ᐊᕐᕕᐊᑦ ᐃᓂᒃᓴᓕᐅᕐᑎᑦᑎᔪᑦ ᓯᒡᔭᕐᐸᓯᖕᒥ ᐆᒧᖓ ᐃᓄᐃᑦ ᓄᓇᖓᑦ ᓯᓚᑦᑐᖅᓴᕐᕕᐊᓗᒃᒧᑦ

For the English version of this story, please see Arviat sets aside waterfront site for Inuit Nunangat University.

ᐃᓕᓐᓂᐊᕐᕕᒃᒥ ᐃᖅᑲᓇᐃᔭᑎᐅᔪᑦ ᐃᓕᓐᓂᐊᖅᑏᓪᓗ ᐅᕙᓂ ᐃᓄᐃᑦ ᓄᓇᖓᑦ ᓯᓚᑦᑐᖅᓴᕐᕕᐊᓗᒃᒥ ᓂᕆᐅᒍᓐᓇᖅᑐᑦ ᑕᓯᐅᔭᕐᔪᐊᕐᒥ ᕿᒥᕐᕈᐊᕈᓐᓇᑦᑎᐊᕐᓗᑎ ᓯᒡᔭᖅᐸᓯᖕᒥᑦ ᐊᕐᕕᐊᓂᑦ ᐃᓂᒃᓴᕆᑎᑕᐅᔪᒥᒃ ᑖᒃᑯᐊ ᑐᓂᓯᓚᐅᙱᑎᓪᓗᒋᑦ ᑐᒃᓯᕋᐅᑎᓕᐊᕆᔭᖏᓐᓂᑦ ᓯᓚᑦᑐᖅᓴᕐᕕᐊᓗᒃᒧᑦ ᐃᓂᒋᔭᐅᔪᒪᓂᖏᓐᓄᑦ, ᒪᐃᔭ ᔫ ᓴᕕᑲᑖᖅ ᓄᑲᖅᖠᖅ ᐅᖃᓚᐅᕐᑐᖅ.

“ᖁᕕᐊᓱᕈᓘᔭᑲᑕᖕᒪᑦ [ᐊᕐᕕᐊᓂᑦ] ᐊᒻᒪᓗ ᐅᓇ ᐱᓕᕆᐊᒃᓴᖅ ᐊᒻᒪ ᑐᒃᓯᕋᐅᑎᓕᐊᖑᔪᖅ ᐊᑕᐅᓯᕐᒧᑦ ᐃᓄᖕᒧᑦ ᑲᒻᐸᓂᒧᓪᓘᓐᓃᑦ ᐱᓕᕆᐊᖑᓯᒪᙱᑦᑐᖅ, ᓴᕕᑲᑖᖅ ᐅᖃᕐᑐᖅ. “ᐱᓕᕆᖃᑎᒌᒃᑐᓄᑦ ᐱᓕᕆᐊᖓᓚᐅᕐᑐᖅ ᐊᒻᒪ ᐊᓂᒍᑦᑎᐊᖅᖢᓂ.”

ᕼᐋᒻᒪᓚᒃᑯᑦ ᑲᑎᒪᔨᖏᑦ ᓴᓂᕐᕙᐃᓚᐅᕐᑐᖅ ᒫᓂ 107,000 ᑭᑉᐹᕆᒃᑐᓂ ᕗᑦᓂ (10,000 ᑭᑉᐹᕆᒃᑎᓯᒪᔪᓂ ᒦᑕᓂ) ᓄᓇᒥ — ᐊᖏᓂᖃᓪᓗᐊᕐᑐᖅ 6-ᓂ ᕼᐋᑭᕐᕕᐅᕙᒃᑐᓂ ᑲᓇᑕᒥ — ᒫᓂ ᐊᕐᕕᐊᑦ ᑲᓇᖕᓇᖓᓂ ᐃᓄᖕᓄᑦ ᐊᐅᓚᑕᐅᓂᐊᖅᑐᒥ ᓯᓚᑦᑐᖅᓴᕐᕕᐊᓗᒃᒧᑦ ᐃᓂᒋᔭᐅᓂᐊᖅᑐᒥ, ᑕᐃᒪᓐᓇᓗ ᓄᓇᓖᑦ ᐊᑐᖁᔭᐅᓯᒪᔪᓂ ᒪᓕᒃᓯᒪᔪᓂ ᓯᓚᑦᑐᖅᓴᕐᕕᐊᓗᒃᒧᑦ ᐃᓕᓐᓂᐊᕐᕕᒃᓴᐅᓂᐊᖅᑐᒧᑦ.

ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᕆᔭᐅᔪᖅ ᓇᐃᑕᓐ ᐅᐱᐊᑦ ᑐᓴᖅᑎᑦᑎᔾᔪᑎᖃᓚᐅᕐᑐᖅ ᕕᕝᕗᐊᕆ 11-ᒥ ᐅᓇ ᐊᕐᕕᐊᑦ ᓂᕈᐊᕆᔭᐅᓂᖓᓂ ᓯᓚᑦᑐᖅᓴᕐᕕᐊᓗᒃᒧᑦ ᐃᓕᓐᓂᐊᕐᕕᖃᕐᓂᐊᕐᓂᖓᓂ ᓂᕈᐊᒐᒃᓴᖃᖅᖢᓂ 7-ᓂ ᐊᓯᖏᓐᓂ ᓄᓇᓕᖕᓂ. ᐅᓇ ᐃᓕᓐᓂᐊᕐᕕᒃᓴᖅ ᒪᑐᐃᕐᓂᐊᕋᓱᒋᔭᐅᔪᖅ 2030-ᒥ.

ᐃᓕᓐᓂᐊᕐᕕᒃᓴᖅ ᐃᓂᖃᕆᐊᖃᕐᒪᑦ 26,900 ᑭᑉᐹᕆᒃᑎᓯᒪᔪᓂᒃ ᕘᑦᓄ ᐃᒡᓗᕐᔪᐊᒃᓴᒥ ᐃᓚᖃᕐᓗᓂ 21,500-ᓂ ᑭᑉᐹᕆᒃᑎᓯᒪᔪᓂ ᕗᑦᓂ ᓯᓂᒃᑕᕐᕕᒋᔭᐅᖃᑦᑕᕐᓂᐊᖅᑐᓂᒃ, ᐃᓄᐃᑦ ᑕᐱᕇᑦ ᑲᓇᑕᒥ ᐅᖃᓚᐅᕐᑐᑦ ᕕᕝᕗᐊᕆ 2025-ᒥ ᑐᓴᒐᒃᓴᓕᐅᖅᖢᑎᒃ. ᓴᓇᔭᐅᓕᕐᕕᒃᓴᖓ ᐅᖃᐅᓯᐅᓚᐅᙱᑦᑐᖅ ᓱᓕ.

ᓴᕕᑲᑖᖅ ᐅᖃᓚᐅᕐᑐᖅ ᑭᖑᓪᓕᕐᒥ ᖃᓄᐃᓕᐅᕈᑎᐅᓂᐊᕐᑐᖅ ᐅᑯᓄᖓ ᐃᓄᐃᑦ ᑕᐱᕇᑦ ᑲᓇᑕᒥ ᓄᓇᒥ ᐊᑐᕈᑎᒃᓴᓕᐅᕐᓗᑎᒃ ᓴᓇᓕᓚᐅᙱᓐᓂᖏᓐᓂᒃ.

“ᐃᒪᓐᓇᐅᒍᓪᓗᓂ, ᒫᓂ ᐊᕐᕌᒍᓂ 25-ᓂ 30-ᓄ ᓄᓇᒥ ᐊᑐᖅᑐᐊᕈᑎᓕᐅᖅᐸᒃᖢᑎᒃ, ᑭᓯᐊᓂᓕ ᐊᑯᓂᐅᓂᕐᓴᐅᔪᓐᓇᕐᒥᔪᖅ ᐅᕘᓇ [ᓄᓇᕗᑦ] ᓄᓇᒧᑦ ᒪᓕᒐᖏᑦᑎᒍᑦ,” ᐅᖃᕐᑐᖅ.

ᐃᓕᓐᓂᐊᕐᕕᒃᓴᒧᑦ ᐃᓂᒋᔭᐅᔪᒪᔪᖅ ᐃᓄᖕᓄᑦ ᐃᒡᓗᖃᕐᕕᒋᔭᐅᔪᓄᑦ ᖃᓂᒋᔭᖓᓃᑦᑐᖅ. ᓴᕕᑲᑖᖅ ᐅᖃᓚᐅᕐᑐᖅ ᕼᐋᒻᒪᓚᒃᑯᑦ ᐃᓂᒃᓴᖃᑦᑎᐊᕋᓗᐊᕐᒪᖔᑦ ᖃᐅᔨᓴᓚᐅᕐᓂᕋᖅᑕᖏᑦ ᑕᒪᐃᓐᓄᑦ ᐃᓕᓐᓂᐊᕐᕕᒃᓴᓄᑦ ᐊᒻᒪ ᐃᓕᓐᓂᐊᖅᑐᑦ ᐊᖏᕐᕋᒃᓴᖏᓐᓄᑦ.

ᐃᒡᓗᓄᑦ ᐃᓂᒃᓴᕆᔭᐅᓂᐊᖅᑐᓂ ᐋᖅᑭᒃᓯᒪᕙᒌᕐᑎᑦᑎᓯᒪᓂᖏᓐᓄᑦ ᐊᕐᕕᐊᑦ ᑐᒃᓯᕋᐅᑎᖏᑦ ᓂᕈᐊᕆᔭᐅᓚᐅᕐᑐᑦ.

“ᐊᕐᕌᒍᓂ ᐊᓂᒍᓵᕐᓯᒪᔪᓂ ᓄᑖᙳᕆᐊᖅᑎᑦᑎᓚᐅᕐᓯᒪᒐᒃᑕ ᐃᒪᖃᕐᕕᒋᓂᐊᖅᑕᑦᑎᓐᓂ, ᓄᑖᖑᓪᓗᓂ ᐃᒥᕐᑕᕐᕕᐅᓂᐊᕐᑐᖅ,” ᓴᕕᑲᑖᖅ ᐅᖃᕐᑐᖅ.

ᐊᓯᖏᑦ ᐱᓕᕆᐊᒃᓴᐃᑦ ᐸᕐᓇᒃᑕᐅᓯᒪᔪᑦ ᐃᓚᖃᕐᑐᑦ ᓄᑖᒥ ᖃᖓᑕᓲᒃᑯᑦ ᐊᐅᓪᓚᕐᓂᐊᖅᑐᓄᑦ ᐱᓕᕆᕝᕕᐅᓂᐊᖅᑐᒥ ᐊᒻᒪ ᐆᒻᒪᖅᑯᑎᓕᕆᕝᕕᐅᓂᐊᖅᑐᒥ ᑭᓯᐊᓂᓕ ᐅᖃᕐᓯᒪᙱᑦᑐᑦ ᖃᑯᒍ ᓴᓇᔭᐅᓕᕐᓂᐊᕐᓂᖏᓐᓂ.

$70 ᒥᓕᐊᓐ ᑖᓚᑐᕐᑐᒥᑦ ᐃᒡᓗᓕᕆᕝᕕᒃᓴᒥ ᐊᕐᕕᐊᓂ ᓴᓇᔭᐅᔪᖃᓕᕐᓂᐊᕐᑐᖅ ᐋᒐᓯᐅᓕᕐᐸᑦ, ᐅᖃᕐᒥᔪᖅ. ᓴᓇᔭᐅᓂᐊᖅᖢᓂ ᓴᒃᑰᑉ ᐱᕈᐃᔭᖏᓐᓂ ᐊᐅᓚᑦᑎᔨᓄᑦ, ᓇᖕᒥᓂᕆᔭᐅᔪᖅ ᐱᓕᕆᕝᕕᓕᕆᕝᕕᒃ ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᓄᑦ ᐊᒻᒪ ᐅᑯᓄᖓ RG Solution, ᑯᐸᐃᒃᒥ ᐃᒡᓗᒃᓴᓕᕆᔨᒃᑯᓐᓄᑦ.

ᓴᕕᑲᑖᖅ ᐅᖃᓚᐅᕐᑐᖅ ᓄᓇᐃᑦ ᐊᑐᐃᓐᓇᐅᔪᑦ, ᐃᒡᓗᓕᐅᕐᕕᒃᓴᓪᓗ ᐊᒻᒪ ᐃᓕᖅᑯᓯᓕᕆᓂᕐᒨᖓᔪᑦ ᑐᒃᓯᕋᐅᑎᒋᔭᐅᔪᓂ ᓴᖅᑭᔮᕈᑎᒻᒪᕆᐅᓚᐅᕐᑐᑦ.

“ᐅᓇ ᑐᒃᓯᕋᐅᑎᓕᐊᕆᔭᕗᑦ ᐊᓂᒍᑎᐊᓚᐅᕐᑐᖅ ᒫᓐᓇ ᖃᓄᐃᓕᐅᕈᑎᐅᕙᓪᓕᐊᔪᓄᑦ ᐅᕝᕙᓘᓐᓃᑦ ᐊᑐᖅᑕᐅᓂᐊᖅᑐᓄᑦ,” ᐅᖃᕐᑐᖅ.

ᓴᕕᑲᑖᖅ ᐅᖃᓚᐅᕐᑐᖅ ᐊᕐᕕᐊᓂ ᐃᒪᖓᑦ, ᑯᕕᕐᑕᕐᕕᖓ ᐊᒻᒪ ᐊᒃᑕᕐᕕᒃᒧᑦ ᐊᐅᓚᑕᐅᔾᔪᑏᑦ ᓈᒻᒪᖕᓂᖏᓐᓂ ᐃᓕᓐᓂᐊᕐᕕᐊᓗᒃᒥ ᓴᓇᓂᐊᖅᐸᑕ. ᕼᐋᒻᒪᓚᒃᑯᑦ ᐃᓄᖃᕐᑐᑦ ᒫᓂ 3,000-ᓂ ᐃᓄᖕᓂ.

ᑖᓐᓇ ᓂᕈᐊᕐᑕᐅᔾᔪᑎᐅᓚᐅᕐᒥᔪᖅ ᐃᓄᒃᑎᑐᑦ ᐅᖃᓪᓚᑲᑕᖃᑦᑕᕐᓂᕐᓴᐅᓂᖏᓐᓄᑦ.

“ᑐᑭᖃᕐᓂᕐᓴᐅᒻᒪᑦ ᓯᓚᑦᑐᖅᓴᕐᕕᐊᓗᒃᑕᖃᕐᐸᑦ ᐃᓄᒃᑎᑐᑦ ᐅᖃᐅᓯᕐᒥ ᐊᑐᖃᑦᑕᖅᑐᓂ,” ᓴᕕᑲᑖᖅ ᐅᖃᕐᑐᖅ.

ᕼᐋᒻᒪᓚᒃᑯᑦ ᑲᑎᒪᔨᖏᑦ ᐊᒻᒪ ᐱᓕᕆᖃᑎᒋᔭᐅᔪᑦ ᑲᑐᔾᔨᖃᑎᒌ ᐅᑯᐊ ᓄᐊᑕᓐ ᕕᐅᑦᓱᔅ ᐸᕐᓇᐅᓯᐅᕐᑎᑦ ᐱᓕᕆᑦᑎᐊᒻᒪᕆᓚᐅᕐᓂᖏᓐᓂ ᐃᑲᔪᖅᖢᑎᒃ ᑐᒃᓯᕋᐅᑎᓕᐅᕐᓂᕐᒥᒃ.

ᓴᕕᑲᑖᖅ ᐅᖃᓚᐅᕐᑐᖅ ᐃᓄᐃᑦ ᑕᐱᕇᑦ ᑲᓇᑕᒥ ᖃᓄᐃᓕᖓᓂᐊᕐᓂᖓᓂ ᐱᓕᕆᐊᖃᒻᒪᕆᓚᐅᕐᓂᖏᓐᓂ, ᓴᓇᔭᐅᓂᖓᓗ ᖃᓄ ᐊᑯᓂᐅᓂᐊᕐᓂᖓᓂᒃ ᐊᒻᒪᓗ ᐃᑲᔫᑎᒃᓴᑎᒍᑦ.

“ᑲᒪᒋᔭᖃᓚᐅᕋᑦ ᐃᒡᓗᖃᕐᕕᒃᓴᑦᑎᐊᕙᐅᓇᔭᕐᑐᓂᒃ, ᐱᔨᑦᑎᕋᕈᑎᐅᕙᒃᑐᓂᒃ ᐆᒧᖓ ᐃᓄᒋᐊᒃᐹᓪᕋᔭᕐᓂᖏ ᑕᒪᒃᑯᐊᓗ ᐊᑐᐃᓐᓇᐅᔪᓐᓇᕐᓗᑎᒃ,” ᐅᖃᕐᑐᖅ.

ᐅᓇ ᐃᓄᐃᑦ ᓄᓇᖓᑦ ᓯᓚᑦᑐᖅᓴᕐᕕᐊᓗ 100-ᓂ ᐃᓕᓐᓂᐊᖅᑎᖃᕈᓐᓇᕐᓂᐊᖅᑐᖅ ᐃᓚᖃᕐᓗᑎᒃ 80-ᓂ ᐃᓕᓴᐃᔨᒃᓴᓂ ᐊᒻᒪ ᐃᖅᑲᓇᐃᔭᖅᑎᐅᓂᐊᖅᑐᓂᒃ.

ᐃᓚᒋᓗᒍ ᐅᐸᓯᓯᒪᓂᒃᑯᑦ ᐃᓕᓐᓂᐊᖅᑎᑦᑎᖃᑦᑕᕐᓂᕐᒥ ᐊᕐᕕᐊᓂ ᐅᓇ ᓯᓚᑦᑐᖅᓴᕐᕕᐊᓗᒃ ᖃᕋᓴᐅᔭᒃᑯᑦ ᐃᓕᓐᓂᐊᕈᑎᖃᕐᓂᐊᕐᒥᔪᑦ ᐃᓕᓴᐃᕙᒡᓗᑎᒡᓗ ᒪᑯᓄᖓ ᒥᑭᓐᓂᕐᓴᓄᑦ ᐃᓕᓐᓂᐊᕕᐅᖃᑦᑕᖅᑐᓄᑦ.