ᐋᑎᒃ ᕗᕋᔅ ᐱᓕᕆᐊᒃᓴᑦ ᐱᒋᐊᖅᑎᑦᑎᓚᐅᕐᒪᑕ ᓯᕙᑖᕐᕕᒃᑯᑦ ᖃᖓᑕᓲᖃᓕᖅᑎᑦᑎᓪᓗᑎᒃ ᐃᖃᓗᖕᓂ ᐃᒡᓗᓕᒃᒧᑦ

ᑖᒃᑯᐊ ᑲᒻᐸᓂᐅᔪᑦ ᓯᕗᓂᐊᒍᑦ ᒪᓂᒪᑎᑦᑎᓇᓱᓚᐅᕐᓯᒪᔪᑦ ᖃᖓᑕᓲᖃᖅᑎᑦᑎᔪᒪᓪᓗᑎᒃ ᐃᖃᓗᖕᓂ ᓴᓂᑭᓗᐊᖅᒧᑦ ᑖᓐᓇ ᖃᐅᔨᓴᕈᑎᐅᓂᐊᕐᓗᓂ ᐃᑲᔫᑎᖃᖅᑎᑕᐅᓂᒃᑯᑦ ᓄᓇᕗᒥᑦ ᒐᕙᒪᒃᑯᓐᓄᑦ

ᐃᒡᓗᓕᒃᒥ ᐊᐅᓚᑕᐅᔪᖅ ᐋᑎᒃ ᕗᕋᔅ ᐱᓕᕆᐊᒃᓴᑦ ᐱᒋᐊᖅᑎᑦᑎᓚᐅᕐᒪᑕ ᐱᓇᓱᐊᕈᓯᑕᒫᑦ ᖃᖓᑕᓲᖅᑕᖃᖃᑦᑕᕐᓂᐊᓕᕐᓗᓂ ᐃᖃᓗᖕᓂ ᐃᒡᓗᓕᒃᒧᑦ ᐃᓄᖕᓄᑦ ᑲᓃᑎᐊᓐ ᓄᐊᑦ ᐊᓯᐊᒎᖔᕈᒪᔪᓄᑦ. (ᐊᔾᔨᙳᐊᖁᑎᒋᔭᐅᔪᖅ)

By ᒥᐅᕈᓪ ᔭᒫᓪ

ᓄᑖᖅ ᖃᖓᑕᓲᒃᑰᕈᑎᒃᓴᖅ ᐅᑯᓇᙵᑦ ᒪᓂᒪᔭᐅᔪᖅ ᐋᑎᒃ ᕗᕋᔅ ᐱᓕᕆᐊᒃᓴᒃᑯᓐᓄ ᖃᖓᑕᓲᒃᑰᕈᒪᔪᓄᑦ ᐃᖃᓗᖕᓂ ᐃᒡᓗᓕᒃᒧ.

ᐃᒡᓗᓕᒃᒥ ᐊᐅᓚᑕᐅᔪᖅ ᑲᒻᐸᓂ ᐱᒋᐊᖅᑎᑦᑎᓚᐅᕐᒪᑦ ᐱᓇᓱᐊᕈᓯᑕᒪᑦ ᖃᖓᑕᓲᖃᕐᕕᐅᓂᐊᖅᑐᒥ ᔭᓄᐊᕆ 14ᒥ. ᖃᖓᑕᓲᖅ 9-ᓂ ᐃᓄᖃᕈᓐᓇᖅᑐᖅ ᐊᒻᒪᓗ ᓯᕙᑖᕐᕕᒃᑰᖅᐸᒃᖢᓂ ᐅᑯᐊ ᑲᓃᑎᐊᓐ ᓄᐊᑦ — ᖃᖓᑕᓲᓂ ᑎᑭᑎᑦᑎᖃᑦᑕᖅᑐᑦ ᐱᓇᓱᐊᕈᓯᐅᑉ ᐃᓗᐊᒍᑦ — ᑕᕝᕘᓇ ᖃᖓᑕᖃᑦᑕᙱᒻᒪᑕ.

ᐅᖓᒻᒧᑐᐃᓐᓇᖅ ᖃᖓᑦᑕᐅᑎ ᐊᑭᖃᖅᑐᖅ $799, ᑖᒃᓰᔭᕈᑎᑦ ᐃᓚᐅᙱᖢᑎᒃ. ᑲᓃᑎᐊᓐ ᓄᐊᑦ ᖃᕋᓴᐅᔭᒃᑯᑦ ᓴᖅᑭᔮᒐᖓ ᐱᓇᓱᐊᕈᓯᐅᑉ ᐃᓗᐊᒍᑦ ᖃᖓᑕᓲᒃᑰᕐᓗᓂ ᐊᑭᖃᕐᑐᖅ ᒫᓂ $1,200, ᑖᒃᓰᔭᕈᑏᑦ ᐃᓚᐅᓪᓗᑎᒃ, ᑭᓯᐊᓂᓕ ᐊᑭᑭᓛᖑᔪᓐᓇᖅᖢᓂ $715 ᖃᖓᑕᔪᒪᔪᑦ ᐱᓇᓱᐊᕈᓰᒃ ᒪᕐᕉᒃ ᓯᕗᓂᐊᒍᑦ ᐃᓂᒃᓴᓕᐅᖅᓯᒪᔪᓄᑦ.

ᕋᐃᐊᓐ ᕼᐋᒐᓐ, ᓂᐅᕕᐊᒃᓴᓕᕆᔨ ᐊᒻᒪ ᐊᐅᓚᑕᐅᔪᓄᑦ ᑐᑭᒧᐊᖅᑎᑦᑎᔨ ᐋᑎᒃ ᕗᕋᔅ ᐱᓕᕆᐊᒃᓴᓄᑦ, ᐅᖃᓚᐅᕐᑐᖅ ᑐᕌᒐᖃᕐᓂᖏᓐᓂᒃ ᓄᓇᓕᖕᓂ ᐱᔨᑦᑎᕋᕈᒪᓪᓗᑎᒃ ᐃᑲᔪᖅᑕᐅᓯᒪᔪᒪᔪᓂ.

“ᖃᐅᔨᒪᒐᓗᐊᖅᑐᒍᑦ ᐱᔨᑦᑎᕋᖅᑎᑕᖄᓂᖕᓂᖓᓂᒃ ᐊᒻᒪᓗ ᖃᐅᔨᓇᓱᒃᓯᒪᓪᓗᑕ ᖃᓄᒃᑲᓐᓂᖅ ᐅᑯᐊ ᐋᑎᒃ ᕗᕋᔅ ᐱᓕᕆᐊᒃᓴᑦ (AFP) ᐃᑲᔪᖅᑐᐃᒃᑲᓐᓂᕈᓐᓇᕆᐊᒃᓴᖏᓐᓂᒃ,” ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑎᑎᕋᖅᖢᓂ ᖃᕋᓴᐅᔭᒃᑯᑦ.

“ᓯᕙᑖᕐᕕᒃᑯᑦ ᖃᖓᑕᓲᖅᑕᖃᖃᑦᑕᙱᒻᒪᑦ ᐃᒡᓗᓕᒃᒧᙵᐅᔪᒥᒃ ᑕᐃᒪᓕ ᑖᓐᓇ ᐊᑯᑦᑐᓂᐅᔪᖅ ᐊᑐᕈᒪᓕᓚᐅᕋᑦᑎᒍᑦ. ᑐᕌᒐᕗᓪᓕ ᐱᔨᑦᑎᕋᐅᑎᖃᕋᓱᒃᖢᑕ ᓄᓇᓕᖕᓂ ᐱᔭᐅᔪᒪᓯᒪᔪᒥᒃ.”

ᕼᐋᒐᓐ ᐅᖃᓚᐅᙱᑦᑐᖅ ᖃᔅᓯᑐᕋᔭᕐᒪᖔᑦ ᐋᑎᒃ ᕗᕋᔅ ᐱᓕᕆᐊᒃᓴᓄᑦ ᑖᔅᓱᒥᖓ ᐱᔨᑦᑎᕋᐅᑎᖃᕐᓗᓂ, ᑭᓯᐊᓂᓕ ᐅᖃᓚᐅᕐᑐᖅ ᐊᑭᓕᐅᑎᐅᔭᕆᐊᓕᓕᒫᓂᒃ ᑲᒪᒋᔭᖃᕐᓂᖏᓐᓂᒃ ᑖᔅᓱᒧᖓ ᐱᓕᕆᐊᕆᓇᓱᒃᑕᖓᓐᓄᑦ.

ᐅᖃᐅᓯᕆᓚᐅᕐᑕᖓ ᑖᓐᓇ ᓄᑖᖅ ᖃᖓᑕᓲᒃᑰᕈᓐᓇᕐᕈᑎ “ᓅᑉᐸᓪᓕᐊᓂᕐᒧᑦ ᖃᓄᐃᓕᐅᕈᑎᒃᓴᖅ, ᑭᓯᐊᓂᓕ ᐅᕙᑦᑎᓐᓄᑦ ᐱᒻᒪᕆᐊᓗᒃ ᐱᓇᓱᐊᒐᕆᓇᓱᒃᖢᑎᒍᑦ.”

ᕼᐋᒐᓐ ᐅᖃᓚᐅᕐᑐᖅ ᐋᑎᒃ ᕗᕋᔅ ᐱᓕᕆᐊᒃᓴᑦ ᖃᖓᑕᓲᓕᕆᓂᕐᒧᑦ ᐱᓕᕆᖃᑎᖓᓂᒃ ᑭᓱᖃᖅᑎᑦᑎᓂᐊᕐᓂᕋᖅᖢᑎᒃ ᐅᑯᓂᖓ ᑯᐸᐃᒃᒥ ᐱᓕᕆᐊᖑᔪᖅ ᐸᓄᕋᒪ ᖃᖓᑕᓲᑦ (Panorama Aviation), ᐊᐅᓚᑦᑎᓂᐊᕐᓗᑎᒃ ᑖᔅᓱᒥᖓ.

ᑖᒃᑯᐊᒃ ᒪᕐᕉᒃ ᑲᑐᔾᔨᖃᑎᒌᒃ ᓯᕗᓂᐊᒍᑦ ᐱᓕᕆᖃᑎᒌᓚᐅᕐᓯᒪᔫᒃ ᖃᖓᑕᓲᓕᕆᓂᕐᒥᒃ ᐃᖃᓗᖕᓂ ᓴᓂᑭᓗᐊᕐᒧᑦ 2021-ᖑᑎᓪᓗᒍ. ᑖᓐᓇ ᖃᖓᑕᓲᖅ ᐊᑐᖁᔭᐅᓚᐅᕐᓯᒪᔪᖅ ᒪᓂᓴᐅᑎᓕᐅᕐᐸᒡᓗᑎᒃ ᐊᒻᒪ ᖃᖓᑦᑕᐅᑎᑖᖅᑎᑦᑎᔨᐅᓗᑎ ᑕᒪᐃᓐᓄᑦ ᓄᓇᕗᒥᑦ ᒐᕙᒪᒃᑯᓐᓂᒃ ᐊᒻᒪ ᑭᒃᑯᑐᐃᓐᓇᕐᓂᒃ.

ᐋᑎᒃ ᕗᕋᔅ ᐱᓕᕆᐊᒃᓴᑦ ᐱᓕᕆᐊᖃᖃᑦᑕᕐᑐᑦ ᖃᕋᓴᐅᔭᒃᑯᑦ ᓂᕿᓂᒃ ᑎᑭᓴᐃᕝᕕᐅᕙᒃᖢᑎᒃ, ᐊᒻᒪᓗ ᐃᒡᓗᓕᐅᒐᒃᓴᓂᒃ, ᓄᑖᙳᕆᐊᖅᑎᑦᑎᓂᕐᒥᒃ ᐊᒻᒪ ᖃᖓᑕᓲᓂᒃ ᖃᐅᔨᓇᓱᒡᕕᐅᔪᓐᓇᖅᖢᑎᒃ. ᐊᐱᕆᔭᐅᑎᓪᓗᒋ ᖃᓄᖅ ᐊᑯᓂᐅᑎᒋᔪᖅ ᑖᔅᓱᒥᖓ ᖃᖓᑕᓲᓕᕆᓂᕐᒥᒃ ᒪᓂᒻᒪᐃᓯᒪᓂᐊᕆᐊᒃᓴᖏᓐᓂᒃ, ᕼᐋᒐᓐ ᐅᖃᓚᐅᕐᑐᖅ “ᑐᕌᒐᖃᕐᑐᒍᑦ ᐊᑐᕈᒪᔪᑦ ᐅᓄᕐᓂᕐᓴᐅᓕᖅᐸᑕ ᖃᖓᑕᓲᒃᑰᖅᑎᑦᑎᕙᖕᓂᖅ ᐅᓄᕐᓯᕚᓪᓕᖅᑎᑕᐅᓗᓂ.”

“ᑐᕌᒐᕗᓪᓕ  ᓄᓇᓕᖕᓂ ᐃᑲᔪᕈᑎᓕᐅᒃᑲᓐᓂᕈᒪᓪᓗᑕ,” ᐅᖃᕐᑐᖅ. “ᒫᓐᓇᐅᔪᕐᓕ ᐱᓇᓱᐊᒐᖃᖅᑐᒍᑦ ᑕᒪᓐᓇ ᐃᖏᕐᕋᑦᑎᐊᖅᑎᓐᓇᓱᒡᓗᒍ ᐊᒻᒪᓗ ᓯᕗᓂᑦᑎᓐᓂ ᖃᓄᐃᓐᓂᐊᕆᐊᒃᓴᖓ ᐅᑕᕿᓗᒍ.”

Share This Story

(0) Comments

Join the Conversation

Your email address will not be published. Required fields are marked *

*