‘ᐊᐅᒃᑲᐅᑎ’ ᐱᙳᐊᕈᓯ ᓄᓇᕕᒃᒥ ᐱᒋᐊᓯᕗᖅ ᐱᒋᐊᖄᖅᖢᓂ ᑰᔾᔪᐊᖅᒥ

ᐱᙳᐊᕈᓯᖅ ᐅᓂᒃᑲᐅᓯᖃᕐᑐᖅ ᐊᐅᒃᑲᐅᑎᒥ, ᓄᓇᕕᒃᒥ ᐅᓂᒃᑳᖅᑐᐊᕆᔭᐅᕙᒃᑐᖅ, ᓄᓇᓕᖕᓄᑦ ᐳᓚᕋᕈᑎᐅᒻᒪᑦ ᓄᓇᕕᒃᒥ.

ᐱᒋᐊᓕᓵᖅᑎᓪᓗᒍ ᑕᐅᑐᒃᑕᐅᓪᓗᑎ ᐳᕕᕐᓂᑐᖅᒥ ᐅᑭᐅᒃᑯᑦ ᖁᕕᐊᓱᖕᓇᒥ ᒫᔅᓯ 2025-ᒥ, ᐅᓇ ᖁᙱᐊᒐᒃᓴᖅ ᐱᒋᐊᕈᑎᖃᓚᐅᕐᑐᖅ ᓈᑦᑏᖑᔭᓛᕐᓂᐊᕐᒥ ᐅᓐᓄᒃᑯᑦ ᑰᔾᔪᐊᖅᒥ. ᐋᖅᑭᒃᓱᐃᓯᒪᔪᑦ ᐊᒻᒪ ᐱᓕᕆᖃᑎᒋᔭᐅᔪᑦ ᐱᒋᐊᖅᑎᑦᑎᓚᐅᕐᑐᑦ ᖁᙱᐊᖅᑕᐅᔪᒃᓴᒥ ᑐᓴᒐᒃᓴᓕᐅᖅᖢᑎᒃ ᒪᐃ 29-ᒥ.

ᐋᖅᑭᒃᓱᖅᑕᐅᓯᒪᓪᓗᓂ ᐋᖅᓯᖅ ᐃᓄᐃᑦ ᑕᑯᔭᒐᖃᕐᕕᖓᓄᑦ, ᐊᐅᒃᑲᐅᑎ ᐅᓂᒃᑲᐅᓯᖃᕈᑎᐅᔪᖅ ᐊᖑᑎᒥ ᑕᐃᒪᓐᓇ ᐊᑎᖃᕐᑐᒥ ᐊᒻᒪᓗ ᐱᔮᕆᓇᓂ ᐱᖃᓐᓇᕆᔭᖓᑕ ᐃᕐᓂᖓᓂ ᖁᑭᕐᓯᓐᓂᖅᖢᓂ, ᑖᓐᓇᓗ ᑭᖑᓕᕇᒃᑐᓂᒃ ᑐᖁᒍᑎᐅᑲᑕᓕᕐᓂᖅᖢᓂ.

ᕗᐃᓕᐊᒻ ᑕᒍᕐᓈᖅ, ᐊᖓᔪᖅᑳᕆᔭᐅᔪᖅ ᐊᕙᑕᖅ ᐃᓕᖅᑯᓯᓕᕆᔨᓄᑦ ᐅᖃᓪᓚᒃᑐᖅ ᑐᓴᒐᒃᓴᓕᐅᕐᑎᓪᓗᒋᑦ ᒪᐃ 29-ᖑᑎᓪᓗᒍ ᐱᒋᐊᓕᕐᑎᓪᓗᒍ ᐊᐅᒃᑲᐅᑎ ᓄᓇᕕᒃᒥ ᓄᓇᓕᖕᓄᐊᑲᑕᓕᖅᑎᓪᓗᒍ. (ᐊᔾᔨᓕᐅᕆᔨ ᑕᒥᓃᒃ ᔩᓂ)

“ᐅᓇ ᐊᒃᓱᕈᕐᓇᕐᒪᑦ ᐅᖃᐅᓯᕆᓗᒍ. ᐃᓱᒪᔪᖓᓕ ᐅᓇ ᐱᙳᐊᕈᓯᖅ ᑐᑭᓯᔾᔪᑎᐅᒃᑲᓐᓂᕋᔭᕆᐊᒃᓴᖓᓂ ᐃᓄᖕᓄᑦ ᑭᓯᐊᓂᑦᑕᐅᖅ ᖁᕕᐊᓲᑎᖃᕐᓂᕐᒨᖓᖕᒥᔪᖅ ᓲᖃᐃᒻᒪ ᑎᔅᓯᓇᖅᑐᖃᕐᒪ ᐊᒻᒪᓗ ᐃᓱᒫᓗᒍᑎᖃᕐᓇᖅᖢᓂ,” ᐅᖃᕐᑐᖅ ᑕᕐᕋᓕᒃ ᐹᑐᕆᔾ, ᐋᖅᓰᒃᑯᑦ ᐊᐅᓚᑦᑎᔨ ᑐᑭᒧᐊᖅᑎᑖᕆᓵᕐᓂᑯᖓ ᐊᐱᕐᓱᖅᑕᐅᑎᓪᓗᒍ.

ᑐᓴᒐᒃᓴᓕᐅᖅᑎᓪᓗᒋᑦ, ᑭᒡᒐᖅᑐᐃᔪᑦ ᒪᑭᕝᕕᒃᑯᓐᓂ, ᐊᕙᑕᖅ ᐃᓕᖅᑭᓯᓕᕆᔨᒃᑯᓐᓄᑦ, ᑲᑎᕕᒃ ᓄᓇᓕᓕᒫᑦ ᒐᕙᒪᖏᑦ, ᑯᐸᐃᒃ ᐅᐊᖕᓇᖓᓂ ᑯᐊᐸᒃᑯᑦ ᐊᒻᒪᓗ ᐅᐊᕐᓇᖓᓂ ᓄᓇᓖᑦ ᑰᔾᔪᐊᖅᒥ ᓴᖅᑭᑎᑦᑎᓚᐅᕐᑐᑦ ᐱᙳᐊᕈᓯᕐᒥ ᓴᖅᑭᔮᖅᑎᑦᑎᓪᓗᑎᒃ ᐃᓄᒃᑎᑐᑦ ᐅᖃᐅᓯᕐᒥ ᐊᒻᒪ ᐃᓄᐃᑦ ᐃᓕᖅᑯᓯᖏᓐᓂ.

ᕗᐃᓕᐊᒻ ᑕᒍᕐᓈᖅ ᐊᕙᑕᖅᑯᓐᓄᑦ ᐊᖓᔪᖅᑳᕆᔭᐅᔪᖅ ᐊᒻᒪ ᐃᓚᒋᔭᐅᓂᑰᓪᓗᓂ ᐅᓈᕐᓄᑦ (Harpoons), ᐃᓄᐃᑦ ᐃᙱᕐᑎᐅᓂᑯᑦ 1960-ᖏᓐᓂ. ᐅᖃᓚᐅᕐᑐᖅ ᓄᓇᕕᒃᒥ ᖁᙱᐊᖅᑕᐅᔾᔪᑎᒃᓴᓂ ᐊᑐᖃᑦᑕᕈᓘᔭᕐᓯᒪᓂᖏᓐᓂ ᐊᒻᒪ ᐃᙱᑲᑕᖃᑦᑕᕐᓂᖏᓐᓂ ᐊᒻᒪᓗ “ᒫᓐᓇᐅᓕᕐᑎ ᑖᒃᑯᐊ ᖁᙱᐊᖅᑕᐅᖃᑦᑕᕆᐊᖃᓕᕐᑐᑦ.”

“ᒫᓐᓇ ᓈᒪᓈᕐᓯᒪᑦᑎᐊᕐᒪᓐ,” ᐅᖃᕐᑐᖅ.

ᐊᓯᖏᑦᑕᐅᖅ ᐅᖃᕐᑎᒋᔭᐅᔪᑦ ᐅᖃᐅᓯᖃᓚᐅᕐᒥᔪᑦ ᐃᓄᒃᑎᑐᑦ ᖁᙱᐊᕐᕕᒃ ᐱᒻᒪᕆᐊᓘᓂᖓᓂ.

“ᑐᑭᓯᑎᑦᑎᒃᑲᓐᓂᕈᒪᔪᖓ ᐋᖅᓰᖅ ᖁᙱᐊᕐᑕᐅᕕᒃ ᐃᓄᒃᑎᑑᖓᔪᓂ ᓴᖅᑭᑎᑦᑎᒃᑲᓐᓂᕐᓯᒪᖕᒪᑕ,” ᐅᖃᕐᑐᖅ ᐊᓗᐸ ᑯᓗᓚ, FCNQ-ᑯᑦ ᐊᖓᔪᖅᑳᖓᑕ ᑐᒡᓕᖓ.

ᐹᑐᕆᔾ ᐅᖃᓚᐅᕐᑐᖅ ᐃᓱᒪᒋᔭᖓ ᖁᙱᐊᖅᑕᐅᕝᕕᐅᑉ ᒥᒃᓵᓄᑦ ᐃᑲᔪᖅᓯᒪᓪᓚᕆᖕᓂᖓᓂ ᓄᓇᕕᒃᒥ ᐃᓅᓱᒃᑐᓂ.

“ᐅᓇ ᖃᓄᑐᐃᓐᓇᖅ ᖃᐅᔨᕚᓪᓕᕈᑎᐅᓂᐊᕐᑐᖅ ᑖᒃᑯᓄᖓ, ᖃᐅᔨᒪᑎᓪᓗᒋᑦ ᐱᙳᐊᖅᑎᐅᕙᒃᑐᓂᒃ, ᐱᓕᕆᐊᒥ ᐊᒻᒪ ᐃᓱᒪᓕᐅᕆᔭᐅᕙᒃᑐᓂ ᓇᑭᑐᐃᓐᓇ ᐊᒻᒪ ᖃᐅᔨᕚᓪᓕᕈᑎᐅᓗᑎᒃ ᖃᓄᐃᓕᐅᕈᓐᓇᕈᑎᒃᓴᓂᒃ.”

ᐅᓇ ᖁᙱᐊᖅᑕᐅᑲᑕᓕᕐᓂᐊᕐᑐᖅ ᒪᐃ 30-ᒥ.