ᐹᕙᓐᓛᓐ ᐅᑎᕋᓱᒍᒪᔪᑦ ᐃᒃᐱᑭᑦᑐᕐᔪᐊᖅᒧᑦ

ᐹᕙᓐᓛᓐᑯᑦ ᓴᕕᕋᔭᒃᓴᒥᒃ ᐅᔭᕋᒃᓯᐅᕐᕕᒃ ᐃᓱᒪᔪᑦ ᐱᓕᕆᕙᓪᓕᐊᓕᕈᒪᓪᓗᑎᒃ ᐃᒃᐱᑭᑦᑐᕐᔪᐊᖅᒥ ᓄᓇᓯᐅᑎᑯᑖᒧᑦ ᐊᖅᑯᑎᓕᐅᕐᓂᕐᒥᒃ ᐊᕐᕌᒍ ᓄᙳᐊᓂᒃ ᑖᒃᑯᐊ ᐃᑲᔫᑎᑖᕈᓐᓇᖅᐸᑕ.

ᐊᖓᔪᖅᑳᖅ ᐊᐅᓚᑦᑎᔨ ᐳᕋᐃᐊᓐ ᐱᐊᓂ ᑐᓴᒐᒃᓴᓕᐅᓚᐅᕐᑐᖅ ᕕᕝᕗᐊᕆ 9-ᒥ ᐅᖃᓪᓚᒃᑎᓪᓗᒍ ᓄᓘᔮᑦ ᓴᕕᕋᔭᒃᓴᒥᒃ ᐅᔭᕋᒃᓯᐅᕐᕕᐅᑉ ᓯᕗᓂᒃᓴᖓᓂᒃ ᐊᖅᓴᖅᓃᑦ ᑲᑎᒪᕕᒡᔪᐊᕐᓇᒥ ᐊᒻᒪ ᐱᓕᕆᐊᓂᒃ ᑕᑯᔭᒐᖃᕐᕕᒃᒥ ᐋᑐᕚᒥ.

“ᐱᓕᕆᐊᖃᕈᒪᓪᓚᕆᒃᑲᑦᑕ ᓄᓇᓯᐅᑎᑯᑖᒧᑦ ᐊᖅᑯᑎᒥ,” ᐅᖃᓚᐅᕐᑐᖅ ᐅᐸᒃᓯᒪᔪᓂᒃ ᒐᕙᒪᒃᑯᓐᓂᒃ ᐱᓕᕆᔨᓄᑦ, ᐃᓄᐃᑦ ᓯᕗᓕᐅᖅᑎᖏᓐᓄᑦ ᐊᒻᒪ ᐅᑭᐅᕐᑕᖅᑐᕐᒥ ᑮᓇᐅᔭᓕᐅᕋᓱᒃᑎᓄᑦ.

ᓄᓘᔮᖕᓂ ᓴᕕᕋᔭᒃᓴᒥ ᐅᔭᕋᒃᓯᐅᕐᕕᒃ ᕿᑭᖅᑖᓘᑉ ᐅᐊᖕᓇᖓᓃᑦᑐᖅ ᓄᓇᕗᒥᑦ.

ᐹᕙᓐᓛᓐᑯᑦ ᐊᕐᕌᒍᓂ ᑕᓪᓕᒪᓂᒃ ᑐᒃᓯᕋᐅᑎᓂᒃ ᐱᓕᕆᐊᖃᕐᓯᒪᔪᖅ ᐊᖏᒡᓕᒋᐊᖅᑎᑦᑎᔪᒪᔾᔪᑎᓂᒃ ᓴᕕᕋᔭᒃᓴᒥᒃ ᐱᑲᑕᖕᓂᖏᓐᓂᒃ ᐅᔭᕋᒃᓯᐅᕐᕕᒃᒥ ᓄᓘᔮᑦ ᑭᙳᐊᑕ ᖃᓂᒋᔭᖓᓂᒃ. ᒐᕙᒪᑐᖃᒃᑯᑦ ᑖᔅᓱᒥᖓ ᐊᖏᓚᐅᕐᓯᒪᙱᑦᑐᑦ ᑐᒃᓯᕋᐅᑎᒥ ᓄᕕᐱᕆᐅᓚᐅᕐᑐᒥᓐ.

2012-ᒥ, ᒐᕙᒪᑐᖃᒃᑯᑦ ᐊᖏᓚᐅᕐᓯᒪᖕᒪᑕ ᐹᕙᓐᓛᓐᑯᑦ ᑐᒃᓯᕋᐅᑎᖓᓂᒃ ᓴᓇᔪᒪᓪᓗᑎᒃ ᓄᓇᓯᐅᑎᑯᑖᖕᒧᑦ ᐊᖅᑯᑎᒥᒃ ᐅᔭᕋᒃᓯᐅᖅᕕᐅᑉ ᓂᒋᐊᓂᒃ ᐃᒃᐱᑭᑦᑐᕐᔪᐊᖅᒥ. ᑕᖅᑭᖅ ᐊᓂᒍᖅᑎᓪᓗᒍ ᑖᒃᑯᐊ ᑲᒻᐸᓂᐅᔪᑦ ᑐᓴᖅᑎᑦᑎᓕᓚᐅᕐᑐᑦ ᐊᐅᓪᓚᖅᑎᑦᑎᖃᑦᑕᕐᓂᐊᕐᓂᖏᓐᓂᒃ ᓄᓘᔮᑦ ᕿᙳᐊᓂᖔᖅ.

ᑕᐃᔅᓱᒪᓂᓕ ᑖᒃᑯᐊ ᑲᒻᐸᓂᐅᔪᑦ ᐅᖃᐅᓯᖃᓚᐅᕐᓯᒪᖕᒪᑕ ᐃᑲᔫᑎᑖᕋᓱᖕᓂᒃᑯ ᓈᒻᒪᙱᓕᐅᕈᑎᖃᕐᓂᕋᖅᖢᑎᒃ ᐃᒃᐱᑭᑦᑐᕐᔪᐊᕐᒥ ᕿᒪᐃᑐᐃᓐᓇᕐᓂᖏᓐᓄᑦ. ᐊᕐᕌᒍᑦ ᖁᓕᑦ ᐊᓂᒍᖅᑎᓪᓗᒋᑦ ᐱᐊᓂ ᐅᖃᒪᐅᕐᑐᖅ ᑖᒃᑯᐊ ᑲᒻᐸᓂᐅᔪᑦ ᑖᔅᓱᒥᖓ ᑐᓗᕈᑎᒋᓯᒪᔭᖓᓂᒃ ᐊᓂᒍᐃᓇᓱᖕᓂᐊᕐᓂᕋᖅᖢᓂ.

“ᐃᒃᐱᑭᑦᑐᕐᔪᐊᖅ ᑕᓪᓕᒪᐃᖅᓱᖅᖢᓂ ᐊᑭᑐᓂᕐᓴᐅᖕᒪᑦ ᐅᕙᙵᓪᓕ ᐅᐊᖕᓇᖓᓂᒃ ᓄᓇᓯᐅᑎᑯᑖᒧᑦ ᐊᖅᑯᑎᐅᓂᐊᖅᑐᒥ ᐊᒻᒪᓗ ᑮᓇᐅᔭᖅᑖᕐᕕᐅᕙᕐᑐᑦ ᐃᑲᔪᕈᑎᒃᓴᓂᒃ ᐋᖅᑭᒃᓯᓯᒪᓚᐅᙱᖢᑎᒃ,” ᐱᐊᓂ ᐅᖃᓚᐅᕐᑐᖅ ᐅᖃᓪᓚᒃᑎᓪᓗᒍ.

ᒫᓐᓇᓕ, ᐅᖃᕐᑐᖅ, ᓄᓘᔮᖕᓂ ᓇᓗᓇᕈᓐᓃᖅᑐᖅ ᓴᕕᕋᔭᒃᓴᖅᑕᖃᑦᑎᐊᕐᓂᖓᓂᒃ ᐱᐅᔪᓂᒃ ᐄᓇᐅᔭᑎᒍᑦ ᐃᑲᔪᕈᑎᐅᔪᓐᓇᖅᑐᓂᒃ.

ᐹᕙᓐᓛᓐᑯᑦ ᐊᖓᔪᖅᑳᒐᓚᖏᑦ ᐅᖃᕐᓯᒪᖕᒪᑕ ᓄᓇᓯᐅᑎᑯᑖᒧᑦ ᐊᖅᑯᑎ ᓱᓕ ᐃᒃᓯᖕᓇᖅᑕᐅᙱᓐᓂᖓᓂᒃ. ᖃᖓᑦᑎᐊᓵᖅ 2021-ᒥ ᐅᖃᐅᓯᖃᖃᑦᑕᓚᐅᕐᑐᑦ ᐃᒃᐱᑭᑦᑐᕐᔪᐊᖅᒥ ᐋᖅᑭᓱᐃᓂᐊᕈᒪᓪᓗᑎᒃ.

ᑮᓇᐅᔭᓂ ᐃᑲᔪᖅᑕᐅᔭᕆᐊᖃᕐᓂᐅᑉ ᐊᓯᐊᒍᑦ ᑭᖑᓪᓕᕐᒥ ᐃᒃᐱᑭᑦᑐᕐᔪᐊᖅᒥ ᖃᓄᐃᓕᐅᖅᐸᓪᓕᐊᔪᒪᓂᖓ ᐃᓚᖃᕐᓂᐊᖅᑐᖅ ᓄᓇᓕᖕᓂ ᐅᖃᓪᓚᖃᑎᖃᑲᑕᖕᓂᕐᒥᒃ ᐊᒻᒪᓗ ᐊᖏᖅᑕᐅᔾᔪᑎᐅᔭᕆᐊᓕᖕᓂ ᐱᓕᕆᐊᖃᕐᓗᑎᒃ, ᐅᖃᓚᐅᕐᑐᖅ ᐱᐊᓂ.

ᐱᐊᓂ ᐊᑐᐃᓐᓇᐅᓚᐅᙱᒻᒪ ᐊᐱᖅᓱᖅᑕᐅᔪᒪᑎᓪᓗᒍ ᑐᓴᖅᑎᑦᑎᐊᓪᓚᓚᐅᖅᖢᓂ ᐊᖏᒡᓕᒋᐊᖅᑎᑦᑎᔪᒪᓂᖓᓂᒃ ᑲᒻᐸᓂᖓᑕ ᐸᕐᓇᐅᑎᖏᓐᓂ.

ᓄᓇᙳᐊᖅ ᓴᕿᑎᑦᑎᓯᒪᔪᖅ ᐹᕙᓐᓛᓐ ᓴᕕᕋᔭᒃᓴᒥᒃ ᐅᔭᕋᒃᓯᐅᕐᕕᒃ ᓄᓘᔮᖕᓂ ᐅᔭᕋᕐᓯᐅᕕᖓ ᐊᒃᑐᐊᓂᖃᖅᖢᓂ ᐃᒃᐱᑭᑦᑐᕐᔪᐊᖅᒥ, ᑕᕝᕙᓂᓗ ᓴᓇᓯᒋᐊᕈᒪᓪᓗᑎᒃ ᓄᓇᓯᐅᑎᑯᑖᖕᒧᑦ ᐊᖅᑯᑎᒃᓴᒥ ᐊᐅᓪᓚᖅᑐᒃᓴᓄᑦ. ᐊᒻᒪᓗ ᓄᓇᙳᐊᓂ ᓄᓘᔮᑦ ᑭᙳᐊ ᓯᕗᓪᓕᕐᒥ ᐅᒥᐊᕐᔪᐊᓄ ᐊᖅᑯᑎᒋᔭᐅᔪᒪᓂᑯᑦ. (ᓄᓇᙳᐊᑦ ᐅᑯᓇᙵᑦ ᐹᕙᓐᓛᓐ ᓴᕕᕋᔭᒃᓴᒥᒃ ᐅᔭᕋᒃᓯᐅᕐᕕᒃᒥ)

ᓄᓇᕗᑦ ᓯᕗᓕᐅᖅᑎᖓ ᐸᐅᓗᓯ ᐊᕿᐊᕈᖅ ᑐᓵᖃᑕᐅᓚᐅᕐᑐᖅ ᐱᐊᓂ ᐅᖃᓪᓚᒃᑕᖓᓂᒃ. ᐅᖃᓚᐅᕐᑐᖅ ᑐᓴᖅᑎᑦᑎᔾᔪᑎᖓ ᑐᓴᕆᐅᕐᓂᕋᖅᖢᓂᐅᒃ, ᑭᓯᐊᓂᓕ ᐅᖃᖅᖢᓂ ᑐᓴᑲᑕᑐᐃᓐᓇᕐᓂᐊᕐᓂᕋᖅᖢᓂ ᓄᓇᓖᑦ ᐊᒻᒪ ᑲᑐᔾᔨᖃᑎᒌᑦ ᐅᖃᖃᑎᒋᔭᐅᓕᕐᐸᑕ.

“ᑕᑯᒍᑦᑎᒍᑦ ᑐᒃᓯᕋᐅᑎᐅᔪᑦ ᑕᐃᒪᓕ ᕿᒥᕐᕈᐊᕈᓐᓇᕐᓂᐊᕋᑦᑎᒍᑦ,” ᐅᖃᕐᑐᖅ. “ᑐᓴᐅᒪᑎᑦᑎᖃᑦᑕᕐᓯᒪᒐᑦᑕ ᑐᓴᑐᐃᓐᓇᕈᒪᓂᑦᑎᓐᓂᒃ, ᑲᑎᖃᑎᖃᕐᓗᑕ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᓄᓇᕗᑦ ᑐᙵᕕᒃᑯᓐᓂᒃ, ᐹᕙᓐᓛᓐᑐᓐᓂᒃ, ᐊᒡᓂᑯᒃᑯᓐᓂᒃ, ᑭᒃᑯᑐᐃᓐᓇᕐᓂ.”

ᐅᖃᐅᓯᒃᓴᓂᒃ ᓄᓇᑦᓯᐊᕐᒥ ᐱᕙᓪᓕᐊᔪᓅᖅᑕᐅᔪᓂᒃ, ᒐᕙᒪᑐᖃᒃᑯᑦ ᐅᑭᐅᕐᑕᖅᑐᓕᕆᓂᕐᒧᑦ ᒥᓂᔅᑕ ᑖᓂᐅᓪ ᕚᓐᑐ ᐅᖃᓚᐅᕐᒪ, “ᐅᓇ ᓂᒋᐊᒎᖓᔪᖅ ᐃᒃᐱᑭᑦᑐᕐᔪᐊᒃᑯᑦ ᐊᖏᖅᑕᐅᓚᐅᕐᓯᒪᔪᖅ ᐊᒻᒪᓗ ᖁᕕᐊᒋᑐᐃᓐᓇᖅᖢᑎᒍᑦ ᐹᕙᓐᓛᓐᑯᑦ ᓄᓇᓕᖕᓂ ᐃᓄᖕᓂᓪᓗ ᐅᖃᓪᓚᖃᑎᖃᑲᑕᖕᓂᖏᓐᓂᒃ.

“ᑎᑎᕋᕐᕕᕗᑦ ᐱᓕᕆᖃᑎᖃᐃᓐᓇᕐᓂᐊᖅᑐᑦ ᐱᓕᕆᐊᖃᖅᑐᓂᒃ ᓴᐳᔾᔨᓯᒪᓇᓱᒡᓗᑎᒃ ᐃᖅᑲᓇᐃᔮᓂᒃ ᐊᒻᒪ ᑮᓇᐅᔭᓕᐅᖅᑎᑦᑎᓇᓱᖕᓂᒃᑯᑦ, ᑖᒃᑯᐊᓗ ᐃᓄᐃᑦ ᐱᔪᓐᓇᐅᑎᖏᑦ ᐃᓱᒪᒋᔭᐅᖕᒥᓗᑎᒃ.”

ᐱᐊᓂ ᐅᖃᓪᓚᒃᑕᖓᒍᑦ ᐊᕐᕌᒎᓴᕐᑐᒥᒃ ᐅᖃᐅᓯᖃᖅᖢᓂ ᖁᕕᐊᓱᓚᐅᕐᓯᒪᙱᓐᓂᖓᓂᒃ ᒐᕙᒪᑐᖃᒃᑯᑦ ᐊᖏᙱᑎᓪᓗᒋ ᓄᓘᔮᖕᓂ ᐱᓕᕆᓂᖅ 2 ᐊᖏᒡᓕᒋᐊᕈᒪᓂᕐᒥᒃ.

“ᑕᑯᓐᓇᑐᐃᓐᓇᓕᓚᐅᕐᑐᖅ ᖁᕕᐊᓇᙱᔾᔪᑎᑐᐃᓐᓇᕐᓂᒃ ᐊᕐᕌᒍᑦ ᑕᓪᓕᒪᑦ ᐅᖃᓪᓚᖃᑎᖃᑲᑕᓚᐅᖅᖢᑎ ᐊᒻᒪᓗ ᐱᖁᔭᑎᒍᑦ ᑲᒪᒋᔭᖃᕐᓂᕐᒥᒃ,” ᐅᖃᕐᑐᖅ.

“ᑭᓯᐊᓂᓕ ᓂᕈᐊᕐᓯᒪᖔᖅᑐᖓ ᓯᕗᓂᒃᓴᒥᒃ ᓂᕆᐅᖕᓂᕐᓴᐅᓂᕐᒥᒃ.”

ᐱᐊᓂ ᐅᖃᐅᓯᖃᓚᐅᕐᑐᖅ ᐹᕙᓐᓛᓐᑯᑦ 71-ᓂ ᓄᑖᓂᒃ ᐃᓄᖕᓂ ᐃᖅᑲᓇᐃᔭᖅᑎᖃᕐᓂᖏᓐᓂᒃ, ᑕᐃᒪᓐᓇᓗ ᑲᑎᖢᑎᒃ 350-ᐅᓕᖅᖢᑎᒃ. ᐅᖃᐅᓯᖃᓚᐅᕐᒥᔪᖅ ᓄᓇᕗᑦ ᖃᓄᐃᓕᐅᕈᑎᑎᒍᑦ ᐃᑲᔪᖃᑕᐅᓂᐊᕐᓂᕋᖅᖢᓂᐅᒃ ᐳᔪᕐᓗᖃᖅᑐᒥᒃ ᐊᑐᖃᑦᑕᔾᔮᔪᓐᓃᕐᓂᕐᒥᒃ.

“ᓯᕗᓂᒃᓴᖅ ᖁᕕᐊᓇᓛᖑᓕᕐᑐᖅ ᓄᓘᔮᖕᓂ ᐅᔭᕋᒃᓯᐅᕐᕕᒃᒧᑦ,” ᐱᐊᓂ ᐅᖃᖅᑐᖅ

“ᓄᓇᕐᔪᐊᖅ ᓄᓇᔪᑦ ᓴᕕᕋᔭᒃᓴᖏᓐᓂᒃ ᐱᖃᕆᐊᖃᕐᒪᑕ.”