ᖃᒪᓂᑦᑐᐊᕐᒥ ᐅᓂᒃᓯᒪᔪᖅ ᕿᒪᒃᑕᐅᕗᖅ ᐅᓪᓗᒐᓴᓂ ᐋᓐᓂᐊᕕᓕᐊᖅᑐᒧᑦ ᒪᓕᒃᑎᖃᕐᓇᓂ

For the English version of this story, please see Baker Lake family upset after medical travellers left without escorts for days.

ᖃᒪᓂᑦᑐᐊᕐᒥ ᐊᖑᒻᒥ ᐅᖃᖅᐳᖅ ᐃᓚᖏᑦ ᐅᒃᐱᕈᓱᒍᓐᓃᕐᓂᖏᓐᓂ ᓄᓇᕘᑉ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᑲᐅᙱᓕᐅᕈᑎᖃᓚᐅᖅᑎᓪᓗᒋᑦ ᑐᐊᕕᕐᓇᖅᑐᒃᑯᑦ ᐋᓐᓂᐊᖅᑐᓄᑦ ᖃᖓᑕᓲᓂ ᐱᓕᕆᔾᔪᓯᐅᔪᓂ ᕿᒪᐃᓚᐅᖅᑎᓪᓗᒍ ᒪᕐᕉᖕᓂ ᐃᓚᒋᔭᒥᓂᑦ ᐃᓄᑑᓪᓗᑎᒃ ᖃᔅᓯᒐᓚᖕᓂ ᐅᓪᓗᓂᑦ ᐅᐃᓂᐱᐊᒡᒥ ᐋᓐᓂᐊᕕᖕᒥ ᐊᓯᐊᒎᖅᑐᓂ ᖃᓄᐃᓐᓂᐅᔪᓂ.

“ᐃᑭᔪᓐᓇᙱᑎᑕᐅᓪᓗᓂ ᑐᐊᕕᕐᓇᖅᑐᒃᑯᑦ ᐋᓐᓂᐊᖅᑐᓄᑦ ᖃᖓᑕᓲᒧᑦ ᒪᓕᒃᑎᐅᓪᓗᓂ ᐊᑲᐅᙱᓕᐅᕈᑎᙳᖅᐳᖅ,” ᓴᐃᓚᔅ ᐊᕐᓇ’ᓈᖅ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ ᑎᓯᐱᕆ 5−ᒥ.

ᐊᕐᓇ’ᓈᖅ ᐅᓂᒃᑳᕆᓚᐅᖅᐳᖅ ᒪᕐᕉᖕᓂ ᐊᓯᐊᒎᖅᑐᓂ ᖃᓄᐃᓐᓂᐅᔪᓂ ᑕᒪᑐᒪᓂ ᐊᕐᕌᒎᔪᒥ ᐃᒻᒥᒃᑰᖅᑐᓂ ᐃᓚᒌᖑᔪᓂ ᐋᓐᓂᐊᕕᓕᐊᖅᑐᓄᑦ ᒪᓕᒃᑎᖃᕈᓐᓇᓚᐅᙱᑦᑐᓂ ᑐᐊᕕᕐᓇᖅᑐᒃᑯᑦ ᐋᓐᓂᐊᖅᑐᓄᑦ ᖃᖓᑕᓲᒃᑯᑦ ᖃᓪᓗᓈᑦ ᓄᓇᖓᓐᓄᑦ.

ᐅᖃᓚᐅᖅᐳᖅ ᐋᒍᔅᑎ 23−ᒥ — ᓯᕙᑖᕐᕕᖕᒥ— ᐃᓅᔪᓐᓃᖅᓯᒪᓕᖅᑐᖅ ᓄᓕᐊᖓ ᓘᓯ ᐊᕐᓇ’ᓈᖅ ᐃᓂᒃᓴᓕᐅᖅᑕᐅᓯᒪᓚᐅᖅᐳᖅ ᑐᐊᕕᕐᓇᖅᑐᒃᑯᑦ ᐋᓐᓂᐊᖅᑐᓄᑦ ᖃᖓᑕᓲᒥᒃ ᖃᒪᓂᑦᑐᐊᕐᒥ ᐅᐃᓂᐱᐊᒡᒧᑦ ᐋᓐᓂᐊᕕᖕᒥ ᐸᖅᑭᔭᐅᓂᕐᒧᑦ.

ᑭᓯᐊᓂ ᐅᖃᐅᔾᔭᐅᓚᐅᖅᐳᖅ ᐃᓂᒃᓴᖃᙱᓐᓂᖓᓂ ᑐᐊᕕᕐᓇᖅᑐᒃᑯᑦ ᐋᓐᓂᐊᖅᑐᓄᑦ ᖃᖓᑕᓲᒥᒃ ᐋᓐᓂᐊᕕᓕᐊᕐᓂᖓᓂ ᒪᓕᒃᑎᒃᓴᖓᓄᑦ ᐊᒻᒪ ᒪᓕᒃᑎᖓ ᐊᑭᓕᕆᐊᓕᖕᒥ ᖃᖓᑕᓲᒃᑰᕆᐊᖃᖔᓚᐅᖅᐳᖅ, ᐊᑐᐃᓐᓇᐅᔪᒥ ᖃᖓᑕᓲᒥᒃ ᑭᓯᐊᓂ ᐅᓪᓗᑦ ᐱᖓᓱᑦ ᐊᓂᒍᕈᓂᐅᓂᐊᓚᐅᖅᐳᖅ, ᒪᓕᒃᑐᒥ ᐊᐃᑉᐹᓂ.

ᑭᓯᐊᓂ ᓇᒡᒐᔾᔭᐅᒥ ᐅᓐᓄᓕᓵᖅᑎᓪᓗᒍ, ᐃᓕᑦᑎᓚᐅᖅᐳᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐱᔪᓐᓇᖅᑎᑦᑎᔨᓂ ᐅᐃᓂᐱᐊᒡᒥ ᐃᓱᒪᓕᐅᕆᓚᐅᖅᐳᑦ ᐃᓚᒋᔭᐅᔪᒥ ᓂᕈᐊᖅᑕᐅᓯᒪᔪᒥ ᐋᓐᓂᐊᕕᓕᐊᖅᑐᒧᑦ ᒪᓕᒃᑎᒃᓴᖓ ᐅᐸᒍᓐᓇᖅᑎᑕᐅᓇᔭᙱᓐᓂᖓᓂ ᓘᓯ ᐊᕐᓇ’ᓈᕐᒥ ᑕᐃᑲᓂ ᐊᒻᒪ ᓇᓂᓯᔭᕆᐊᖃᕋᔭᖅᐳᑦ ᐃᓇᖏᖅᑎᒃᓴᒥ ᒪᓕᒃᑎᒃᓴᒥᒃ.

ᑕᐃᒪᐃᑦᑐᓐᓇᙱᓐᓂᖓᓂ, 68-ᓂ-ᐅᑭᐅᓕᒃ ᓴᐃᓚᔅ ᐊᕐᓇ’ᓈᖅ — ᓇᖕᒥᓂᖅ ᐋᓐᓂᐊᖃᕐᓇᕐᓂᕐᒧᑦ ᐊᑲᐅᙱᓕᐅᕈᑎᖃᕐᒥᔪᖅ — ᐃᓱᒪᓕᐅᕆᓚᐅᖅᐳᖅ ᐃᒻᒥᓂᒃ ᐊᐅᓪᓛᕐᓂᕐᒧᑦ.

ᖃᖓᑕᓲᓂ ᐅᐃᓂᐱᐊᒡᒧᑦ ᑕᑕᑦᑎᐊᖅᖢᑎᒃ ᑭᓯᐊᓂ ᕿᑎᖅᑰᒥ ᐅᓐᓄᖓᓂ, ᑎᑭᓚᐅᖅᐳᖅ ᐅᐃᓂᐱᐊᒡᒧᑦ ᐅᓐᓄᕐᔪᐊᖅᑎᓪᓗᒍ ᐅᓐᓄᖓᓂ ᐊᒻᒪ ᑕᑯᓚᐅᖅᐳᖅ ᓄᓕᐊᖓᓂ ᓯᕗᓪᓕᖅᐹᒥ ᐅᓪᓗᑐᐃᓐᓇᕐᒥ ᐅᓪᓛᖓᓂ ᐋᓐᓂᐊᕕᓕᐊᖅᑐᒧᑦ ᒪᓕᒃᑎᖃᕐᓇᓂ ᐅᓪᓗᓄᑦ 6−ᓄᑦ.

ᐱᔾᔪᑎᖃᖅᑐᒥ ᒪᒥᔪᐃᑦᑐᒥ ᐋᓐᓂᐊᒧᑦ ᐊᑲᐅᙱᓕᐅᕈᑕᐅᔪᓂ, ᓘᓯ ᐊᕐᓇ’ᓈᖅ ᐊᐅᓪᓛᖅᓯᒪᓂᖃᓚᐅᖅᐳᖅ ᐊᒥᓱᐊᖅᑐᖅᖢᓂ ᓯᕗᓂᐊᓂ. ᐅᓇ ᓯᕗᓪᓕᖅᐹᖑᓪᓗᓂ; ᑭᓯᐊᓂ, ᐋᓐᓂᐊᕕᓕᐊᖅᑐᒧᑦ ᒪᓕᒃᑎᒥ ᐊᐅᓪᓛᖃᑎᖃᕈᓐᓇᓚᐅᙱᓚᖅ.

ᓴᐃᓚᔅ ᐊᕐᓇ’ᓈᖅ ᐊᓂᖓ, ᑭᐊᓂᑦ ᐊᕐᓇ’ᓈᖅ, ᐊᔾᔨᐸᓗᐊᓂ ᐊᑐᕐᓂᑯᖃᓚᐅᖅᐳᖅ ᓯᑎᐱᕆᒥ.

ᑕᐃᑲᓂ ᖃᓄᐃᓐᓂᐅᔪᒥ, ᑭᐊᓂᑦ ᐊᕐᓇ’ᓈᖅ ᐃᑭᔪᓐᓇᓚᐅᖅᐳᖅ ᑐᐊᕕᕐᓇᖅᑐᒃᑯᑦ ᐋᓐᓂᐊᖅᑐᓄᑦ ᖃᖓᑕᓲᒧᑦ. ᐋᓐᓂᐊᕕᓕᐊᖅᑐᒧᑦ ᒪᓕᒃᑎᖓ ᐱᔪᓐᓇᓚᐅᙱᓚᖅ ᑭᓯᐊᓂ, ᐊᒻᒪ ᐱᔭᕆᐊᖃᓚᐅᖅᐳᖅ ᐅᓪᓗᓂ ᐱᖓᓱᓂ ᐅᓪᓗᓂᑦ ᓇᓂᓯᓂᕐᒥ ᐊᑭᓕᕆᐊᓕᖕᓂ ᖃᖓᑕᓲᒥᒃ, ᕿᒪᐃᓪᓗᓂ ᑭᐊᓂᑦ ᐊᕐᓇ’ᓈᖅ ᐃᓄᑑᓪᓗᓂ ᐅᐃᓂᐱᐊᒡᒧᑦ ᐅᓪᓗᓄᑦ ᐱᖓᓱᓄᑦ.

“ᐅᓇ ᖃᓄᐃᓐᓂᐅᔪᒥ ᐱᑎᑦᑎᓚᐅᖅᐳᖅ ᐊᑲᐅᙱᓕᐅᕈᑕᐅᔪᒥ ᐱᓕᕆᖃᑎᖃᕐᓂᑦᑎᓐᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ,” ᐅᖃᓚᐅᖅᐳᖅ ᓴᐃᓚᔅ ᐊᕐᓇ’ᓈᖅ.

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᑐᒃᓯᕋᓚᐅᖅᐳᑦ ᐊᐱᖅᓱᐃᓂᕐᒥ ᐱᓕᕆᕝᕕᖕᒥ ᐱᓕᕆᔨᕐᔪᐊᖑᔪᓂ ᑭᓯᐊᓂ ᐅᖃᐅᔾᔭᐅᓚᐅᖅᐳᑦ ᓇᓕᐊᑐᐃᓐᓇᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔮᓂᑦ ᐱᑦᓯᐅᓛᖅ ᐳᕉᔅᑐᕐ ᐊᒻᒪ ᒥᓂᔅᑕᐅᑉ ᑐᒡᓕᖓ ᒪᐃᒐᓐ ᕼᐊᓐᑦ ᐅᕝᕙᓘᓐᓃᑦ ᑭᓇᑐᐃᓐᓇᖅ ᐃᖅᑲᓇᐃᔭᖅᑐᖅ ᓄᓇᕘᑉ ᑐᐊᕕᕐᓇᖅᑐᒃᑯᑦ ᐋᓐᓂᐊᖅᑐᓄᑦ ᐱᓕᕆᐊᖑᔪᒥ ᐊᑐᐃᓐᓇᐅᓚᐅᙱᓚᑦ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᖅᑎᖓ ᓵᒪᐃᓐ ᑎᐅᒍᕌᓯᐊᔅ ᐅᖃᓚᐅᖅᐳᖅ ᐱᓕᕆᕝᕕᒃ ᐅᖃᐅᓯᒃᓴᓕᐅᓲᖑᙱᓚᑦ ᐃᒻᒥᒃᑰᖅᑐᓂ ᐱᓕᕆᐊᖑᓂᐅᔪᓄᑦ.

“ᑕᐃᒪᐃᒐᔪᒃᑐᒥ ᐊᑐᖅᑕᐅᕙᒃᑐᒥ ᑕᐃᒪᐃᖏᓐᓇᖅᐳᖅ ᒪᓕᒃᑎᓂ ᐊᐅᓪᓛᖃᑎᖃᕐᓂᖏᓐᓂ ᐅᒥᒃᓯᒪᔪᒧᑦ,” ᑎᐅᒍᕌᓯᐊᔅ ᐅᖃᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᑎᓯᐱᕆ 12−ᒥ.

“ᑭᓯᐊᓂ, ᐊᓯᐊᒎᖅᑐᓂ ᐊᔾᔨᐅᙱᑦᑐᓂ ᖃᓄᐃᓐᓂᐅᔪᓂ, ᓲᕐᓗ ᐅᓂᒃᓯᒪᔪᒥ ᐋᓐᓂᐊᕐᔪᐊᖅᑎᓪᓗᒍ, ᖃᔅᓯᒐᓚᖕᓂ ᐅᓂᒃᓯᒪᔪᓂ ᐊᑕᐅᑦᑎᒥᒃ ᖃᖓᑕᓲᒦᑦᑐᓂ, ᐅᕝᕙᓘᓐᓃᑦ ᒪᓕᒃᑎᖓ ᐊᑐᐃᓐᓇᐅᑲᐅᑎᒋᙱᒃᑯᓂ, ᒪᓕᒃᑎᖓ ᒪᓕᒍᓐᓇᖅᐳᖅ ᐊᑭᓕᕆᐊᓕᖕᒥ ᖃᖓᑕᓲᒃᑯᑦ.”

ᑖᔅᓱᒥᖓ ᑎᐅᒍᕌᓯᐊᔅ ᑕᐃᔭᖏᓐᓂ ᐅᑯᐊ “ᑕᐃᒪᐃᒐᔪᙱᕕᒡᔪᐊᖅᑐᒥ” ᖃᓄᐃᓐᓂᐅᔪᓂ, “ᐊᒃᓱᕈᑦᑎᐊᓲᖑᕗᑦ ᐋᖅᑭᐅᒪᑎᑦᑎᓂᕐᒥ ᑲᔪᓰᓐᓇᕐᓂᖓᓂ ᐸᖅᑭᔭᐅᓂᖓᓂ ᐊᒻᒪ ᐃᑲᔪᖅᓱᐃᓂᐅᔪᒥ ᐅᓂᒃᓯᒪᔪᓄᑦ.”

“ᐋᓐᓂᐊᕕᓕᐊᖅᑐᓄᑦ ᐊᐅᓪᓛᕐᓂᕐᒥ ᐃᖅᑲᓇᐃᔭᖅᑏᑦ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᐅᓚᑦᑎᕗᑦ ᓇᓗᓇᐃᖅᓯᓂᕐᒥ ᐅᓂᒃᓯᒪᔪᑦ ᒪᓕᒃᑕᐅᓂᖏᓐᓂ ᐱᓪᓚᕆᐅᔪᑎᒍᑦ ᐱᓕᕆᓂᐅᔪᓂ ᐊᐅᓪᓛᕐᓂᖏᓐᓂ ᐊᒻᒪ ᐸᖅᑭᔭᐅᓂᖏᓐᓂ, ᒪᓕᒃᑎᑕᖃᙱᑎᓪᓗᒍᓘᓐᓃᑦ.”

ᐅᖃᓚᐅᖅᐳᖅ ᐋᓐᓂᐊᕕᓕᐊᖅᑐᓄᑦ ᑐᔪᕐᒥᕕᓂᑦ ᐃᒡᓗᕐᔪᐊᖏᑦ ᐃᖅᑲᓇᐃᔭᖅᑎᓂ ᐊᑐᐃᓐᓇᖃᙱᓚᑦ ᐃᓗᓪᓕᖅᓯᓂᕐᒥ ᐊᑐᕐᓂᖃᐅᑎᖓᓂ ᐋᓐᓂᐊᕕᓕᐊᖅᑐᒧᑦ ᒪᓕᒃᑎᒃᓴᒧᑦ.

“ᐅᓂᒃᓯᒪᔪᑦ ᐊᒻᒪ ᐃᓚᖏᑦ ᐊᔭᐅᕆᔭᐅᕗᑦ ᖃᐅᔨᒋᐊᕐᓂᕐᒥ ᑎᑎᕋᕐᕕᖓᓂ ᐅᓂᒃᓯᒪᔪᓄᑦ ᐱᓕᕆᔨᐅᔪᓄᑦ ᐃᓱᒫᓘᑕᐅᔪᓄᑦ, ᐊᑲᐅᙱᓕᐅᕈᑕᐅᔪᓄᑦ, ᐅᕝᕙᓘᓐᓃᑦ ᐃᑲᔪᖅᓱᐃᓂᕐᒥ ᐱᔭᕆᐊᖃᑐᐃᓐᓇᕆᐊᓕᖕᒥ ᐋᓐᓂᐊᕕᓕᐊᕐᓂᕐᒧᑦ ᐊᐅᓪᓛᕐᓂᐅᔪᒥ,” ᑎᐅᒍᕌᓯᐊᔅ ᐅᖃᓚᐅᖅᐳᖅ.