ᐱᕐᓯᕐᓂᖅᒧᑦ ᐃᒪᓕᕆᓂᖅ ᓄᖃᖓᑎᑕᐅᕗᖅ ᐅᖅᓱᖅᑑᕐᒥ

For English version, see Blizzard stalls water line repairs in Gjoa Haven

ᐅᖅᓱᖅᑑᕐᒥᐅᑕᖅ ᐊᖑᑎ ᐅᖃᕐᑐᖅ ᐃᒪᕐᒧᑦ ᓈᒻᒪᙱᓕᐅᕈᑎ ᐊᔪᕐᓇᕐᓂᕐᓴᐅᓂᕋᓕᓚᐅᕐᓂᕋᖅᑕᖓ ᐃᒪᐃᑦ ᓂᐅᕕᐊᒃᓴᐃᑦ ᐊᑭᑦᑐᕆᐊᖅᑕᐅᑎᓪᓗᒋᑦ ᓯᓚᐅᑉ ᐱᕐᓯᕐᓂᖓᓄᑦ ᐃᖅᑲᓇᐃᔭᖅᑎᑦ ᓴᓇᔪᓐᓇᒋᓚᐅᑲᒃᑎᓪᓗᒋᑦ ᐃᒪᐅᑉ ᐊᖅᑯᑎᐊᓂ.

ᑲᐃᐅᓪ ᐊᒡᓘᒃᑲᖅ ᐅᖃᓚᐅᕐᑐᖅ ᐃᒪᖅ ᓂᐅᕕᒃᓴᑦ ᓂᐅᕕᕐᕕᒃᒥ ᐊᑭᑦᑐᕆᐊᖅᑕᐅᓚᐅᕐᓂᖏᓐᓂ ᒪᐅᖓ $4.99- ᔭᓄᐊᕆ 19-ᖑᑎᓪᓗᒍ ᐅᕙᙵᑦ $3.49-ᒥ ᔭᓄᐊᕆ 18-ᒥ ᐊᑭᖏᓐᓂ. ᓂᐅᕕᓚᐅᕐᑐᖅ ᖁᓕᓂ 500 ᒥᓕᓖᑕ ᐃᒪᕐᒥ ᐸᓂᖓᓄᑦ ᓄᑕᕋᓛᒧᑦ ᐊᑭᖃᓪᓗᐊᖅᖢᑎᒃ $50 ᖃᓂᒋᔭᖓᓂ.

ᑕᐅᑐᒃᖢᒋᑦ ᐃᒥᒐᖅ ᓂᐅᕕᕐᕕᒃᒥ ᐊᑭᖃᕐᑐᖅ $2.79, ᐅᖃᕐᑐᖅ ᕙᐃᔅᐳᒃᑯᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᐅᕙᓂ ᕙᐃᔅᐳᒃᑯᑦ ᑎᑎᕋᕐᓯᒪᔭᖏᓐᓂ ᐅᖅᓱᖅᑑᕐᒥ, ᐊᒡᓘᒃᑲᖅ ᐅᖃᓚᐅᕐᑐᖅ ᐃᓚᖏᑦ ᓄᓇᖃᕐᑐᑦ ᐊᐳᑎᒥ ᐊᐅᒃᓰᓗᑎᒃ ᖁᕐᕕᖏᓐᓄᑦ ᐃᒪᓕᐅᕈᓐᓇᕐᓂᖏᓐᓂ, ᑭᓯᐊᓂᓕ ᑕᒪᕐᒥ ᐊᔪᕐᒪᑕ ᐅᓗᕆᐊᓇᙱᑦᑐᒥ ᓈᒻᒪᒃᑐᓂᒡᓗ ᐃᒪᖃᐅᑎᖃᕆᐊᒃᓴᖅ ᖃᓛᕈᑎᐅᔪᓐᓇᖅᑐᓂᒃ ᐃᒪᕐᒥ. ᐊᒥᓱᑦ ᓂᐅᕕᐊᒃᓴᕐᓂ ᐱᔭᕆᐊᖃᕐᒪᑕ ᓄᑕᕋᓛᖏᓐᓄᑦ ᐊᒻᒪ ᓱᕈᓯᖏᓐᓄᑦ.

“ᐊᑭᑦᑐᕆᐊᖅᑎᑦᑎᔭᕆᐊᖃᙱᒻᒪᑕ ᐃᒪᕐᒥ ᓈᒻᒪᙱᓕᐅᕈᑎᖃᖅᑎᓪᓗᒋᑦ,” ᐊᒡᓘᒃᑲᖅ ᐅᖃᕐᑐᖅ.

ᐊᑭᒋᔭᐅᔪᑦ ᖁᕝᕙᖅᑎᑕᐅᓯᒪᓚᐅᑲᓚᐅᕐᒪᑕ ᐃᒪᕐᓂ ᐅᖅᓱᖅᑑᕐᒧᑦ ᑎᑭᑎᑦᑎᑎᓪᓗᒋᑦ ᐱᔭᐅᔪᒪᓂᕐᓴᐅᓂᖏᓐᓄᑦ, ᐅᖃᕐᑐᖅ ᐳᕆᔾᔨᑦ ᐳᒍᐊᐃᓐ, ᑐᓴᐅᒪᑎᑦᑎᔨᓄᑦ ᑐᑭᒧᐊᖅᑎᑦᑎᔨ ᓄᐊ ᕕᐊᔅᑦ ᑲᒻᐸᓂᒃᑯᓐᓄᑦ, ᓄᐊᑕᓐᒥ ᐊᐅᓚᑦᑎᔪᓄᑦ.

ᐅᓇ “ᖃᖓᑕᓲᒃᑰᕐᑐᑦ ᐊᑭᖏᓐᓂ ᖁᕝᕙᕆᐊᕈᑎᐅᓚᐅᕐᑐᖅ ᐃᒪᕐᓄᑦ,” ᐳᒍᐊᐃᓐ ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᕋᖅᑕᖏᑦᑎᒍ ᔭᓄᐊᕆ 20-ᒥ, ᐅᖃᒃᑲᓐᓂᖅᖢᓂ ᐃᒪᐅᑉ ᐊᑭᖏ ᐊᑦᑎᒃᓯᒃᑲᓐᓂᕐᓂᐊᕐᓂᖏᓐᓂᒃ.

“ᒫᓐᓇ ᐃᒪᕐᒧᑦ ᓈᒻᒪᙱᓕᐅᕈᑎᖃᕐᓂᕐᒧᑦ ᑕᐃᒪᓕ ᖃᖓᑕᓲᒃᑰᕐᑐᑦ ᐊᑭᖏ ᐊᑭᖃᖅᑎᓕᓚᐅᕐᑕᕗᑦ ᐅᒥᐊᕐᔪᐊᒃᑰᖅᑐᕕᓂᕐᑎᑐᑦ ᑕᒻᒪᓐᓇᓗ ᐅᓪᓛᕐᓂ ᑕᐃᒪᐃᓕᖅᖢᓂ,” ᐅᖃᕐᑐᖅ.

“ᐱᓕᕆᖃᑎᖃᕐᒥᒐᑦᑕ ᓄᓇᓕᖕᓂ ᐊᖏᖅᑕᐅᑎᑦᑎᓇᓱᒃᖢᑕ ᐃᒪᕐᓂ ᐃᒻᒥᕐᓱᐃᖃᑦᑕᕈᒪᓂᕐᒥ ᐊᑭᑭᓐᓂᕐᓴᐅᔪᓐᓇᕐᓂᐊᕐᒪᑕ.”

ᓄᓇᕗᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᒪᕐᒥ ᖃᓛᕐᑎᑦᑎᖃᑦᑕᖁᔨᓕᓚᐅᕐᓯᒪᖕᒪᑕ ᔭᓄᐊᕆ 23-ᒥ ᐃᒪᐅᑉ ᐊᖅᑯᑎᖓᓂ ᓈᒻᒪᙱᓕᐅᕈᑎᖃᖅᑎᓪᓗᒋᑦ ᐃᒥᕐᑕᕐᕕᒃᒥᑦ.

ᒫᓐᓇ ᓱᓕ ᑕᐃᒪᐃᖁᔭᐅᓯᒪᔪᑦ.

ᑕᐃᒪᙵᓂ, ᐅᖄᑲᑕᑦᑐᑦ ᕙᐃᔅᐳᒃᑯᑦ ᕼᐋᒻᒪᓚᒃᑯᓐᓂ ᐃᒪᖃᐅᑎᓂ ᑐᓂᐅᖃᐃᖁᔨᓯᒪᔪᓂ ᐊᒻᒪ ᓂᓚᒃᑕᖁᔨᔪᓂ ᓄᓇᓕᖕᓄᑦ.

ᕼᐋᒻᒪᓚᒃᑯᓐᓄᑦ ᐱᓕᕆᔨᒻᒪᕇᑦ ᑭᐅᓚᐅᙱᑦᑐᑦ ᓄᓇᑦᓯᐊᕐᒥ ᐱᕙᓪᓕᐊᔪᓂ ᑐᓴᕋᓱᒃᑎᓪᓗᒋᑦ ᑕᒪᑐᒥᖓ.

ᐃᓱᒫᓘᑎᐅᔪᑦ ᓴᖅᑭᑕᐅᑲᑕᓕᓚᐅᕐᑐᑦ ᐱᕐᓯᕐᓂᕐᒧᑦ ᐃᖅᑲᓇᐃᔭᖅᑏᑦ ᐱᓕᕆᔪᓐᓇᙱᑎᓪᓗᒋ ᐋᖅᑭᒃᓱᐃᓂᕐᒥ ᐃᒪᐅᑉ ᐊᖅᑯᑎᐊᓂ ᑕᓯᕐᒥᙶᖅᑐᒥ ᐊᒻᒪ ᐃᒪᖃᐅᑎᒧᑦ, ᕼᐋᒻᒪᓚᒃᑯᑦ ᐅᖃᓚᐅᕐᑐᑦ ᕙᐃᔅᐳᒃᑯᑦ ᑐᓴᒐᒃᓴᖏᓐᓂ ᔭᓄᐊᕆ 19-ᒥ.

ᕼᐋᒻᒪᓚᒃᑯᑦ ᐱᓕᕆᔨᖏᑦ ᒫᓐᓇ ᑲᒪᒋᔭᖃᕐᓂᕋᓚᐅᕐᑐᑦ ᓱᕋᒃᑎᑦᑎᒃᑲᓐᓂᖅᑎᑦᑕᐃᓕᓂᕐᒥ ᐃᒪᐅᑉ ᐊᖅᑯᑎᐊᓂ, ᓇᓂᓗᒍ ᓇᐅᒃᑯᑦ ᓈᒻᒪᙱᓕᐅᕈᑎᖃᕐᒪᖓ ᐋᖅᑭᒃᓱᕐᓗᒍᓗ ᐊᒻᒪᓗ ᐃᒥᖅᑕᑲᑕᓕᕐᓗᑎᒃ ᐊᒻᒪ ᑯᕕᖅᑕᐃᑲᑕᒡᓗᑎᒃ.

ᓄᓇᕗᒥᑦ ᒐᕙᒪᒃᑯᑦ ᐊᒻᒪ ᓄᓇᓕᖕᓂ ᓴᓇᔨᐅᔪᑦ ᑳᓐᑐᕌᑎᒍᑦ ᐅᑯᐊ CAP ᐊᓐᑐᐳᕋᐃᓯᔅ ᓕᒥᑎᑦ ᐃᖅᑲᓇᐃᔭᖅᑎᖏᑦ ᐱᓕᕆᐊᖃᓚᐅᕐᑐᑦ 3:00 ᐅᓐᓄᐊᒃᑯᑦ ᐊᓂᒍᖅᖢᒍ ᖁᐊᖅᑎᑦᑎᑦᑕᐃᓕᑎᑦᑎᓪᓗᑎᒃ ᐃᒪᖃᐅᑎᖃᕐᕕᒃᒥ, ᕼᐋᒻᒪᓚᒃᑯᑦ ᐱᓕᕆᔨᒻᒪᕆᖏᑦ ᐅᖃᓚᐅᕐᒥᔪᑦ ᕙᐃᔅᐳᒃᑯᑦ ᐊᓯᐊᒎᖅᖢᑎᒃ.

ᖁᐊᖅᑎᑦᑎᑦᑕᐃᓕᒪᓪᓗᑎ ᐊᑕᐅᓯᖅ ᐃᒥᖅᑕᐅᑎ ᓄᓇᓯᐅᑎ ᐅᑎᕐᑕᕋᐃᓐᓇᖅᑐᑦ ᑕᓯᐅᓪᓗ ᐃᒪᖃᕐᕕᐅᓪᓗ ᐊᑯᓐᓂᐊᓂ ᐊᐅᓚᑕᐅᖏᓐᓇᕋᓱᒃᖢᓂ ᐃᒪᐅᑉ ᐊᖅᑯᑎᖓ. ᐅᓇ ᐅᓄᙱᓐᓂᕐᓴᓂ ᐃᒥᖅᑕᐅᑎᓂ ᐊᑐᕈᑎᐅᔪᖅ ᐃᒡᓗᓄᑦ ᐃᒥᖅᑕᖅᑐᓂ ᑕᐃᒪᓐᓇᓗ ᓱᒃᑲᐃᓐᓂᕐᓴᐅᓕᖅᖢᓂ ᐃᒥᕐᑕᕐᓂᖅ ᓄᓇᓕᖕᓂ.

ᓄᓇᓖᑦ ᐅᖃᐅᔾᔭᐅᓯᒪᔪᑦ ᐊᑕᐅᓰᕐᓗᑎᒃ ᐃᒥᖅᑕᖅᑕᐅᔪᒪᓗᑎ ᐅᖄᓚᖃᑦᑕᖁᔭᐅᓪᓗᑎᒃ, ᐊᒻᒪᓗ ᐊᑯᓂᒍᓱᓗᐊᑲᑕᖁᔨᙱᖢᑎᒃ.

ᕼᐋᒻᒪᓚᒃᑯᑦ ᐱᓕᕆᔨᒻᒪᕆᖏ ᑲᑎᒪᖃᑎᖃᕐᓂᐊᖅᑐᑦ ᔭᓄᐊᕆ 20-ᒥ ᐅᑯᓂᖓ ᓄᓇᕗᒥᑦ ᒐᕙᒪᒃᑯᑦ ᑐᐊᕕᕐᓇᖅᑐᓕᕆᔨᖏᓐᓂᒃ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᔨᖏᓐᓂ ᑕᒪᓐᓇ ᐃᒪᓕᕆᓂᖅ ᐅᖃᐅᓯᐅᓗᓂ.

ᐃᓱᒫᓗᑎᖃᕋᓗᐊᖅᖢᓂ ᐊᒡᓘᒃᑲᖅ ᐅᖃᓚᐅᕐᑐᖅ ᐃᑲᔪᖅᑐᐃᓂᖓᓂ ᐃᖅᑲᓇᐃᔭᖅᑎᓂ ᑐᐊᕕᕐᓇᖅᑐᓕᕆᑎᓪᓗᒋᑦ. “ᑐᑭᓯᔪᖓ ᕼᐋᒻᒪᓚᒃᑯᑦ ᐱᓕᕆᓇᓱᓪᓚᕆᖕᓂᖏᓐᓂᑦ ᑕᒪᑐᒥᖓ,” ᐅᖃᕐᑐᖅ.

“ᖃᓄᐃᑦᑐᖃᖅᑎᓐᓇᒍᑦ ᐱᓕᕆᑦᑎᐊᖅᐸᒃᑐᑦ,” ᐅᖃᕐᑐᖅ. “ᐃᑲᔫᑎᖃᒃᑲᓐᓂᖅᐸᑦ ᖃᐅᔨᒪᔪᖓ ᐱᐅᓯᕚᓪᓕᖅᑎᑦᑎᔪᓐᓇᕐᓂᖏᓐᓂᒃ.”