‘ᐃᑲᔪᖅᓱᐃᓂᕐᔪᐊᖑᔪᒥ ᐱᒋᐊᖅᑕᐅᓂᐅᔪᒥ’ ᐅᑭᐅᖅᑕᖅᑐᒥ ᐅᔾᔨᖅᓱᕐᓂᕐᒥ ᓄᖅᑲᕆᐊᖃᖅᐳᖅ: ᖃᐅᔨᒪᔨᕐᔪᐊᖅ

For the English version of this story, please see Canada needs to stop the ‘partisan slagging’ when it comes to Arctic security.

ᑲᓇᑕᒥ ᐅᖃᓪᓚᖕᓂᐅᔪᒥ ᑲᓇᑕᐅᑉ ᐅᑭᐅᖅᑕᖅᑐᒥ ᐅᔾᔨᖅᓱᕐᓂᐅᔪᒥ ᑕᑖᖅᐳᖅ “ᓱᓕᙱᑦᑎᐊᒻᒪᕆᒃᑐᓂ” “ᑲᙳᓵᕆᓇᓱᐊᖅᑐᒥ ᐋᑐᕚᒥ” ᐃᓕᓯᒃᑲᓐᓂᕐᓂᕐᒥ ᑮᓇᐅᔭᖃᖅᑎᑕᐅᓂᐅᔪᒥ ᐅᑭᐅᖅᑕᖅᑐᒥ ᓴᐳᔾᔨᓯᒪᓂᐅᔪᒥ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ, ᐃᓱᒪᒋᓇᒍ ᐱᑕᖃᙱᓗᐊᕐᓂᖓᓂ ᑲᑉᐱᓵᕆᓂᓪᓚᕆᐅᔪᒥ ᐅᓇᑕᖅᑐᒃᓴᓂ ᐱᒋᐊᖅᓯᓂᖏᓐᓂ ᐊᕕᒃᑐᖅᓯᒪᓂᐅᔪᒧᑦ.

ᐊᑕᐅᓯᐅᓪᓗᓂ ᖃᐅᔨᒪᔨᕐᔪᐊᖑᔪᒥ ᖃᐅᔨᓴᕐᓂᖓᓂ, ᐅᖃᐅᓯᐅᓚᐅᖅᐳᖅ ᐊᐃᑉᕆᓕ 9−ᒥ ᐅᖃᐅᓯᐅᔪᒥ ᐅᖃᓪᓚᖕᓂᐅᔪᒥ ᓄᓇᕗᒻᒥ ᐅᔭᕋᖕᓂᐊᕐᓂᕐᒧᑦ ᑲᑎᒪᓂᕐᔪᐊᖑᔪᒥ ᐃᖃᓗᖕᓂ.

“ᐃᓄᐃᑦ ᐅᖃᕌᖓᒥᒃ ᖃᓄᐃᓕᐅᖅᓯᒪᙱᑦᑐᒍᑦ ᐅᕝᕙᓘᓐᓃᑦ ᐱᓕᕆᓯᒪᙱᓗᐊᖅᑐᒍᑦ ᐱᔾᔪᑎᖃᖅᑐᒥ ᐅᔾᔨᖅᓱᕐᓂᕐᒥ, ᑭᒃᑯᑦ ᐅᕙᑦᑎᓐᓂ ᐱᒋᐊᖅᓯᒪᕙᑦ?” ᐊᐱᕆᓚᐅᖅᐳᖅ ᑐᕋᓐᑦ ᓯᓚᑦᑐᖅᓴᕐᕕᒡᔪᐊᒥ ᐃᓕᓴᐃᔨᕐᔪᐊᖅ ᐅᐃᑦᓂ ᓛᑲᓐᐸᐅᐊ, ᖃᐅᔨᒪᔨᕐᔪᐊᖑᖕᒥᔪᒥ ᐅᑭᐅᖅᑕᖅᑐᒥ ᓴᐳᔾᔨᓯᒪᓂᕐᒥ.

ᐅᓇ ᐅᖃᐅᓯᕆᓚᐅᖅᐸᖓ 70−ᐸᓗᖕᓄᑦ ᐃᓚᐅᖃᑕᐅᔪᓄᑦ ᐅᖃᓪᓚᖕᓂᖓᓂ ᐱᔾᔪᑎᖃᖅᑐᒥ “ᐱᓪᓚᕆᙳᕐᓂᕐᒥ ᐃᓱᒪᒋᔭᑦᑎᓐᓂ ᐱᔾᔪᑎᓕᖕᒥ ᐅᑭᐅᖅᑕᖅᑐᒥ ᐅᔾᔨᖅᓱᕐᓂᕐᒥ.”

ᓛᑲᓐᐸᐅᐊ ᑎᑎᕋᖅᓯᒪᕗᖅ ᐊᒻᒪ ᐋᖅᑭᒋᐊᖅᓯᓯᒪᓪᓗᓂ ᐅᓄᕐᓂᖅᓴᐅᔪᓂ 60−ᓂ ᐅᖃᓕᒫᒐᕐᓂ ᑕᐅᑐᒃᑕᑐᐊᖃᑲᐃᓐᓇᖅᑐᒥ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪ ᐅᔾᔨᖅᓱᕐᓂᕐᒥ.

ᓄᓇᕐᔪᐊᒥ ᓱᑲᖓᓂᐅᔪᓂ ᓴᖅᑭᑉᐸᓪᓕᐊᔪᓂ ᐊᒻᒪ ᖃᓱᕙᓪᓕᐊᓂᐅᔪᒥ ᐱᓕᕆᖃᑎᖃᕐᓂᐅᔪᒥ ᑲᓇᑕᒥ ᐊᒻᒪ ᒫᓐᓇᐅᔪᒥ ᔫᓇᐃᑎᑦ ᔅᑕᐃᑦᔅᓂ ᐊᓪᓚᕝᕕᓕᕆᓂᖓᓂ, ᐅᑭᐅᖅᑕᖅᑐᒥ ᐅᔾᔨᖅᓱᕐᓂᕐᒥ ᐊᒻᒪ ᐱᔪᓐᓇᕐᓂᖃᕐᔪᐊᕐᓂᕐᒥ ᖁᑦᑎᓛᖑᖃᑕᐅᓕᖅᖢᓂ ᐃᓱᒪᒋᔭᐅᓂᐅᔪᒥ ᑲᓇᑕᒥᐅᑕᓄᑦ ᐊᒻᒪ ᐋᖅᑭᒃᓱᐃᕗᖅ ᐃᓚᖓᓐᓂ ᑕᒪᒃᑭᓂ ᐱᖓᓱᓂ ᐊᖏᔪᓂ ᒐᕙᒪᑐᖃᒃᑯᑦ ᑲᑎᒪᔨᕐᔪᐊᖑᔪᓂ ᐱᓕᕆᐊᕆᓇᓱᐊᖅᑕᖏᓐᓂ ᐱᓕᕆᕝᕕᖓᓂ ᐊᐃᑉᕆᓕ 28 ᒐᕙᒪᑐᖃᒃᑯᑦ ᓂᕈᐊᕐᓂᕆᔭᖓᓂ.

ᐅᑯᐊ ᐅᖃᓪᓚᖕᓂᐅᔪᑦ ᐅᓂᒃᑳᕆᒐᔪᒃᐳᑦ ᐅᑭᐅᖅᑕᖅᑐᒥ ᐅᔾᔨᖅᓱᕐᓂᕐᒥ ᐊᒻᒪ ᐱᔪᓐᓇᕐᓂᖃᕐᔪᐊᕐᓂᕐᒥ ᐊᑕᐅᓯᐅᓪᓗᓂ ᑭᓲᓂᖓᓂ, ᐱᔭᕆᐊᖃᕋᓗᐊᖅᑎᓪᓗᒋᑦ ᐊᔾᔨᒌᙱᑦᑐᓂ ᑐᕌᒐᕆᔭᐅᔪᓂ, ᓛᑲᓐᐸᐅᐊ ᐅᖃᓚᐅᖅᐳᖅ.

“ᐊᒻᒪ ᓯᕗᓕᖅᑏ, ᐃᓱᒪᕗᖓ ᐅᖃᐅᓯᖃᕐᓂᓐᓂ ᐃᓱᒪᒋᔭᕐᓂᑦ ᐱᔪᓐᓇᕐᓂᖃᕐᔪᐊᕐᓂᐅᔪᒥ ᐃᓕᒃᑯᐊᖓᓂ,” ᓛᑲᓐᐸᐅᐊ ᐅᖃᓚᐅᖅᐳᖅ, ᐅᖃᓪᓚᒃᖢᓂ ᓯᕗᓕᖅᑎ P.J. ᐊᕿᐊᕈᕐᒧᑦ ᖁᙱᐊᖅᑐᓃᓚᐅᖅᑐᒥ.

ᐊᐃᑉᕆᓕ 8, ᐊᕿᐊᕈᖅ ᐅᖃᓚᐅᖅᐳᖅ ᐱᒻᒪᕆᐅᓪᓗᓂ ᐃᓚᒋᔭᐅᓂᖓᓂ ᑲᓇᑕᒥ ᐅᑭᐅᖅᑕᖅᑐᒥ ᐱᔪᓐᓇᕐᓂᖃᕐᔪᐊᕐᓂᐅᔪᒥ ᓴᖅᑭᑎᑦᑎᓂᕐᒥ “ᖃᓄᐃᙱᑦᑎᐊᖅᑐᒥ ᐊᒻᒪ ᓴᙱᔪᒥ” ᓄᓇᕗᒻᒥ ᓄᓇᓕᐅᔪᓂ.

“ᐱᔪᓐᓇᕐᓂᖃᕐᔪᐊᕐᓂᐅᔪᖅ ᐅᓇᑕᖅᑐᒃᓴᓄᑦ ᐊᑲᐅᙱᓕᐅᕈᑕᐅᙱᓚᖅ ᓇᒃᓯᐅᔾᔨᑐᐃᓐᓇᕐᓂᐊᕈᑦᑕ ᐅᓇᑕᖅᑐᒃᓴᑦᑎᓐᓂ ᐋᖅᑭᒃᓯᒪᓂᒐᓚᐅᓗᓂ ᐃᓄᖕᓂ ᐊᐅᓚᖁᑕᐅᓂᖏᓐᓂ ᐅᑭᐅᖅᑕᖅᑐᒧᑦ ᐅᖃᕐᓗᑎᒃ ᑲᓇᑕᒥᐅᑕᐅᓂᖏᓐᓂ,” ᓛᑲᓐᐸᐅᐊ ᐅᖃᓚᐅᖅᐳᖅ.

ᐃᓄᓕᒫᑦ “ᐱᑎᑕᐅᓯᒪᕐᔪᐊᖅᐳᑦ” ᑎᑎᕋᖅᑕᐅᓯᒪᔪᓂ ᐊᒻᒪ ᖃᐅᔨᒪᔨᕐᔪᐊᖑᔪᓂ ᐃᓱᒪᒋᔭᐅᓂᐅᔪᓂ ᐅᑭᐅᖅᑕᖅᑐᒥ “ᐃᓂᐅᔪᒥ ᐊᑭᑦᑐᕋᐅᑎᔭᐅᔪᒥ,” ᐅᖃᓚᐅᖅᐳᖅ.

“ᑕᒪᒃᑭᒐᓚᑦ ᐃᓚᖃᖅᐳᖅ ᓱᓕᓂᒐᓚᐅᔪᒥ. ᑭᓯᐊᓂ ᐊᓯᐊᒍᑦ, ᐃᒥᕆᔪᓐᓇᖅᐳᖅ ᓇᖕᒥᓂᖅ ᐃᓱᒪᒋᔭᑦᑎᓐᓂ ᐊᒻᒪ ᐅᕙᑦᑎᓐᓂ ᐅᔭᐅᕆᙱᓪᓗᓂ ᐱᓂᕐᒥ ᓇᓚᐅᑦᑎᐊᖅᑐᓂ ᐃᓱᒪᒋᓂᕆᔭᑦᑎᓐᓂ.”

ᒫᓐᓇᓕᓴᐅᔪᓂ ᑕᖅᑭᐅᔪᓂ, ᐊᒥᓱᓂ ᓛᑲᓐᐸᐅᐊ ᐅᔾᔨᖅᓱᕐᓂᕐᒥ ᖃᐅᔨᒪᔨᕐᔪᐊᖑᖃᑎᖏᓐᓂ ᐅᕙᑦᑎᓐᓂ ᐃᓂᖅᑎᕆᓯᒪᕗᑦ ᑲᓇᑕᐅᑉ ᐅᑭᐅᖅᑕᖅᑐᖓ ᐸᕐᓇᒃᓯᒪᙱᓐᓂᖏᓐᓂ ᓵᙵᓂᕐᒥ ᑲᑉᐱᐊᓇᕈᑕᐅᔪᓂ ᓴᖅᑭᑎᑕᐅᔪᓂ ᓄᓇᕐᔪᐊᒥ ᓱᑲᖓᓂᐅᔪᓄᑦ ᐊᒻᒪ ᓴᐳᔾᔭᐅᓯᒪᓂᖃᙱᓚᖅ.

ᓛᑲᓐᐸᐅᐊ ᑕᐃᓚᐅᖅᐸᖓ ᑲᒪᒋᔭᖃᑦᑎᐊᙱᓐᓂᐅᔪᒥ “ᐃᑲᔪᖅᓱᐃᓂᕐᔪᐊᖑᔪᒥ ᐱᒋᐊᖅᑕᐅᓂᐅᔪᒥ” ᑐᕌᖓᑎᑕᐅᔪᒥ ᒐᕙᒪᑐᖃᒃᑯᓐᓄᑦ.

“ᐅᒃᐱᕈᓱᙱᑦᑎᐊᒻᒪᕆᒡᓗᓯ ᑐᓴᕐᓂᕐᒥ ᐃᒪᐃᑦᑐᒐᓚᖕᓂ,” ᐅᖃᓚᐅᖅᐳᖅ. “ᑲᓇᑕᒥ ᐅᓇᑕᖅᑐᒃᓴᖃᖅᐳᒍᑦ ᐱᑕᖃᕐᓂᖓᓂ ᐊᕕᒃᑐᖅᓯᒪᓂᐅᔪᒥ. ᖃᓄᖅ ᐅᔾᔨᖅᓱᕐᓂᕐᒥ ᑲᑉᐱᐊᓵᕆᔭᐅᓯᒪᕙ ᐅᓇᑕᖅᑐᒃᓴᒥ ᐃᒃᐱᒋᔭᐅᓂᐅᔪᒥ ᑐᓂᓯᔪᓐᓇᙱᓐᓂᑦᑎᓐᓂ ᐅᔾᔨᖅᓱᕐᓂᕐᒥ ᑲᓇᑕᒥᐅᑕᓄᑦ?”

ᓛᑲᓐᐸᐅᐊᒧᑦ, ᐅᑭᐅᖅᑕᖅᑐᖅ ᐃᓂᙳᓚᐅᖅᐳᖅ “ᐱᔪᓐᓇᕐᓂᖃᕐᔪᐊᖅᑐᒥ ᐊᑭᑦᑐᕋᐅᑎᓂᕐᒥ ᖄᖏᐅᔾᔨᓗᐊᕐᓂᖓᓂ.”

ᐊᖏᐸᓗᒃᑐᒥ ᑲᑉᐱᐊᓇᕐᓂᖃᙱᓚᖅ ᐅᑭᐅᖅᑕᖅᑐᒥ ᓄᓇᓕᖕᓄᑦ ᐃᒻᒥᖕᓄᑦ, ᐅᖃᓚᐅᖅᐳᖅ, ᑭᓯᐊᓂ ᐅᓇᑕᖅᑐᒃᓴᒧᑦ ᑲᑉᐱᐊᓵᕆᓂᐅᔪᓂ ᑲᓇᑕᒧᑦ ᐅᔾᔨᖅᓱᕐᓂᕐᒧᑦ ᑎᑭᑦᑐᓐᓇᖅᐳᖅ “ᐅᕘᓇ” ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᖓᑎᒍᑦ.

ᐊᐱᖅᓱᖅᑕᐅᓂᐅᔪᒥ ᓛᑲᓐᐸᐅᐊ ᑕᑯᒃᓴᐅᑎᓂᕆᓚᐅᖅᑕᖓᓂ ᑭᖑᓂᐊᒍᑦ, ᐊᕿᐊᕈᖅ ᐅᖃᓚᐅᙱᓚᖅ ᐊᖏᖃᑎᖃᕐᒪᖔᑦ ᑐᕌᖓᔪᒥ ᑲᑉᐱᐊᓇᕈᑎᖃᕐᓂᖓᓂ ᓄᓇᕗᒻᒥ ᓄᓇᓕᐅᔪᓄᑦ.

“ᓴᐳᔾᔨᓯᒪᓂᖅ ᐃᓗᐊᓃᑉᐳᖅ ᑲᒪᒋᔭᐅᔭᕆᐊᓕᖕᓂ ᒐᕙᒪᑐᖃᒃᑯᓐᓂ. ᐃᓗᐊᓃᙱᑦᑐᖅ ᐱᓕᕆᐊᒃᓴᑦᑎᓐᓂ,” ᐅᖃᓚᐅᖅᐳᖅ.

ᐅᔭᕋᖕᓂᐊᓂᕐᒧᑦ ᑲᑎᒪᕕᒡᔪᐊᕐᓂᐅᔪᒥ ᐃᓱᓕᓚᐅᖅᐳᖅ ᐊᐃᑉᕆᓕ 10−ᒥ ᐊᖅᓴᕐᓃᑦ ᑐᔪᕐᒥᕕᖓᓂ.