ᐊᑦᑕᓇᖅᑐᒦᑎᑦᑎᑦᑕᐃᓕᓂᕐᒧᑦ ᑲᑎᒪᔨᕋᓛᑦ ᑲᑎᒪᑎᓪᓗᒋ ᐅᖃᐅᓯᖃᓗᐊᓚᐅᕐᑐᑦ ᐊᑐᕆᐊᑦ ᖃᐅᒪᒃᑲᓐᓂᕆᐊᖃᕐᓂᖏᑦ

For English version, see Brighter streets, fire safety focus of Iqaluit public safety committee

ᐃᑭᑎᑦᑎᑦᑕᐃᓕᓂᕐᒧᑦ ᐱᕐᕈᓗᐊᕿᑎᑦᑎᑦᑕᐃᓕᓂᖅ ᐊᒻᒪ ᓄᓇᓕᐸᐅᔭᐃᑦ ᐊᑐᕆᐊᖏᑦ ᖃᐅᒻᒪᖅᐹᓪᓕᕆᐊᖃᕐᓂᖏᑦ ᐅᖃᐅᓯᐅᖃᑕᐅᓚᐅᕐᑐᑦ ᐃᖃᓗᐃᑦ ᓄᓇᓕᐸᐅᔭᐃᑦ ᐊᑦᑕᓇᖅᑐᒦᑎᑦᑎᑦᑕᐃᓕᓂᕐᒧᑦ ᑲᑎᒪᔨᕋᓛᖏᓐᓄᑦ ᑲᑎᒪᑎᓪᓗᒋᑦ ᐅᒃᑑᐱᕆ 3-ᒥ.

ᒪᐃᔭᐅ ᑐᒡᓕᖓ ᑭᒻ ᓯᒥᑦ, ᐱᖓᓱᓂ ᓄᓇᓕᐸᐅᔭᓄᑦ ᑲᑎᒪᔨᐅᖃᑕᔪᓂ ᐃᓚᒋᔭᐅᔪᖅ ᑲᑎᒪᔨᕋᓛᓄᑦ, ᐸᓖᓯᓂ ᓈᒻᒪᒃᓴᕐᓂᕋᓪᓚᕆᓚᐅᕐᑐᖅ ᐊᐅᔭᖅ ᐊᖓᔮᖅᑐᓂᒃ ᐊᖁᑎᑦᑎᑦᑕᐃᓕᓂᕐᓴᐅᓂᖏᓐᓂ ᐊᒻᒪᓗ ᓄᓇᓕᖕᓄᑦ ᐸᓖᓯᙳᐊᑦ ᐃᖅᑲᓇᐃᔭᖅᑎᖏᓐᓂ ᓄᓇᓕᖕᓃᑦᑐᓂ ᓄᓇᓯᐅᑎᕕᓂᕐᓂ ᐊᑐᕈᓐᓃᖅᓯᒪᔪᓂᒃ ᑲᒪᒋᔭᖃᓚᐅᕐᓂᖏᓐᓂᒃ

ᑭᓯᐊᓂᓕ, ᐃᓱᒫᓘᑎᖃᓚᐅᕐᑐᖅ ᒪᑯᓂᖓ ᐃᓄᖕᓂ ᕿᔪᖕᓂ ᖃᓕᕇᓕᖅᑎᑦᑎᓯᒪᔪᓂᒃ ᐃᒡᓗᖏᑦᑕ ᓯᓚᑎᑦᑎᐊᖏᓐᓂ. ᑖᒃᑯᐊᓕ ᕿᔪᐃᑦ ᐃᑭᓂᖅᐸᑕ, ᓯᒥᑦ ᐅᖃᕐᑐᖅ, “ᐃᒡᓗᐃᑦ ᑐᒡᓕᕇᒃᑑᑎᑦ ᐃᑭᖃᑕᐅᓕᑐᐃᓐᓇᕆᐊᖃᕐᒪᑕ.”

ᖃᑦᑎᕆᔨᒃᑯᑦ ᐊᖓᔪᖅᑳᖓ ᓯᑏᕝ ᒪᒌᓐ ᐅᖃᓚᐅᕐᑐᖅ ᓄᓇᓕᖕᓂ ᕿᒥᕐᕈᐊᕐᓂᐊᕐᓂᕋᖅᖢᓂ ᖃᓄᖅ ᐃᓄᐃᑦ ᕿᔪᖕᓂ ᖃᓕᕇᒃᑎᑦᑎᓯᒪᖃᑦᑕᕆᐊᒃᓴᖏᓐᓂᒃ.

“ᑕᒪᓐᓇ ᖃᐅᔨᒋᐊᒃᑲᓐᓂᕆᐊᖃᕋᑦᑎᒍᑦ,” ᐅᖃᕐᑐᖅ, ᐅᖃᒃᑲᓐᓂᖅᖢᓂ ᓄᓇᓕᐸᐅᔭᐃᑦ ᐃᑭᑎᑦᑎᑦᑕᐃᓕᓂᕐᒧᑦ ᐱᕐᕈᓗᐊᕿᑎᑦᑎᑦᑕᐃᓕᓂᖅᒧᑦ ᒪᓕᒐᕋᓛᖅ ᓄᑖᙳᕆᐊᖅᑕᐅᓂᐊᕐᓂᖓᓂᒃ.

ᓯᒥᑦ ᐊᐱᕆᓚᐅᕐᒥᔪᖅ ᖃᓄᖅ ᐱᐅᓯᕚᓪᓕᖅᑎᑦᑎᔪᓐᓇᕆᐊᒃᓴᖏᓐᓂ ᐃᖃᓗᐃᑦ ᐊᑐᕆᐊᖏᓐᓂ ᐊᒻᒪ ᐱᓱᒡᕕᐊᖃᑦᑕᖅᑐᑦ.

“ᐃᓱᒪᒋᖃᑦᑕᕋᒃᑯᑦ ᕙᑐᕈᓪ ᐊᑐᕆᐊᒥ ᐱᕐᕈᓗᐊᕿᓚᐅᕐᓯᒪᔪᓂ ᐊᐅᔭᖅ ᐱᓗᐊᖅᑐᒥ ᐃᓄᐃᑦ ᐱᓱᒃᐸᒃᑐᑦ ᑕᒪᐅᓇ.” ᐅᖃᕐᑐᖅ, ᐅᖃᐅᓯᖃᖅᖢᓂ ᐱᓱᒃᑐᒥ ᐃᓅᔪᓐᓃᓚᐅᕐᓯᒪᔪᒥ ᐋᒐᓯ 10-ᖑᑎᓪᓗᒍ.

ᐅᖃᖅᖢᓂ ᓄᓇᓕᐸᐅᔭᐃᑦ ᖃᐅᒪᖅᑯᑎᖃᒃᑲᓐᓂᕆᐊᖃᕐᓂᖏᓐᓂ ᐊᒻᒪ ᑲᒪᒋᔭᖃᖅᐸᒡᓗᑎᒃ ᐱᓱᒡᕕᐅᕙᒃᑐᑦ.

ᕌᑦ ᒪᒡᕗᐊᑦ, ᓄᓇᓕᐸᐅᔭᐃᑦ ᐊᐅᓚᑕᖏᓐᓄᑦ ᐊᒻᒪ ᓱᐳᓐᓂᐊᖅᑐᓕᕆᓂᕐᒧᑦ ᑐᑭᒧᐊᖅᑎᑦᑎᔨ, ᐅᖃᓚᐅᕐᑐᖅ ᖃᐅᔨᓴᓚᐅᕐᓯᒪᓂᖏᓐᓂᒃ ᑕᒪᒃᑯᐊ ᐱᐅᓯᕚᓪᓕᖅᑎᑕᐅᔪᒪᓂᖏᓐᓂ ᐊᑐᕆᐊᑦ ᖃᐅᒻᒪᖅᑯᑎᖏᑦ.

ᐅᓇᑦᑕᐅᖅ ᐃᓄᒋᐊᓂ ᐋᖓᔮᖃᑦᑕᖅᑐᑦ ᐅᖃᐅᓯᐅᑲᑕᖕᒪᑦ ᑲᑎᒪᔨᓄᑦ ᐊᒻᒪᓗ ᓄᓇᕗᒥ ᑲᑎᒪᔨᕐᔪᐊᓄᑦ ᐅᖃᐅᓯᐅᓚᐅᕆᓪᓗᓂ.

ᑲᑎᒪᔨᕋᓛᓄᑦ ᑲᑎᒪᔨ ᑕᐃᕕᑦ ᓛᓴᓐ ᐅᖃᓚᐅᕐᑐᖅ ᐸᓖᓯᒃᑯᑦ ᐱᓱᑲᑕᖃᖕᓂᕐᓴᐅᓕᕐᓂᖏ ᐊᒻᒪᓗ ᑎᓴᒪᓕᖕᓂ ᐊᑐᖃᑦᑕᓕᕐᓂᖏᑦ “ᐊᑑᑎᖃᒻᒪᕆᒃᑐᖅ,” ᐊᒻᒪᓗ ᐸᓖᓯᓂ ᐱᓕᕆᓂᕐᓴᐅᒃᑲᓐᓂᖁᔨᓪᓗᓂ ᓯᕗᓂᑦᑎᓐᓂ.

ᑲᑎᒪᓂᖅ, 17 ᒥᓂᑦᔅ ᑲᑎᒪᓂᐅᓚᐅᕐᑐᖅ ᐊᒻᒪᓗ ᑲᑎᒪᔨᕋᓛᑦ ᑲᑎᒪᑕᐃᓐᓇᖅᖢᑎ ᑕᐃᒪᙵᓂ ᐊᐃᕆᓕ 11-ᒥ ᑕᐃᔅᓱᒪᓂᓕ ᐃᑲᔪᖅᑐᐃᓂᕐᒨᓚᐅᕐᓯᒪᖕᒪᑕ ᓄᓇᓖᑦ ᐊᑦᑕᓇᖅᑐᒦᑎᑦᑕᐃᓕᓂᖏᑦ ᐱᐅᓯᕚᓪᓕᖅᑎᑕᐅᔪᒪᑎᓪᓗᒍ ᒪᐅᓇ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᒪᓂᒃᑯᑦ ᐊᒻᒪᓗ ᐊᑐᐃᓐᓇᖃᕐᓂᓴᐅᓂᕐᒥ ᐱᔨᑦᑎᕋᐅᑎᐅᔪᓂᒃ.

ᑲᑎᒪᔨᕋᓛᑦ ᐃᓚᖃᓚᐅᕐᒥᔪᑦ ᓄᓇᓕᐸᐅᔭᓄᑦ ᐃᖅᑲᓇᐃᔭᖅᑎᓂ, ᓄᓇᕗᒥᑦ ᒐᕙᒪᒃᑯᓐᓄᑦ ᑭᒡᒐᖅᑐᐃᔪᓂᒃ ᐊᒻᒪᓗ ᐸᓖᓯᒃᑯᓐᓂ ᐊᒻᒪ ᓄᓇᓕᖕᓄᑦ ᒪᓕᒐᕋᓛᓕᕆᔨᓂ.