ᐊᕐᕕᐊᕐᒥᐅᑕᑦ ᐅᔾᔨᖅᓱᖁᔭᐅᓚᐅᕐᑐᑦ ᑎᕆᒐᓂᐊᕐᔪᒃᒥᑦ ᖃᐅᔨᓴᖅᑕᐅᔪᖃᓚᐅᖅᑎᓪᓗᒍ ᐱᓪᖤᙱᓴᕐᓂᕋᖅᑕᐅᓪᓗᓂᓗ

For English version, see Arviat residents warned after fox tests positive for rabies

ᐊᕐᕕᐊᕐᒥᐅᑕᑦ ᐅᔾᔨᖅᓱᕆᐊᖃᖅᑐᑦ ᑎᕆᒐᓂᐊᕐᔪᒃᒥ ᐊᑕᐅᓯᖅ ᖃᐅᔨᓴᖅᑕᐅᓚᐅᖅᑎᓪᓗᒍ ᐊᒻᒪ ᐱᓪᖤᙱᓴᕐᓂᕋᖅᑕᐅᓪᓗᓂ, ᐅᖃᕐᑐᑦ ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ.

ᑎᕆᒐᓂᐊᕐᔪᒃᒥ ᕿᒻᒥᒥ ᐹᔪᖃᓚᐅᕐᓯᒪᖕᒪᑦ ᐊᐃᕆᓕ 3ᒥ ᐊᒻᒪᓗ ᐃᓱᒪᒋᔭᐅᓪᓗᓂ ᐱᓪᖤᙱᓴᕆᐊᒃᓴᖓᓂ ᐊᒻᒪᓗ ᖃᐅᔨᓴᖅᑕᐅᒐᒥ ᐱᓪᖤᙱᓴᕐᓂᕋᖅᑕᐅᓚᐅᕐᑐᖅ, ᑐᓴᒐᒃᓴᓕᐊᕆᔭᐅᔪᑦ ᐊᐃᕆᓕ 26ᒥ ᐅᖃᕐᓯᒪᓚᐅᕐᑐᖅ.

ᕿᒻᒥᖅ ᐹᔭᐅᓂᑯ ᐃᓄᑑᑎᑕᐅᑲᑕᓕᓚᐅᖅᑐᖅ ᑭᓯᐊᓂᓕ ᑐᖁᑎᑕᐅᔭᕆᐊᖃᕐᓂᐊᖅᑐᖅ.

“ᑮᔭᐅᓐᓂᕈᕕᑦ ᕿᓱᒃᑕᐅᓐᓂᕈᕕᓪᓘᓐᓃᑦ ᑎᕆᒐᓂᐊᖅᔪᒃᒧᑦ ᐅᕝᕙᓘᓐᓃᑦ ᕿᒻᒥᒧᑦ, ᐋᓐᓂᐊᕕᓕᐊᕆᖃᕋᔭᖅᑐᓯ ᐊᒻᒪᓗ ᖃᓄᐃᑕᐅᓃᑦ ᐅᖃᐅᓯᕆᑲᐅᑎᒋᓗᒍ,” ᑐᓴᒐᒃᓴᐃᑦ ᐅᖃᕐᓯᒪᓚᐅᕐᒥᔪᑦ.

“ᑲᒪᒋᔭᐅᑲᐅᑎᒋᔭᕆᐊᖃᖅᑐᑦ ᖃᓄᐃᓕᔭᐅᓂᑯᐃᑦ ᓲᖃᐃᒻᒪ ᐱᓪᖤᙱᓴᖅᑐᒧᑦ ᐊᐃᑦᑐᕐᓗᒃᑕᐅᓪᓗᓂ ᑐᖁᓐᓇᐃᓐᓇᐅᔭᐸᓗᖕᒪᑦ.”

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᓚᐅᕐᒥᔪᑦ ᑎᒍᐊᕆᔭᐅᔪᑦ ᕿᒻᒦᑦ ᐃᐱᖅᑕᐅᓯᒪᓪᓗᑎ ᓯᓚᒥ ᖃᐅᔨᔭᐅᒋᐊᖃᑦᑕᖁᔭᐅᓪᓗᑎᒃ ᖃᓄᐃᓕᐅᕐᓂᖓ ᐊᔾᔨᐅᔪᓐᓃᕋᔭᕐᒪᖔᑕ ᐃᕐᓯᓵᑲᑕᒡᓗᑎᒡᓘᓐᓃᑦ, ᐊᒻᒪᓗ ᓄᕚᕿᑲᑕᒋᐊᒃᓴᖏᓐᓂ, ᑐᐱᓯᒪᖅᑰᔨᖕᒪᖔᑕ ᐅᕝᕙᓘᓐᓃᑦ ᓂᓪᓕᐊᕈᓘᔭᑲᑕᒋᐊᒃᓴᖏᓐᓂᒃ.

ᑎᕆᒐᓂᐊᕐᔪᐃᑦ ᐊᒪᕈᐃᓪᓘᓐᓃᑦ ᓄᓇᓕᖕᓃᑲᑕᒃᑐᑦ ᐅᕝᕙᓘᓐᓃᑦ ᐱᓪᖤᙱᓴᖅᑰᔨᔪᑦ ᐆᒪᔪᕐᓂᐊᖅᑎᒧᑦ ᐅᖃᐅᓯᐅᑲᐅᑎᒋᔭᕆᐊᖃᖅᑐᑦ.

ᐅᓇ ᓄᓇᕗᒥᑦ ᒐᕙᒪᒃᑯᑦ ᐱᓪᖤᙱᓴᖅᑐᒥ ᐅᓂᒃᑳᓕᐊᕕᓂᖓ, ᑭᖑᓪᓕᖅᐹᒥ ᒪᐃ 2023ᒥ ᑕᐃᒪᓐᓇ ᐅᖃᐅᓯᖃᓚᐅᕐᓯᒪᓪᓗᑎᒃ.

ᓯᕗᓂᐊᓂᓪᓕ ᐅᑭᐅᒃᑯᑦ ᐊᒻᒪ ᐅᐱᕐᖔᒃᑯᑦ, ᕿᒻᒦᑦ ᐊᒻᒪ ᑎᕆᒐᓂᐊᕐᔪᐃᑦ ᐱᓪᖤᙱᓴᖅᑐᑦ ᑐᓴᖅᑕᐅᒐᔪᓚᐅᕐᓯᒪᔪᑦ.

ᔮᓐ ᓃᓕ, ᑐᑭᒧᐊᖅᑎᑦᑎᔨᒋᔭᐅᑲᐃᓐᓇᖅᑐᖅ ᐆᒪᔪᓕᕆᔨᒃᑯᓐᓄᑦ ᐊᕙᑎᓕᕆᔨᒃᑯᓐᓂ, ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑕᖅᑭᐅᓚᐅᖅᑐᒥ ᐅᓄᙱᓐᓂᕐᓴᐃᑦ ᐅᖃᐅᓯᐅᓯᒪᓚᐅᕐᓂᖏᓐᓂᒃ ᐱᓪᖤᙱᓴᕐᓂᕋᖅᑕᐅᓂᑯᑦ ᑕᒪᑐᒪᓂ ᐊᕐᕌᒍᒥ.