‘ᐱᐅᓂᕐᓴᓂᒃ ᓇᐅᑦᑎᐅᒃᑯᒫᖃᕆᐊᓕᒃ’ ᓄᓇᕗᒥᑦ: ᒐᕙᒪᑐᖃᒃᑯᓐᓄᑦ ᒥᓂᔅᑕ

ᒐᕙᒪᑐᖃᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᖏᓐᓄᑦ ᒥᓂᔅᑕ ᒫᒃ ᕼᐋᓚᓐ ᐅᖃᓚᐅᕐᑐᖅ ᒫᔅᓯ 5ᒥ ᐱᑕᖃᕆᐊᖃᕐᓂᖓᓂᒃ “ᐱᐅᓂᕐᓴᓂᒃ ᓇᐅᑦᑎᐅᒃᑯᒫᓂ” ᓄᓇᕗᒥᑦ ᐅᑯᐊ ᐱᓕᕆᖃᑎᒋᔭᖏᑦ ᓄᓇᕗᒥᑦ ᐅᖃᐅᓯᕆᓚᐅᕐᑕᖓᓂ ᐆᒥᖓ ᑐᖓᐅᑦᑎᓯᒪᓂᖓᓂᒃ ᓇᐅᑦᑎᐅᒃᑯᒫᖃᙱᑦᑐᓄᑦ ᐋᓐᓂᐊᖃᙱᑦᑐᓕᕆᓂᕐᒧᑦ ᐱᓕᕆᐊᒃᓴᓄᑦ ᐃᑲᔫᑎᒃᓴᓕᕆᓂᖅ.

ᕼᐋᓚᓐ, ᑖᓐᓇ ᐃᖃᓗᖕᓄᐊᓚᐅᕐᑐᖅ ᑐᓴᖅᑎᑦᑎᔭᖅᑐᖅᖢᓂ ᒪᕐᕉᖕᓂ ᐊᖏᕈᑎᓂᒃ ᐱᐅᓯᕚᓪᓕᕈᑎᐅᓂᐊᖅᑐᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐃᓐᓇᑐᖃᕐᓄᑦ ᑲᒪᒋᔭᐅᔾᔪᑎᒃᓴᓄᑦ ᓄᓇᕗᒥᑦ, ᐅᖃᓚᐅᕐᑐᖅ ᑐᓴᒐᒃᓴᓕᐅᖅᑎᓄ ᐅᓇ ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᒥᓂᔅᑕ ᔮᓐ ᒪᐃᓐ ᐃᓱᒫᓘᑎᖏᓐᓂᒃ ᐅᖃᐅᓯᖃᓚᐅᕐᓯᒪᓂᖓᓂᒃ ᒐᕙᒪᑐᖃᒃᑯᑦ ᐱᓕᕆᐊᖓᓂᒃ ᑲᑎᒪᖃᑎᒋᑎᓪᓗᓂᐅᒃ.

“ᒥᓂᔅᑕ ᒪᐃᓐ ᐅᕙᓐᓄᑦ ᐅᖃᓪᓚᖃᕐᑕᕐᒪᑦ ᐃᓱᒫᓘᑕᐅᓐᓇᖅᑐᓂᒃ ᐅᕙᓂ ᓄᓇᕗᒥᑦ, ᐊᒻᒪᓗ ᐅᖃᕈᒪᓪᓗᖓ, ᐅᓇ ᓇᐅᑦᑎᐅᒃᑯᒫᖃᙱᑦᑐᓄᑦ ᐋᓐᓂᐊᖃᙱᑦᑐᓕᕆᓂᕐᒧᑦ ᐃᑲᔫᑎ ᐃᓚᒋᔭᐅᓪᓗᓂ,” ᕼᐋᓚᓐ ᐅᖃᕐᑐᖅ.

“ᐃᓱᒪᔪᖓ ᒪᕐᕉᐃᖅᖢᓂ ᐊᑕᐅᑦᑎᒃᑰᙱᑦᑐᖅ ᒥᓂᔅᑕ ᒪᐃᓐ ᐅᕙᓐᓄ ᐅᖃᐅᓯᖃᓪᓚᐅᕐᒪᑦ ᐱᑕᖃᕆᐊᖃᕐᓂᖓᓂᒃ ᐱᐅᓂᕐᓴᓂᒃ ᓇᐅᑦᑎᐅᒃᑯᒫᓂ ᐊᒻᒪᓗ ᑕᒪᑐᒧᖓ ᐃᓱᒫᓘᑎᑕᖃᕐᓂᖓᓂᒃ.”

ᒪᐃᓐ ᒪᑭᖢᓂ ᓄᓇᕗᒥᑦ ᑲᑎᒪᔨᕐᔪᐊᑦ ᑲᑎᒪᕕᒡᔪᐊᖓᓂ ᐅᖃᐅᓯᖃᓚᐅᕐᑐᖅ ᑐᖓᐅᑦᑎᓯᒪᓂᖓᓂᒃ ᒐᕙᒪᑐᖃᒃᑯᓐᓂ ᐃᑲᔫᑎᑖᕆᕙᒃᑕᖏᑦ ᐆᒧᖓ ᓇᐅᑦᑎᐅᒃᑯᒫᖃᙱᑦᑐᓄᑦ ᐋᓐᓂᐊᖃᙱᑦᑐᓕᕆᓂᕐᒧᑦ ᐃᑲᔫᑎᒃᓴᓕᕆᓂᕐᒧᑦ

ᐅᓇ ᐱᓕᕆᐊᒃᓴᖅ, ᐃᑲᔫᑎᑖᖃᑦᑕᖅᑐᖅ ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᓕᕆᔨᓂ ᑲᓇᑕᒥ, ᐊᑭᓖᔾᔪᑎᐅᕙᒃᑐᖅ ᐋᓐᓂᐊᖃᖅᑕᐃᓕᓂᕐᒧᑦ ᐊᑭᓕᐅᑎᒃᓴᐅᕙᒃᑐᓂᒃ ᓇᐅᑦᑎᐅᒃᑯᒫᖃᙱᑦᑐᓂᒃ ᓄᓇᕗᒥᑦ ᓇᖕᒥᓂᖅ ᐋᓐᓂᐊᖃᖅᑕᐃᓕᓂᕐᒧ ᐱᓕᕆᐊᖏᓐᓂᒃ. ᐅᑯᐊ ᐃᓚᒋᔭᐅᔪᑦ ᐃᔨᓕᕆᔭᐅᓂᖅ ᐊᒻᒪ ᑭᒍᑎᓕᕆᔭᐅᖃᑦᑕᕐᓂᖅ, ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒧᑦ ᐃᓅᓯᓕᕆᔭᐅᓂᕐᒧᑦ, ᐋᓐᓂᐊᖅᑐᓄᑦ ᐃᑲᔫᑎᒃᓴᓄᑦ ᐊᒻᒪ ᐱᖁᑎᓄᑦ, ᐃᓅᓕᓴᐅᑎᓄᑦ ᐊᒻᒪᓗ ᐋᓐᓂᐊᕐᕕᓕᐊᕈᑎᐅᕙᒃᑐᓄᑦ ᐊᐅᓪᓚᕈᑎᓄᑦ.

ᒪᓕᒐᓕᕆᕕᒡᔪᐊᕐᒥ, ᒪᐃᓐ ᐃᓱᒪᓚᐅᕐᒪᑦ ᓄᓇᕗᒥᑦ ᒐᕙᒪᒃᑯᑦ ᐃᑲᔪᕈᑎᖃᕆᐊᖃᕐᓂᐊᕐᓂᖏᓐᓂᒃ ᐱᓕᕆᐊᓄᑦ ᐃᒪᓐᓇ $25 ᒥᓕᐊᓐᓂ ᑕᒪᑐᒪᓂ ᐊᕐᕌᒍᒥ.

ᓄᓇᕗᒧᑦ ᒪᓕᒐᓕᐅᖅᑎ ᓘᕆ ᐃᓪᓚᐅᖅ ᒐᕙᒪᑐᖃᒃᑯᓐᓄᑦ ᐅᖃᐅᔾᔨᓚᐅᕐᒥᔪᖅ ᐃᑲᔪᖅᑐᐃᓂᕐᓴᐅᔭᕆᐊᖃᕐᓂᖏᓐᓂᒃ ᐱᓕᕆᐊᒃᓴᒥᒃ..

“ᒪᑯᐊ — ᑭᒍᑎᓕᕆᔭᐅᓂᕐᒧᓪᓘᓐᓃᑦ ᐅᕝᕙᓘᓐᓃᑦ ᐃᓅᓕᓴᐅᑎᓄᑦ — ᐃᓄᐃᑦ ᑲᒪᒋᔭᐅᔾᔪᑎᒋᕙᒃᑕᖏ ᐱᔭᕆᐊᖃᖅᑕᖏᓐᓄᑦ ᑕᐅᑐᒐᓱᒻᒪᕆᒃᑲᑦᑎᒍᑦ,” ᕼᐋᓚᓐ ᐅᖃᕐᑐᖅ.

“ᖁᔭᒋᔪᒪᔭᕋ ᒥᓂᔅᑕ ᒪᐃᓐ ᑕᒪᑐᒥᖓ ᓴᖅᑭᑎᑦᑎᓯᒪᓪᓚᕆᖕᒪᑦ ᐱᔭᐅᔭᕆᐊᓕᖕᓂ ᐊᒻᒪ ᐊᒃᓱᕈᕈᑎᐅᕙᒃᑐᓂᒃ ᓄᓇᕗᒥᑦ ᐊᒻᒪᓗ ᑕᒪᒃᑯᓄᖓ ᐱᓕᕆᖃᑎᒋᔪᒪᓪᓗᒍ.”

ᒪᐃᓐ ᐅᖃᓚᐅᕐᑐᖅ ᐅᖃᓪᓚᖃᑎᒌᖕᓂᐅᓚᐅᕐᑐᖅ ᓄᓇᕗᒥᑦ ᒐᕙᒪᒃᑯᑦ ᐊᒻᒪᓗ ᐋᑐᕚᒥ ᐆᒧᖓ ᓇᐅᑦᑎᐅᒃᑯᒫᖃᙱᑦᑐᓄᑦ ᐋᓐᓂᐊᖃᙱᑦᑐᓕᕆᓂᕐᒧᑦ ᐃᑲᔫᑎ ᐱᓕᕆᐊᒃᓴᖅ ᓱᓕ ᑲᔪᓯᔪᖅ.

ᑭᓯᐊᓂᓕ, ᐊᐱᕆᔭᐅᑎᓪᓗᒍ ᑐᓴᒐᒃᓴᓕᐅᖅᑎᒧᑦ ᐱᓕᕆᐊᒃᓴᐅᑉ ᒥᒃᓵᓄᑦ, ᒫᐃᓐ ᐅᖃᐅᓯᖃᕐᓂᕐᓴᐅᓚᐅᕐᑐᖅ ᐆᒥᖓ $35.6 ᒥᓕᐊᓐ ᐊᖏᖃᑎᒌᒍᑎᖏᓐᓂᒃ ᑖᔅᓱᒪ ᐊᒻᒪ ᕼᐋᓚᓐ ᑐᓴᒐᒃᓴᖓᓂᒃ.

ᑖᒃᑯᐊᒃ ᒪᕐᕉᒃ ᐊᖏᕈᑏᒃ ᐃᓚᖃᖅᑑᒃ ᐃᑲᔫᑎᒃᓴᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᔪᕈᓐᓃᕐᓴᕈᑎᒃᓴᓂᒃ ᐊᒻᒪ ᐊᖏᒡᓕᒋᐊᖅᑎᑦᑎᔪᒪᓪᓗᑎᒃ ᑲᒪᒋᔭᐅᖃᑦᑕᕆᐊᖃᕐᓂᕐᒨᖓᔪᓂᒃ ᓄᓇᕗᒥᑦ.

“ᐱᓕᕆᐊᕗᑦ ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᑦ ᑲᓇᑕᒥ ᑲᔪᓯᔪᖅ ᒪᐅᓇ ᐃᑲᔫᑎᒃᓴᓂᒃ ᐊᖏᖃᑎᒌᒍᑎᓄᑦ ᒫᓐᓇ ᐊᕐᕌᒍᒧᑦ ᐊᒻᒪᓗ ᐊᕐᕌᒍᓄᑦ ᐊᒡᒋᖅᑐᓄᑦ,” ᒪᐃᓐ ᐅᖃᕐᑐᖅ.

“ᐱᔾᔪᑎᒋᔭᐅᔪᖅ ᑐᓴᒐᒃᓴᓕᐅᕈᑎᒧ ᐅᓪᓗᒥ ᐊᒻᒪᓗ ᒥᓂᔅᑕ ᕼᐋᓚᓐ ᐃᖃᓗᖕᓄᑦ ᐳᓛᕐᓂᖓ ᒪᕐᕉᖕᓅᖓᓚᐅᕐᒪᑦ ᐊᖏᕈᑎᓄᑦ ᐊᑎᓕᐅᓚᐅᖅᑕᑦᑎᓐᓄᑦ. ᐊᒻᒪᓗ ᖃᓄᐃᓕᔭᐅᒐᐊᖅᐸᑦ ᐅᓇ ᓇᐅᑦᑎᐅᒃᑯᒫᖃᙱᑦᑐᓄᑦ ᐋᓐᓂᐊᖃᙱᑦᑐᓕᕆᓂᕐᒧᑦ ᐃᑲᔫᑦ ᐱᓕᕆᐊᒃᓴᖅ — ᒫᓐᓇ ᓯᕗᓂᑦᑎᓐᓂᓪᓘᓐᓃᑦ — ᑕᐃᒪᓕ ᖃᐅᔨᒪᓇᕐᑐᖅ ᐃᑲᔫᑎᒃᓴᒃᑲᓐᓃᑦ ᐃᑲᔪᕈᑎᒻᒪᕆᐅᓂᐊᕐᓂᖏᓐᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓄᓇᕗᒥᑦ.”