ᖃᒪᓂᑦᑐᐊᖅ ᐸᐃᕆᕝᕕᒃ ᐱᔪᓐᓇᖅᓯᕗᑦ $6.4 ᒥᓕᐊᓐ ᑖᓚᓂ ᓄᑖᒧᑦ ᐸᐃᕆᕝᕕᒃᓴᒧᑦ
ᐊᑐᓃᓕᖓᔪᑦ ᐃᓕᓐᓂᐊᕐᕖᑦ ᐃᓄᖃᕈᓐᓇᕐᓂᐊᕐᓗᑎᒃ 56-ᓄᑦ ᓱᕈᓯᕐᓄᑦ
ᖃᒪᓂᑦᑐᐊᖅ ᐸᐃᕆᕝᕕᒃᒥ ᐃᖅᑲᓇᐃᔭᖅᑎᒋᔭᐅᔪᑦ, ᓴᐅᒥᖓᓂ, ᕼᐋᓕ ᑲᔪᕐᔪᒃ, ᕘᓇ ᑲᓪᓗᒃ, ᕌᐱᓐ ᐃᖅᑲᑦ, ᐊᒻᒪ ᐃᓕᓴᐱ ᐃᕿᓕᒃ, ᐸᐃᕆᔭᖏᓐᓂᒃ ᓱᕈᓯᕐᓂ ᐱᖃᑎᖃᖅᖢᑎᒃ ᒫᓐᓇ ᐃᓂᒋᓚᐅᑲᒃᑕᖏᓐᓂᒃ ᐅᕙᓂ ᐸᕼᐃ ᐃᒡᓗᒥ. ᐸᐃᕆᕝᕕᐅᓚᐅᕐᓯᒪᔪᖅ ᐃᑭᖢᓂ ᐱᐅᔪᓐᓃᓚᐅᕐᓯᒪᒻᒪᑦ 2021-ᒥ, ᓴᓇᔭᐅᕙᓪᓕᐊᓕᕐᓂᐊᖅᑐᖅ ᐅᓇ $6.35 ᒥᓕᐊᓐ ᑖᓚᑐᕐᑐᖅ ᐸᐃᕆᕝᕕᒃᒪᒻ ᐱᒋᐊᕐᓕᐊᒻ:ᓕ ᐊᐅᔭᖅ ᐋᒐᓯᒥ. (ᐊᔾᔨᙳᐊᖅ ᐅᕙᙵᑦ ᐃᒥ ᑐᑐ)
For the English version of this story, see Baker Lake daycare secures $6.4M for new facility.
ᖃᒪᓂᑦᑐᐊᖅ ᐸᐃᕆᕝᕕᒃ ᐱᔪᓐᓇᕐᓯᕗᑦ $6.4 ᒥᓕᐊᓐᓂ ᓄᑖᒥ ᐸᐃᕆᕝᕕᒃᓴᒃᓴᒧᑦ ᑖᓐᓇᓗ ᓴᓇᔭᐅᓕᕐᓂᐊᖅᖢᓂ ᐊᐅᔭᖅᑐ.
ᓄᑖᖅ ᐃᒡᓗ, ᒪᑐᐃᓛᕋᓱᒋᔭᐅᔪᖅ 2026-ᒥ ᒪᕐᕈᐃᕐᓗᓂ ᐊᖏᓂᕐᓴᐅᓂᐊᖅᑐᖅ ᐃᓄᖃᕈᓐᓇᕐᓯᓗᓂ 56-ᓂ ᓱᕈᓯᕐᓂ ᐱᖓᓱᓂ ᐃᓕᓐᓂᐊᕐᕕᖕᓂ ᑕᕝᕙᓂ ᒪᑯᓄᖓ ᐃᓕᓐᓂᐊᕐᓂᐊᓕᓵᖅᑐᓄᑦ, ᐱᓱᒋᐅᓕᓵᕐᓂᑯᓄᑦ ᐊᒻᒪ ᓱᕈᓯᓛᕐᓄᑦ, ᐅᑯᐊ ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓴᖅᑎᑦᑎᓚᐅᕐᑐᑦ ᒫᔅᓯ 11-ᒥᑦ ᑐᓴᒐᒃᓴᑎᒍᑦ.
“ᓂᕈᐊᕋᓱᓚᐅᕐᑐᒍᑦ ᕿᑎᐸᓗᐊᓃᑦᑐᒥ, ᓄᓇᓖᑦ ᐊᑯᓐᓂᖓᑕ ᖃᓂᒋᔭᖓᓂᒃ ᑕᐃᒪᓐᓇ ᐅᖓᓯᒋᔭᐅᓗᐊᔾᔮᙱᒻᒪᑦ ᐊᖓᔪᖅᑳᓄᑦ,” ᐅᖃᕐᑐᖅ ᐃᒥ ᑐᑐ, ᐃᒃᓯᕙᐅᑕᕆᔭᐅᔪᖅ ᖃᒪᓂᑦᑐᐊᖅ ᐸᐃᕆᕝᕕᐅᑉ ᑲᑎᒪᔨᖏᓐᓄᑦ, ᐊᐱᕐᓱᖅᑕᐅᑎᓪᓗᒍ.
ᓄᑖᖅ ᐸᐃᕆᕝᕕᒃᓴᖅ, ᓱᓕ ᖃᓄᐃᓕᖓᓂᐊᕐᓂᖓ ᐱᐊᓂᒃᑕᐅᕙᓪᓕᐊᓇᓱᒃᑐᖅ, ᐃᓚᖃᕐᓂᐊᕐᒥᔪᖅ ᑐᑭᒧᐊᖅᑎᑦᑎᔨᐅᑉ ᑎᑎᕋᕐᕕᖓᓂ ᐊᒻᒪ ᑲᑎᒪᕝᕕᒃᓴᒥᒃ ᐊᒻᒪᓗ ᓯᓚᑖᓂ ᐊᓃᕋᔭᒃᕕᒃᓴᒥᒃ ᐊᒻᒪ ᓄᓇᓯᐅᑎᓄᑦ ᓄᖃᖓᕝᕕᒃᓴᒥ.
ᑐᑐ ᐅᖃᒃᑲᓐᓂᓚᐅᕐᑐᖅ ᐃᓚᐅᓕᖅᑎᑦᑎᓯᒪᓂᖏᓐᓂᒃ ᐃᓄᐃᑦ ᐃᓕᖅᑯᓯᖓᒎᖓᔪᓂᒃ ᐊᒻᒪ ᓄᓇᓖᑦ ᓴᓇᐅᒐᖏᓐᓂ ᓴᖅᑭᔮᒐᖃᖅᖢᑎᒃ.
“ᐃᒡᓗᒥ ᑎᑎᕋᐅᔭᒐᖅᑏᑦ ᐱᓕᕆᐊᖃᕐᓂᕐᓴᐅᒻᒪᑕ ᐃᓄᐃᑦ ᓯᕗᓕᕕᓂᖏᑦᑕ ᐃᓕᖅᑯᓯᖏᓐᓂᒃ,” ᐅᖃᕐᑐᖅ.
“ᓴᖅᑭᔮᓗᐊᖃᑕᐅᓂᐊᕐᑐᖅ ᐃᒡᓗᕕᒐᖅᑎᑐᑦ ᐋᖅᑭᒃᓯᒪᓂᐊᕐᓂᖓ ᐃᓚᖓᒍᑦ.”
ᐊᒻᒪᓗ, ᑐᖑᔪᕈᔪᒃᑐᐃᑦ ᐊᒻᒪ ᖁᕐᓱᖅᑐᐃᑦ ᐊᕙᓗᒋᓂᐊᖅᑕᖓᓄᑦ ᑎᑎᕋᐅᔭᒐᕐᒥᙶᖅᖢᓂ ᖃᐅᔨᒪᔭᐅᑦᑎᐊᖅᑐᒥ ᖃᒪᓂᑦᑐᐊᕐᒥ ᑎᑎᕋᐅᔭᒐᖅᑎᒥᒃ ᔭᓂ ᐆᓇᒃ.
“ᐅᐱᒍᓱᑦᑎᐊᓚᐅᕐᑐᖓ ᓇᓂᓯᑲᑕᖕᓂᕋᖅᑎᓪᓗᒋᑦ ᑎᑎᕋᐅᔭᒐᕐᓂ ᓴᓇᔭᐅᓯᒪᔪᓂᒃ ᖃᒪᓂᑦᑐᐊᕐᒥᐅᓄᑦ,” ᑐᑐ ᐅᖃᕐᑐᖅ.
“ᑐᕌᒐᕆᔭᐅᔪᕐᓕ “ᑐᕌᒐᕆᔭᐅᔪᕐᓕᖅ ᐱᑕᖃᓕᓛᕐᓗᓂ ᐊᒥᓱᓂ ᐃᓕᖅᑯᓯᓕᕆᓂᒃᑯᑦ ᐱᓕᕆᐊᒃᓴᓂ ᐅᕙᓂ ᓄᑖᒥ ᐸᐃᕆᕝᕕᒃᒥ ᐃᓐᓇᕈᖅᐸᓪᓕᐊᓂᕐᒧᑦ ᓈᒻᒪᒐᔭᖅᑐᒥᓐ.”
ᐅᓇ ᐱᓕᕆᐊᕆᔭᐅᓕᕐᓯᒪᔪᖅ ᐃᑭᒍᔾᔨᓚᐅᕐᓯᒪᓪᓗᑎᒃ ᐋᒐᓯ 2021-ᒥ ᐸᐃᕆᕝᕕᒃᒥ ᓯᕗᓪᓕᐅᓚᐅᕐᑐᒥ. ᐃᑲᔫᑎᑖᕐᑐᑦ ᐅᕘᓇ $2.5 ᒥᓕᐊᓐ ᑖᓚᓂ ᐃᑲᔫᑎᒃᓴᓂ ᐊᖏᕈᑎᑎᒍᑦ ᐅᑯᓇᙵᑦ ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᒻᒪ $3.5 ᒥᓕᐊᓐ ᓄᓇᕗᒥᑦ ᒐᕙᒪᒃᑯᑦ ᓱᕈᓯᓛᓂᒃ ᐃᓕᓐᓂᐊᖅᑐᓕᕆᓂᕐᒧᑦ ᐊᒻᒪ ᓱᕈᓯᓛᓕᕆᓂᕐᒧᑦ ᐱᓕᕆᐊᖃᖅᑐᓂᒃ.
ᐊᒡᓂᑯ ᐃᒎᓪ ᐅᔭᕋᒃᓯᐅᕐᕕᒃ ᓕᒥᑎᑦ ᐊᒻᒪ ᐲᑕᐅᑉ ᐊᐅᓪᓚᑎᑦᑎᔨᖏᑦ (Peter’s Expediting Ltd.) ᐃᑲᔫᓯᐊᖅᑖᖅᑎᑦᑎᓯᒪᖕᒥᔪᖅ.
ᑕᐃᒪᙵᑦ ᐃᑭᓚᐅᕐᑎᓪᓗᒍ ᐸᐃᕆᕝᕕᖃᕐᑐᑦ ᐸᕼᐃ ᐃᒡᓗᒥ.
ᐅᓇ ᐸᕼᐃ ᐃᒡᓗ, ᐊᑐᖅᑕᐅᕙᓗᐊᙱᑦᑐᖅ ᐊᖏᔪᒥ ᐃᒡᓗᕈᓯᖃᖅᖢᓂ, ᓂᕿᓕᐅᕐᕕᕋᓛᒥᑦ ᐊᒻᒪᓗ ᐊᓯᖏᓐᓂ ᐃᒡᓗᕈᓯᕐᓂ, ᑕᐃᒪᓐᓇ ᐸᐃᕆᕝᕕᒃ ᐱᔨᑦᑎᕋᐃᓐᓇᕈᓐᓇᖅᓯᓯᒪᔪᖅ ᓄᓇᓕᖕᓄᑦ.
ABF Arctic, ᖃᒪᓂᑦᑐᐊᕐᒥ ᑲᒻᐸᓂᐅᔪᖅ ᐱᓕᕆᐊᖃᖅᐸᒃᑐᑦ ᐊᐅᓚᐅᑎᒐᓚᖕᓂ ᐊᒻᒪ ᓴᓇᕝᕕᖕᓂ ᐱᓕᕆᐊᒃᓴᓂ ᓄᓇᕗᒥᑦ, ᐊᐅᓚᑦᑎᓂᐊᖅᑐᑦ ᐸᐃᕆᕝᕕᒃᓴᐅᑉ ᓴᓇᔭᐅᓂᖓᓂᒃ.
“ᐃᓱᒪᒐᑦᑕ ᐋᒐᓯᒥ ᓴᓇᓕᕈᒪᓪᓗᑕ ᑭᓯᐊᓂᓕ ᐅᒥᐊᕐᔪᐊᖅ ᖃᓄᐃᓐᓂᐊᕐᓂᖓ ᒪᓕᒡᓗᒍ,” ᑐᑐ ᐅᖃᕐᑐᖅ, ᑕᒪᒃᑯᐊ ᐃᒡᓗᓕᐅᒐᒃᓴᐃᑦ ᓴᓇᔭᐅᓂᐊᕐᑐᑦ ᐊᐅᔭᖅ ᑭᓯᐊᓂ ᑎᑭᓐᓂᐊᕐᒪᑕ.
ᐸᐃᕆᕝᕕᒃᒧᑦ ᑲᑎᒪᔩᑦ ᐊᒻᒪ ᐊᖓᔪᖅᑳᕆᔭᐅᔪᑦ ᐅᖃᖃᑎᒌᕈᓘᔭᓚᐅᕐᑐᑦ ᐱᓕᕆᐊᒃᓴᐅᑉ ᒥᒃᓵᓄᑦ, ᐅᖃᕐᑐᖅ, ᐸᕐᓇᒃᓯᒪᓪᓗᑎᒃ ᐃᑲᔪᖅᑎᒋᔭᐅᔪᑦ ᑮᓇᐅᔭᓂᒃ ᐱᕈᖅᑎᑦᑎᓇᓱᖕᓂᕐᒧᑦ ᑲᑎᒪᔨᕋᓛᑦ ᑲᒪᒋᔭᖃᖅᑎᑕᐅᓂᐊᕐᓗᑎᒃ ᐃᑲᔫᑎᒃᓴᓄᑦ ᐸᐃᕆᕝᕕᒃᒥ.
“ᐱᓇᓱᒍᒪᓂᖅᑕᖃᑦᑎᐊᓕᕐᒪ ᐊᖓᔪᖅᑳᕆᔭᐅᔪᑦ ᐃᑲᔪᕈᒪᓪᓗᑎᒃ,” ᑐᑐ ᐅᖃᕐᑐᖅ.
ᐅᖃᒃᑲᓐᓂᖅᖢᓂ ᐃᑲᔫᑎᒃᓴᑦ ᐊᖏᔪᓂᙶᖅᑐᑦ ᐊᑑᑎᖃᒻᒪᕆᖕᓂᐊᕐᓂᖏᓐᓂᒃ, ᓴᓇᔭᐅᓂᖓ ᐊᓂᒍᑦᑎᐊᕐᓂᐊᖅᐸᑦ ᓄᓇᖃᖅᑐᓂᒃ ᐱᓇᓱᒃᑕᐅᓯᒪᓪᓗᓂ.
“ᑕᐅᑐᙳᐊᖅᑕᕋᓕ ᐆᒧᖓ ᐱᓕᕆᐊᕐᔪᐊᖏᖑᓂᐊᖅᑐᒧᑦ ᓄᓇᕐᔪᐊᕐᒥᐅᑕᑦ ᑐᑭᓯᑎᑦᑎᑕᐅᓗᑎᒃ ᑕᐃᒪᐃᓕᐅᕈᓐᓇᕐᓂᖏᓐᓂᒃ ᓄᓇᓖᑦ, ᐊᒻᒪᓗ ᐱᓕᕆᐊᖑᔪᓐᓇᖅᖢᓂ ᓱᕈᓯᖏᓐᓄᑦ, ᐃᓚᖏᓐᓄᑦ, ᓄᓇᓕᖏᓐᓄᑦ,” ᐅᖃᕐᑐᖅ.
(0) Comments