ᐃᖃᓗᒃᑑᑦᑎᐊᒥ ᐸᑦᑕᐃᑦᑐᓂᒃ ᑐᓐᓂᖅᓴᐃᓂᖅ ᒥᑭᑦᑑᙱᓚᖅ

ᕼᐋᒻᓚᑦᑯᑦ ᐃᖃᓗᒃᑑᑦᑎᐊᒥ ᐃᓅᓯᖃᑦᑎᐊᕐᓂᕐᒧᑦ ᐱᓕᕆᕝᕕᖓ ᐱᓕᕆᕐᔪᐊᖅᓯᒪᕗᑦ ᑐᓂᐅᖅᑲᐃᓪᓗᑎᒃ 1,500 ᐸᐅᓐᔅ−ᓂᒃ ᐅᖁᒪᐄᓐᓂᖓᓂ (681 ᑭᓗᒍᕌᒻᓂᒃ ᐅᖁᒪᐄᓐᓂᖓᓂ) ᐸᑦᑕᐃᑦᑐᓂᒃ ᓄᓇᓕᖕᒥᐅᓄᑦ ᑲᑐᔾᔨᖃᑎᒌᓄᓪᓗ ᑕᐃᒪᙵᑦ ᐊᐅᒍᔅᑦ 5−ᖑᓚᐅᕐᓂᖓᓂᑦ.

ᕗᕆᑦ ᒧᐃᔅ, ᐱᓕᕆᐊᖑᔪᒧᑦ ᐊᐅᓚᑦᑎᔨ ᖃᓄᐃᙱᑦᑎᐊᕐᓂᕐᒧᑦ ᐃᓂᒋᔭᐅᔪᒥ ᐃᖃᓗᒃᑑᑦᑎᐊᒥ, ᐅᖃᓚᐅᖅᐳᖅ ᖃᕆᑕᐅᔭᒃᑯᑦ ᑎᑎᕋᖅᑕᒥᓂ ᑕᒪᒃᑯᐊ ᐸᑏᑎᑦ ᓄᖑᑉᐸᓪᓕᐊᓕᓚᐅᕐᓂᖏᓐᓂᒃ, ᑕᒪᕐᒥᑲᓴᒃ ᐱᑕᖃᕈᓐᓃᖅᖢᑎᒃ ᐅᓐᓄᒃᑯᑦ ᐋᒌᓯ 6−ᒥ.

“1,500 ᐸᐅᓐᔅ ᐅᖁᒪᐄᓐᓂᖓᓂ ᐅᖓᑖᓂ ᐸᑏᑎᑖᓚᐅᖅᐳᒍᑦ, ᐊᒻᒪ ᖃᐅᑎᓪᓗᒍ ᐅᓪᓛᒃᑯᑦ, ᓇᑉᐸᓪᓗᐊᖏᑦ ᐱᑕᖃᕈᓐᓃᓚᐅᖅᐳᑦ ᓄᖑᑕᐅᓪᓗᑎᑦ ᖃᐅᔨᒋᐊᓚᐅᖅᐳᖓ ᐅᓐᓄᐊᒃᑲᓐᓂᖅ, ᐊᒻᒪ 75 ᐳᓴᓐᑎᐸᓗᐃᑦ ᐱᑕᖃᕈᓐᓃᓚᐅᖅᐳᑦ,” ᒧᐃᔅ ᐅᖃᓚᐅᖅᐳᖅ ᖃᕋᓴᐅᔭᒃᑯᑦ ᑎᑎᕋᖅᑕᖓᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᐸᑏᑎᑦ Miner Creek Farms-ᑯᓐᓂᙶᓚᐅᖅᐳᑦ ᓴᔅᑳᑦᓱᐊᓐᒥ ᐊᒻᒪ ᐊᐅᓪᓚᖅᑎᑕᐅᓪᓗᑎᒃ ᐅᑭᐅᖅᑕᖅᑐᒧᑦ ᒍᕋᓐ ᐱᐊᕆ, ᐋᓪᐴᑕᒥ, ᑮᓇᐅᔭᓕᐅᕋᓱᒃᑎᐅᙱᑦᑐᒧᑦ ᑕᐃᔭᐅᔪᖅ Polaris Pantry Project, ᐊᐅᓚᑕᐅᔪᖅ ᑯᕆᔅᑎ ᐊᒻᒪ ᒫᑎᓐ ᕗᔨᑕᒧᑦ. ᐱᒋᐊᖅᑎᑦᑎᓚᐅᖅᐳᑦ ᑮᓇᐅᔭᓕᐅᕋᓱᒃᑎᐅᙱᖦᖢᑎᒃ ᐊᕐᕌᒍᓂ ᐊᕐᕕᓂᓕᖕᓂ ᓂᐅᕕᑲᑕᓚᐅᖅᖢᑎᒃ ᐊᐅᓪᓚᖅᑎᑦᑎᕙᒃᖢᑎᒡᓗ ᐅᑭᐅᖅᑕᖅᑐᒥ ᓄᓇᓕᖕᓄᑦ ᑲᒻᐸᓂᒋᔭᒥᓄᑦ GP2U−ᑯᓐᓄᑦ.

“Polaris Pantry ᐊᐃᑉᐸᕆᓕᖅᑕᖓᓂ ᐊᕐᕌᒍᖓᓃᓕᑕᐃᓐᓇᖅᐳᖅ,” ᑯᕆᔅᑎ ᕘᔨᑕ ᐅᖃᓚᐅᖅᐳᖅ ᐊᐱᖅᓱᖅᑕᐅᑎᓪᓗᒍ. “ᓇᓗᓇᐃᒃᑯᑕᖃᖅᑐᖅ ᑮᓇᐅᔭᓕᐅᕋᓱᐊᖅᑎᐅᙱᖦᖢᓂ…. ᑕᐃᒪᐃᓕᐅᕈᓘᔭᓚᐅᖅᐳᒍᑦ ᓵᑦᑕ ᓴᓂᕌᓂ… ᑭᓯᐊᓂ ᐃᓱᒪᓕᓚᐅᖅᐳᒍᑦ ᐱᓕᕆᑦᑎᐊᕆᐊᖃᕐᓂᑦᑎᓐᓂᒃ. ᐊᑎᓕᐅᖃᑕᐅᓯᒪᒍᑦᑕ ᑮᓇᐅᔭᓕᐅᕋᓱᐊᖅᑎᐅᙱᖦᖢᑕ, ᐅᓄᕐᓂᖅᓴᓂᒃ ᑐᓐᓂᖅᑯᓯᐊᖅᑖᕈᓐᓇᖅᐳᒍᑦ ᐃᓄᖕᓄᑦ.”

ᕗᔨᑕ ᐅᖃᓚᐅᕐᑐᖅ 16,000 ᐸᐅᓐᓯᓂᒃ ᐅᖁᒪᐄᓐᓂᖓᓂ ᐸᑏᑎᓂᒃ ᐱᓚᐅᕐᓂᕋᖅᖢᑎᒃ ᐊᒻᒪ ᐊᐅᓪᓚᖅᑎᓯᒪᓕᖅᖢᓂᒋᑦ ᔫᑳᓐᒧᑦ, ᓄᓇᑦᓯᐊᕐᒧᑦ, ᐊᒻᒪ ᖃᔅᓯᑲᓪᓚᖕᓄᑦ ᓄᓇᓕᖕᓄᑦ ᓄᓇᕗᒻᒥ, ᓲᕐᓗ ᐊᐅᓱᐃᑦᑐᒧᑦ ᐊᒻᒪ ᐃᒃᐱᐊᕐᔪᖕᒧᑦ. ᕘᔨᑕ ᐅᖃᓚᐅᕐᑐᖅ ᒐᕙᒪᑐᖃᒃᑯᑦ ᓂᕿᑦᑎᐊᕙᓕᕆᓂᕐᒧᑦ ᐅᑭᐅᕐᑕᖅᑐᕐᒥ ᓂᕿᓄᑦ ᐃᑲᔫᑎᓄᑦ ᐱᓕᕆᐊᖓ ᐊᑭᓖᓚᐅᕐᓂᖏᓐᓂᒃ ᐅᓯᔭᐅᔾᔪᑎᖏᓐᓄᑦ.

“ᐊᑭᖃᙱᑦᑐᖅ,” ᐅᖃᓚᐅᖅᐳᖅ ᕘᔨᑕ. “ᕗᕆᐊᑦ ᐱᙳᐊᖅᑎᖏᑦ ᐊᐃᒃᖠᑐᐃᓐᓇᓚᐅᖅᐳᑦ.”

ᒧᐃᔅ ᐊᒻᒪ ᐱᓕᕆᖃᑎᒋᔭᖏᑦ ᑎᒍᓯᓚᐅᕐᑐᑦ ᑐᙵᕕᓕᖕᒥᒃ ᐊᖏᔪᐊᓗᖕᒥᒃ ᐴᒃᓴᓕᖕᒥᒃ ᐸᑏᑎᓂᒃ.

ᑕᐃᒃᑯᐊ ᓂᐅᕕᕐᕕᐅᔪᑦ ᐃᖃᓗᑦᑑᑦᑎᐊᕐᒥ ᐅᖃᖃᑎᒋᔪᓐᓇᓚᐅᖏᑕᕋᓗᐊᕗᑦ ᖃᓄᖅ ᐊᑭᖃᕐᒪᖔᑕ. ᑭᓯᐊᓂ ᐃᖃᓗᓐᓂ ᐊᑭᑭᓐᓂᖅᓴᐅᕌᕐᔪᓲᖑᒻᒪᑕ ᓂᐅᕕᕐᕕᒻᒥ ᓂᐅᕕᐊᔅᓴᖃᖃᑦᑕᓚᐅᕐᒪᑕ $22 ᐅᖓᑖᓂ 10 ᐸᐅᓐᑦᓯᒧᑦ ᐅᖁᒪᐄᓐᓂᖓᓂ ᐴᕐᒧᑦ.

ᒧᐃᔅ ᐅᖃᓚᐅᕐᑐᖅ ᐃᖃᓗᒃᑑᑦᑎᐊᕐᒥᐅᑦ ᐸᑏᑎᑖᖃᑕᐅᑎᓪᓗᒋᑦ, ᐊᖑᑎᓄᑦ ᐊᕐᓇᓄᓪᓗ ᕿᒫᕝᕕᖕᓄᑦ ᖃᐅᔨᑎᑦᑎᓚᐅᕐᑐᖅ ᐱᕈᖅᑐᕕᓃᑦ ᐊᑭᖃᙱᓐᓂᖏᓐᓂᒃ. ᓇᓗᓇᐃᖅᓯᓚᐅᖅᐳᖅ ᐃᓐᓇᒃᑯᕕᒃ ᐸᑏᑎᓂᒃ ᓂᕿᓕᐅᕐᕕᒋᓂᐊᖅᑕᒥᓂᒃ ᐊᐃᒃᖠᓚᐅᕐᓂᕋᖅᖢᓂᐅᒃ. ᒧᐃᔅ ᐅᖃᓚᐅᕐᑐᖅ ᐊᑲᐅᙱᓕᐅᕈᑎᖃᓚᐅᙱᓐᓂᕋᖅᖢᓂ ᑐᓂᐅᖅᑲᐃᔭᕆᐊᒃᓴᖅ ᐸᑏᑎᓂᒃ, ᐊᑕᐅᓯᖅ ᐃᓄᒃ ᕙᐃᔅᐳᒃᑯᑦ ᑎᑎᕋᖅᑕᖓᓂ ᐸᑏᑎᑦ ᐊᑐᐃᓐᓇᐅᓂᖏᓐᓂᒃ ᐅᖃᕋᓗᐊᖅᑎᓪᓗᒍ ᑕᑯᓯᒪᓂᕋᖅᖢᓂ ᐋᓐᓂᐊᓕᕈᑕᐅᑐᐃᓐᓇᕆᐊᓕᖕᒥᒃ.

“ᑕᑯᓚᐅᙱᓐᓇᒪ ᐊᑲᐅᙱᓕᐅᕈᑕᐅᔪᓂᒃ ᑐᓂᐅᖅᑲᐃᓂᕐᒧᑦ,” ᒧᐃᔅ ᐅᖃᓚᐅᖅᐳᖅ. “ᖃᐅᔨᓚᐅᖅᐳᖓ ᖃᑕᙳᑎᒋᔭᐅᔪᓂᒃ ᐃᑲᔪᖅᑐᓂᒃ ᐃᓐᓇᐅᓂᖅᓴᓂᒃ ᐊᒻᒪ ᐊᖁᑦᑐᓐᓇᙱᑦᑐᓂᒃ, ᐊᒻᒪ ᐱᖃᓐᓇᕆᔭᓐᓂᒃ ᐃᑲᔪᖅᑐᓂᒃ ᐱᖃᓐᓇᕆᔭᕐᓂᒃ, ᐅᖃᖅᖢᑎᒃ, ‘ᐸᑏᑎᓂᒃ ᐊᐃᒃᖠᓚᐅᖅᑕ,’ ᐊᒻᒪ ᑕᐃᒪᐃᓕᓚᐅᖅᐳᑦ.”

ᐸᑏᑎᑦ ᐊᐃᔭᐅᔪᓐᓇᖅᐳᑦ ᐃᖃᓗᒃᑑᑦᑎᐊᑉ ᐋᓐᓂᐊᕕᑐᖃᖓᑕ ᑐᓄᐊᓂ, ᐊᒻᒪ ᐊᒥᐊᒃᑯᖃᖅᐸᑕ ᓱᓕ, ᒧᐃᔅ ᐅᖃᓚᐅᖅᐳᖅ ᓄᓇᓕᖕᒥᐅᑦ ᓇᖕᒥᓂᖅ ᐴᒃᓴᒥᓂᒃ ᓇᒃᓴᓪᓗᐊᖅᐳᑦ ᐊᖏᕐᕋᐅᔾᔨᓗᑎᒡᓗ.

“ᐊᓕᐊᓇᐃᒋᑦᑎᐊᖅᑕᕋ ᑭᒃᑯᓕᒫᑦ ᑲᑎᙵᓚᐅᕐᓂᖏᓐᓂᒃ ᓄᓇᖅᑲᑎᒌᒃᖢᑎᒃ ᐃᑲᔪᖃᑦᑕᐅᑎᓪᓗᑎᒃ,” ᒧᐃᔅ ᐅᖃᓚᐅᖅᐳᖅ. “ᐱᕈᖅᓰᔨᓂᑦ, Polaris Pantry Project, Buffalo Airways, ᐃᖃᓗᒃᑑᑦᑎᐊᒥ ᐃᓅᓯᖃᑦᑎᐊᕐᓂᕐᒧᑦ ᐱᓕᕆᕝᕕᒃ, ᐊᒻᒪ ᐱᓗᐊᖅᑐᒥ ᓄᓇᓕᑦᑎᓐᓂ ᑲᑎᙵᓂᐅᔪᓄᑦ ᐊᒻᒪ ᐃᑲᔪᖅᓱᐃᖃᑦᑕᐅᑎᓂᕐᒧᑦ ᐃᑲᔪᕐᓂᕐᒧᑦ ᓂᕿᖃᑦᑎᐊᙱᓐᓂᐅᔪᒧᑦ.”