ᐅᓇ ᐊᕿᔭᕐᓂᕐᒧᑦ ᐊᖅᓴᖅ ᐅᓛᔪᒃ ᐃᓕᓐᓂᐊᕐᕕᖓᓂ ᒥᑦᑎᒪᑕᓕᖕᒥ ᐃᖏᕐᕋᓂᖃᓚᐅᖅᐳᖅ ᖃᔅᓯᒐᓚᖕᓂ ᑕᐅᓴᓐᓂ ᑭᓛᒥᑐᓂ ᓅᕙᓐᓛᓐᒧᑦ ᐊᑯᓂᐅᓂᐅᔪᒥ ᐊᕐᕌᒍᓄᑦ 10−ᓄᑦ. (ᓖ ᑯᕋᐅᑦᓱᕐ ᐊᔾᔨᓕᐅᖅᑕᖓ)

ᐊᕿᔭᕐᓂᕐᒧᑦ ᐊᖅᓴᐅᑉ ᐃᖏᕐᕋᔅᓲᔭᕐᔪᐊᕐᓂᖓ ᐃᓱᓕᑉᐳᖅ ᓅᕙᓐᓛᓐᒥ ᓯᒡᔭᖓᓂ

ᐅᓛᔪᒃ ᐃᓕᓐᓂᐊᕐᕕᖓᑕ ᐃᓕᓴᐃᔨᓄᑦ ᐊᖓᔪᖅᑳᖓ ᐅᖃᖅᐳᖅ ᐃᓕᓐᓂᐊᖅᑏᑦ ᐊᕿᓯᓚᐅᖅᐳᑦ ᐊᖅᓴᒥᒃ ᑕᕆᐅᕐᒧᑦ ᐊᕐᕌᒍᑦ 10 ᖄᖏᖅᓯᒪᓕᖅᑐᓂ ᖃᐅᔨᓇᓱᐊᖅᖢᑎᒃ ᖃᓄᖅ ᐅᖓᓯᒃᑎᒋᔪᒥ ᐃᖏᕐᕋᓇᔭᕐᓂᖓᓂ

By ᔪᐊᔾ ᐋᓐᑑᓐᔅᒧᑦ

For the English version of this story, please see Soccer ball’s 3,000-km journey ends on Newfoundland beach.

ᐊᕿᔭᕐᓂᕐᒧᑦ ᐊᖅᓴᖅ ᒥᑦᑎᒪᑕᓕᖕᒥ ᒫᓐᓇᓕᓴᐅᔪᒥ ᐃᓱᓕᓚᐅᖅᐳᖅ ᐱᔭᐅᔪᒪᓂᙱᑦᑐᒥ ᐱᔭᐅᓂᐅᔪᒥ ᓅᕙᓐᓛᓐᒥ ᐳᔾᔫᑎᓂ ᐃᖃᓗᒐᓱᒃᑎᐅᔪᒧᑦ .

ᓖ ᑯᕋᐅᑦᓱᕐ ᐃᖅᑲᓇᐃᔭᓲᖑᕗᖅ Beaumont, Long Island, ᓯᒡᔭᖅᐸᓯᖓᓐᓂ ᓅᕙᓐᓛᓐᒥ, ᐊᒻᒪ ᑕᐃᓯᕗᖅ Robert’s Arm, N.L., ᐃᓄᒋᐊᖕᓂᓕᖕᒥ 805−ᓂ, ᐊᖏᕐᕋᕆᓂᖓᓂ.

ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᓇᓂᓯᓚᐅᕐᓂᖓᓂ ᐊᕿᔭᕐᓂᕐᒧᑦ ᐊᖅᓴᕐᒥ ᒪᐃ 30−ᒥ ᐳᔾᔫᑎᒥᒃ ᐃᖃᓗᒐᓱᖃᑎᖃᖅᑎᓪᓗᒍ ᐊᒃᑲᒥᓂᒃ.

“ᖁᑦᑎᒃᑐᒥ ᐊᒻᒪ ᐸᓂᖅᓯᒪᑦᑎᐊᓚᐅᖅᐳᖅ ᓯᒡᔭᒥ,” ᐅᖃᓚᐅᖅᐳᖅ, ᓇᓚᐅᑦᑖᕆᓪᓗᓂ ᓯᒡᔭᒧᐊᓚᐅᕐᓂᖓᓂ ᐅᑭᐅᖑᔪᒥ ᐃᖅᑲᐅᒪᙱᒻᒪᒍ ᑕᑯᓚᐅᕐᓂᖓᓂ ᐅᑭᐊᒃᓵᖑᓚᐅᖅᑐᒥ.

ᑯᕋᐅᑦᓱᕐ ᐊᒻᒪ ᐊᕐᑲᖓ ᑭᓛᒥᑐᒥ ᐅᖓᓯᖕᓂᖅᓴᐅᒐᓛᒃᑐᒥ ᐅᖓᓯᖕᓂᖃᓚᐅᖅᐳᑦ ᐃᖃᓪᓕᐊᕐᕕᒋᕙᒃᑕᖓᓂ. ᐊᖅᓴᖅ, ᖃᐅᒪᕐᔪᐊᓚᐅᖅᑐᒥ ᐆᔭᐅᔭᕐᒥ ᓯᓚᕆᓯᒪᔪᒥ, ᐅᓛᔪᒃ ᐃᓕᓐᓂᐊᕐᕕᖓᓂ ᑎᑎᕋᖅᓯᒪᓪᓗᓂ ᕿᕐᓂᖅᑕᒥ ᑎᑎᕋᐅᑎᕐᔪᐊᒧᑦ. ᐃᓕᓯᒪᓚᐅᖅᐳᖅ ᖃᓂᒋᔭᖓᓂ ᑯᕋᐅᑦᓱᕐ ᐳᔾᔫᑎᑦ ᖃᑦᑕᖏᓐᓂ ᖃᔅᓯᒐᓚᖕᓂ ᐱᓇᓱᐊᕈᓯᐅᔪᓂ ᖃᐅᔨᓴᕆᐊᕈᒪᓕᕋᒥ.

“ᒪᕐᕉᖕᓂ ᐸᓂᕋᓛᖃᖅᐳᖓ … ᐊᒻᒪ ᐊᐃᒃᓯᕐᓂᐊᓚᐅᖅᐳᖓ ᐊᕿᔭᕐᓂᕐᒧᑦ ᐊᖅᓴᒥᒃ ᑕᐃᒃᑯᓄᖓ ᐱᙳᐊᕈᑎᒋᖃᑦᑕᕐᓂᐊᕐᒪᒍ,” ᑯᕋᐅᑦᓱᕐ  ᐅᖃᓚᐅᖅᐳᖅ.

ᐅᔾᔨᕆᒐᒥ ᖃᓄᑎᒋ ᐅᖓᓯᒃᑎᒋᔪᒥ ᐃᖏᕐᕋᓂᖃᓚᐅᕐᓂᖓᓂ, ᐃᓱᒪᓚᐅᖅᐳᖅ ᐸᖅᑭᓂᑦᑎᐊᕙᐅᓇᔭᕐᓂᖓᓂ ᐸᓂᖏᓐᓄᑦ.

“ᐱᐅᓇᔭᖅᐳᖅ ᑕᑯᒃᓴᐅᑎᑦᑎᓂᕐᒥ ᐅᒻᒪ ᐅᖃᓪᓚᒍᑕᐅᓗᓂ,” ᐅᖃᓚᐅᖅᐳᖅ.

ᐅᓛᔪᒃ ᐃᓕᓐᓂᐊᕐᕕᖓ ᐱᒋᐊᓕᓵᖅᑐᓂ ᖁᑦᑎᖕᓂᓕᖕᒧᑦ 5−ᒧᑦ ᐃᓕᓐᓂᐊᕐᕕᐅᕗᖅ ᒥᑦᑎᒪᑕᓕᖕᒥ , 3,000 ᕿᓛᒥᑐᐸᓗᖕᓂ ᐅᐊᖕᓇᖓᓂ Long Island−ᒥ.

ᑯᕋᐅᑦᓱᕐ  ᐅᖃᓚᐅᖅᐳᖅ “ᑲᒪᓇᕐᔪᐊᓚᐅᖅᐳᖅ” ᓇᓂᓯᓂᕐᒥ ᐊᖅᓴᖅ ᐃᖏᕐᕋᓯᒪᓂᖓᓂ ᐅᖓᓯᒃᑐᐊᓗᖕᒧᑦ, ᐊᒻᒪ ᐃᓱᒪᒋᐅᔭᓚᐅᖅᐸᖓ ᑕᑯᓯᒪᓂᖓᓂ “ᐊᔾᔨᒋᙱᐸᓗᒃᑕᖓᓂ ᓯᓚᐅᔪᒥ” ᐃᖏᕐᕋᕙᓪᓕᐊᑎᓪᓗᒍ.

“ᑕᐃᒪᐃᓐᑐᒐᓚᖕᒥ ᓇᓂᓇᔭᙱᑕᕐᓂ ᖃᐅᑕᒫᒥ,” ᑯᕋᐅᑦᓱᕐ  ᐅᖃᓚᐅᖅᐳᖅ.

ᓵᓐᑐᕋ ᕋᑦᓕᑦᔅ, ᐃᓕᓴᐃᔨᓄᑦ ᐊᖓᔪᖅᑳᖅ ᐅᓛᔪᒃ ᐃᓕᓐᓂᐊᕐᕕᖓᓂ, ᐅᖃᓚᐅᖅᐳᖅ ᖃᐅᔨᒪᓂᖓᓂ ᑭᓇ ᑎᑎᕋᓚᐅᕐᓂᖓᓂ ᐊᕿᔭᕐᓂᕐᒧᑦ ᐊᖅᓴᒧᑦ — ᓄᖅᑲᖓᓕᖅᑐᒥ ᐃᓕᓴᐃᔨᐅᔪᒥ ᓇᓗᓇᐃᖅᓯᕙᓚᐅᖅᑐᒥ ᑕᒪᒃᑭᓂ ᐃᓕᓐᓂᐊᕐᕕᐅᑉ ᐱᖁᑎᖏᓐᓂ ᕿᕐᓂᖅᑕᒧᑦ ᑎᑎᕋᐅᑎᕐᔪᐊᒧᑦ ᐊᕐᕌᒍᐸᓗᖕᓂ 10−ᖑᓕᖅᑐᓂ ᖄᖏᖅᓯᒪᓕᖅᑐᓂ.

ᕋᑦᓕᑦᔅ ᐃᓕᑦᑎᒐᒥ ᐊᖅᓴᐅᑉ ᐃᖏᕐᕋᓂᖓᓂ, ᐅᖃᓗᒡᕕᒋᓚᐅᖅᐸᖓ ᐃᓕᓴᐃᔨᒥᒃ, ᓇᓗᓇᐃᖅᓯᓚᐅᖅᑐᒥ ᐊᖅᓴᐅᑉ ᓇᑭᙶᕐᓂᖓᓂ.

“ᖁᒃᓴᓪᓚᓚᐅᖅᐳᖅ ᐊᒻᒪ ᐃᒡᓚᓚᐅᖅᐳᖅ” ᖃᐅᔨᒐᒥ, ᕋᑦᓕᑦᔅ ᐅᖃᓚᐅᖅᐳᖅ.

ᕋᑦᓕᑦᔅ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ ᐃᓕᓴᐃᔨ, ᑭᓇᐅᓂᖓᓂ ᓇᓗᓇᐃᖅᑕᐅᔪᒪᙱᑦᑐᒥ, ᐃᖅᑲᐃᓚᐅᖅᐳᖅ ᐊᕐᕌᒍᐸᓗᓂ 10−ᓂ ᖄᖏᖅᓯᒪᓕᖅᑐᓂ ᐃᓕᓐᓂᐊᖅᑎᑦ ᐱᙳᐊᓚᐅᖅᐳᑦ ᐊᕿᔭᕐᓂᕐᒧᑦ ᐊᖅᓴᓂᑦ ᐃᓕᓐᓂᐊᕐᕕᖕᒥ,  ᑐᓄᐊᓂ ᑕᕆᐅᖑᓪᓗᓂ.

“ᓱᕈᓰᑦ ᐱᙳᐊᓚᐅᖅᐳᑦ ᐊᒻᒪ ᒥᑕᓗᒃᖢᑎᒃ ᐅᖃᖅᖢᑎᒃ ‘ᖃᓄᑎᒋᑭᐊᖅ ᐃᖏᕐᕋᓇᔭᕐᓂᖓᓂ’ ᐊᒻᒪ ᐊᕿᓯᓪᓗᑎᒃ ᐊᖅᓴᒥᒃ ᐃᒪᕐᒧᑦ,” ᕋᑦᓕᑦᔅ ᐅᖃᓚᐅᖅᐳᖅ.

ᐃᓱᒪᒋᔭᐅᒃᑲᓐᓂᓚᐅᖅᓯᒪᙱᓚᖅ ᐊᕐᕌᒍᒐᓴᓄᑦ. ᐊᓱᐃᓛᒃ, ᒪᐃ 31−ᒥ, ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᐅᔪᒥ ᑎᑎᕋᖅᓯᒪᔪᒥ ᑕᑯᒃᓴᐅᑎᑕᐅᕈᓘᔭᓕᓚᐅᖅᐳᖅ ᐊᓯᐅᖅᑲᔪᒥ ᐊᖅᓴᒥᒃ.

“ᑐᖁᖅᑲᔭᓚᐅᖅᐳᒍᑦ ᐅᖃᖅᖢᑕ, ‘ᐅᐊᑲᓪᓚᖔ ᓅᕙᓐᓛᓐᒧᖅᓯᒪᕗᒍᑦ.’ ᑕᐃᒫᒃ ᑭᒃᑯᓕᒫᑦ ᖁᕕᐊᕐᔪᐊᖅᓯᒪᕗᑦ,” ᕋᑦᓕᑦᔅ ᐅᖃᓚᐅᖅᐳᖅ.

ᐅᖃᓚᐅᖅᐳᖅ ᐊᓯᖏᓐᓂ ᓯᐊᒻᒪᖅᑎᑦᑎᔨᐅᔪᓂ ᖃᐅᔨᒋᐊᖅᓯᒪᕗᑦ ᐃᒻᒥᓄᑦ ᓇᓂᔭᐅᓂᖓᓂ ᐊᖅᓴᒥᒃ.

“ᐱᐅᙱᑦᑐᒻᒪᕆᐊᓗᖕᓂ ᑭᓱᑐᐃᓐᓇᓂ ᓄᓇᕐᔪᐊᕐᒥ ᐱᓕᕆᐊᖑᑲᑕᒃᑐᓂ, ᐃᓄᐃᑦ ᑎᒍᓯᓯᒪᕗᑦ ᐅᓂᒃᑳᓕᐊᖑᔪᒥ ᐃᒃᐱᒍᓱᑦᑎᐊᕐᓇᖅᑐᐊᓘᖕᒪᑦ ᐅᓂᒃᑳᓕᐊᖑᔪᒥ,” ᐅᖃᓚᐅᖅᐳᖅ.

“ᑲᒪᕐᔪᐊᖅᐳᒍᑦ ᖃᓄᑎᒋ ᐅᖓᓯᖕᓂᐅᔪᒧᑦ [ᐅᓂᒃᑳᓕᐊᖅ] ᐃᖏᕐᕋᓯᒪᓂᖓᓂ.”

ᕋᑦᓕᑦᔅ ᐅᖃᓚᐅᖅᐳᖅ ᐃᓕᓴᐃᔩᑦ ᐃᓕᓐᓂᐊᕐᕕᖕᒥ ᖁᕕᐊᑉᐳᑦ ᐊᒻᒪ ᐅᐱᒍᓱᒃᐳᑦ ᑭᒃᑯᓕᒫᑦ ᐅᖃᐅᓯᖃᕐᓂᖏᓐᓂ ᒥᑦᑎᒪᑕᓕᖕᒥ “ᐃᓕᓐᓂᐊᕐᕕᕋᓛᖓᓂ” ᐅᖓᓯᒃᑐᒥ ᐅᑭᐅᖅᑕᖅᑐᒥ.

“ᓲᕐᓗ ᐊᐅᓪᓛᖅᓯᒪᒋᕗᒍᑦ ᓇᒧᑐᐃᓐᓈᓗᒃᑕᐅᖅ,” ᐅᖃᓚᐅᖅᐳᖅ.

Share This Story

(0) Comments