ᐊᐅᐸᓗᖕᒥ ᐹᔅᑭᑦᐹᓪᒧᑦ ᑕᖕᒫᕐᕕᒃ ᑐᓐᓂᖅᑯᓯᑦᑎᐊᕚᓘᕗᖅ ᒪᒃᑯᒃᑐᓄᑦ ᓄᓇᕕᖕᒥᐅᓄᑦ

For English version, see Aupaluk basketball camp a ‘huge gift’ to young Nunavimmiut

27−ᓂ ᒪᒃᑯᒃᑐᓂ ᐃᓄᖕᓂ ᓄᓇᕕᖕᒥ ᑲᑎᓚᐅᖅᐳᑦ ᐱᓇᓱᐊᕈᓯᐅᓚᐅᖅᑐᒥ ᐊᐅᐸᓗᖕᒥ, ᐊᕕᒃᑐᖅᓯᒪᓂᐅᔫᑉ ᒥᑭᓛᖓᓂ ᓄᓇᓕᐅᔪᒥ, ᐱᓇᓱᐊᕈᓯᐅᔪᒥ ᐹᔅᑭᑦᐹᓪᒥ.

ᐊᒻᒪ ᐅᑯᐊ ᒪᒃᑯᒃᑐᑦ ᐊᖅᓴᖅᑎᐅᔪᑦ ᑕᑯᔪᒪᕗᑦ ᐱᙳᐊᕐᓂᐅᔪᒥ ᐱᕈᕐᓂᖓᓂ ᓄᓇᕕᓕᒫᒥ.

ᕋᔅ ᔮᓐᓴᓐ, ᐃᓕᓴᐃᔨᐅᔪᖅ ᐹᔅᑭᑦᐹᓪ ᐊᔪᕆᖅᓱᐃᖃᑦᑕᖅᑐᖅ ᐊᐅᐸᓗᖕᒥ, ᐊᐅᓚᑦᑎᕗᖅ ᐊᒃᓱᕈᓚᐅᕐᓗᑎᒃ ᒫᓐᓇ ᑭᖑᓂᐊᒍᑦ ᖃᐅᒪᓕᕐᓗᑎᒃ ᐱᓕᕆᐊᖑᔪᒥ, ᑐᕌᒐᖃᖅᑐᒥ ᐱᕙᓪᓕᐊᑎᑦᑎᓂᕐᒥ ᒪᒃᑯᒃᑐᓂ ᓯᕗᓕᐅᖅᑎᐅᔪᓂ ᐊᔪᕆᖅᓱᐃᖃᑦᑕᕐᓂᐊᖅᑐᓂ ᓄᓇᓕᖏᓐᓂ ᓇᒧᙵᐅᑎᑎᑕᐅᓂᖓᓂ ᐊᓕᐊᓇᐃᒋᔭᐅᓂᖓᓂ ᐹᔅᑭᑦᐹᓪᒥ.

ᔮᓐᓴᓐ ᑲᒪᒋᔭᖃᓲᖑᕗᖅ ᑕᐃᒪᐃᒐᔪᒃᑐᒥ ᓄᓇᓕᖕᓂ ᐹᔅᑭᑦᐹᓪᒥ ᖃᓄᐃᓐᓂᐅᔪᓂ ᐃᓕᓐᓂᐊᕐᕕᐅᑉ ᐃᖃᐃᓕᓴᕐᕕᖓᓂ. ᑕᖕᒫᕐᕕᖃᖅᑎᓪᓗᒋᑦ, ᐃᓕᓐᓂᐊᖅᑏᑦ ᖁᐊᖅᑕᒥ, ᑲᖏᖅᓱᒃ ᐊᒻᒪ ᑰᔾᔪᐊᕐᒥ ᑕᐃᑯᖓ ᐊᐅᓪᓛᓚᐅᖅᐳᑦ ᑕᐃᑯᖓ ᐃᓚᐅᖃᑕᐅᓂᕐᒥ ᐊᓕᐊᓇᐃᓐᓂᐅᔪᒥ, ᐊᒻᒪ ᐃᓕᓐᓂᐊᖅᑎᑕᐅᓂᖏᓐᓂ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐊᒻᒪ ᐃᓕᓐᓂᐊᖏᓐᓇᕐᓂᕐᒥ.

“ᒪᑐᐃᖓᑦᑎᐊᖅᖢᑕ ᐅᖃᓪᓚᖕᓂᖃᓚᐅᖅᐳᒍᑦ. ᑭᓱᓕᒫᐸᓗᖕᓂ ᐊᑲᐅᙱᓕᐅᕈᑕᐅᔪᓂ ᐃᓱᒪᒋᔪᓐᓇᖅᑕᕐᓂ ᐅᑭᐅᖅᑕᖅᑐᒥ,” ᔮᓐᓴᓐ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

“ᐊᑐᕈᒪᕗᒍᑦ ᐱᙳᐊᕐᓂᐅᔪᓂ, ᐊᒻᒪ ᐹᔅᑭᑦᐹᓪᒥ ᐱᓗᐊᖅᑐᒥ, ᐱᓕᕆᓇᓱᐊᖅᑕᑦᑎᓐᓂ ᐃᑲᔪᕐᓂᕐᒧᑦ ᐅᓇᑕᕐᓂᕐᒥ ᐃᓕᓐᓂᐊᖃᑦᑕᕈᓐᓃᕐᓂᐅᔪᓂ ᐅᓄᕐᓂᐅᔪᓂ ᐊᒻᒪ ᐃᒻᒥᓃᖅᐸᒃᑐᓄᑦ ᐅᓄᕐᓂᐅᔪᓂ.”

ᓇᓗᒥ ᓇᓴᒃ ᑲᖏᖅᓱᕐᒥᐅᑕᖅ, ᐊᑕᐅᓯᐅᕗᖅ ᒪᒃᑯᒃᑐᓂ ᐊᐅᓪᓛᓚᐅᖅᑐᒥ ᐊᐅᐸᓗᖕᒧᑦ.

17-ᓂ-ᐅᑭᐅᓕᒃ ᐊᓕᐊᓇᐃᒋᔭᖃᑦᑎᐊᖅᐳᖅ ᐹᔅᑭᑦᐹᓪᒥ ᓴᖅᑭᑎᕝᕕᐅᓚᐅᖅᑎᓪᓗᒍ ᐱᙳᐊᕐᓂᐅᔪᒥ ᐱᖃᓐᓇᕆᔭᖓᓂ. ᐅᖃᓚᐅᖅᐳᖅ ᐱᕐᔪᐊᖑᒋᕙᖓ ᐊᑐᐃᓐᓇᖃᕐᓂᕐᒥ ᐱᓕᕆᐊᖑᓂᐅᔪᓄᑦ ᐱᔪᓐᓇᖅᑎᑦᑎᔪᒥ ᒪᒃᑯᒃᑐᓂ ᐊᔾᔨᒌᙱᑦᑐᓂ ᓄᓇᓕᐅᔪᓂ ᐱᙳᐊᕈᓐᓇᕐᓂᕐᒧᑦ ᑲᑎᙵᓗᑎᒃ.

“ᕋᔅ ᐅᕙᑦᑎᓐᓄᑦ ᐊᖏᔪᐊᓗᖕᒥ ᑐᓐᓂᖅᑯᓯᐊᖅᑎᑦᑎᓯᒪᕗᖅ,” ᓇᓴᒃ ᐅᖃᓚᐅᖅᐳᖅ.

“ᐊᓕᐊᓇᐃᑉᐳᖅ ᐱᙳᐊᖃᑎᖃᕐᓂᕐᒥ ᐊᓯᖏᓐᓂ ᐃᓄᖕᓂ ᐱᙳᐊᖃᑎᒋᒐᔪᙱᑕᕐᓂ ᐊᔾᔨᐅᙱᒻᒪᑦ, ᐊᒻᒪ ᐊᓕᐊᓇᐃᑉᐳᖅ ᓱᕈᓯᕐᓂ ᑕᑯᓂᕐᒥ ᐊᓯᖏᓐᓂ ᓄᓇᓕᐅᔪᑦ ᖃᓄᐃᓕᖓᓂᖓᓐᓂ.”

ᓇᓴᐅᑉ ᐅᖃᐅᓯᒃᓴᖓ ᓱᕈᓯᕐᓄᑦ ᐆᒃᑐᕋᒪᔪᓂ ᐹᔅᑭᑦᐹᓪᒥ: ᐱᓕᕆᑐᐃᓐᓇᕐᓗᒍ.

ᐊᓯᐊᓂ ᐃᓚᐅᖃᑕᐅᔪᖅ, ᐋᓐᔨᓖᓇ ᒪᓱᕐ, 19-ᓂ-ᐅᑭᐅᓕᒃ ᐃᓕᓴᐃᔨᐅᔪᖅ ᑕᖅᓴᑲᓪᓚᒃ ᐃᓕᓐᓂᐊᕐᕕᖓᓂ ᐊᐅᐸᓗᖕᒥ.

ᓯᕗᓂᐊᓂ ᐱᙳᐊᖅᓯᒪᓪᓗᖓ ᐹᔅᑭᑦᐹᓪᒥ ᐃᓕᓐᓂᐊᖅᑎᓪᓗᒍ ᖃᓪᓗᓈᑦ ᓄᓇᖓᓐᓂ, ᐅᖃᓚᐅᖅᐳᖅ ᐱᔪᒪᕗᖅ ᐹᔅᑭᑦᐹᓪᒥ ᓄᓇᕕᖕᒥ ᐱᕈᕐᓂᖓᓂ ᑎᑭᐅᑎᔪᒧᑦ ᑲᑎᙵᓂᐅᔪᑦ ᐃᓚᐅᖃᑕᐅᔪᓐᓇᕐᓂᖏᓐᓂ ᐊᖏᓂᖅᓴᐅᔪᓂ ᑲᓇᑕᒥ ᐊᕕᒃᑐᖅᓯᒪᓂᐅᔪᓄᑦ ᓵᓚᖃᕋᓱᐊᕐᓂᐅᔪᓄᑦ.

“ᐱᐅᕐᔪᐊᖅᐳᖅ ᑕᑯᓂᕐᒥ ᐃᒪᐃᓐᓂᑦᑎᓐᓂ, ᐊᔾᔨᐅᙱᑦᑐᒥ, ᓴᖑᕙᓪᓕᐊᓂᑦᑎᓐᓂ,” ᐅᖃᓚᐅᖅᐳᖅ.

“ᐅᖃᕐᓗᑕ ᓯᕗᓂᒃᓴᒥ, ᐃᓚᐅᖃᑕᐅᔪᓐᓇᓛᕐᓂᑦᑎᓐᓂ ᑯᐸᐃᖕᒥ ᐱᙳᐊᕐᓂᐅᔪᓂ,” ᐅᖃᓚᐅᖅᐳᖅ. “ᐃᒻᒪᖄᑦ ᖃᖓᒃᑲᓐᓂᖅ ᐱᙳᐊᖅᑎᓂ ᑕᐃᑯᙵᐅᔪᓂ ᓵᓚᖃᕋᓱᐊᕐᓂᐅᔪᓄᑦ ᐊᒻᒪ ᑕᐃᒪᓐᓇᒐᓚᒃ.”

ᔮᓐᓴᓐ ᐅᖃᓚᐅᖅᐳᖅ ᐊᓕᐊᓇᐃᒍᓱᓚᐅᕐᓂᖓᓂ ᐊᐅᓚᑦᑎᒃᑲᓐᓂᕈᓐᓇᕐᓂᖓᓂ ᐱᓕᕆᑦᑎᐊᖅᑐᒥ ᑕᖕᒫᕐᕕᐅᔪᒥ ᐊᐅᐸᓗᖕᒥ, ᐃᓱᒪᒋᓇᒍ ᐃᓚᖏᑦ ᐱᙳᐊᖅᑎᐅᔪᑦ ᐃᓚᐅᖃᑕᐅᔪᒪᓂᕐᒧᑦ ᐊᑎᓕᐅᖃᑕᐅᓚᐅᖅᑐᓂ ᑎᑭᑦᑐᓐᓇᓚᐅᙱᓐᓂᖏᓐᓂ ᐱᔾᔪᑎᖃᖅᑐᒥ ᓯᓚᑦᑎᐊᕙᐅᙱᓐᓂᐅᔪᒥ ᖃᓄᐃᓐᓂᐅᔪᓂ ᐊᒻᒪ ᐊᓯᖏᓐᓂ ᐊᐅᓪᓛᕐᓂᕐᒧᑦ ᐊᑲᐅᙱᓕᐅᕈᑕᐅᔪᓄᑦ.

ᐅᓄᕐᓂᖅᓴᐅᔪᓂ ᐊᒃᓱᕈᓚᐅᕐᓗᑎᒃ ᒫᓐᓇ ᑭᖑᓂᐊᒍᑦ ᖃᐅᒪᓕᕐᓗᑎᒃ ᐹᔅᑭᑦᐹᓪᒧᑦ ᖃᓄᐃᓐᓂᐅᔪᓂ ᐋᖅᑭᒃᑕᐅᓯᒪᕗᑦ ᐱᓕᕆᐊᖑᓂᐊᕐᓂᖏᓐᓂ ᓄᓇᕕᖕᒥ ᐊᒻᒪ ᖃᓪᓗᓈᑦ ᓄᓇᖓᓐᓂ ᑕᒪᑐᒪᓂ ᐊᕐᕌᒎᔪᒥ. ᔮᓐᓴᓐ ᐅᖃᓚᐅᖅᐳᖅ ᑐᕌᒐᒃᓴᖓ ᐱᕙᓪᓕᐊᑎᑦᑎᓂᕐᒥ ᒪᒃᑯᒃᑐᓂ ᐱᙳᐊᖅᑎᐅᔪᓂ ᐊᔪᕆᖅᓱᐃᖃᑦᑕᕐᓂᐊᖅᑐᓂ, ᐊᒻᒪᓗ ᐱᕈᖅᓴᐃᓂᕐᒥ ᑐᙵᕕᐅᔪᓂ ᐊᕕᒃᑐᖅᓯᒪᓂᐅᔪᒥ ᐱᙳᐊᖅᑎᐅᔪᓂ ᐃᓕᓐᓂᐊᖅᑎᓂ ᐱᙳᐊᖅᑎᐅᔪᓄᑦ ᓵᓚᖃᕋᓱᐊᖅᑐᓂ ᐊᖑᒻᒪᑎᑦᑎᐅᔮᕐᔪᒃᑎᓪᓗᒋᑦ ᐃᓕᓐᓂᐊᕐᓂᖓᓐᓂ.

“ᐱᙳᐊᖅᑎᖃᕈᒪᕗᒍᑦ, ᐊᒻᒪ ᐅᖃᕈᒪ ᐱᙳᐊᖅᑎᐅᔪᓂ, ᓲᕐᓗ ᑐᙵᕕᖃᖅᑐᒥ ᖃᓪᓗᓈᑦ ᓄᓇᖓᓐᓂ ᓱᕈᓰᒃ ᐱᙳᐊᖃᑎᖃᕐᓂᖏᓐᓂ ᐊᔾᔨᒌᙱᑦᑐᓂ ᖁᑦᑎᒃᑐᒥ ᐃᓕᓐᓂᐊᕐᕕᐅᔪᓂ. ᑕᒪᓐᓇ ᐃᓱᒪᒋᕙᕗᑦ ᐱᒻᒪᕆᕐᔪᐊᖑᓂᖓᓂ ᐱᕙᓪᓕᐊᑎᑦᑎᓂᕐᒧᑦ,” ᔮᓐᓴᓐ ᐅᖃᓚᐅᖅᐳᖅ.

“ᐃᓱᒪᕗᒍᑦ ᓅᑉᐸᓪᓕᐊᑎᑦᑎᓂᓐᓂ ᑐᕌᖓᓂᖃᑦᑎᐊᖅᑐᒧᑦ, ᐊᒻᒪ ᖃᓄᐃᙱᓐᓂᖅᓴᐅᕙᓪᓕᐊᓂᖓᓂ ᐃᕝᕕᑦ ᐊᒻᒪ ᓱᕈᓯᕐᓂ, ᐱᓕᕆᓂᖅᓴᐅᓲᖑᕗᑦ.”