ᐃᒃᐱᐊᕐᔪᒃ ᐸᕐᓇᒃᓯᒪᓕᕐᑐᖅ 44-ᓂ ᐃᖅᑲᓇᐃᔮᒃᓴᓂᒃ ᓄᑖᒥ ᐸᐃᕆᕝᕕᒃᓴᒥ

For English version, see Arctic Bay set to get 44 new daycare spots

ᐸᕐᓇᐅᑎᑦ ᐱᓕᕆᐊᖑᓕᕐᑐᑦ ᓄᑖᒥ ᐸᐃᕆᕝᕕᒃᓴᐅᓂᐊᖅᑐᒧᑦ ᐃᒃᐱᐊᕐᔪᒃᒥ.

ᑲᑭᕙᒃ ᑲᑐᔾᔨᖃᑎᒌᑦ ᐊᑎᓕᐅᓚᐅᕐᒪᑕ ᐊᕐᕌᒍᓄᑦ 50-ᓂ ᓄᓇᒥ ᐊᑐᖅᑐᐊᒐᒃᓴᒥ ᐃᒃᐱᐊᕐᔪᒃ ᕼᐋᒻᒪᓚᒃᑯᓐᓂ ᐅᒃᑑᐱᕆ 23-ᖑᑎᓪᓗᒍ ᑲᑐᔾᔨᖃᑎᒌᑦ ᐱᓕᕆᕙᓪᓕᐊᓕᕈᓐᓇᕐᓗᑎ ᐆᒥᖓ $14 ᒥᓕᐊᓐᓂ ᐊᑭᓕᖕᒥ ᐱᓕᕆᐊᒥ, ᔨᐅᕆᒥ ᑑᕐᖔᓗᒃ, ᑲᑎᒪᔨᐅᖃᑕᐅᔪᖅ ᑲᑐᔾᔨᖃᑎᒌᓄᑦ ᐅᖃᓚᐅᕐᑐᖅ ᐊᐱᕐᓱᖅᑕᐅᑎᓪᓗᒍ.

“ᖁᕕᐊᓱᒻᒪᕆᒃᑐᖓ ᐅᓇ ᑎᑎᖃᑎᒍᑦ ᓴᖅᑭᓯᒪᓕᕐᒪᑦ ᐊᒻᒪᓗ ᓇᓗᓇᕈᓐᓃᖅᖢᓂ ᓴᓇᓂᐊᕐᓂᑦᑎᓐᓂ ᐸᐃᕆᕝᕕᒃᓴᕐᒥ ᐃᒃᐱᐊᕐᔪᒃᒥ,” ᐅᖃᕐᑐᖅ.

ᑐᕌᖓᕆᔭᐅᔪᖅ ᓴᓇᓕᕐᓂᐊᕐᓗᑎᒃ 2026-ᒥ ᐊᒻᒪᓗ ᐃᒡᓗᕐᔪᐊᖅ ᐱᐊᓂᒃᑕᐅᓗᓂ ᐊᒻᒪ ᐊᐅᓚᑕᐅᓕᕐᓗᓂ 2027-ᒥ.

ᑲᑭᕙᒃ ᑲᑐᔾᔨᖃᑎᒌᑦ ᓄᓇᓕᖕᓂ ᐊᒻᒪ ᐱᕙᓪᓕᐊᔪᓕᕆᓂᕐᒥ ᑲᑐᔾᔨᖃᑎᒌᖑᔪᑦ ᐱᔨᑦᑎᕋᐅᑎᖃᖅᖢᑎᒃ ᐃᓄᖕᓄᑦ ᕿᑭᖅᑕᓃᑦᑐᓄᑦ, ᐃᓚᖃᖅᖢᓂ ᐃᖅᑲᓇᐃᔭᖅᑎᑦᑎᕙᖕᓂᕐᒥᒃ ᐊᒻᒪ ᐊᔪᕈᓐᓃᖅᓴᖅᑎᑦᑎᕙᖕᓂᕐᒥᒃ, ᐱᓕᕆᐊᓂᒃ ᐱᕙᓪᓕᐊᑎᑦᑎᓂᕐᒥᒃ ᐊᒻᒪ ᓱᕈᓯᓕᕆᓂᕐᒥ.

ᐃᑲᔫᑎᒃᓴᑦ ᐃᒃᐱᐊᕐᔪᒃ ᐸᐃᕆᕝᕕᒃᓴᒧᑦ ᒐᕙᒪᑐᖃᒃᑯᓐᓂᙶᖅᓯᒪᔪᖅ ᐅᕘᓇ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓂ ᐊᒻᒪ ᑲᑭᕙᒃᑯᓐᓂ. ᑮᓇᐅᔭᖅ ᐊᕐᕌᒍᓄᑦ ᐱᖓᓱᓄᑦ ᐋᖅᑭᒃᑕᐅᓯᒪᔪᖅ ᐱᒋᐊᕐᓯᒪᓪᓗᓂ ᑕᒪᑐᒪᓂ ᐊᕐᕌᒍᒥ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᐃᑲᔪᕈᑎᖃᕐᓂᐊᕐᒥᔪᖅ $5 ᒥᓕᐊᓐᓂ ᑐᓐᓂᔭᐅᓂᑰᓪᓗᑎᒃ ᒐᕙᒪᑐᖃᒃᑯᑦ ᓄᓇᖃᖅᑳᖅᑐᓂ ᓄᓇᓕᖕᓄᑦ ᐃᑲᔫᑎᒃᓴᓂᒃ ᐊᒻᒪ ᑲᑭᕙᒃᑯᑦ ᐊᑐᕐᓂᐊᖅᖢᑎᒃ $9 ᒥᓕᐊᓐᓂ ᒐᕙᒪᑐᖃᒃᑯᑦ ᓄᓇᖃᖅᑳᖅᑐᓄᑦ ᓱᕈᓯᓛᓕᕆᓂᕐᒧᑦ ᐊᒻᒪ ᓱᕈᓯᓕᕆᓂᕐᒧᑦ ᐱᓕᕆᐊᓄᑦ.

ᐸᐃᕆᕝᕕᒃ ᐊᖏᑎᒋᓂᖃᕐᓂᐊᖅᑐᖅ 650 ᑭᑉᐹᕆᒃᑎᓯᒪᔪᓂ ᒦᑕᓂ ᐃᒡᓘ ᐃᓗᐊᓂ ᐊᒻᒪ ᐊᓃᕐᓯᒋᓂᐊᖅᑕᖓᓂ ᐃᓚᖃᕐᓗᓂ ᒪᕐᕉᖕᓂ ᐃᓕᓐᓂᐊᕐᕕᒃᓴᐅᓂᐊᖅᑐᓂ 32-ᓄ ᐃᓕᓐᓂᐊᕐᓂᐊᓵᖅᑐᓄᑦ ᐃᓄᖃᕈᓐᓇᖅᑐᓂ. ᖃᓄᐃᓕᐅᕈᓘᔭᕐᕕᖃᕐᓂᐊᖅᖢᓂ 12-ᓄ ᓱᕈᓯᓛᓄᑦ ᖁᐃᕕᖕᓂ ᐊᓯᔾᔨᖅᓯᕝᕕᒃᓴᓂ ᐊᒻᒪ ᓯᓂᓚᐅᑲᒡᕕᒃᓴᓂᒃ. ᐃᒡᓘ ᕿᑎᖓ ᓂᕿᓕᐅᕐᕕᖃᕐᓂᐊᖅᑐᖅ, ᐊᓐᓄᕌᓄᑦ ᐅᐊᓴᕐᕕᒃ, ᐱᖁᑎᖃᕐᕕᒃᓴᖅ, ᖁᐃᔭᖅᑐᕐᕕᒃᓴᖅ, ᐃᖅᑲᓇᐃᔭᖅᑎᓄᑦ ᑎᑎᕋᕐᕕᖕᓂ ᐊᒻᒪᓗ ᑲᑎᒪᕕᒃᓴᒥ, ᑕᐃᒪᓐᓇ ᑲᑭᕙᒃᑯᑦ ᑐᓴᒐᒃᓴᓕᐅᓚᐅᕐᓯᒪᔪᑦ ᐅᒃᑑᐱᕆ 11-ᐅᑎᓪᓗᒍ.

“ᒫᓐᓇᓕ ᐃᓕᓐᓂᐊᕐᓂᐊᓵᖅᑐᓄᑦ ᐃᓕᓐᓂᐊᕐᕕᒃᑕᓕ ᐃᒃᐱᐊᕐᔪᒃᒥ,” ᐅᖃᕐᑐᖅ ᑑᕐᖔᓗᒃ, ᐅᖃᐅᓯᖃᖅᖢᓂ ᐃᒃᐱᐊᕐᔪᒃᒥ ᓄᓇᖃᖅᑳᖅᑐᓄᑦ ᓱᕈᓯᓛᓕᕆᕝᕕᒃᒥ, ᑖᒃᑯᐊᓗ ᐅᓪᓘ ᐃᓚᐃᓐᓇᖓᓂ ᐃᓕᓐᓂᐊᖅᑎᑦᑎᕙᒃᖢᑎᒃ ᐃᓕᓐᓂᐊᕐᓂᐊᓵᖅᑐᓂᒃ.

“ᖃᖓᒃᑲᓐᓂᕐᓕ ᓇᓂᓯᔪᓐᓇᖃᑦᑕᓚᐅᕐᙱᑦᑐᑦ ᐃᓕᓐᓂᐊᕐᓂᐊᓵᖅᑐᓂ ᐃᓕᓐᓂᐊᕈᑎᒃᓴᓂᒃ. ᐃᓂᖃᖅᑎᑦᑐᓐᓇᕐᓂᕐᓴᐅᓂᐊᓕᖅᑕᕗᑦ ᓄᑖᒥ ᐃᒡᓗᕐᔪᐊᕐᒥ.”

ᐸᐃᕆᕝᕕᒃᓴᖅ ᒐᕙᒪᑐᖃᒃᑯᓐᓄᑦ ᓚᐃᓴᓐᓯᖃᖅᑎᑕᐅᓂᐊᖅᑐᖅ, ᑕᒪᓐᓇᓕ ᑐᑭᖃᖅᖢᓂ ᐃᓚᒌᑦ ᐊᑭᓖᓇᔭᕐᓂᖏᓐᓂᒃ $10-ᒥ ᓱᕈᓯᖏᓐᓂ ᐃᓂᒃᓴᓕᐅᕋᓱᒡᑎᓪᓗᒋᑦ.

ᓄᓇᕗᒥᑦ ᒐᕙᒪᒃᑯᑦ ᑐᕌᒐᖃᕋᓱᒃᑐᑦ ᐋᖅᑭᒃᓯᓂᐊᕈᒪᓪᓗᑎᒃ 238-ᓂ $10-ᒥ ᐅᓪᓗᕐᒧᑦ ᐊᑭᓖᕝᕕᐅᖃᑦᑕᕐᓂᐊᖅᑐᒥ ᓄᓇᕗᓕᒫᓂ 2026 ᑎᑭᓚᐅᕐᑎᓐᓇᒍ. ᐱᒋᐊᖅᖢᓂ ᒪᐃ 6, 159 ᓄᑖᑦ ᐸᐃᕆᕝᕕᒃᓂ ᐃᓂᒃᓴᓂ ᐱᑕᖃᓕᕐᑎᑦᑎᓯᒪᔪᑦ.

NCC ᐱᕙᓪᓕᐊᔪᓕᕆᔨᒃᑯᑦ ᓕᒥᑎᑦ ᓴᓇᓂᐊᖅᑐᑦ ᐃᒃᐱᐊᕐᔪᒃᒥ ᐱᓕᕆᐊᖑᓂᐊᖅᑐᒥ, ᐅᓇᓕ ᖃᓄᐃᓕᖓᓂᐊᕐᓂᖓ ᐊᒻᒪ ᓴᓇᔭᐅᓂᖓᓂ ᐊᐅᓚᑦᑎᓂᕐᒥ ᐱᔨᑦᑎᕋᖅᑕᐅᓂᐊᖅᖢᓂ ᑳᓐᓴᓐᑐᕆᒃ ᐊᓐᔨᓂᐅᕆᖕᑯᓐᓂ, ᖃᐅᔨᓴᓱᒃᑎᐅᓂᕐᒥ ᐱᓕᕆᔨᐅᔪᑦ ᐃᖃᓗᖕᓂ.

ᑑᕐᖔᓗᒃ ᐅᖃᓚᐅᕐᑐᖅ ᐃᓱᒪᓂᕋᖅᖢᓂ ᑲᑭᕙᒃᑯᑦ ᐃᒡᓗᖁᑎᒃᓴᖓ ᐃᑲᔪᕐᓂᐊᕐᓂᖓᓂ ᓂᕿᖃᑦᑎᐊᖅᑎᑦᑎᓂᕐᒥ ᓱᕈᓯᕐᓂ ᐃᒃᐱᐊᕐᔪᒃᒥ, ᑕᕝᕙᓂᓗ ᓄᓇᖃᖅᑐᑦ 1,000-ᖏᓐᓃᓪᖢᑎᒃ, ᒪᐅᓇ ᓂᕆᑎᑦᑎᕙᒡᓗᑎᒃ ᓂᕿᑦᑎᐊᕙᖕᓂ.

ᓈᒻᒪᒃᓯᒃᐸᓪᓕ, ᐃᒃᐱᐊᕐᔪᒃ ᓱᕈᓯᓛᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᑲᒪᒋᔭᖃᕐᓂᐊᖅᑐᑦ ᐃᖅᑲᓇᐃᔭᖅᑎᑖᖅᐸᓪᓕᐊᓂᕐᒥ, ᐃᓚᖃᕐᓗᓂ ᐱᓕᕆᕝᕕᒃᒧᑦ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᒃᓴᒥᒃ, ᑑᕐᖔᓗᒃ ᐅᖃᕐᑐᖅ.

“ᖁᕕᐊᓱᒻᒪᕆᒃᑐᒍᑦ ᐅᓇ ᖃᓄᐃᓕᐅᕈᑎᒃᓴᐅᓕᕈᓐᓇᕐᓂᐊᕐᓂᖓᓂ, ᓱᕈᓯᕐᓄᑑᙱᑦᑐᑦ ᐊᒻᒪ ᐊᖓᔪᖅᑳᓄᑦ ᑭᓯᐊᓂᓕ ᓄᓇᓕᖕᓂ ᐃᖅᑲᓇᐃᔮᖃᖅᑎᑦᑎᓂᕐᓴᐅᓂᐊᖅᑐᖅ,” ᐅᖃᕐᑐᖅ.