ᒪᓕᒐᓕᐅᕐᑎ ᓯᐊᕕ ᐸᕉᐱ ᐊᐅᐸᓗᒃᒧᐊᖅᑎᓪᓗᒍ ᐱᓇᓱᐊᕈᓯᐅᓚᐅᕐᑐᒥ ᓯᕗᓪᓕᖅᐹᒥᑦ ᓄᓇᕕᒻᒧᐊᕈᑎᒋᓚᐅᕐᑕᖓ. ᓂᕈᐊᖅᑕᐅᓚᐅᕐᓯᒪᔪᖅ ᒪᓕᒐᓕᐅᖅᑎᐅᓂᕐᒧᑦ ᐊᐱᑎᐱ-ᔭᐃᒻᔅ-ᓄᓇᕕᒃ-ᐄᔫᒧᑦ 2019-ᖑᑎᓪᓗᒍ. (ᐊᔾᔨᙳᐊᖅ ᐅᕙᙵᑦ ᓕᓐᑕ ᐱᕉ)

ᐊᐅᐸᓗᒃᒥ ᓄᓇᖃᕐᑐᑦ ᑐᐊᕕᖅᑎᑕᐅᖂᔨᔪᑦ ᒪᓕᒐᓕᐅᖅᑎ ᐳᓛᖅᑎᓪᓗᒍ ᓯᕗᓪᓕᖅᐹᒥ

ᓯᐊᕕ ᐸᕉᐱᐅᑉ ᓯᕗᓪᓕᖅᐹᒥ ᓄᓇᕕᒃᒧ ᐳᓛᕐᓯᒪᓚᐅᕐᑐᖅ ᐃᑲᕐᕋᓂ ᐅᓄᙱᑦᑐᓂᒃ

By ᔨᐊᕝ ᐱᐊᑦᓯᐄ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For English version, see Aupaluk residents feel rushed, dissatisfied with Berube’s first Nunavik visit

ᒪᓕᒐᓕᐅᕐᑎ ᓯᐊᕕ ᐸᕉᐱ ᓇᐃᑦᑐᒥ ᐳᓛᕐᓯᒪᓂᕆᓚᐅᕐᑕᖓ ᐅᒃᑑᐱᕆ 12-ᒥ ᓄᓇᕕᒃᒥ ᓄᓇᖃᕐᑐᓂᒃ ᓈᒻᒪᒃᓴᙱᔾᔪᑎᐅᓚᐅᕐᑐᖅ ᒪᓂᒪᔭᕆᐊᖅᑐᖅᑕᖏᓐᓂᒃ.

ᐸᕉᐱ ᓯᕗᓪᓕᕐᐹᒥ ᓂᕈᐊᕆᔭᐅᓚᐅᕐᓯᒪᔪᖅ ᐸᓛᒃ ᑯᐸᑯᐊᖑᓪᓗᓂ ᐅᑯᓄᖓ ᒪᓕᒐᓕᐅᖅᑎᐅᓂᐊᕐᓗᓂ ᐊᐱᑎᐱ-ᔭᐃᒻᔅ ᐸᐃ-ᓄᓇᕕᒃ-ᐄᔭᐅᒧ 2019-ᖑᑎᓪᓗᒍ. ᐅᓇ ᐱᖓᔪᒋᔭᐅᓪᓗᓂ ᐊᖏᓛᖅ ᑭᒡᒐᖅᑐᖅᑕᐅᓂᒃᑯᑦ ᑲᓇᑕᒥ ᓄᓇᕗᓪᓗ ᓄᓇᑦᓯᐊᑉᓗ ᑭᖑᓂᐊᒍᑦ, ᑭᓯᐊᓂᓕ ᑕᒪᑐᒪᓂ ᐱᓇᓱᐊᕈᓯᐅᑉ ᐊᓯᐊᒍᑦ ᓄᓇᕕᒃᒧᐊᓚᐅᕐᓯᒪᙱᑦᑐᖅ.

ᐸᕉᐱ ᐳᓛᕈᒪᓚᐅᕐᓯᒪᔪᖅ ᒫᔅᓯ 2020-ᒥ ᑭᓯᐊᓂᓕ ᐊᑐᕈᓐᓇᓚᐅᙱᑕᖓ ᓄᓇᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᒧᑦ ᒪᑐᔭᐅᑎᓪᓗᒋᑦ ᐃᖏᕐᕋᔾᔪᑎᖃᕐᕕᐅᔪᑦ ᑕᒪᐅᖓ.

ᐊᕐᕌᒍᑦ ᐱᖓᓱᑦ ᐊᓂᒍᖅᑎᓪᓗᒋᑦ ᐊᒻᒪᓗ ᐊᕐᕌᒍᒥ ᓵᓚᒃᓴᒃᑲᓐᓂᖅᑎᓪᓗᒍ ᐊᐃᑉᐸᖓᓂ ᒪᓕᒐᓕᐅᖅᑎᐅᓂᐊᕐᓂᕐᒥᒃ, ᓄᓇᕕᒃᒧᐊᓚᐅᕐᓯᒪᔪᖅ ᓯᕗᓪᓕᖅᐹᒥᒃ ᐅᒃᑑᐱᕆ 12-ᒥ ᕿᓚᒥᕈᓗ ᐳᓛᖅᖢᓂ ᐊᐅᐸᓗᒃᒧᑦ, ᒥᑭᓐᓂᖅᐹᖅ 14-ᓂ ᓄᓇᓕᖕᓂ ᓄᓇᕕᒃᒥ.

ᐸᕉᐱ ᐊᒻᒪ ᐱᓕᕆᖃᑎᒋᔭᖏᑦᑕ ᐃᓚᖏ ᖃᖓᑕᓲᒃᑯᑦ ᑯᐸᐃᒃ ᓯᑎᒥᙶᓚᐅᕐᓯᒪᔪᖅ ᐅᒃᑑᐱᕆ 12 ᐅᓪᓛᖓᓂᒃ. ᑲᑎᖃᑎᖃᓚᐅᕐᓯᒪᔪᖅ ᒪᐃᔭ ᑕᐃᕕᑦ ᐊᖑᑎᙳᐊᒃᒥ ᓄᓇᓕᖕᓂ ᑲᑎᖃᑎᖃᓚᐅᙱᓐᓂᖓᓂᒃ ᑕᕐᓴᑲᓪᓚᒃ ᐃᓕᓐᓂᐊᕐᕕᒃᒥ.

ᐃᑲᕐᕋᓪᓗᐊᒃ ᒪᕐᕉᒃ ᐊᓂᒍᕐᑎᓪᓗᒋᑦ, ᐸᕉᐱ ᖃᖓᑕᓲᒃᑯᑦ ᑯᐸᐃᒃ ᓯᑎᒧ ᐅᑎᓕᓚᐅᕐᑐᖅ — ᐅᓪᓗᖅ ᐊᑕᐅᓯᕐᒧᑦ ᐅᑎᕐᔭᕈᑎᐅᓪᓗᓂ ᐃᖅᑲᓇᐃᔭᖅᑎᖏᓐᓄᑦ ᐊᑭᖃᕐᓂᕋᖅᑕᐅᔪᖅ $13,546 ᐃᓚᖃᖅᖢᓂ ᑖᒃᓯᓂ.

“ᓈᒻᒪᙱᓗᐊᓚᐅᕐᒪᓐ ᕿᓚᒻᒥᐅᓂᖓᓄᑦ ᓄᓇᖃᖅᖢᓂ,” ᐊᖑᑎᙳᐊᖅ ᐅᖃᓚᐅᕐᑐᖅ. “ᑕᐃᒪᓕ ᐅᖃᓪᓚᖃᑎᖄᓂᒍᓐᓇᓚᐅᙱᑦᑐᒍ ᐊᐱᕐᓱᐊᓂᙱᖢᑕᓗ … ᐊᐅᓪᓚᕆᐊᖃᓚᐅᕐᒪᑕ.”

ᐊᖑᑎᙳᐊᖅ ᐃᓄᑑᓚᐅᙱᑦᑐᖅ ᑕᐃᒪᓐᓇ ᐸᕉᐱᒧᑦ ᐱᔭᐅᓂᖏᓐᓂᒃ.

ᑕᕐᓴᑲᓪᓚᒃ ᐃᓕᓐᓂᐊᕐᕕᒃᒦᑦᑐᑦ ᐅᖃᓚᐅᕐᑐᑦ ᑐᐊᕕᕐᓇᖅᖢᓂ ᐳᓛᕐᓂᐅᔪᖅ ᕿᒥᕐᕈᐊᖅᑎᑦᑎᔪᓐᓇᓚᐅᙱᑦᑐᑦ ᖃᓄᐃᓐᓂᖓᓂᒃ ᓄᓇᓕᖕᓂ ᒪᑯᑎᑐᓇᖅ ᐊᓐᓂᑭᑦᑐᕐᕕᒃᑎᑐᑦ ᐊᒻᒪ ᐅᖁᖃᐅᖅᑐᑦ ᐃᒡᓗᓂ.

ᑐᐊᕕᕐᓇᕋᓗᐊᖅᑎᓪᓗᒍ ᐊᒻᒪ ᐊᖑᑎᙳᐊᖅ ᐅᖃᓚᐅᕐᑐᖅ ᑐᓴᐅᒪᖃᑦᑕᐅᑎᓂᖅ ᓈᒻᒪᓚᐅᙱᓐᓂᖓᓂᒃ: ᐃᓄᒃᑎᑐᑦ ᐅᖃᓪᓚᓲᑦ ᐅᖃᖃᑎᖃᕈᒪᑎᓪᓗᒋ ᐸᕉᐱᒥ ᑐᓵᔨᖃᕆᐊᖃᓚᐅᕐᒪᑕ ᖃᓪᓗᓈᑐᑦ ᐊᒻᒪ ᐅᐃᕖᑑᖅᑕᐅᓕᖅᐸᒃᖢᑎᒃ ᐅᖃᓪᓚᖃᑎᖃᕋᓱᑐᐃᓐᓇᖅᑎᓪᓗᒋᑦ.

ᔪᐊᔾ-ᓗᐃᓴ ᐃᑐᒃ, ᓄᓇᓕᖕᓂ ᑲᑎᒪᔨᐅᖃᑕᐅᔪᖅ ᐊᐅᐸᓗᒃᒥ ᐅᑯᓇᓂ ᒪᓕᒐᓕᕆᔨᒃᑯᓐᓂᒃ ᐊᒻᒪ ᐃᓕᓐᓂᐊᖅᑐᓕᕆᔨᒃᑯᓐᓂᒃ, ᐅᖃᐅᓯᖃᕈᓘᔭᓚᐅᕐᑐᖅ ᐳᓛᖅᑐᒥ — ᓈᒻᒪᒃᓴᙱᔾᔪᑎᑐᐃᓐᓇᐅᓚᐅᕐᑐᖅ, ᐸᒡᕕᓇᖅᖢᓂ ᓈᒻᒪᓈᕐᓯᒪᙱᖢᓂ ᐊᒻᒪᓗ ᓲᕐᓗ ᐱᙳᐊᕆᔭᐅᑐᐃᓐᓇᖅᖢᑎᒃ.

“ᓲᕐᓗᓕ ᑭᒡᒐᖅᑐᐃᔨᖃᑦᑎᐊᔾᔮᙱᑦᑐᒍᑦ ᒪᑯᓄᖓ ᓈᒻᒪᙱᓕᐅᕈᑎᑦᑎᓐᓄᑦ ᐅᑭᐅᕐᑕᖅᑐᕐᒥ,” ᐃᑐᒃ ᐅᖃᓚᐅᕐᑐᖅ.

“ᐅᖃᐅᓯᒃᓴᖃᕈᓘᔭᕋᒪ, ᑭᓯᐊᓂᓕ ᑐᓵᔭᐅᓇᓱᓚᐅᙱᑦᑐᒍᓪᓘᓂᑦ.”

ᐸᕉᐱ ᐅᖃᓚᐅᕐᑐᖅ ᐅᐃᕖᑐᑦ ᐊᐱᕐᓱᖅᑕᐅᓪᓗᓂ ᖁᕕᐊᓱᖕᓂᕋᖅᖢᓂ ᐳᓛᕋᒥ, ᐊᒻᒪᓗ ᐅᔾᔨᕈᓱᖕᓂᕋᖅᖢᓂ ᐃᓄᐃᑦ ᓄᓇᕕᒻᒥ ᑖᔅᓱᒥᖓ ᐅᖓᓯᒃᓴᕐᓂᖏᓐᓂᒃ.

“ᖃᐅᔨᕚᓪᓕᓚᐅᕐᑐᖓ,” ᐅᖃᕐᑐᖅ.

“ᐊᓕᐊᓇᐃᑦ ᑕᐃᑲᓃᓚᐅᕋᒪ, ᐊᒻᒪᓗ ᑕᐃᒪᐃᓕᓪᓗᖓ: ᑕᐃᑯᙵᕈᒪᓚᐅᕐᓯᒪᒐᓗᐊᖅᑐᖓ ᐅᒃᑑᐱᕆ 12 ᓯᕗᓂᐊᒍᑦ ᑭᓯᐊᓂᓕ ᐋᓐᓂᐊᕕᒡᔪᐊᕐᓇᖅ ᐊᒡᕕᐊᓕᓚᐅᕐᒥᖕᒪᓐ.”

ᐅᒃᑑᐱᕆ 13 ᓄᖑᓕᕐᑎᓪᓗᒍ ᖃᕋᓴᐅᔭᒃᑯᑦ ᐅᐃᕖᑐᑦ ᑎᑎᕋᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᒍᔪᓄᑦ, ᑕᕝᕙᓂ ᐸᕉᐱ ᐅᖃᓚᐅᕐᑐᖅ ᓇᒻᒪᒋᔭᐅᙱᔾᔪᑎᒋᓚᐅᕐᑕᖏᓐᓂᒃ ᐊᐅᐸᓗᒃᒥᐅᓄᑦ.

ᐅᖃᓚᐅᕐᑐᖅ ᓄᓇᓕᖕᓃᒃᑲᓐᓂᕈᒪᓂᕋᖅᖢᓂ ᑭᓯᐊᓂᓕ ᖃᖓᑕᓂᐅᔪᖅ ᐋᖅᑭᒃᑕᐅᓯᒪᓂᖓᓄᑦ ᐊᔪᕐᓇᓚᐅᕐᒪᑦ. “ᐱᓇᓱᑦᑎᐊᒻᒪᕆᓚᐅᕋᓗᐊᕐᑐᖓ,” ᐅᖃᕐᑐᖅ.

ᐳᓛᓚᐅᕐᑐᖅ ᐳᓛᕐᓂᐊᕐᓂᕋᓚᐅᕐᓯᒪᓪᓗᓂ ᓄᓇᕕᒃᒥ, ᐅᖃᕐᑐᖅ, ᐊᒻᒪᓗ ᖁᕕᐊᓱᒃᖢᓂ ᖃᓄᖅ ᑐᓴᓚᐅᕐᓂᖓᓂᒃ ᓄᓇᓕᖕᓂ ᕿᓚᒥᐅᒐᓗᐊᖅ ᑕᐃᑲᓃᑎᓪᓗᒍ.

ᐅᖃᓚᐅᕐᑐᖅ ᒐᕙᒪᑐᖃᒃᑯᑦ ᐊᒻᒪ ᑯᐸᐃᒃᒧᑦ ᐱᓕᕆᔨᒻᒪᕆᖕᓂ ᐅᖃᓪᓚᖃᑎᖃᕐᓂᐊᖅᖢᓂ ᓄᓇᓕᖕᓂ ᐃᓱᒫᓘᑎᒋᔭᐅᓚᐅᕐᑐᓂᒃ.

“ᐅᖃᐅᑎᓚᐅᕋᒃᑭ ᑕᐃᑲᓃᓐᓂᕋᖅᖢᖓ ᑖᒃᑯᓄᖓ ᐊᒻᒪᓗ ᐅᕙᓐᓄ ᐅᖃᕈᓐᓇᕐᓂᖏᓐᓂᒃ ᑎᑎᕋᕐᕕᑦᑎᓐᓄᑦ,” ᐸᕉᐱ ᑎᑎᕋᕐᑐᖅ.

“ᐅᖃᕐᕕᐅᙲᓐᓇᕈᒪ ᑕᐃᒪᓕ ᐃᓱᒪᒋᔭᖏᑦ ᑐᓴᖅᑕᐅᔪᓐᓇᔾᔮᙱᑦᑐᑦ ᐋᑐᕚᒥ.”

ᐳᓛᓚᐅᙱᑎᓪᓗᒍ ᐸᕉᐱ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᖃᓚᐅᕐᑐᖅ ᐅᓪᓗᕐᓂ ᐱᖓᓱᓂᒃ ᓄᓇᕕᒃᒦᓐᓂᐊᕐᓂᕋᖅᖢᓂ ᐅᑯᓇᓂ ᓯᓂᒃᑕᕐᓗᓂ ᓴᓪᓗᐃᑦ ᐊᒻᒪ ᑰᔾᔪᐊᖅᒥ.

ᖃᐅᒃᐸᙳᖅᑎᓪᓗᒍᓕ ᑭᓯᐊᓂ ᐃᖅᑲᓇᐃᔭᖅᑎᖏᑦ ᓇᓗᓇᐃᕐᓯᓕᓚᐅᕐᑐᑦ ᐳᓛᕐᓯᒪᓂᐊᕐᓂᖓ ᓇᒡᓕᒋᐊᖅᑕᐅᓂᖓᓂᒃ ᐅᓪᓗᕐᒥ ᐊᐅᐸᓗᒃᒥ ᐱᔾᔪᑎᖃᖅᖢᑎᒃ ᐃᓂᒃᓴᖃᑦᑎᐊᙱᓐᓂᖏᓐᓄᑦ ᑕᐃᑲᓂ.

ᐅᕌᔅ ᔮᓐᓴᓐ, ᐃᓕᓴᐃᔨ ᐊᐅᐸᓗᒃᒥ ᓄᓇᖃᕐᓯᒪᓕᕐᑐᖅ ᐊᕐᕌᒍᓂᒃ ᐱᖓᓱᓂᒃ ᐅᖃᓚᐅᕐᑐᖅ ᐅᒃᐱᕈᓱᙱᓐᓂᕋᖅᖢᓂ ᓄᕙᒡᔪᐊᕐᓇᖅᑦ-19 ᐱᔾᔪᑎᐅᓚᐅᕐᓂᖓᓂᒃ ᐅᓇ ᐸᕉᐱ ᐳᓛᓚᐅᕐᓯᒪᙱᓐᓂᖓᓂᒃ ᐊᕐᕌᒍᓂᒃ ᐱᖓᓱᓂᒃ ᐊᒻᒪᓗ ᑕᐃᑲᓃᑐᐃᓐᓇᓚᐅᑲᒃᖢᓂ ᐅᓪᓘ ᐃᓚᐃᓐᓇᖓᓂᒃ.

ᓄᕙᒡᔪᐊᕐᓇᖅ-19-ᒧᑦ ᖃᓄᐃᓕᐅᖅᑕᐃᓕᒪᔾᔪᑎᐅᔪᑦ ᓄᖅᑲᖅᑎᑕᐅᑎᓪᓗᒋᑦ ᐅᐱᕐᖔᖅ ᐊᒻᒪᓗ ᐊᔪᕐᓇᙱᓐᓂᕐᓴᐅᓕᖅᖢᓂ ᓄᓇᕕᒃᒧᐊᕆᐊᒃᓴᖅ, ᐅᖃᐅᔾᔭᐅᓚᐅᕐᑐᖅ ᐸᕉᐱᐅᑉ ᑎᑎᕋᕐᕕᖓᓂᒃ ᐃᖏᕐᕋᔾᔪᑎᓯᐊᕈᓐᓇᙱᓐᓂᖏᓐᓂᒃ ᐊᒻᒪ ᐃᓂᒃᓴᖃᑦᑎᐊᙱᓐᓂᖏᓐᓂᒃ.

“ᐃᓱᒪᓚᐅᕐᑐᖓᓕ ᐊᐅᓪᓚᑲᐅᖅᑐᕈᒪᓚᐅᕆᐊᒃᓴᖏᓐᓂᒃ … ᓲᕐᓗ ᐃᓯᓚᐅᑲᒃᖢᑎᒃ ᐊᓂᔭᕇᖅᖢᑎᒡᓗ,” ᔮᓐᓴᓐ ᐅᖃᕐᑐᖅ.

“ᐃᓱᒪᔪᖓᓕ ᑕᒪᑐᒧᖓ ᓈᒻᒪᒃᓴᙱᕈᓘᔭᓚᐅᕐᑐᑦ.”

ᐸᕉᐱ ᐅᖃᓚᐅᕐᑐᖅ ᓄᓇᕕᒃᒧ ᐅᑎᕈᒪᓂᕋᖅᖢᓂ ᐄᐳᕉᓛᖅᑐᒥ ᐊᑯᓂᐅᓂᕐᓴᖅ ᐊᒻᒪ ᓯᓂᒃᑕᑲᑕᒡᓗᓂ ᐃᓚᖏᓐᓂ ᓄᓇᓕᖕᓂ. ᒫᓐᓇᐅᔪᕐᓕ ᐅᖃᓚᐅᕐᑐᖅ ᐃᓱᒫᓘᑎᒋᔭᐅᔪᑦ ᐅᖃᐅᓯᕆᓂᐊᕐᓂᕋᖅᖢᓂᒋᑦ ᑖᔅᓱᒧᖓ ᐅᖃᐅᓯᐅᓚᐅᕐᑐᑦ ᐊᐅᐸᓗᒃᒥ.

“ᐱᓕᕆᓂᐊᖅᑐᖓ ᐃᓕᔅᓯᓐᓄ, ᓴᐳᑎᓯᒪᓇᓱᒡᓗᒋᓪᓗ ᐃᓱᒪᒋᔭᓯ ᒐᕙᒪᑐᖃᒃᑯᑎᒍᑦ ᐊᒻᒪᓗ ᐃᒪᐃᑦᑕᕆᐊᖃᕈᒪ ᓴᐳᑎᔪᓐᓇᕐᓗᒋ ᐱᓕᕆᖃᑎᖃᕐᓂᒃᑯᑦ ᐳᕌᕕᓐᓯᒥ,” ᐸᕉᐱ ᐅᖃᕐᑐᖅ.

ᔮᓐᓇ ᐅᖃᓚᐅᕐᑐᖅ ᑖᓐᓇ ᐳᓛᕐᓂᐅᔪᖅ ᓄᓇᕕᒻᒥᐅᓂᒃ ᐊᒃᓱᕈᕈᑎᐅᑐᐃᓐᓇᕐᓗᓂ ᓂᕈᐊᕐᓯᒪᔭᖏᓐᓄᑦ. ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᕋᖃᑦᑕᕐᓂᐊᕐᓂᖓᓂᒃ ᐊᒻᒪ ᐅᖄᓚᖃᑦᑕᕐᓗᓂ ᐸᕉᐱᐅᑉ ᑎᑎᕋᕐᕕᖓᓄᒃ ᐊᒻᒪᓗ ᐃᓱᒪᓪᓗᓂ ᐊᓯᖏᑦ ᓄᓇᓖᑦ ᐱᓕᕆᖃᑕᐅᓇᓱᖁᓪᓗᓂᒋᑦ ᒐᕙᒪᒃᑯᑎᒍᑦ.

“ᑕᑯᔪᒪᒐᒪ ᐅᓄᕐᓂᕐᓴᓂᒃ ᐃᓄᖕᓂ ᒪᓕᒐᓕᕆᓂᕐᒥᒃ ᐱᓕᕆᖃᑕᐅᔪᓂᒃ, ᑭᓯᐊᓂᓕ ᐃᓱᒪᔪᖓ ᒪᓕᒐᓕᐅᖅᑎᓂᒃ ᐱᒋᐊᕐᓯᒪᓂᖓᓂᕐ, ᑐᑭᓯᑎᑕᐅᔪᓐᓇᕐᓗᑎᒃ ᐊᒻᒪ ᐊᔭᐅᖏᓐᓇᕐᓗᒋᑦ ᐱᓕᕆᖁᔭᐅᓗᑎᒃ,” ᔮᓐᓴᓐ ᐅᖃᕐᑐᖅ.

“ᐅᖄᓚᖃᑦᑕᐃᓐᓇᕐᓂᐊᕐᑐᒪ ᑖᒃᑯᓄᖓ ᐊᒻᒪ ᑲᒪᒌᓐᓇᕐᓗᒋᑦ ᑕᒪᐅᙵᒃᑲᓐᓂᖁᓗᒋ ᐊᒻᒪ ᐱᓕᕆᐊᒃᓴᖏᓐᓂᒃ ᐱᓕᕆᐊᖃᕐᓗᑎᒃ.”

Share This Story

(0) Comments

Join the Conversation

Your email address will not be published. Required fields are marked *

*