ᐹᕕᓐᓛᓐ ᐊᖏᕐᑐᑦ ᓄᓇᓯᐅᑎᑯᑖᒧᑦ ᐊᖅᑯᑎᒃᓴᒥ ᐅᔭᕋᒃᓴᖅᓯᐅᕐᕕᒃ ᐱᓕᕆᐊᖏᓐᓂ ᐱᓕᕆᓂᕐᓴᐅᓂᐊᕐᒪᑕ

For English version, see Baffinland gives green light to rail line to boost mine’s output, lifespan

ᐹᕕᓐᓛᓐ ᓴᕕᕋᔭᒃᓴᒥ ᐅᔭᕋᒃᓴᖅᓯᐅᕐᕕᒃᑯᑦ ᐅᖃᕐᑐᑦ ᖃᔪᓯᓂᐊᓕᕐᓂᕋᖅᖢᑎᒃ ᓴᓇᓗᑎᒃ ᓄᓇᓯᐅᑎᑯᑖᑉ ᐊᖅᑯᑎᒃᓴᖓᓂ ᐃᑲᔫᑎᐅᓇᔭᕐᑐᒥ ᓄᓘᔮᖕᓂ ᐅᔭᕋᒃᓴᖅᓯᐅᕐᕕᐅᑉ ᓴᖅᑭᑎᑉᐸᓪᓕᐊᔭᖏᓐᓂ ᐊᒻᒪ ᐊᑯᓂᐅᓂᕐᓴᖅ ᐱᓕᕆᕝᕕᐅᔪᓐᓇᕐᓗᓂ.

“ᐅᓇ ᐋᖅᑭᒍᑎᒋᔭᐅᔪᖅ ᓄᓘᔮᖕᓂ ᐱᓕᕆᐊᒧᑦ,” ᐅᖃᕐᑐᖅ ᔭᐅᑕᑦ ᕗᐊᕼᐃᑦ, ᐊᖓᔪᖅᑳᕆᔭᐅᑲᐃᓐᓇᖅᑐᖅ ᐹᕕᓐᓛᓐᒥ, ᑐᓴᒐᒃᓴᓕᐅᕐᑎᓪᓗᒋ ᔭᓄᐊᕆ 29-ᒥ ᐅᖃᐅᓯᖃᖅᖢᑎᒃ ᓄᓇᓯᐅᑎᑯᑖᒧᑦ ᐊᖅᑯᑎᒃᓴᖅᑖᕆᔭᐅᔪᒪᔪᖅ ᐱᖁᔭᑎᒍᑦ ᐊᖏᕐᑕᐅᓚᐅᕐᓂᖓᓂ ᐊᒻᒪ ᑲᔪᓯᔪᓐᓇᕐᓂᕋᖅᑕᐅᓪᓗᓂ.

ᑲᒻᐸᓂᐅᑉ ᐃᒃᐱᑭᑦᑐᕐᔪᐊᕐᒥ ᐱᓕᕆᕝᕕᒋᔭᖓᓂ — ᐊᕐᕌᒍᓕᒫᖅ ᓄᓇᓯᐅᑎᑯᑖᒧᑦ ᐊᑐᖅᑕᐅᔪᓐᓇᖅᑐᒥ ᑕᑭᓂᖃᕐᓗᓂ 149 ᑭᓛᒥᑕᓂ ᓄᓘᔮᑦ ᓂᒋᐊᓂ ᐅᕗᙵᐅᔪᒥ ᑲᖏᕐᓱᒡᔪᐊᕐᒥ ᑐᓚᒃᑕᕐᕕᐅᔪᒪᔪᒧᑦ — ᐱᕕᖃᕈᑎᐅᔪᓐᓇᕋᔭᕐᑐᖅ ᐹᕕᓐᓛᓐᒥ ᓴᕕᕋᔭᒃᓴᓂ ᓴᖅᑭᑎᑦᑎᕙᓪᓕᐊᓂᕐᓴᐅᓗᑎᒃ ᒪᐅᖓ 22 ᒥᓕᐊᓐ ᑕᓐᔅᓂ ᐊᕐᕌᒍᒥ ᐅᕙᙵ ᒫᓐᓇ ᐱᔭᐅᕙᒃᑐᓂ 4.2 ᒥᓕᐊᓐ ᑕᓐᔅᓂ.

ᑖᓐᓇᓗ ᐅᔭᕋᒃᓯᐅᕐᕕᒃᒥ ᐱᓕᕆᕝᕕᐅᔪᓐᓇᕐᓂᕐᓴᐅᓗᓂ ᑎᑭᓪᓗᒍ 2059 “ᐅᖓᑖᓄᓪᓗ,” ᐅᖃᕐᑐᖅ ᐲᑕ ᐋᒃᒪᓐ, ᑐᓴᐅᒪᔭᐅᔪᒃᓴᓕᕆᓂᕐᒧᑦ ᐊᖓᔪᖅᑳᕆᔭᐅᔪᖅ ᐹᕕᓐᓛᓐᒧᑦ, ᖃᕋᓴᐅᔭᒃᑯᑦ ᑎᑎᕋᖅᖢᓂ.

“ᐅᓇ ᓴᖅᑭᑎᑦᑎᓯᒪᔪᖅ ᐊᔪᕐᓇᙱᓐᓂᕐᓴᐅᓕᕐᓗᓂ ᐊᖏᓂᕐᓴᓂ ᓴᓂᕐᕙᐃᓯᒪᕝᕕᐅᔪᓐᓇᖅᑐᓂ ᐱᓕᕆᐊᖑᔪᓐᓇᕋᔭᙱᑦᑐᓂᒃ ᓄᓇᓯᐅᑎᑯᑖᒧᑦ ᐊᖅᑯᑎᑕᖃᙱᑉᐸᑦ,” ᐅᖃᕐᑐᖅ.

ᐹᕕᓐᓛᓐ ᒫᓐᓇ ᐃᖅᑲᓇᐃᔭᖅᑎᑦᑎᔪᖅ 1,200-ᓂ ᓄᓇᕗᒥᐅᑕᕐᓂ ᐅᑯᓇᓂ ᐅᔭᕋᒃᓴᖅᓯᐅᕐᕕᒃᒥ, ᑐᓚᒃᑕᕐᕕᒃᒧᑦ ᐊᐅᓚᑦᑎᓂᒃᑯᑦ, ᐃᒪᕐᒥᐅᑕᓕᕆᓂᕐᒧᑦ, ᐃᓂᖃᖅᑎᑦᑎᓕᕆᓂᒃᑯᑦ ᐊᒻᒪ ᐃᖅᑲᓇᐃᔭᖅᑎᓂ ᐃᑲᔪᖅᑐᐃᔨᓂ, ᐋᒃᒪᓐ ᐅᖃᕐᑐᖅ.

ᑲᖏᓱᒡᔪᐊᖅᒧᑦ ᑐᓴᒐᒃᓴᓕᐅᓚᐅᕐᑎᓐᓇᒋᑦ, ᓄᓘᔮᖕᓂ ᐅᔭᕋᒃᓴᖅᓯᐅᕐᕕᒃ ᕿᑭᖅᑖᓘ ᐅᐊᖕᓇᖅᐸᓯᐊᓂ ᓄᖃᖅᑎᑕᐅᓂᐊᓚᐅᕐᓯᒪᔪᖅ 2035-ᒥ.

ᐋᒃᒪᓐ ᓇᓗᓇᐃᓚᐅᙱᑦᑐᖅ ᖃᔅᓯᑐᕋᔭᕆᐊᒃᓴᖓᓂ ᓄᓇᓯᐅᑎᑯᑖᖕᒧᑦ ᐊᖅᑯᑎ ᓴᓇᔭᐅᓂᐊᕐᓂᖓ, ᐅᖃᖅᖢᓂ “ᓯᕗᓂᑦᑎᐊᑦᑎᓐᓂ” ᐅᖃᐅᓯᐅᓛᕐᓂᕋᖅᖢᓂᐅᒃ.

“ᐅᓇ ᐱᓕᕆᐊᒃᓴᖅ ᓯᕗᒧᑦ ᐱᕙᓪᓕᐊᓂᖓ ᐅᔭᕋᒃᓴᖅᓯᐅᕐᕕᒃᒥ ᐱᕈᖅᑎᑦᑎᕙᓪᓕᐊᓇᔭᕐᑐᖅ ᐊᒻᒪ ᓄᓇᕗᒥᑦ ᐱᓕᕆᕝᕕᐅᖏᓐᓇᕐᓗᓂ,” ᐅᖃᕐᑐᖅ ᕼᐊᑦᓴᓐ ᓛᔅᑐ, ᓄᓇᕗᒥᑦ ᐊᖓᔪᖅᑳᕆᔭᐅᔪᖅ ᓄᓇᑦᓯᐊᕐᒥ ᐊᒻᒪ ᓄᓇᕗᒥᑦ ᐅᔭᕋᒃᓴᖅᓯᐅᕐᕕᖕᓂ ᑲᒪᔨᐅᔪᓂᒃ ᐅᖄᓚᐅᑎᒃᑯᑦ ᐊᐱᕐᓱᖅᑕᐅᑎᓪᓗᒍ ᔭᓄᐊᕆ 29-ᖑᑎᓪᓗᒍ.

“ᐅᖃᕈᓐᓇᖅᑐᒃᓴᐅᔪᒍ ᐅᓇ ᐱᒋᐊᕈᑎᐅᓕᕐᓂᖓᓂ ᐊᕐᕌᒍᒐᔭᖕᓂ ᐱᓕᕆᖃᑎᒌᖕᓂᕐᒧᑦ ᐃᓄᐃᑦ ᑲᑐᔾᔨᖃᑎᒌᓂᒃ, ᓄᓇᕗᒥᑦ ᒐᕙᒪᒃᑯᓐᓂ, ᑲᓇᑕᐅᑉ ᒐᕙᒪᖓᓂ ᐊᒻᒪᓗ ᑕᒪᐃᓐᓂ ᒪᓕᒐᓕᕆᓂᕐᒧᑦ ᑎᒥᒋᔭᐅᔪᓄᑦ,” ᐅᖃᕐᑐᖅ.

ᑲᖏᕐᓱᒡᔪᐊᕐᒥ ᓄᓇᓯᐅᑎᑯᑖᒧ ᐊᖅᑯᑎᒃᓴᖅ ᐹᕕᓐᓛᓐᑯᓐᓄᑦ ᐃᓱᒪᒋᔭᐅᓚᐅᕐᓯᒪᔪᖅ ᓯᕗᓪᓕᕐᒥ ᑐᒃᓯᕋᐅᓯᐅᕐᑎᓪᓗᒋᑦ ᓄᓘᔮᖕᓄᑦ ᐊᒻᒪᓗ ᐊᖏᖅᑕᐅᓚᐅᕐᓯᒪᓪᓗᓂ ᒐᕙᒪᑐᖃᒃᑯᓐᓄᑦ 2012-ᒥ.

“ᑕᐃᒪᙵᑦ ᐊᓯᙳᖅᑐᖃᐅᕐᓯᒪᖕᒪᑦ,” ᓄᓇᕗᒧᑦ ᒪᓕᒐᓕᐅᖅᑎ ᓘᕆ ᐃᓪᓚᐅᑦ ᐅᖃᓚᐅᕐᑐᖅ ᐅᖄᓚᐅᑎᒃᑯᑦ ᐊᐱᕐᓱᖅᑕᐅᑎᓪᓗᒍ ᔭᓄᐊᕆ 29-ᒥ.

ᐅᖃᖅᖢᓂ ᐅᒃᐱᕈᓱᖕᓂᕋᖅᖢᓂ ᐱᓕᕆᐊᕆᔭᐅᔪᖅ ᐊᕙᑎᓕᕆᓂᕐᒧᑦ ᖃᐅᔨᓴᖅᑕᐅᒃᑲᓐᓂᕆᐊᖃᕐᓂᖓᓂ ᑖᓐᓇ ᓄᓇᓯᐅᑎᑯᑖᒧᑦ ᐊᖏᖅᑕᐅᔾᔪᑎᐅᔪᖅ “ᑐᑭᓯᓯᒪᓂᒃᑯᑦ ᐃᓱᒪᓕᐊᕆᔭᐅᓯᒪᓗᓂ.”

ᑭᓯᐊᓂᓕ ᖃᐅᔨᓴᖅᑕᐅᒃᑲᓐᓂᕆᐊᖃᕆᔭᐅᙱᑦᑐᖅ ᒐᕙᒪᑐᖃᒃᑯᑦ ᐱᖁᔭᓕᕆᔨᖏᓐᓄᑦ.

ᐊᖏᕐᑕᐅᕌᓂᒃᓯᒪᓕᕐᑎᓪᓗᒍ ᐹᕕᓐᓛᓐᑯᑦ ᐅᑭᐅᕐᑕᖅᑐᕐᒥ ᓄᓇᓯᐅᑎᑯᑖᒧᑦ ᐊᖅᑯᑎᓕᐅᕐᓂᖅ ᐃᓱᒪᒋᔭᐅᔪᓐᓃᓚᐅᕐᓯᒪᔪᖅ ᐊᑭᖃᓕᒑᓂᖓᓄᑦ ᒫᓂ $5.7 ᐱᓕᐊᓐ ᑖᓚᓂ.

ᑖᒃᑯᐊ ᑲᒻᐸᓃᐅᔪᑦ ᐋᖅᑭᒃᓯᖔᖅᖢᑎᒃ ᐅᓄᕐᓂᕐᓴᓂ ᐊᐅᓪᓚᖅᑎᑦᑎᓇᓱᖕᓂᕐᒥ ᑎᑭᓪᓗᒍ 12 ᒥᓕᐊᓐ ᑕᓐᔅ ᓴᕕᕋᔭᒃᓴᒥ ᐊᕐᕌᒍᒥ ᐅᕘᓇ ᓄᓘᔮᑦ ᕿᙳᐊᓂᒃ ᒪᐅᖓ ᐃᑭᓕᑉᔅ ᓴᐅᓐᒧᑦ (Eclipse Sound). ᒐᕙᒪᑐᖃᒃᑯᑦ ᑐᒃᓯᕋᐅᑎᒋᔭᐅᔪᒥ ᐊᖏᓚᐅᕐᓯᒪᙱᒻᒪᑕ 2022-ᒥ ᐊᕐᕌᒍᒐᓴᖕᓂ ᑲᑎᒪᑎᑦᑎᑲᑕᓚᐅᕐᑎᓪᓗᒋᑦ.

ᐹᕕᓐᓛᓐ ᐋᖅᑭᒃᓯᒪᖅᑳᓚᐅᕐᓯᒪᔭᖓᓄᑦ ᐅᑎᓚᐅᕐᑐᑦ ᓴᓇᔪᒪᓪᓗᑎᒃ ᓄᓇᓯᐅᑎᑯᑖᒧᑦ ᐊᖅᑯᑎᒥ, ᑖᓐᓇᓗ ᐊᑐᕋᔭᖅᖢᓂ ᐅᔭᕋᒃᓴᖅᓯᐅᕐᕕᒃ ᐱᓕᕆᕝᕕᐅᖏᓐᓇᕈᓐᓇᕐᓂᖓᒍᑦ, ᑕᐃᒪᓐᓇ ᐅᖃᕐᓯᒪᓚᐅᕐᓯᒪᔪᑦ 2021-ᒥ ᐅᓂᒃᑳᓕᐊᓂ ᐅᑯᓇᙵᑦ ᓄᓘᔮᖕᓂ ᐱᓕᕆᐊᒃᓴᓂ ᐱᕙᓪᓕᐊᔾᔪᑎᒃᓴᓂ ᐅᖃᓚᓯᖏᑦᑎᒍᑦ.

ᓴᓇᓕᕐᓂᐊᕋᓱᒋᔭᐅᔪᑦ ᓄᓇᓯᐅᑎᑯᑖᒧᑦ ᐊᖅᑯᑎᒃᓴᒥ ᑕᒪᑐᒪᓂ ᐊᕐᕌᒍᒥ ᐊᒻᒪ ᐱᐊᓂᒃᑕᐅᓇᔭᕐᓗᓂ ᐊᕐᕌᒍᓂ ᐱᖓᓱᓂ ᓴᓇᔭᐅᓚᐅᕐᑎᓪᓗᒍ, ᑲᒻᐸᓂᐅᔪᑦ ᑐᓴᒐᒃᓴᖏᑦ ᐅᖃᕐᓯᒪᓚᐅᕐᑐᑦ.

ᐅᖃᕐᓯᒪᓚᐅᕐᑐᖅ ᓴᓇᔭᐅᑎᑕᐅᓂᐊᕐᓂᕋᖅᖢᒍ ᑲᓇᑕᒥ ᑲᒻᐸᓂᐅᔪᓂᒃ, “ᐃᓚᐅᓗᑎᒃ ᐃᓄᖕᓄᑦ ᓇᖕᒥᓂᕆᔭᐅᔪᑦ,” ᐊᒻᒪ ᐃᖅᑲᓇᐃᔮᒃᓴᓂ ᓴᖅᑭᑎᑦᑎᒃᑲᓐᓂᕈᑎᐅᓗᓂ ᓄᓇᕗᒥᑦ ᐊᒻᒪ ᑲᓇᑕᒥ.

ᐃᓪᓚᐅᑦ ᐅᖃᓚᐅᕐᑐᖅ ᐅᒃᐱᕈᓱᖕᓂᕋᖅᖢᓂ ᐅᖃᐅᓯᖃᒃᑲᓐᓂᖁᓪᓗᓂᒋᑦ ᒫᓐᓇ ᐊᕙᑎᒋᔭᒧᑦ ᐃᓱᒫᓘᑎᒋᔭᐅᔪᑦ ᓲᕐᓗ ᓴᕕᕋᔭᒃᓴᐅᑉ ᐳᔪᓕᐊᕆᕙᒃᑕᖓ ᐊᒻᒪ ᐅᔭᕋᒃᓯᐅᖅᕕᒃ ᐊᒃᑐᐃᓂᖃᕐᕐᓂᖓ ᑐᒃᑐᐃᑦ ᐊᖅᑯᑎᒋᕙᒃᑕᖏᓐᓂ ᐊᖏᒡᓕᒋᐊᖅᑕᐅᓚᐅᙱᓐᓂᖓᓂ.

“ᑐᓴᖃᑦᑕᕋᒪ ᓱᓕ ᓄᓇᕗᒻᒥᐅᓂ ᐃᓱᒫᓘᑎᖏᓐᓂ ᒫᓐᓇ ᐊᐅᓚᑕᐅᓂᖓᓂ ᐊᒻᒪ ᐊᐅᓚᑦᑎᔾᔪᑎᐅᔪᑦ ᐊᒃᑐᐃᓯᒪᓂᖏᓐᓂᒃ ᑕᒪᐃᓐᓂ ᐃᒪᐅᑉ ᐊᕙᓗᖏᓐᓂ ᐊᒻᒪᓗ ᓄᓘᔮᑉ ᖃᓂᒋᔭᖓᓃᑦᑐᓂᒃ,” ᐅᖃᕐᑐᖅ.