ᖃᒪᓂᑦᑐᐊᕐᒥ ᐱᓕᕆᐊᖑᔪᒪᑦᑎᐊᕐᑐᖅ ᐅᓇᑕᖅᑐᒃᓴᙳᐊᖑᓂᖅ

For English version, see Baker Lake youth flock to junior rangers program

ᐊᕐᕌᓂ ᐅᖓᓪᓕᐅᓚᐅᕐᓯᒪᔪᒥᑦ ᑲᓃᑎᐊᓐ ᐅᓇᑕᖅᑐᒃᓴᖑᐊᓂᒃ ᖃᒪᓂᑦᑐᐊᕐᒧᐊᖅᑐᖃᓚᐅᕐᓯᒪᖕᒪ ᐅᔾᔨᕈᓱᓕᖅᑎᑦᑎᓇᓱᒃᖢᑎᒃ ᐋᖅᑭᒃᓱᐃᔪᒪᓂᕐᒥᒃ ᓄᑲᖅᖠᕐᓂᒃ ᑲᓃᑎᐊᓐᓂ ᐅᓇᑕᖅᑐᒃᓴᙳᐊᓂᒃ ᐱᓕᕆᐊᖃᕐᓂᕐᒥᒃ ᑕᐃᒪᓂ.

ᒫᓐᓇᓕ, ᑭᕙᓪᓕᖅᒥ ᓄᓇᓕᒃ ᐃᓄᖃᖅᑐᖅ 2,000-ᓂ ᐊᖏᕐᕋᕆᔭᐅᔪᖅ ᐅᓄᓛᓄᑦ ᐅᓇᑕᕐᑐᒃᓴᙳᐊᓄᑦ ᑲᓇᑕᒥ.

ᐊᔪᕈᓐᓃᕐᓴᖅᑎᑦᑎᔨ ᓗᐃᒃ ᓛᓕᐅ, ᐃᓚᒋᔭᐅᔪᖅ ᐅᑯᓇᙵᑦ 1st Canadian Ranger Patrol Group (ᓯᕗᓪᓖᑦ ᑲᓇᑕᒥ ᐅᓇᑕᕐᑐᒃᓴᙳᐊ ᓴᐳᓐᓂᐊᖅᑏᑦ) ᔭᓗᓇᐃᒥ, ᐅᖃᓚᐅᕐᑐᖅ 90 ᐅᖓᑖᓃᑦᑐᑦ ᓱᕈᓰᑦ ᐅᐸᒍᑎᓚᐅᕐᓯᒪᓂᖏᓐᓂᒃ ᑲᑎᖃᑎᒌᖕᓂᕐᒧᑦ ᕕᕝᕗᐊᕆᐅᑉ ᓄᙳᐊᓂ.

ᑖᒃᑯᐊᓕ ᐅᓄᕐᓯᕚᓪᓕᓯᒪᓕᕐᑐᑦ ᒫᓃᓕᖅᖢᑎᒃ 105.

ᓄᑲᖅᖡᑦ ᑲᓃᑎᐊᓐ ᐅᓇᑕᖅᑐᒃᓴᙳᐊᓂᒃ ᐱᓕᕆᐊᒃᓴᖅ ᐊᔪᕈᓐᓃᖅᓴᖅᑎᑦᑎᕙᒃᖢᑎᒃ ᓯᓚᐃᓐᓇᒥᕐ ᐊᔪᕈᓐᓃᕐᓴᕈᑎᒃ, ᐃᓅᓯᕐᒧᑦ ᐃᑲᔫᑎᓂᒃ ᐊᒻᒪᓗ ᐃᓕᖅᑯᓯᒃᑯᑦ ᐊᔪᙱᔾᔪᑎᓂᒃ ᒪᒃᑯᑦᑐᓂᒃ ᐊᕐᕌᒍᓕᖕᓄᑦ 12-ᓂ 18-ᓄᑦ ᑕᒫᓃᑦᑐᓂᒃ ᐅᑭᐅᕐᑕᖅᑐᕐᒥ ᓯᒡᔭᖅᐸᓯᖕᓂᒃ ᐅᕝᕙᓘᓐᓃᑦ ᐃᓄᑭᑦᑐᒥᐅᑕᓂᒃ.

ᐅᓇ ᐱᓕᕆᐊᒃᓴᖅ ᓄᓇᓕᖕᓄᑦ ᐱᒋᐊᕈᑎᐅᓂᖓ ᖃᒪᓂᑦᑐᐊᖅᒥ ᐊᕐᕌᒎᖕᓂ ᒪᕐᕉᖕᓂ ᐱᓕᕆᓂᐅᔪᖅ, ᐅᖃᓚᐅᕐᑐᖅ ᓛᓕᐅ.

ᐅᓇᑕᖅᑐᒃᓴᙳᐊᑦ ᓯᕗᓪᓕᖅᐹᒥᒃ ᑐᓴᖅᑎᑦᑎᑕᐅᑎᓪᓗᒋᑦ ᑲᑎᒪᖃᑕᐅᓚᕐᓯᒪᔪᑦ ᓄᓇᓕᖕᓄ ᓄᕕᐱᕆ 2021-ᒥ.

ᑕᑯᑲᑕᓚᐅᖅᖢᓂᒃ “ᐅᓄᒻᒪᕆᒃᑐᓂᒃ ᓱᕈᓯᕐᓂ ᐱᓕᕆᔪᒪᔪᓂ ᓄᓇᓕᖕᓂ” ᑕᐃᔅᓱᒪᓂ, ᓛᓕᐅ ᐅᖃᓚᐅᕐᑐᖅ, ᑖᒃᑯᐊ ᕼᐋᒻᒪᓚᒃᑯᑦ ᐊᒻᒪᓗ ᓄᑲᖅᖠᕐᓂ ᐅᓇᖅᑐᒃᓴᙳᐊᓕᕆᔩᑦ ᐱᓕᕆᖃᑎᒌᒃᐸᓪᓕᐊᓕᓚᐅᕐᓯᒪᔪᑦ.

ᐸᐃᑉᐹᓕᕆᓕᕐᔨ “ᐱᓕᕆᐊᖑᓚᐅᕐᒪ ᐊᑯᓂᐊᓂᕐᓴᖅ ᐃᓱᒪᒋᔭᐅᓯᒪᔪᒥᒃ,” ᐅᖃᕐᑐᖅ, ᑭᓯᐊᓂᓕ ᐱᐊᓂᒃᑕᐅᑕᐃᓐᓇᓚᐅᕐᒪᑦ ᐊᒻᒪᓗ ᐊᖏᖅᑕᐅᓪᓗᓂ ᕕᕝᕗᐊᕆ ᐱᒋᐊᖅᓯᒪᓕᖅᑎᓪᓗᒍ.

ᓛᓕᐅ ᐅᖃᓚᐅᕐᑐᖅ ᐅᓇᑕᖅᑐᒃᓴᙳᐊᑦ ᖃᒪᓂᑦᑐᐊᖅᒥᐅᑕᓂᒃ ᐱᓕᕆᖃᑎᖃᕐᓂᕋᖅᖢᓂᒋᑦ ᖃᓄᐃᓕᐅᕈᑎᒃᓴᓂᒃ ᓯᓚᐃᓐᓇᕐᒥ ᐱᓕᕆᐊᖑᖃᑦᑕᕐᓂᐊᖅᑐᓂᒃ ᓲᕐᓗ ᒪᑯᑎᑐᓇᖅ ᐊᔪᕈᓐᓃᖅᓴᖅᑎᑕᐅᕙᖕᓂᖅ, ᐅᖃᐅᓯᓕᕆᓂᖅ ᐱᓕᕆᐊᒧᑦ ᐊᒻᒪᓗ ᐃᓕᖅᑯᓯᒃᑯᑦ ᐊᔪᕈᓐᓃᖅᑕᐅᔭᕆᐊᓕᖕᓂᒃ.

“ᐅᓇ ᐱᓕᕆᐊᖑᔪᖅ ᓄᓇᓕᖕᓂ ᐱᓕᕆᐊᕆᔭᐅᑎᓐᓇᓱᒃᑕᕗᑦ ᐅᓪᓗᖅ ᐱᐊᓂᒃᑳᖓᑦ.” ᐅᖃᕐᑐᖅ.

ᓛᓕᐅᒧᓪᓕ, ᐃᑲᔫᑎᐅᓂᖅᐹᖑᓚᐅᕐᑐᖅ ᓄᑲᖅᖠᕐᓂᒃ ᐅᓇᑕᖅᑐᒃᓴᙳᐊᓕᕆᓂᕐᒥᒃ ᐅᓇ ᖃᐅᔨᕚᓪᓕᖃᑦᑕᕐᓂᖓᓂᒃ ᓄᓇᓕᖕᓂ ᐊᒻᒪ ᓱᕈᓯᕐᓂ ᖃᓄᖅ ᐃᓚᐅᑎᑦᑎᔪᓐᓇᕐᓂᕐᒥᒃ.

“ᐅᐱᒋᖃᑦᑕᒻᒪᕆᒃᑲᒃᑭ ᖃᐅᔨᕚᓪᓕᕈᑎᒋᕙᒃᑕᒃᑲ,” ᐅᖃᕐᑐᖅ.

“ᐃᖃᓪᓕᐊᖃᑎᒋᔭᕌᖓᑦᑎᒍᑦ ᓱᕈᓰᑦ ᐊᖑᓇᓱᖃᑎᒋᓪᓗᑎᒍᓪᓘᓐᓃᑦ, ᐃᓛᓐᓂ ᐃᓐᓇᕐᓂ ᐃᓚᐅᑎᑦᑎᕙᒃᑐᒍᑦ ᓱᕈᓯᕐᓂ ᐃᓕᓐᓂᐊᖅᑎᑦᑎᓂᐊᖅᑐᓂᒃ ᐊᒻᒪ ᐅᓇᑕᖅᑐᒃᓴᙳᐊᓂᒃ ᐃᑲᔪᕐᓂᐊᖅᑐᓂᒃ.

“ᐃᓛᓐᓂ ᑕᐅᑐᑐᐃᓐᓇᖃᑦᑕᖅᑐᖓ ᐊᒻᒪᓗ ᐊᔪᕈᓐᓃᖅᐸᓪᓕᐊᑲᑕᐅᕙᒃᖢᖓ ᑕᒪᓐᓇ ᖁᕕᐊᓇᓗᐊᖃᑦᑕᖅᑐᖅ.”