ᐸᐃᑕᓐ, ᑐᕉᑑ ᓱᓕᓂᕋᐃᕗᖅ ᓄᑖᙳᕆᐊᖅᑎᑕᐅᓂᐅᔪᓂ ᐅᑭᐅᖅᑕᖅᑐᒥ ᓴᐳᔾᔨᓯᒪᓂᐅᔪᒥ

For English version, see Biden, Trudeau promise upgrades to Arctic defence

ᔫᓇᐃᑎᑦ ᔅᑕᐃᑦᔅ ᐊᖓᔪᖅᑳᕐᔪᐊᖓ ᔫ ᐸᐃᑕᓐ ᐊᒻᒪ ᑲᓇᑕᒥ ᐊᖓᒧᖅᑳᕐᔪᐊᖅ ᔭᔅᑎᓐ ᑐᕉᑑ ᐊᖏᖅᓯᒪᓂᖃᖅᐳᑦ ᐱᓕᐊᓐᓂ ᑮᓇᐅᔭᓂ ᐊᑐᖅᑕᐅᓂᖏᓐᓂ ᖁᕝᕙᕆᐊᖅᑎᑦᑎᓂᕐᒧᑦ ᓴᐳᔾᔨᓯᒪᓂᐅᔪᒥ ᐅᑭᐅᖅᑕᖅᑐᒥ.

ᐅᖃᐅᓯᒃᓴᓕᐊᖑᔪᖅ ᑎᑭᐅᓚᐅᖅᐳᖅ ᑲᑐᔾᔭᐅᔪᒥ ᐅᖃᐅᓯᒃᓴᓕᐊᖑᔪᒥ ᒫᔾᔨ 24−ᒥ ᒪᓕᒃᑐᒥ ᐸᐃᑕᓐ ᐅᖃᓪᓚᓚᐅᕐᓂᖓᓂ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ, ᓯᕗᓪᓕᖅᐸᐅᓪᓗᓂ ᐊᖓᒧᖅᑳᕐᔪᐊᖑᔪᒥ ᐅᖃᓪᓚᖕᓂᕐᒧᑦ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ ᑕᐃᒪᙵᓂ ᐸᕌᒃ ᐅᐹᒪᒥ 2016−ᒥ.

ᐊᑐᖅᑕᐅᔪᒃᓴᐃᑦ ᐃᓚᖃᖅᐳᖅ $7 ᐱᓕᐊᓐᓂ ᓇᐅᑦᑎᖅᓱᕐᓂᕐᒧᑦ-ᐱᓕᕆᔾᔪᓯᐅᔪᒥ ᒫᓐᓇᒨᓕᖓᓕᖅᑎᑕᐅᓂᖓᓄᑦ ᐊᒻᒪ ᐱᓂᕐᒥ ᓄᑖᖑᔪᓂ ᓯᕗᓂᒃᓴᒥ ᓴᖅᑭᑉᐸᓪᓕᐊᔪᒥ ᑕᐅᑑᑎᐅᔪᒥ ᐱᓕᕆᔾᔪᓯᐅᔪᓂ.

ᐸᐃᑕᓐ ᐊᒻᒪ ᑐᕉᑑ ᐅᖃᐅᓯᖃᓚᐅᕆᕗᑦ $7.3 ᐱᓕᐊᓐᓂ ᑐᕌᕐᓂᐊᖅᑐᓂ ᖃᖓᑕᓲᓄᑦ ᒫᓐᓇᒨᓕᖓᓕᖅᑎᑕᐅᓂᖓᓄᑦ, ᐃᓚᖃᖅᑐᒥ ᐸᕐᓇᐃᓂᐅᔪᒥ ᑲᓇᑕᐅᑉ ᓂᐅᕕᕐᓂᖓᓂ F-35 ᐅᓇᑕᖅᑐᒃᓴᓄᑦ ᓱᒃᑲᔪᓂ.

ᐅᖓᓯᒃᑐᒧᑦ−ᑎᑭᐅᑎᓂᐅᔪᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ, ᐸᐃᑕᓐ ᐅᖃᐅᓯᖃᓚᐅᖅᐳᖅ ᐱᒻᒪᕆᐅᓂᖓᓂ ᓴᐳᔾᔨᓯᒪᓂᕐᒥ ᐅᑭᐅᖅᑕᖅᑐᒥ ᐱᐅᓯᒋᐊᖅᑕᐅᓂᒃᑯᑦ ᐊᒻᒪ ᒫᓐᓇᒨᓕᖓᓕᖅᑎᑕᐅᓂᖓᓄᑦ ᐅᐊᖕᓇᒥ ᐊᒥᐊᓕᑲᒥ ᖃᖓᑕᓂᕐᒥ ᐊᒻᒪ ᐊᓂᕐᓂᖃᕐᓇᙱᑦᑐᒥ ᓴᐳᔾᔨᓯᒪᓂᐅᔪᒥ ᑎᓕᐅᕆᔭᐅᓂᖓᓂ ᐅᕝᕙᓘᓐᓃᑦ Norad.

“ᐱᓕᕆᕗᒍᑦ ᖃᓂᑦᑐᒥ ᐊᐅᓚᑦᑎᓂᐅᔪᒥ ᐱᒪᑐᑦᑎᐊᕆᐊᕐᓂᕐᒥ ᐊᒻᒪ ᓴᐳᔾᔨᓯᒪᓂᕐᒥ ᐅᐊᖕᓇᖅᐸᓯᐅᓛᖑᔪᒥ ᐊᕕᒃᑐᖅᓯᒪᓂᐅᔪᓂ ᓄᓇᕐᔪᐊᑦᑎᓐᓂ,” ᐸᐃᑕᓐ ᐅᖃᓚᐅᖅᐳᖅ.

“ᕿᓚᒻᒥᐅᔪᒥ, ᐅᐊᖕᓇᒥ ᐊᒥᐊᓕᑲᒥ ᖃᖓᑕᓂᕐᒥ ᐊᒻᒪ ᐊᓂᕐᓂᖃᕐᓇᙱᑦᑐᒥ ᓴᐳᔾᔨᓯᒪᓂᐅᔪᒥ ᑎᓕᐅᕆᔭᐅᓂᖓᓂ ᐱᖃᕐᓂᐊᖅᐳᖅ ᓄᑖᖑᔪᒥ ᒪᓕᒃᑐᓄᑦ−ᐱᐅᓯᖃᑎᒌᖑᔪᓄᑦ ᓯᕗᓂᒃᓴᒥ ᓴᖅᑭᑉᐸᓪᓕᐊᔪᒥ ᑕᐅᑑᑎᐅᔪᒥ ᐊᖏᒡᓕᒋᐊᖅᑎᑦᑎᓂᕐᒥ ᐃᓂᖅᑎᕆᔭᐅᓵᓕᔪᒥ ᐱᔪᓐᓇᕐᓂᐅᔪᒥ, ᓄᑖᙳᕆᐊᖅᑐᒥ ᐃᒪᐅᑉ ᐊᑖᓂ ᓇᐅᑦᑎᖅᓱᕐᓂᕐᒧᑦ ᐱᓕᕆᔾᔪᓯᐅᔪᓂ, ᒫᓐᓇᒨᓕᖓᓕᖅᑎᑕᐅᓯᒪᔪᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐱᔭᕆᐊᓕᖕᓂ ᑲᒪᒋᔭᖃᕐᓂᕐᒥ ᐅᖓᕙᕆᐊᖅᓯᒪᓛᕐᒥ ᖃᖓᑕᓲᖑᔪᒥ.”

ᓯᕗᓂᒃᓴᒥ ᓴᖅᑭᑉᐸᓪᓕᐊᔪᒥ ᑕᐅᑑᑎᐅᔪᒥ ᐱᔪᓐᓇᕐᓂᖃᖅᐳᖅ ᖃᐅᔨᓂᕐᒥ ᑐᕌᒐᕆᔭᐅᔪᓂ ᕼᐊᓐᓇᓚᖏᓐᓂ ᑭᓛᒥᑐᓂ ᐅᖓᑖᓂ ᐊᖏᓂᖓᓂ ᑕᐃᒪᐃᒐᔪᒃᑐᒥ ᑕᐅᑑᑎᐅᔪᒥ.

“ᖁᕕᐊᑉᐳᖓ ᐱᓕᕆᖃᑎᖃᐃᓐᓇᕐᓂᕐᒥ ᖃᓂᑦᑐᒥ ᐱᓕᕆᖃᑎᖃᕐᓂᐅᔪᒥ ᑲᓇᑕᒥ ᑐᓂᓯᑎᓪᓗᑕ ᐅᑯᓂᖓ ᐱᔭᕆᐊᖃᕐᓂᐅᔪᓂ ᐃᓄᖁᑎᕗᑦ ᖃᓱᖓᑦᑎᐊᖏᓐᓇᕈᓐᓇᕐᓂᖏᓐᓂ ᖃᐅᔨᒪᓗᑎᒃ ᐅᐊᖕᓇᒥ ᐊᒥᐊᓕᑲᒥ ᖃᖓᑕᓂᕐᒥ ᐊᒻᒪ ᐊᓂᕐᓂᖃᕐᓇᙱᑦᑐᒥ ᓴᐳᔾᔨᓯᒪᓂᐅᔪᒥ ᑎᓕᐅᕆᔭᐅᓂᖓᓂ ᓇᐅᑦᑎᖅᓱᕐᓂᖓᓂ,” ᐸᐃᑕᓐ ᑲᔪᓯᓚᐅᖅᐳᖅ.

ᐅᖃᓪᓚᖕᓂᖓ ᐱᓚᐅᖅᐳᖅ ᓇᖏᑦᑐᓂ ᐸᑦᑕᒃᑐᖅᑕᐅᓂᐅᔪᒥ ᖁᙱᐊᖅᑐᓂ ᑲᓇᑕᐅᑉ ᒪᓕᒐᓕᐅᑎᖏᓐᓂ ᐃᓚᒋᔭᐅᔪᓂ ᐊᒻᒪ ᖃᐃᖁᔭᐅᓯᒪᔪᓂ ᐱᓕᕆᔨᕐᔪᐊᖑᔪᓂ.

ᑐᕉᑑ ᐅᖃᐅᓯᖃᓚᐅᕆᕗᖅ ᐸᐃᑕᓐ ᐅᖃᐅᓯᒃᓴᖏᓐᓂ ᐅᑭᐅᖅᑕᖅᑐᒥ ᐅᔾᔨᖅᓱᐃᓂᕐᒧᑦ.

“ᐱᓕᕇᓐᓇᖅᐳᒍᑦ ᑭᐅᓂᕐᒥ ᓴᖑᕙᓪᓕᐊᓂᐅᔪᒥ ᐅᔾᔨᖅᓱᐃᓂᕐᒥ ᐊᒃᓱᕈᕈᑕᐅᔪᓂ ᓵᙵᔭᑦᑎᓐᓂ ᐅᓪᓗᓂ,” ᑐᕉᑑ ᐅᖃᓚᐅᖅᐳᖅ ᑐᓴᒐᒃᓴᓕᐊᖑᔪᒥ ᐅᖃᓪᓚᖕᓂᖃᓚᐅᖅᑎᓪᓗᒍ.

ᓴᙱᒃᑎᒋᐊᖅᑕᐅᔪᒥ ᐅᐊᖕᓇᒥ ᐅᔾᔨᖅᓱᐃᓂᐅᔪᒥ ᐃᓱᒫᓘᑕᐅᓚᐅᖅᐳᖅ ᑲᓇᑕᐅᑉ ᒪᓕᒐᓕᐅᑎᖏᓐᓂ ᐃᓚᒋᔭᐅᔪᓂ ᓄᓇᕗᒻᒥ ᐊᒻᒪ ᓄᓇᕕᖕᒥ ᓯᕗᓂᐊᓂ ᐊᖓᔪᖅᑳᕐᔪᐊᑉ ᐅᖃᓪᓚᖕᓂᖓᓂ. ᓄᓇᕗᒻᒥ ᑲᓇᑕᒥ ᒪᓕᒐᓕᐊᕆᔭᐅᔪᓂᒃ ᖃᐅᔨᓴᖅᑎ ᑕᓂᔅ ᐹᑐᓴᓐ ᐅᖃᓚᐅᖅᐳᖅ ᑐᕌᖓᓂᖃᑦᑎᐊᖅᑐᒥ ᐸᐃᑕᓐᒧᑦ, ᓂᐅᕝᕕᐅᕐᓂᐅᔪᒥ ᐅᖃᕐᓂᖓᓂ ᑲᓇᑕᐅᑉ ᒪᓕᒐᓕᐅᖅᑎᖏᑦᑕ ᖃᓕᕈᓯᖓᓐᓂ ᐅᓪᓗᑐᐃᓐᓇᕐᒥ ᐅᓪᓛᖓᓂ.

“ᒫᓐᓇᒨᓕᖅᑎᑦᑎᓂᐊᖅᐳᒍᑦ ᐅᐊᖕᓇᒥ ᐊᒥᐊᓕᑲᒥ ᖃᖓᑕᓂᕐᒥ ᐊᒻᒪ ᐊᓂᕐᓂᖃᕐᓇᙱᑦᑐᒥ ᓴᐳᔾᔨᓯᒪᓂᐅᔪᒥ ᐊᒻᒪ ᓇᐅᑦᑎᖅᓱᕐᓗᑕ ᐅᐊᖕᓇᒥ ᐊᒥᐊᓕᑲᒥ ᐃᓕᖕᓄᑦ,” ᐹᑐᓴᓐ ᐅᖃᓚᐅᖅᐳᖅ ᑕᓯᐅᖃᑦᑖᖅᑎᓪᓗᒍ ᐸᐃᑕᓐ ᐊᒡᒐᖓᓂ.

ᐸᐃᑕᓐ ᐅᖃᐅᓯᖃᓚᐅᖅᐳᖅ ᖃᔅᓯᒐᓚᖕᓂ ᐅᖃᐅᓯᒃᓴᐅᔪᓂ ᐅᖃᓪᓚᖕᓂᖓᓂ.

ᐅᓇᑕᕐᔪᐊᕐᓂᐅᔪᖅ ᔪᑯᕋᐃᓐᒥ ᖁᑦᑎᓛᖑᓚᐅᖅᐳᖅ ᐃᓱᒪᒋᔭᖓᓂ. ᐊᖓᔪᖅᑳᕐᔪᐊᖅ ᓇᓗᓇᐃᖅᓯᒃᑲᓐᓂᓚᐅᖅᐳᖅ ᔫᓇᐃᑎᑦ ᔅᑕᐃᑦᔅ ᐊᒻᒪ ᑲᓇᑕᐅᑉ ᐃᑲᔪᖅᓱᐃᓂᖓᓂ ᓄᓇᒧᑦ ᐅᓇᑕᕐᓂᐅᔪᒥ ᕋᓴᒃᑯᓐᓂ ᐃᓵᖅᑕᐅᓂᖓᓂ.

ᐸᐃᑕᓐ ᐊᑐᓚᐅᕆᕗᖅ ᐅᖃᓪᓚᖕᓂᖓᓂ ᐅᖃᐅᓯᖃᒐᓛᖕᓂᕐᒥ ᑕᐅᖅᓰᓂᐅᔪᒥ, ᐃᑲᔪᕈᑎᒃᓴᓂ ᐲᖅᑕᐅᓂᖏᓐᓂ, ᐃᖅᑲᓇᐃᔮᒧᑦ ᐱᕈᖅᐸᓪᓕᐊᓂᖓᓂ, ᐊᒻᒪ ᑲᓇᑕᒥ ᐊᒻᒪ ᔫᓇᐃᑎᑦ ᔅᑕᐃᑦᔅ ᐃᓚᐅᖃᑕᐅᓂᖏᓐᓂ ᐊᑭᕋᖅᑐᐃᓂᐅᔪᒥ ᕼᐊᐃᑎᒥ.

ᐅᖃᓪᓚᖕᓂᐅᔪᖅ ᐱᓕᕆᓂᖃᓚᐅᖅᐳᖅ ᑕᒪᐃᑎᒍᑦ ᓂᕆᐅᖕᓂᖃᑦᑎᐊᕐᓇᖅᑐᒥ ᐅᖃᕐᓂᐅᔪᒥ ᓯᕗᓂᒃᓴᐅᔪᒥ ᑲᓇᑕᒥ ᐊᒻᒪ ᔫᓇᐃᑎᑦ ᔅᑕᐃᑦᔅ ᐱᓕᕆᖃᑎᒌᖕᓂᖏᓐᓂ.

“ᓄᓇᕐᔪᐊᖅ ᐱᔭᕆᐊᖃᖅᐳᖅ ᑲᓇᑕᒥ ᐊᒻᒪ ᔫᓇᐃᑎᑦ ᔅᑕᐃᑦᔅᒥ ᐱᓕᕆᖃᑎᒌᖕᓂᖏᓐᓂ ᐱᓕᕆᖃᑎᒋᔭᑦᑎᓐᓂ ᓄᓇᕐᔪᐊᓕᒫᒥ ᑲᑎᖃᑎᒌᖕᓂᕐᒥ ᓴᙱᔪᒥ ᐊᒻᒪ ᐊᑑᑎᖃᑦᑎᐊᖅᑐᒥ ᓯᓚᕐᔪᐊᒥ ᖃᓄᐃᓕᐅᕐᓂᐅᔪᒥ,” ᐸᐃᑕᓐ ᐅᖃᓚᐅᖅᐳᖅ.

ᐃᔪᕐᓂᖃᓚᐅᕆᕗᖅ ᑐᕌᓐᑐ ᒪᐃᐳᓪ ᓖᕝᔅᓂ, ᐅᖃᖅᖢᓂ ᕕᓕᑎᐅᓪᕕᐊ ᕙᓚᐅᔪᔅᓂ ᐃᑲᔪᖅᓱᐃᔨᐅᓪᓗᓂ ᓖᕝᔅ ᑲᓇᑕᒥᐅᑕᐅᔪᑐᐊᖑᓪᓗᑎᒃ ᕼᐋᑭᒥ ᐱᙳᐊᖅᑎᐅᔪᓂ ᐱᐅᒋᙱᑕᖏᓐᓂ.