ᕿᓚᓗᒐᕋᓱᖕᓂᖅ ᒪᑐᐃᕐᑐᖅ ᓄᓇᕕᒃ ᐃᓚᖓᓂ

ᕿᓚᓗᒐᕋᓱᖕᓂᖅ ᒪᑐᐃᑦᑐᖅ ᓄᓇᕕᒃ ᐃᓚᖓᓂ.

ᒐᕙᒪᑐᖃᒃᑯᓐᓄᑦ ᐃᖃᓗᓕᕆᔨᒃᑯᑦ ᐊᒻᒪ ᑕᕆᐅᕐᒥᐅᑕᓕᕆᔨᒃᑯᑦ ᖃᐅᔨᑎᑦᑎᔾᔪᑎᒥ ᑐᓂᓯᓚᐅᕐᒪᑕ ᐊᖑᓇᓱᒃᑎᓄᑦ ᕕᕝᕗᐊᕆ 1-ᖑᑎᓪᓗᒍ ᐊᖑᓇᓱᒍᓐᓇᕐᓯᓂᕋᖅᑐᓂ ᐃᓚᖏᓐᓂ ᓄᓇᕕᐅᑉ ᐃᒪᖏᓐᓂᒃ; ᑭᓯᐊᓂᓕ ᐊᖑᓇᓱᒍᓐᓇᙱᑦᑐᑦ ᐃᓚᖓᓂ.

ᐊᖑᓇᓱᒍᓐᓇᕐᓯᔪᑦ ᑕᓯᐅᔭᕐᔪᐊᑉ ᑲᖏᖅᖢᐊᒍᑦ (Hudson Strait), ᓛᖕ ᐊᐃᓚᓐ (Long Island) ᐊᒻᒪ ᔭᐃᒻᔅ ᐸᐃᒥ, ᑕᓯᐅᔭᕐᔪᐊᑉ ᐅᐊᖕᓇᖓᑕ ᑲᓇᖕᓇᖅᐸᓯᐊᓂᒃ, ᐋᑐᕚ ᕿᑭᖅᑕᐃᑦ ᐊᒻᒪ ᐅᖓᕙᐅᑉ ᑕᕆᐅᖓᓂ.

ᐊᖑᓇᓱᖕᓂ ᒪᑐᐃᖓᔪᖅ ᑕᓯᐅᔭᕐᔪᐊᑉ ᑲᓇᖕᓇᖓᓂᒃ, ᑭᓯᐊᓂᓕ ᐊᖑᓇᓱᒃᑏᑦ 13-ᓂ ᕿᓚᓗᒐᕈᓐᓇᖅᑎᑕᐅᔪᑦ ᐊᕐᕌᒍᒥ.

ᐊᖑᓇᓱᖕᓂᖅ ᓱᓕ ᒪᑐᓯᒪᔪᖅ ᐅᑯᓇᓂ ᒧᑲᓕᒃ ᑕᕆᐅᕐᒧᐊᖓᔪᖅ, ᓇᔅᑕᐳᑲ ᑕᕆᐅᕐᒧᐊᖓᔪᖅ ᐊᒻᒪᓗ ᓕᑐᓪ ᕗᐃᐅᓪ ᑰᒃ ᑕᕆᐅᕐᒧᐊᖓᔪᖅ. ᓄᓇᕕᒃᒦᑦᑐᖅ ᐆᒪᔪᓕᕆᔨᕐᔪᐊᒃᑯᑦ ᐱᓕᕆᐊᖃᓚᐅᕐᒪᑕ ᑕᒪᑐᒥᖓ ᐊᖑᓇᓱᒡᕕᐅᔪᓐᓇᙱᑦᑐᒥᒃ ᓄᖃᖅᑎᑦᑎᓇᓱᒃᖢᑎᒃ ᐅᕙᓂ ᒧᑲᓕᒃ ᑕᕆᐅᕐᒧᐊᖓᔪᕐᒥ. ᐅᓇ ᐊᖑᓇᓱᒡᕕᐅᔭᕆᐊᖃᙱᓐᓂᖓ ᐊᕐᕌᒍᒐᓴᒻᒪᕆᖕᓂ ᐋᖅᑭᒃᑕᐅᓯᒪᓕᕐᑐᖅ.

ᐃᖃᓗᓕᕆᔨᒃᑯᑦ ᐊᒻᒪ ᑕᕆᐅᕐᒥᐅᑕᓕᕆᔨᒃᑯᑦ ᐅᖃᓚᐅᕐᒪᑕ ᑎᑎᕋᐅᓯᐅᓯᒪᙱᓗᐊᕐᓂᖓᓂᒃ ᐊᒻᒪᓗ ᖃᓄᐃᑦᑐᓂᒃ ᓂᕐᔪᑎᓂᒃ ᓴᐳᔾᔨᓯᒪᖕᒪᖔᑦ ᐊᖑᓇᓱᒡᕕᐅᔭᕆᐊᖃᙱᔾᔪᑎᖓᓂᒃ, ᑭᓯᐊᓂᓕ ᐃᖃᓗᓕᕆᔨᒃᑯᑦ ᐊᒻᒪ ᑕᕆᐅᕐᒥᐅᑕᓕᕆᔨᒃᑯᑦ ᐅᖃᖅᑎᒋᔭᖓ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑎᓯᐱᕆᐅᑎᓪᓗᒍ ᑖᒃᑯᐊ ᐱᓕᕆᖃᑎᖃᕈᒪᑐᐃᓐᓇᕐᓂᕋᖅᖢᑎᒃ ᐃᓄᖕᓂ ᐆᒪᔪᓕᕆᓂᕐᒥᒃ ᐊᐅᓚᑦᑎᓂᒃᑯᑦ.

ᐊᖑᓇᓱᒃᑎᐅᔪᑦ ᕿᓚᓗᒐᕋᓱᒍᒪᔪᑦ ᐊᖑᓇᓱᒃᑐᓕᕆᔨᓄᑦ ᖃᐅᔨᒋᐊᖁᔭᐅᔪᑦ, ᐃᖃᓗᓕᕆᔨᓄᑦ ᐊᒻᒪ ᐆᒪᔪᓕᕆᔨᒃᑯᓐᓄᑦ ᑕᒪᑐᒧᖓ ᐊᐱᖅᑯᑎᖃᑐᐊᖅᐸᑕ.