ᐋᓐᓂᖅᓯᕆᓂᕐᒧᑦ ᐃᖅᑲᖅᑐᖅᑕᐅᔾᔪᑎᒃᓴᒥ ᓄᖅᑲᖅᑎᑕᐅᑲᐃᓐᓇᖅᐳᖅ ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓᓄᑦ ᑑᙶᓗᖕᒧᑦ

For English version, see Assault charge stayed against NTI president Tunraluk

ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᔨᐊᕋᒥ ᑑᙶᓘᑉ ᐋᓐᓂᖅᓯᕆᓂᕐᒧᑦ ᐃᖅᑲᖅᑐᖅᑕᐅᔾᔪᑎᒃᓴᒥ ᓄᖅᑲᖅᑎᑕᐅᑲᐃᓐᓇᖅᐳᖅ.

“ᑭᒡᒐᖅᑐᐃᔨᖏᑦ ᑐᕌᖅᑎᑦᑎᕗᖅ ᓄᖅᑲᖅᑎᑕᐅᑲᐃᓐᓇᕐᓂᐅᔪᒥ ᐃᖅᑲᖅᑐᐃᓂᕐᒥ,” ᐅᖃᓚᐅᖅᐳᖅ ᑭᒡᒐᖅᑐᐃᔨᖏᑦ ᐃᖅᑲᖅᑐᐃᔨᒧᑦ ᓯᑕᕙᓂ ᐳᐊᐃᑎᐅᓪᒧᑦ ᐃᖃᓗᖕᓂ ᐃᖅᑲᖅᑐᐃᕕᖓᓂ ᔭᓄᐊᕆ 15−ᒥ.

“ᑭᒡᒐᖅᑐᐃᔨᖏᑦ ᐅᖃᖃᑎᖃᖅᓯᒪᕗᖅ ᐃᖅᑲᖅᑐᖅᑕᐅᑎᑦᑎᔪᒧᑦ,” ᐃᓚᒋᐊᖅᓯᓚᐅᖅᐳᖅ.

ᓄᖅᑲᖅᑎᑕᐅᑲᐃᓐᓇᕐᓂᐅᔪᒥ ᐃᖅᑲᖅᑐᐃᓂᕐᒥ ᑐᑭᖃᖅᐳᖅ ᓄᖅᑲᖅᑎᑦᑎᓚᐅᑲᖕᓂᐅᔪᒥ ᐱᕋᔭᖕᓂᕐᒧᑦ ᐃᖅᑲᖅᑐᐃᓂᕐᒥ, ᑭᓯᐊᓂ ᐃᖅᑲᖅᑐᖅᑕᐅᔪᓐᓃᖅᑎᑕᐅᙱᓐᓂᐅᔪᒥ ᐃᖅᑲᖅᑐᖅᑕᐅᔾᔪᑎᒃᓴᒥ. ᑭᒡᒐᖅᑐᐃᔨᖓ ᐱᒋᐊᒃᑲᓐᓂᕈᓐᓇᖅᐳᖅ ᐃᖅᑲᖅᑐᐃᓂᕐᒥ ᐊᕐᕌᒎᑉ ᐃᓗᐊᓂ ᐃᓕᓯᓚᐅᕐᓂᖓᓂ ᓄᖅᑲᖅᑎᑕᐅᑲᐃᓐᓇᕐᓂᐅᔪᒥ.

ᑑᙶᓗᒃ ᐃᖅᑲᖅᑐᐃᕕᖕᒦᓚᐅᙱᓚᖅ ᑭᒡᒐᖅᑐᐃᔨᖏᑕ ᐃᓱᒪᓕᐊᖓᓂ. ᑭᒡᒐᖅᑐᐃᔨ ᕕᒃᑐᐊᕆᐊ ᐱᐊᕆ ᓴᖅᑭᓚᐅᖅᐳᖅ ᑕᓚᕖᓴᒃᑯᑦ ᑲᑎᒪᓂᐅᔪᒥ ᑭᒡᒐᖅᑐᐃᓪᓗᓂ.

ᐃᖃᓗᖕᓂ ᑲᓇᑕᒥ ᐸᓖᓯᒃᑯᑦ ᑎᒍᓯᓚᐅᖅᐳᑦ ᑑᙶᓗᖕᒥ ᐊᑕᐅᓯᐅᔪᒥ ᖃᓄᐃᓐᓂᐅᔪᒥ ᐋᓐᓂᖅᓯᕆᓂᕐᒥ ᓱᒋᐅᑎᖃᖅᖢᓂ ᐅᕝᕙᓘᓐᓃᑦ ᑎᒥᒧᑦ ᓱᔪᐃᓂᖃᖅᑎᑦᑎᓪᓗᓂ ᑎᓯᐱᕆ 3−ᒥ. ᐃᖅᑲᖅᑐᒐᒃᓴᙳᓚᐅᖅᐳᖅ ᐅᕘᓇ ᐃᓚᖓᓐᓂ 267(c) ᐱᕋᔭᒃᑐᓄᑦ ᒪᓕᒐᖓᓐᓂ, ᐱᕋᔭᐅᑕᐅᔪᒥ ᕿᒥᓴᐃᓂᕐᒥ, ᐃᐱᑎᑦᑎᓂᕐᒥ ᐅᕝᕙᓘᓐᓃᑦ ᕿᒥᑦᑎᓂᕐᒥ ᑭᓇᑐᐃᓐᓇᒥᑦ.

ᑭᖑᓂᑦᑎᐊᖓᒍᑦ, ᐊᑭᓕᖅᓱᖅᑕᐅᙱᑦᑐᒥ ᓄᖅᑲᖓᓂᖃᓕᓚᐅᖅᐳᖅ ᐊᑐᕐᓂᖃᐅᑎᖓᓐᓂ ᓄᓇᕗᒻᒥ ᑐᙵᕕᒃᑯᓐᓂᑦ.

ᑑᙶᓗᒃ ᓯᕗᓪᓕᖅᐹᒥᒃ ᓴᖅᑭᓐᓂᖃᕆᐊᖃᓚᐅᖅᐳᖅ ᐃᖅᑲᖅᑐᒐᒃᓴᒧᑦ ᔭᓄᐊᕆ 15−ᒥ.

“ᐹᓪ ᐃᕐᙵᐅᑦ ᐱᔨᑦᑎᕋᐃᓐᓇᖅᐳᖅ ᐊᖓᔪᖅᑳᖑᓚᐅᑲᖕᓂᐅᔪᒥ ᓄᓇᕗᒻᒥ ᑐᙵᕕᒃᑯᓐᓂ ᒥᔅᑐᕐ ᑑᙶᓗᒃ ᐊᑭᓕᖅᓱᖅᑕᐅᙱᑦᑐᒥ ᓄᖅᑲᖓᓚᐅᑲᖕᓂᐅᔪᒥ,” ᐅᖃᓚᐅᖅᐳᖅ ᐃᕙᓗᐊᕐᔪᒃ ᒥᐊᕆᑦ, ᓄᓇᕗᒻᒥ ᑐᙵᕕᒃᑯᑦ ᐋᔩᖃᑎᒌᖕᓂᕐᒧᑦ ᑐᑭᒧᐊᒃᑎᑦᑎᔨᖓ, ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᔭᓄᐊᕆ 15−ᒥ.

ᓄᓇᕗᒻᒥ ᑐᙵᕕᒃᑯᑦ ᐅᖃᐅᓯᒃᓴᓕᐅᖅᓯᒪᙱᓚᑦ ᖄᒃᑲᓐᓂᐊᒍᑦ ᓯᕗᓕᐅᖅᑎᐅᓂᕐᒥ ᐊᓯᔾᔨᕐᓂᐅᔪᓂ ᑕᐃᒪᙵᓂ ᑎᓯᐱᕆᒥ.

ᐱᐊᕆ ᑕᐃᓯᓚᐅᖅᐳᖅ ᑭᒡᒐᖅᑐᐃᔨᖏᑦᑕ ᓄᖅᑲᖅᑎᑕᐅᑲᐃᓐᓇᕐᓂᐅᔪᒥ ᐃᖅᑲᖅᑐᐃᓂᕐᒥ “ᓈᒻᒪᒃᑐᒥ ᖃᓄᐃᓕᖓᓂᐅᔪᒥ.”

“ᒥᔅᑐᕐ ᑑᙶᓗᒃ ᐋᖅᑭᐅᒪᑎᑦᑎᓇᓱᐊᓚᐅᖅᐳᖅ ᐱᕋᔭᒃᓯᒪᙱᓐᓂᖓᓂ ᐆᒧᖓ ᐱᓕᕆᐊᖑᓂᐅᔪᒥ. ᑭᓯᐊᓂ, ᑭᒡᒐᖅᑐᐃᔨᖓ ᓄᖅᑲᖅᑎᑕᐅᑲᐃᓐᓇᖅᑎᑦᑎᓚᐅᖅᐳᖅ ᐃᖅᑲᖅᑐᐃᓂᕐᒥ ᓯᕗᓂᐊᓂ ᑭᐅᔾᔪᑎᒃᓴᖓᓂ ᐃᓕᔭᐅᔪᖃᓚᐅᙱᑎᓪᓗᒍ,” ᐱᐊᕆ ᐅᖃᓚᐅᖅᐳᖅ ᐅᖃᓗᒡᕕᐅᒐᒥ ᔭᓄᐊᕆ 15−ᒥ.

“ᕿᓚᒻᒥᐅᐸᓗᒃᐳᖅ ᑕᐃᔅᓱᒧᖓ ᓄᖅᑲᖅᑎᑕᐅᑲᐃᓐᓇᕐᓂᐅᔪᒥ ᐃᓕᔭᐅᓂᖓᓂ, ᐊᒻᒪ ᐅᖃᕈᓐᓇᖅᐳᖓ ᑭᒡᒐᖅᑐᐃᔨᐅᑉ ᐃᓱᒪᓕᐊᕆᓚᐅᖅᐸᖓ ᓄᖅᑲᖅᑎᑕᐅᑲᐃᓐᓇᕐᓂᐅᔪᒥ ᐃᖅᑲᖅᑐᖅᑕᐅᔾᔪᑎᒃᓴᓂ.”

ᐱᐊᕆ ᑐᓂᓯᓚᐅᙱᓚᖅ ᑐᓴᒐᒃᓴᓂ ᑐᕌᖅᑎᑦᑎᓂᐅᓇᔭᖅᑐᒥ ᓄᖅᑲᖅᑎᑕᐅᑲᐃᓐᓇᕐᓂᐅᔪᒥ. ᐅᖃᓚᐅᖅᐳᖅ ᐅᖃᓪᓚᖕᓂᐅᔪᓂ ᐅᑯᓇᓂ ᓴᐳᓐᓂᐊᖅᑎᓂᑦ ᐊᒻᒪ ᑭᒡᒐᖅᑐᐃᔨᖏᓐᓂᑦ ᑐᓴᖅᑕᐅᔭᕆᐊᖃᙱᓚᑦ.

ᐱᐊᕆ ᐅᖃᓚᐅᕆᕗᖅ ᐃᒻᒥᒃᑯᑦ ᐸᐸᑕᐅᓚᐅᖅᐳᖅ ᑑᙶᓘᑉ ᐃᖅᑲᖅᑐᐃᕕᓕᕆᔭᐅᔪᒥ ᐃᖅᑲᖅᑐᐃᕕᖕᒥ, ᐊᒻᒪ ᐅᖃᐅᓯᒃᓴᓕᐅᕈᓐᓇᓚᐅᙱᓚᖅ ᖃᓄᖅ ᓄᖅᑲᖅᑎᑕᐅᑲᐃᓐᓇᕐᓂᐅᔪᒥ ᐊᒃᑐᐃᓂᐊᕐᓂᖓᓂ ᓄᖅᑲᖓᓚᐅᑲᖕᓂᖓᓂ ᓄᓇᕗᒻᒥ ᑐᙵᕕᒃᑯᓐᓂᑦ.

ᑑᙶᓗᒃ ᐅᖃᓪᓚᒍᒪᓚᐅᙱᓚᖅ ᓄᑖᙳᕆᐊᖅᑎᑕᐅᓂᐅᔪᒥ ᐃᖅᑲᖅᑐᐃᕕᓕᕆᔭᐅᓂᖓᓂ, ᑐᓂᓯᓪᓗᓂ ᐅᖃᐅᓯᒃᓴᓕᐊᓂ ᓴᐳᓐᓂᐊᖅᑎᖓᓄᑦ.

ᐊᐱᕆᔭᐅᒐᒥ ᖃᓄᐃᓕᖓᓕᕐᓂᖓᓂ ᐊᑐᕐᓂᖃᐅᑎᖓᓂ ᓄᓇᕗᒻᒥ ᑐᙵᕕᒃᑯᓐᓄᑦ, ᐅᓂᒃᑳᕆᓂᖃᑦᑎᐊᓚᐅᙱᓚᖅ.

“ᑕᑯᓂᐊᖅᐳᒍᑦ ᖃᓄᐃᓐᓂᐊᕐᓂᖓᓂ ᒪᓕᒃᑐᓂ ᖃᔅᓯᐊᕐᔪᖕᓂ ᐅᓪᓗᓂᑦ,” ᐅᖃᓚᐅᖅᐳᖅ.