖅᑕᒫᑦ ᐊᒻᒪᓗ ᒪᑉᐱᒐᖃᖅᑐᑎᑦ ᐊᕙᑎᑦ ᐅᖓᑖᓄᑦ. ᑲᑎᖅᓱᖅᓯᒪᓪᓗᑎᑦ ᐸᐃᑉᐹᑦ, ᐱᕆᓯᒪᓐᓇᑎᓪᓕ ᐱᕙᓪᓕᐊᔪᑦᑎᑐᑦ. ᑯᐊᑕᕌᖅᑐᑎᒃ, ᐳᕉᐱᓱ ᐸᐃᒥ ᓱᕈᓯᕐᓄᑦ ᓂᐅᕕᐊᔅᓴᕆᔭᐅᕙᑦᑐᑎᒃ − ᕼᐊᓐᓴᓐ ᐃᓚᖏᓐᓅᒐᔪᑦᑐᖅ − ᐊᑭᓕᖅᑕᐅᓪᓗᑎᑦ “ᑯᑯᒥᑦ ᒪᕐᕉᓂᓪᓘᓐᓃᒃ” ᐅᕝᕙᓘᓐᓃᑦ “ᐅᑯᒻᒥᐊᒐᕐᓂᑦ ᐊᒥᓲᓗᐊᓐᖏᒻᒥᔪᓂᑦ.”

“ᑕᕝᕙ ᐅᓂᒃᑳᒐᓛᑦ ᓄᓇᓕᓐᓂ ᐱᕙᓪᓕᐊᔪᓂᒃ. ᐊᕝᕙᐸᓗᖏᑦ, ᑭᓲᓪᓗᐊᓚᐅᖅᓯᒪᓐᖏᑦᑐᑦ. ᐃᓄᐃᑦ ᐅᓂᒃᑳᕈᒪᒻᒪᑕ. ᐃᓄᑦᑎᑑᓕᖅᑕᐃᓐᓇᕆᕙᑦᑐᒋᑦ ᐅᕙᖓ.”

ᑭᓯᐊᓂᑦᑕᐅ ᓄᓇᓕᓐᓄᑦ ᐱᕙᓪᓕᐊᔫᒐᓗᐊᖅᑎᓪᓗᒋᑦ ᐃᓄᒃᓱᒃ − ᐳᕉᐱᓱ ᐸᐃᒥ ᑲᑎᒪᔨᑦ ᒥᔅᓵᓄᑦ, ᖃᖓᑦᑕᐅᑎᖏᑦ ᐊᑭᑦᑐᖅᑐᐊᓘᓚᐅᖅᓯᒪᒻᒪᑕ ᓄᐊᑎᐅᒃᑯᑦ (Nordair), ᐃᒥᐊᓗᖃᕈᒪᔪᓄᑦ ᓂᕈᐊᖅᑐᖃᖅᑐᓂ, ᐱᕙᓪᓕᐊᔪᓪᓗ ᔮᓐᓄᐊᕆ 1974−ᒥ, “ᐸᓖᓯ ᖁᑭᖅᑕᐅᑎᓪᓗᒍ.”

ᓅᕖᑉᐱᕆᒥ 20−ᐅᑎᓪᓗᒍ, 1974−ᒥ, ᐱᕙᓪᓕᐊᔪᑦ ᑐᓴᕈᒥᓇᖅᑐᖃᓚᐅᖅᓯᒪᔪᑦ “ᔭᐃᒻᔅ ᐸᐃᒥ ᐃᓄᐃᑦ ᐊᖏᖃᑎᒌᓐᓂᕆᓚᐅᖅᓯᒪᔭᖏᑦ $150−ᒥᓕᐊᑦ ᐊᒻᒪᓗ ᐊᓯᕙᕈᓐᓇᕐᓂᖏᑕ ᐱᔪᓐᓇᐅᑎᖏᑦ — ᑕᐱᕇᒃᑯᓪᓗ (ITC) ᖁᕕᐊᓐᓇᑎᑦ.” ᐊᒻᒪᓗ ᐅᓂᒃᑳᖃᖅᑐᑎᑦ ᐃᑭᑦᑐᐊᓘᓚᐅᖅᓯᒪᓂᖓᓂ ᖁᓛᓂ ᐱᓐᖑᐊᕕᒻᒥ ᑰᓕᕝᕕᒻᒥ (Curling Club).

“ᑭᓱᑐᐃᓐᓇᐃᑦ ᐸᐃᑉᐹᒨᕋᔅᓴᐃ,” Hᐊᓐᓴᓐ ᐅᖃᖅᑐᓂ ᐃᓄᒃᓲᑉ ᒥᔅᓵᓄᑦ ᑕᐃᒫᒃ.

ᑎᑭᑦᑐᒍ ᔪᓂ 1976, ᐃᓄᒃᓱᒻᒥ ᐃᑲᔪᖅᑎ ᐊᑭᓕᖅᓱᖅᑕᐅᒐᑎᑦ ᑲᑎᒪᔨᖏᑦ ᓂᐅᕐᕈᑎᖃᕈᒪᓕᓚᐅᖅᓯᒪᔪᑦ.

ᑮᖏᓐᓂ ᑐᓂᓯᓪᓗᑎᑦ ᐳᕉᐱᓱ ᐱᕙᓪᓕᐊᔪᓄᑦ (Frobisher Press Ltd.), ᐊᐅᓚᑕᐅᓪᓗᓂ ᒫᓂᑲ ᑳᓇᓕᒧᑦ, ᖃᓪᓗᓈᓃᓐᖔᖅᓯᒪᔪᖅ ᐋᓱᕚᒥ, ᐊᓐᑎᐅᕆᔪᒥᑦ, ᐱᕙᓪᓕᐊᔪᓕᕆᔨᐅᓚᐅᖅᓯᒪᓪᓗᓂ ᐃᓄᒃᓱᑯᓐᓄᑦ. ᑳᓇᓕ ᐋᖅᑭᔅᓱᐃᓪᓗᓂ ᑎᒍᒥᐊᖅᑎᔅᓴᐅᔪᓂᒃ ᓇᒻᒥᓂᖅᑖᕆᔭᐅᓕᕐᓗᓂ ᐱᓚᐅᖅᓯᒪᔪᖅ.

ᐃᓄᒃᓲᑉ ᑲᑎᒪᔨᖏᑦ ᐊᑕᐅᓯᕐᒥᑦ ᒪᓕᒐᖃᖅᑐᑎᑦ − ᓄᑖᑦ ᓇᒻᒥᓂᕆᔭᐅᔪᑦ ᓄᑕᕐᒥᑦ ᐊᑎᖅᑖᕐᓗᑎᑦ ᐃᓄᒃᓱᒃ ᐃᓱᓕᓪᓗᓂ. ᔫᓂᒥ 16−ᖑᑐᓪᓗᒍ, 1976−ᒥ, ᐃᓄᒃᓱ ᐅᓂᒃᑳᖅᑐᑦ ᓂᐅᕐᕈᑎᖃᕐᓂᖏᓐᓂ ᐊᑎᖓᓪᓗ ᐊᓯᔾᔨᖅᑕᐅᓂᐊᕐᓂᖓᓐᓂ ᑕᒪᓐᓇᓗ ᐱᒋᐊᕐᓂᐊᓕᖅᑐᓂ ᔪᓚᐃᒥ.

ᑕᐃᔅᓱᒪᓂ, ᐆᒻᒪᓚᐅᖅᓯᒪᔪᖅ ᓄᓇᑦᓯᐊᖅ ᐱᕙᓪᓕᐊᔪᖅ.

ᐳᕉᐱᓱ ᐱᕙᓪᓕᐊᔪᑦ (Frobisher Press) ᓴᖅᑮᖃᑦᑕᓚᐅᖅᑐᑦ ᐱᕙᓪᓕᐊᔪᓂᑦ ᐅᑭᐅᓄᑦ 9-ᓄᑦ ᑎᑭᑦᑐᒍ 1985, ᓂᐅᕕᐊᖑᒻᒪᑦ ᓄᐊᑕᒃᔅᑯᓐᓄᑦ (Nunatext), ᐱᓕᕆᖃᑎᖃᖅᑐᑎᑦ ᓄᓇᓯ ᑯᐊᐳᕇᓴᒃᑯᖏᓐᓂ ᐊᒻᒪᓗ ᓄᐊᑕᔅ ᓴᖅᑮᕙᑦᑐᑎᑦ ᓇᒻᒥᓂᕆᔭᐅᓪᓗᑎᑦ ᕌᐳᑦ ᐃᓚᒌᓐᓄᑦ, ᐱᖓᓱᑦ ᓄᑲᕇᑦ ᐋᑐᕙᒥᐅᑕᐃᑦ ᐱᓕᕆᓇᓱᐊᖅᓯᒪᓪᓗᑎᓪᓗ ᐊᑯᓂᐊᓗᒃ ᑲᓇᑕᐅᑉ ᐅᑭᐅᖅᑕᖅᑐᖓᓐᓂ.

ᓄᓇᑦᓯᐊᖅ ᐱᕙᓪᓕᐊᔪᓕᕆᔨᒃᑯᑦ ᓇᒻᒥᓂᖁᑎᒋᔭᐅᔪᑦ ᒪᓐᓇ ᓄᐊᑕᒃᔅᑯᓐᓂ.